Vera – i osobina koja pomožini amen te ova zoralje

I VERA dela amen baro zoraljipe. E Bengeso cilj tano te rumini amaro šukar odnos e Jehovaja. Ama, i vera pomožini amen „te [ačhava] sa e Lošnonese strele so thabljona“ (Ef. 6:16). Iako o problemija šaj te oven bare sar planine, ako isi amen vera šaj te istrajina. Odoljese o Isus phendža pe učenikonendže: „Ako tumari vera tani bari sar zrno andi gorušica, ka phenen akalje planinače: ’Cide tut akatar hem ka cidel pe‘“ (Mat. 17:20). Odoljese so i vera čerela amaro odnos e Jehovaja te ovel pozoralo, amen valjani te džana: Soj tani i vera? Sar ki vera utičini ked o čačipe tano amendže ko vilo? Sar šaj amari vera te ovel pozoralji? Kase valjani te verujina? (Rimlj. 4:3).

SOJ TANI I VERA?

I vera nane samo te verujina ko odova sostar i Biblija vačeri, sose hem „o demonja verujinena [so o Devel postojini] hem darana“ (Jak. 2:19). Odoljese, soj tani i vera?

I Biblija phenela so i vera uključini duj buča. Sar prvo, „i vera tani zoralo pouzdanje so ka ovel odova so nadinaja amen“ (Jevr. 11:1a). Ked isi tut vera, tu hijan sigurno so e Jehovase obećanja tane čače hem so ka ispuninen pe. Na primer, o Jehova phendža e Izraelcendže: „Ked bi šaj te raskininen moklo savez e diveja hem moklo savez e račaja, hem te na ovel ni dive ni rat ko vreme, tegani šaj ka raskinini pe hem moklo savez e Davideja, meklje slugaja“ (Jer. 33:20, 21). Da li nekad alo tuče ki godi so tajsa o kham na ka ikljol ja so na ka oven dive hem rat? Tu džaneja so sa odova ovela sebepi o zakonja kola čerena i phuv te irini pe okolo piklji osa hem te džal okolo kham, hem verujineja so odova uvek ka ovel adžahar. Tegani, da li valjani te sumnjina so okova kova čerdža odola zakonja našti te ispunini peklje obećanja? Na! (Is. 55:10, 11; Mat. 5:18).

Sar dujto, i vera tani „dokaz ando odova soj tano čače, iako na dičhola“ (Jevr. 11:1b). Da li čače šaj te verujina ko diso so na dičhola? Zamislin so to čhavo pučela tut: „Sar džanaja so o vazduh postojini?“ Iako niked na dikhljan o vazduh, tu šaj te vačere teklje čhavese kotar sa o buča kola mothovena so o vazduh postojini sar soj tane – o dišiba hem sar phudela i bavlal. Ked o čhavo tano uverimo so odova čače postojini, ov haljola so šaj te verujini ko diso so na dikhela pe. Isto adžahar, i vera temeljini pe ko dokazija (Rimlj. 1:20).

O ČAČIPE NEK OVEL TUČE KO VILO

Odoljese so i vera temeljini pe ko dokazija, o manuš kova mangela te ovel lje vera valjani „šukar te [pendžari] o čačipe“ (1. Tim. 2:4). Ama, na valjani samo but te džana. O apostol Pavle phendža: „Viljeja mothovi pe i vera“ (Rimlj. 10:10). O manuš na valjani samo te verujini ko čačipe, već hem te mangel lje. Tegani ka ovel podstaknimo te mothovi i vera adžahar so ka živini sar so o Devel mangela (Jak. 2:20). O manuš kova na mangela te menini peklje verovanja, a džanela o čačipe ja čerela so ov mangela, mothovi so na cenini o čačipe kotar vilo hem odoljeja fordela o čačipe (2. Petr. 3:3, 4; Jud. 18). Sebepi akava ko purano vreme, iako o manuša dikhlje o čudija, na hine ljen sare vera (Br. 14:11; Jov. 12:37). E Devljeso sveti duh šaj te barjačeri i vera ko vilo okoljengo kola mangena o čačipe (Gal. 5:22; 2. Sol. 2:10, 11).

SAR O DAVID BARJAČERDŽA I ZORALJI VERA

Jekh ando manuša kola hine ljen zoralji vera tano o kralj David (Jevr. 11:32, 33). Ama, na hine ljen sare zoralji vera ki oljesi porodica. Na primer, jekhvar, ked suočindže pe e Golijateja, e Davideso najphureder phral o Elijav, odoljeja so prekorindža hem optužindža e Davide, mothovdža so na hine lje vera (1. Sam. 17:26-28). Niko na bijandžola e veraja niti dobini la ando peklje roditeljija. O David hine lje vera sose hine lje šukar odnos e Devljeja.

Ko 27. psalam, o David mothovi amendže sar šaj te barjačera i zoralji vera (1. stiho). Ov hor razmislindža kotar odova so nakhlja angljeder hem sar tegani o Jehova pomožindža lje (2. hem 3. stiho). But cenindža e Jehovaso sveto šator (4. stiho). Zajedno okoljencar kola alje ko šator, hvalindža e Devlje (6. stiho). Kotar vilo molindža pe e Jehovase (7. hem 8. stiho). O David manglja o Devel te sikavi lje (11. stiho). I vera hine ljese odobor važno so ov phendža: „Ked na bi verujinava [...] so bi ovela mancar!“ (13. stih).

SAR ŠAJ AMARI VERA TE OVEL ZORALJI?

Amen šaj te ovel amen sar e Davidesi vera, ako razmislinaja hem čeraja sar so pisini ko 27. psalam. Te šaj te ovel amen vera, valjani šukar te pendžara o čačipe. Odoljese, so pobuter proučinaja e Devljeso Lafi hem amare publikacije, sa pobuter e Devljeso duho ka barjačeri akija osobina ano amende (Ps. 1:2, 3). Valjani hor te razmislina odoljestar so čitinaja. Ked odova čeraja amari zahvalnost ka ovel sa pobari. Ako hijam zahvalna e Jehovase, odova ka dičhol adžahar so ka hvalina e Jehova ko sastankija hem ka propovedina averendže (Jevr. 10:23-25). I vera šaj te mothova ked molinaja amen hem na predajinaja amen (Luka 18:1-8). Odoljese, „uvek molinen tumen“ hem oven uverime so ov „brinini pe tumendar“ (1. Sol. 5:17; 1. Petr. 5:7). I vera podstaknini amen te čera odova soj tano ispravno, hem ked čeraja odova amari vera ovela pozoralji (Jak. 2:22).

VERUJIN KO ISUS

I rat angljeder te merel, o Isus phendža pe učenikonendže: „Verujinen ko Devel, hem verujinen ki mande“ (Jov. 14:1). Odova značini so na valjani te verujina samo ko Jehova, već hem ko Isus. Sar šaj te mothova i vera ko Isus? Ka dikha trin načinja.

Sar prvo, ma te bistre so i otkupno žrtva tani e Devljeso poklon tuče. O apostol Pavle phendža: „Živinava sebepi i vera ko e Devljeso čhavo, kova manglja man hem dindža po dživdipe maje“ (Gal. 2:20). Ako verujineja so i otkupno žrtva šaj te pomožini tut, so prekali late šaj te dobine o večno dživdipe hem so šaj te oven oprostime teklje grehija, hem so oj tani najbaro dokaz so o Jehova mangela tut, adžahar ka mothove so verujineja ko Isus (Rimlj. 8:32, 38, 39; Ef. 1:7). Odova ka uverini tut so na valjani te krivine kokri tut ja te na misline lošno tutar (2. Sol. 2:16, 17).

Sar dujto, amen šaj te ačhova paše e Jehovaja prekali molitva odoljese so o Isus dindža po dživdipe amendže. Odoljese šaj slobodno te vačera e Jehovaja ki molitva hem ko pravo vreme ov ka mothovi amendže o milosrđe hem o šukaripe kova na zaslužindžam (Jevr. 4:15, 16; 10:19-22). I molitva pomožini amen te ova odlučna te na grešina (Luka 22:40).

Sar trito, šun e Isuse. O apostol Jovan pisindža: „Ko verujini ko Čhavo, isi lje večno dživdipe. Ko na šunela e Čhave, na ka dikhel o dživdipe, nego e Devljesi holji ačhola upro oljeste“ (Jov. 3:36). Zapazin so o Jovan phendža so ako na mothovaja vera, tegani na šunaja. Odoljese, amen verujinaja ko Isus ked šunaja lje. Šunaja lje ked ičeraja o zakon kova ov dindža, a kova uključini sa so sikavdža hem so zapovedindža (Gal. 6:2). Isto adžahar, šunaja lje ked primeninaja sa o smernice kola dela amen prekalo „verno hem o razborito robo“ (Mat. 24:45). O problemija šaj te oven but bare hem šaj ka dara oljendar sar so daraja andi oluja, ama ako šunaja e Isuse, amen ka ova istrajna ko sa (Luka 6:47, 48).

„IZGRADINEN TUMEN KI NAJSVETIJO VERA“

Jekhvar, jekh manuš phendža e Isusese: „Verujinava! Ama pomožin man te ovel man pobari vera!“ (Mar. 9:24). Iako ov hine lje vera, skromno priznajindža so valjani oljese pobari vera. Sar akava manuš hem amen ka ova ko situacije kuri ka valjani amendže pobari vera. Odoljese sare amen šaj akana te čera amari vera te ovel pobari. Sar so dikhljam, amari vera šaj te ovel pobari ako proučinaja e Devljeso Lafi hem hor razmislinaja odoljestar. Adžahar amari zahvalnost ka ovel pobari. Amari vera ka ovel pozoralji ako zajedno amare phraljencar hem phenjencar služinaja e Jehovase, propovedinaja hem istrajinaja ki molitva. Ama, so ka ovel najbari nagrada ako čeraja ko odova amari vera te ovel pozoralji? E Devljeso Lafi phenela: „Izgradinen tumen ki tumari najsvetijo vera [...] te šaj te ačhoven ko e Devljeso mangipe“ (Jud. 20, 21).