ӶЛАВА 19
Фэрисар и дружба лэ Иеговаса
1, 2. Кай амэ можэм тэ фэрисавас?
ПРЕДСТАВЬ, кай ту пэ вулица и зажал бари буря. О нэбо вся кало, блестий и молния, и о ӷромо ӷремий. И па нэбо щяс, щяс дэла о брышын. И ту родэс, кай тэ гарадёс. И кала виарақлян, кай тэ гарадёс, тоди тути ашэл драго.
2 Адес амэ жувас, ԥэнэса, андэ кацави буря. Андэ люма дес десэстар ашэл май ԥарэс. Но амэндэ исин, кай тэ гарадювас. Кай? О псалмопевцо пистрояс: «Мэ ԥэнава лэ Иеговасти: „Ту ман фэриса и ек ту ман подритярэса, мэрно Дэл, савэсти мэ патяв“» (Псалом 91:2). О Иегова па чачимастэ кодэва, ко амэн фэрий, важ кода кай во поможый амэнди тэ пэрэандярас о ԥаримос и тэ аштярас о лашимос, саво авэла англэ.
3. Со трэбуй тэ терэс, кай о Иегова тэ фэрий тут?
3 Саво бы ԥаримос амэндэ тэ на авэл, о Иегова дэла амэнди зор вся тэ пэрэандярас. Во май зорало любонэ амарэ вороӷостар. Дажэ, кала андэ амари жызня терэлапэ варисави бида, амэ можэм тэ патяс, кай англэ о Иегова улэла вся, через со амэндэ биды и о ԥаримос. Андэ Библия пистромэ важ амэндэ: «Терэн вся, кай о Дэл тэ на парашэл тэ любий тумэн» (Иуды 21). На отдурю лэ Иеговастар. Если дурёса, тоди на вижала, кай во тэ поможый тути.
САР ТЭ СЫКАВАС АМАРИ ЛЮБОВЬ ЛЭ ДЭВЛЭСТИ?
4, 5. Андэр со дицол лэ Иеговастири любовь каринг амэндэ?
4 Кай тэ на хасарас и дружба лэ Иеговаса, амэнди трэбуй тэ сэрас, сар фартэ во амэн любий. Кати погиндон, скати лашимос во важ амэндэ стердя. Во сыкадя пэстири любовь, кала дя шукарни ԥув, дя амэнди бут шукаримос, саво исин пэ ԥув, и лэ жывотнонэн. Ай инке дя амэнди бут разно лашо хамос и вужо паи. Через и Библия во ԥэндя амэнди пэско алав и пала пэстирэ лашэ качестворя. Но со май куч, со во стердя важ амэндэ, када, кай бишалдя пэ ԥув пэстирэ Шавэс, лэ Иисусос Христос, кай во тэ отдэл пэстири жызня важ амэндэ (Иоанна 3:16). Через кода, со стердя важ амэндэ о Иисусо, амэ можэм тэ аштярас англэ о лашимос.
5 О Иегова стердя по нэбо правительство, када лэ Христоско Царство, саво улэла вся о найлашимос. Через кадэва Царство вся и ԥув ашэла раё и мануша жувэна вечно, авэна бахталэ и лэна тэ лошавэн (Псалом 37:29). Кадя жэ о Иегова сыкавэл пэстири любовь, кала шол сама кажнонэс андар мэндэ. Во сыкавэл амэнди само лашо дром андэ жызня и дэл алав, кай вся и время лэла тэ ашунэл амарэ молитвы.
6. Со трэбуй тэ терас, кай тэ сыкавас амари любовь лэ Иеговасти?
6 Сар амэ можэм тэ сыкавас амари любовь лэ Иеговасти? Трэбуй тэ блаӷодарисарас лэс пала вся, со во важ амэндэ терэл. Жалко, кай адес исин бут мануша, савэ най блаӷодарни. Кадя жэ сас и андэ кодэя время, кала жувэлас о Иисусо. Еқварэс, кала о Иисусо исцэлисардя дэшэ манушэн, савэндэ тернёлас и тила, кати ек андар лэндэ рисайля, кай тэ поблаӷодарий лэс (Луки 17:12—17). Давай никала на бистрам тэ блаӷодарисарас лэ Иеговас!
7. Сар трэбуй тэ любисарас лэ Иеговас?
7 О Иегова амэн любий и амэ кадяжэ трэбуй тэ любисарас лэс. О Иисусо ԥэндя пэстирэ учениконэнди, кай лэ Иеговас трэбуй тэ любисарас всаворэ одеса, всаворя жызняса и всаворя годяса. (Адиносар Матфея 22:37.) Со када сыкавэл?
8, 9. Сар амэ можэм тэ сыкавас лэ Иеговасти, кай любисарас лэс?
8 На хутилэла просто тэ ԥэнэс: «Мэ любисарав лэ Иеговас». Если ту любис лэ Иеговас всаворэ одеса, всаворя жызняса и всаворя годяса, када трэбуй тэ дицол па кода, сар ту жувэс (Матфея 7:16—20). Андэ Библия драго пистромэ, кала ту любис лэ Дэвлэс, тоди ту лэса тэ жувэс па лэстирэ законоря. Када найԥарэс тэ терэс, важ кода кай «лэско законо найԥаро». (Адиносар 1 Иоанна 5:3.)
9 Если амэ кандас лэ Иеговас, амари жызня авэла май бахтали (Исаия 48:17, 18). Со поможыя амэнди тэ на хасарас и дружба лэ Иеговаса? Давайте уӷанаса.
МЭК АВЭЛ ТУТЭ ЛАЩИ ДРУЖБА ЛЭ ИЕГОВАСА
10. Васо трэбуй тэ на парашэс тэ уӷанэс важ о Иегова?
10 Сэрэс ту чи най, сар заляпэ тири дружба лэ Иеговаса? Ту лян тэ сытёс па Библия и лян тэ уӷанэс важ о Дэл вся май бут и май бут, и посли када закамлян, кай во тэ ашэл тиро друӷо. И дружба лэ Дэвлэса, када сар яг, андэ сави вся и время трэбуй тэ подшос кашторэ. Если ту камэс, кай кадэя «яг» тэ на мудардёл, на параш и май дур тэ уӷанэс пала Иегова (Притчи 2:1—5).
И дружба лэ Дэвлэса, када сар яг, андэ сави вся и время трэбуй тэ подшон кашторэ.
11. Сар ту прилэса о чачимос анда Библия?
11 О чачимос анда Библия, саво ту лэса тэ уӷанэс, лэла тут лэ одестар. Кацаво жэ сас дуе лэ Иисусостирэ учениконэнца, кала во росԥэнэнас лэнди и пророчества пала пэстэ анда Писания. Акэ, со вонэ ԥэндэ: «Хэба, на ԥаболас амаро ди, кала па дром во дэлас дума амэнца и росԥэнэнас, сар тэ полас и Писания?» (Луки 24:32).
12. Со можэт тэ терэлпэ кодэлэса, кай ту любис лэ Дэвлэс?
12 Со ля лэ одестар лэ Иисусостирэ учениконэн? Кода, кай вонэ дэсо полинэ анда Писания. Кала ту лян тэ полэс и Библия, тутэ кадяжэ андо ди сас бут радость. Через када ту закамлян май драго тэ уӷанэс лэ Иеговас и тэ любис лэс. Но и любовь каринг о Дэл можэт тэ ашэл май набут. Канешно, ту на камлоп кацаво (Матфея 24:12).
13. Со поможыя тути тэ на хасарэс и любовь каринг о Дэл?
13 Хоть ту ужэ ашэлян лэ Дэвлэско друӷо, трэбуй всаек тэ на парашэс тэ терэс вся, кай тэ авэл лащи дружба лэ Дэвлэса. Уӷан май драго и важ о Дэл и важ о Иисусо и гиндосар пала кода, со уӷанэс. Мэк кода, со ту уӷанглян, лашарэл тири жызня (Иоанна 17:3). Кала ту сытёс чи адинос и Библия, пуш пэстар: «Со мэ уӷанглэм важ о Иегова? Васо во ашэл кода, кай мэ тэ любисарав лэс всаворэ одеса и всаворя жызняса?» (1 Тимофею 4:15).
14. Сар и молитва сыкавэла тири любовь каринг о Иегова?
14 Со сыкавэл, кай и мануша лашэ друӷоря? Кода, кай вонэ вся и время дэн дума пала вся и кадэлэстар лэндири дружба ашэл инке май лащи. Кадя жэ и ту, кала вся и время дэс дума лэ Иеговаса, мангэспэ каринг лэстэ, кадэлэстар тири дружба лэса ашэл май лащи. (Адиносар 1 Фессалоникийцам 5:17.) И молитва, када фартэ лашо подарко амарэ небеснонэ Дадэстар. Тирэ молитвы трэбуй тэ авэн анда оди (Псалом 62:8). На трэбуй тэ ԥэнас кажно разо ек молитва, сави можэт варикала висытелям. И молитва трэбуй тэ авэл анда оди. Кай тири любовь каринг о Иегова тэ авэл инке май бари, трэбуй тэ на парашэс тэ сытёс па Библия и тэ мангэспэ анда оди.
РОСԤЭН ВАЖ О ИЕГОВА АВРЭНДИ
15, 16. Васо трэбуй тэ росԥэнэс важ о Дэл?
15 Кай тэ авэс май пашэ каринг о Иегова, тути трэбуй тэ росԥэнэс аврэнди пала лэстэ. Тэ терэс када важ тутэ, бари бах (Луки 1:74). Инке, кадэя дила, о Христос дя тэ терэн пэстирэ учениконэнди. Амэ всаворэ трэбуй тэ росԥэнас лащи весть пала лэ Дэвлэско Царство. Ай ту терэс кадя? (Матфея 24:14; 28:19, 20).
16 Важ о апостоло Павло сас фартэ куч кода, кай во росԥэнэнас важ о Дэл. Во пэ када ԥэнэнас «сомнак» (2 Коринфянам 4:7). Андэ амарэ деса нинай нисо май важно, чем кода, кай тэ росԥэнэс аврэнди пала Иегова и пала кода, со во камэл тэ стерэл. Кадэлэса, ту сыкавэс, кай тэлёс лэ Иеговасти. И важ лэстэ када фартэ куч (Евреям 6:10). Кала росԥэнэс важ о Дэл аврэнди, када анэна лашимос най кати тути, но и кодэлэнди, ко тут ашунэн. Вонэ, кадяжэ сар и ту, ашэна май пашэ каринг о Иегова и во дэла лэнди вечно жызня. (Адиносар 1 Коринфянам 15:58.) Кала росԥэнэс важ о Царство, када па чачимастэ фартэ лащи дила!
17. Васо тэ росԥэнас важ о Дэл, када нащи тэ отстас?
17 Амэ трэбуй тэ росԥэнас важ о Дэл и тэ на отстас када (2 Тимофею 4:2). Лэ манушэнди трэбуй со май йто тэ ашунэн и весть пала лэ Дэвлэско Царство. Андэ Библия пистромэ: «Лэ Иеговаско дес пашэ. Во пашэ и фартэ йто авэла» и во «авэла андэ время, сави стодя о Дэл» (Софония 1:14; Аввакум 2:3). Фартэ йто о Иегова розмарэла и люма, савяса правий о Сатана. Амэ трэбуй тэ ԥэнас лэ манушэнди пала када, кай вонэ тэ витидэн важ пэстэ тэ служын лэ Иеговасти.
18. Васо амэ трэбуй тэ тэлювас лэ Иеговасти еқэҭанэ аврэ служытелёнэнца?
18 О Иегова камэл, кай амэ тэ тэлювас лэсти еқэҭанэ аврэ служытелёнэнца. Андэ Библия пистромэ: «Ай инке ласа тэ шас сама ек аврэс, кай через када авэр тэ закамэн тэ любин и тэ терэн лашимос. И тэ на промэкас и собрании, сар дэко ужэ присытеля каринг када, ай тэ подритярас ек аврэс. И тэ терас када инке май бут, важ кода кай диқас, кай пашол кодэва дес» (Евреям 10:24, 25). Трэбуй тэ терас вся, со можно, кай тэ на промэкас и собрании, важ кода кай пэ собрании амэ можэм тэ дас зор и тэ подритярас ек еқэс.
19. Со поможыя тути тэ любис лэ ԥралэн и лэ ԥэян?
19 Кала ԥирэс пэ собрании, котэ ту виарақэса лашэ друӷонэн, савэ поможына тути тэ авэс май пашэ каринг о Иегова. Котэ ту уӷанэса разнонэ ԥралэн и ԥэян, савэ анда вся оди служын лэ Иеговасти. Вонэ кадяжэ, сар и ту, найсовершэни и шылинпэ. Важ када ту трэбуй тэ простис. (Адиносар Колоссянам 3:13.) Вся и время гиндосар ек пала лашэ качестворя, савэ исин кай и ԥрала и ԥэя андэ собрания и старысав тэ на шос сама пэ кода, со лэндэ най кадя. Тоди тути авэла май вушэро тэ любис лэн и ту авэса май пашэ каринг о Иегова.
ЧАЧУНИ ЖЫЗНЯ
20, 21. Со када «чачуни жызня»?
20 О Иегова камэл, кай всаворэ лэстирэ друӷоря тэ авэн бахталэ. Андэ Библия пистромэ, кай англэ амари жызня авэла авэр.
О Иегова камэл, кай тумэндэ тэ авэл «чачуни жызня». Ай ту старыиспэ тэ домардёс када?
21 Амэ ласа тэ жувас вечно, ай най 70—80 бэрш. Амэ жуваса андо шукарно раё. Амэндэ авэла лашо зор. Амэ никастар на дараса. И амэ па чачимастэ ашаса бахталэ! Андэ Библия ԥэнэнпэ, кай кацави жызня, када «чачуни жызня». О Иегова дэл алав, кай подария амэнди кацави жызня тоди, кала амэ «састэс» ласапэ пала чачуни жызня (1 Тимофею 6:12, 19).
22. а) Со сыкавэл «састэс тэ лэнпэ пала чачуни жызня»? б) Можэм амэ чи най тэ затерас и вечно жызня? Росԥэн.
22 Со када «састэс тэ лэнпэ пала чачуни жызня»? Када «тэ терэн лашимос» и «тэ барвадён лащя диласа» (1 Тимофею 6:18). Аврэ алавэнца, трэбуй тэ жувас кадя, сар амэ уӷанас анда Библия. Но и чачуни вечно жызня, када най кода, со амэ затердям. Када подарко лэ Иеговастар, «лашимос, саво амэ на затердям» (Римлянам 5:15). Патян, амаро небесно Дад фартэ камэл тэ дэл вечно жызня всаворэ служытелёнэнди, савэ на парашэн лэс тэ кандэн.
23. Со инке трэбуй тэ терэс? Росԥэн.
23 Пуш пэстар: «Тэлював мэ лэ Дэвлэсти кадя, сар во камэл?» Если тути здэлпэ, кай трэбуй инке варисо тэ парувэс андэ пэстири жызня, стер када со май йто. О Иегова фэрия тут, если ту лэса тэ кандэс лэс и тэ патяс лэсти. О Иегова дя алав, кай дэла вечно жызня и фэрия пэстирэ служытелёнэн андэ послидни деса лэ Сатанастиря люмати. Да, тутэ можэт тэ авэл чачуни жызня! Ту трэбуй екжэно када тэ витидэс.