5. LEKCIJA
Koja tani e Devlesi namera e phuvjaja?
1. Sose o Devel stvorinđa i phuv?
O Jehova dinđa i phuv e manušenđe te ovel olengo ćher. Odolese, o prva manuša, o Adam hem i Eva, na hine stvorime te živinen ko nebo. O Devel već stvorinđa e anđelen te živinen upre (Jov 38:4, 7). Umesto odova, o Devel ljelja e prvone manuše hem ćhivđa le ko jekh but šužo than kova vićinđa pe edensko vrt (Postanak 2:15-17). O Jehova dinđa e Adamese hem olese budućo ćhavenđe mogućnost te živinen večno ki phuv. Čitin Psalam 37:29; 115:16.
Ko početko, samo o edensko vrt hine raj. O prva manuša, o Adam hem i Eva, valjanđe te pheren i phuv pe ćhavencar. Sar đelo o vreme, on valjanđe te brininen pe kotar i celo phuv hem te ćeren la te ovel raj (Postanak 1:28). I phuv niked na ka ovel uništimi. Oj uvek ka ovel than kuri ka živinen o manuša. Čitin Psalam 104:5.
Dikh o kratko film Zašto je Bog stvorio zemlju?
2. Sose i phuv akana nane raj?
O Adam hem i Eva na šunđe e Devle, odolese o Jehova uspudinđa len ando edensko vrt. O raj hine našaldo hem nijekh manuš naštinđa te obnovini le. I Biblija vaćeri so i phuv tani „dindi ko e lošnonenge vasta“ (Jov 9:24). Čitin Postanak 3:23, 24.
Da li o Jehova promeninđa pi namera koja ko početko hine le e manušencar? Na! Ov tano svemoćno hem uvek ka ispunini pi namera (Isaija 45:18). Ov ka ćerel i phuv palem te ovel raj. Čitin Psalam 37:11, 34.
3. Sar o raj ka ovel obnovimo?
O raj ka ovel obnovimo ki phuv, đi o Isus ka vladini sar Kralj, ko e Devleso Kraljevstvo. Ko maribe kova vićini pe Armagedon, o Isus hem e Devlese anđelija ka uništinen sa okolen kola protivinena pe e Devlese. Palo odova, o Isus ka phanel e Benge 1 000 berš. E Devleso narodo ka preživini odova uništenje, odolese so o Isus ka vodini len hem ka štitini len. On ka uživinen ko večno đivdipe ko raj, ki phuv. Čitin Otkrivenje 20:1-3; 21:3, 4.
4. Ked o muke ka ovel len krajo?
Ked o Devel ka ćhinavi o lošnipe ki phuv? O Isus dinđa „znak“ premalo kova ka đana ked o kraj ka ovel paše. O avdisutne uslovija ko sveto ugrozinena e manušengo đivdipe hem mothovena so akana živinaja ko „kraj kotar akava sveto.“ Čitin Matej 24:3, 7-14, 21, 22.
Đi o Isus ka vladini 1 000 berš upri phuv, ov ka cidel sa o muke (Isaija 9:6, 7; 11:9). Uzo odova soj tano Kralj, ov ka služini hem sar Prvosveštenik hem ka kosel sa o grehija ando okola kola mangena e Devle. Ađahar, o Devel prekalo Isus ka cidel o nabormipe, o phuripe hem o meribe. Čitin Isaija 25:8; 33:24.
5. Ko ka živini ko raj ki phuv?
Ki dvorana, ka rese e manušen kola mangena e Devle hem kola mangena te sikljon sar te ugodinen olese
O manuša kola šunena e Devle ka živinen ko raj (1. Jovanova 2:17). O Isus bićhalđa pe učenikonen te roden e krotko manušen hem te sikaven len sar šaj te oven paše e Devleja. Avdije, o Jehova pripremini bute manušen te živinen ko raj ki phuv (Sofonija 2:3). Ko e Jehovase svedokonenge dvorane, o murša sikljovena sar šaj te oven pošukar roma hem dada, a o đuvlja sar šaj te oven pošukar romnja hem daja. O ćhave zajedno pe roditeljencar služinena e Devlese hem sikljona ando Devel hem ando odova sar i šukar vest šaj te pomožini lenđe te ovel len pošukar đivdipe. Čitin Mihej 4:1-4.