Jul

Nekase gruba lafija ja odova so ćerela šaj but te povredini amen. Posebno ako odola lafija phenela neko andi amari porodica ja amaro šukar amal. Šaj but te sikljova ando odova sar te ikljova ko krajo e problemencar ando e Anako primer. Ola stalno povredinđa olake romesi dujto romni (1. Sam. 1:12). Sar i Ana, hem amen šaj te vaćera e Jehovase odova so mučini amen hem sostar daraja. Amare molitve na valjani te oven vaćerde ko savršeno način niti te koristina poetska izrazija. Amen šaj te rova hem te vaćera e Jehovase so mučini amen. Čak hem tegani, o Jehova strpljivo ka šunel amen. Uzo odova so ki molitva ka vaćera lese amare problemija, amen na valjani te bistra o savet ando Filipljanima 4:6, 7. O apostol Pavle posebno istakninđa so ki molitva valjani hem te zahvalina amen e Jehovase. Isi amen but razlogija sose šaj te ova zahvalna olese, na primer odolese so dinđa amen đivdipe, so stvorinđa šukar buća, aso leso verno mangipe, hem so dinđa amen but šuži nada (w20.02 21 ¶3; 22 ¶6).

Sposobnost te vaćera tano dar kova dinđa amenđe o Jehova (Izl. 4:10, 11; Otkr. 4:11). Prekalo poklo Lafi, ov sikavi amen sar odova dar te koristina ko ispravno način. Uvek valjani te ova spremna te vaćera ando Jehova hem ando oleso Kraljevstvo (Mat. 24:14; Rimlj. 10:14). Ked ćeraja ađahar, amen oponašinaja e Isuse. Jekh ando najvažna razlogija sose o Isus alo ki phuv hine te vaćeri e manušenđe o ćaćipe kotar poklo Dad (Jov. 18:37). Ama, na valjani te bistra so sar vaćeraja tano isto ađahar važno. Odolese, đi vaćeraja averenđe ando Jehova, amen mora te mothova „blagost hem hor poštovanje“. Isto ađahar, valjani te la ko obzir sar osetinena pe hem ko so verujinena (1. Petr. 3:15). Tegani, na samo so ka vaćera odole osobaja, nego hem ka sikava la hem možda ka uspina te resa đi olako vilo. O starešine valjani te oven odlučna te den savet jekhe phralese ja jekha phenjaće ked odova tano potrebno. Naravno, on ka birinen pravo vreme ked ka ćeren odova te na bi ovela lenđe neprijatno (w20.03 18-19 ¶2-4).

Aso so šaj te molina amen? E Jehovase šaj te molina amen te del amen „pobuter vera“ (Luka 17:5; Jov. 14:1). Amenđe valjani vera odolese so o Beng ka iskušini sa e Isusese učenikon (Luka 22:31). Sar šaj i vera te pomožini amen? Ked amen ćerđam sa soj tano đi amende te rešina o problemi, i vera ka podstaknini amen te mukha amare problemija ko e Jehovase vasta. Odolese so verujinaja so ov ka rešini amare problemija pošukar nego li amen, ki amari godi hem ko vilo amen isi amen mir (1. Petr. 5:6, 7). I molitva ka pomožini amen te arakha o unutrašnjo mir save god pharipa te oven amen. Jekh phral kova vićini pe Robert, a isi le koro 80 berš hem tano starešina, phenela: „O savet ando Filipskonenđe 4:6, 7 pomožinđa man te ikljovav ko krajo me problemencar. Hine man problemi e parencar. Jekh vreme na služinđum sar starešina.“ So pomožinđa e Robertese te arakhi o unutrašnjo mir? Ov phenela: „Ked god bi počminava te sikirina man, odmah bi molinava man. So pobuter molinđum man ando vilo, osetinđum pobaro mir“ (w19.04 9-10 ¶5-7).

Seksualno te zlostavinen pe o ćhavore tano greh anglo Devel. Ked neko ćerela greh premalo aver manuš, ov grešini hem premalo Jehova. Te dikha jekh primer kotar zakon kova o Devel dinđa e Izraelcenđe. Ko Zakon pisini so okova so ćorđa ja prevarinđa pekle pašutne nane verno e Jehovase (Lev. 6:2-4). Znači, ako neko koj tano deo andi skupština seksualno zlostavini e ćhavore – sova ćerela o ćhavoro više te na osetini pe sigurno – ov ađahar mothovi soj tano neverno e Devlese. Ov anela bari lađ e Jehovase navese. Odolese, o zlostavljanje valjani te osudini pe, sose tano baro greh anglo Devel. Disave člankija ki Stražarsko kula hem Probudite se! vaćerena odolestar sar okola so hine zlostavime šaj te živinen odola ranaja, sar šaj avera te pomožinen len hem te utešinen len hem sar šaj o roditeljija te zaštitinen pe ćhaven. O starešine dobinena obuka hem detaljna uputstvija kola temeljinena pe ki Biblija odolestar so te ćeren ked neko zlostavini e ćhavoren. I organizacija ćerela but buti ko odova o skupštine te ovel len jasna uputstvija odolestar sar te postupini pe ko asavke situacije (w19.05 9 ¶8-9).

E Devleso Lafi tano sar jekh oštro mač koleja šaj te ćhina ja te phena te haljova e Bengese hovajba (Ef. 6:17). Na primer, e Devleso Lafi mothovi so jekh ando hovajba tano so o mule šaj te vaćeren e đivde manušencar (Ps. 146:4). Isto ađahar, setinćeri amen so samo o Jehova šaj ćaće te đanel so ka ovel ki budućnost (Is. 45:21; 46:10). Ako amen redovno čitinaja e Devleso Lafi hem hor razmislinaja ando odova, tegani ka mrzina o hovajba ko kola o lošna duhovna sile mangena amen te verujina. Odolese, cide tut kotar sa odova so avela ando spiritizam. Sar hrišćanja amen na mangaja te ovel amen ništa odoleja so avela ando spiritizam. Na primer, amen na đaja ko manuša kola šaj te vaćeren e duhoncar, niti mangaja ko bilo kova način te pokušina te vaćera e mulencar. Amen na učestvujinaja ko običaja kola avena ando verovanja so o manuš ked merela nastavini te živini ko aver than. Isto ađahar, amen na mangaja prekali astrologija te đana savi ka ovel amari budućnost. Amen đanaja so asavke buća tane opasna hem ćhivena amen ko direktno kontakt e Bengeja hem e demonencar (w19.04 21-22 ¶8-9).

Okola kola prihvatinđe akale svetosi mudrost asana ked šunena so i Biblija phenela ando moral. On mislinena so odola merilija tane but purane. Asavke manuša šaj pućena pe sose o Devel stvorinđa amen te ovel amen seksualna želje, a palo odova rodela amendar te kontrolišina amen. Odova pućibe mothovi so o manuša isi len pogrešno mišljenje so mora te zadovoljina svako amari želja. Ama, i Biblija na phenela odova. Oj phenela so amen ne mora te zadovoljina svako želja koja isi amen hem so svako amendar šaj te kontrolišini pekle lošna želje (Kol. 3:5). O Jehova ćerđa o brak te šaj te zadovoljina amare normalna seksualna potrebe (1. Kor. 7:8, 9). Odova so i Biblija phenela ando seksualna odnosija tano but averćhane, nego li akale svetosi mudrost. I Biblija sikavi amen sar ispravno te dikha ko polna odnosija hem phravde vaćeri so on anena zadovoljstvo (Posl. 5:18, 19). Ama, isto ađahar i Biblija phenela: „Svako tumendar [valjani] te đanel te savladini poklo telo ki svetost hem ki čast, a na ki nekontrolisimi polno požuda (1. Sol. 4:4, 5; w19.05 22-23 ¶7-9).

O Devel na ka dozvolini o politička sile te uništinen olese narodo. On akharena oleso anav hem šunđe i zapovest te ikljon ando Baro Vavilon (Dela 15:16, 17; Otkr. 18:4). Isto ađahar, on dena sa pestar te pomožinen averenđe te ikljon odothar. Iako e Jehovase sluge ka oven zaštitime ked o Baro Vavilon ka ovel uništimo, olengi vera pana valjani te ovel zorali te šaj te istrajinen ko odova so pana ađićeri len (Jezek. 38:2, 8). Palo odova so o Jehova ka uništini sa o hovavne religije, ka ovel samo jekh religija ki phuv. Samo e Jehovase sluge ka aćhon. Sebepi odova o Beng ka ovel but holjamo. Ov ka mothovi odija holi ađahar so ka koristini „lafija so avena ando demonija“, te ćhivel i koalicija ando narodija te napadini e Devlese slugen (Otkr. 16:13, 14). Odija koalicija vićini pe „Gog andi phuv Magog“. Ked i koalicija ando narodija ka napadini e Devlese narodo, tegani o Armagedon ka počmini (Otkr. 16:16; w19.09 11 ¶12-13).

Ko purano vreme ko Izrael, o Beng prekali hovavni religija ćerđa o nemoral te dićhol sar diso normalno. Hem avdije ćerela isto. I hovavni religija dozvolini hem čak ćerela o nemoral te dićhol sar diso normalno. Odolese, but manuša kola phenena so služinena e Devlese više na ićerena pe ko olese moralna merilija. Ked o apostol Pavle pisinđa lil e hrišćanenđe ko Rim, ov phenđa đi soste sa odova anđa (Rimlj. 1:28-31). Maškaro „buća kola nane pristojna“ tane sa o oblikija ando nemoral, a odothe tani hem i homoseksualnost (Rimlj. 1:24-27, 32; Otkr. 2:20). But tano važno te šuna odova so i Biblija jasno sikavi amen! O manuša kola šunena akale svetosi mudrost, na samo so na ićerena e Jehovase merilija, nego hem protivinena pe olenđe. Akale svetosi mudrost na pomožini amen te barjaćera o osobine ando e Devleso sveto duho, nego „o postupkija ando grešno telo“ (Gal. 5:19-23). Oj ćhivela e manušen te oven ponosna hem odolese o manuša mangena „kokri pes“ (2. Tim. 3:2-4). Asavko stav na pomožini amen te ova ponizna sar so o Devel mangela (2. Sam. 22:28; w19.06 5-6 ¶12-14).

O Ilija služinđa e Jehovase ko but pharo vreme hem hine le but bare problemija. O Jehova phenđa e Ilijase te del jekh deo kotar pikli odgovornost e Jelisejese. Ko asavko način, o Jehova dinđa e Ilijase jekhe šukar amale kova pomožinđa le ked hine le pharipa. Isto ađahar, ked amen poverina amen jekhe amalese, ov šaj te pomožini amen te borina amen amare pharipencar (2. Kralj. 2:2). Ako mislineja so nane tut nikas kase šaj te phene tekle problemija hem sar osetineja tut, molin tut e Jehovase te pomožini tut te arakhe nekas koj tano zrelo hem ko šaj te ohrabrini tut. O Jehova pomožinđa e Ilijase te borini pe pekle pharipencar hem te služini olese but berša. E Ilijaso primer dela amen nada. Nesavo puti sebepi o stres hijam fizički hem emocionalno but umorna. Ama, ako osloninaja amen upro Jehova ov ka del amen snaga koja valjani amenđe te šaj te služina olese (Is. 40:28, 29 w19.06 15 ¶4; 16 ¶9-10).

Ked vaćeraja o šukar haberi kotar e Devleso Kraljevstvo, amen barjaćeraja amari hrabrost već akana. Sose tano odova ađahar? Odolese so, ked propovedinaja amen sikljovaja te ovel amen poverenje ko Jehova hem te na dara e manušendar. Sar so amare mišićija ovena pozorale ked vežbinaja, hem amari hrabrost ka ovel pobari ked amen propovedinaja kotar ćher ko ćher, ko javna thana, neformalno hem ko poslovna thana. Ako akana hijam hrabra te propovedina, ka ova spremna te propovedina hem ked o vlastija ka zabraninen amaro delo (1. Sol. 2:1, 2). But šaj te sikljova kotar amari phen koja hine but hrabro. Iako amari phen i Nensi Juen hine ući samo metar tekvaš, ola našti hine lokho te darave. Oj na manglja te ćhinavi te propovedini i šukar vest kotar e Devleso Kraljevstvo. Odolese, hine ko phanlipe pobuter ando 20 berš ki Kina. O policajcija kola ispitujinđe la phenđe so na dikhlje nikas ki olengi phuv koj tano odobor „zorale šereso“ sar oj (w19.07 5 ¶13-14).

Disave manuša mangena te sikljon o ćaćipe kotar i Biblija, ama disave šaj te dićhon so nane zainteresime. Šaj ka valjani te podstaknine e manušen te mangen te đanen pobuter. Te šaj te ova uspešna ki služba amen valjani šukar te pripremina amen. Birin o teme kola ka oven zanimljiva e manušenđe kas ka rese. Palo odova, razmislin sar te počmine te vaćere olencar. Na primer, šaj te puće e stanare: „Šaj li te pućav tut diso? Sare amen isi amen ista problemija. So tu mislineja, da li valjani amenđe jekh nevi vlast koja ka rešini sa amare problemija?“ Palo odova, šaj te vaćere kotar o Danilo 2:44. Ja šaj te phene e komšijase: „Kova tano najšukar način te sikava amare ćhaven te ponašinen pe šukar? Mangava bi te šunav so tu mislineja odolestar?“ Palo odova, šaj te vaćere kotar Ponovljeni zakoni 6:6, 7. Hem amen osetinaja asavko bahtalipe ked pomožinaja e manušenđe te oven e Hristese učenikija (w19.07 15 ¶4, 6-7).

Jekh phral, ki Istočno Azija, kova but vreme propovedini e manušenđe kola na verujinena ko Devel, phenela: „Ked o manuš akate phenela ’Me na verujinava ko Devel‘, tegani mangela te phenel so na obožavini e devlen kolen but manuša obožavinena. Odolese, složinava man so bute devlen ćerđe o manuša hem so on na postojinena. But putija čitinava Jeremija 16:20 hem palo odova pućava: Sar šaj te đana kova devel tano ćaće, a kole devle ćerđa o manuš? Šukar šunava le hem palo odova čitinava Isaija 41:23: ’Phenen amenđe so ka ovel palo odova, pa ka đana so tumen hijen devela. Ćeren diso, šukar ja lošno, pa sare ka dikha odova‘. Tegani, mothovava jekh primer ando odova so o Jehova phenđa so ka ćerel ki budućnost“. Jekh aver phral phenela: „Mothovava olenđe nekobor primerija odolestar kobor tane o savetija andi Biblija mudra hem sar disave e biblijake proročanstvija ispuninđe pe. A disavo puti vaćerava ando jekh zakon kova vladini ko svemir. Palo odova, mothovava sar sa akava sikavi amen so postojini o Stvoritelj. Ked o manuš prihvatini odija mogućnost so o Devel postojini, tegani počminava te mothovav olese so i Biblija vaćeri ando Jehova“ (w19.07 23-24 ¶14-15).

Odola važna buća tane: te posvetini pe e Jehovaso anav, te ispunini pe olesi namera hem te ovel mir hem jekhipe ki skupština (Mat. 6:9, 10; Jov. 13:35). Ked akala buća tane najvažna ko amaro đivdipe, tegani amen mothovaja so mangaja e Jehova. Isto ađahar, apostol Pavle phenđa so amen valjani te ova „bizi mana“. Akava na značini so amen valjani te ova savršena. Ko e Jehovase jaćha amen ka ova bizi mana, ako daja sa amendar te barjaćera amaro mangipe hem ako đanaja kola tane o najvažna buća ko amaro đivdipe. Jekh način sar mothovaja amaro mangipe tano ked trudinaja amen te na spotaknina averen. O savet te na spotaknina averen tano but ozbiljno. Sar šaj amen te spotaknina nekas? Amari zabava, odova so uravaja hem kuri ćeraja buti šaj te spotaknini averen. Šaj odova so ćeraja nane pogrešno. Ama, ako odoleja so ćeraja povredinaja averesi savest hem ov spotaknini pe, tegani odova tano diso but ozbiljno (Mat. 18:6; w19.08 10 ¶9-11).

Kotar 1935. berš, e Jehovase svedokija verujinena so o baro mnoštvo andi e Jovanesi vizija tano i grupa ando verna hrišćanija kola isi len nada so ka živinen večno ki phuv (Otkr. 7:9, 10). Te šaj te preživini i bari nevolja, o baro mnoštvo valjani te sikljol kotar Jehova hem te služini olese angleder so počmini e Hristesi vladavina. Olengi vera valjani te ovel zorali te šaj te „našen kotar sa akala buća so valjani te oven“ angleder so o Isus ka počmini te vladini (Luka 21:34-36). O baro mnoštvo tano but bahtalo sebepi i nada koja isi le. On haljona so o Jehova odlučini kaj o verna manuša ka služinen, da li ko nebo ja ki phuv. O solduj grupe, hem o pomazanikija hem o baro mnoštvo haljona so on nisar na zaslužinđe i nagrada, već o Jehova mothovđa olenđe poklo bizaslužimo šukaripe prekali e Hristesi otkupno žrtva (Rimlj. 3:24; w19.09 28 ¶10; 29 ¶12-13).

Da li isi tut neve okolnostija? Hem tegani šaj te ove bahtalo. Ma mislin so i promena mothovi so angleder na ćerđan o buća šukar ja so akana na hijan odobor vredno. Razmislin sar o Jehova akana pomožini tut hem nastavin te propovedine. Oponašin o primer ando hrišćanija ko prvo veko. On kuri god „đelje [...] vaćerđe o šukar haberi“ (Dela 8:1, 4). Odova so tu deja sa tutar ki služba šaj te pomožini averenđe. Na primer, o pionirija kola hine paldime kotar jekh phuv, selinđe pe ki aver phuv kuri hine potreba te propovedini pe ki olengi ćhib. Palo nekobor masek, hine baro porast hem ulje grupe ki ćhib koja vaćerena akala pionirija. Amen valjani te ova radosna sebepi amaro šukar odnos e Jehovaja. Odolese, ako mangaja te ovel amen radost valjani te aćhova paše oleja hem te oslonina amen upro leste. Ma te bistre, so o zadatko kova ćerđan angleder mangljan le odolese so dinđan sa tutar te pomožine e manušenđe uduri. Isto ađahar, hem pana ponodri celone tekle vileja ćer ađahar sar so ćerđan hem dikh sar o Jehova akana pomožini tut te mange hem akava zadatko (Prop. 7:10: w19.08 24-25 ¶15-16).

Amen valjani te ova podložna e Jehovase sose ov tano amaro Stvoritelj. Odolese, ov isi le pravo te phenel amenđe so te ćera (Otkr. 4:11). Ama, pana jekh razlog sose te šuna e Jehova tano odova so jedino ov vladini ko najšukar način. But manuša vladinđe upro avera manuša. Ked uporedina olen hem e Jehova, ov tano jedino Vladari kova tano mudro, pherdo mangipaja, milosrdno hem saosećajno (Izl. 34:6; Rimlj. 16:27; 1. Jov. 4:8). Amen hijam podložna e Jehovase ked daja sa amendar te šuna le ko sa hem ked kokri amen na odlučinaja amenđe soj tano šukar, a soj tano lošno (Posl. 3:5). So pobuter sikljovaja ando e Jehovase šukar osobine, polokho tano amenđe te ova lese podložna. Sose? Odolese so olese osobine dićhona ko sa so ćerela (Ps. 145:9). So pobuter sikljovaja e Jehovastar, pobuter mangaja le. Ked amen mangaja le, nane amenđe potrebno but pravilija te šaj te đana so te ćera, a so te na ćera (w19.09 14 ¶1, 3).

O Beng ćhivela e manušenđe pharipa kola našti te akharen. Na primer, ov mangela te verujina so o Jehova na ka oprostini amare grehija hem so na mangela amen. Akava tano baro hovajbe kova but obeshrabrini e manušen (Jov. 8:44). Ked amen avaja koro Isus, amare grehija tane oprostime (Mat. 11:28). Isto ađahar, o Jehova sarinen but mangela (Rimlj. 8:32, 38, 39). O pharipe kova o Isus dinđa amen tano averćhane ando avera pharipa kola valjani te akhara. Na primer, but amendar ked avaja andi buti hijam but umorna hem na hijam bahtale. Ama, ked amaro vreme daja ki služba e Jehovase hem e Hristese, amen osetinaja amen but bahtale. Šaj hijam but umorna hem valjani te terina kokri amen te đa ko sastanak. Ama, but putija ked irinaja amen ćhere, amen isi amen nevi snaga hem zoralipe. Isto odova desini pe ked valjani te đa ki služba ja te ovel amen lično proučibe. Ked amen daja sa amendar te ćera odova, amen osetinaja so isi amen nevi snaga hem zoralipe (w19.09 20 ¶1; 23-24 ¶15-16).

Aćhilo pana hari vreme angleder so ka počmini „e Jehovaso dive“, hem odolese o Jehova očekujini te da sa amendar te propovedina. Mangaja te ova sigurna so daja sa amendar te ćera buti e Jehovase (1. Kor. 15:58). Ked o Isus vaćerđa ando važna buća kola ka oven ko poslednja dive ov prorekninđa hem so amen ka ćera: „Angleder o sa, ko sa o narodija valjani te propovedini pe i šukar vest“ (Mar. 13:4, 8, 10; Mat. 24:14). Razmislin hari: Svako puti ked đaja ki služba, amen pomožinaja te ispunini pe akava proročanstvo andi Biblija. Amaro delo svako berš napredujini sa pobuter. Na primer, razmislin kobor pobuter objaviteljija isi ko poslednja dive. Ko 1914. berš hine 5 155 objaviteljija ko 43 phuvja. Avdije isi koro 8,5 milionija objaviteljija ko 240 phuvja. Ama, amari buti pana nane završimi. Amen hem ponodri valjani te propovedina so e Devleso Kraljevstvo jedino šaj te rešini e manušenge problemija (Ps. 145:11-13; w19.10 8 ¶3; 9-10 ¶7-8).

O Jehova koristinđa e Varzelaje te pomožini e kraljese, e Davidese. O David hem o narodo „bokhaljilo, ćhindilo hem trošaljilo“, đi našlje ando e Davideso ćhavo, o Avesalom. Zajedno avere manušencar, o Varzelaj, kova tegani hine phuro, rizikujinđa po đivdipe te šaj te pomožini e Davidese hem okolenđe kola hine oleja. O Varzelaj na mislinđa so o Jehova našti više te koristini le odolese soj tano phuro. U stvari, ov phravde vasteso koristinđa odova so hine le te šaj te pomožini e Devlese slugenđe (2. Sam. 17:27-29). So amen sikljovaja akalestar? Bizi razlika kobor berš isi amen, o Jehova šaj te koristini amen te šaj te pomožini amare phralenđe hem phenjenđe, kola nane len odova so valjani olenđe, bilo te živinen uzo amende ja ki aver phuv (Posl. 3:27, 28; 19:17). Iako šaj našti te pomožina len lično, amen šaj te da prilogija. Odola prilogija šaj te koristinen pe te šaj te pomožini pe amare phralenđe hem phenjenđe, ked hem kuri valjani (2. Kor. 8:14, 15; w19.10 21 ¶6).

Šaj te ovel pharo te vaćera averenđe sar osetinaja amen ako angleder neko uvredinđa amen (Posl. 18:19). Ja šaj mislinaja so nane amen vreme ja snaga te ova paše amala nekasa. Ama, na valjani te mislina so odova našti te ovel. Ako mangaja amare phralja te pomožinen amen ked nakhaja disavo pharipe, amen akana valjani te zorjaćera amaro amalipe olencar. Jekh način sar šaj te ćera odova, tano te vaćera lenđe sostar razmislinaja hem sar osetinaja amen (1. Petr. 1:22). O Isus mothovđa so isi le poverenje ko pe amala ađahar so phravde vaćerđa olencar (Jov. 15:15). Amen šaj te oponašina le ked vaćeraja averenđe ando buća kola ćerena amen te ova bahtale, zabrinime ja razočarime. Odolese, šun pažljivo ked neko vaćeri tuvaja hem tegani šaj ka dikhe so isi tumen but slična razmišljanja, osećanja ja ciljija. Ako tu phravde vaćereja averencar ando tekle razmišljanja hem osećanja, to amalipe olencar verovatno ka ovel pozoralo (Posl. 27:9; w19.11 4 ¶8-9).

Ki bari nevolja, i vest koja propovedinaja izgleda ka menjini pe. Akana, amen propovedinaja o šukar haberi ando e Devleso Kraljevstvo hem ćeraja učenikonen. Ama, ko odova vreme, amen šaj ka propovedina o haberi kova e manušenđe ka ovel sar bari kukudi (Otkr. 16:21). Šaj ka propovedina so e Bengeso sveto pana hari ka ovel uništimo. Sar đala o vreme, amen ka đana kova tačno ka ovel amaro haberi hem sar ka vaćera le e manušenđe. Da li ka koristina ista metode ili ka koristina avera metode? Na đanaja. Sar god ka ovel, izgleda so amen ka ovel amen bari čast te propovedina e Jehovasi poruka andi osuda (Jezek. 2:3-5). Verovatno, sebepi amaro haberi kova ka vaćera, o vladarija ka pokušinen te ćhinaven amen te propovedina. Ama, sar so akana osloninaja amen upro Jehova te pomožini amen ki služba hem tegani ka valjani te oslonina amen upro leste. Šaj te ova uverime so amaro Devel ka del amen bari snaga te šaj te ćera olesi volja (Mih. 3:8; w19.10 16 ¶8-9).

O lafi „durilje“ značini so amen šaj sa pobuter hem pobuter te manga te ovel amen buća kola na valjanena amenđe. Tegani, ko amaro vilo šaj te barjon „but nerazumna hem lošna želje“ (1. Tim. 6:9). Ama, na valjani te bistra so o Beng koristini akala želje protiv amende te šaj te slaboni amari vera. Šaj isi amen odobor pare so šaj te ćina but buća. Da li tano diso pogrešno ako ćinaja o buća kola na valjanena amenđe? Nane. Ama, razmislin ando akala pućiba: Iako šaj te ćina but buća, da li ćaće isi amen vreme hem snaga te sikljova sar te koristina odola buća? Isto ađahar, da li šaj te počmina te manga o materijalna buća kola isi amen? Šaj li odova so mangaja o materijalna buća, te ćerel te ova sar o terno manuš kova odbinđa e Isuseso poziv? (Mar. 10:17-22). Kobor tano pošukar te živina skromno hem te koristina amaro vreme hem amari snaga te ćera e Devlesi volja! (w19.11 17-18 ¶15-16).

O Devel šaj te del amen snaga te ićera amen ki odluka (Fil. 2:13). Molin e Jehova te del tut snaga te ćere odova so odlučinđan. Rode ando Jehova prekalo po sveti duh te del tut snaga koja valjani tuće. Ma ćhinav te moline tut čak hem ako dićhola tuće so o odgovor ko tekle molitve harini. Sar so o Isus phenđa: „Molinen, hem ka del pe tumenđe [o sveti duh]“ (Luka 11:9, 13). Isto ađahar, ćer tuće plan. Te šaj te završine bilo so so počminđan te ćere, valjani te ćere tuće plan. Palo odova, valjani te ićere tut ko toklo plan. Isto ađahar, ked aneja dijekh odluka, ko jekh lil pisin sa so valjani te ćere te šaj te ćere odova so odlučinđan. Ked isi tut diso pharo te ćere, delin odova ko nekobor tikne zadatkija. Svako puti ked ispunineja jekh ando odola tikne zadatkija, tegani šaj te dikhe kobor već ćerđan. O apostol Pavle podstakninđa e hrišćanen ando Korint „svako prvo dive ko kurko“ te ćhiven hari pare ki strana aso prilogija, a na te ađićeren te ćeden o prilogija ked ov ka resel (1. Kor. 16:2). Ked dijekh pharo zadatko delineja ko nekobor potikne zadatkija, tegani na ka osetine so isi tut but pharo zadatko kova našti te ćere (w19.11 29 ¶13-14).

Amen šaj te phena so jekh manuš penđari e Jehova, ako olese tano penđardo sar o Devel vićini pe. Šaj penđarde tane lese disave buća kola ov vaćerđa ja ćerđa. Ama, odova na značini so ov šukar đanela e Jehova. Aso odova valjani amenđe diso pobuter. Najangleder, mora te arakha vreme te sikljova ando Jehova hem olese šukar osobine. Palo odova, amen šaj te haljova sose ov phenđa ja ćerđa diso. Odova ka pomožini amen te haljova da li o Jehova mangela odova sostar razmislinaja hem so ćeraja. Ked haljovaja so o Jehova mangela te ćera, amen odova valjani te ćera. Disave manuša šaj marena amenđe muj odolese so mangaja te služina e Jehovase. Isto ađahar, šaj protivinena pe amenđe ked počminaja te đa ko sastankija. Ama, ako isi amen poverenje upro Jehova, ov niked na ka aćhavi amen. Ađahar ka počmina te ćera ko amaro amalipe e Jehovaja kova ka trajini celo đivdipe. Da li ćaće šaj šukar te penđara e Jehova? Ja, šaj! (w19.12 16-17 ¶3-4).

But putija, e roditeljenđe nane lokho te sikaven pe ćhaven, ama na valjani te bistren so o ćhave tane poklon ando Jehova. Ov uvek ka pomožini e roditeljenđe hem uvek ka šunel olenge molitve. Ov ka odgovorini ko olenge molitve prekali Biblija, prekalo amare publikacije hem prekalo iskustvija hem savetija ando avera iskusna roditeljija ki skupština. Disave phenena so valjani 20 berš te šaj te barjaćere te ćhave, ama kobor god berša te nakhen, o roditeljija uvek ka oven roditeljija. Najšukar so šaj o roditeljija te den pe ćhavenđe tane o mangipe, poklo vreme hem te sikaven len ando e Devleso Lafi. Sebepi soj tane o ćhave različita, svako olendar averćhane ka prihvatini odova sostar sikaveja le. Ama, sar osetinena pe o ćhave kola barjona ki porodica koja služini e Jehovase? But olendar osetinena pe sar amari phen, i Džoana Mej kotar i Azija. Oj phenela: „But hijum zahvalno so me roditeljija šukar vaspitinđe man hem so ano mo vilo ćhivđe o mangipe premalo Jehova. On na dinđe man samo o đivdipe, nego hem pomožinđe man te haljovav sose živinava“ (Posl. 23:24, 25). But amare phralja hem phenja osetinena pe isto ađahar (w19.12 27 ¶21-22).

Na valjani te đa dur te šaj te arakha e phralen hem e phenjen kolenđe valjani uteha. Amen valjani te dikha sar šaj te pomožina averenđe, čak iako daraja. Na primer, šaj daraja sose na đanaja so te phena ja so te ćera te šaj te utešina nekas. Ked mothovaja so ćaće brininaja amen averendar, tegani šaj te utešina averen. Sar o krajo avela sa popaše, ka ovel amen sa pobare problemija hem ka ovel amenđe sa popharo (2. Tim. 3:13). Isto ađahar, sebepi so hijam nesavršena hem grešna manuša, but putija ka ovel potrebno neko te pomožini amen hem te zorjaćeri amen. O apostol Pavle aćhilo verno đi o krajo ando poklo đivdipe, odolese so avera phralja pomožinđe le hem zorjaćerđe le. Ked ćereja ađahar hem tu ka pomožine te phralenđe hem te phenjenđe te služinen verno e Jehovase (1. Sol. 3:2, 3; w20.01 12-13 ¶17-19).

O pomazanikija ceninena o poziv kova dobinđe, on na očekujinena averendar te ponašinen pe olencar ko posebno način (Fil. 2:2, 3). On đanena so ked o Jehova pomazinđa len, ov pe duhoja odova mothovđa samo olenđe, a na averenđe. Odolese, okova soj tano pomazimo đanela so i Biblija phenela so na valjani sig te verujina ked neko phenela so o Devel dinđa le disavi posebno odgovornost. Sebepi so jekh pomazaniko na mangela te ovel diso posebno anglo averenge jaćha, ked upoznajini pe averencar ov na ka phenel soj tano ov pomazanik. Ov na ka hvalini pe odoleja (1. Kor. 4:7, 8). O pomazanikija na rodena avere pomazanikonen te šaj te vaćeren olencar ando poklo pomazanje, niti formirinena disave grupe te šaj zajedno te proučinen i Biblija (Gal. 1:15-17). Ked bi o pomazanikija ćerena diso ađahar, ki skupština bi ovena bare podele. Ko asavko način, bi ćerena protiv o sveti duh, kova pomožini e Devlese narodose te ovel ko mir hem ko jekhipe (Rimlj. 16:17, 18; w20.01 28 ¶6-7).

Ko jekh trenutko, o manuša kase religije ka oven uništime, ka oven but holjame sebepi so e Jehovase svedokonengi religija nane uništimi. On šaj ka mothoven kobor tane holjame, čak hem prekalo internet. O manuša hem olengo vladari o Beng, ka mrzinen amen sose ka postojini samo amari religija. O vladarija na ka ispuninen poklo cilj te uništinen sa o religije kola tane ki phuv. Odolese, amen ka ova lenđe sar karo ani jakh. Ko akava trenutko, o vladarija ka oven o Gog ando Magog. On ka ćeden pe hem ka koristinen pikli moć te napadinen e Jehovase narodo (Jezek. 38:2, 14-16). Amen šaj ka počmina te brinina amen, sebepi so na đanaja so tačno ka ovel. Ama, jekh buti tani sigurno: Amen na valjani te dara ki bari nevolja. O Jehova ka del amen uputstvija sar te preživina (Ps. 34:19; w19.10 16-17 ¶10-11).

Amen na samo so osetinaja i zahvalnost, već amare lafencar hem delijencar mothovaja so hijam zahvalna e Jehovase. Sebepi odova, amen hijam averćhane averendar. Avdije, o manuša na mothovena soj tane zahvalna aso sa so o Devel ćerđa olenđe. Odova mothovi so živinaja „ko poslednja dive“ (2. Tim. 3:1, 2). Niked ma dozvolin te ovel tut asavko stav. O Jehova mangela sa olese sluge te oven amala, sose o ćaćutne hrišćanija penđarena pe palo mangipe (Jov. 13:35). Amen šaj te phena ista lafija kola hem jekh psalmista phenđa: „Kobor tano šukar hem prijatno ked o phralja živinena ko jekhipe!“ (Ps. 133:1). Ked mangaja amare phralen hem e phenjen, amen mothovaja so mangaja e Jehova (1. Jov. 4:20). Kobor tano šukar te ove deo andi porodica ki koja te phralja hem te phenja tane „šukar jekh premalo avereste [hem] samilosna“ (Ef. 4:32; w20.02 9 ¶6-7).

E Anake problemija na nakhlje prekali rat. Oj pana morandilji te živini ko isto ćher e Feninaja. Ki Biblija na pisini so i Fenina meninđa po ponašanje premali Ana. Oj pana morandilji te trpini e Feninake lafija kola posavena la hine sar ćhurik. I Ana više na hine uznemirimi. Ked ki molitva vaćerđa e Jehovase poklo problemi, oj više na brininđa pe. Oj dozvolinđa o Jehova te utešini la hem te del la mir. Palo disavo vreme, o Jehova odgovorinđa ki e Anaki molitva hem oj hine la ćhave (1. Sam. 1:2, 6, 7, 17-20). Amen palem šaj te ovel amen mir, iako amare problemija pana trajinena. Disave problemija na ka rešinen pe, čak iako istrajinaja ki molitva hem đaja ko sastankija. Ama, ando e Anako primer dikhaja so ništa našti te ćhinavi e Jehova te del amen mir ko vilo. O Jehova niked na ka bistrel amen. Da li akana ja hari kasnije ov ka blagoslovini amen sose hijam lese verna (Jevr. 11:6; w20.02 22 ¶9-10).

O starešine tane odlučna te mothoven e biblijake načelija kola ka pomožinen averenđe te postupinen mudro. Sose tano odobor važno te ova hrabra ked valjani te vaćera? Razmislin ando e Ilijeso primer. O prvosvešteniko o Ilije hine le duj ćhave kas but manglja. Ama, on duj na poštujinđe e Jehova. On služinđe sar sveštenikija ko sveto šatori, a odova hine but bari odgovornost. On duj koristinđe po autoritet ko pogrešno način, mothovđe baro nepoštovanje premalo o žrtve kola dinđe pe e Jehovase hem javno ćerđe blud (1. Sam. 2:12-17, 22). Premalo e Mojsijeso zakon, e Ilijese ćhave valjanđe te oven mudarde, ama olengo dad, o Ilije hine but popustljivo premalo lende ađahar so samo blago ukorinđa len hem dozvolinđa lenđe hem ponodri te služinen ko sveto šatori (Pon. zak. 21:18-21). Sar o Jehova dikhlja upro način sar o Ilije reagujinđa? Ov phenđa e Ilijese: „Sose te ćhavenđe mothoveja pobari čast nego li maje?“ O Jehova palo odova odlučinđa te mudari akale duje lošna ćhaven (1. Sam. 2:29, 34; w20.03 19 ¶4-5).