Анда вся оди доверяйте лэ Иеговасти

1, 2. а) Васо бутэ манушэнди найвушэро тэ доверяют кодэлэнди, кастэ исин власть? б) Пала со амэ подаса дума андэ кадэя статья?

АДЕС бутэ манушэнди фартэ ԥарэс тэ доверяют кодэлэнди, кастэ исин власть. Вонэ диқэн, сар и барэдэра анда политика и сындомаря зашонпэ пала барвалэ и ашунглэ мануша, но нэсправедливо обжанпэ лэ чорорэнца. И пэ када жэ шол сама и Библия: «Кала о мануш хулаий пэ авэр мануш, када на анэн лашимос» (Эккл. 8:9). Ай инке дэсавэ парашэн тэ патян андо Дэл через кода, сар дэ найдраго андярэн пэс и рашая андэ религии. Важ када, дажэ если о мануш камэл тэ изучает и Библия, дэкала найвушэро тэ поможысарас лэсти тэ доверяет лэ Иеговасти и лэ манушэнди, савэн во назначил тэ диқэн пала лэско народо пэ ԥув.

² Канешно, най кати и изучающи трэбуй тэ сытён тэ сыкавэн и доверия каринг о Иегова и каринг лэстири арӷанизацыя. Дажэ если амэ болделям ужэ бут бэрша палпалэ, амэ всаек трэбуй тэ на парашас тэ патяс, кай о Иегова всегда терэл правильно. Важ кода кай дэкала можэт тэ авэл найвушэро тэ доверяем лэ Иеговасти. Андэ кадэя статья амэ роздиқаса трин кацавэ ситуацыи, савэ сыкавэн, пэскати амэндэ састи вера: 1) кала адиносарас и Библия; 2) кала и арӷанизацыя дэл нэво руковоцтво; 3) кала авэла ԥари время англэ.

ДОВЕРЯЙТЕ ЛЭ ИЕГОВАСТИ, КАЛА АДИНОН И БИБЛИЯ

3. Сар дэсавэ случаёря анда Библия сыкавэн, пэскати амэ доверяем лэ Иеговасти?

³ Кала амэ адиносарас и Библия, дэкала амэ на полас, васо о Иегова кадя андярдя пэс варисавэ манушэса или приля имено кацави ришэния. Например, андэ книӷа Числа амэ адиносарас, кай о Иегова ԥэндя тэ казнин лэ манушэс, саво стидэлас и каш андэ суббота. Ай андэ 2 Самуила ԥэнэнпэ, кай о Иегова простисардя лэ Давидос, хоть во стердя бэзэх ла Вирсавияса и умардя латирэ хулас (Чис. 15:32, 35; 2 Сам. 12:9, 13). Варико можэт тэ пушэл: «Хэба када правильно? Васо о Иегова простисардя лэ Давидости кацаво баро бэзэх, ай аврэ манушэс, саво, сар амэнди здэлпэ, стердя най бари ошыбка, ԥэндя тэ казнин?» Кай тэ полас када, давайте роздиқаса трин маменторя, пала савэ амэ трэбуй тэ сэрас, кала адиносарас и Библия.

4. Сар и Бытие 18:20, 21 и Второзаконие 10:17 поможын амэнди май фартэ тэ патяс, кай о Иегова всегда андярэл пэс справедливо?

⁴ Андэ Библия най всегда подробно росԥэнэнпэ и ситуацыя. Например, амэ ӷанас, кай о Давидо анда вся оди каисайля андэ пэско бэзэх (Пс. 51:2—4). Но со амэ ӷанас пала мануш, саво стидэлас и каш андэ суббота? Каисайля во андэ кода, со стердя? Ритярэлас во лэ Дэвлэско законо май данглал? Можэт, лэсти най еқвар ԥэнэнас, ай во на шолас сама? Андэ Библия на ԥэнэнпэ пала када. Но амэ точно ӷанас: о Иегова всегда андярэл пэс справедливо (Втор. 32:4). Кала и мануша виандярэн ришэния, вонэ шон сама, со ԥэнэн или гиндон авэр, ай о Дэл диқэл вся, сар исин. (Проадинон Бытие 18:20, 21; Второзаконие 10:17.) Со май бут амэ уӷанас лэ Иеговас и лэско законо, со май фартэ амэ доверяем, кай во виандярэл правильни ришэнии. Да, кала амэ адиносарас и Библия, амэндэ моӷут тэ авэн бут вопросоря, пэ савэ амэ на виарақаса атветоря. Но амэ можэм тэ патяс: о Иегова «всегда андярэл пэс праведно» (Пс. 145:17).

5. Сар о нэсовершэнство на дэл амэнди тэ авас справедливи? (Кадяжэ диқэн и рамка «О нэсовершэнство на дэл амэнди тэ авас андэ вся справедливи».)

⁵ Амэ нэправильно диқас пэ справедливость, важ кода кай нэсовершэни. О Дэл создал амэн пар пэстэ, важ када, кала варикаса обжанпэ нэсправедливо, амэндэ андрэ вся лэл тэ тирёл (Быт. 1:26). Но через о нэсовершэнство амэ можэм тэ полас вся най кадя, дажэ если амэнди здэлпэ, кай амэ ӷанас вся и ситуацыя. Например, вспомним пала Иона. Лэсти фартэ на чалеля, кай о Иегова жалуисардя лэ манушэн андэ Ниневия, савэ каисайлэ (Иона 3:10—4:1). Но блаӷодаря кадэлэсти май бут чем 120 000 мануша ашэлэпэ жундэ! Вижал, када о Иона трэбуй сас тэ парувэл пэско гиндо, ай най о Иегова.

6. Васо лэ Иеговасти на трэбуй тэ объясний амэнди пэстирэ ришэнии?

⁶ О Иегова нэ обязано тэ объясний лэ манушэнди пэстирэ ришэнии. Варикала о Иегова домэкэлас, кай лэстирэ служытеля тэ ԥэнэн, кай пэрэжывают пала ришэнии, савэ во прилэлас (Быт. 18:25; Иона 4:2, 3). И дэкала во дажэ росԥэнэнас лэнди, васо во стердя имено кадя (Иона 4:10, 11). Но о Иегова — амаро Создателё. И важ када во нэ обязано тэ объясний амэнди пэстирэ ришэнии, кай амэ тэ авас соӷласни лэса (Ис. 40:13, 14; 55:9).

ДОВЕРЯЙТЕ ЛЭ ИЕГОВАСТИ, КАЛА АШУНЭН НЭВО РУКОВОЦТВО

7. Со важ амэндэ можэт тэ авэл найвушэро и васо?

⁷ Канешно, амэнди дажэ по гиндо на авэл, кай о Иегова андэ варисостэ можэт тэ авэл нэсправедливо. Но тэ доверяем лэ ԥралэнди, савэн во назначил, най всегда вушэро. Амэ можэм тэ гиндосарас пала ԥрала, савэндэ исин власть андэ собрания: «Вонэ терэн кадя, сар ԥэнэн о Иегова или па пэстирятэ?» Кадя моӷли тэ гиндон и дэсавэ мануша андэ дэлмутни время. Вспомним, со сас пистромэ андо трито абзацо. Варико анда родо кадэлэ манушэско, саво стидэлас и каш андэ суббота, моӷ тэ ԥэнэн: «Ай чаче о Моисеё подя дума лэ Иеговаса англа кода, сар тэ виандярэл смертно приӷоворо?» И дэко анда лэ Уриястирэ друӷоря моӷ тэ гиндой, кай лэ Давидос на сындосардэ ек важ кода, кай во сас царё. Вижал, амэ нэ можэм тэ ԥэнас, кай доверяем лэ Иеговасти, если нэ доверяем лэ ԥралэнди, савэн во стодя тэ диқэн пала лэстири арӷанизацыя и савэнди во доверяет.

8. Пала саво порядко пистромэ андэ Деяния 16:4, 5 и со амэ диқас андэ христианско собрания адес?

⁸ Адес о Иегова руководий андэ пэстири арӷанизацыя пэ ԥув через «о годявэрно и кандино рабо» (Матф. 24:45). Сар и о руководящё совето андо пэрво вико, кадэва «рабо» диқэл пала вся лэ Дэвлэско народо и дэл и указании лэ старейшынонэнди. (Проадинон Деяния 16:4, 5.) Ай вонэ поможын лэ ԥралэнди и лэ ԥэянди андэ собрании тэ прилэн о руковоцтво. Амэ сыкавас, кай доверяем лэ Иеговасти, если терас кадя, сар ԥэнэн амэнди и арӷанизацыя и старейшыноря.

9. Кала можэт тэ авэл ԥарэс тэ подритярас и ришэнии, савэ прилэн и старейшыноря, и васо?

⁹ Но дэкала можэт тэ авэл ԥарэс тэ подритярас и ришэнии, савэ прилэн и старейшыноря. Например, найдэлмут андэ дэсавэ раёноря сас изменении, и бут собрании стидэ вмести. Дэкай и старейшыноря манглэ лэ вазвещятелёнэн тэ пэрэжан андэ авэр собрания. Васо када стердэ? Блаӷодаря кадэлэсти андэ Залы Царства ашэля май набут свободни месторя. Если тумэнди прижыляпэ када тэ стерэн, наверно, сас найвушэро тэ ашавэн пэстирэ друӷонэн и лэ родос. Канешно, и старейшыноря на ашунэн лэ Иеговаско ӷолосо па нэбо, саво ԥэнэн лэнди, каринг назначить кажнонэ вазвещятелёс. Важ када амэнди можэт най всегда вушэро тэ подритярас и ришэнии, савэ прилэн и старейшыноря. Но если лэнди доверяет о Иегова, кадяжэ трэбуй тэ терас и амэb.

10. Сар ԥэнэнпэ андэ Евреям 13:17, васо амэнди трэбуй тэ кандас лэ старейшынонэн?

¹⁰ Васо трэбуй тэ кандас лэ старейшынонэн, дажэ если амэнди най фартэ чалён лэндирэ ришэнии? Блаӷодаря кадэлэсти лэ Дэвлэско народо авэла сар ек ери (Эф. 4:2, 3). Если всаворэ ԥрала и ԥэя подритярэн и ришэнии, савэ прилэн и старейшыноря, тоди вся и собрания авэла дружно. (Проадинон Евреям 13:17.) И со май важно, кала амэ кандас лэ старейшынонэн, кадя амэ сыкавас, кай доверяем лэ Иеговасти, важ кода кай имено во стодя лэн тэ заботинпэ пала амэндэ (Деян. 20:28).

11. Со поможыя амэнди май фартэ тэ доверяем лэ старейшынонэнди, кала вонэ прилэн и ришэнии?

¹¹ Со поможыя амэнди май фартэ тэ доверяем лэ старейшынонэнди, кала вонэ прилэн ришэнии? Важно тэ сэрас: кала и ԥрала розлэн и вопросоря андэ собрания, вонэ всегда мангэнпэ пала свынто духо. Кадяжэ вонэ драго розуӷанэн и библейски принцыпоря и о руковоцтво, саво дэл лэ Иеговастири арӷанизацыя. И старейшыноря анда вся оди камэн тэ уӷодин лэ Иеговасти и со май драго тэ заботинпэ пала лэско народо. Кадэла предани ԥрала ӷанэн, кай дэна отчёто лэ Дэвлэсти пала пэстири дила (1 Пет. 5:2, 3). Погиндон: андэ люма и мануша вороӷуин кодэлэнца, кастэ авэр нацыя, вера или политика. Ай лэ Иеговаско народо вмести сар ек ери тэлёл лэ чачунэ Дэвлэсти. Када возможно кати блаӷодаря кодэлэсти, кай о Иегова блаӷословий пэстири арӷанизацыя!

12. Савэ вопросоря роздиқэн и старейшыноря, кай тэ полэн, каийпэ о мануш чи най?

¹² О Иегова дя лэ старейшынонэнди важно дила — тэ диқэн, кай и собрания тэ авэл вужи. Если о христианино стердя баро бэзэх, о Иегова камэл, кай и старейшыноря драго тэ розлэнпэ, можэт кадэва мануш тэ ашэлпэ андэ собрания чи най. Вонэ трэбуй тэ полэн, чаче во каийпэ андэ пэско бэзэх? Кадэва мануш можэт тэ ԥэнэн, кай во каийпэ, но вэрыцый во кода, со стердя? Дицол, кай во чаче камэл будэр тэ на рийпэ каринг о бэзэх? Если лэс змардя, кай во общялся лэ найлашэ друӷонэнца, ӷотово во тэ парашэл тэ дружый лэнца? И старейшыноря мангэнпэ, роздиқэн вся и ситуацыя па Библия и старыинпэ тэ полэн, сар о мануш диқэл пэ пэско бэзэх. Посли када вонэ прилэн ришэния, можэт во тэ ашэлпэ андэ лэ Дэвлэско народо или най. Андэ дэсавэ случаёря лэ манушэс прижалпэ тэ исключин анда собрания (1 Кор. 5:11—13).

13. Пала со амэ можэм тэ пэрэжываем, если исключисардэ варикас анда амарэ чаче?

¹³ Кала можэт тэ авэл найвушэро тэ доверям лэ старейшынонэнди? Если исключин най амарэ пашутнэ друӷос или родос, тоди вушэро тэ подритярас кадэя ришэния. Но со, если исключисардэ лэ манушэс, саво амэнди куч? Дэко можэт фартэ тэ пэрэжывает: «Чаче и старейшыноря драго розуӷанглэ вся и ситуацыя? Прилинэ вонэ кацави ришэния, сави прилиноп о Иегова?» Со поможыя амэнди правильно тэ диқас пэ ришэния, сави прилинэ и старейшыноря?

14. Со поможыя амэнди тэ доверяем лэ старейшынонэнди, кала исключисардэ варикас анда амарэ чаче?

¹⁴ Важно тэ сэрас, кай тэ исключин анда собрания лэ манушэс, саво на каийпэ андэ пэско бэзэх, ԥэнэн о Иегова. Када анэн лашимос и ла собранияти, и кодэлэсти, ко стердя бэзэх. Если кацаво мануш ашэлапэ андэ собрания, во можэт тэ римой аврэ ԥралэн и ԥэян (Гал. 5:9). Кадяжэ лэстэ на дожала, саво дэ баро бэзэх во стердя. Ай значит, во на закамэла тэ парудёл и тэ рийпэ каринг о Иегова (Эккл. 8:11). Амэ можэм тэ авас уверени, кай и старейшыноря драго розлэнпэ, трэбуй тэ исключин лэ манушэс анда собрания чи най. Вонэ полэн, кай кадя жэ, сар и сындомаря андо дэлмутно Израилё, вонэ прилэн ришэния «лэ Иеговастирэ алавэстар, ай най лэ манушэндирэ алавэстар» (2 Лет. 19:6, 7).

ЕСЛИ АМЭ УЖЭ АКАНА ДОВЕРЯЕМ ЛЭ ИЕГОВАСТИ, КАДА ПОМОЖЫЯ АМЭНДИ МАЙ АНГЛЭ

15. Васо ужэ акана фартэ важно тэ доверяем лэ Иеговасти, сар никала?

¹⁵ Ӥто кадэя найлащи люма на авэла, важ када амэнди фартэ трэбуй тэ доверяем лэ Иеговасти. Васо? Кала авэла и само бари бида, амэнди моӷут тэ дэн указании, савэ, сар можэт тэ здэлпэ, найгодявэрнэ и нэпонятни. Трэбуй тэ полас, кай о Иегова на лэла тэ дэл дума амэнца лично. Наверно, во дэла амэнди указании через и назначени ԥрала. Тоди ужэ на авэла время тэ на допатяс и тэ гиндосарас: «Чаче кадэла указании лэ Иеговастар или и ԥрала ԥэнэн када пэстар?». Сар тумэ андярэна пэс? Лэна тумэ тэ доверяете лэ Иеговасти и лэстиря арӷанизацыяти андэ кодэя важно время? Када зависит кодэлэстар, сар тумэ ужэ акана диқэн пэ ришэнии, савэ прилэн и ԥрала. И если тумэ доверяете кодэлэсти, со вонэ ԥэнэн адес, и сразу жэ када прилэн, тоди, май ӥто всаворэстар, кала авэла и само бари бида, тумэ лэна тэ андярэн пэс кадя жэ (Луки 16:10).

16. Со можэт тэ сыкавэл, пэскати амэ доверяем лэ Иеговасти, кала авэла о Армагеддоно?

¹⁶ Погиндосарам инке пала ек важно маменто: сар амэ ласа тэ андярас пэс, кала о Иегова виандярэла приӷоворо кадэлэ найлашэ мирости? Канешно, амэ надеисавас, кай инке бут мануша — особено амарэ чаче — ашэна лэ Иеговастирэ служытеля. Но андо Армагеддоно о Иисусо, сар лэ Дэвлэско сындомари, виандярэла послиднё ришэния, лэна вонэ тэ жувэн или най (Матф. 25:31—33; 2 Фес. 1:7—9). Амэ на ласа тэ витидас, кас о Иегова трэбуй тэ жалуий, ай кас най (Матф. 25:34, 41, 46). Ласа амэ тэ доверяем лэ Иеговасти или холяваса и парашаса тэ служысарас лэсти? Дицол, кай трэбуй тэ сытювас тэ доверяем лэ Иеговасти ужэ акана, и тоди амэ ласа андэ вся тэ доверяем лэсти и май англэ.

17. Васо тумэ камэн, кай о Иегова тэ исполнит пэско приӷоворо кадэлэ найлашэ мирости?

¹⁷ Прецтавьте, кай тумэ ужэ андо раё и диқлэ, сар о Иегова исполнил пэско приӷоворо. Будэр нинай хохавнэ веры и жадно камерческо система. Инке нинай политическо система, сави поумардя милионоря манушэн и андя лэ мирости фартэ бут ԥаримос и бида. Андэ амари жызня ужэ нинай найлашо зор, ԥуримос и смэрть. Лэ Сатанас и лэ бэнгэн шутэ андэ пропасть пэ 1 000 лет. О Иегова улэла вся о найлашимос, саво вонэ стердэ, кала жылэ против лэстэ (Отк. 20:2, 3). Сар жэ амэ аваса бахталэ, кай доверяли лэ Иеговасти!

18. Сости амэ сытювас анда кода, со сас лэ израильтянонэнца, кала адиносарас Числа 11:4—6 и 21:5?

¹⁸ Сар тумэ гиндон, кала амэ попэраса андо раё, авэла амэнди вушэро всегда и андэ вся тэ доверяем лэ Иеговасти? Вспомним, сар линэ тэ андярэн пэс и израильтяноря почти сразу, сар вижылэ анда Египто. Дэсавэ линэ тэ жалуинпэ, кай камэн тэ хан кодэва хамос, саво лэндэ сас андо Египто. Ай пала манна, сави лэнди дя о Иегова, вонэ ԥэнэнас: «Амэнди вэрыцысайля кадэва ӷитко марно». (Проадинон Числа 11:4—6; 21:5.) Ай со, если и амэ кадя ласа тэ андярас пэс посли само бари бида? Амэ на ӷанас, скати жала время и зор, кай посли Армагеддоно тэ стерас порядко пэ ԥув и кай упалэ тэ авэл раё. Можэт, спэрва и жызня авэла найвушэро. На ласа амэ тоди тэ жалуемся пэ кода, со дэла амэнди о Иегова андо раё? Полэн ек важно гиндо: со май фартэ амэ акана блаӷодарни лэ Иеговасти пала вся, со во амэнди дэл, со май бари блаӷодарность амэндэ авэла май англэ.

19. Савэ важни гиндоря амэ уӷанглям анда кадэя статья?

¹⁹ О Иегова всегда терэл кода, со правильно. Амэ трэбуй тэ доверяем лэсти. Кадяжэ фартэ важно тэ доверяем кодэлэнди, через кастэ во дэл амэнди руковоцтво. Давайте никала тэ на бистрас лэ Иеговастирэ алава: «Тумаро зор андэ кода, кай тэ ашэнпэ спокойни и тэ сыкавэн, кай патян» (Ис. 30:15).