Da li sikljiljan sar te ove zadovoljno?

1. So značini te ova zadovoljna hem so odova na značini?

DA LI bi tuće pheneja so hijan zadovoljno manuš? Okova kova tano zadovoljno tano bahtalo, isi le mir hem zahvalno tano aso buća kola isi le. Asavko manuš nane holjamo niti tano ogorčeno sebepi odova so nane le. Ama, odova na značini so na ka ćera ništa hem so na ka napredujina. Na primer, amen sar hrišćanija valjani te da sa amendar te ćera pana pobuter e Jehovase (Rimlj. 12:1; 1. Tim. 3:1). Čak hem ked na dobinđam disavo zaduženje kova ćaće mangljam, amen na ka našala amari radost.

2. So šaj te ovel ako na hijam zadovoljna?

² Ako na hijam zadovoljna odoleja so isi amen, šaj te ana but lošna odluke. Okola so niked nane zadovoljna odoleja so isi len, but putija ćerena prekovremeno te šaj te ćinen o buća kola u stvari na valjanena lenđe. Nažalost, disave hrišćanija čak ćorđe pare ili disave avera buća. On šaj mislinđe: „Me zaslužinava te ovel man akava, dosta više ađićerđum. Me ka lav akava, pa posle ka platinav.“ Ama, na valjani te bistra so o Jehova na mangela o ćoribe hem so odova lađaćeri le (Posl. 30:9). A disave odobor razočarinđe pe so na dobinđe disavo zadatko, so čak ćhinavđe te služinen e Jehovase (Gal. 6:9). Sar šaj jekhe hrišćanese te perel ki godi te ćerel odova? O problemi tano so odija osoba hari pohari počminđa te na ovel zadovoljno odoleja so isi la.

3. So šaj te sikljova ando Filipljanima 4:11, 12?

³ Sare šaj te sikljova te ova zadovoljna odoleja so isi amen. O apostol Pavle pisinđa so sikljilo te ovel „zadovoljno ko save god okolnostija“ te ovel. (Čitin Filipljanima 4:11, 12.) Odola lafija pisinđa đi hine ko phanlipe. Ama, čak hem tegani na našalđa pi radost. Ako tano amenđe pharo te ova zadovoljna, odova so o Pavle pisinđa hem doživinđa šaj but te pomožini amen. Amen na valjani te očekujina te ovel amenđe lokho, ama šaj te sikljova te ova zadovoljna. Sar? Ko akava članko ka dikha so šaj te pomožini amen te ova zadovoljna.

OV ZAHVALNO

4. Sar i zahvalnost pomožini amen te ova zadovoljna? (1. Solunjanima 5:18)

⁴ O manuš kova tano zahvalno verovatno ka ovel zadovoljno odoleja so isi le. (Čitin 1. Solunjanima 5:18.) Na primer, ako ćaće ceninaja o osnovna buća kola isi amen, tegani verovatno na ka razmislina but ando buća kola bi mangaja te oven amen. Ako hijam zahvalna e Jehovase ko odova so akana šaj te ćera lese, amen na ka razmislina but ando odova sose pana na dobinđam o zadatkija kola mangaja. Nane čudo so e Devleso Lafi podstaknini amen uvek te zahvalina amen e Jehovase ki molitva. Asavki zahvalnost ka pomožini amen te ovel amen „e Devleso mir kova tano upreder odova so o manuš šaj te haljol“ (Fil. 4:6, 7).

5. Aso so o Izraelcija šaj hine te oven zahvalna? (Dikh i slika.)

⁵ Akana ka dikha so desinđa pe e Izraelcenđe. But putija, on žalinđe pe e Jehovase so nedostajinđa lenđe i hrana koja hine len ko Egipat (Br. 11:4-6). Ćaće o životi ki pustinja na hine lokho. Ama, so šaj hine te pomožini lenđe te oven zadovoljna? On valjanđe te razmislinen ando odova so o Jehova već ćerđa lenđe. Đi hine ko Egipat, o Jehova anđa o deš nevolje upro Egipćanija kola mučinđe len. Palo odova so hine oslobodime, ando Egipćanija lelje srebro, zlato hem šeja (Izl. 12:35, 36). Ked hine maškar e faraonesi vojska hem o Crveno more, o Jehova ćerđa čudo ađahar so odvojinđa o more. Isto ađahar, đi putujinđe prekali pustinja, ov svako dive dinđa len mana. So tegani hine o problemi? On na hine zadovoljna, na sose na hine len odova so valjanđa lenđe, nego so na hine zahvalna aso odova so već hine len.

6. So šaj te pomožini amen te ova zahvalna?

⁶ So šaj te pomožini amen te ova zahvalna? Sar prvo, valjani svako dive te odvojina vreme te razmislina ando šukar buća kola isi amen. Na primer, šaj ko jekh lil te pisina duj ja trin buća aso kola hijam zahvalna (Tužb. 3:22, 23). Sar dujto, šaj te zahvalina amen averenđe aso odova so ćerena amenđe. Soj tano najvažno, valjani te zahvalina amen e Jehovase svako dive (Ps. 75:1). Sar trito, valjani te birina amalen kola tane zahvalna. Ako amare amala nane zahvalna ja često žalinena pe hem amen šaj te ova sar olende. Ama, ako tane zahvalna hem amen ka ova zahvalna (Pon. zak. 1:26-28; 2. Tim. 3:1, 2, 5). Ako rodaja prilike te mothova amari zahvalnost, tegani verovatno na ka ova nezadovoljna.

7. So pomožinđa jekha phenjaće te ovel zadovoljno?

⁷ Te dikha o primer andi amari phen i Ači koja živini ki Indonezija. Oj phenela: „Đi trajinđa i pandemija kotar koronavirus, počminđum te uporedinav me okolnostija hem o okolnostija ko kola hine o phralja hem o phenja. Sebepi odova, više na hijum le zadovoljno odoleja so hine man“ (Gal. 6:4). So pomožinđa la te menini po mišljenje? I Ači pana phenela: „Počminđum te đenav o blagoslovija kola dobinđum svako dive hem te razmislinav ando šukar buća kola isi man sose hijum deo andi Devlesi organizacija. Palo odova, ki molitva zahvalinđum man e Jehovase aso sa odola buća. Odova pomožinđa man palem te ovav zadovoljno odoleja so isi man.“ Ako hem tu na hijan zadovoljno sebepi te okolnostija, da li šaj te ćere odova so amari phen i Ači ćerđa?

OV PONIZNO

8. So ulo e Varuheja?

⁸ E Jeremijaso pisari o Varuh, jekh vreme na hine zadovoljno odoleja ko save okolnostija hine. Ov hine le pharo zadatko. Valjanđa te pomožini e Jeremijase te phenel e nezahvalno Izraelcenđe so ka ovel odolese so na šunđe e Jehova. Ama, umesto te usredsredini pe ko odova so o Jehova rodinđa olestar, o Varuh počminđa te razmislini ando diso aver. Prekalo Jeremija, o Jehova phenđa lese: „Tu rodeja tuće diso baro. Ma ćer odova!“ (Jer. 45:3-5). Avere lafencar, ov phenđa lese: „Ov zadovoljno ko te okolnostija.“ O Varuh šunđa e Jehova hem aćhilo paše oleja.

9. Premali 1. Korinćanima 4:6, 7, so i poniznost ka pomožini amen te haljova? (Dikh o slike.)

⁹ Podijekh puti neko amendar šaj te mislini so zaslužini te ovel le disavo zadatko ki Jehovasi organizacija. Šaj odova mislini sose tano sposobno, bućarno ja isi le baro iskustvo. Ama, palo disavo vreme šaj neko aver dobinđa odova zadatko. So šaj te pomožini lese te na holjani? Šaj te razmislini odolestar so o Pavle pisinđa ki 1. Korinćanima 4:6, 7. (Čitin.) Svako zadatko ja sposobnost koja isi amen avela ando Jehova. Odova niti zaslužinđam, niti o Jehova dinđa amen sose mislini so hijam pošukar averendar. Sa so isi amen tano sebepi oleso bizaslužimo šukaripe (Rimlj. 12:3, 6; Ef. 2:8, 9).

10. Sar šaj te sikljova te ova ponizna?

¹⁰ Amen šaj te sikljova te ova ponizna ako razmislinaja ando Isuseso primer. Akana ka dikha so ulo ked o Isus thovđa pe apostolenge pre. O apostol Jovan pisinđa: „O Isus đanđa [1] so oleso Dad mukhlja sa ko olese vasta, [2] so alo ando Devel hem [3] so ka irini pe ko Devel“, ama ov ipak „počminđa te thovel pe učenikonenge pre“ (Jov. 13:3-5). O Isus šaj hine te mislini so on valjani te thoven olese pre. Ama, ov niked na mislinđa odova niti mislinđa so valjani te ovel le šužo životi odolese soj tano e Devleso Ćhavo (Luka 9:58). Ov hine ponizno hem zadovoljno odoleja so hine le. Ćaće aćhavđa amenđe but šukar primer (Jov. 13:15).

11. Sar i poniznost pomožinđa e Denisese te ovel zadovoljno?

¹¹ O Denis andi Holandija dela sa pestar te ovel ponizno sar o Isus, ama nane lese uvek lokho. Ov phenela: „Podijekh puti, ked avera dobinena o zadatko kova me mangljum, osetinava so ano mande barjola o ponos hem o nezadovoljstvo. Ked odova ovela, čitinava disave člankija kola vaćerena andi poniznost. Ki aplikacija JW Library^® obeležinđum disave stihija kola vaćerena andi poniznost sose ađahar šaj posigate te arakhav len hem te čitinav len. Isto ađahar, ko mo telefoni huljavđum disave govorija andi poniznost hem često šunava len.a Haljiljum so odova so ćeraja valjani te slavini e Jehova, a na kokri amen. O Jehova svakonese amendar dela diso te ćerel, ama ov ćerela odija buti te ovel uspešno.“ Ako na hijan zadovoljno sose na dobinđan disavo zadatko, tegani de sa tutar te ove poponizno. Odova ka zorjaćeri to amalipe e Jehovaja hem ka pomožini tut te ove zadovoljno (Jak. 4:6, 8).

RAZMISLIN ANDI TI NADA

12. Sar amari nada pomožini amen te ova zadovoljna? (Isaija 65:21-25)

¹² Šaj te ova pana pobuter zadovoljna ako razmislinaja andi amari nada. Ki knjiga Isaija, o Jehova phenela amenđe so haljola amare pharipa hem obećini so ka cidel len. (Čitin Isaija 65:21-25.) Isto ađahar, ov obećini so ka ovel amen šuže ćhera, so ka uživina ki buti koja ka ćera, so ka ovel amen zdravo hem ukusno hrana. Više niked na ka valjani te brinina amen so diso lošno ka ovel amenđe ili amare ćhavenđe (Is. 32:17, 18; Jezek. 34:25). Šaj te ova uverime so o Jehova ka ispunini sa akala šuže obećanja.

13. Kola pharipa šaj isi amen akana hem sar šaj te pomožini amen amari nada?

¹³ Sose tano akana važno te razmislina andi amari nada? Odolese so živinaja ko „poslednja dive“ hem sose sare isi amen bare problemija (2. Tim. 3:1). O Jehova svako dive pomožini amen te istrajina ađahar so dela amen snaga hem vođstvo (Ps. 145:14). Uzo odova, hem amari nada šaj te zorjaćeri amen ked isi amen bare problemija. Na primer, šaj jedva zaradineja aso osnovna buća. Da li odova značini so uvek ka valjani te borine tut te ikljove ko krajo? Na. Odolese so o Jehova obećini so ko raj ka del amen but pobuter ando odova so valjani amenđe (Ps. 9:18; 72:12-14). Šaj akana svako dive dukhala tut diso, hijan depresivno ja isi tut disavo baro nabormipe. Da li uvek ka ovel ađahar? Na. Odolese so o Jehova obećini so ko nevo sveto ka cidel sa o nabormipa hem više na ka ovel meribe (Otkr. 21:3, 4). Amari nada već akana pomožini amen te na ova razočarime ja holjame sebepi odova so desini pe amenđe. Amen šaj te ova bahtale hem te ovel amen mir, čak iako doživinaja disavi nepravda, našalđam nekas kas mangljam ja isi amen disavo aver pharipe. Sose šaj te phena odova? Odolese so bizo obzir kobor tane bare amare pharipa, on tane privremena. Pana hari, o Jehova zauvek ka cidel len (2. Kor. 4:17, 18).

14. Sar šaj te zorjaćera amari nada?

¹⁴ Odolese so amari nada šaj te pomožini amen te ova zadovoljna, amen valjani te zorjaćera la. Sar šaj te ćera odova? Sar so jekh manuš ćhivela pese naočare te šaj te dikhel odova soj tano dur hem amen valjani te ćera diso te šaj jasno te dikha so ka ovel ki budućnost. Na primer, ako brininaja amen so nane amen dovoljno pare, šaj te zamislina sar ka izgledini o životi ked na ka valjani amenđe pare hem ked ka ovel amen sa so valjani amenđe. Ako razočarinđam amen sose pana na dobinđam disavo zadatko, šaj te razmislina ando odova so odola buća nane važna ked uporedinaja len odoleja savo šužo životi ka ovel amen ked ka ova savršena hem ked ka služina e Jehovase večno (1. Tim. 6:19). Odolese so isi amen but pharipa šaj te ovel amenđe pharo te razmislina ando nevo sveto. Ama, so pobuter razmislinaja odolestar, na ka usredsredina amen odobor ko amare problemija.

15. So sikljovaja andi amari phen i Krista?

¹⁵ Te dikha so pomožinđa e Kristaće koja tani ko brak e Deniseja, kole već pominđam. Oj phenela: „Isi man nabormipe kova ćerela me mišićija te oven slaba. Sebepi odova, našti te phirav hem valjani te koristinav i kolica hem pobuter vreme te ovav ko kreveti. Svako dive isi man bare dukha. Akana sigende mo doktori phenđa maje so na ka ovav pošukar. Ama, ked šunđum odova, odmah alo maje ki godi so ov ki budućnost na dikhela ađahar sar so me dikhava. Me razmislinava andi mi nada hem odolese isi man mir. Avdije, valjani te borinav man me problemencar, ama ko nevo sveto ka uživinav.“

„OKOLENĐE SO DARANA OLESTAR NIŠTA NA FALINI“

16. Sose o David pisinđa so okolenđe so darana ando Jehova ništa na falini?

¹⁶ Čak iako hijam zadovoljna odoleja so isi amen, hem ponodri šaj te oven amen problemija. Razmislin ando kralj David. Olestar mule najhari trin ćhave, hine nepravedno optužimo, olese amala izdajinđe le hem beršencar morandilo te garavi pe ando pe dušmanija. Ama, ov ipak ando Jehova phenđa: „Okolenđe so darana olestar ništa na falini“ (Ps. 34:9, 10). So značinena akala lafija? Amen sar e Jehovase sluge, na očekujinaja te na oven amen problemija ko životi. Ama, đanaja so na ka falini amenđe odova so ćaće valjani amenđe (Ps. 145:16). Sar o David, hem amen hijam sigurna so o Jehova ka pomožini amen te istrajina, bizo obzir ko save okolnostija hijam.

17. Sose mangeja te ove zadovoljno?

¹⁷ O Jehova mangela te ove zadovoljno (Ps. 131:1, 2). Odolese, ćer sa so šaj te sikljove te ove zadovoljno. Ako trudineja tut te ove zahvalno, ponizno hem ako zorjaćereja ti nada hem tu šaj te phene: „Ja, me hijum zadovoljno“ (Ps. 16:5, 6).