Со и Библия росԥэнэн амэнди пала пэско Афтаро

1. Васо ту блаӷодарно пала Библия?

САР жэ амэ блаӷодарни лэ Иеговасти пала Библия! Андэр латэ исин мудри советоря, савэ поможын амэнди тэ полас, со тэ терас, кала исин трудности. Кадяжэ амэ уӷанас пала жызня, сави аштярэл амэн англэ, и када дэл амэнди надежда. Но со май важно, андэ Библия о Иегова бут росԥэнэн пала пэстэ. Кала амэ гиндосарас пала лэстирэ райканэ качестворя, вонэ лэн амэн лэ одестар. Тоди амэ камас тэ ашас май пашэ каринг лэстэ и тэ терас вся, кай амэндэ тэ авэл лэса чачуни дружба (Пс. 25:14).

2. Сар о Иегова росԥэндя пала пэстэ лэ манушэнди?

² О Иегова камэл, кай и мануша лэс тэ ӷанэн. Андэ дэлмутни время во росԥэнэнас пала пэстэ, кала дэлас и сунэ, сыкавэлас и видении, ай кадяжэ бишалэлас лэ анӷелонэн каринг и мануша (Чис. 12:6; Деян. 10:3, 4). Но хэба кадэла сунэ, видении и новости лэ анӷелонэндар андоп амэнди варисаво лашымос, если тэ на авелоп запистромэ? Акэ васо о Иегова дя лэ манушэнди тэ пистрой андэ книӷа кода, со во камэлас пала пэстэ тэ росԥэнэн (Иер. 30:2). Амэ ӷанас, кай «лэ чачунэ Дэвлэско дром совершэно» (Пс. 18:30). Важ када амэ уверени, кай во витидя со май лашо способо, сар тэ дэл дума амэнца.

3. Сар о Иегова позаботисайля, кай лэстирэ алава тэ дожан каринг амарэ деса? (Исайя 40:8).

³ Проадинон Исайя 40:8. И Библия ужэ най ек тысяча бэрш дэл мудрость лэ муршэнди и лэ жувлянди, савэ верни лэ Дэвлэсти. Сар? Када лашо вопросо, важ кода кай и Библия сас пистромэ дэлмут. Спэрва вой пистрояспэ пэ свиткоря, савэн через и время на ашэля, важ када амэндэ нинай ни ек ориӷинально свитко. Но о Иегова позаботисайля, кай па кадэла свиткоря тэ авэн стердэ бут копии. Хоть и мануша, савэ терэнас и копии, сас нэсовершэни, вонэ фартэ любинас пэстири бути. Например, акэ со ԥэндя ек учоно пала Еврейски Писании: «Амэ уверени, кай нинай ни ек кацави дэлмутни книӷа, сави кадяжэ точно пэрэпистросардэ». Важ када хоть и нэсовершэни пэрэпищикоря бут викоря палпалэ терэнас копии пэ най прочно материало, амэ всаек можэм тэ патяс, кай адес адиносарас андэ Библия кодэла гиндоря, савэ пэрэдя лако Афтаро, о Иегова.

4. Со амэ уӷанаса андэ кадэя статья?

⁴ О Иегова дэл амэнди «лашэ и совершэни подаркоря» (Иак. 1:17). Ек анда со май лашэ лэ Дэвлэстирэ подаркоря — када и Библия. Часто через о подарко можно тэ уӷанас, пэ скати дэ драго амэн ӷанэн кодэва, ко лэс дарий. Кадя жэ и ла Библияса. Со май бут амэ уӷанас пала латэ, со май бут амэ уӷанас пала Иегова: пэ скати дэ драго во ӷанэн амэн и кода, со амэнди трэбуй. Андэ кадэя статья амэ подаса дума, сар и Библия сыкавэл трин лэ Иеговастирэ качестворя — мудрость, справедливость и любовь. Спэрва давайте роздиқаса, со амэ можэм тэ уӷанас анда Библия пала лэ Дэвлэстири мудрость.

И БИБЛИЯ РОСԤЭНЭН ПАЛА ЛЭ ДЭВЛЭСТИРИ МУДРОСТЬ

5. Со доԥэнэн, кай андэ Библия исин мудрость лэ Дэвлэстар?

⁵ О Иегова ӷанэн, кай амэнди трэбуй лэстирэ мудри советоря. И андэ Библия, сави во подарисардя, исин бари мудрость. Латирэ советоря драго влияют пэ мануша. Лэ Дэвлэстирэ алава парувэн и жызня. Посли кода, сар сас запистромэ пэрви книжки андэ Библия, о Моисеё ԥэндя лэ израильтянонэнди: «Када важ тумэндэ най прости алава, важ кода кай лэндар зависит тумари жызня» (Втор. 32:47). Кодэла, ко приашундёнас каринг и алава анда Свынто Писания, андярэнас бахтали жызня, и лэндэ вся драго вижалас (Пс. 1:2, 3). Прожыля бут время, но и гиндоря анда Библия на хасардэ пэско зор, вонэ вся кадя жэ поможын лэ манушэнди тэ парудёнпэ андэ лащи риг. Андо раздело «Библия парувэл и жызня» по сайто jw.org можно тэ виарақас май бут чем 50 биаӷрафии пала амарэ ԥрала и ԥэя. Лэндири жызня сыкавэл, кай и Библия и адес «парувэл и жызня кодэлэнди, ко патял» (1 Фес. 2:13).

6. Васо можно тэ ԥэнас, кай и Библия — када особено книӷа?

⁶ Ни ек авэр книӷа на сыстояпэ ла Библияса. Васо можно кадя тэ ԥэнас? Важ кода кай лако Афтаро, о Дэл Иегова, — всемоӷущё, вечно и со май мудро андэ люма. Бут авэр книжки адинон и посли кода, сар лэнго афтаро на ашэля, но сар прожал время, часто лэндирэ советоря ужэ на анэн нисави польза. Но и принцыпоря анда Библия вечни. Када мудрость пэ вся и время. Кала амэ адиносарас кадэя свынто книӷа и гиндосарас пала кода, со уӷанглям, лако Афтаро пэстирэ зоралэ свынтонэ духоса поможый амэнди тэ полас, сар тэ прилас латирэ советоря (Пс. 119:27; Мал. 3:16; Евр. 4:12). Чаче, ла Библияко Афтаро вечно и во камэл амэнди тэ поможый. Акэ васо кадя важно тэ адиносарас и Библия кажно дес!

7. Сар и Библия поможыяс, кай андэ лэ Дэвлэско народо тэ авэл единство?

⁷ Сар инке и Библия сыкавэл лэ Дэвлэстири мудрость? И Свынто Писания поможый, кай андэ лэ Дэвлэско народо тэ авэл единство. Кала и израильтяноря авелэ андэ обетовано ԥув, вонэ розжылэпэ андэ разни ҭана, савэ сас андэ кодэя бари тиритория. Дэсавэ ашэлэ рыбакоря, авэр пасынас о ското, ай варико залэласпэ ла ԥувьяса. И израильтяноря, савэ жувэнас пэ разни краёря и сас дур ек еқэстар, моӷли вушэро тэ парашэн тэ заботинпэ ек пала еқэстэ. Но о Иегова позаботисайля, кай андэ дэсавэ деса вся о народо тэ стидэлпэ еқэҭанэ, кай тэ ашунэн, сар адинон и объяснин и Свынто Писания (Втор. 31:10—13; Неем. 8:2, 8, 18). Прецтавьте, со сас по ди кай о израильтянино, саво авеля андо Иерусалимо. Во диқэл бутэ лэ Дэвлэстирэ служытелёнэн, савэ авелэ па разни краёря андэ страна! Кадя о Иегова поможыяс пэстирэ народости тэ фэрин о единство. Ӷэт май интя, кала появисайля и христианско собрания, андэр латэ сас мурша и жувля, савэ дэнас дума пэ разни шыба. Машкар лэндэ сас барвалэ, ашунглэ, ай кадяжэ прости и дажэ чорорэ мануша. Но через кода кай вонэ любинас и Свынто Писания, вонэ еқэҭанэ тэлёнас чачунэ Дэвлэсти. И нэвэ ученикоря моӷли тэ полэн, со пистромэ андэ лэ Дэвлэско Алав, кати тоди, кала ԥирэнас пэ встречи и прилэнас помощь лэ ԥралэндар и лэ ԥэяндар (Деян. 2:42; 8:30, 31).

8. Сар и Библия адес поможый, кай машкар лэ Иеговаско народо тэ авэл единство?

⁸ Амаро мудро Дэл на парашэл тэ сытярэл и тэ стидэл пэстирэ служытелёнэн через и Библия. Андэр латэ исин вся о чачимос пала Иегова, саво амэнди трэбуй тэ ӷанас. Амэ на промэкас амарэ встречи и канӷрэсоря. Котэ амэ ашунас, сар адинон и объяснин и Свынто Писания. Вижал, имено блаӷодаря ла Библияти амэ можэм тэ служысарас лэ Иеговасти еқэҭанэ (Соф. 3:9).

9. Саво качество трэбуй, кай тэ полэс и Библия?

⁹ Роздиқаса инке ек маменто пала лэ Иеговастири мудрость. И Библия сас пистросарди кадя, кай ла моӷ тэ полэл кати о найӷордо мануш. (Проадинон Луки 10:21.) Сар амэ ӷанас, и Библия адинон па вся и люма. Ек учоно ԥэндя: «Анда всаворэ книӷи и мануша май бут адинон и Библия. Нинай ни ек книӷа, сави адиносардоп кадя дэ внимательно». Но кати и мануша, савэндэ исин смирения, па чачимастэ ла полэн и прилэн кода, со андэр латэ ԥэнэнпэ (2 Кор. 3:15, 16).

10. Сар инке андэ Библия дицол лэ Иеговастири мудрость?

¹⁰ Со инке амэ уӷанас анда Библия пала лэ Иеговастири мудрость? Через и Свынто Писания во най кати сытярэл вся пэско народо, но кадяжэ сытярэл и подритярэл кажнонэ пэстирэ служытелёс. Кажно андар мэндэ, кала адиной и Библия, можэт тэ полэл, кай о Иегова шол сама лично лэс (Ис. 30:21). Сас кацаво, кай кала андэ ԥари время адиносас и Библия, тути попэрдёлас стихо, саво фартэ трэбуй тути? Наверно, кацаво сас най еқвар. Но и Библия сас пистромэ важ и милионоря мануша. Сар тоди андэр латэ моӷут тэ авэн гиндоря, савэ трэбуй имено тути андэ тири ситуацыя? Када возможно кати блаӷодаря кодэлэсти, кай лако Афтаро само мудро (2 Тим. 3:16, 17).

И БИБЛИЯ РОСԤЭНЭН ПАЛА ЛЭ ДЭВЛЭСТИРИ СПРАВЕДЛИВОСТЬ

11. Сар дицэля, кай о Иегова еқэндар обжалпэ всаворэнца, кала пистронас и Библия?

¹¹ Инке ек лэ Иеговаско качество — када справедливость (Втор. 32:4). Справедливо мануш всаворэнца обжалпэ еқэндар. Кадяжэ можно тэ ԥэнас и пала Иегова (Деян. 10:34, 35; Рим. 2:11). Андар со дицэля, кай о Иегова обжалпэ всаворэнца еқэндар? Например, када пэ савэ шыба сас пистромэ и Библия. Пэрви 39 библейски книжки почти полностью сас пистросардэ пэ еврейско шыб, сави вушэро полэнас лэ Дэвлэстирэ служытеля андэ кодэя время. Но каринг о пэрво вико май бут мануша линэ тэ дэн дума пэ ӷреческо шыб. Важ када авэр 27 книжки андэ Библия сас пистросардэ пэ кадэя шыб. О Иегова на столас правило, кай и Библия тэ авэл кати пэ ек шыб. Адес пэ амари ԥув жувэл варикай 8 милиардов манушэн, савэ дэн дума пэ разни шыба. Сар всаворэ кадэла мануша моӷут тэ уӷанэн пала Иегова?

12. Сар о пророчество анда Даниила 12:4 исполнийпэ андэ амарэ деса?

¹² Через о пророко Даниило о Иегова дя алав, кай андэ послидни деса «о чачимос [анда Библия] полэна май бут». (Проадинон Даниила 12:4.) Кадэва чачимос ашэл май бут, блаӷодаря кодэлэсти, кай пэрэандярэн, вимэкэн и роздэн и Библии, ай кадяжэ библейско литература. И Библия исин пэ со май бут шыба и вой ашэля со май ашунгли книӷа па вся и ԥув. И камерчески арӷанизацыи кадяжэ пэрэандярэн и Библии, но дэкала вонэ ашэн фартэ куч. Лэ Иеговастирэ служытеля пэрэандярдэ и Свынто Писания или дэсавэ части андар латэ май бут чем пэ 240 шыба. Любо можэт тэ адиной ла и пала када на трэбуй тэ дэл ловэ. Важ када и мануша анда всаворэ народоря моӷут тэ ашунэн «и лащи новость пала Царство» (Матф. 24:14). Амаро справедливо Дэл, саво всаворэнца обжалпэ еқэндар, камэл, кай май бут мануша тэ адинон и Библия и через када тэ ашэн май пашэ каринг лэстэ. Во дэл амэнди кадэя возможность, важ кода кай фартэ любий амэн.

И БИБЛИЯ РОСԤЭНЭН ПАЛА ЛЭ ДЭВЛЭСТИРИ ЛЮБОВЬ

13. Васо можно тэ ԥэнас, кай и Библия сыкавэл лэ Иеговастири любовь? (Иоанна 21:25).

¹³ И Библия поможый тэ уӷанас райкано качество, саво исин кай лако Афтаро, — када любовь (1 Иоан. 4:8). Погиндон, со о Иегова через пэско свынто духо запистросардя андэ Библия, ай со най. Во росԥэндя амэнди имено кода, со трэбуй, кай тэ ашас лэстирэ друӷоря, тэ авас бахталэ и тэ жувас вечно. Но через кода, кай о Иегова любий амэн, во на ля тэ дэл амэнди бут авэр знании, савэ амэ на полиноп. (Проадинон Иоанна 21:25.)

14. Сар инке и Библия доԥэнэн, кай о Дэл любий амэн?

¹⁴ Лэ Иеговастири любовь инке дицэля андэ кода, сар во пативаса дэл дума амэнца через пэско Алав, и Библия. Андэр латэ амэ на виарақас бут правила, савэ контролируют кажно амаро шаӷо. Наоборот, о Иегова камэл, кай амэ тэ сытювас тэ гиндосарас. Важ када, андэ лэско алав запистромэ бут случаёря анда жызня, удивительни пророчества и лашэ советоря. Кадяжэ и Библия побудий амэн тэ любисарас и тэ кандас лэ Иеговас анда вся оди.

15. а) Сар о Иегова сыкавэл, кай заботийпэ пала кодэла, ко адинон и Библия? б) Диқэн пэ картинка. Пала савэ примероря анда Библия гиндой тэрнёры ԥэёры, тэрно ԥрал и ԥэй андэ бэршэндэ? (Быт. 39:1, 10—12; 2 Цар. 5:1—3; Луки 2:25—38).

¹⁵ И Библия сыкавэл, кай о Иегова фартэ заботийпэ пала амэндэ. Андар со када дицол? Андэ лэско алав амэ можэм тэ адиносарас пала мануша и тэ уӷанас, со лэндэ сас по ди. Тоди амэ можэм тэ полас, кай лэндэ сас кацавэ жэ чуства, сар и амэндэ (Иак. 5:17). Но со май важно, кала амэ адиносарас, сар о Дэл обжаласпэ лэ манушэнца, амэ инке май драго полас, кай о Иегова «фартэ любий и жалуий анда вся оди» (Иак. 5:11).

16. Со амэ уӷанас пала Иегова, кала адиносарас андэ Библия пала мануша, савэ шылинаспэ? (Исайя 55:7).

¹⁶ Со инке амэ уӷанас анда Библия пала лэ Иеговастири любовь? И Свынто Писания сыкавэл, кай о Дэл на одбандёла амэндар, если амэ шылисаваса. И израильтяноря терэнас бэзэх против о Иегова упалэ и упалэ. Но кала вонэ анда вся оди каинаспэ, во лэн простияс. (Проадинон Исайя 55:7.) И христианоря андэ пэрво вико тожэ ӷанэнас, кай о Иегова лэн любий. О апостало Павло через о свынто духо ԥэндя лэ ԥралэнди и лэ ԥэянди, кай вонэ «анда вся оди тэ простин... и тэ подритярэн» лэ манушэс, саво стердя баро бэзэх, но ӷэт май интя каисайля (2 Кор. 2:6, 7; 1 Кор. 5:1—5). Сар приятно тэ адиносарас, кай о Иегова на отшолас пэстирэ служытелёнэн, савэ шылинаспэ! Наоборот, во терэлас пэрво шаӷо каринг лэндэ, сытярэлас и ақарэлас, кай вонэ упалэ тэ ашэн лэстирэ друӷоря. Во дэл алав, кай адес кадяжэ лэла тэ обжалпэ кодэлэса, ко тердя бэзэх, но каийпэ (Иак. 4:8—10).

ЦЭНИН И БИБЛИЯ — ЛЭ ДЭВЛЭСКО СОВЕРШЭНО ПОДАРКО

17. Васо можно тэ ԥэнас, кай и Библия — када особено подарко лэ Дэвлэстар?

¹⁷ О Иегова подарисардя амэнди розлашо подарко. Васо можно тэ ԥэнас, кай во особено? Сар амэ уӷанглям, и Библия росԥэнэн пала лэ Дэвлэстири мудрость, любовь и справедливость. Кадэя книӷа сыкавэл, кай о Иегова камэл, кай амэ пала лэстэ тэ уӷанас май бут и тэ авас лэстирэ друӷоря.

18. Сар амэ можэм тэ сыкавас пэстири блаӷодарность лэ Иеговасти важ лэско совершэно подарко?

¹⁸ Амэ на камас тэ бистрас, кай и Библия — совершэно подарко амарэ небеснонэ Дадэстар (Иак. 1:17). Сар амэ можэм тэ сыкавас пэстири блаӷодарность? Кала адиносарас и свынти лэ Иеговастирэ алава и гиндосарас пала лэндэ. Тоди ла библияко велико Афтаро блаӷословия амэн и дэла май бут тэ уӷанас пала лэстэ (Прит. 2:5).