Лошав пэстиря дилати!

1. Васо о Иегова амэн никаса на сыстой?

О ИЕГОВА любий, кай вся тэ авэл разно. Када и растении, и жывотни, и мануша. Важ када во амэн никаса на сыстой. Во ӷанэн, савэ амэ и со кажнонэстэ андо ди (1 Сам. 16:7). Во кадяжэ полэл и ӷанэн, со амэ можэм тэ терас и со амэндэ на вижала тэ стерас. Кадяжэ полэл, андэ саво ери амэ барелям. Во никала на лэла тэ мангэл амэндар тэ стерас кода, со амэ нэ сможэм. Амэнди трэбуй тэ диқас пэр пэстэ кадя, сар диқэл пар мэндэ о Иегова. Тоди амэ на ласа тэ заваздас о шэро и на ласа тэ терас наоборот, тэ затасавас пэс (Рим. 12:3).

2. Васо най драго, кала о мануш сыстой пэс аврэнца?

² Сар жэ амэ лошалэ тэ служысарас вмести амарэ ԥралэнца и ԥэянца андэ собрания (Евр. 13:7). Амэ можэм тэ сытювас лэндар, сар май драго тэ служысарас (Флп. 3:17). Но исин разница, кала ту просто камэс тэ сытёс варисости лэ манушэстар или кала ту лэс тэ сыстос пэс лэса. Через када ту можэш тэ лэс тэ завидуис лэ манушэсти и тэ умэкэс и вас и дажэ тэ гиндос, кай ту нисо на ашэс. Или можэт тэ авэл па аврятэ. Ту закамэса тэ доԥэнэс, кай ту май лашо аврэндар. Ай через када ту можэш дажэ тэ хасарэс и дружба лэ Дэвлэса. Важ када о Иегова анда вся оди ԥэнэн амэнди: «Мэк кажно сыкавэла пэстири дила, и тоди лэстэ авэла, васо тэ лошавэл, сар диқэл кати пэр пэстэ и тэ на сыстой пэс аврэнца» (Гал. 6:4).

3. Андэр со ту паруделян, и состар ту па чачимастэ бахтало?

³ О Иегова камэл, кай ту тэ лошавэс кодэлэсти, кай ту варисо терэс, кай тири дружба лэса тэ авэл инке май лащи. Если ту ужэ болделян, тоди ту можэш кадэлэсти тэ лошавэс. Ту екжэно закамлян тэ болдёс, важ кода кай ту любис лэ Иеговас. Акана погиндосар, андэр со ту ашэлян май фэдэр кодэлэ десэстар? Можэт тути ля май фартэ тэ чалёл тэ адинос и Библия и тэ проандярэс лично изучения. Ай можэт тирэ молитвы ашэлэ май лашэ и ту лян тэ мангэспэ анда вся оди (Пс. 141:2). Или можэт ту ашэлян май смило андэ служэния и драго ӷанэс тэ пользуешся кодэлэса, со дэл амари арӷанизацыя. Или можэт тири дружба лэ Дэвлэса поможысардя тэ авэс май лашо хулай или хулаи андо ери, или май лашо дад или дэй. Кала ту полэса, кай ту паруделян и ашэлян май фэдэр, тоди ту па чачимастэ авэса бахтало.

4. Пала со амэ подаса дума андэ кадэя статья?

⁴ Кадяжэ амэ можэм тэ поможысарас аврэнди тэ лошавэн кодэлэстэ, кай вонэ домарделэ кода, со камлэ тэ стерэн важ о Иегова. Амэ можэм тэ поможысарас лэнди тэ на сыстон пэс аврэ манушэнца. Андэ кадэя статья амэ подаса дума, со моӷут тэ терэн и родителя, о хулай и хулаи и старейшыноря и авэр ԥрала и ԥэя андэ собрания, кай тэ поможын аврэнди тэ на сыстон пэс никаса. Ай инке амэ роздиқаса и советоря анда Библия, савэ поможына тэ терас важ о Иегова кода, со па амаро зор.

СОВЕТОРЯ ВАЖ И РОДИТЕЛЯ И ВАЖ О ХУЛАИ И ХУЛАИ

5. Со, сар ԥэнэнпэ андэ Эфесянам 6:4, лэ родителёнэнди нащи тэ терэн?

⁵ И родителя никала нащи тэ сыстон пэстирэ бэятос аврэса и тэ аштярэн лэстар кода, со во нэ можэт тэ стерэл. Если и родителя авэна кадя тэ терэн, тоди лэ бэятости авэла ԥарэс. (Адиносар Эфесянам 6:4.) И ԥэй Аделинаb ԥэнэн, кай латири учительница камэлас, кай вой тэ сытёл май драго всаворэндар андо класо, ай и дэй ԥэнэнас, кай вой трэбуй тэ сытёл ек пэ пятёрки. И дэй камэлас, кай лако хулай и учителёря драго тэ дэн дума пала лэ Иеговастирэ свидетеля. Инке латири дэй камэлас, кай вой тэ сдэл и экзаменоря и тэ на стерэл ни ек ошыбка. Но и Аделина ԥэнэн, кай када сас най па лако зор. Вой ужэ дэлмут на ԥирэл андэ школа, но кодэла пэрэжывании вой идоси сэрэл. И через када вой на допатял, кай вой уӷодий лэ Иеговасти, хоть акана вой отдэл лэсти, со май лашо.

6. Сости и родителя сытён анда Псалом 131:1, 2?

⁶ Лашо совето важ и родителя запистромэ андэ Псалом 131:1, 2 (адиносар). О царё Давид ԥэндя: «Мэ на родав важ пэстэ бут и на лав тэ домардював кода, со най па мэрно зор». Лэ Давидости сас спокойно по ди кодэлэстар, кай во полэлас, кай най вся па лэско зор. Сости кай о Давид моӷут тэ сытён и родителя? Лэнди кадяжэ авэла май спокойно по ди, кала вонэ полэна, кай най вся па лэнго зор. Кадяжэ вонэ на трэбуй тэ аштярэн фартэ бут пэстирэ бэятонэндар. Трэбуй тэ полэн, со о бэято сможэт тэ стерэл, ай со нэ сможэт. И трэбуй тэ поможын лэсти, кай во тэ лэл тэ домардёл кода андэ жызня, со па лэско зор. Блаӷодаря кадэлэсти во полэла, кай лэс любин и родителя. И ԥэй Марина росԥэнэн, кай латири дэй никала ла на сыстояс аврэ бэятонэнца и латирэ тринэ ԥралэнца. Вой вся и время ԥэнэнас, кай кажно манушэс ӷанэн варисо драго тэ терэл и о Иегова любий кажнонэс андар мэндэ. Важ када вой почти никаса пэс на сыстой.

7, 8. Сар о хулай можэт тэ сыкавэл, кай цэний пэстиря хулая́?

⁷ О хулай, саво служый лэ Иеговасти диласа лэла тэ сыкавэл, кай цэний пэстиря хулая и стол пэр латэ патив (1 Пет. 3:7). Во на лэла тэ мангэл латар кода, со вой нэ можэт тэ стерэл. И канешно, во на лэла ла тэ сыстой аврэ жувлянца. Кадя тэ терэл нащи. Уӷанам, со сас кай и ԥэй Роза. Лако хулай на служыяс лэ Иеговасти, и во вся и время сыстояс ла аврэ жувлянца. Через када вой ля тэ гиндой пала пэстэ, кай вой нисо на ашэл. Вой дажэ парашэля тэ патял, кай о Иегова ла цэний. И лати фартэ придэл зор, кала варико ԥэнэн, кай вой фартэ куч важ о Иегова. Ай о хулай, саво служый лэ Иеговасти, трэбуй тэ андярэл пэс совсем па аврятэ. Во цэний пэстиря хулая и полэл ла. Во полэл, кай через када, лэско ери авэла бахтало. Ай если во на лэла кадя тэ терэл, тоди о Иегова авэла лэса нэдовольноc.

⁸ О хулай, саво стол патив пэ пэстири хулаи, сыкавэл, кай вой лэсти куч. Во хвалий ла и дэл дума аврэнца пала латэ кати драго (Прит. 31:28). Ла Катяко хулай, пала сави амэ дям дума андэ кодэя статья, кадя пэс и андярэлас. Во поможысардя лати, кай вой тэ на гиндой пала пэстэ вэрыто. Латири дэй фартэ часто долэласпэ латэ и сыстояс ла аврэ щеёранца и латирэ подружкэнца. Кадя и Катя присытеля тэ сыстой пэс аврэнца, и лати ԥарэс сас тэ парашэл када тэ терэл, дажэ посли кода, сар вой ашэля лэ Иеговаско свидетелё. Но лако хулай поможысардя лати, и вой ля тэ диқэл пэр пэстэ па аврятэ. Вой ԥэнэн, кай во ла цэний, хвалий ла и мангэлпэ лэ Иеговасти пала латэ. Кадяжэ во ԥэнэн лати, кай о Иегова полэл и жалуий всаворэн амэн. Кадэва гиндо поможый лати тэ додиқэл андэр пэстэ варисо лашо и тэ на сыстой пэс аврэнца.

СОВЕТОРЯ ВАЖ ИСТАРЕЙШЫНОРЯ И ВАЖ АВЭР ХРИСТИАНОРЯ

9, 10. Сар и старейшыноря поможысардэ еқа ԥьяти тэ на гиндой, кай вой май хужэ аврэндар?

⁹ Сар и старейшыноря моӷут тэ поможын лэ ԥралэнди или лэ ԥэянди, савэ часто сыстон пэс аврэнца? Подам дума пала ԥэй Чохаи. Кала вой сас бэятаса, ла фартэ ридко хвалинас. Вой росԥэнэн, кай вой сас фартэ лажавни и гиндояс, кай вой май хужэ аврэндар. И вся и время вой сыстояс пэс аврэнца. И важ када дажэ кала вой болделя и ля тэ служый пианероса, лати сас фартэ ԥарэс тэ патял, кай и ԥрала и ԥэя ла цэнин. Акана вой ля тэ гиндой пала пэстэ па аврятэ и кадэлэстар ашэля пэ бутэстэ май бахтали.

¹⁰ И Чохаи ԥэнэн, кай лати фартэ поможысардэ и старейшыноря. Вонэ ԥэндэ лати, кай вой фартэ куч важ и собрания и кай латар моӷут тэ сытён авэр ԥрала и ԥэя. И Чохаи ԥэнэн, кай и старейшыноря най еқвар мангэнас ла, кай вой тэ поможый аврэ ԥэянди, савэ май тэрнорэ латар. Через када вой поля, кай ла цэнин андэ собрания. Ла фартэ ля лэ одестар, кала и ԥрала похвалисардэ ла и проадиносардэ лати стихоря анда 1 Фессалоникийцам 1:2, 3. Вой фартэ блаӷодарно кадэлэ ԥралэнди, кай вонэ поможысардэ лати тэ полэл, кай вой тожэ можэт тэ стерэл варисо важ и собрания. Вой кадэлэстар фартэ лошали!

11. Сар амэ можэм тэ поможысарас кодэлэнди, касти ԥарэс по ди и ко гиндой, кай нисо на ашэл? (Исаия 57:15).

¹¹ Адиносар Исаия 57:15. О Иегова фартэ заботийпэ пала кодэла, касти ԥарэс по ди через и гиндоря, кай нисо на ашэл. Но най кати и старейшыноря трэбуй тэ поможын кацавэ манушэнди. Када можэт тэ терэл кажно андар мэндэ. Амэ можэм анда вся оди тэ шас сама лэн. Важ о Иегова куч кажно мануш андэ собрания. И во камэл, кай и амэ тэ цэнисарас ек еқэс (Кол. 3:12). Сар инке амэ можэм тэ поможысарас лэ ԥралэнди и лэ ԥэянди, савэ вэрыто гиндон пала пэстэ? Всаворэ амэ ӷанас варисо драго тэ терас. Но трэбуй тэ авас сэжи и тэ на вистас пэс кадя, кай потом и ԥрала и ԥэя тэ лэн тэ завидуин амэнди или тэ гиндон, кай нисо на ашэн. Амэ, наоборот, камас тэ подритярас ек еқэс (1 Пет. 4:10, 11).

12. Васо и прости мануша цырдэнаспэ каринг о Иисусо? (Диқэн и картинка пэ обложка.)

¹² Лашо примеро важ амэндэ о Иисусо. Во сас ашунгло учителё и всаек во на заваздэлас о шэро и на сас ӷордо (Матф. 11:28—30). Хоть во сас фартэ годявэрно и бут со ӷанэнас, во никала на вистолас пэс англа авэр. Во сытярэлас лэ манушэн и дэлас дума просто, росԥэнэнас кацавэ примероря, кай када полэнас дажэ и прости мануша (Луки 10:21). Во фартэ на шоласпэ пэ фарисеёря, во никала на терэлас кадя, кай о мануш тэ гиндой, кай во на трэбуй лэ Дэвлэсти (Иоан. 6:37). Наоборот, во бари патив столас пэ мануша, ко када тэ на авэл.

13. Сар о Иисусо сыкадя пэстири доброта и кода, кай во любий пэстирэ учениконэн?

¹³ О Иисусо сас фартэ добро пэстирэ учениконэнца и любияс лэн. Во полэлас, кай кажно андар лэндэ сас разно. И кай вонэ нэ моӷут тэ терэн вся одинаково. Во ӷанэнас, кай вонэ всаворэ служын лэ Иеговасти анда вся оди и цэнияс лэн пала када. Кода, сар во полэлас пэстирэ учениконэн, драго дицол андэ притча, сави во ԥэндя. Андэр латэ ԥэнэнпэ, кай о ӷосподино дя кажнонэ рабости тэ терэл дила па лэско зор. И дуй раборя драго терэнас пэстири дила. Но ек андар лэндэ важ пэско ӷосподино затердя май бут ловэ, но всаек лэдон рабонэн во похвалисардя одинаково и лэдонди ԥэндя кадэла алава: «Драго стердян. [...] Ту рабо, саво на парашэл тэ кандэл» (Матф. 25:14—23).

14. Сости амэ можэм тэ сытювас анда кода, сар о Иисусо андярэлас пэс аврэнца?

¹⁴ Кадяжэ лэ Иисусостири любовь и доброта дицол андэ кода, сар во каринг амэндэ пэс андярэл. Во полэл, кай амэ всаворэ ӷанас варисо драго тэ терас и кай амэндэ всаворэндэ разно жызня. И во лошавэл кодэлэсти, кай амэ терас вся, со па амаро зор. Амэнди кадяжэ трэбуй тэ андярас пэс и аврэнца. Нащи тэ терас кадя, кай о ԥрал или ԥэй тэ гиндой, кай во нисо на ашэл или тэ лэл тэ дошалярэл пэс через кода, кай во нэ можэт тэ стерэл, скати авэр моӷут тэ терэн. Трэбуй тэ хвалисарас амарэ ԥралэн и ԥэян, кай вонэ служын лэ Иеговасти анда вся оди.

ТЕР КОДА, СО ПА ТИРО ЗОР

15, 16. Сар ла ԥьяти поможысардя кода, кай вой ля тэ терэл важ о Иегова кода, со па лако зор?

¹⁵ Кала амэ камас варисо тэ стерас важ о Иегова, тоди исин смысло андэ жызня. Но исин и ек маменто. Трэбуй тэ стерэс кода, со па тиро зор и тэ на сыстос пэс аврэнца. Ай если ту лэса тэ сыстос пэс аврэнца, тоди тутэ умэкэнапэ и вас и ту лэса тэ гиндос, кай май хужэ аврэндар (Луки 14:28). Подам дума пала ек ԥэй, сави служый пианероса. Ла ақарэн Ԥабай.

¹⁶ Ла Ԥабаяко дад на служый лэ Иеговасти. Во вся и время сыстояс ла латирэ ԥралэнца и ԥэянца и аврэ бэятонэнца и ԥэнэнас, кай вой хужэ всаворэндар. Лати сас фартэ ԥарэс по ди и вой гиндояс, кай нисо на ашэл. Но кала и Ԥабай вибареля, вой ля тэ гиндой па аврятэ. И кай тэ диқэл, сар о Иегова ла любий и подритярэл, вой кажно дес ля тэ адиной и Библия. И инке вой поля, кай трэбуй тэ терэл важ о Иегова кода, со па лако зор. Вой ля тэ мангэлпэ пала када лэ Иеговасти, кай во тэ поможый лати. И кадя и Ԥабай ашэля май бахтали, важ кода кай терэл важ о Иегова вся, со па лако зор.

НА ПАРАШ ТЭ ТЕРЭС ВАЖ О ИЕГОВА ВСЯ, СО ПА ТИРО ЗОР

17. Со поможыя тути тэ парудёс, и саво лашимос када тути анэна?

¹⁷ Трэбуй время, кай будэр тэ на гиндос пала пэстэ вэрыто и тэ на сындос пэс. Када най вушэро. Важ када о Иегова ԥэнэн, кай трэбуй тэ на парашэс тэ терэс вся, кай тэ гиндос пала пэстэ драго (Эф. 4:23, 24). Важ када тути трэбуй тэ мангэспэ, тэ изучаеш и Библия и тэ гиндос пала кода, со проадиносардян. Манг лэ Иеговас тэ поможый тути никала тэ на бистрэс пала када. И тоди через о свынто духо о Дэл поможыя тути тэ на сыстос пэс аврэнца, тэ на завидуис аврэнди, ай кадяжэ тэ на гиндос пала пэстэ бут.

18. Сар тумэн подритярэн и алава анда 2 Летопись 6:29, 30?

¹⁸ Адиносар 2 Летопись 6:29, 30. О Иегова ӷанэн, со амэндэ по ди. Кадяжэ во ӷанэн, сар дэ ԥарэс амэнди тэ на шаспэ пэ мануша андэ кадэя люма и тэ на терас кадя, сар вонэ. И кала о Иегова диқэл, сар амэ старысавас, во амэн инке май фартэ любий.

19. Сар о Иегова амэн любий? Росԥэнэн о примеро.

¹⁹ Кай тэ полас, сар о Иегова амэн любий, амэнди поможый о примеро анда Библия пала дэй и пала лако бэято (Ис. 49:15). И ԥэй Русалина росԥэнэн, кай латэ арақаделяпэ най доԥиряди бэята. Кала вой пэрво разо ла додиқля, вой сас фартэ цынёни и пэрви деса вой сас андэ больница. И врачоря мэклэ ла тэ авэл каринг и бэята кажно дес и тэ лэл ла пэ вас. И Русалина ԥэнэн, кай андэ кодэя время лати сас драго по ди, важ кода кай латири бэята сас паша латэ. Акана ла бэятати шов бэрш, но вой май цынёни, чем и бэяцэ андэ латирэ бэрша. Но и Русалина ла любий май фартэ дес десэстар, важ кода кай и бэята бут со пэрэандярдя андэ жызня и вижудя. Кадяжэ точно о Иегова амэн любий, кала диқэл, кай амэ пэрэандярас бут ԥаримос андэ жызня и пристас бут зор, кай тэ на парашас тэ служысарас лэсти. Через кадэва гиндо, амэнди фартэ драго по ди!

20. Соса ту можэш тэ лошавэс?

²⁰ Ту служыс лэ Иеговасти и када сыкавэл, кай ту андэ лэско баро ери, андэ саво тут фартэ всаворэ любин. О Иегова тут фартэ цэний. Ту важ лэстэ особенно. Во закамля туса тэ дружый, най важ кода кай ту май лашо аврэндар, ай важ кода кай во додиқля, кай ту найӷордо мануш, ту на заваздэс о шэро, ту камэс тэ сытёс и тэ парудёс (Пс. 25:9). Мангас тут, на параш тэ патяс, кай о Иегова цэний тут пала вся, со ту терэс андэ служэния лэсти. Кода, кай ту виритярэс о ԥаримос, на парашэс тэ кандэс лэ Иеговас, сыкавэл, кай тутэ «шукарно и лашо ди» (Луки 8:15). Важ када на параш тэ терэс андэ служэния вся, со па тиро зор. Тоди ту лэса тэ лошавэс, кала диқэса пэр пэстэ и на лэса тэ сыстос пэс аврэнца.