Ту екжэно трэбуй тэ витидэс, сави жизня тутэ авэла англэ!
НАЩИ ТУ ЕКЖЭНО ВАРИСО ТЭ ПАРУВЭС АНДЭ КОДА, СО ТУТЭ АВЭЛА АНГЛЭ? Дэсавэ мануша гиндон, кай нисар на парувэса андэ пэстири жизня кода, со авэла англэ. Васо? Важ кода кай о мануш нэ может тэ витидэл, сави лэстэ авэла жизня, важ кода, кай лэстэ исин судьба. Кала кацавэ манушэндэ варисо на вижал, со вонэ камлэ тэ стерэн, вонэ отԥэндёнпэ кадэлэстар. Кадэла мануша ԥэнэн: «Вижал кадя сас трэбуй тэ авэл лэ Дэвлэстар!»
Авэр мануша умэкэн и вас, кала лэнца найдраго обжылэпэ и кала варикас марэн и умарэн. Файма, вонэ варикала камлэ варисо тэ терэн андэ пэстири жизня, кай вой тэ авэл май лащи, но андэ лэндири жизня варисо жалас най кадя. Андэ лэндири жизня сас насвалимос чи войны, чи ураӷаноря, тинояспэ и ԥув, чи инке варисавэ биды. Файма, кацавэ мануша гиндон: «Сости трэбуй каринг варисо тэ домардював, сар всаек вся хасарава?»
Чаче, кода, со терэлпэ андэ амари жизня, дэкала фартэ ла парувэл (Экклезиаст 9:11). Но кода, кай жувэса ту вечно чи най, дицола кодэлэстар, со ту витидэса. Шу сама, со пала када ԥэнэнпэ андэ Библия.
Англа кода, сар израильтяноря авелэ кордэ, кай сас и ԥув, пала сави о Иегова ԥэндя, кай авэла лэндири, лэнго барэдэр о Моисеё, ԥэндя лэнди лэ Дэвлэстар: «Мэ дав, кай тумэ екжэнэ тэ витидэн и жизня чи смэрть, блаӷословения чи амрая. Витидэ и жизня, кай тэ жувэс, ту екжэно и кодэла, ко тутар жана, кай тэ любис тирэ Дэвлэс лэ Иеговас, тэ ашунэс лэско ӷолосо и тэ на парашэс тэ кандэс лэс» (Второзаконие 30:15, 19, 20).
«Мэ дав, кай тумэ екжэнэ тэ витидэн и жизня чи смэрть, блаӷословения чи амрая. Витидэ и жизня» (Второзаконие 30:19).
О Дэл виандярдя лэ израильтянонэн анда еӷипетско рабство и дя алав лэнди, кай вонэ жувэна бахталэс и нико пэр лэндэ на тасавэла пэ кадэя ԥув. Но када на сыкавэл, кай лэнди дорэслопэ кадэя ԥув просто кадя. Лэнди трэбуй сас «тэ витидэн и жизня». Ай сар када тэ терэн? Лэнди трэбуй сас тэ любин лэ Дэвлэс, тэ ашунэн, со во ԥэнэн и тэ на парашэн лэс тэ кандэн.
Адес кадяжэ, сар и израильтяноря, кажно мануш трэбуй тэ витидэл. И кодэлэстар, со во витидэла, дицола, со лэстэ авэла англэ. Лэсти кадяжэ трэбуй тэ любий лэ Дэвлэс, тэ кандэл лэс и тэ на парашэл када тэ терэл. Кала во кадя терэл, во сыкавэл, кай витидэл и жизня, када вечно жизня андо раё пэ ԥув. Уӷанаса акэ пала со.
ЛЮБИСАР ЛЭ ДЭВЛЭС
Любовь, када само ӷлавно, со исин кай о Дэл. О апостоло о Иоанно пистросардя: «О Дэл исин любовь» (1 Иоанна 4:8). Кала лэ Иисусостар пушлэ, саво само баро законо, пэ када во ԥэндя: «Любисар пэстирэ Дэвлэс лэ Иеговас всаворэ одеса, всаворя жизняса, всаворя годяса» (Матфея 22:37). И чачуни дружба лэ Дэвлэса, трэбуй тэ авэл най через и дар и най важ кода кай тэлювас лэсти, сар раборя, ай важ кода кай любисарас лэс. Но васо трэбуй тэ любисарас лэ Дэвлэс?
О Иегова любий лэ манушэн кадя, сар о дад и дэй любин пэстирэ бэятонэн. О дад и дэй, савэ любин пэстирэ бэятонэн, вонэ сытярэн, поможын и подритярэн лэн. Васо? Важ кода кай камэн важ и бэятцэ вся, со май лашо. Но со о дад и дэй аштярэн лэндар? Вонэ камэн, кай и бэятцэ тэ любин лэн и тэ приашундёнпэ каринг кодэва лашимос, саво вонэ подԥэнэн лэнди. Хэба, када найгодявэрнэс авелоп тэ гиндосарас, кай амаро дад, саво по нэбо, кадяжэ камэл, кай амэ тэ ценисарас вся, со во важ амэндэ терэл?
КАНДЭ ЛЭ ДЭВЛЭС
Тэ кандас лэ Дэвлэс, вижал, када тэ терас кадя, сар во ԥэнэн. Чаче, амэ на ашунас лэ Дэвлэско ӷолосо, но амэ можем тэ адиносарас лэско алав и Библия. Ай кадяжэ тэ жувас кадя, сар андэр латэ ԥэнэнпэ (1 Иоанна 5:3).
Акэ, со ԥэндя о Иисусо пала кода, пэ скати трэбуй тэ кандас лэ Иеговас: «Най кати еқэ марнэса о мануш трэбуй тэ жувэл, но кажнонэ алавэса, саво вижал анда лэ Иеговаско муй» (Матфея 4:4). Кадяжэ, сар лэ манушэсти трэбуй тэ хал, кай тэ жувэл, кадяжэ фартэ трэбуй лэ манушэсти тэ уӷанэн пала Дэл. Тэ уӷанэн пала Дэл, инке май фартэ трэбуй, чем о хамос. Васо кадя можно тэ ԥэнас? О царё о Соломоно ԥэндя: «Важ кода кай и мудрость, сар и ловэ фэрин, но о лашимос ла мудростятар и кодэлэстар, со ӷанэн, фэрин и жизня кодэлэсти, кастэ вонэ исин» (Экклезиаст 7:12). И мудрость и кода, сости сытярэл амэн о Дэл, фэрий уже адес и поможый тэ витидас годяса, кай англэ тэ жувас вечно.
НА ПАРАШ ТЭ КАНДЭС ЛЭ ДЭВЛЭС
Шам сама пэ Иисусостирэ алава, савэ во ԥэндя андэ статья, сави сас май англал: «И вуськи вороты и о тисно дром андярэл каринг и жизня и лэс найбут виарақэн» (Матфея 7:13, 14). Па дром, саво андярэл каринг и вечно жизня, амэндэ по ди авелоп май драго, сар паша амэндэ тэ авэл кодэва, ко драго ӷанэн тэ сыкавэл о дром. Акэ, васо амэнди трэбуй тэ ашаспэ лэ Дэвлэса (Псалом 16:8). Со важ када трэбуй?
Всаворэндэ амэндэ исин фартэ бут дилы, савэ амэ трэбуй тэ терас. Ай кадяжэ исин инке кода, со амэнди чалёл тэ терас. Через када вся, амэндэ может тэ на ашэлпэ время тэ гиндосарас пала кода, со амэндар аштярэл о Дэл. Важ када, кай тэ на бистрас, андэ Библия ԥэнэнпэ: «Драго диқэн, кай тумэ тэ андярэн пэс най сар найгодявэрнэ мануша, ай сар годявэрнэ. Витинэн важ пэстэ время, важ кода кай андэ кадэла деса бут найлашимос» (Эфесянам 5:15, 16). Амэ ашасапэ лэ Дэвлэса, кала ценисараса кадэя дружба и кала вой амэндэ авэла пэ пэрво ҭан (Матфея 6:33).
ТУТИ ТРЭБУЙ ЕКЖЭНЭСТИ ТЭ ВИТИДЭС
Кода, со сас андэ жизня уже на парувэса. Но амэ можем тэ терас кадя, кай амэндэ и кодэлэндэ, кас амэ любисарас, англэ, андэ жизня, тэ авэл па аврятэ. Амаро небесно дад, о Дэл Иегова, фартэ любий лэ манушэн и драго росԥэнэн, со во амэндар аштярэл. Диқэн, со пала када ԥэндя о пророко о Михеё:
«Во ԥэндя тути, мануш, со лашо. Хэба, о Иегова аштярэл тутар инке варисо? Кати кода, кай андэ тири дила тэ дицол чачимос, тэ любис тэ терэс лашимос и тэ авэс сэжо, кала ԥирэс англа Дэл!» (Михей 6:8).
Сэр, о Иегова камэл, кай ту драго тэ полэс лэс, ай во тут. Во камэл, кай ту тэ жувэс вечно. Но тути трэбуй екжэнэсти тэ витидэс!