Ԥрала, савэн стодя о дэл через и старейшыноря тэ терэн дила важ и собрания, сытён кай о Тимофеё!
АНДЭ КОДЭВА бэрш тысячи ԥралэн стодэ старейшынонэнца и помошниконэнца. Сар ту ек анда кадэла ԥрала, тоди ту лошало, кай тути динэ тэ терэс дила важ собрания.
Андэ кадэя жэ время ту, файма, набут дарас. Акэ, со ԥэнэн ек тэрно старейшына, савэс ақарэн Джейсоно: «Кала ман кати стодэ старейшынаса, мэ погиндосардэм: „Скати акана мандэ дила!“». Кала лэ Моисеёсти и лэ Иеремиясти о Иегова дя тэ терэн дила важ лэстэ, вонэ гиндонас, кай лэндэ када на вижала (Исход 4:10; Иеремия 1:6). Сар тумэндэ кадяжэ андо ди, со трэбуй тэ терэн, кай тэ улэн када и тэ сытён май драго тэ терэн кадэя дила? Диқам, сар када терэлас о Тимофеё (Деяния 16:1 жы кай 3).
СЫТЁН КАЙ О ТИМОФЕЁ
Лэ Тимофеёсти сас варикай 20 бэрш, кала о апостоло Павло ақардя лэс пэса андэ разъездно служэния. О Тимофеё сас тэрно и здэлпэ кай, май англал во даралас, кай лэстэ на вижала тэ терэл кадэя дила и во на ӷанэнас, сар када тэ терэл (1 Тимофею 4:11, 12; 2 Тимофею 1:1, 2, 7). Варикай па дэш бэрш о Павло пистросардя ла собранияти андэ Филиппы: «Мэ аштярав андо Ӷосподо Иисусо йто тэ бишалав тумэндэ лэ Тимофеёс... Важ кода кай мандэ нинай никас будэр кацавэ одеса» (Филиппийцам 2:19, 20).
Состар о Тимофеё ашэля лашо старейшына и сости лэстар тэ сытювас?
1. Во анда вся оди поможыяс лэ манушэнди. О Павло пистросардя лэ ԥралэнди андэ Филиппы, кай о Тимофеё анда вся оди поможыя андэ лэндири дила (Филиппийцам 2:20). Чаче, о Тимофеё драго диқэлас пала авэр. Во столас о зор и пэстири время, кай лэндири вера тэ авэл май састи.
Тумэнди нащи тэ авэн кацавэ, сар о мануш, саво водий о автобусо и дарал тэ на змардёл па время и важ када на залэл лэ манушэн па остановки. Акэ, со подԥэнэн о ԥрал, саво служый старейшынаса май бут чем 20 бэрш, лэ ԥралэнди, савэн найдэлмут стодэ тэ терэн май бут дила: «Любисарэн лэ ԥралэн, гиндон пала кода, со трэбуй важ лэндэ, ай най важ кода кай кадя трэбуй тэ терэн».
2. Важ лэстэ сас пэ пэрво ҭан тэ служый лэ Иеговасти. О Павло ԥэнэнас, кай о Тимофеё на шоласпэ пэ кодэла ԥрала, ко «родэн кода, со лэнди камэлпэ, ай най кода, со чалёл лэ Иисусос Христости» (Филиппийцам 2:21). О Павло шутя сама, кай лэ ԥралэндэ, савэ слинэ андо Римо паша лэстэ, жалас фартэ бут время, кай тэ терэн пэстири дила. Вонэ на камэнас варисо тэ умэк, но и камэнас тэ терэн лэ Дэвлэстири дила. Но о Тимофеё на сас кацаво! Сар кати лэстэ вижалас май бут тэ терэл андэ служэния лэ Дэвлэсти, во терэлас кадя, сар о пророко Исаия: «Акэтало мэ! Бишал ман» (Исаия 6:8).
Но со тэ терэн, кай и драго тэ диқэн пала собрания и тэ терэн пэстири дила? Пэрво, сэрэн, со май фартэ трэбуй. О Павло ԥэндя, кай трэбуй вся время драго тэ уӷанэн, со май фартэ трэбуй (Филиппийцам 1:10). Мэк кода, со фартэ трэбуй лэ Иеговасти, трэбуй тэ авэл и важ тумэндэ. Дуйто, жувэн просто. На лэнпэ каринг кадэя дила, сави бут залэл тумари время и о зор. О Павло пистросардя лэ Тимофеёсти: «Наш кодэлэстар, со камэлпэ андэ тэрнэ бэрша, но домардю, кай тэ ритярэс лэ Дэвлэско законо, тэ патяс, тэ любис, тэ авэл тутэ лашимос андо ди и тэ ладис» (2 Тимофею 2:22).
3. Во анда оди и бут сас андэ свынто служэния. О Павло ԥэндя лэ филиппийцонэнди: «Но тумэ ӷанэн, саво во, сар о шаво лэ дадэса, во ашэля манца, сар рабо, кай тэ росԥэнэн бутэнди лащи весть» (Филиппийцам 2:22). О Тимофеё любияс тэ терэл и дила. Во служыяс паша Павло, и через када вонэ ашэнас, сар чаче ԥрала.
Андэ амари время и дила андэ лэ Иеговастири орӷанизацыя хутилэла важ и всаворэ. Кадэла дилатар по ди драго и ԥрала и ԥэя ашэн инке май фартэ ек пала еқэстэ. Важ када загиндон, кай вся время бут тэ терэн «андэ лэ Ӷосподостири дила» (1 Коринфянам 15:58).
4. Во терэлас кода, сости сытёлас. О Павло пистросардя лэ Тимофеёсти: «Но ту терэсас ворта кадя, сар мэ сытяравас, жувэсас сар мэ, терэсас, со мэ камавас тэ стерав по Дэвлэско дром, патясас, на холявэсас и ӷанэсас тэ аштярэс, любисас, виритярэсас о ԥаримос» (2 Тимофею 3:10). Чаче, о Тимофеё терэлас кода, сости сытёлас. Через када во ля тэ полэл, кай авелоп драго май бут тэ терэл андэ собрания (1 Коринфянам 4:17).
Исин тутэ о друӷо, савэстэ лащи дружба лэ Иеговаса и саво ужэ най ек бэрш диқэл пала собрания? Сар нинай, авелоп драго тэ виарақэс. О Томо, саво старейшына бут бэрша, росԥэнэн: «Ек старейшына, саво ужэ дэлмут диқэл пала собрания, ля манди тэ подԥэнэн и бутэсти ман сытярдя. Мэ най еқвар пушавас лэстар, со и сар, и терав кода, со во подԥэнэнас. Важ када мэ парашэлэм тэ дарав, кай мандэ на вижала тэ диқав пала собрания».
5. Во на терделя пэ кода, со ужэ домарделян. О Павло ԥэнэнас лэ Тимофеёсти: «Тер кадя, кай тэ авэс май састо, домардю, кай тэ ритярэс лэ Дэвлэско законо» (1 Тимофею 4:7). Кай о спортсмено исин тренеро. Но во екжэно трэбуй тэ терэл вся, кай тэ авэс май састо. О Павло подԥэнэнас лэ Тимофеёсти: «Сто о зор, кай тэ на парашэс тэ адинос, кай тэ ашунэн авэр, тэ подԥэнэс и тэ сытярэс. [...] Гиндосар пала када, жув кадэлэса, кай всаворэнди тэ дицол, сости ту домардёс по Дэвлэско дром» (1 Тимофею 4:13 жы кай 15).
Тумэнди кадяжэ трэбуй май драго тэ ӷанэн, сар тэ терэн лэ Дэвлэстири дила. Терэн вся, кай драго тэ сытён па Библия. Диқэн, со андэ орӷанизацыя парудёл. Инке, фэринпэ тэ гиндон пала пэстэ май бут, чем трэбуй, кай тумэ, ԥэнэса, ужэ бут бэрша терэн кадэя дила и важ када драго ӷанэн ла. Кадяжэ фэринпэ кодэлэстар, кай тэ гиндон, кай тумэ ӷанэн, со тэ терэн андэ любо дила и тэ на уӷанэн драго, со пала кадэя дила ԥэнэнпэ андэ Библия. Терэн кадя, сар о Тимофеё, савэсти сас ԥэндо: «Вся время дик пала пэстэ и пала кода, сар ту сытярэс» (1 Тимофею 4:16).
6. Во патялас лэ Иеговастирэ духости. Акэ, со пистросардя о Павло лэ Тимофеёсти пала лэстири служэния: «Кодэва лашимос, саво тути динэ, фэрисар лэ свынтонэ духоса, саво исин андар мэндэ» (2 Тимофею 1:14). Кай и май дур о Тимофеё тэ служый лэ Иеговасти, во трэбуй сас тэ патял лэ Иеговастирэ духости.
О Дональдо, саво служый старейшынаса ужэ най ек бэрш, ԥэнэн: «Лэ муршэнди, савэнди о Дэл дя через и старейшыноря тэ терэн дила андэ собрания, трэбуй тэ цэнин пэстири дружба лэ Дэвлэса. Тоди лэндэ авэла бут зор. Кала вонэ мангэн лэ Дэвлэстар о свынто духо и стон зор, кай май бут тэ андярэн пэс кадя сар во сытярэл, тоди вонэ авэна бари бах важ и авэр ԥрала» (Псалом 84:7; 1 Петра 4:11).
ТЭ АВЭЛ КУЧ КОДА, СО ТУМЭНДИ ДЯ О ДЭЛ ЧЕРЕЗ И СТАРЕЙШЫНОРЯ ТЭ ТЕРЭН АНДЭ СОБРАНИЯ
Драго тэ диқас, кай бут ԥрала, савэнди найдэлмут динэ тэ терэн дила андэ собрания, терэн када анда вся оди. О Джейсоно, пала саво ԥэнэнаспэ май англал, росԥэнэн: «Важ кодэя время, сар мэ служысарав андэ собрания старейшынаса, мэ бутэсти сытелэм и парашэлэм фартэ тэ дарав, кай мандэ на вижала тэ диқав пала собрания. Акана мэ кадяжэ служысарав старейшынаса. Важ мандэ кода, со мэ терав, бари честь и мэ фартэ лошало».
Ԥрала, старейшыноря чи служэбни помошникоря, терэн тумэ вся, кай тэ уӷанэн, сар май драго тэ терэн пэстири дила? Сытён кодэлэсти кай о Тимофеё. И тоди через тумэндэ о Иегова дэла лэ ԥралэнди и лэ ԥэянди бут лашимос.