Дада и дэя, тумэ дэн зор пэстирэ бэятонэнди тэ жан каринг кода, кай тэ болдён?

1. Со камэн тэ полэн и годявэрнэ родителя англа кода, сар лэндирэ бэятцэ тэ болдён?

СО СЭРЭЛ и Блоссом Брандт, сави болделя 31 декабря андо 1934 бэрш? Вой сэрэл, сар вой най ек шон ԥэнэнас пэстирэ родителёнэнди, кай камэл тэ болдёл. И родителя най еқвар ласа пала када дэнас дума. Состэ? Важ кода кай камэнас тэ уӷанэн, полэл вой, пэ скати када дэ бари дила, кай тэ болдёл. Адес и дада и дэя кадяжэ камэн, кай лэндирэ бэятцэ тэ витидэн, со годявэрнэс. Дэкала о дад и дэй ԥэнэн, кай лэнго бэято инке на трэбуй тэ болдёл, хоть лэндэ и нинай, васо о бэято тэ на болдёл. Но со кадэлэстар может тэ авэл? Тэ хасардёлпэ лэ бэятостири дружба лэ Дэвлэса (Иак. 4:17). Но со трэбуй тэ терэн и годявэрнэ родителя? Вонэ трэбуй англа кода, сар о бэято тэ болдёл, драго тэ полэн, исин кай лэнго бэято кацави вера, кай во тэ лэл пэр пэстэ лэ Христоско ӷамо чи най.

2. а) Пэр со шон сама дэсавэ районни надзирателя? б) Пала со амэ подаса дума андэ кадэя статья?

² Дэсавэ районни надзирателя фартэ загиндонпэ пала тэрнэ шавэ и щея андэ собрании, савэнди варикай 20 бэрш. Васо? Важ кода кай вонэ вибарелэ андэ еря, савэ свидетеля, ай инке на болделэ. Бут анда кадэлэ тэрнэ мануша ԥирэн пэ собрании и росԥэнэн важ о Дэл. Вонэ гиндон, кай вонэ лэ Иеговастирэ свидетеля. Но на грабинпэ тэ дэн лэ Иеговасти алав тэ жувэн важ лэстэ и тэ болдён. Васо? Важ кода кай дэкала и родителя лэнди ԥэнэн, кай вонэ тэ на грабинпэ када тэ терэн. Андэ кадэя статья амэ подаса дума, васо дэсавэ дада и дэя фартэ загиндонпэ и на домэкэн пэстирэ бэятонэн тэ болдён.

ПОДЖЫЛЭ И БЭРША МЭРНЭ БЭЯТОСТИ, КАЙ ТЭ БОЛДЁЛ?

3. Пала со фартэ загиндонаспэ ла Блоссоматирэ родителя?

³ Андэ пэрво абзацо ԥэнэнпэ пала ла Блоссоматирэ родителя. Вонэ фартэ загиндонаспэ акэ пала со. Поджылэ лати и бэрша, кай вой тэ полэл, пэ скати када дэ бари дила тэ болдёл? Сар о дад и дэй тэ полэн, трэбуй уже лэнго бэято тэ дэл алав тэ жувэл важ о Иегова чи най?

4. Сар кода, со о Иисусо приԥэндя андэ Матфея 28:19, 20 поможый лэ родителёнэнди, кала сытярэн лэ бэятонэн?

⁴ Адиносар Матфея 28:19, 20a. Сар ԥэнэнаспэ андэ пэрво статья, андэ Библия на ԥэнэнпэ, скати трэбуй тэ авэл бэрш лэ манушэсти, кай во тэ болдёл. Драго, кала и родителя погиндона, со сыкавэн и алава «сытярэн лэ манушэн, кай вонэ тэ авэн ученикоря». Пэ ӷреческо шыб и алава, савэ кадяжэ исин андэ Матфея 28:19 сыкавэн, кай трэбуй тэ сытярэн лэ манушэн, кай вонэ тэ ашэн «ученикоря». Ко када ученико? Када, ко сытёл и полэл, сости сытярэлас о Иисусо и ко камэл тэ кандэл лэс. Важ када и родителя трэбуй акэ пала со тэ сэрэн. Кала арақадёнпэ бэятцэ и родителя трэбуй тэ сытярэн лэн. Тэ сытярэн кадя, кай и бэятцэ тэ камэн тэ дэн алав лэ Иеговасти тэ жувэн важ лэстэ и тэ ашэн лэ Христостирэ ученикоря. Андэ Библия пистромэ, даже кай и бэятцэ вижала тэ полэн и тэ любин о чачимос анда Библия. Но, ԥарнэндирэ бэятонэн нащи тэ болэн.

5, 6. а) Сар ԥэнэнпэ пала Тимофеё андэ Библия, кала, файма, во болделя? б) Сар и родителя, савэ диқэн май дур, драго поможын пэстирэ бэятонэнди?

⁵ О Тимофеё инке андэ тэрнэ бэрша витидя тэ терэл дила важ о Иегова. Па лэ Павлостирэ алава о Тимофеё «жы лэ бэятоса ӷанэнас и свынти писании». Андэ лэско ери най всаворэ служинас лэ Иеговасти, кати лэ Тимофеёстири дэй и баба. Вонэ слинэ еврейки и сытярдэ лэс, кай во тэ любий лэ Дэвлэско алав. Через када лэ Тимофеёстири вера ашэля бари (2 Тим. 1:5; 3:14, 15). Кала лэ Тимофеёсти сас варикай 20 бэрш, во уже сас лэ Христоско ученико. Лэсти уже дэнас тэ терэл дила андэ собрания (Деян. 16:1—3).

⁶ Всаворэ бэятцэ разни. Дэсавэ бэятонэндэ и вера ашэл бари андэ найбарэ бэрша, ай варикасти, кай и вера тэ авэл бари, трэбуй тэ подбарёл. Варико андар лэндэ, уже андэ найбарэ бэрша, драго полэн о чачимос анда Библия. Кадяжэ вонэ ӷанэн тэ витидэн кода, со годявэрнэс и ԥэнэн, кай камэн тэ болдён. Ай аврэ бэятонэнди, кай тэ болдён, трэбуй набут тэ подбарён. Важ када и родителя, савэ диқэн май дур, на лэна тэ тасавэн пэ пэстирэ бэятцэ, кай май йто тэ болдён. Но вонэ диқэн бари лэндэ вера чи най и поможын пэстирэ бэятонэнди тэ жан каринг кода, кай тэ болдён. Чаче, и родителя лошалэ, кала лэнго бэято терэл кода, со годявэрнэс. (Адиносар Притчи 27:11b). Но лэ родителёнэнди на трэбуй тэ бистрэн, кай вонэ трэбуй тэ поможын лэ бэятости, кай о бэято тэ ашэл лэ Христоско ученико. Кала вонэ пала када сэрэн, вонэ трэбуй тэ пушэн пэстар акэ со: «Драго мэрно бэято ӷанэн пала Иегова, кай тэ дэл алав тэ жувэл важ лэстэ и тэ болдёл?»

ДРАГО МЭРНО БЭЯТО ӶАНЭН О ЧАЧИМОС АНДА БИБЛИЯ?

7. Трэбуй кодэлэсти, ко болдёла, тэ ӷанэн вся анда Библия? Росԥэнэн.

⁷ И родителя трэбуй тэ сытярэн пэстирэ бэятонэн. Важ када вонэ камэн тэ росԥэнэн лэнди о чачимос анда Библия, кай вонэ лэс драго тэ ӷанэн. Но, кай тэ дэн лэ Иеговасти алав тэ жувэн важ лэстэ и тэ болдён, на трэбуй тэ ӷанэн вся. Васо? Важ кода кай всаворэ христианонэнди после кода, сар болделэ, трэбуй и май дур тэ сытён. (Адиносар Колоссянам 1:9, 10c). Ай скати трэбуй тэ ӷанэн, кай тэ болдён?

8, 9. Сости амэ сытювас анда кода, со сас андэ Филиппы лэ манушэса, саво диқэлас пала барунаря?

⁸ Диқаса, со сас еқэ ереса, саво жувэлас андэ пэрво вико (Деян. 16:25—33). Кала о Павло до дуйто жыля дур тэ росԥэнэн важ о Дэл, во жыля андо форо Филиппы. Када сас андо 50 бэрш лэ И. Х. Котэ лэ Павлос и лэ Силас стодэ андо баруно, важ кода кай пэр лэндэ хохадэ. И рят фартэ затиносайля и ԥув и через када и двэри андо баруно ԥэрнаделэ. О мануш, саво диқэлас пала барунаря, камля тэ умарэл пэс. Васо? Во гиндосардя, кай всаворэ барунаря унашлэтар. Но о Павло тердярдя лэс. Тоди о Павло и о Сила линэ тэ росԥэнэн лэсти и лэстирэ родости важ о Иисусо. Кодэла мануша слинэ фартэ блаӷодарни важ о чачимос анда Библия и йто болделэ. Сости амэ сытювас анда када?

⁹ О мануш, саво диқэлас пала барунаря, файма, сас варикала римско воино. Во на ӷанэнас, со ԥэнэнаспэ андэ писании. Важ кода кай тэ ашэл христианино, лэсти трэбуй сас спэрва тэ уӷанэн, саво чачимос анда писания ӷлавно. Инке тэ полэл, со када тэ авэл лэ Дэвлэско мануш и тэ витидэл тэ жувэл, сар сытярэлас о Христос. Пала набут время кадэва мануш уӷангля анда свынто писания, саво чачимос анда писания ӷлавно и поля, пэ скати дэ куч кадэва чачимос. Ай инке поля, кай лэсти трэбуй тэ на цырдэл время, кай тэ болдёл. Амэ патяс, после кода, сар во болделя, во на парашэлас и май дур тэ уӷанэн важ о Дэл. Тумэ диқэн, кай тумаро бэято любий лэ Иеговас и камэл тэ кандэл лэс. Ай кадяжэ диқэн, кай во полэл, васо трэбуй тэ дэл лэ Иеговасти алав тэ жувэл важ лэстэ и тэ болдёл. Погиндон, со тумэ трэбуй тэ терэн? Ԥэнэн лэсти, кай во тэ жал кай и старейшиноря, савэ диқэна, жувэл во кадя, сар ԥэнэнпэ андэ лэ Дэвлэско законо чи найd. После кода, сар тумаро бэято болделя, во, сар и авэр христианоря, лэла май бут и май драго тэ уӷанэн важ о Иегова вся пэстири жизня и даже вся вечность (Рим. 11:33, 34).

САВИ МАЙ ЛАЩИ ОБРАЗОВАНИЯ ВАЖ МЭРНО БЭЯТО?

10, 11. а) Со гиндон дэсавэ родителя? б) Пала со трэбуй тэ сэрэн и родителя?

¹⁰ Дэсавэ родителя гиндон, кай лэндирэ бэятонэнди трэбуй тэ поаштярэн, кай тэ болдён. Васо? Дэкин лэндэ на авэла бари образования и лащи бути. Кадэла родителя гиндон кадя, важ кода кай камэн важ пэстирэ бэятцэ со май лашо. Но па чачимастэ када поможыя? Ай кадэла гиндоря сжанпэ кодэлэса, со ԥэнэнпэ андэ Библия? Со пала када ԥэнэнпэ андэ лэ Дэвлэско алав? (Адиносар Экклезиаст 12:1e).

¹¹ Трэбуй тэ сэрас, кай кода, со дэл кадэва миро, на сжалпэ кодэлэса, со камэл и со гиндой о Иегова (Иак. 4:7, 8; 1 Иоан. 2:15—17; 5:19). Кала лэ бэятостэ авэла лащи дружба лэ Иеговаса, када лэс фэрия. Состар? Лэ Сатанастар, лэстирэ миростар и кодэлэстар, сар найдраго гиндон и мануша андэ кадэва миро. Кала и родителя спэрва ԥэнэн, кай лэ бэятонэндэ трэбуй тэ авэл образования и лащи бути, каринг со када анэн? Лэндирэ бэятцэ лэна тэ гиндон, кай када май куч, чем и дружба лэ Иеговаса. Хэба и родителя, савэ любин пэстирэ бэятонэн камэн, кай лэ Сатанаско миро тэ сытярэл лэн кодэлэсти, со трэбуй важ и бах? Чачуни бах авэла кати тоди, кала амэндэ пэ пэрво ҭан андэ жизня авэла о Иегова. (Адиносар Псалом 1:2, 3f).

АЙ САР О БЭЯТО БОЛДЁЛА, АЙ ТОДИ СТЕРЭЛА БЭЗЭХ?

12. Васо дэсавэ родителя камэн, кай лэндирэ бэятцэ тэ поаштярэн тэ болдён?

¹² Акэ, со ԥэнэн ек ԥэй, сави на камэлас, кай латири щей тэ болдёл: «Лажаво тэ ԥэнав, но мэ даравас, кай мэрни щей ашэла най лэ Иеговаско свидетелё». Бут родителя гиндон, сар кадэя ԥэй, кай лэндирэ бэятонэнди фэдэр тэ поаштярэн тэ болдён. Васо? Дэкин вонэ на пэрэбарёна, кай тэ парашэн тэ терэн варисо най кадя (Быт. 8:21; Прит. 22:15). Вонэ, файма, гиндон: «Сар мэрно бэято найболдо, тоди лэсти на ԥэнэна, кай во будэр най лэ Иеговаско свидетелё». Но васо нащи кадя тэ гиндос? (Иак. 1:22).

13. Чаче, о Иегова ни пала со на спушэла лэ манушэстар, саво найболдо? Росԥэнэн.

¹³ Чаче, и родителя на камэн, кай лэндирэ бэятцэ тэ болдён. Васо? Важ кода кай инке на поджыля время, андэ сави вонэ закамэна тэ дэн алав лэ Иеговасти тэ жувэн важ лэстэ. Найдраго тэ гиндос, кала о мануш найболдо, о Дэл лэстар ни пала со на спушэла. Васо? О Иегова спушэла амэндар пала кода, со амэ терас, ай най, кай болделям. О Дэл аштярэл лэ бэятостар, кай во лэла тэ ритярэл лэско законо кодэла времятар, кала во ля тэ полэл, со чалёл лэ Иеговасти, ай со най. (Адиносар Иакова 4:17g). Важ када и родителя на трэбуй тэ ԥэнэн, кай о бэято тэ на болдёл, ай тэ терэн кадя, кай во лэндар тэ сытёл. И годявэрнэ родителя сытярэн лэ бэятос тэ любий лэ Иеговаско законо, сар во инке цыкноро (Луки 6:40). Кода, кай во екжэно лэла тэ терэл кадя, сар чалёл лэ Иеговасти, када фэрия лэ бэятос, кай во тэ на терэл бэзэх (Ис. 35:8).

САР АВЭР ТЭ ДЭН ЗОР?

14. Сар и старейшиноря тэ поможын лэ родителёнэнди, кай лэндирэ бэятцэ тэ закамэн тэ болдён?

¹⁴ И старейшиноря дэн зор лэ родителёнэнди, кала драго дэн дума лэндирэ бэятонэнца, со вонэ камэн тэ терэн пэ Дэвлэско дром. Ек ԥэй сэрэлас, кала лати сас шов бэрш, ласа дя дума о ԥрал Расселло. Вой росԥэнэнас: «Минут 15 во дэлас дума манца, со мэ камав тэ терав пэ Дэвлэско дром». И со када андя? Прожыля набут время и кадэя ԥэй ашэля пионеро и служисардя кадя, май бут чем 70 бэрш! Чаче, кала хвалис лэ манушэс и ԥэнэс лашэ алава, када ашэлпэ лэстэ андо ди пэ бут бэрша (Прит. 25:11). Инке и старейшиноря ақарэн лэ родителёнэн лэ бэятонэнца, кай вонэ тэ терэн дила андо зало, кай тидэнпэ лэ Иеговастирэ свидетеля. Котэ вонэ дэн и дила лэ бэятонэнди па лэндирэ бэрша и па лэнго зор.

15. Сар и ԥрала и ԥэя подритярэн лэ тэрнэ манушэн?

¹⁵ И ԥрала и ԥэя кадяжэ трэбуй тэ шон сама пэ тэрнэ мануша андэ собрания и пэ дила, сави вонэ терэн важ о Дэл. Када, кала о бэято пэ собрания ԥэндя алава, пала савэ во драго погиндосардя цэрэ или лэсти динэ задания пэ собрания, сави машкар курко. Чи сар во росԥэндя варикасти важ о Дэл андэ школа и отԥэнделя тэ терэл кода, со нащи. Йто похвалисар кацавэ бэятос. Амэ трэбуй тэ ритярас андо шэро, кай тэ виарақас время тэ подас дума лэ бэятонэнца, сар инке на ля тэ жал и собрания, и после латэ. Важ када и бэятцэ полэна, кай вонэ куч андэ «бари собрания» (Пс. 35:18).

ДАДА И ДЭЯ, ДЭН ЗОР ПЭСТИРЭ БЭЯТОНЭНДИ ТЭ ЖАН КАРИНГ КОДА, КАЙ ТЭ БОЛДЁН

16, 17. а) Васо лэ бэятонэнди трэбуй тэ болдён? б) Саво лошалимос всаворэ дада и дэя камэн, кай лэндэ тэ авэл? (Диқэн и картинка англа статья.)

¹⁶ Тэ сытярэн пэстирэ бэятонэн и тэ дэн лэнди годи кадя, сар ԥэнэн о Иегова, када бари честь, сави во дя лэ родителёнэнди (Эф. 6:4; Пс. 127:3). Лэ бэятонэнди, савэ арақадёнаспэ кай израильтяноря, на трэбуй сас тэ дэн алав лэ Иеговасти тэ жувэн важ лэстэ. Васо? Важ кода кай вонэ уже слинэ лэско народо. Но андэ амари время най кадя. Кадяжэ, кай и бэятцэ тэ любин лэ Дэвлэс, када на пэрэдэлпэ лэ дадэстар и ла датар. Кодэлэ десэстар, кала арақаделяпэ о бэято и родителя трэбуй тэ ритярэн андо шэро, кай тэ сытярэн лэ бэятос, кай во тэ авэл лэ Христоско ученико. Инке тэ ритярэн андо шэро, кай тэ дэн зор лэ бэятости тэ дэл алав лэ Иеговасти тэ жувэл важ лэстэ и тэ болдёл. Хэба исин кадэлэстар варисо май куч? Кала о мануш дэл алав лэ Дэвлэсти тэ жувэл важ лэстэ, болдёл и на парашэл лэс тэ кандэл, во пэрэжувэла и фартэ бари бида, сави инке никала на сас (Матф. 24:13).

¹⁷ И Блоссом Брандт витидя, кай тэ болдёл. Латирэ родителя закамлэ тэ ӷанэн, кай вой полэл, пэ скати када дэ бари дила, кай тэ болдёл. Кала вонэ када полинэ, вонэ подритярдэ ла. Сар? Вэчэром о дад англа дес, сар вой тэ болдёл, стердя акэ со. Во мангля всаворэ ерес тэ тердён пэ чанга, кай тэ мангэнпэ. Во ԥэндя лэ Иеговасти, кай во бахтало кодэлэстар, кай лэстири бэята витидя тэ дэл алав лэ Иеговасти тэ жувэл важ лэстэ. Сар прожыля май бут чем 60 бэрш и Блоссом сэрэлас кода, со сас андэ кодэва вэчэро. Дада и дэя, амэ всаворэ́ одеса патяс, кай тумэ авэна кацавэ же лошалэ. Состар лошалэ? Кала диқэна, кай тумарэ бэятцэ болдён, важ кода кай вонэ динэ алав лэ Иеговасти тэ жувэн важ лэстэ!