O Jehova vaćeri e Samuileja

O prvosveštenik, o Ilije, hine le duj ćhave kola služinđe ko sveto šatori sar sveštenikija. Olenge anava hine Ofnije hem Fines. On na šunđe e Jehovase zapovestija hem but lošno ponašinđe pe e narodoja. Ked o Izraelcija anđe žrtve e Jehovase, o Ofnije hem o Fines lelje pese o najšukar deo kotar mas. O Ilije šunđa so ćerđe olese ćhave, ama ništa na ćerđa. Da li o Jehova ka mukhel odola buća ađahar te aćhon?

O Samuilo hine but poterno ando Ofnije hem ando Fines, ama na hine sar olende. O Jehova hine but zadovoljno e Samuileja. Jekh rat, đi o Samuilo suća, šunđa sar neko vićini le ko anav. Uštilo, prastandilo ko Ilije hem phenđa lese: „Akate hijum!“ O Ilije phenđa lese: „Me na vićinđum tut. Irin tut te sove.“ O Samuilo irinđa pe te sovel, ama palem šunđa odova glaso. Ked o Samuilo šunđa hem o trito puti isto glaso, o Ilije haljilo so o Jehova vićini le. Tegani, ov vaćerđa e Samuilese ked ka šunel palem odova glaso, te phenel: „Vaćer Jehova. To sluga šunela tut.“

O Samuilo palem irinđa pe te pašljol. Tegani, šunđa sar o glaso vićini: „Samuilo! Samuilo!“ Ov odgovorinđa: „Vaćer Jehova. To sluga šunela tut.“ O Jehova phenđa lese: „Phen e Ilijese so ka kazninav ole hem olese porodica. Ov đanela so olese ćhave ćerena lošna buća ko mo šatori, ama ništa na ćerela.“ Sabale, o Samuilo phravđa o udar ando šatori, sar so uvek ćerđa odova. Ov darandilo te phenel e prvosveštenikose odova so vaćerđa lese o Jehova. Ama, o Ilije vićinđa le hem pućlja le: „Mo ćhavo, so phenđa tuće o Jehova? Phen maje sa.“ Tegani o Samuilo vaćerđa lese sa so vaćerđa o Jehova.

Đi o Samuilo barjola hine, o Jehova celo vreme hine oleja. Ko celo Izrael sare đanđe so o Jehova birinđa e Samuile te ovel proroko hem sudija.