Anton Petrus/Moment via Getty Images
AĆHOVEN ĐANGAVDE!
Da li ka ovel o Trito svetsko maribe – so phenela i Biblija?
Ko poslednja 30 berša, but manuša mislinena so o odnosija maškaro disave phuvja ulje pošukar. Ama, o događaja kola ulje akana sigende mothovena so odova nane ađahar.
„O manuša brininena pe so o maribe ki Gaza ka utičini ko avera phuvja, a o Izrael hem o Hezbolah marena pe ki libansko granica“ (6. januar 2024, Rojters).
„O iranska grupe napadinena ko različita thana, a o Iran palem počminđa te ćerel nuklearno oružje. Uzo odova, i Rusija hem i Kina podržinena o Iran. Sa odova tano pretnja aso phuvja ko zapad“ (7. januar 2024,The New York Times).
„I Rusija nastavini te napadini e Ukrajina hem o posledice tane but bare“ (11. januar 2024, UN News).
„I Kina tani sa pobarvali hem isi la sa pobari vojska, ko Tajvan barjola o nacionalno ponos, a o lošna odnosija maškari Kina hem i Amerika but lokho šaj te anen đi o maribe“ (9. januar 2024, The Japan Times).
Da li i Biblija vaćeri diso andi akija situacija koja desini pe ko sveto? Da li ka ovel o Trito svetsko maribe?
I Biblija phenđa so ka oven akala događaja
Nijekh maribe kova avdije isi ko sveto, na pomini pe ki Biblija. Ki aver strana, ki Biblija pisini so sebepi o mariba na ka ovel amen mir ki phuv (Otkrivenje 6:4).
Ki biblijaki knjiga Danilo pisini so „ko vreme ando krajo“ o svetska sile ka borinen pe asi vlast. On trošinena but pare te bi ovela len sa pobari vojska hem pana pobaro naoružanje (Danilo 11:40, 42, 43).
O maribe kova ka ovel
I Biblija mothovi so i situacija ko sveto ka ovel pana pološno. O Isus phenđa so „ka ovel bari nevolja savi na hine kotar početak ando sveto“ (Matej 24:21). I „bari nevolja“ ka legari đi o Armagedon kova tano opisimo sar maribe „kova ka ovel ko baro dive ando Svemoćno Devel“ (Otkrivenje 16:14, 16).
Ama, o Armagedon ka anel spasenje e manušenđe. Ko odova maribe, o Devel ka cidel sa o manušikane vlastija sose on tane odgovorna aso mariba ki phuv. Ako mangeja te đane sar o Armagedon ka anel mir, čitin o člankija: