Sar o Jehova pomožini amen te istrajina?

1. Sose nane amenđe lokho te istrajina hem ko šaj te pomožini amen ko odova? (1. Petrova 5:10)

AMEN živinaja ko but pharo vreme hem nane amenđe lokho te istrajina. Disave tane but naborme ja mulo lendar neko kas but manglje. Avera isi len baro protivljenje kotar pi porodica ja kotar vlastija (Mat. 10:18, 36, 37). Ama, šaj te ova sigurna so, savo god pharipe te ovel amen, o Jehova ka pomožini amen te istrajina. (Čitin 1. Petrova 5:10.)

2. Sose šaj te istrajina?

² Te istrajina značini te aćhova verna e Jehovase hem te služina lese radosno čak hem ked isi amen problemija, iskušenje ili progonstvo hem te nadina amen so ka ovel pošukar. Amen našti te istrajina amare snagaja. Odolese, valjani amenđe pomoć ando Jehova, a ov šaj te del amen „but bari snaga“ (2. Kor. 4:7). Ko akava članko ka dikha prekalo kola štar buća o Jehova pomožini amen te istrajina. Isto ađahar, ka dikha so šaj te ćera te šaj odola buća te pomožinen amen.

I MOLITVA

3. Sose šaj te phena so i molitva tani jekh but šukar poklon?

³ O Jehova dinđa amen nešto but šukar so pomožini amen te istrajina. Iako hijam nesavršena, amen šaj te vaćera oleja prekali molitva (Jevr. 4:16). Razmislin ando akava. E Jehovaja šaj te vaćera ked god mangaja hem ando so god mangaja. Bizo obzir savi ćhib vaćeraja ili kaj nalazinaja amen, čak iako hijam but dur ando avera ili hijam ko phanlipe, ov šaj te šunel amen (Jona 2:1, 2; Dela 16:25, 26). Ako but brininaja amen hem na đanaja so te phena lese, ov hem tegani đanela so mangljam te phena (Rimlj. 8:26, 27). Ćaće, i molitva tani jekh but šukar poklon!

4. Sose šaj te phena soj tano premali Jehovasi volja te molina amen te istrajina?

⁴ Ki Biblija pisini so god te molina amen e Jehovase „a soj tano premali olesi volja, ov šunela amen“ (1. Jov. 5:14). Da li šaj te molina amen e Jehovase te pomožini amen te istrajina? Naravno. Odova tano premali olesi volja. Sar đanaja odova? Ked istrajinaja ko disavo pharipe, o Jehova šaj te odgovorini e Satanase kova marela lese muj (Posl. 27:11). Isto ađahar, ki Biblija pisini so o Jehova jedva ađićeri „te [. . .] mothovi pi snaga hem te [. . .] zaštitini okolen kola tane celone vileja verna olese“ (2. Let. 16:9). Odolese, šaj te ova sigurna so o Jehova isi le hem moć hem želja te pomožini amenđe te istrajina (Is. 30:18; 41:10; Luka 11:13).

5. Sar šaj i molitva te pomožini amen te ovel amen mir? (Isaija 26:3)

⁵ I Biblija phenela so ked molinaja amen ando odova so mučini amen, „e Devleso mir kova tano upreder odova so o manuš šaj te haljol“ ka arakhi amaro vilo hem amari godi (Fil. 4:7). Razmislin so odova značini. O manuša kola na služinena e Jehovase, isi len but problemija hem pokušinena ko razna načinija te smirinen pe. Na primer, disave koristinena disavo oblik andi meditacija te šaj te ciden sa o mislija andi pi godi. Ama, odova tano but opasno sose tegani on na kontrolišinena po razmišljanje hem o demonija šaj te utičinen upro lende. (Uporedin e stihonencar ando Matej 12:43-45.) Uzo odova, o mir kova o Jehova dela amen ked molinaja amen lese, tano but pobaro ando mir kova o manuša osetinena pali asavki meditacija. Ked molinaja amen e Jehovase, amen mothovaja so potpuno uzdajinaja amen upro leste hem ov dela amen „trajno mir“. (Čitin Isaija 26:3.) Jekh način sar o Jehova ćerela odova tano ađahar so pomožini amen te setina amen ko disave utešna stihija. Odola stihija setinćerena amen kobor o Jehova mangela amen hem so mangela te pomožini amenđe (Ps. 62:1, 2).

6. Aso so šaj sa te moline tut? (Dikh i slika.)

⁶ So šaj te ćere? Ako isi tut problemi, „forde to pharipe upro Jehova“ hem rode lestar te del tut mir (Ps. 55:22). Rode lestar mudrost te đane so te ćere (Posl. 2:10, 11). Isto ađahar, ma bistri te zahvaline tut lese (Fil. 4:6). Razmislin ando odova ko save sa načinija o Jehova pomožini tut te istrajine hem zahvalin tut lese aso odova. Ma dozvolin sebepi o problemija te bistre o blagoslovija kola o Jehova već dinđa tut (Ps. 16:5, 6).

E DEVLESO LAFI

7. Sar šaj i Biblija te pomožini amenđe te istrajina?

⁷ O Jehova dinđa amen i Biblija te šaj te pomožini amen te istrajina. Ki Biblija isi amen but utešna stihija kola uverinena amen so o Jehova tano uzo amende. Aće na primer Matej 6:8. Uduri pisini: „Tumaro nebesko Dad đanela so valjani tumenđe hem angleder te zamolinen le aso odova.“ Akala lafija phenđa o Isus, a ov najšukar đanela e Jehova. Odolese, nane amen razlog te sumnjina ko odova so o Jehova ka brinini pe aso amare potrebe ked ka ovel amen problemija. Ki Biblija isi pana but obećanja kola dena amen snaga te istrajina (Ps. 94:19).

8. (a) Sar šaj disavo načelo andi Biblija te pomožini amen te istrajina? Vaćer jekh primer. (b) So šaj te pomožini amen te setina amen ko disavo biblijako načelo?

⁸ E biblijake načelija šaj te pomožinen amen te istrajina. On pomožinena amen te ova mudra te šaj te ana šukar odluke (Posl. 2:6, 7). Na primer, i Biblija podstaknini amen te razmislina ando avdisutno dive hem te na brinina amen odobor ando odova so šaj te anel o tajsato dive (Mat. 6:34). Ako redovno čitinaja i Biblija hem razmislinaja odolestar, polokho ka setina amen ko načelija kola ka pomožinen amen te istrajina.

9. Sar utičini upro amende ked ki Biblija čitinaja ando odova sar o Jehova pomožinđa pe slugenđe?

⁹ Ki Biblija isi amen primerija ando manuša kola mothovđe poverenje upro Jehova (Jevr. 11:32-34; Jak. 5:17). Ked dikhaja sar o Jehova pomožinđa lenđe, amen isi amen pana pobaro poverenje ko odova so o Jehova ka pomožini hem amenđe. Ov tano „amari snaga hem o than kuri garavaja amen ked hijam ko pharipa“ (Ps. 46:1). Ked razmislinaja ando odova sar e Jehovase sluge aćhilje lese verna ko pharipa, hijam podstaknime te oponašina olengi istrajnost (Jak. 5:10, 11).

10. So šaj te ćere te šaj i Biblija pobuter te pomožini tuće?

¹⁰ So šaj te ćere? Čitin i Biblija svako dive hem pisin ko lil disave stihija kola šaj te pomožinen tut. But đene svako sabaj čitinena e diveso stiho hem ađahar šaj te razmislinen ando diso ohrabrujuće celo dive. Odova ćerđa hem amari phen i Marijaa, ked olake solduj roditeljija hine len rak. So pomožinđa laće te istrajini đi brininđa pe olendar angleder te meren? Oj phenela: „Svako sabaj hine čitinava e diveso stiho hem razmislinava odolestar. Odova pomožinđa man svako dive te razmislinav ando Jehova hem ando but šuže buća kola sikavi amen prekalo po Lafi, a na ando me problemija“ (Ps. 61:2).

AMARE PHRALJA HEM PHENJA

11. Sar osetinaja amen ked razmislinaja ando odova sar amare phralja hem phenja istrajinena ko pe problemija?

¹¹ O Jehova dinđa amen phralen hem phenjen ko celo sveto kola pomožinena amen te istrajina. Odova so đanaja so ista patnje doživinena amare phralja, uverini amen so na hijam kokri (1. Petr. 5:9). Odova značini so isi phralja hem phenja kola hine len slična problemija sar amare hem istrajinđe. Odolese, hijam sigurna so hem amen šaj te istrajina (Dela 14:22).

12. Sar šaj amare phralja te pomožinen amenđe, a sar šaj amen olenđe? (2. Korinćanima 1:3, 4)

¹² Đi istrajinaja, amare phralja šaj te pomožinen amen. Slično doživinđa hem o apostol Pavle. Ked hine ko kućno pritvor olese pomožinđe o phralja, ov odova but ceninđa hem čak pominđa len ko pe lila. On ohrabrinđe le, tešinđe le hem pomožinđe le ko disave praktična načinija (Fil. 2:25, 29, 30; Kol. 4:10, 11). Slično šaj te desini pe hem amenđe. Ked amenđe valjani pomoć te istrajina, amare phralja tane odothe te pomožinen amen. Ked olenđe valjani pomoć hem podrška amen hijam odothe olenđe. (Čitin 2. Korinćanima 1:3, 4.)

13. So pomožinđa amara phenjaće e Majaće te istrajini?

¹³ O phralja hem o phenja but ohrabrinđe amara phenja e Maja andi Rusija. Ko 2020. berš, o policajcija ćerđe pretres ko olako ćher. Kasnije, oj valjanđa te ikljol ko sudo odolese so vaćerđa averencar ando pe verovanja. Oj phenela: „Ko odova period hijum le but tužno, umorno hem but darandiljum. Ama, o phralja hem o phenja vićinđe man ko telefoni, pisinđe maje lila hem poruke hem mothovđe maje kobor mangena man. Me uvek đanđum so hijum deo andi jekh but bari porodica, ama kotar 2020. berš pana pobuter uverinđum man ko odova.“

14. Sar ka pomožini amenđe odova so averenđe pomožinaja? (Dikh i slika.)

¹⁴ So šaj te ćere? Đi istrajineja, ov paše te phralencar hem te phenjencar. Ma lađa te rode pomoć ando starešine. On šaj te oven „sar zaklon andi bavlal [hem] sar zaklon andi oluja“ (Is. 32:2). Ma bistri, so hem te phralja hem te phenja trudinena pe te istrajinen ko pe pharipa. Odova so pomožineja nekase kase valjani pomoć, ka pomožini tuće te aćhove pozitivno đi istrajineja ko te problemija (Dela 20:35).

AMARI NADA

15. Sar i nada ki budućnost pomožinđa e Isusese, a sar pomožini amenđe? (Jevrejima 12:2)

¹⁵ O Jehova dinđa amen zorali nada koja pomožini amenđe te istrajina (Rimlj. 15:13). Setin tut sar i nada pomožinđa e Isusese te istrajini ko najpharo dive kova hine le ki phuv. (Čitin Jevrejima 12:2.) O Isus đanđa so ako ka aćhol verno, ka posvetini e Jehovaso anav. Isto ađahar, ov jedva ađićerđa te irini pe ko po Dad ko nebo hem te avel o vreme te vladini zajedno e pomazanikonencar sar Kralj. Ko slično način, amari nada so ka živina večno ko Devleso nevo sveto pomožini amen te istrajina ko pharipa kola isi amen ko Satanaso sveto.

16. Sar i nada pomožinđa jekha phenjaće te istrajini hem so amen sikljovaja olatar?

¹⁶ Te dikha sar i nada pomožinđa jekha phenjaće andi Rusija koja vićini pe Alja. I policija astarđa lake rome hem ćhivđa le ko phanlipe. Uduri hine sa đi na ikljilo ko suđenje. Ked odova desinđa pe, i Alja phenđa: „Često molinava man e Jehovase hem razmislinava andi mi nada. Odova pomožini man te na ovav odobor obeshrabrimi. Đanava so sa akava jekh dive ka nakhel. O Jehova ka pobedini pe dušmanen hem ka nagradini pe slugen.“

17. Sar šaj te mothova so hijam zahvalna asi nada koja o Jehova dinđa amen? (Dikh i slika.)

¹⁷ So šaj te ćere? Odvojin vreme te razmisline andi but šuži budućnost koja o Jehova pana hari ka del amen. Zamislin sar živineja ko nevo sveto hem uživineja ko blagoslovija kola o Jehova obećinđa. O pharipe kova akana isi amen tano „trenutno hem lokho“ ked uporedinaja le odoleja so ka živina večno ko raj (2. Kor. 4:17). Isto ađahar, trudin tut te vaćere averenđe ando Jehovase obećanja. Razmislin sar tano e manušenđe ko sveto. On isto isi len problemija, ama na đanena aso Jehovase obećanja andi budućnost. Odolese, čak hem ako kratko vaćereja olencar, tu šaj te podstaknine len te mangen te đanen diso pobuter ando Jehovaso Kraljevstvo hem olese obećanja.

18. Sose šaj te verujina ko Jehovase obećanja?

¹⁸ Palo odova so istrajinđa ko but iskušenja, o Jov phenđa: „Akana đanava so tu sa šaj te ćere hem so tuće ništa nane nemoguće“ (Jov 42:2). Ov sikljilo so ništa našti te ćhinavi e Jehova te ispunini pe obećanja. Odova šaj hem amenđe te del snaga te istrajina. Aće jekh primer. Zamislin jekha romnja koja tani but nabormi hem beršencar đelji ko doktorija, ama nijekh naštine te saćari la hem sebepi odova tani but obeshrabrimi. Akana arakhlja jekhe šukar hem iskusno doktore kova tačno objasninđa laće savo tano lako nabormipe hem sar šaj te saćari la. Oj tani but bahtali sebepi odova iako ka valjani te ađićeri disavo vreme te ovel pošukar. Akana šaj te istrajini sose isi la nada so ka ovel pošukar. Ko slično način, amen šaj te istrajina sose hijam sigurna so o Jehova ka ispunini pe obećanja asi budućnost.

19. So valjani te ćera te šaj te istrajina?

¹⁹ Sar so dikhljam, o Jehova pomožini amen te istrajina prekali molitva, prekalo po Lafi, prekalo phralja hem phenja hem prekali amari nada. Ako koristinaja sa akala buća, o Jehova ka pomožini amen ko amare pharipa. Amen ka istrajina sa đi na avela o dive ked e Satanaso sveto hem o muke više na ka oven (Fil. 4:13).