СТАТЬЯ, КАЙ ТЭ СЫТЮВАС 28
На парашэн тэ служын лэ Иеговасти, кала запрето
«Амэ нэ можэм тэ парашас тэ росԥэнас пала кода, о диқлям и ашундям» (ДЕЯНИЯ 4:19, 20).
ДИЛИ 122 Будьте тверды, непоколебимы!
ПАЛА СО УӶАНАСА АНДА СТАТЬЯ?a
1, 2. а) Васо амэ на удивисавас, кай андэ дэсавэ страны пэ амари дила запрето? б) Пала со амэ подаса дума андэ кадэя статья?
ИСИН страны, кай совсем на мэкэн тэ тэлён лэ Иеговасти или на мэкэн дэсо тэ терэн, кай тэ тэлён лэсти. Андо 2018 бэрш, андэ кацавэ страны сас май бут чем 223 000 манушэн, савэ росԥэнэнас важ о Дэл. Кода, кай и власти найдраго обжанпэ лэ Иеговастирэ свидетелёнэнца, амэ кадэлэстар на удивисавас. Сар ԥэнэнаспэ андэ статья, сави сас май англал, чачунэ христианоря ӷанэн, кай лэн лэна тэ ӷонин (2 Тимофею 3:12). Кай бы амэ тэ на жувас, и власти моӷут тэ стон запрето, кала на аштярас, кай амэ тэ на тэлювас амарэ любящёнэ Дэвлэсти, лэ Иеговасти.
2 Если кацаво тердяпэ андэ тумари страна, тумэ можэте тэ пушэн, када со, о Иегова амэн на блаӷословий? Тердярэла о запрето амари дила чи най? Трэбуй тэ пэрэладас андэ авэр страна, кай тэ тэлювас лэ Иеговасти, кай нинай запрето? Роздиқам кадэла вопросоря и подаса дума, со тэ терас, кай и май дур тэ служысарас лэ Дэвлэсти, кала исин запрето и со на трэбуй тэ терас.
СО, О ИЕГОВА НА БЛАӶОСЛОВИЙ АМЭН, КАЛА ӶОНИН?
3. Сар ӷонинас лэ Павлос, сар пистромэ андэ 2 Коринфянам 11:23—27, и со прижыляпэ лэ Павлости тэ пэрэандярэл и со амэ можэм тэ сытювас кадэлэстар?
3 Кала амэндэ запрето пэ амари дила, амэ можэм тэ гиндосарас, кай о Иегова пар мэндэ холявэл. Но када най кадя. Подам дума пала апостоло Павло. О Иегова лэс блаӷословияс. Во дя лэ Павлости кацави честь тэ пистрой 14 письморя, савэ ашэлэпэ андэ Христиански Гречески Писании, и кадяжэ тэ ашэл апостоло важ авэр народоря. И всаек лэ Павлос фартэ ӷонинас. (Адиносар 2 Коринфянам 11:23—27b.) Кода, со сас лэ Павлоса, сыкавэл, кай о Иегова домэкэл, кай лэстирэ служытелёнэн тэ ӷонин.
4. Васо о миро амэн вэрыцый?
4 О Иисусо росԥэндя, васо на трэбуй тэ удивисавас, кала амэн ӷонин. Во ԥэндя: «Ай важ кода кай тумэ най анда кадэва миро...тоди и о миро вэрыцый тумэн» (Иоанна 15:18, 19). Кала амэн ӷонин, када на сыкавэл, кай о Иегова будэр амэн на блаӷословий. Када сыкавэл, кай амэ терас вся сар трэбуй!
ТЕРДЯРЭЛА О ЗАПРЕТО АМАРИ ДИЛА ЧИ НАЙ?
5. Вижал лэ манушэндэ тэ тердярэн, кай нико тэ на тэлёл лэ Иеговасти? Росԥэнэн.
5 Най андэ лэ манушэнго зор тэ тердярэн, кай тэ на тэлён лэ Всемоӷущёнэ Дэвлэсти лэ Иеговасти. Бут камэнас тэ тердярэн када, но лэндэ нисо на вижыля. Сэрэн, со сас, кала сас и Дуйто мирово война? И власти андэ бут страны фартэ ӷонинас лэ Дэвлэстирэ народос. Пэ свидетелёнэндири дила стодэсас запрето най кати андэ нацыско Германия, но и андэ Австралия, Канада и андэ авэр страны. Но шон сама пэ цыфры. Андо 1939 бэрш, сар заляпэ и война, па вся миро сас 72 475 вазвещятеля. Ай сар тэ закончица и война андо 1945 бэрш, лэн ужэ сас 156 299. Лэ Иеговастирэ свидетелёнэн ашэля дувар май бут! Патян, кацаво можэт тэ авэл кати тоди, кала о Иегова подритярэл.
6. Со можэт тэ авэл через о запрето? Росԥэнэн.
6 Кала гиндос пала кода, кай ӷонин, када можэт тэ анэн пэрэжывании и дар. Када нармально. Ай инке, кала ӷонин, можэт тэ авэл па аврятэ. Через када амэ можэм тэ закамас май бут тэ служысарас лэ Иеговасти. Акэ со сас еқэ ереса, кастэ сас цынёнё бэято. Кадэла хулай и хулаи жувэнас андэ страна, кай сас о запрето. Вонэ на пэрэдарайлэ и залинэ тэ служын, сар пианероря. Ради када и хулаи ашадя лащи бути, кай бут потинэнас. Лако хулай росԥэнэн, кай посли запрето, бут мануша закамлэ май бут тэ уӷанэн пала лэ Иеговастирэ свидетеля. Важ када лэсти сас май вушэро тэ залэл тэ сытярэл лэ манушэн па Библия. О запрето андя инке ек лашимос. О старейшына анда кодэя жэ страна росԥэнэн, кай бут кодэла, ко парашэля тэ служый лэ Иеговасти, упалэ линэ тэ ԥирэн пэ собрании и линэ тэ служын лэ Иеговасти.
7. а) Сости амэ сытювас анда Левит 26:36, 37? б) Со тумэ терэна, кала исин запрето?
7 Кала запретин амари дила, и вороӷоря камэн, кай амэ тэ пэрэдарас и тэ парашас тэ служысарас лэ Иеговасти. Вонэ моӷут тэ хохавэн пар мэндэ, тэ обродэн и цэра, тэ виақарэн амэн андо сындо и дажэ тэ бэшарэн. Вонэ гиндон, кай если лэндэ вижала тэ бэшарэн варикас андар мэндэ, тоди авэр фартэ пэрэдарана. Если амэ пэрэдараса, тоди амэ екжэнэ пэс запретисараса. Амэ на камас тэ шаспэ пэ кодэла, пала кастэ пистромэ андэ Левит 26:36, 37c. (Адиносар.) Амэ на домэкаса, кай через и дар амэ май набут тэ росԥэнас важ о Дэл чи тэ парашас совсем тэ росԥэнас. Амэ анда вся оди патяс лэ Иеговасти и на ласа тэ тиносавас даратар (Исаия 28:16). Амэ ласа тэ мангас лэ Иеговас, кай во тэ подԥэнэн амэнди, со тэ терас. Амэ патяс, если амаро Дэл паша амэндэ, дажэ кай и само зоралэ анда кадэва миро на вижала тэ тердярэн амэн, кай тэ парашас тэ служысарас лэ Дэвлэсти (Евреям 13:6).
ТЭ ПЭРЭЛАДАВ АНДЭ АВЭР СТРАНА ЧИ НАЙ?
8, 9. а) Со трэбуй тэ витидэл кажно хулай андо ери? б) Со поможыя тэ витидэс годявэрнэс?
8 Если андэ тумари страна и власти ԥандадэ и дила лэ Иеговастирэ свидетелёнэнди, тумэ можэте тэ пушэн: «Можэт тэ пэрэладав кордэ, кай нинай запрето и котэ тэ служысарав лэ Дэвлэсти?» Када тэ ришыс трэбуй екжэно. Варико можэт тэ диқэл пэ кода, со стердэ и христианоря андэ пэрво вико, кала лэн линэ тэ ӷонин. Посли кода, сар и вороӷоря умардэ лэ Стефанос лэ барэнца, и ученикоря, савэ жувэнас андо Иерусалимо «рознашлэпэ па вся Иудея и Самария» и дажэ «дожылэ каринг и Финикия, Кипро и Антиохия» (Деяния 8:1; 11:19; Матфея 10:23). Ай варико закамэла тэ терэл кадя, сар о Павло, саво на закамля тэ ашавэл и местность, кай и вороӷоря фартэ ӷонинас важ и вера. Важ лэ Павлости жызня сас опасно, кала во росԥэнэнас и лащи весть и подритярэлас лэ ԥралэн андэ фороря, кай лэн фартэ ӷонинас (Деяния 14:19—23).
9 Сости амэн када сытярэл? Кажнонэ хуласти андо ери, трэбуй екжэнэсти тэ витидэл, тэ пэрэладэл варикаринг чи най и со авэла май драго важ лэско ери. Англа кода, кай варисо тэ витидэл, во трэбуй тэ мангэлпэ каринг о Иегова. Кадяжэ трэбуй тэ диқэл и тэ полэл, со май фартэ трэбуй лэстирэ ерести. Андэ кадэя дила кажно христианино «андярэла пэско ԥаримос» (Галатам 6:5). Нащи тэ сындос аврэн пала кода, со вонэ витидэ.
САР ТЭ СЛУЖЫСАРАС, КАЛА ЗАПРЕТО?
10. Со лэна тэ ԥэнэн о филиало и старейшыноря?
10 Сар май дур тэ служысарас лэ Иеговасти, кала исин запрето? О филиало ԥэнэна лэ старейшынонэнди, со трэбуй авэла тэ терас, кай амэндэ вся и время тэ авэл и литература, и собрании и сар трэбуй авэла тэ росԥэнас важ о Дэл. Если кай о филиало на вижал связаца лэ старейшынонэнца, тоди вонэ екжэнэ пала вся заботинапэ, кай тумэ и тумари собрания и май дур тэ служын лэ Иеговасти. И старейшыноря лэна тэ ԥэнэн па Библия и па амари литература, со амэ трэбуй тэ терас (Матфея 28:19, 20; Деяния 5:29; Евреям 10:24, 25).
11. а) Васо амэ можэм тэ патяс, кай амэндэ вся и время авэла пар со тэ уӷанас важ о Дэл? б) Со ту можэш тэ терэс, кай тутэ всегда тэ авэл пар со тэ уӷанэс важ о Дэл?
11 О Иегова дя алав, кай лэстирэ служытелёнэндэ авэла вся, со трэбуй, кай лэндири вера тэ авэл май састи (Исаия 65:13, 14; Луки 12:42—44). Важ када патян, кай лэстири арӷанизацыя стерэла вся, кай тумэ тэ на парашэн тэ кандэн лэ Дэвлэс. Ай со можэш тэ стерэс ту? Кала авэла о запрето, загарав, кай нико тэ на арақэл и Библия и литература. Никала на ашав кадэя кучутни литература котэ, кай ла моӷут йто тэ виарақэн. Када амари печатно литература, ай кадяжэ и электронно литература. Кажно андар мэндэ трэбуй тэ терэл вся, кай лэстири вера тэ ашэлпэ састи.
О Иегова поможыя амэнди тэ на дарас и тэ ԥирас пэ собрания (Диқэн о абзацо 12.)f
12. Сар и старейшыноря лэна тэ терэн и собрания, кай пэр лэндэ май набут тэ шон сама?
12 Ай со важ и собрании? И старейшыноря позаботинапэ, кай и мануша, савэ жан против амэндэ тэ на полэн, кай прожал и собрания. Можэт и старейшыноря мангэна тумэн, кай тэ стидэнпэ май набут мануша и лэна тэ парувэн часто и время и о ҭан, кай авэла и собрания. Важ кода кай тэ фэрин лэ ԥралэн и лэ ԥэян, тумэнди трэбуй авэла тэ дэн дума полокэ, кала авэн пэ собрания чи ужантар. Кай май набут тэ шон сама пэр тумэндэ, тумэнди трэбуй авэла най фартэ тэ вурядён, кала авэн пэ собрания.
Дажэ, кала пэ амари дила авэла запрето, амэ на парашаса тэ росԥэнас важ о Дэл (Диқэн о абзацо 13.)g
13. Сости амэ можэм тэ сытювас кай и ԥрала, савэ жувэнас андо Советско Союзо?
13 Ай сар амэ ласа тэ росԥэнас важ о Дэл? Вся зависит кодэлэстар, кай амэ жувас. Варикай, кала росԥэнас важ о Дэл, амэ фартэ на фэрисавас, ай аврэтэ трэбуй тэ фэрисавас. Но сар бы тэ на авэл, амэ всаек виарақаса, сар тэ росԥэнас лэ манушэнди важ о Дэл, важ кода кай амэ любисарас лэ Иеговас и камас тэ росԥэнас аврэнди важ лэско Царство (Луки 8:1; Деяния 4:29). Акэ, со пистросардя ек историко, савя ақарэн Эмили Бэран пала лэ Иеговастирэ свидетеля, савэ жувэнас андо Советско Союзо: «Кала и власти стодэ запрето тэ на росԥэнэн важ о Дэл, лэ Иеговастирэ свидетеля линэ тэ росԥэнэн лэ сосидонэнди, кодэлэнди, каса терэн пэ бути и лэ друӷонэнди. Ай кала важ када лэ Иеговастирэ свидетелёнэн стодэ андо баруно, вонэ линэ тэ росԥэнэн важ о Дэл лэ барунаренди». Хоть и сас о запрето, и ԥрала всаек на ашэнас мулком. Если андэ тумари страна запретина тэ росԥэнэн важ о Дэл, на бистрэн пала кадэла ԥрала и сытён лэндар.
ВАСО ТРЭБУЙ ТЭ АВАС ОСТОРОЖНИ?
Трэбуй тэ сэрас, кай исин время тэ ашас мулком (Диқэн о абзацо 14.)h
14. Пала сави опасность пистромэ андэ Псалом 39:1?
14 На дэн дума лишнё. Кала жувас андо запрето, трэбуй тэ сэрас, кай «исин время тэ ашэс мулком» (Экклезиаст 3:7). Амэнди трэбуй тэ на росԥэнас, сар ақарэн лэ ԥралэн и лэ ԥэян, кай прожан и собрании, сар амэ служысарас и катар лас и литература. Амэ на росԥэнаса пала када лэ властенди, лэ друӷонэнди и лэ родости, савэ жувэн андэ амари страна чи пала ӷраница, кай тэ на подстас лэн. (Адиносар Псалом 39:1d.)
15. Со о Сатана терэл и сар тэ на попэрас андэ лэстири ловушка?
15 На домэкэн, кай и найбарэ проблемы тэ роздилин амэн. О Сатана драго ӷанэн, кай «кала о цэр роздилияпэ, тоди кадэва цэр на уприяпэ» (Марка 3:24, 25). Важ када во анда вся зор камэла тэ роздилий амэн. Во камэл, кай амэ тэ мараспэ ек аврэса, ай най лэса.
16. Сости амэн сытярэл кода, со сас ла ԥэяса Гертруд Пётцингер?
16 Дажэ и христианоря, савэндэ састи вера, трэбуй тэ авэн осторожни. Акэ со сас дуе ԥэянца Гертруд Пётцингер и Эльфрид Лёр, савэ сас памазаникоря. Вонэ и бут инке ԥэя бэшэнас андо нацыско баруно. И Гертруд ля тэ завидуий, кай и Эльфрида моӷла тэ подритярэл лэ ԥэян, кала росԥэнэнас речи. Прожыля время и ла Гертрудати ашэля лажаво пала када и вой ля ясвэнца тэ мангэл лэ Иеговас тэ поможый лати. Вой пистросардя: «Трэбуй тэ сытёс тэ полэс, кай аврэндэ май драго варисо вижал, чем тутэ и тэ на пэрэжываеш, кай лэндэ май бут почотно дила». Сар и Гертруд уля пэстар и зависть? Вой ля май бут тэ шол сама пэ лашэ качестворя, савэ сас кай и Эльфрида и пэ кода, кай вой всаворэн любий. Через када вонэ лэдуй линэ тэ ладин. Вонэ лэдуй пэрэжудэ о нацыско баруно и на парашэлэ тэ служын лэ Иеговасти жы каринг пэстири смэрть. Кала амэ анда вся зор старысавас тэ ладисарас лэ ԥралэнца и лэ ԥэянца, лэ Сатанастэ на вижала тэ роздилий амэн (Колоссянам 3:13, 14).
17. Васо опасно, кала на кандэс?
17 Кандэн, со ԥэнэн. Кала амэ ласа тэ кандас лэ ԥралэн, савэн стодя о Иегова, амэндэ на авэна проблемы, савэ амэнди на трэбуй (1 Петра 5:5). Диқам, со сас. Андэ страна, кай пэ амари дила запрето, и ԥрала, савэн стодя о Иегова, ԥэндэ, кай тэ на ашавэн печатно литература кодэлэнди, касти росԥэнэн важ о Дэл. Но ек пианеро погиндосардя, кай во ӷанэн май драго и росԥэнэнас важ о Дэл, сар варикала. Каринг со када андя? Еқварэс во и дэсавэ авэр вазвещятеля росԥэнэнас важ о Дэл. Кати вонэ закончили тэ служын, каринг лэндэ поджылэ рая. Дицол, кай пала лэндэ слединас и рая и андэ лэндирэ вас попэля и литература, сави вонэ ашадэ лэ манушэнди. Сости амэн када сытярэл? Трэбуй андэ вся тэ кандас лэ ԥралэн, дажэ кала амэнди здэлпэ, кай май фэдэр авэла тэ стерас па аврятэ. О Иегова всегда амэн блаӷословий, кала амэ кандас кодэлэн, кас во стодя андэ пэсти арӷанизацыя (Евреям 13:7, 17).
18. Васо нащи тэ стон пэстирэ законоря?
18 На стон пэстирэ законоря. Кала и старейшыноря стон пэстирэ законоря, кадэлэса вонэ терэн аврэнди жызня май ԥари. Акэ, со росԥэнэн о ԥрал Юрай Каминский пала кодэя время, кала сас запрето андэ Чехословакия: «Кала залинэ бутэ ԥралэн, савэн стодя о Иегова, кодэла, ко ашэлэпэ вместо лэндэ, линэ тэ диқэн пала собрании и пала раёноря и залинэ тэ стон пэстирэ законоря лэ вазвещятелёнэнди, со можно, ай со нащи тэ терэн». О Иегова на дя амэнди, кай амэ тэ витидас важ авэр, со тэ терэн. Кодэла, ко стон пэстирэ законоря, савэ на трэбуй, на фэрин лэ ԥралэн, ай камэн тэ хулаин пэ лэндири вера (2 Коринфянам 1:24).
НИКАЛА НА ПАРАШЭН ТЭ СЛУЖЫН ЛЭ ИЕГОВАСТИ
19. Андэр со дэн тэ патяс и алава анда 2 Летопись 32:7, 8?
19 Амаро само баро вороӷо, о Сатана Бэнг, и май дур лэла тэ ӷоний лэ Иеговастирэ служытелёнэн (1 Петра 5:8; Откровение 2:10). О Сатана и кодэла, ко пэ лэстири риг, терэна вся, кай тэ запретин тэ тэлювас лэ Иеговасти. Но, хоть амэндэ и исин дар, амэ никала на парашаса тэ служысарас лэ Иеговасти (Второзаконие 7:21). О Иегова амэнца, и во лэла тэ подритярэл амэн, дажэ кала амари дила запретина. (Адиносар 2 Летопись 32:7, 8e.)
20. Сар тумэ камэн тэ терэн?
20 Давайте амэ тэ сытювас кай и христианоря, савэ ԥэндэ кодэлэнди, кастэ сас и власть: «Диқэн екжэнэ, ай драго авэла англа лэ Дэвлэстирэ яқа тэ кандас тумэн, ай най лэ Дэвлэс? Ай со жы каринг амэндэ, амэ нэ можэм тэ парашас тэ росԥэнас пала кода, со диқлям и со ашундям» (Деяния 4:19, 20).
ДИЛИ 73 Дай нам смелости
a Со, если и власти на мэкэн тэ тэлювас лэ Иеговасти? Андэ кадэя статья роздиқаса лашэ советоря пала кода, со трэбуй тэ терас и со на трэбуй тэ терас, кай и май дур тэ служысарас амарэ Дэвлэсти.
b 2 Коринфянам 11:23—27: «Лэ Христостирэ служытеля? Ровав, сар найгодявэрно, мэ со май фартэ. Мэ май бут тердэм дила, чем авэр, май бут сымас андо баруно, бут разоря ман марэнас, най еқварэс чуть на мэравас. Лэ иудеёнэндар панчварэс мэ марделэмас по сорок удароря би еқэско, триварэс ман мардэ лэ хворостинэнца, еқварэс ман мардэ лэ барэнца, триварэс мэ сымас пэ кораблёря, савэ розмарделэсаспэ, сутки сымас андэ моря. Мэ часто сымас андо дром, сас опасность пэ лэна, трэбуй сас тэ фэрисавав кодэлэндар, ко облэл и умарэл па дрома, тэ фэрисавав пэстирэндар и манушэндар анда авэр народоря, мандэ сас опасность и андо форо, андэ пустыня, пэ моря, ай кадяжэ машкар и хохавнэ ԥрала. Мэ теравас ԥари бути, часто на совавас рятянца, сымас боқало и камавас тэ пав паи, бут разоря на сас хамос, сымас андо шудримос и на сас йда».
c Левит 26:36, 37: «Ай андо ди кодэлэнди, ко вижувэла и лэла тэ жувэл пэ ԥув кай и вороӷоря, мэ дава лэнди и дар. Кала о листо па витка лэла тэ мишкийпэ, лэна тэ нашэнтар, и вонэ лэна тэ нашэнтар, сар нашэнтар лэ мечостар, и пэрэна, хоть пала лэндэ нико на ӷонияпэ. Вонэ нашэнатар, сар нашэнтар лэ мечостар, дэнапэдап ек андэ ек и пэрэна, хоть нико пала лэндэ на ӷонияпэ. Тумэндэ на вижала тэ ашэнпэ тэ тердён англа тумарэ вороӷоря».
d Псалом 39:1: «Мэ ԥэндэм: „Лава тэ диқав пала пэстэ, кай тэ на терав бэзэх ла шыбаса. Лава тэ зритярав пэстирэ алава, кала паша мандэ и вэрыти“».
e 2 Летопись 32:7, 8: «„На даран и авэн састэ. На даран и на пэрэдаран лэ ассирийсконэ царёстар и всаворэ́ бутэ манушэндар, савэ лэса. Важ кода кай кодэлэн, ко амэнца, май бут чем кодэлэн, ко лэса. Лэса манушэско зор, ай амэнца амаро Дэл о Иегова, кай тэ поможый амэнди и тэ марэлпэ пала амэндэ“. И кадэлэ алавэндар, савэ ԥэндя о Иудейско царё Езеки́я, о народо ля зор».
f Андэ кадэя статья пэ всаворэ картинки дицон лэ Иеговастирэ свидетеля, савэ служын андэ страны, кай на мэкэн дэсо тэ терэн анда амари дила. Набут вазвещятеля авелэ пэ собрания, сави прожал андэ подсобка кай о ԥрал.
g Пэ картинка. И ԥэй (слева) би грабимаско дэл дума ла жувляса и аштярэл маменто, кала тэ залэл тэ росԥэнэн лати важ о Дэл.
h Пэ картинка. По допросо о ԥрал на росԥэнэн нисо пала собрания.