Тэрнэ мануша, домардён, кай тэ спасынпэ

1. Васо кажно христианино трэбуй тэ болдёл? (Диқэн и картинка англа статья.)

КАЖНО бэрш болдён тысячи мануша, савэ сытён па Библия. Машкар лэндэ бут бэятцэ и тэрнэ мануша. Дэсавэ андар лэндэ барелэ андэ еря, савэ лэ Иеговастирэ свидетеля. Может и ту барелян андэ кацаво ери. И важ кода, со ту стердян, трэбуй тут тэ похвалис. Кажно христианино трэбуй тэ болдёл, кай тэ спасыйпэ и тэ жувэл вечно (Матф. 28:19, 20; 1 Пет. 3:21).

2. Васо трэбуй тэ на дарас тэ болдёс?

² Кала о мануш болдёл, када дэл лэсти бут со инке тэ терэл андэ служения лэ Иеговасти. Но лэсти трэбуй тэ сэрэл, кай во кадэла времятар трэбуй тэ дэл отчёто англа Дэл. Англа кода, сар тэ болдёс, тутар пушлэ: «Каисайлян ту андэ кода, кай терэсас и грехоря, кай о Иегова тэ простий тут через лэ Иисусости смэрть, и дян ту алав лэ Иеговасти тэ жувэс важ лэстэ?» И ту ԥэндян алав «да». Кала ту болделян, ту англа всаворэ сыкадян, кай дян алав лэ Дэвлэсти тэ жувэс важ лэстэ, кай лэса вся время тэ любис лэс и кай кода, со камэл о Дэл, авэла тутэ пэ пэрво ҭан. Ту на трэбуй тэ гиндос, кай кода, со ту стердян, евья. Тэ отдэс пэс лэ Иеговасти, када само лашо, со о мануш может тэ витидэл. Если о мануш на кандэл лэ Иеговас, во жувэл андо миро, савэса правий о Сатана. О Сатана на камэл, кай ту тэ спасыспэ. Во авелоп радо, если ту тэ залэс лэстири риг и тэ отԥэндёспэ лэ Иеговастар и тэ парашэс тэ аштярэс о лашимос тэ жувэс вечно.

3. Саво лашимос тутэ исин после кода, кала ту болделян?

³ Акана погиндосар, саво лашимос тутэ исин после кода, кала болделян. Ту дян алав тэ жувэс важ о Иегова и важ када ту можешь тэ ԥэнэс: «О Иегова важ мандэ, на лава тэ дарав. Со стерэла манди о мануш?» (Пс. 118:6). Тэ авэс пэ Иеговастири риг и тэ ӷанэс, кай во абурой туса, када фартэ бари честь!

ЕКЖЭНО ТРЭБУЙ ТЭ ДЭС ОТЧЁТО АНГЛА ДЭЛ

4, 5. а) Васо можно тэ ԥэнас, кай после кода, сар о мануш болделя, во кати пала пэстэ дэла отчёто англа Дэл? б) Саво ԥаримос исин най кати кай и тэрнэ христианоря?

⁴ Ту болделян и тири дружба лэ Иеговаса на шолпэ по интернето, саво исин андо цэр и саво стодэ и родителя, ай тэ лэл может кажно. Кати ту екжэно можешь тэ стерэс кадя, кай тэ спасыспэ, даже если ту инке жувэс лэ родителёнэнца. Васо пала када трэбуй тэ сэрэс. Важ кода кай никала на ӷанэс, со авэла англэ. Если ту болделян бэятоса, ай тоди подбарелян, тутэ может тэ авэл по ди кацаво, со инке на сас и тэ авэн нэвэ проблемы. Ек ԥэй ԥэндя: «Кацаво ридко может тэ авэл, кай через о торто, саво дэн по день рожденья, о бэято лэл тэ гиндой, кай евья ашэля лэ Иеговаско свидетелё, важ кода кай во на хал лэс». Но сар прожан бэрша, кала лэ шаворэсти или ла щеёрати камэлпэ тэ терэн кода, со кати может тэ авэл машкар ром и ромни, лэнди трэбуй фартэ тэ патян, кай лэ Иеговаско дром вся время само лашо.

⁵ Най кати кай и тэрнэ мануша исин варисаво нэво ԥаримос. Во может тэ авэл и кай кодэла, ко болделя най андэ тэрнэ бэрша. Ԥаримос может тэ авэл после кода, сар женисайлэ или лэ зорэса, или ла бутяса. Кажнонэстэ авэла ԥари время, андэ сави дицола, пэ скати во патял лэ Иеговасти (Иак. 1:12—14).

6. а) Со сыкавэл, кай андо алав, саво ту дян лэ Дэвлэсти тэ жувэс важ лэстэ, нинай алав «если»? б) Сости ту сытёс анда Филиппийцам 4:11—13?

⁶ Со поможыя тути, со бы тэ на авэл, тэ на парашэс тэ кандэс лэ Иеговас? Вся время сэр, кай андо алав, саво дян тэ жувэс важ о Дэл, нинай алав «если». Васо? Важ кода кай ту дян кадэва алав кодэлэсти, ко Хулай понад вся Люма. Ту дян алав, кай лэса тэ служис лэсти, даже если тирэ родителя и другоря парашэна када тэ терэн (Пс. 27:10). Со бы тутэ тэ на авэл, манг лэ Иеговас, кай во тэ дэл тути зор тэ зритярэс о алав, саво ту дян лэсти. (Адиносар Филиппийцам 4:11—13a).

7. Со када ла дараса и тэ тиноспэ ла даратар тэ домардёс, кай тэ спасыспэ?

⁷ О Иегова камэл, кай ту тэ авэс лэско друго. Но кай тэ фэрис кадэя дружба и кай тэ домардёс, кай тэ спасыспэ, трэбуй тэ стос зор. Андэ Филиппийцам 2:12 ԥэнэнпэ, кай трэбуй ла дараса и тэ тиноспэ ла даратар тэ домардёс, кай тэ спасыспэ. Кадэла алава сыкавэн, кай тути трэбуй драго тэ погиндос, сар тэ ашэспэ лэ Иеговаско друго даже тоди, кала исин ԥаримос. Трэбуй тэ фэриспэ и тэ на гиндос, кай туса на авэла кадя, кай ту ашавэса лэ Дэвлэс, даже кала дэсавэ, ко служинас бут бэрша лэ Дэвлэсти ашадэ лэс. Со поможыя тути тэ домардёс, кай тэ спасыспэ?

ТЭ СЫТЁС ПА БИБЛИЯ

8. Васо ту трэбуй тэ сытёс па Библия и васо када важно?

⁸ Кай тэ дружис лэ Иеговаса, трэбуй лэса тэ дэс дума. Сар ту можешь тэ ашунэс кода, со тути ԥэнэн о Иегова? Главно, со трэбуй тэ терэс, када тэ сытёс па Библия. Ту сытёс пар латэ, кала адинос и Библия и амари литература, сави стерди пар латэ. Ай кадяжэ, кала гиндос пала кода, со проадиносардян. Тэ сытёс па Библия на шолпэ пэ кода, кала адинос школьно учебнико или кала висытёс кода, со андэр лэстэ. Тэ сытёс па Библия, када, сар о мануш варикаринг ладэл и котэ бут со нэво уӷанэн. Када шолпэ, кала бут со уӷанэс пала Иегова. Через вся када ту пашос май пашэ каринг о Дэл, ай во пэстиря ригатар пашол каринг тутэ (Иак. 4:8).

9. Со ту лэс, кала сытёс па Библия?

⁹ Лэ Иеговастири организация дэл бут со, пар со тэ сытёс и ту можешь тэ стидэс кода, со пала со тэ уӷанэс. Бут лашэ гиндоря кадяжэ исин андэ статья «Как сделать чтение Библии занимательным?», сави андэ «Пробудитесь!» пала апрелё 2009 бэрш котэ, кай исин «Вопросы молодежи». Тэ сытёс па Библия и тэ гиндос пала кода, со адиносардян, фартэ трэбуй, если камэс тэ домардёс, кай тэ спасыспэ. (Адиносар Псалом 119:105b).

ТЭ МАНГЭСПЭ ЛЭ ДЭВЛЭСТИ

10. Васо кодэла, ко болделэ, трэбуй тэ мангэнпэ лэ Иеговасти?

¹⁰ Кала сытёс па Библия, ту ашунэс лэ Иеговаско голосо, ай кала мангэспэ, ту дэс дума лэса. Тути на трэбуй тэ гиндос, кай тэ мангэспэ трэбуй кати, кай кадя присытелян или кай алава анда молитва тэ анэн тути лашимос. Чаче, кала ту мангэспэ, о Создателё ашунэл тут, и во камэл, кай ту тэ дэс дума лэса. (Адиносар Филиппийцам 4:6c). Если ту фартэ пала варисо пэрэживаешь, тер кадя, сар подԥэнэн и Библия: «Отдэ пэско ԥаримос лэ Иеговасти и во поможыя тути. Во никала на дэла тэ пэрэл кодэлэсти, ко кандэл лэс» (Пс. 55:22). Ту патяс, кай кадя и исин? Миллионоря ԥрала и ԥэя, савэ андэ собрания, могут тэ ԥэнэн тути, кай када поможый. Кода, со подԥэнэн и Библия, поможыя и тути!

11. Васо трэбуй вся время тэ авэс благодарно лэ Иеговасти?

¹¹ Кала мангэспэ трэбуй най кати тэ мангэс, кай о Иегова тэ поможый тути. Андэ Библия ԥэнэнпэ: «Авэн благодарни» (Кол. 3:15). Дэкала ту фартэ пэрэживаешь пала пэско ԥаримос, кай на шос сама, скати лашимос тутэ исин. Можешь тэ стерэс кадя, кай кажно дес тэ виарақэс хоть трин моменторя, пала савэ ту благодарно лэ Иеговасти и тэ ԥэнэс лэсти пала када андэ молитва. Абигейл, сави болделя, кала лати сас 12 бэрш, росԥэнэн: «Мэ ӷанав, кай па вся Люма кати о Иегова достойно, кай и мануша лэс тэ благодарин. Амэ трэбуй кажно разо тэ ԥэнас „наис“ пала лэстирэ подаркоря, савэ во дэл амэнди. Еқвар мэ акэ со ашундэм: „Если бы амэндэ тэсара авелоп кати кода, пала со амэ ԥэндям „наис“ лэ Иеговасти арати, тоди со амэндэ ашэлоп пэ кадэва дес?“».

ЦЕНИСАР КОДА, СО САС АНДЭ ТИРИ ЖИЗНЯ

12, 13. Васо трэбуй тэ гиндос, андэр со о Иегова тути дэл лашимос?

¹² О Иегова най еқвар поможыяс лэ царёсти лэ Давидости андэ ԥари время. О Давидо пистросардя о псалом, андэ саво дилабэлас: «Дэндалэн и уӷанэн, саво лашимос дэл о Иегова. Бахтало о мануш, савэс во фэрий» (Пс. 34:8). Кадэла алава сыкавэн, пэ скати важно, со сас кай о мануш андэ жизня. Кала адинос и Библия, амари литература и сар ԥирэс пэ христиански собрании, ту уӷанэса, сар о Дэл поможыяс аврэ манушэнди тэ тэлён кати лэсти. Кадэлэстар ашэл май драго по ди. Но кай тири дружба лэ Иеговаса тэ ашэл май састи, тути трэбуй тэ додиқэс, сар о Иегова поможый тути. Сас андэ тири жизня кацаво, кала ту полян, кай о Иегова дя тути лашимос?

¹³ Кай всаворэ христианоря андэ када исин варисо ек. О Иегова кажнонэсти дя лашимос, кала ақардя каринг пэстэ и каринг пэско Шаво. О Иисусо ԥэндя: «Нико нэ может тэ авэл каринг мандэ, если о Дад, саво бишалдя ман, на ақарэла лэс каринг мандэ» (Иоан. 6:44). Исин тутэ андо ди, кай кадэла алава и каринг тутэ? Может ту гиндос: «О Иегова ақардя най ман, ай лэ родителёнэн. Мэ просто терав, сар вонэ». Но кала ту дян алав лэ Иеговасти тэ жувэс важ лэстэ и болделян, ту сыкадян, кай во тиро фартэ лашо друго. И Библия ԥэнэн амэнди: «Если, ко любий лэ Дэвлэс, тоди кодэлэ манушэс ӷанэн о Дэл» (1 Кор. 8:3). Вся время ценисар пэско ҭан андэ лэ Иеговасти организация.

14, 15. Сар кода, кай ту росԥэнэс аврэнди важ о Дэл, стерэла тири вера май састи?

¹⁴ Ту кадяжэ можешь тэ диқэс о лашимос андэ кода, кай о Иегова поможый тути, акэ андэр со. О Дэл поможый тути, кала ту росԥэнэс, андэр со патяс, кодэлэнди, ко туса сытёл андэ школа и кала пала када росԥэнэс цэр цэрэстар, па телефоно, сытярэс лэ манушэс па Библия или инке варикай. Дэсавэнди ԥарэс тэ росԥэнэн важ о Дэл кодэлэнди, ко лэса сытёл андэ школа. И амэ полас васо. Никала на ӷанэс, со вонэ тути ԥэнэна. Дэкала дарас тэ дэс дума, андэр со патяс, кала ту екжэно лэ манушэса. А май фартэ ту можешь тэ дарас, кала росԥэнэс, андэр со патяс, англа бут мануша. Со поможыя тути тэ улэс и дар?

¹⁵ Спэрва погиндосар, васо, андэр со ту патяс, и исин чачимос. Виарак время, кай тэ погиндос, андэр со ту патяс, васо ту андэ када патяс и сар пала када ту можешь тэ росԥэнэс аврэнди. Кала ту екжэно патяс и ӷанэс, сар тэ дэс дума, тути закамэлапэ тэ росԥэнэс пала Иегова варикасти (Иер. 20:8, 9).

16. Со поможыя тэ улэс и дар, сави на дэл тэ дэс дума аврэнца, андэр со патяс?

¹⁶ Но даже, кала ту вся стердян, кай драго тэ росԥэнэс, андэр со патяс, тути может тэ авэл всаек ԥарэс када тэ терэс. Ек ԥэй, сави болделя андэ 13 бэрш, акана лати 18 бэрш, росԥэнэн: «Мэ ӷанавас, андэр со мэ патявас. Но дэкала манди сас ԥарэс тэ ԥэнав кода, со гиндосарав». Со поможый лати андэ када? Вой росԥэнэн: «Мэ андярав пэс кадя, сар андэ жизня. Кодэла, каса мэ сытював андэ школа росԥэнэн пала кода, со терэн. Тоди, васо мэ нэ могу кадя тэ терав? Важ када андэ дума проԥэнав кацавэ алава: „Мэ найдэлмут давас дума лэ манушэнца пала Библия“. После када мэ росԥэнав, со манца сас. Хоть пала кода, со мэ росԥэнав най анда Библия, бут ко камэл тэ уӷанэн, сар мэ када терав. Дэкала вонэ мандар пушэн. Со май часто мэ терав кадя, со май вушэро вижал. После када мандэ вся время бари радость андо ди!»

17. Со поможыя тути, кала дэс дума аврэнца, тэ на дарас?

¹⁷ Кала ту стос патив пэ кодэла, каса дэс дума и камэс тэ уӷанэс, со вонэ гиндон, тоди лэнди авэла май вушэро тэ стон патив пэр тутэ и пэ кода, андэр со ту патяс. И Оливия болделя, кала сас бэята. Акана лати 17 бэрш и вой росԥэнэн: «Кала мэ давас дума лэ манушэнца, мэ вся время даравас тэ ԥэнав важ и Библия. Мэ гиндосаравас, кай вонэ ԥэнэна, кай мэ дав дума кати пала кода, андэр со патяв». Тоди пэ кода вой диқля авря ригатар. Кай тэ на дарал, вой парашэля тэ гиндой кати пала пэстири дар. Вой ля тэ гиндой кадя: «Бут тэрнэ мануша нисо на ӷанэн важ лэ Иеговастирэ свидетеля. Анда свидетеля вонэ ӷанэн кати амэн. Важ када, сар амэ андярас пэс, вонэ лэна тэ ашунэн амэн или на закамэна. Ай, со если амэ дарас, лажас и ужастар ла думатар, кала и дума зажал пала амари вера. Или кала дас дума нервичисарас? Лэнди может тэ здэлпэ, кай амэ лажас кодэлэстар, андэр со патяс. Через кода, кай дарас тэ росԥэнас, вонэ могут грубо тэ дэн дума амэнца. Но если амэ на дарас, кала росԥэнас, андэр со патяс и дас дума кадя, сар андэ жизня, спокойно, тоди и вонэ стона патив пар мандэ».

ДОМАРДЮ, КАЙ ТЭ СПАСЫСПЭ!

18. Со ту трэбуй тэ терэс, кай тэ домардёс, кай тэ спасыспэ?

¹⁸ Ту уже полян, кати ту екжэно можешь тэ терэс кадя, кай тэ спасыспэ. Кажно христианино трэбуй тэ домардёл, кай тэ спасыйпэ. Важ када трэбуй тэ адинос и Библия и тэ гиндос, со проадиносардян, тэ мангэспэ лэ Иеговасти и тэ ԥэнэс «наис» лэсти важ вся, со во терэл важ тутэ. Вся када поможыя тути тэ патяс, кай о Иегова, тиро Друго, и поможыя, кай ту смило тэ дэс дума аврэнца, андэр со патяс. (Адиносар Псалом 73:28d).

19. Васо трэбуй тэ стос зор, кай тэ домардёс, кай тэ спасыспэ?

¹⁹ О Иисусо ԥэндя: «Если варико закамэла тэ жал пала мандэ, мэк отԥэндёлапэ пэстар, лэла пэско ԥаримос и вся время жала пала мандэ» (Матф. 16:24). Кай тэ авэс христианиноса, трэбуй тэ дэс алав лэ Иеговасти, кай жувэса важ лэстэ и тэ болдёс. Када само лашо дром, и пэр лэстэ ту кати лэс тэ жас. И кадэва дром анэна тут каринг и вечно жизня андо нэво миро, пала саво о Иегова дя алав. Важ кода домардю, кай тэ спасыспэ!