30. ČLANKO PROUČIBASE
ĐILI 97 E Devleso Lafi dela životi
Da li šaj hem ponodri te sikljove ando osnovna biblijake sikljoviba?
Uvek ka podsetinav tumen ko odova, iako već đanena hem utvrdime hijen ko ćaćipe kova prihvatinđen (2. PETR. 1:12)
SO KA SIKLJOVA?
Ka dikha so šaj pana te sikljova ando osnovna biblijake sikljoviba iako beršencar hijam ko ćaćipe.
1. Sar e biblijake sikljoviba utičinđe upro amaro životi ked prvo puti šunđam len?
KED počminđam te sikljova o ćaćipe ando Devleso Lafi odova meninđa amaro životi. Na primer, ked sikljiljam so o Devel vićini pe Jehova, amen počminđam te ova olese amala (Is. 42:8). Ked sikljiljam so ovela e manušencar ked merena, više na pućljam amen da li amare mangle kola mulje patinena (Prop. 9:10). A ked šunđam so o Devel obećinđa so i phuv ka ovel raj, više na brininđam amen so ka ovel amencar ki budućnost. Uverinđam amen so na ka živina samo 70 ja 80 berš, već zauvek (Ps. 37:29; 90:10).
2. Premali 2. Petrova 1:12, 13, sose čak hem o zrela hrišćanija valjani te podsetinen pe ko osnovna biblijake sikljoviba?
2 Niked na valjani te bistra kobor tane važna e biblijake osnovna sikljoviba. Po dujto lil, o apostol Petar pisinđa e hrišćanenđe kola već hine „utvrdime ko ćaćipe“. (Čitin 2. Petrova 1:12, 13.) Ama, ko odova vreme ki skupština pojavinđe pe disave hovavne učiteljija hem lošna manuša kola manglje te ciden disave phralen hem phenjen ando ćaćipe (2. Petr. 2:1-3). O Petar manglja te zorjaćeri e phralen hem te pomožini len te ciden pe ando asavke hovajba. Odolese, podsetinđa len ko disave buća kola on već đanđe. Odola osnovna sikljoviba šaj hine te pomožinen len te aćhon verna e Jehovase đi o krajo.
3. Sose sare valjani hor te razmislina ando osnovna biblijake sikljoviba? Vaćer jekh primer.
3 Iako sar nakhena o berša ovaja sa pozrela, amen pana šaj te sikljova disave neve buća ando osnovna biblijake sikljoviba. Aće jekh primer. Jekh iskusno kuvari hem okova kova sikljola te spremini, šaj koristinena ista sastojkija te ćeren disavo habe. Ama, sar đelo o vreme, o iskusno kuvari sikljilo te koristini odola sastojkija ko jekh nevo hem zanimljivo način. Isto ađahar, okola so beršencar služinena e Jehovase hem okola so akana sigende počminđe te proučinen šaj averćhane te dikhen ko isto biblijako sikljovibe. Šaj nakhlja but vreme sar krstinđam amen hem verovatno amare okolnostija hem zaduženja meninđe pe. Ked akana, ko amare neve okolnostija, primeninaja odova so angleder sikljiljam, amen šaj te sikljova disave neve hem praktična buća. Hajde akana te dikha so o zrela hrišćanija šaj te sikljon ando trin osnovna biblijake sikljoviba.
O JEHOVA TANO STVORITELJ
4. Sar odova so đanaja so o Jehova tano amaro Stvoritelj utičinđa upro amaro životi?
4 Amen đanaja so i phuv hem sa so isi upro late ćerđa jekh moćno hem mudro Stvoritelj. Ki Biblija pisini: „O Devel tano okova kova sa ćerđa“ (Jevr. 3:4). Ama, kotar akava ćaćipe šaj te sikljova nekobor buća. Odolese so o Jehova ćerđa amen, ov najšukar đanela amen. Ov brinini pe amendar hem đanela soj tano najšukar amenđe. Odova so đanaja so o Jehova tano amaro Stvoritelj, meninđa amaro životi hem pomožinđa amen te haljova sose živinaja.
5. So šaj te pomožini amen te ova ponizna? (Isaija 45:9-12)
5 Isto ađahar, odova so đanaja so o Jehova tano amaro Stvoritelj pomožini amen te ova ponizna. Na primer, jekh puti o Jov vaćerđa disave buća ando Jehova kola na hine tačna. Ov bisterđa soj tano ćaće važno hem razmislinđa samo pestar hem odolestar sar te mothovi soj tano u pravu. Ama, o Jehova setinćerđa le soj tano ov o svemoćno Stvoritelj (Jov 38:1-4). Odova pomožinđa e Jovese te haljol so o Jehova uvek ćerela odova soj tano ispravno. O prorok Isaija kasnije pisinđa: „Da li i glina valjani te phenel e Grnčarese: ’So ćereja?‘ “ (Čitin Isaija 45:9-12.)
6. Ked tano posebno važno te razmislina odolestar kobor tano amaro Stvoritelj mudro hem moćno? (Dikh o slike.)
6 Sar ovela amen pobaro iskustvo, šaj te počmina pobuter te oslonina amen upro amaro mišljenje nego upro Jehova hem olese savetija (Jov 37:23, 24). Sar šaj te pomožini amen odova so hor razmislinaja so o Jehova tano amaro Stvoritelj hem odova kobor tano ov mudro hem moćno? (Is. 40:22; 55:8, 9). Odova osnovno sikljovibe ka pomožini amen te ova ponizna hem te haljova kobor olese mislija tane pobare amarendar.
So šaj te pomožini amen te na mislina so amaro mišljenje tano pošukar ando Jehovaso? (Dikh o 6. odlomko)d
7. So pomožinđa e Rahelaće te prihvatini o promene ki organizacija?
7 Amari phen i Rahela koja živini ki Slovenija haljilji so odova so razmislinđa ando Stvoritelj pomožinđa laće te prihvatini disave promene ki organizacija. Oj phenela: „Podijekh puti nane maje lokho te prihvatinav o odluke kola anena okola so predvodinena. Na primer, iako dikhljum o Izveštaj ando Vodeće telo aso 2023. berš broj 8, hine maje but čudno ked prvo puti dikhljum so o phral kova ićeri o govor isi le brada. Odolese, molinđum man e Jehovase te pomožini man te prihvatinav odija promena.“ I Rahela haljilji so o Stvoritelj kova ćerđa o nebo hem i phuv tano savršeno sposobno te vodini pi organizacija ko ispravno pravco. Ako tano hem tuće pharo te prihvatine disave promene ili disave neve smernice, tegani hor razmislin ando odova kobor tano mudro hem moćno amaro Stvoritelj (Rimlj. 11:33-36).
SOSE O DEVEL MUKHELA TE OVEN O PATNJE?
8. Sar pomožinđa amen odova so haljiljam sose o Devel mukhela i patnja?
8 Sose o Devel mukhela o patnje? Disave kola na arakhlje odgovor ko odova pućibe holjanena upro Devel ja mislinena so ov na postojini (Posl. 19:3). Ama, amen sikljiljam so o manuša patinena hem merena sebepi o greh hem i nesavršenost, a na sose o Devel ćerđa diso pogrešno. Isto ađahar, sikljiljam so odolese soj tano o Jehova strpljivo, but manuša isi len prilika te upoznajinen le hem te sikljon ando odova sar ov ka cidel i patnja (2. Petr. 3:9, 15). Odova ćaćipe utešinđa amen hem pomožinđa amen te ova paše oleja.
9. Ko kola situacije šaj te razmislina sose o Jehova mukhela o patnje?
9 Đi ađićeraja o Jehova te ćhinavi o patnje, amen valjani te ova strpljiva. Ama, ked amenđe ja amare manglenđe desini pe disavi nepravda, isi amen disavo pharipe ja merela amendar neko, šaj pućaja amen sose o Jehova na ćhinavi odola buća posigate (Avak. 1:2, 3). So šaj te ćera ko asavke situacije? Šaj te razmislina ando razlogija sose o Jehova mukhela i patnja (Ps. 34:19).a Isto ađahar, šaj te razmislina ando vreme ked o Jehova ka ćhinavi i patnja.
10. So pomožinđa e Enaće palo odova so olaki daj mulji?
10 Odova so đanaja sose o Devel mukhela te patina šaj te pomožini amen te istrajina. I En koja živini ko ostrvo Majot ko Indijsko okeani, phenela: „Ked angleder nekobor berš mulji mi daj, hine maje but pharo. Ama, stalno podsetinđum man so o Jehova nane krivo so amen patinaja. Ov jedva ađićeri te ćhinavi i patnja hem te uskrsnini amare manglen kola mulje. Ked razmislinava ando odova, isi man mir iako mi dukh tani pana bari.“
11. Sar odova so đanaja sose o Jehova mukhela o patnje pomožini amen hem ponodri te propovedina?
11 Odova so đanaja sose o Jehova mukhela o patnje, dela amen snaga hem želja hem ponodri te propovedina. Palo odova so phenđa so o Jehova tano strpljivo sose mangela o manuša te kajinen pe hem te oven spasime, o apostol Petar pisinđa: „Razmislinen odolestar save manuša valjani te oven. Nek tumare delija ovena sveta hem nek premalo lende dićhola so hijen odana e Devlese“ (2. Petr. 3:11). Maškaro delija kola pominena pe ko akava stih tani hem amari služba propovedanja. Sar amaro Dad, o Jehova, amen mangaja e manušen hem mangaja te živinen ko pravedno nevo sveto. Ov strpljivo dela sa e manušenđe prilika te služinen lese. Amenđe tani bari čast te ova olese saradnikija hem te pomožina e manušenđe te sikljon olestar angleder te avel o kraj (1. Kor. 3:9).
AMEN ŽIVINAJA KO „POSLEDNJA DIVE“
12. Sar pomožini amen odova so đanaja so živinaja ko „poslednja dive“?
12 I Biblija phenela save ka oven o manuša ko „poslednja dive“ (2. Tim. 3:1-5). Ked dikhaja sar o manuša avdije ponašinena pe, jasno šaj te dikha sar ispunini pe akava proročanstvo. Sar đala o vreme, on ovena sa pološna hem odova uverini amen soj tano e Devleso Lafi tačno (2. Tim. 3:13-15).
13. Sar pomožini amen e Isuseso poređenje ando Luka 12:15-21?
13 Odova so đanaja so živinaja ko poslednja dive pomožini amen te usredsredina amen ko odova soj tane ćaće važno. Akana ka dikha so šaj odolestar te sikljova ando Isuseso poređenje ko Luka 12:15-21. (Čitin.) Sose aso odova manuš hine phendo soj tano „bigođako“? Na sebepi odova so hine barvalo nego sose na ćhivđa o važna buća ko prvo than. Ov ćedinđa pese barvalipe, a na hine barvalo anglo Devel. Odova so na koristinđa mudro o vreme hine bari greška odolese so na aćhilo le but vreme. O Devel phenđa lese: „Akija rat ka mere.“ So sikljovaja ando akava poređenje? Avdije hem amen živinaja ko poslednja dive hem o krajo tano but paše, na aćhilo amen but vreme. Odolese, šaj te puća amen: „So me ciljija mothovena ando odova soj tano maje najvažno ko životi? Kola ciljija podstakninava me ćhaven te ćhiven pese? Da li koristinava mo vreme, mi snaga hem me materijalna buća te ćedav barvalipe ki phuv ili ko nebo?“
14. Sar so mothovi o primer andi Miki, sose tano mudro te razmislina ando dokazija so živinaja ko poslednja dive?
14 Ked razmislinaja ando odova so živinaja ko poslednja dive, odova pomožini amen te ana šukar odluke ko životi. Amari phen koja vićini pe Miki ćerđa odova. Oj phenela: „Ked završinđum i srednjo škola, hine man bari želja te đav ko fakulteti hem te sikljovav pobuter ando životinje. Ama, hine man hem cilj te služinav sar pioniri hem te đav uduri kaj tani pobari potreba. Disave zrela amala phenđe maje so valjani šukar te razmislinav da li ćaće šaj te đav ko fakulteti hem te ispuninav me ciljija. Phenđe maje so o kraj ando akava sveto tano but paše hem so ko nevo sveto ka ovel man celo večnost kuri šaj te sikljovav but buća ando životinje. Odolese, odlučinđum te završinav jekh kurs kova na lelja mandar but vreme, ama pomožinđa man te arakhav maje buti hem te služinav sar pioniri. Palo disavo vreme, selinđum man ko Ekvador sose uduri hine pobari potreba.“ Akana, i Miki pe romeja služini ki pokrajinsko služba ki odija phuv.
15. Sar šaj o manuša te reagujinen ki šukar vest? Vaćer jekh primer. (Dikh o slike.)
15 Na valjani te obeshrabrina amen ked o manuša na mangena te šunen i šukar vest. O manuša šaj te meninen pe. Te dikha o primer ando Isuseso phral o Jakov. Ov dikhlja sar o Isus barilo, sar ulo Mesija hem sar vaćerđa e manušencar. Ama, ipak ov beršencar na sledinđa e Isuse. Tek palo e Isuseso uskrsenje ulo oleso učeniko hem hine but revno (Jov. 7:5; Gal. 2:9).b Amen na valjani te vazda amare vasta andi amari familija hem ando manuša kola angleder na prihvatinđe i šukar vest. Ma bistri, amen živinaja ko poslednja dive hem odolese i služba tani but važno. Odova so akana vaćeraja lenđe šaj te utičini upro lende kasnije, možda čak palo odova so ka počmini i bari nevolja.c
So šaj te pomožini amen te na vazda amare vasta kotar amari familija? (Dikh o 15. odlomko)e
HEM PONODRI CENINEN O OSNOVNA BIBLIJAKE SIKLJOVIBA
16. Sar šaj te pomožinen amen o osnovna biblijake sikljoviba? (Dikh o okvir „Koristin e biblijake ćaćipa te pomožine averenđe“.)
16 Jekh deo andi amari duhovno hrana tano ćerdo aso manuša kola na đanena but andi Biblija. Na primer, o javna govorija ki dvorana, disave člankija hem videa ko amaro sajt hem o časopisija asi javnost tane ćerde aso manuša kola nane e Jehovase svedokija. Pa ipak, odija duhovno hrana tani šukar hem amenđe. Sose? Odolese so pomožini amenđe te barjaćera amaro mangipe premalo Jehova, te zorjaćera amari vera hem pošukar te sikava e manušen andi Biblija (Ps. 19:7).
17. Ko kola situacije šaj ka razmislina ando biblijake osnovna sikljoviba?
17 Amen sar e Jehovase svedokija but radujinaja amen ked dobinaja disavo nevo objašnjenje. Ama, amen hijam zahvalna hem aso osnovna ćaćipa andi Biblija kola ćerđe amen te ova paše e Jehovaja. Ako nekad dobinaja disavi smernica andi Jehovasi organizacija kolaja na složinaja amen potpuno, tegani valjani te ova ponizna hem te setina amen so amari organizacija vodini o moćno hem o mudro Stvoritelj, o Jehova. Ked amen ja neko kas mangaja isi len disavo pharipe, valjani te ova strpljiva hem te razmislina odolestar sose o Jehova dozvolini te patina. A ked anaja odluke ando odova sar ka koristina amaro vreme hem amare materijalna buća, valjani te setina amen so živinaja ko poslednja dive. O podsetnikija kola dobinaja ando Jehova šaj hem ponodri te zorjaćeren amen, te pomožinen amen te ova mudra hem istrajno te služina lese.
ĐILI 95 I svetlost ovela sa pobari
a Dikh o članko „Zašto će uskoro nestati patnja“, ki Stražarsko kula kotar 15. maj 2007. berš, str. 21-25.
c Dikh o članko „So đanaja ando odova sar o Jehova ka sudini ki budućnost?“, ki Stražarsko kula kotar maj 2024. berš, str. 8-13.
d SO DIKHAJA KO SLIKE: Jekhe starešinaso predlog na prihvatinđa o starešinstvo. Kasnije, đi dikhela o zvezde ko nebo, ov razmislini ando odova kobor tano mudro hem moćno amaro Stvoritelj hem haljola so odova so o Jehova mangela tano but považno ando odova so ov mangela.
e SO DIKHAJA KO SLIKE: Đi proučini, jekh phen razmotrini o dokazija so živinaja ko poslednja dive. Odova podstaknini la te vićini pe phenja hem te svedočini laće.