1 Каринфо

3 Важ када, ԥрала, мэ не моӷ тэ дав дума тумэнца сар дэвликунэ манушэнца. Манди прижаласпэ тэ дав дума тумэнца сар кадэла люматирэ манушэнца, сар ԥарнэндирэ бэятонэнца андэ христианско вера. 2 Мэ праваравас тумэн ҭудэса, ай най састэ хамаса, важ кода кай тумэндэ инке на хутилэлас зор тэ прилэн када. Па чачимастэ, тумэндэ и акана нинай зор, 3 важ кода тумэ идоси шонпэ пэ мануша андэ кадэя люма. Тумэ завидуин и скандалин ек еқэса и када сыкавэл, кай тумэ андярэн пэс сар и мануша андэ кадэя люма. 4 Кала ек ԥэнэн: «Мэ лэ Павлоско ученико», ай авэр: «Мэ — лэ Апалососко», хэба тумэ на терэн сар всаворэ авэр мануша?

5 Но ко тоди о Апало́со? Ай ко о Павло? Када лэ Христостирэ помошникоря, савэ динэ тумэнди зор, кай тумэ тэ патян. Вонэ просто стердэ и дила, сави дя лэнди о Баро Хулай. 6 Мэ садисаравас, о Апало́со шолас паи, но вибарярэлас о Дэл. 7 Най кадя важно, ко садий и ко шол паи, важ кода кай вибарярэл о Дэл. 8 Ко садий и ко шол паи — терэн ек дила, но кажнонэс блаӷословина па лэско трудо. 9 Амэ — лэ Дэвлэстирэ амала. Ай тумэ — лэ Дэвлэстири мал, цэр, саво ваздэл о Дэл.

10 О Дэл здиқля пэр мандэ па пэско баро ковло ди, важ када мэ, сар лашо строителё, зашутэм о фундаменто. Акана пэр лэстэ строий авэр. Но кажно трэбуй тэ диқэл, сар во строий. 11 О Дэл стодя лэ Исусос лэ Христос, кай пэр лэстэ тэ строин. Важ када нико не можэт тэ строий пэ варисо авэр. 12 Варикастэ, кай тэ строий пэ кадэва фундаменто, исин сомнак, руп и кучутнэ бара, ай варикастэ — каш, қас и сулум. 13 Но авэла о дес, кала дицола, сар кажно стердя пэстири дила, важ кода кай и яг сыкавэла, драго во строисардя чи най. 14 Если кода, со во строисардя пэ кадэва фундаменто, уприя, тоди лэстэ авэла блаӷословения. 15 Ай если када сԥабола, во бут со хасарэла. Хоть во екжэно на хындёла, када авэла кадя, ԥэнэса во сас вилино анда яг.

16 Хэба на ӷанэн, кай тумэ — лэ Дэвлэстири қандири и тумэндэ исин лэ Дэвлэско зор? 17 Если варико розмарэла лэ Дэвлэстири қандири, лэс умарэла о Дэл. Лэ Дэвлэстири қандири свынто, и кадэя қандири — тумэ.

18 На́ хохавэн корко пэс: если варико гиндой, кай во годявэрно андэ кадэя люма, во трэбуй тэ ашэл дило, кай па чачимастэ тэ ашэл годявэрно. 19 Важ кода кай кадэла люмако годявэрнимос — дилимос важ о Дэл. Пала када пистромэ: «Во астарэл лэ годявэрнэн па лэндири хытро дума». 20 Ай инке пистромэ: «О Иегова* ӷанэн, кай кода, пала со гиндон и годявэрнэ, нисо на ашэл». 21 И нико на трэбуй тэ абурой кодэлэса, со моӷут тэ стерэн и мануша. Важ кода кай вся прижал тумэнди: 22 о Па́вло, о Апало́со, о Ки́фа, и люма, и жызня, и смэрть и кода, со исин и со авэла, — вся када прижал тумэнди. 23 Тумэ прижан лэ Христости, ай о Христос — лэ Дэвлэсти.