LEKTIONA 01
Hoi nai dell i bibla tuke?
Bud putchenn pen, hoske bibacht un merepen della, hoi o djipen un o tsiro glan mende anella, hoske mer djiwah un har te well menge doha djipaske, jaake te well mari familja bachteles. Bud haiwan, kai penell i bibla menge o tchatchepen pral ko pharo un ninna pral ko tikno koowa an maro djipen. Penals tu kowa ninna, kai hi i bibla hakeneske mishto?
1. Pral hawe putchepena penell i bibla menge o tchatchepen?
I bibla penell menge o tchatchepen ap putchepena, har: Har was o djipen kerdo? Hoske djiwah mer? Hoske well bibacht ap mende? Hoi hi pal o merepen? Hoske dell jaake bud kurepen, te kamell hakeno kamlepen? Hoi well dran mari phub? I bibla kamell, te rodas pal o tchatchepen un bud millione hatsan win, kai kola laba an lengro djipen lenge mishto hi.
2. Har krell i bibla, te well maro djipen bachteles?
I bibla penell menge, hoi menge mishto hi. Joi sikrella, har i familja nai wella bachteles. An late hatsah, hoi te kras, te hi men stress. Joi penell menge ninna, har mari budi menge shukar nai wella. Mer te rakrah khetne, haiweh tu, hoi i bibla pral kowa un bud wawar themre penella. Tu haiweh sik, kai “lauter, hoi an o Debleskro lab tchinlo hi”, menge mishto hi (2. Timoteo 3:16).
Kaja publikationa hi gar i bibla. Kaja publikationa kamell, te dikess tu budeder an i bibla dren. Tuke hi mishto, te drawereh kola biblakre verse an haki lektiona. Jaake nai hatseh tu kokres win, hoi i bibla pral kola themre penella.
RODAS DUREDER
Kanna dikeh, kai his i bibla wawarenge mishto, har tuke kowa shukar nai wella, te draweress an i bibla un hoske kowa mishto hi, te kras kowa khetne.
3. I bibla nai sikrell menge o drom
I bibla hi har i sorli momeli an o tamlepen. Te dikah, hoi joi penella, nai krah mer, hoi menge mishto hi un nai djinah, hoi o tsiro anella.
Dikenn pal an Gilja 119:105, un rakrenn khetne pral:
Hoi his i bibla ko morsheske, kai kowa tchinas?
Hoi hi i bibla tuke?
4. I bibla sikrell menge o tchatchepen
I djuwel penell menge, har joi an i bibla o tchatchepen pral kowa hatsas, hoi lat bud bersha ap o dji his. Te dikan o VIDEO, rakrenn khetne pral:
Hoi putchas pes koi djuwel?
Hoi anas lake o Biblakro Kurso?
I bibla kamell, te rodas pal o tchatchepen. Dikenn pal an Mateo 7:7, un rakrenn khetne pral:
Hoi kamals tu te djinell?
5. Te drawereh an i bibla, nai well tuke kowa shukar
Denna bud, kolenge kowa shukar un an lengro djipen mishto hi, te drawerenn le an i bibla. Te dikan o VIDEO, rakrenn khetne pral:
Har hi o drawepen kola ternenge dran o Video?
Hoske hi lenge kowa pash i bibla gar jaake?
I bibla was tchinlo, te las newi soor un te dikas ko latchepen, hoi wella. Dikenn pal an Remarja 15:4, un rakrenn khetne pral:
Kamals tu budeder pral kowa te djinell?
6. Te nai haiwas i bibla, hunte well menge jek koi
Hi mishto, te drawereh an i bibla. Bud haiwan, lenge hi kowa ninna mishto, te hi jek pash lende, te nai rakrenn le pral kowa. Dikenn pal an Bitchepangre 8:26-31, un rakrenn khetne pral:
Har nai haiweh tu i bibla? (Dik ninna pal an i verse 30 un 31)
Har ko morsh dran o them Etiopia i Filipeha khetne his, haiwas lo o tchinlo lab. Bud menshenge hi kowa mishto, te rakrenn le wawarentsa pral i bibla
BUD PENENNA: “I Biblakro Kurso hi mange tchi.”
Penals tu kowa ninna?
HOI KATE PENLO WAS
I bibla hi menge an maro tselo djipen mishto, penell menge o tchatchepen un dell menge newi soor.
Hoi penals tu?
Ap hawe themre hatsah an i bibla laba, hoi menge mishto hi?
Pral hawe putchepena penell i bibla menge o tchatchepen?
Hoi khamals tu te djinell?
BUDEDER
Kate nai drawereh, kai hin i biblakre laba ninna an maro tsiro mishto.
“I laba an i bibla — Goswepen, hoi an hako tsiro atchella” (O Gardeskro Kher Nr. 1 2018)
Kate nai dikeh, kai his i bibla an ko morsheskro djipen mishto. Les his emotionaltike probleme, ninna, har his lo i terno tchawo.
Kate nai drawereh, hawe biblakre laba i familjake mishto hi.
“12 laba, hoi krenn i familja bachteles” (Djangrenna! Nr. 2 2018)
Kate dikeh, kai penell i bibla menge, koon o rai pral i phub hi.