Предано любин ек еқэс

1, 2. Васо амэ трэбуй предано тэ любисарас ек еқэс?

АМЭНДЭ исин бут причины, кай предано тэ любисарас ек еқэс. Савэ? Например, пала дэсавэ шукарнэс росԥэнэнпэ андэ книӷа Притчи: «На ашав предано любовь и верность. ...И тоди ту уӷодиса лэ Дэвлэсти и лэ манушэнди и пала тут ӷанэна, кай ту мудро мануш»; «Если о мануш добро, [или «предано любий»] када лэсти жэ и анэна лашимос...»; «Кодэва, ко камэл тэ авэл праведно и предано тэ любий, виарақэла жызня, праведность и слава» (Прит. 3:3, 4; 11:17; 21:21).

² Андэ кадэла притчи исин трин причины, васо амэ трэбуй предано тэ любисарас ек еқэс. Пэрво, кодэлэн, ко предано любий, фартэ цэний о Иегова. Дуйто, предано любовь анэн амэнди лашимос ужэ акана, например вой поможый амэнди тэ авас лашэ друӷоря. Трито, кодэлэн, ко предано любий, аштярэн райканэ блаӷословении англэ, ай кадяжэ и вечно жызня. Драго дицол, кай амэ трэбуй тэ сыкавас «предано любовь, сави сыкавэл о Иегова» (1 Сам. 20:14).

3. Пала савэ вопросоря амэ подаса дума андэ кадэя статья?

³ Анда кадэя статья амэ уӷанаса атветоря пэ штар вопросоря. Кас амэнди трэбуй предано тэ любисарас? Со амэ уӷанас пала предано любовь анда книӷа Руфь? Сар и предано любовь дицол пэ дила? И саво лашимос авэла кодэлэндэ, ко предано любий?

КАС АМЭНДИ ТРЭБУЙ ПРЕДАНО ТЭ ЛЮБИСАРАС?

4. Кас предано любий о Иегова и сар амэ можэм тэ сытювас лэстар? (Марка 10:29, 30).

⁴ Андэ кодэя статья амэ подям дума пала лэ Иеговастири предано любовь. Кадя фартэ и кадя нежно о Иегова любий кати кодэлэн, ко любий лэс и служый лэсти (Дан. 9:4). Обычно бэяцэ, кала диқэн лэ дадэстири любовь и забота, сытён лэстар тэ терэн, сар во. Точно кадяжэ амэ старысавас тэ сытювас кай амаро небесно Дад (Эф. 5:1). Важ када амэ тожэ камас всаворэ́ одеса тэ любисарас амарэ ԥралэн и ԥэян и тэ авас важ лэндэ предани друӷоря. (Адиносар Марка 10:29, 30.)

5, 6. Сар и мануша часто полэн, со када преданость?

⁵ Канешно, кай тэ сыкавас предано любовь, трэбуй драго тэ полас, сави вой. Давайте спэрва подаса дума, соса и предано любовь на шолпэ пэ преданость, пала сави гиндон бут мануша.

⁶ Роздиқаса ек примеро. Прецтавим манушэс, саво бут бэрша терэл андэ ек фирма. Еқа ригатар, можно тэ ԥэнас, кай во предано работнико. Но авря ригатар, када на сыкавэл, кай во любий кадэя фирма и латирэ барэдэрэн. Можэт, во дажэ ни еқвар лэн на диқля. И файма, во най всегда соӷласно кодэлэса, савэ ришэнии вонэ прилэн. Просто лэсти чалёл, скати котэ потинэн, и во лэла тэ терэл пэ кодэя фирма жы каринг и пенсия, если кати май лащи бутёры на попэрдёлапэ.

7, 8. а) Васо дэсавэ мануша сыкавэн предано любовь? б) Васо авелоп драго тэ подас дума пала дэсавэ стихоря анда книӷа Руфь?

⁷ Сави разница машкар предано работнико анда примеро и машкар о мануш, саво сыкавэл предано любовь? Разница андэ кода, васо вонэ предани. Васо лэ Дэвлэстирэ служытеля андэ дэлмутни время сыкавэнас предано любовь? Вонэ терэнас када най важ кода, кай трэбуй сас, ай важ кода, кай анда оди када камэнас. Погиндосарам пала Давидо. Лэсти сас фартэ куч лэско друӷо о Ионафано, и важ када во предано лэс любияс. И во терэлас када дажэ тоди, кала лэ Ионафаноско дад о Сауло камэлас тэ умарэл лэ Давидос. Дажэ сар прожылэ бэрша посли кода, сар муля о Ионафано, через и предано любовь каринг лэстэ, о Давидо анда ди заботияспэ пала лэско шаво Мефивошето (1 Сам. 20:9, 14, 15; 2 Сам. 4:4; 8:15; 9:1, 6, 7).

⁸ Пала предано любовь амэ можэм бут со тэ уӷанас анда книӷа Руфь. Сар лэ Дэвлэстирэ служытеля, пала савэ росԥэнэнпэ андэ кадэя книӷа, сыкавэнас предано любовь? И сар лэнго примеро поможыя амэнди предано тэ любисарас амарэ ԥралэн и ԥэян андэ собрания?b

СО ПАЛА ПРЕДАНО ЛЮБОВЬ АМЭ УӶАНАС АНДА КНИӶА РУФЬ?

9. Васо и Ноеминь ԥэндя, кай о Иегова одбанделя латар?

⁹ Андэ книӷа Руфь росԥэнэнпэпала Ноеминь, пала лэ Дэвлэско мануш Боазо, саво сас родо латирэ хуласти, и пала латири бори Руфь. Кала андо Израилё сас боқалимос, и Ноеминь пэстирэ хуласа и пэстирэ шавэнца ля тэ жувэл андо Моаво. Но через дэсави время латэ муля о хулай. Латирэ шавэ жэнисайлэ, но потом прожыля время и вонэ тожэ мулинэ (Руфь 1:3—5; 2:1). Через кадэя бида и Ноеминь умэкля и вас. Лати сас фартэ ԥарэс, и вой дажэ ля тэ гиндой, кай андэ латири бида дошало о Иегова. Акэ савэ алава ԥэнэнас и Ноеминь: «О Иегова бишалдя пэр мандэ бида»; «Фартэ бут ԥаримос манди дя о Дэл тэ пэрэандярав»; «О Иегова одбанделя мандар» (Руфь 1:13, 20, 21).

10. Сар андярдя пэс о Иегова, кала ашундя и алава, савэ ԥэндя и Ноеминь?

¹⁰ Сар о Иегова андярдя пэс, кала ашундя и алава, савэ ԥэндя и Ноеминь? Во на ля тэ холявэл и на одбанделя латар. Наоборот, во додиқля, сар лати сас дэ ԥарэс, поля и жалуисардя ла. О Иегова драго ӷанэнас, кай кала мудро мануш умэкля и вас, «тоди во можэт тэ стерэл дилимос» (Эккл. 7:7). И всаек важ и Ноеминь трэбуй сас, кай о Дэл тэ сыкавэл лати, кай на одбанделя латар. О Иегова када полэлас (1 Сам. 2:8). Важ када во подритярдя пэстиря служытельница через и Руфь, сави ла предано любияс, и дя лати помощь. Нежно и анда вся ди и Руфь подритярдя пэстиря сасуя. Вой придя лати зор, кай латэ упалэ тэ авэл лащи дружба лэ Иеговаса. Сости амэ можэм тэ сытювас кай и Руфь?

11. Васо амэ поможысарас кодэлэнди, ко умэкля и вас?

¹¹ Если амэ предано любисарас, амэ подритярас кодэлэн, ко умэкля и вас. И Руфь на закамля тэ ашавэл пэстиря сасуя. Кадя и амэ камас тэ авас паша кодэла, касти ԥарэс или ко умэкля и вас. Амэ любисарас амарэ ԥралэн и ԥэян и терас вся, со па амаро зор, кай тэ подритярас лэн (Прит. 12:25; 24:10). Амэ камас тэ терас кадя, сар ԥэндя о апостоло Павло: «Подритярэн кодэлэн, касти ԥарэс по ди, поможын кодэлэнди, касти найвушэро, на холявэн ни пэр кастэ» (1 Фес. 5:14).

12. Со май фартэ всаворэстар, трэбуй кодэлэсти, ко умэкля и вас?

¹² Часто кодэлэсти, касти ԥарэс, трэбуй, кай варико лэс внимательно тэ виашунэл и тэ ԥэнэн, кай любий лэс. Если тумэ заботинапэ пала ек цэно лэ Иеговаско служытелё, ӷанэн, во обязательно пэ када шола сама (Пс. 41:1). Важ кода кай андэ Притчи 19:17 ԥэнэнпэ: «Ко терэл лашимос лэ чорорэсти, кодэва залэл лэ Иеговасти, и о Дэл дэла лэсти наӷрада важ када».

13. Соса и Руфь на шоласпэ пэ Орфа и васо можно тэ пэнас, кай и Руфь сыкадя предано любовь? (Диқэн и картинка пэ обложка.)

¹³ Инке май бут пала райкани предано любовь амэ уӷанас анда кода, со сас дальшэ андэ жызня кай и Ноеминь. Кала и Ноеминь ашундя, кай о Иегова вспомнил пала пэско народо и дя лэсти о марно, вой закамля тэ рийпэ цэрэ, и лэдуй латирэ боря жылэ ласа (Руфь 1:6). Но, кала вонэ жанас па дром, и Ноеминь най еқвар ԥэнэнас лэнди, кай вонэ тэ ринпэ андо Моаво. Вой мангэлас пала када тривар. Со сас дальшэ? «И Орфа чуминдя ла сасуя и ужылятар, ай и Руфь ашэляпэ» (Руфь 1:7—14). Кала и Орфа приля кадэя ришэния, вой стердя кадя, сар лати ԥэндэ. Ай акэ и Руфь андярдя пэс совсем па аврятэ. Вой моӷла просто тэ рийпэ андо Моаво, но вой фартэ любияс пэстиря сасуя, сави сас умарди бидаса, и важ када вой ла на ашадя (Руфь 1:16, 17). И вой стердя када най важ кода, кай трэбуй сас, ай важ кода, кай анда ди када камэлас. Кадя вой сыкадя предано любовь каринг и Ноеминь. Сости амэ сытювас анда када?

14. а) Сар андярэн пэс бут ԥрала и ԥэя? б) Савэ жэртвы уӷодни лэ Иеговасти, сар ԥэнэнпэ андэ Евреям 13:16?

¹⁴ Если амэ предано любисарас, амэ камас тэ терас май бут, чем амэндар аштярэн. Адес бут чачунэ христианоря тожэ сыкавэн, кай предано любин лэ ԥралэн и лэ ԥэян. Вонэ дажэ сыкавэн предано любовь каринг кодэла, кас на ӷанэн лично. Например, кала терэлпэ бида андэ природа, вонэ сразу авэн тэ поможын. Ай если андэ собрания варикасти трэбуй помощь, вонэ на аштярэн, кала лэн мангэна пала када. Кадэлэса вонэ шонпэ пэ христианоря анда Македония, савэ жувэнас андо пэрво вико. Кодэла христианоря екжэнэ жувэнас найбарвалэс, но вонэ сас ӷотови бут состар тэ отԥэндёнпэ, кай тэ поможын кодэлэнди, касти сас инке май ԥарэс. Кадя и адес бут христианоря терэн «дажэ май бут», чем лэндар аштярэн (2 Кор. 8:3). Лэ Иеговасти фартэ чалёл, кай лэстирэ служытеля предано любин ек еқэс! (Адиносар Евреям 13:16.)

САР И ПРЕДАНО ЛЮБОВЬ ДИЦОЛ ПЭ ДИЛА?

15, 16. Сар и Руфь сыкадя, кай на умэкэлас и вас, кай тэ поможый?

¹⁵ Кала амэ адиносарас пала Руфь и пала Ноеминь, амэ можэм бут сости тэ сытювас. Давайте подаса дума пала трин маменторя.

¹⁶ На умэкэн и вас, кай тэ поможын. И Ноеминь спэрва отԥэндёлас, кала и Руфь камэлас тэ поможый лати. Но и Руфь на умэкэлас и вас. Со анда када вижыля? «И Ноеминь диқля, кай и Руфь точно ришыла тэ жал ласа и важ када парашэля лати тэ отԥэнэн» (Руфь 1:15—18).

17. Сар тэ на умэкас и вас, кала поможысарас?

¹⁷ Сости амэ сытювас? Кай тэ поможысарас кодэлэсти, касти ԥарэс, трэбуй тэ авас терпеливи и тэ на умэкас и вас. Например, ԥэйc, савятэ ԥаримос, спэрва можэт тэ отԥэндёлпэ, кай амэ тэ дас лати помощь. Но кодэва, ко предано любий, на ашавэла пэстирэ друӷос андэ бида (Гал. 6:2). Амэ на парашаса тэ поможысарас лати, важ кода кай ласа тэ надеисавас, кай вой всаек прилэла амари помощь.

18. Васо и Руфь моӷла тэ холявэл пэ Ноеминь?

¹⁸ На холявэн. Кала и Ноеминь рисайля андо Вифлеемо, вой ԥэнэнас аврэ жувлянди: «Кала мэ ужавас, мандэ сас вся, но о Иегова рисардя ман шушэ вастэнца» (Руфь 1:21). Погиндон, со сас по ди кай и Руфь, кала вой када ашундя! Вой бут со стердя важ и Ноеминь, подритярэлас и ровэлас ласа, жыля ласа андо баро дром, ай кодэя ԥэнэн: «О Иегова рисардя ман шушэ вастэнца». И када англа Руфь! Кабута вся, со вой стердя важ и Ноеминь, сас евья. Наверно, важ и Руфь сас фартэ обидно када тэ ашунэл. Но вой всаек на одбанделя пэстиря сасуятар.

19. Со поможыя амэнди фартэ тэ на прилас каринг оди, кала ԥэнэн варисо ӷрубо?

¹⁹ Сости амэ сытювас? Можэт, скати бы тумэ тэ на стон зор, кай тэ поможын ла ԥьяти, сави умэкля и вас, вой всаек ԥэнэна тумэнди варисо ӷрубо. Старыинпэ тэ на прилэн када фартэ пашэ каринг оди, на одбандён ла ԥьятар и мангэн лэ Иеговас тэ поможый тумэнди тэ полэн, сар май драго ла тэ подритярэн (Прит. 17:17).

20. Со придя зор ла Руфяти и дальшэ тэ заботийпэ пала Ноеминь?

²⁰ На умэкэн и возможность тэ подритярэн лэ ԥралэн и лэ ԥэян. И Руфь сыкавэлас предано любовь каринг и Ноеминь и отдэлас важ када бут зор. Но акана лати трэбуй сас, кай ла тэ подритярэн. О Иегова стердя када через о Боазо. Кадэва мануш ԥэндя лати: «Мэк о Иегова блаӷословий тут важ тири дила и мэк тутэ авэла бут лашимос лэ Иеговастар, лэ Израилёстирэ Дэвлэстар, тала кастирэ крылоря ту авелян тэ фэриспэ!» Имено кацавэ алава лати трэбуй сас тэ ашунэн. И Руфь ԥэндя: «Тирэ алавэндар манди ашэля май вушэро по ди и када подритярдя ман» (Руфь 2:12, 13). О Боазо подтидя лашэ алава и подритярдя ла Руфя, кай вой и дальшэ тэ заботийпэ пала Ноеминь.

21. Со трэбуй тэ терэн и старейшыноря, сар пистромэ андэ Исайя 32:1, 2?

²¹ Сости амэ сытювас? Лэ манушэсти, саво предано любий аврэн, тожэ дэкала трэбуй, кай лэс тэ подритярэн. Например, важ и Руфь сас фартэ приятно, кала о Боазо шутя сама пэ латири доброта. И старейшыноря моӷут тэ сытён лэстар. Вонэ шон сама по лашимос, саво терэн и ԥрала и ԥэя, и хвалин лэн пала када. Да, лашэ, приятни алава моӷут тэ придэн амэнди зор, кай амэ и дальшэ тэ сыкавас предано любовь. (Адиносар Исайя 32:1, 2.)

САВО ЛАШИМОС АВЭЛА КОДЭЛЭНДЭ, КО СЫКАВЭЛ ПРЕДАНО ЛЮБОВЬ?

22, 23. Сар паруделя о гиндо кай и Ноеминь и со андэ када лати поможысардя? (Псалом 136:23, 26).

²² Через дэсави время о Боазо щедро дя зэрно ла Руфяти и ла Ноеминяти (Руфь 2:14—18). Со ԥэндя и Ноеминь, кала лати динэ кадэва подарко? «Мэк блаӷословий лэс о Иегова, саво сыкавэл предано любовь каринг и жундэ и каринг и мулэ» (Руфь 2:20а). Сар дэ фартэ паруделя лако гиндо! Варикала вой ясвэнца ԥэнэнас: «О Иегова одбанделя мандар». Ай акана вой радосно ԥэнэн: «О Иегова... сыкавэл предано любовь». Со лати поможысардя тэ диқэл пэ вся када авря ригатар?

²³ Акана и Ноеминь поля, кай па чачимастэ о Иегова никала ла на ашавэлас. Вся о дром анда Моаво андэ Иудея во заботияспэ пала латэ, важ кода кай паша латэ вся и время сас и Руфь (Руфь 1:16). И андэ кода, кай лэн шутя сама о Боазо, кодэва, ко па лэ Моисеёско законо моӷ тэ поможый, вой додиқля лэ Иеговастири любовь каринг латэ и каринг латири бори (Руфь 2:19, 20б). Наверно, вой гиндояс: «Акана мэ полав, о Иегова никала на одбандёлас мандар. Во вся и время сас паша мандэ!» (Адиносар Псалом 136:23, 26.) И канешно, и Ноеминь сас фартэ блаӷодарно, кай и Руфь и о Боазо на ашадэ ла. Блаӷодаря лэнди и Ноеминь упалэ ля зор. Можно кати прецтавить, савэ дэ бахталэ вонэ лэтрин сас!

24. Васо амэнди трэбуй предано тэ любисарас амарэ ԥралэн и ԥэян?

²⁴ Сости амэ сытелям анда книӷа Руфь? Кодэва, ко предано любий лэ ԥралэн и лэ ԥэян, на ашавэл лэн андэ бида и жал пэ жэртвы важ лэндэ. И старейшыноря трэбуй тэ авэн внимательни каринг кодэла, ко сыкавэл предано любовь, и анда ди тэ хвалин лэн важ када. Кадяжэ, кала амэ предано любисарас и диқас, сар када подритярэл лэ ԥралэн и лэ ԥэян, када анэн амэнди бари радость (Деян. 20:35). Ай сави со май ӷлавно причина, кай амэ предано тэ любисарас амарэ ԥралэн и ԥэян? Амэ анда вся оди камас тэ сытювас кай о Иегова и тэ уӷодисарас лэ Дэвлэсти, саво сыкавэл фартэ бари предано любовь (Пс. 103:8; 33:22).