1 Каринфо

4 И мануша трэбуй тэ диқэн пар мэндэ сар пэ лэ Христостирэ слуӷоря и помошникоря, савэнди о Дэл росԥэндя и свынти тайны. 2 Ай и помошникоря трэбуй драго тэ терэн пэстири дила. 3 Манди всаек, тумэ лэна тэ розлэнпэ андэ мэрни дила или о миро тидэлапэ важ када. Дажэ мэ на старысавав тэ розлавпэ андэ пэстири дила. 4 Важ кода кай мэ на ӷанав пала пэстэ нисави дош. Но када на доԥэнэн, кай мэ найдошало. Андэ мэрни дила лэла тэ розлэлпэ* о Иегова*. 5 Кочай на́ старыинпэ тэ розлэнпэ андэ варисостэ май данглал, чем трэбуй. Кала авэла о Баро Хулай, ашэла свитло, и во дэла тэ ӷанэн пала дила, сави згаради андэ тэмнота. Кадяжэ во ӷатярэла, со кажнонэстэ андо ди. Тоди о Дэл кажнонэсти ԥэнэна лашо алав па кода, со во затердя.

6 Ԥрала, мэ росԥэндэм тумэнди пала пэстэ и пала Апало́со, кай па амаро примеро тумэ драго тэ полэн ек важно маменто: «Тэ на вижан пала порядко, саво пистромэ». Если тумэ лэна кадя тэ терэн, тумэ на заваздэна о нак и на лэна тэ гиндон, кай ек май лашо аврэстар. 7 Соса ту най кацаво сар авэр? Со тутэ исин, со тути на сас дино? Ай если тути када сас дино, тоди васо ту путёс, ԥэнэса екжэно када затердян?

8 Тумэ гиндон, кай тумэндэ вся исин? Тумэ ужэ розбарваделэ? Хэба тумэ линэ тэ правин сар царёря би амаро? Мэ камлоп, кай тумэ тэ лэн тэ правин сар царёря, тоди и амэ прависардоп тумэнца. 9 Манди здэлпэ, кай о Дэл вистодя амэн, лэ апосталонэн, всаворэнди пэ яқа, ԥэнэса амэ послидни, кас виандярэн пэ смэрть. Важ кода кай амэ сар пэ сцэна андо театро важ и люма, важ и анӷелоря и важ и мануша. 10 Важ авэр амэ дилэ, кай андярас лэ Христостири время, ай па тумарятэ тумэ годявэрнэ, кай андярэн лэ Христостири время. Амэ би зорэстирэ, ай тумэ зоралэ. Пэр тумэндэ стон патив, ай амэн лажаварэн. 11 Амэ идоси боқалэ и камас тэ пас. Амэн марэн, амэндэ нинай ӥда и най кай тэ жувас. 12 Амэ терас ԥари дила пэстирэ вастэнца. Кала пала амэндэ найпативалэс дэн дума, амэндар жал лашо алав. Кала амэн ӷонин, амэ тэрписарас. 13 Кала пар мэндэ андярэн хохавни дума, амэ дас дума ковлэс. И люма идоси диқэл пар мэндэ сар пэ звалка и по гуной.

14 Пистросарав када, най кай тэ лажаварав тумэн, но кай тэ дав тумэнди годи, сар мэрнэ сомнакунэ бэятонэнди. 15 Дажэ если тумэндэ 10 000 учителёря, савэ сытярэн тэ андярэн лэ Христостири время, кодэлэн, ко тумэнди сар дад, най кадя бут. Ай мэ ашэлэм тумэнди сар дад, кала росԥэндэм и лащи новость пала Христос Исусо. 16 Важ када анда ди мангав тумэн: лэн мандар примеро. 17 Акэ васо мэ бишалав каринг тумэндэ лэ Тимафеёс. Во мэрно любимо и кандино шаво андэ лэ Барэ Хуластири время. Во инке еқвар шола сама пэ принцыпоря, па савэ мэ, сар лэ Христоско лэ Исусоско слуӷо, жував и савэнди мэ сытярав андэ всаворэ ӷурторя.

18 Дэсавэ линэ тэ андярэн пэс фартэ путярдэс, важ кода кай гиндонас, кай мэ на авава. 19 Если лэ Иеговасти авэла уӷодно, мэ ӥто авава каринг тумэндэ — но най важ кода, кай тэ ашунав, со ԥэнэн кадэла путярдэ, ай кай тэ диқав, исин лэндэ лэ Дэвлэско зор чи най. 20 Важ кода кай лэ Дэвлэско Царство дицол най па алава, ай пэ дила. 21 Кочай со тумэ камэн? Кай мэ тэ авав и тэ марав тумэн ла лозынкаса или тэ обжавпэ тумэнца жалостяса и ковлэс?