О мануш, саво дэл анда вся оди, авэла бахтало
«Май бари бах тэ дас, чем тэ лас» (ДЕЯНИЯ 20:35).
1. Со сыкавэл, кай о Иегова дэл анда вся оди?
АНГЛА КОДА, сар о Иегова ляпэ вся тэ стерэл, во сас екжэно. Но во на гиндояс кати пала пэстэ. О Дэл подарисардя и жызня лэ анӷелонэнди и лэ манушэнди. «Бахтало Дэл» о Иегова любий тэ терэл подаркоря (1 Тимофею 1:11; Иакова 1:17). Во камэл, кай амэ кадяжэ тэ авас бахталэ, важ када во сытярэл амэн тэ дас анда вся оди (Римлянам 1:20).
2, 3. а) Васо, кала дэс анда вся оди, анэн бах? б) Пала со амэ подаса дума андэ кадэя статья?
2 Андэ Библия пистромэ: «О Дэл создал лэ манушэс кацавэс, сар во» (Бытие 1:27). Када сыкавэл, кай амэндэ вижала тэ андярас пэс, сар во. Кай тэ авас бахталэ, амэнди трэбуй тэ терас, сар о Иегова, тэ шас сама лэ манушэн и тэ дас анда вся оди (Филиппийцам 2:3, 4; Иакова 1:5). Васо? Важ кода кай о Иегова кадя амэн создал. Хоть амэ и найсовершенни, амэндэ вижала тэ терас кадя, сар амаро Дэл, саво дэл анда вся оди.
3 Андэ кадэя статья амэ подаса дума, сар и Библия сытярэл амэн тэ дас анда вся оди. Инке подаса дума, васо о Иегова лошало, кала амэ дас анда вся оди. Кадяжэ амэ уӷанаса, сар кода, кай дас анда вся оди, поможыя амэнди тэ терас лэ Иеговастири дила, сави во дя амэнди. И уӷанаса, васо амэ кадэлэстар бахталэ и васо амэ трэбуй тэ на парашас тэ дас анда вся оди.
О ИЕГОВА ЛОШАЛО, КАЛА АМЭ ДАС АНДА ВСЯ ОДИ
4, 5. Сар о Иегова и о Иисусо дэнас анда вся оди и васо амэ трэбуй тэ терас кадя, сар вонэ?
4 О Иегова камэл, кай и мануша тэ терэн кадя, сар во. Важ када во лошало, кала амэ дас анда вся оди (Эфесянам 5:1). О Иегова камэл, кай амэ тэ авас бахталэ. Амэ патяс андэ када, важ кода кай во амэн драго создал, сар во шукарнэс стердя и ԥув и вся, со исин пэр латэ. И кадяжэ вся, со исин пэр латэ, най еқэндар (Псалом 104:24; 139:13 жы кай 16). Важ када, кала амэ дас анда вся оди и терас, кай авэр тэ авэн лошалэ, амэ терас, кай о Иегова тэ авэл ашунгло.
5 Чачунэ христианоря терэн кадя, сар о Иисусо, саво сыкадя лэ манушэнди, сар трэбуй тэ дэн анда вся оди. О Иисусо ԥэндя: «О шаво лэ манушэско авеля най важ кода, кай лэсти тэ служын, ай кай тэ послужый и тэ отдэл пэсти жызня, кай тэ витинэл бутэн» (Матфея 20:28). Ай о Павло ԥэнэнас лэ христианонэнди: «Гиндон кадя жэ, сар о Христос о Иисусо... ...во отԥэндяпэ всаворэстар, со лэстэ сас и ашэля сар о рабо, сар о мануш» (Филиппийцам 2:5, 7). Кажно андар мэндэ трэбуй тэ пушэл пэстар: «Вижылоп мандэ инке май драго тэ уштавав котэ, кай уштавэлас о Христос?» (Адиносар 1 Петра 2:21a).
6. Сости о Иисусо камэлас тэ сытярэл пэстирэ учениконэн, кала росԥэндя пала самаритянино, саво терэлас лашимос? (Диқэн и картинка англа статья.)
6 О Иегова лошало, кала амэ терас кадя, сар во и о Христос. Када, кала амэ гиндосарас, кай аврэнди тэ авэл май драго и сар тэ поможысарас лэнди. О Иисусо росԥэндя пала самаритянино, саво терэлас аврэнди лашимос. Кодэлэса, со о Иисусо росԥэндя, во сыкадя пэстирэ учениконэнди, кай трэбуй тэ поможын всаворэ манушэнди и тэ на шон сама, ко вонэ и катар. (Адиносар Луки 10:29 жы кай 37b). Сэрэн, васо о Иисусо росԥэндя пала самаритянино? Ек евреё пушля лэстар: «Ко манди пашэ?» О Иисусо ԥэндя, кай, сар амэ камас, кай о Дэл тэ авэл лошало, амэ трэбуй тэ дас анда вся оди, сар кадэва самаритянино.
7. Сар амэ сыкавас, кай аваса май бахталэ, кала кандас лэ Иеговас?
7 Исин инке, васо тэ дас анда вся оди. Важ кода кай андо Эдемско садо о Сатана ԥэндя, кай о Адамо и Ева авэна май бахталэ, сар на кандэна лэ Иеговас, ай лэна кати тэ гиндон важ пэстэ. И Ева гиндояс кати пала пэстэ и камэлас тэ авэл сар о Иегова. И о Адамо гиндояс кати пала пэстэ. Во камэлас май бут тэ чалёл ла Евати, чем лэ Дэвлэсти (Бытие 3:4 жы кай 6). Кода, со вонэ стердэ, андя биды. Кала амэ гиндосарас кати пала пэстэ, када на анэна амэнди бах. Но кала амэ на аштярас нисо пала кода, со дас анда вся оди, амэ сыкавас, кай камас тэ терас кадя, сар сытярэл о Дэл. Важ кода кай када само бахтало дром.
ТЕРАС ЛЭ ИЕГОВАСТИРИ ДИЛА, САВИ ВО ДЯ АМЭНДИ
8. Васо лэ Адамости и ла Евати трэбуй сас тэ гиндон пала авэр?
8 О Адамо ла Еваса андо садо Эдем слинэ екжэнэ. Но вонэ всаек трэбуй сас тэ гиндон пала авэр. Васо? О Иегова блаӷословисардя лэн и ԥэндя, кай тэ авэн лэндэ бут бэятцэ па вся ԥув и тэ залэнпэ ла ԥувьяса (Бытие 1:28). О Иегова камэлас, кай всаворэ мануша тэ авэн бахталэ. О Адамо ла Еваса кадяжэ трэбуй сас тэ камэн и тэ гиндон, кай и лэндирэ бэятцэ тэ авэн бахталэ. О Адамо ла Еваса, ай кадяжэ кодэлэнца, ко лэндар жала, вонэ трэбуй сас тэ терэн кадя, кай и ԥув тэ авэл раё. Кай када тэ стерэн, всаворэ андо ери трэбуй сас еқэҭанэ тэ терэн кадэя дила.
9. Васо и мануша авелоп лошалэ, кала линоп тэ терэн пэ ԥув раё?
9 Кай тэ стерэн кода, со загиндосардя о Дэл, и совершенни мануша кадяжэ трэбуй сас тэ терэн ек дила лэса. Сави дила? Кай и ԥув тэ авэл раё. Кадя вонэ авелоп андэ время, андэ сави отцыёл о Иегова (Евреям 4:11). Кати погиндосар, савэ вонэ авелоп дэ лошалэ кадэла лащя дилатар! Тэ тердоп вонэ аврэнди лашимос и пала када нисо тэ на аштярдоп, о Иегова диноп лэнди инке май бут лашимос.
10, 11. Васо фартэ бари бах, кала росԥэнас важ о царство и сытярас лэ манушэн, кай тэ авэн вонэ ученикоря?
10 О Иегова дя пэстирэ служытелёнэнди тэ росԥэнэн пала лэстэ и тэ сытярэн лэ манушэн, кай вонэ тэ авэн ученикоря. Кай тэ стерас кадэя дила, амэнди трэбуй тэ гиндосарас, сар тэ стерас важ авэр май драго. Амэндэ вижала тэ стерас кадэя дила кати тоди, кала амэндэ исин любовь каринг о Дэл и каринг и мануша.
11 О апостоло Павло ԥэндя пала пэстэ и пала дэсавэ пэстирэ друӷоря, кай вонэ «терэн лэ Дэвлэса ек дила». Васо? Важ кода кай вонэ росԥэнэнас пала Дэл и сытярэнас лэ манушэн пала чачимос (1 Коринфянам 3:6, 9). Амэндэ кадяжэ вижала тэ терас ек дила лэ Дэвлэса. Када, кала росԥэнас важ о царство и кала анда вся оди дас ловэ, пэстири время и зор. Када важ амэндэ фартэ бари бах.
Ту авэса май лошало, кала поможыс аврэнди тэ уӷанэн о чачимос (Диқэн о абзацо 12.)
12, 13. Савэ тумэндэ блаӷословения кодэлэстар, кай тумэ сытярэн аврэн, кай тэ авэн вонэ ученикоря?
12 Кала на жалуисарас пэско зор, кай тэ росԥэнас важ о царство и тэ сытярас лэ манушэн, кай тэ авэн вонэ ученикоря, амэнди кадэлэстар фартэ драго по ди. Пала када кадяжэ ԥэнэн бут возвещятеля, савэ сытярэнас лэ манушэн па Библия. На пэрэдэса алавэнца, сави дэ бари лош андо ди, кала диқэс, сар кай кадэла мануша заԥабол оди, кала вонэ лэн тэ полэн о чачимос пала Дэл. Инке, кала диқэс, сар лэндири вера ашэл май састи, сар парудёлпэ лэндири жизня и сар вонэ лэн тэ росԥэнэн аврэнди кода, со полинэ анда Библия. О Иисусо кадяжэ ля тэ лошавэл, кала рисайлэ 70 ученикоря, савэн во бишалдя тэ росԥэнэн важ о царство. Васо? Важ кода кай лэндэ драго вижыля тэ росԥэнэн пала царство и вонэ кадэлэстар слинэ кадяжэ лошалэ (Луки 10:17 жы кай 21).
13 Па вся ԥув и ԥрала и ԥэя лошалэ, кала диқэн, сар и весть парувэл лэ манушэндири жызня андэ лащи риг. Акэ, со росԥэнэн и Аннаc, тэрни ԥэй, сави най миростэ. Вой пэрэлагля андэ Восточно Европа, кай на хутилэл кодэлэн, ко тэ росԥэнэн важ о Дэл. Вой пэрэлагля, кай май бут тэ терэл дила важ о Дэл. Вой ԥэнэн: «Катэ вушэро тэ лэс тэ сытярэс лэ манушэн па Библия, и када роздраго! Кадэла служэниятар мэ фартэ лошали. Кала мэ авав цэрэ, мандэ нинай время тэ гиндосарав пала кода, саво мандэ исин ԥаримос. Мэ гиндосарав пала кодэла, кас сытярав па Библия и пала кода, саво лэндэ исин ԥаримос, кай тэ поможысарав лэнди пэ дила. Акана мэ драго ӷанав, кай „май бари бах, кала дас, чем кала лас“» (Деяния 20:35).
14. Со поможый тумэнди тэ авэн лошалэ андэ служэния, дажэ кала набут кодэлэн, ко ашунэн и лащи весть?
14 Ай со, сар котэ, кай тумэ жувэн и мануша най фартэ ашунэн и лащи весть? Тумэ авэна май лошалэ ла служэниятар, кала тумэндэ вижала тэ подэн дума май бутэ манушэнца анда вся оди. Дэн лэ манушэнди тэ ашунэн и лащи весть и на шон сама пэ кода, прилэн вонэ ла чи най. Амари дила шолпэ пэ кодэя, сави терэлас о пророко Иезекиилё. О Иегова ԥэндя лэсти: «Ԥэн лэнди мэрнэ алава и на дик пэ кода, лэна вонэ тэ ашунэн чи най» (Иезекииль 2:7; Исаия 43:10). Амэ ӷанас, кай о Иегова цэний кода, саво зор амэ стас, кай терас кадэя дила. И на диқэл пэ кода, ашунэн и мануша и лащи весть чи най. (Адиносар Евреям 6:10d). Ек ԥрал, савэстэ када драго вижалас, акэ со пистросардя важ и служэния: «Амэ садисарас, шас паи, мангаспэ лэ Иеговасти и аштярас, кай во вибарярэла» (1 Коринфянам 3:6).
Кала на промэкас ни ек цэр пэ амаро участко, амэ дас лэ манушэнди тэ ашунэн и весть пала лэ Дэвлэско царство (Диқэн о абзацо 14.)
САР АМЭ ТЭ АВАС БАХТАЛЭ?
15. Трэбуй амэ тэ дас анда вся оди, кати важ кода кай амэнди тэ ԥэнэн «наис»? Росԥэнэн.
15 О Иисусо камэл, кай амэ тэ дас анда вся оди, важ кода кай кадэлэстар аваса бахталэ. Во ԥэндя: «Дэн, и тумэнди дэна. Тумэнди шона андо брэк ԥэрдо, май бут, чем трэбуй, кадя, кай дэла упрал. Важ кода кай скати тумэ дэн, скати дэна и тумэнди» (Луки 6:38). Най всаворэ мануша ԥэнэн «наис», кай амэ дас анда вся оди. Но сар о мануш цэний кода, со амэ терас, лэско ди цырдэла лэс кадяжэ тэ дэл анда вся оди аврэнди. Вижал, трэбуй тэ на парашас тэ дас и тэ на диқас, шона и мануша сама пэ када чи най. Амэ на ӷанас, скати лашимос авэла кодэлэстар, кала терас варисо лашо и на аштярас важ када нисо.
16. Касти амэ трэбуй тэ дас анда вся оди и васо?
16 И мануша, савэ па чачимастэ дэн анда вся оди, на аштярэн нисо пала када. О Иисусо камля тэ сыкавэл када, кала ԥэндя: «Кала стос бари мисяйля, ақар лэ чорорэн, лэ каликэн, кодэлэн, ко лангал, лэ корэн, и авэса бахтало, важ кода кай лэндэ най соса тэ рин тути пала тиро лашимос» (Луки 14:13, 14). Андэ Библия запистромэ кацавэ лэ Дэвлэстирэ алава: «Манушэс, саво терэл лашимос, о Дэл блаӷословия» и «Бахтало мануш, саво шол сама лэ чорорэс» (Притчи 22:9; Псалом 41:1). Чаче, кодэва, ко поможый аврэнди, па чачимастэ бахтало.
17. Сар тэ дас анда вся оди?
17 Кала о Павло ԥэндя лэ Иисусостирэ алава: «Май бари бах тэ дас, чем тэ лас», во камля тэ ԥэнэн, кай трэбуй най кати тэ дас аврэнди, со амэндэ исин, ай кадяжэ тэ подритярас алавэнца, тэ подԥэнас анда Библия и тэ поможысарас пэ дила (Деяния 20:31 жы кай 35). О апостоло пэ алава и пэ дила сытярэлас, сар тэ на жалуисарас пэс, кала шас сама аврэн, отдас пэстири время, пэско зор и пэстири любовь.
18. Со ԥэнэн бут учёни пала кода, кала дэн анда вся оди?
18 И учёни, савэ уӷанэн пала мануша, полинэ, кай и мануша, савэ дэн анда вся оди, май бахталэ. Андэ ек статья ԥэнэнпэ, кай «кодэла, ко терэлас варисо лашо важ авэр, слинэ май бахталэ». И учёни мануша гиндон, кай кала амэ поможысарас аврэнди, амэ май драго полас, васо амэ жувас, каринг со жас. Дэсавэ учёни гиндон, кай кала и мануша терэн аврэнди лашимос и пала када лэнди нисо на потинэн, кацавэ мануша май зоралэ и май бахталэ. Кода, кай и мануша дэн анда вся оди, вонэ ашэн инке май бахталэ. И кадэлэстар амэ на дас наздив, важ кода кай андэ лэ Дэвлэско алав пала када сас дэлмут запистромэ (2 Тимофею 3:16, 17).
НА ПАРАШЭН ТЭ ДЭН АНДА ВСЯ ОДИ
19, 20. Васо тумэ камэн тэ дэн анда вся оди?
19 Тэ дас анда вся оди найвушэро, сар паша амэндэ мануша, савэ гиндон кати пала пэстэ. Но о Иисусо ԥэндя дуй со май барэ законоря. Када тэ любисарас лэ Иеговас всаворэ одеса, всаворя жизняса, всаворя годяса и зорэса, и тэ любисарас лэ манушэн, сар екжэнэ пэс (Марка 12:28 жы кай 31). Амэ полям анда кадэя статья, кай кодэла, ко любин лэ Иеговас, стон зор, кай тэ терэн кадя, сар во. О Иегова и о Иисусо дэн аврэнди анда вся оди. И вонэ камэн, кай амэ кадяжэ тэ терас. Кадэлэстар аваса па чачимастэ бахталэ. Кала терас варисо важ о Иегова и важ и мануша и нисо на аштярас важ када, амэ терас кадя, кай о Дэл тэ авэл ашунгло, поможысарас аврэнди и екжэнэ ашас май бахталэ.
20 Тумэ уже акана стон зор, кай тэ поможын аврэнди, но инке май фартэ лэ ԥралэнди и лэ ԥэянди, савэ тумэнца патян андо ек Дэл (Галатам 6:10). Кала тумэ терэн кадя и май дур, пэр тумэндэ лэна тэ стон патив, тумэн авэна тэ любин и тумэ авэна бахталэ. Андэ Притчи 11:25 пистромэ: «О мануш, саво дэл анда вся оди, лэстэ ашэл инке май бут, и кодэва, ко паярэл анда вся оди, кодэлэс кадяжэ паярэна анда вся оди». Андэ амари жызня и служэния исин бут, сар тэ дас анда вся оди, тэ терас лашимос и нисо тэ на аштярас важ када. Андэ авэр статья амэ подаса дума, сар када тэ терас.
a 1 Петра 2:21: «Тумэн важ када и ақардэ, кай екжэно о Христос пэрэандярдя о ԥаримос важ тумэндэ. Во сыкадя тумэнди, сар тэ терэн, кай тумэ кадяжэ тэ уштавэн котэ, кай во уштадя».
b Луки 10:29 жы кай 37: «Но кадэва мануш камэлас, кай авэр тэ ԥэнэн, кай во ритярэл лэ Дэвлэско законо. Во пушля кай о Иисусо: „Ко манди пашэ?“ Пэ лэстирэ алава о Иисусо ԥэндя: „Ек мануш змэкэласпэ анда Иерусалимо андо Иерихоно. Па дром пэр лэстэ динэ и бидаря. Вонэ злинэ пар лэстэ и йда, мардэ лэс и жылэтар. Вонэ ашадэ лэс еле жундэс. Кадя вижыля, кай па кодэва жэ дром змэкэласпэ о рашай. Но кала во додиқля кадэлэ манушэс, прожыля пэ авэр лэ дромэстири риг. Кадяжэ о левито, кала дожыля жы кай кодэва ҭан и додиқля кодэлэ манушэс, прожыля па авэр лэ дромэстири риг. Ай ек, о самаритянино, саво жалас па кодэва дром, додиқля лэс пэ кадэва дром, и лэсти ашэля лэс жалко. Во пашэля лэстэ и пэрэԥангля котэ, кай сас жы ратэстэ помардо. И кала пэрэԥандэлас лэс, шолас пэр лэстэ о вулей и о чыхыри. Тоди во стодя лэс пэ пэско жывотно и андя андо цэр, кай и мануша ашэнаспэ тэ рятярэн, и диқэлас пала лэстэ. Ай пэ авэр дес виля дуй динария и отдя лэ хуласти кадэлэ цэрэско, и ԥэндя: „Дик пала лэстэ, ай сар жана май бут ловэ, мэ потинава тути, кала рисавава“. Сар ту гиндос, ко анда кадэла трин ашэля кодэва, ко пашэ кодэлэсти, кас мардэ и бидаря. Во ԥэндя: „Кодэва, ко жалуисардя анда вся оди“. Тоди о Иисусо ԥэндя лэсти: „Жа и тер кадя жэ“».
c Манушэс на ақарэн кадя, сар катэ пистромэ.
d Евреям 6:10: «О Дэл обжалпэ аврэнца кати кадя, сар вонэ затердэ, и важ када во на бистрэла тумари дила и любовь, сави тумэ сыкадэ каринг лэско алав, кала поможынас и на парашэн када тэ терэн важ кодэла, ко патял тумэнца андо ек Дэл».