Патян, кай тумэ уӷанглэ о чачимос пала Дэл

1. Васо амэ лошалэ тэ ӷанас о чачимос анда Библия?

МОЖЭТ, амэ уӷанглям о чачимос пала Дэл, кала самас цынёне чи кала ужэ ашэлям взросли. Сар бы тэ на авэл, амэ лошалэ тэ ӷанас о чачимос пала Дэл. Кала амэ лям тэ жувас па библейски принцыпоря, амэ лям па аврятэ тэ полас лэ Дэвлэс и па аврятэ пэс тэ андярас. Важ када амэ парашэлям тэ патяс андо хохаимос, савэсти сытярэн и хохавнэ веры. Ай кадяжэ амари жызня ашэля май бахтали, пэ скати када можэт тэ авэл кай и найсовершэни мануша (Иоанна 8:32).

2. Со, сар пистромэ андэ Иоанна 13:34, 35, чалёл лэ манушэсти, кала во лэл тэ уӷанэн о чачимос?

² Васо ту закамлян тэ уӷанэс о чачимос анда Библия? Можэт тути чалеля кода, сар андярэнас пэс лэ Иеговастирэ служытеля (1 Петра 2:12). Ай можэт тути чалеля, сар вонэ обжанпэ ек еқэса. Бут андэ кодэла, ко пэрво разо авелэ пэ собрания, диқлэ кадэя любовь каринг пэстэ. Вонэ сэрэн пала латэ май фартэ, чем пала кода, со ашундэ пэ собрания. И амэ на удивисавас кадэлэсти, важ кода кай о Иисусо ԥэндя, кай лэстирэ учениконэн ӷатярэна па кода, кай вонэ любин ек еқэс. (Адиносар Иоанна 13:34, 35b.) Но кай фартэ тэ патяс андо Дэл, амэ трэбуй инке варисо тэ стерас.

3. Со можэт тэ авэл, если ту патяс лэ Дэвлэсти кати важ кода, кай тути чалёл и любовь, сави исин кай лэстирэ служытеля?

³ Амэнди всаворэнди чалёл и любовь, сави исин кай лэ Дэвлэстирэ служытеля. Но амэ трэбуй тэ патяс лэ Иеговасти най кати важ када. Васо? Со если варисаво ԥрал, саво дажэ старейшына чи пианеро, стерэла баро бэзэх? Ай со если варико андэ собрания холярэла тут чи ашэла отступникоса и лэла тэ ԥэнэн тути, кай лэ Иеговастирэ свидетелёнэндэ найчачуни вера? Если кацаво авэла, змардёса ту па правильно дром и парашэса тэ служыс лэ Иеговасти? Кадэла вопросоря поможын тэ полас акэ со. Если амэ патяс лэ Дэвлэсти кати важ кода, кай амэнди чалёл и любовь, сави исин кай лэстирэ служытеля, ай най важ кода кай дружысарас лэ Иеговаса, тоди амэ, ԥэнаса, строисарас амаро цэр най по састо фундаменто. Канешно, кода, кай тумэ любин лэ Иеговас и лэстирэ служытелёнэн, поможыя тумэнди тэ патян лэ Дэвлэсти. Но кай май фартэ тэ патян, трэбуй драго тэ сытён па Библия и драго тэ полэн, сости вой сытярэл. Кадя тумэ май драго полэна, кай и Библия сытярэл лэ чачимасти пала Иегова (Римлянам 12:2).

4. Со дэко терэл, сар запистромэ андэ Матфея 13:3—6, 20, 21, кала лэндэ ԥаримос?

⁴ О Иисусо ԥэндя, кай дэко авэла лошало тэ прилэл о чачимос пала Дэл. Но кала лэндэ авэла ԥаримос, вонэ парашэна фартэ тэ патян лэ Дэвлэсти. (Адиносар Матфея 13:3—6c, 20, 21d.) Файма, кацавэ мануша на полэнас, кай кала вонэ жана пала Иисусо, лэндэ авэла ԥаримос (Матфея 16:24). Ай можэт вонэ гиндонас, кала вонэ ашэна христианонэнца, лэндэ никала на авэла ԥаримос чи кай всаворэ лэндирэ проблемы улэла о Дэл. Но адес би ԥаримаско нисар. Амэндэ можэт варисо тэ парудёл андэ жызня и важ када пэ дэсави время амэ можэм тэ хасарас и радость (Псалом 6:6; Экклезиаст 9:11).

5. Со сыкавэл, кай почти всаворэ амарэ ԥрала и ԥэя ӷанэн, кай кода, андэр со вонэ патян, чачимос?

⁵ Почти всаворэ амарэ ԥрала и ԥэя ӷанэн, кай кода, андэр со вонэ патян, када чачимос. Васо можно кадя тэ ԥэнас? Важ кода кай дажэ, если варико андэ собрания холярэл лэн чи андярэл пэс най кадя, сар сытярэл о Дэл, вонэ всаек на парашэн тэ кандэн лэ Иеговас (Псалом 119:165). Кажно разо, кала андэ лэндири жызня ԥаримос, вонэ инке май фартэ лэн тэ патян лэ Дэвлэсти и на змардён па лэско дром (Иакова 1:2—4). Со поможыя и амэнди кадяжэ фартэ тэ патяс, сар и вонэ?

МАЙ ДРАГО УӶАНЭН ПАЛА ДЭЛ

6. Со сас ӷлавно, андэр со патянас и христианоря андэ пэрво вико?

⁶ Андэ пэрво вико ӷлавно, андэр со патянас и христианоря сас кода, сости сытярэлас о Иисус Христос и со сас запистромэ андэ Свынто Писания. Када сас чачимос, андэ саво вонэ патянас (Галатам 2:5). Андэ кадэва чачимос ужал вся, андэр со патян и христианоря. Вонэ патян, кай о Иисусо отдя пэстири жызня, витиндя амэн анда ӷрехо, и кай о Дэл рисардя лэс каринг и жызня. О апостоло Павло патялас андэ када. Катар амэ када ӷанас? Во драго доԥэнэнас па Писания, кай «лэ Христости трэбуй сас тэ пэрэандярэл о ԥаримос и тэ рийпэ каринг и жызня» (Деяния 17:2, 3). Ай кадяжэ андэ када патяе лэ Христостирэ ученикоря и вонэ патяе, кай о свынто духо поможыя лэнди тэ полэн и Писания. И вонэ полинэ, кай вся, андэр со вонэ патяе, када запистромэ андэ Свынто Писания (Деяния 17:11, 12; Евреям 5:14). Лэ Иисусостирэ ученикоря патянас лэ Иеговасти най кати важ кода кай лэнди сас драго по ди машкар христианоря, и служынас вонэ най кати важ кода кай лэнди чалёлас тэ проандярэн и время лэ ԥралэнца и лэ ԥэянца. Ай вонэ патяс, важ кода кай линэ «май бут и май драго тэ уӷанэн пала Дэл» (Колоссянам 1:9, 10).

7. Сар амэнди можэт тэ поможый кода, кай амэ патяс андо чачимос анда Библия?

⁷ Кода, сости сытярэл и Библия, никала на парудёлпэ (Псалом 119:160). Например, если варико андэ собрания амэн холярдя чи стердя баро ӷрехо, о чачимос анда Библия, всаек нисар на парудёлпэ. На парудёлпэ и тоди, кала амэндэ ԥаримос. Важ када амэнди трэбуй фартэ драго тэ ӷанас, сости сытярэл и Библия и тэ патяс, кай када чачимос. Если амэ патяс лэ Дэвлэсти, важ кода кай ӷанас и Библия, тоди када поможыя амэнди тэ виритярас любо ԥаримос. Када, сар о якорё ритярэл о кораблё, кала бари буря. Но со трэбуй, кай инке май драго тэ полас, кай кода, андэр со амэ патяс, када и исин чачимос?

ТРЭБУЙ ТЭ ПОЛАС, КАЙ АМЭ ӶАНАС О ЧАЧИМОС

8. Со поможысардя лэ Тимофеёсти тэ полэл, кай во патял андо чачимос пала Дэл?

⁸ О Тимофеё полэлас, кай кода, андэр со во патялас, када чачимос. Со лэсти андэ када поможысардя? (Адиносар 2 Тимофею 3:14, 15e.) Пала Свынто Писания лэсти росԥэндэ лэсти дэй и лэсти баба. Но инке во екжэно столас зор и время, кай май драго тэ полэл и Писания. Важ када во патялас, кай уӷангля о чачимос. Прожыля время, о Тимофеё, лэсти дэй и лэсти баба уӷанглэ пала кода, сости сытярэлас о Иисусо. Лэ Тимофеёсти фартэ чалёлас, кай лэ Иисусостирэ ученикоря сас куч ек еқэсти. Во фартэ камэлас тэ проандярэл и время лэ ԥралэнца и лэ ԥэянца, савэндэ лащи дружба лэ Иеговаса и тэ заботийпэ пала лэндэ (Филиппийцам 2:19, 20). Но во патялас най ек важ кода кай лэсти чалёлас, сар андярэн пэс ек еқэса и христианоря, ай важ кода кай драго ӷанэнас о чачимос анда Свынто Писания. Блаӷодаря кадэлэсти, лэстэ ашэля лащи дружба лэ Иеговаса. Амэнди кадяжэ трэбуй, кала адиносарас пала Иегова анда Библия, тэ погиндосарас пала кода, со уӷанас пала лэстэ.

9. Со тумэ трэбуй драго тэ полэн анда Библия?

⁹ Спэрва трэбуй тэ полас трин ӷлавни гиндоря анда Библия. Пэрво, када, кай вся создал о Иегова (Исход 3:14, 15; Евреям 3:4; Откровение 4:11). Дуйто, кай и Библия, када письмо лэ Дэвлэстар лэ манушэнди (2 Тимофею 3:16, 17). Трито, кай лэ Иеговастэ исин народо, савэстэ порядко андэ служэния и пала када диқэл о Иисус Христос. Пэ кадэва народо ԥэнэн лэ Иеговастирэ свидетеля (Исаия 43:10—12; Иоанна 14:6; Деяния 15:14). Кай фартэ тэ патяс андэ кадэва чачимос, амэнди на трэбуй тэ ӷанас вся, со пистромэ андэ Библия. Но амэ камас инке май фартэ тэ патяс андэ кода, кай ӷанас о чачимос анда Библия и када трэбуй тэ терас «всаворя́ годяса» (Римлянам 12:1).

ПОМОЖЫН АВРЭНДИ ТЭ ПОЛЭН, КАЙ КОДА, АНДЭР СО ВОНЭ ПАТЯН, ЧАЧИМОС

10. Сости амэ трэбуй тэ сытювас, кала уӷанас, кай андэ Библия запистромэ о чачимос пала Дэл?

¹⁰ Кала амэ патяям андэ кадэла трин ӷлавни маменторя, када пала Библия, пала Дэл и пала лэско народо, амэ трэбуй тэ сытювас, сар па Библия тэ доандярас аврэнди, кай када чачимос. Васо? Важ кода кай, сар христианоря, амэ трэбуй тэ росԥэнас пала кадэва чачимос анда Библия кодэлэнди, ко амэн ашунэн (1 Тимофею 4:16)f. И кала амэ аврэ манушэнди росԥэнас, кай вся, сости сытярэл и Библия, када чачимос, амэ екжэнэ лас май фартэ тэ патяс андэ када.

11. Сости амэ сытювас кай о апостоло Павло?

¹¹ Кала о апостоло Павло росԥэнэнас лэ манушэнди, во «доԥэнэнас лэнди о чачимос пала Иисусо анда лэ Моисеёско Законо и анда лэ Пророконэндирэ алава» (Деяния 28:23). Сар тэ терас, сар о Павло, кала сытярас лэ манушэн па Библия? Амэнди трэбуй най просто тэ пэрэԥэнас кода, со пистромэ. Амэ трэбуй тэ поможысарас, кай вонэ екжэнэ тэ гиндон и екжэнэ тэ полэн кода, со запистромэ андэ Библия. Кадя вонэ авэна май пашэ каринг о Иегова. Амэ камас, кай вонэ тэ патян андо чачимос пала Дэл, най важ кода кай лэнди чалёл амэнца тэ дэн дума, ай важ кода кай вонэ екжэнэ виарақлэ анда Библия кода, со доԥэнэн, кай о Иегова любящё Дэл.

12, 13. Сар и родителя моӷут тэ поможын лэ бэятонэнди тэ ашэн лэ Иеговастирэ свидетеля?

¹² Дада и дэя, тумэ, канешно, камэн, кай тумарэ бэяцэ тэ авэн лэ Иеговастирэ свидетеля. Файма, тумэ гиндон, кай если лэндэ авэна лашэ друӷоря андэ собрания, тоди лэндэ авэла лащи дружба лэ Иеговаса. Но кай тумарэ бэяцэ тэ патян, кай вся, сости сытярэл и Библия, када чачимос, тэ авэн лэндэ ек кати и лашэ друӷоря, на хутилэла. Лэндэ трэбуй тэ авэл пэстири дружба лэ Иеговаса и трэбуй, кай вонэ екжэнэ тэ полэн, кай вся, со запистромэ андэ Библия, када чачимос.

¹³ О дад и дэй камэн тэ сытярэн пэстирэ бэятонэн, кай вонэ тэ ӷанэн о чачимос пала Дэл. Важ када вонэ трэбуй екжэнэ драго тэ сытён па Библия и кадэлэса тэ подэн лэнди примеро. Лэ родителёнэнди трэбуй время, кай драго тэ погиндон пала кода, со уӷанглэ анда Библия. Тоди лэндэ вижала тэ сытярэн пэстирэ бэятонэн тэ терэн кадяжэ. Лэ бэятонэн трэбуй тэ сытярэн, кай вонэ тэ ӷанэн, сар тэ зажан андэ «Онлайн-библиатека Сторожэво башня» и андэ прилажэния JW Library®. Ай кадяжэ вонэ трэбуй тэ ӷанэн тэ ԥэрнавэн андо компьютеро чи телефоно вся амари литература и видео, савэ поможын драго тэ полэн и Библия. И родителя трэбуй тэ сытярэн лэн кадяжэ, сар и аврэ манушэн, савэн вонэ сытярэн па Библия. Кадя вонэ поможына лэ бэятонэнди май фартэ тэ любин лэ Иеговас и май фартэ тэ патян, кай о Иегова стодя лэ годявэрнэс и кандинэс рабос, важ кода кай во тэ поможый тэ полас и Библия (Матфея 24:45—47). Дада и дэя, на парашэн тэ поможын лэ бэятонэнди тэ уӷанэн кода, со ӷлавно анда Библия. Ай кадяжэ сытярэн лэн, кай вонэ тэ полэн и пророчества андар латэ и авэр важни гиндоря, савэ ԥарэс тэ полэс. Росԥэнэн лэнди кадя, кай тэ авэл понятно па лэндирэ бэрша и годи. Кадя тумэ поможына лэнди инке май фартэ тэ патян лэ Дэвлэсти.

УӶАНЭН МАЙ ДРАГО И ПРОРОЧЕСТВА АНДА БИБЛИЯ

14. Васо амэнди трэбуй драго тэ ӷанас и пророчества анда Библия? (Диқэн и рамка «Можэш ту тэ росԥэнэс, пала со кадэла пророчества?».)

¹⁴ Андэ Библия исин бут пророчества. Вонэ поможын амэнди май фартэ тэ патяс лэ Иеговасти. Ай савэ пророчества поможысардэ тумэнди? Можэт кодэла, андэ савэ росԥэнэнпэ пала «послидни деса» (2 Тимофею 3:1—5; Матфея 24:3, 7). Ай со тумэ ӷанэн пала авэр пророчества? Можэте тумэ тэ росԥэнэн, со пистромэ андо пророчество анда Даниила 2 чи 11 ӷлава?g Если амэ патяс андэ кода, со пистромэ андэ Библия, тоди, со бы тэ на авэл, амэ на парашаса тэ патяс лэ Дэвлэсти.

15—17. Сар кода, кай и ԥрала и ԥэя драго полэнас и Библия, дя лэнди зор тэ виритярэн о ԥаримос, кала сас нацыско правления?

¹⁵ Погиндон пала амарэ ԥрала и ԥэя, савэн фартэ ӷонинас андэ Германия, кала сас Дуйто мирово война. Хоть андэ кодэя время найдраго полэнас о пророчество пала послидни деса, всаек и ԥрала и ԥэя фартэ патянас кодэлэсти, со вонэ уӷанглэ анда Библия. Кала правияс нацыско правительство андэ Германия, фартэ бутэ ԥралэн и ԥэян бэшарэнас андэ концлаӷерёря (када барунэ, кай сас фартэ ԥарэс тэ вижувэс и кай терэнас фартэ ԥари бути). О Гитлеро и о Генрихо Гиммлеро, саво сас барэ манушэса андо правительство, нэнавидели лэ Иеговастирэ свидетелёнэн. Сар росԥэндя ек ԥэй, о Гиммлеро ԥэндя дэсавэнди ԥэянди, савэ бэшэнас андэ кадэва баруно: «Тумаро Иегова мэк правий по нэбо, ай катэ пэ ԥув прависарас амэ! Амэ тумэнди сыкаваса, ко кас пэрэжувэла!» Со поможысардя лэ Иеговастирэ служытелёнэнди тэ на парашэн тэ патян лэ Дэвлэсти андэ кацави ԥари время?

¹⁶ Вонэ ӷанэнас, кай лэ Дэвлэско Царство ля тэ правий андо 1914 бэрш. Важ када вонэ на удивисайлэ, кай лэн линэ фартэ тэ ӷонин. Лэ Иеговаско народо патялас, кай ни ек манушыкано правительство нэ сможэт тэ тердярэл лэ Дэвлэс, кай во тэ на стерэл кода, со загиндосардя. О Гитлеро нэ моӷ тэ стерэл кадя, кай нико тэ на тэлёл лэ Иеговасти чи тэ стол правительство, саво май зорало, чем лэ Дэвлэско Царство. Амарэ ԥрала и ԥэя драго ӷанэнас, кай авэла время и о Гитлеро, парашэла тэ правий.

¹⁷ Кода, андэр со патянас кадэла ԥрала и ԥэя, сас чачимос. Через дэсави время о нацыско правительство парашэля тэ правий. И лэ Генрихости Гиммлерости прижыляпэ тэ нашэлтар, кай тэ спасыйпэ, хоть во и ԥэндясас: «Катэ пэ ԥув прависарас амэ». Прожыля время, и во додиқля лэ ԥралэс, саво бэшэлас андо концлаӷерё и ӷатярдя лэс. По Гиммлеро на сас муй. Во сас нисаво, кала пушля: «Ну, со, Исследователь Библии, и со акана авэла?» О ԥрал росԥэндя лэ Гиммлерости, кай лэ Иеговастирэ служытеля всегда ӷанэнас, кай о нацыско правительство парашэла тэ правий, ай вонэ спасынапэ. Раньшэ о Гиммлеро ԥэнэнас бут найлашимос пэ Иеговастирэ служытеля. Но андэ кодэва маменто лэстэ най со сас тэ ԥэнэн. Йто посли када во умардя корко пэс. Сости амэ можэм анда вся када тэ сытювас? Кала амэ драго полас и Библия и и пророчества, савэ андэр латэ, када амэнди поможыя май фартэ тэ патяс лэ Дэвлэсти и тэ на здаспэ, кала амэн ӷонин (2 Петра 1:19—21).

18. Сар кода, со пистромэ андэ Иоанна 6:67, 68, поможыя тэ полас, васо амэнди трэбуй май драго тэ уӷанас и тэ полас кода, андэр со патяс?

¹⁸ Всаворэндэ амэндэ трэбуй тэ авэл любовь, па сави ӷатярэн лэ чачунэ христианонэн. Но кадяжэ амэнди трэбуй май драго тэ уӷанас и май драго тэ полас кода, андэр со патяс (Филиппийцам 1:9). Если амэ када на тераса, тоди амэ ласа тэ патяс лэ манушэнди, савэ хохавэн, и лэ отступниконэнди. Тоди амэн, сар балваляса лэла тэ шувидэл андэ рига (Эфесянам 4:14). Андэ пэрво вико бут ученикоря ашадэ лэ Иисусос. Ай о апостоло Пётро анда оди ԥэндя лэ Иисусости: «Тутэ и алава пала вечно жызня». (Адиносар Иоанна 6:67, 68h.) Хоть о Пётро най вся полэлас, сости сытярэлас о Иисусо, всаек во на парашэлас тэ кандэл пэстирэ Учителёс, важ кода кай поля, кай о Иисусо, када и исин о Христос. Тумэ кадяжэ можэте инке май фартэ тэ патян андэ кода, сости сытярэл и Библия. Тоди со бы тэ на авэл, тумэ на парашэна тэ патян лэ Дэвлэсти и поможына аврэнди май фартэ тэ патян лэсти (2 Иоанна 1, 2).