Ov revno sar o Isus

1. Ko so e Jehovase sluge razlikujinena pe ando manuša kola phenena soj tane hrišćanija?

E JEHOVASE sluge tane but revna ki služba. Ko odova razlikujinena pe ando manuša kola phenena soj tane hrišćanijaa (Tit. 2:14). Ama, podijekh puti šaj ka ovel tuće pharo te đa ki služba. Tegani, šaj ka osetine tut sar jekh starešina kova phenđa: „Podijekh puti, nane man želja te propovedinav.“

2. Sose tano amenđe disavo puti pharo te propovedina?

² Šaj pobuter mangaja ko disave avera načinija te služina e Jehovase nego te đa te propovedina. Sose? Odolese so isi buća kuri odmah dikhaja odova so ćerđam hem osetinaja amen šukar sebepi odova, sar na primer ked pomožinaja ki gradnja, ki disavi prirodno katastrofa ja ked pomožinaja disave phralese ja phenjaće. Ked sarađujinaja amare phralencar isi amen mir, mothovaja mangipe jekh jekhese hem on ceninena odova so ćeraja. Ki aver strana, šaj beršencar propovedinaja ko isto područje, a o manuša na šunena i šukar vest ja čak protivinena pe amenđe. Amen đanaja so sar tano o kraj sa popaše, o manuša na ka mangen te šunen amen (Mat. 10:22). Tegani, so šaj te pomožini amen te aćhova ja te ova pana pobuter revna ki služba?

3. So sikljovaja ando Isuseso poređenje kotar Luka 13:6-9?

³ Amen šaj ando Isuseso primer te sikljova sar te ova revna ki služba. Đi hine ki phuv, ov niked na ćhinavđa te propovedini e manušenđe. Sar nakhlja o vreme, ov ćerđa pana pobuter buća ki služba e Jehovase. (Čitin Luka 13:6-9.) Sar o vinogradari kova trin berš brininđa pe andi smokva, a oj na anđa plod, o Isus trin berš propovedinđa e manušenđe iako but olendar na reagujinđe šukar. Ama, sar so o vinogradari niked na našalđa pi nada so i smokva jekh dive ka bijani, ađahar ni o Isus na vazdinđa pe vasta e manušendar. Ov hem ponodri propovedinđa e Jevrejenđe hem trudinđa pe te resel đi olengo vilo.

4. Kola štar buća šaj te sikljova ando Isus?

⁴ Ko akava članko ka dikha sar o Isus mothovđa so hine revno, pogotovo ko poslednja šov masek ando po životi ki phuv. Amen šaj te aćhova revna ako sikljovaja ando odova so ov phenđa hem ćerđa. Akana ka dikha štar buća kola šaj te sikljova ando Isus: (1) Ov ćerđa e Jehovasi volja, (2) obratinđa pažnja ko biblijake proročanstvija, (3) osloninđa pe upri Jehovasi pomoć hem (4) hine pozitivno hem verujinđa so disave ipak ka šunen.

OV ĆERĐA E JEHOVASI VOLJA

5. Sar o Isus mothovđa soj tani olese e Devlesi volja najvažno ko životi?

⁵ O Isus revno propovedinđa „i šukar vest ando Devleso Kraljevstvo“ odolese so đanđa so o Devel mangela odova te ćerel (Luka 4:43). Olese i služba hine ko prvo than. Čak hem nekobor kurće angleder te merel, „ov đelo kotar dizja hem gava hem sikavđa e manušen“ (Luka 13:22). Isto ađahar, sikavđa sa pobuter učenikonen sar te propovedinen i šukar vest (Luka 10:1).

6. Sar amari služba tani povezimi avere bućencar kola ćeraja? (Dikh i slika.)

⁶ Avdije, o Jehova hem o Isus mangena i služba te ovel amenđe diso najvažno ko životi (Mat. 24:14; 28:19, 20). Sa o buća kola ćeraja e Jehovase tane povezime e propovedibaja. Sar? Na primer, amen gradinaja dvorane te šaj o manuša kolenđe propovedinaja te aven othe te služinen e Jehovase. Isto ađahar, odoleja so služinaja ko Betel amen pomožinaja pana pobuter te propovedini pe i šukar vest. Ked isi disavi prirodno katastrofa, amen na samo so bićhalaja amare phralenđe hem phenjenđe humanitarno pomoć, već hem pomožinaja len palem te đan ko sastankija hem ki služba. Ked haljovaja kobor tano važno te propovedina hem so o Jehova mangela najangleder odova te ćera, amen ka ova podstaknime redovno te đa ki služba. O Janoš, jekh starešina andi Mađarska, phenela: „Uvek setinćerava kokri man so nijekh zadatko kova isi amen ki Jehovasi organizacija našti te zamenini i služba. O propovedibe tano amaro najvažno zadatko kova isi amen.“

7. Sose o Jehova mangela hem ponodri te propovedina? (1. Timoteju 2:3, 4)

⁷ Amen šaj te ova pana pobuter revna ako upro manuša dikhaja sar o Jehova. Ov mangela so pobuter manuša te šunen i šukar vest hem te prihvatinen la. (Čitin 1. Timoteju 2:3, 4.) Odolese, ov sikavi amen sar pošukar te propovedina. Na primer, ki brošura Mang e manušen hem ćer učenikonen isi praktična savetija kola pomožinena amen te počmina te vaćera e manušencar, a kasnije hem te proučina olencar. Čak hem ako o manuša avdije na prihvatinena i šukar vest, on ka ovel len pana prilika te ćeren odova angleder te završini pe i bari nevolja. Odova so akana phenaja, šaj ka podstaknini len ki budućnost te prihvatinen o ćaćipe. Ama, odova ka ovel jedino ako amen akana propovedinaja.

OV OBRATINĐA PAŽNJA KO PROROČANSTVIJA

8. Kola proročanstvija pomožinđe e Isusese šukar te koristini o vreme kova hine le?

⁸ O Isus haljilo sar disave proročanstvija ka ispuninen pe. Đanđa so olesi služba ka trajini samo trin tekvaš berš (Dan. 9:26, 27). Isto ađahar, đanđa so hine proreknimo ked hem sar ka merel (Luka 18:31-34). Sebepi so sa odova đanđa, šaj hine šukar te koristini po vreme. Odolese, revno propovedinđa te šaj te završini po zadatko.

9. Sar odova so haljovaja e biblijake proročanstvija podstaknini amen revno te propovedina?

⁹ Ked razmislinaja ando proročanstvija kola akana ispuninena pe hem kola pana hari ka ispuninen pe hem amen mangaja te da sa amendar ki služba. Amen đanaja so pana hari ka avel o krajo. Haljovaja so odova so ovela ko sveto hem odova save tane o manuša tano dokaz so živinaja ko poslednja dive. Isto ađahar, e biblijako proročanstvo phenela so o kralj ando jug hem o kralj ando sever ka borinen pe jekh jekheja ko „vreme ando krajo“. Amen haljovaja so akava odnosini pe ko odova so i angloameričko svetsko sila hem i Rusija hem olake saveznikija borinena pe asi vlast (Dan. 11:40). Haljovaja hem so o stopala ando kip kolestar vaćeri pe ko Danilo 2:43-45 predstavinena i angloameričko svetsko sila. Odova proročanstvo uverini amen so pana hari e Devleso Kraljevstvo ka uništini sa o manušikane vlastija. Sa odola proročanstvija mothovena so o kraj tano but paše hem so nane amen odobor but vreme. Odolese, valjani te da sa amendar revno te propovedina.

10. Ko kola avera načinija e biblijake proročanstvija ohrabrinena amen te vaćera i šukar vest averenđe?

¹⁰ Isto ađahar, amen jedva ađićereja te vaćera averenđe ando biblijake proročanstvija. I Keri, andi Dominikansko Republika, phenela: „Ked razmislinava ando šukar buća kola o Jehova obećinđa so ka ćerel, me haljovava so odova valjani te vaćerav hem averenđe. Isto ađahar, ked dikhava kola pharipa isi len o manuša avdije, haljovava so odola obećanja nane pisime samo maje, već hem olenđe.“ E biblijake proročanstvija mothovena so o Jehova pomožini amen te ćera amaro zadatko hem odova ohrabrini amen hem ponodri te ćera le. I Lejla, koja živini ki Mađarska, phenela: „O lafija ando Isaija 11:6-9 mothovena so uzi Jehovasi pomoć svako šaj te menini pe. Odova pomožini man te vaćerav i šukar vest e manušenđe aso kola mislinava so šaj na ka mangen te šunen.“ O Kristofer, jekh phral andi Zambija, phenela: „Sar soj tano proreknimo ko Marko 13:10, i šukar vest ćaće propovedini pe ko celo sveto. Odolese mislinava so isi man čast te pomožinav te ispunini pe akava proročanstvo.“ Kova proročanstvo tut podstaknini te vaćere i šukar vest e manušenđe?

OV OSLONINĐA PE UPRI JEHOVASI POMOĆ

11. Sose e Isusese valjanđa e Jehovasi pomoć te šaj te aćhol revno? (Luka 12:49, 53)

¹¹ O Isus osloninđa pe upro Jehova so ka pomožini lese te aćhol revno. Iako hine taktično, ov hine svesno so disave na ka mangen te šunen, čak ka protivinen pe lese. (Čitin Luka 12:49, 53.) Odolese so propovedinđa, o religiozna vođe nekobor putija manglje te mudaren le (Jov. 8:59; 10:31, 39). Ama, ov na ćhinavđa te propovedini sose đanđa so o Jehova tano oleja. Ov phenđa: „Na hijum kokri nego mancar tano o Dad kova bićhalđa man [. . .] Na mukhlja man kokri, sose me uvek ćerava odova so ov mangela“ (Jov. 8:16, 29).

12. Sar o Isus pripreminđa pe učenikonen te propovedinen čak iako ka oven progonime?

¹² O Isus phenđa pe učenikonenđe so šaj uvek te osloninen pe upro Jehova. But putija vaćerđa lenđe so o Jehova ka pomožini lenđe ked ka oven progonime (Mat. 10:18-20; Luka 12:11, 12). Odolese so đanđa so but manuša ka protivinen pe lenđe, ov podstakninđa len te oven oprezna (Mat. 10:16; Luka 10:3). Isto ađahar, phenđa so ako o manuša na mangena te šunen i šukar vest, na valjani zorjeja te ćhiven len te šunen (Luka 10:10, 11). Uzo odova, phenđa lenđe hem te našen ako ka oven progonime (Mat. 10:23). Iako o Isus hine revno hem osloninđa pe upro Jehova, ov uvek cidinđa pe andi opasnost (Jov. 11:53, 54).

13. Sose šaj te ove sigurno so o Jehova hem tuće ka pomožini?

¹³ Avdije, hem amenđe but manuša protivinena pe. Odolese, valjani amenđe e Jehovasi pomoć te šaj te propovedina (Otkr. 12:17). Sose šaj te ove sigurno so o Jehova ka pomožini hem tuće? Sebepi odova so o Isus phenđa ki jekh molitva. Odija molitva tani pisimi ko Jovan 17. poglavlje. O Isus molinđa e Jehova te arakhi olese apostolen hem ov šunđa odija molitva. Ko Dela apostolska pisini sar pomožinđa e apostolenđe revno te propovedinen, iako hine len progonstvo. Isto ađahar, o Isus molinđa e Jehova te arakhi hem okolen kola kasnije ka verujinen ko odova so o apostolija propovedinđe. A maškar olende hijan hem tu. O Jehova hem avdije ćerela odova so o Isus tegani molinđa le. Sar so pomožinđa e apostolenđe ađahar ka pomožini hem tuće (Jov. 17:11, 15, 20).

14. Sar đanaja so amen ka šaj te propovedina iako ka ovel amenđe pharo? (Dikh i slika.)

¹⁴ Sar tano o krajo sa popaše, amenđe šaj ka ovel sa popharo te propovedina. Ama, o Isus uverinđa amen so ka pomožini amen te aćhova revna (Luka 21:12-15). Sar o Isus hem olese učenikija, ni amen na ćhivaja e manušen zorjeja te šunen amen niti raspravinaja amen olencar. Čak hem ko phuvja kuri tano amaro delo ograničimo, amare phralja hem ponodri propovedinena i šukar vest sose osloninena pe upro Jehova, a na upro peste. Sar so o Jehova ko prvo veko dinđa snaga pe slugenđe, hem amenđe avdije dela snaga te šaj te propovedina i šukar vest ađahar sar so ov mangela (2. Tim. 4:17). Šaj te ove sigurno so ako oslonineja tut upro Jehova hem tu ka uspine revno te propovedine i šukar vest.

OV HINE POZITIVNO

15. So mothovi so o Isus hine le pozitivno stav premali služba?

¹⁵ O Isus hine uverimo so ka oven manuša kola ka šunen i šukar vest. Odova pomožinđa lese te ovel radosno hem te nastavini te propovedini. Na primer, ko krajo ando 30. berš ki nevi era, o Isus dikhlja so but manuša tane spremna te šunen i šukar vest hem uporedinđa len e njivaja koja tani zrelo asi žetva (Jov. 4:35). Oko berš dive palo odova, ov phenđa pe učenikonenđe: „I žetva tani bari“ (Mat. 9:37, 38). Kasnije, ov palem phenđa lenđe: „I žetva tani bari [. . .] molinen e Gospodare andi žetva te bićhali radnikonen ki pi žetva“ (Luka 10:2). O Isus niked na našalđa pi nada so o manuša ka šunen i šukar vest hem hine but bahtalo ked disave šunđe (Luka 10:21).

16. Sar e Isusese poređenja pomožinena amen te ovel amen pozitivno stav premali služba? (Luka 13:18-21; dikh i slika.)

¹⁶ O Isus podstakninđa pe učenikonen te aćhon revna ađahar so phenđa lenđe so odova so ka propovedinen ka anel bare rezultatija. Koristinđa duj poređenja te šaj te objasnini lenđe odova. (Čitin Luka 13:18-21.) Ko jekh poređenje, i poruka ando Kraljevstvo uporedinđa jekhe tikne zrnoja andi gorušica kova barilo hem ulo jekh but baro kaš. Odova značinđa so but manuša ka šunen i šukar vest hem so ništa na ka šaj te ćhinavi odova. Ko dujto poređenje, i šukar vest uporedinđa e kvascoja. Sose? Odolese so i šukar vest ka propovedini pe ko celo sveto hem ka pomožini e manušenđe te meninen pe, iako odola promene na ka dićhon odmah. Ađahar o Isus uverinđa pe učenikonen so i šukar vest koja ka propovedinen ka pomožini bute manušenđe.

17. Kola razlogija isi amen hem ponodri te ovel amen pozitivno stav premali služba?

¹⁷ Ked razmislinaja ando odova kobor i šukar vest ko celo sveto pomožini bute manušenđe, odova podstaknini amen hem ponodri te propovedina. Svako berš milionija manuša avena ki Spomen-svečanost, a but olendar počminena hem te proučinen i Biblija amencar. Nekobor hiljade manuša krstinena pe hem pođinena ki služba. Amen na đanaja pana kobor manuša ka prihvatinen i šukar vest, ama đanaja so o Jehova ćedela o baro mnoštvo kova ka preživini i bari nevolja (Otkr. 7:9, 14). Ov tano o Gospodari andi žetva hem sigurno tano so pana but manuša ka prihvatinen i šukar vest, a odova tano šukar razlog hem ponodri te propovedina.

18. So mangaja avera te dikhen koro amende?

¹⁸ E Isusese učenikija uvek hine penđarde premalo odova so revno propovedinđe. Na primer, o apostolija odobor hrabro propovedinđe so o manuša „haljilje so on hine e Isuseja“ (Dela 4:13). Amen isto mangaja hrabro te propovedina i šukar vest hem sebepi odova but manuša šaj hem koro amende te dikhen so hijam revna sar o Isus.