«Жан... сытярэн лэ манушэн, кай вонэ тэ авэн ученикоря»

1, 2. а) Сави ӷлавно цэль андэ христианско собрания сар пистромэ андэ Матфея 28:18—20? б) Савэ вопросоря амэ роздиқаса андэ кадэя статья?

КАТИ погиндон, савэ лошалэ сас и апостолоря, кала о Иисусо, саво рисайля каринг и жызня ақардя лэн по плай андэ Галилея (Матфея 28:16). Файма, тоди лэс «диқлэ май бут чем пятьсот ԥрала сразу» (1 Коринфянам 15:6). Состэ о Иисусо лэн кордэ ақардя? Во дя лэнди бари дила и ԥэндя: «Жан кай всаворэ народоря, сытярэн лэ манушэн, кай вонэ тэ авэн ученикоря». (Адиносар Матфея 28:18—20b.)

² И ученикоря, савэ ашундэ кадэла алава, ашэлэ пэрви, ко сас андэ христианско собрания андэ пэрво вико. Ӷлавно цэль ла собранияти сас андэ кода, кай тэ сытярэн лэ манушэн, кай тэ ашэн нэвэ лэ Христостирэ ученикоряc. Адес па вся и ԥув бут христиански собрании, и лэндири цэль на паруделя. Андэ кадэя статья амэ роздиқаса штар вопросоря. Васо трэбуй тэ сытярас лэ манушэн, кай тэ ашэн лэ Христостирэ ученикоря? Со важ када амэнди трэбуй тэ терас? Ай всаворэ христианоря сытярэн лэ манушэн, кай тэ авэн ученикоря? И васо амэнди трэбуй терпения?

ВАСО ТРЭБУЙ ТЭ СЫТЯРАС ЛЭ МАНУШЭН, КАЙ ТЭ АШЭН УЧЕНИКОРЯ?

3. Васо, сар пистромэ андэ Иоанна 14:6 и 17:3, трэбуй тэ сытярас лэ манушэн, кай тэ ашэн лэ Христостирэ ученикоря?

³ Васо трэбуй тэ сытярас лэ манушэн, кай тэ ашэн лэ Христостирэ ученикоря? Важ кода кай кати лэ Христостирэ ученикоря моӷут тэ авэн лэ Дэвлэсти друӷоря. Ай инке, кодэла, ко терэл сар о Христос, ужэ акана парувэн пэстири жызня, кай тэ авэл май лащи и аштярэн о лашимос, саво авэла англэ, и тэ жувэн вечно. (Адиносар Иоанна 14:6d; 17:3e.) Канешно, и дила, сави дя амэнди о Иисусо, вой фартэ трэбуй, но амэ ла на терас екжэнэ. Акэ со о апостоло Павло пистросардя важ пэстэ и важ авэр христианоря: «Амэ терас лэ Дэвлэса ек дила» (1 Коринфянам 3:9). Сави бари патив стодэ пар мэндэ о Иегова и о Иисусо!

4. Сости амэ можэм тэ сытювас кай о Ивано и Матильда?

⁴ Кода, кай амэ сытярас лэ манушэн тэ ашэн лэ Христостирэ ученикоря, анэн амэнди бари радость. Акэ со сас лэ Ивано́са и лэстиря хулаяса ла Матильдаса, савэ жувэн андэ Колумбия. Еқварэс вонэ росԥэнэнас важ о Дэл тэрнэ манушэсти, савэс ақарэнас Давьеро. Во ԥэндя лэнди: «Мэ камав тэ парудював, но мандэ на вижал». О Давьеро сас профессионально боксёро, прилэлас наркотикоря, на парашэлас тэ пэл и жувэлас манушняса, савя ақарэн Эрика. О Ивано росԥэнэн: «О Давьеро жувэлас андо дурутно гав, и кай лэстэ тэ доладас, амэнди прижаласпэ най ек часо тэ ладас по лисапедо па росхаладэ и чикалэ дрома. И Эрика диқля, кай о Давьеро ля тэ парудёл, и тожэ закамля тэ сытёл па Библия». Прожыля время о Давьеро парашэля тэ пэл, тэ прилэл и наркотикоря и на ля тэ залэлпэ лэ боксоса. Инке во жэнисайля пэ Эрика. И Матильда росԥэнэн: «Кала вонэ болделэ андо 2016 бэрш, амэ вспомнили лэ Давьеростирэ алава. „Мэ камав тэ парудював, но мандэ на вижал“. Амэ ровасас радостятар». Сави жэ када бах, кала поможысарас лэ манушэнди тэ ашэн лэ Христостирэ ученикоря!

СО ВАЖ КАДА ТРЭБУЙ ТЭ ТЕРАС?

5. Со амэ ласа тэ терас, кай тэ сытярас лэ манушэн, тэ ашэн ученикоря?

⁵ Кай тэ сытярас лэ манушэн, тэ ашэн ученикоря, амэ залас кодэлэстар, кай родас кодэлэн, савэ камэн тэ уӷанэн важ о Иегова (Матфея 10:11). Кала амэ росԥэнас важ о Иегова, амэ сыкавас, кай амэ па чачимастэ лэ Иеговастирэ свидетеля. Ай кала терас и дила, сави дя о Христос тэ росԥэнас важ о Дэл, амэ сыкавас, кай амэ чачунэ христианоря.

6. Со трэбуй, кай амари служэния тэ анэн результаторя?

⁶ Дэсавэ мануша камэн тэ уӷанэн о чачимос анда Библия, но бутэнди, кас амэ диқас, май англал можэт тэ здэлпэ, кай лэнди када на трэбуй. Тоди амэнди можэт авэла трэбуй тэ стерас кадя, кай вонэ тэ закамэн тэ уӷанэн. Кай амари служэния тэ анэн результаторя, амэнди трэбуй драго тэ погиндосарас, со тэ терас. Витидэн, пала со тэ дэн дума лэ манушэнца, кай лэнди тэ авэл интересно. Посли када витидэн, сар тэ залэс дума.

7. а) Сар можно тэ залэс дума лэ манушэса? б) Васо, трэбуй драго тэ виашунэс лэ манушэс, и тэ стос патив пэ кода, сар во гиндой?

⁷ Например, можно тэ ԥэнэс манушэсти: «Камав тутар тэ пушав. Па вся и ԥув кай и мануша еқэндар и проблемы. Сар ту гиндос, моӷут и правительства, савэ исин па вся и ԥув тэ улэн и проблемы?» Посли када можно тэ сыкавэс Даниил 2:44 и тэ подэс дума. Ай акэ авэр варианто. Можэш тэ пушэс: «Со поможыя драго тэ сытярэс лэ бэятос?», ай потом можэш тэ подэс дума пала кода, со пистромэ андэ Второзаконие 6:6, 7. Пала со бы ту тэ на дэс дума, старысав тэ гиндос пала мануш, каса дэс дума. Погиндосар, сар лэсти поможыя кода, со во уӷанэна анда Библия. Кала дэс дума лэ манушэса, трэбуй драго лэс тэ виашунэс и тэ стос патив пэ кода, сар во гиндой. Када поможыя тути май драго тэ полэс лэс и, можэт, во закамэла тут тэ виашунэл.

8. Васо трэбуй тэ авэс кай о мануш най еқварэс?

⁸ Кай о мануш тэ залэл тэ сытёл па Библия, тумэнди можэт тэ авэл трэбуй бут время, и тэ стон бут зор, кай тэ авэн лэстэ най еқвар. Васо? Важ кода кай лэ манушэн часто нинай цэрэ. Ай инке, кай о мануш тэ присытёл каринг тумэндэ и тэ закамэл тэ сытёл па Библия, тумэнди прижалапэ тэ авэн каринг лэстэ най еқварэс. Кай тэ барёл и растения, ла трэбуй вся и время тэ поливаеш. Кадяжэ и о мануш, кай во май фартэ тэ любий лэ Иеговас и лэ Христос, трэбуй тэ на промэкас тэ дас дума лэса пала кода, со пистромэ андэ Библия.

АЙ ВСАВОРЭ ХРИСТИАНОРЯ СЫТЯРЭН ЛЭ МАНУШЭН, КАЙ ТЭ АВЭН УЧЕНИКОРЯ?

9, 10. Васо кажно христианино трэбуй тэ поможый тэ родэл кодэлэс, ко камэл тэ ашэл лэ Христоско ученико?

⁹ Кажно христианино трэбуй тэ поможый тэ родэл кодэлэс, ко камэл тэ ашэл лэ Христоско ученико. Кадэя дила можно тэ ԥэнэс шолпэ пэ кода, кала родэн лэ бэятос, саво хасарделя. Акэ со сас, кала хасарделя бэято, савэсти трин бэрш. Лэс родэнас почти 500 мануша. Прожылэ 20 часоря, сар ек андар лэндэ виарақля лэ бэятос пэ мал андэ кукуруза. Кодэва мануш на ԥэндя, кай када во виарақля лэ бэятос, и важ када во ԥэндя: «Сас трэбуй фартэ бут мануша, кай тэ виарақас лэ бэятос».

¹⁰ Бут мануша шонпэ пэ кодэва бэято. Лэндэ андо ди кацаво, ԥэнэса, вонэ хасарделэ. Лэндэ нинай нисаво лашимос тэ аштярэн англэ, но вонэ камэн, кай лэнди тэ поможын (Эфесянам 2:12). Кацавэ манушэн родэн май бут чем 8 милионоря лэ Иеговастирэ свидетеля. Можэт ту инке на арақлян кодэлэс, ко камэл тэ сытёл па Библия. Но кай авэр вазвещятеля, савэ котэ жэ росԥэнэн важ о Дэл, кай и ту, када вижыля. Кала о ԥрал или и ԥэй виарақэн кодэлэс, ко камэл тэ ашэл лэ Христоско ученико, лошавэн всаворэ, кай када всаворэндири дила.

11. Со тумэ можэте тэ терэн, кай тэ сытярэн лэ манушэн тэ ашэн ученикоря, дажэ кала тумэндэ нинай, кас тэ сытярэн па Библия?

¹¹ Дажэ кала тумэндэ пока нинай, кас тэ сытярэн па Библия, тумэ всаек можэте пэстиря ригатар варисо тэ терэн. Например, тумэ можэте анда оди тэ прилэн кодэлэн, ко пэрво разо авеля андо зало, кай тидэнпэ лэ Иеговастирэ свидетеля, и тэ поможын лэнди. Кадя вонэ полэна, кай тумэ чачунэ христианоря, важ кода кай машкар тумэндэ исин любовь (Иоанна 13:34, 35). Кала дэн каминтарии пэ собрания, мэк дажэ скуртинки, кадэлэса тумэ сытярэна лэн пативалэс и просто тэ дэн дума пала кода, андэр со вонэ патян. Кадяжэ можэте тэ жан тэ росԥэнэн важ о Дэл кодэлэса, ко найдэлмут ашэля вазвещятелё и тэ поможын лэсти тэ сыкавэл и стихоря анда Библия, кала дэл дума лэ манушэнца. Кадя тумэ поможына лэсти тэ терэл, сар о Христос (Луки 10:25—28).

12. Трэбуй чи най тэ авас варисавэ особенни, кай тэ сытярас лэ манушэн тэ ашэн ученикоря? Росԥэнэн.

¹² Важ кода кай тэ сытярэс лэ манушэн тэ ашэн лэ Христостирэ ученикоря, на трэбуй тэ авэс варисаво особенно. Акэ ек примеро. И Фаустина, сави жувэл андэ Боливия, кала пэрво разо диқляпэ лэ Иеговастирэ свидетелёнэнца, вой на ӷанэнас тэ адиной. Щяс вой адиной, но ԥарэс. И Фаустина болделя и лошали, кай сытярэл аврэн лэ чачимасти анда Библия. Кажно курко вой сытярэл панчже манушэн па Библия. Хоть и Фаустина адиной май вэрыто чем кодэла, кас вой сытярэл, вой ужэ поможысардя шовэ манушэнди тэ болдён (Луки 10:21).

13. Саво лашимос анэна амэнди кода, кай амэ сытярас лэ манушэн тэ ашэн ученикоря, хоть амэ и фартэ заняти?

¹³ Бут христианоря фартэ заняти, важ кода кай лэндэ исин важни дилы. И всаек вонэ виарақэн время, кай тэ сытярэн лэ манушэн па Библия, и кадэлэстар вонэ фартэ лошалэ. Акэ со сас еқа ԥэяса, савя ақарэн Мелани, вой жувэл андо дурутно цынёнё форицо пэ Аляска. Вой екжэни барярэл бэята, савяти 8 бэрш, цыло дес терэл пэ бути, инке диқэл пала пэско дад, савэстэ рако. Андо форо и Мелани сас екжэни анда лэ Иеговастирэ свидетеля. Вой фартэ камэлас тэ виарақэл варикас, кай тэ сытярэл па Библия. Важ када вой вся и время мангэлас лэ Дэвлэс тэ дэл лати зор, кай тэ на дарал лэ шудримастар и тэ ԥирэл тэ росԥэнэн важ о Дэл. И акэ вой уӷангля манушня, савя ақарэн Сара, сави сас фартэ лошали, кай уӷангля, кай лэ Дэвлэстэ исин алав. Прожыля варисави время и Сара закамля тэ сытёл па Библия. И Мелани росԥэнэн: «Кажно пятница, вэчэром мэ сымас кадя цыени, кай пэравас па пэрнэ, но амэ всаек ла бэятаса жасас тэ сытярас па Библия. Када анэнас амэнди лэ дуенди лашимос. Кай и Сара сас бут вопросоря, и амэнди чалёлас тэ арақас пэр лэндэ атветоря. Сави када бах тэ диқэс, сар вой ашэл лэ Иеговаско друӷо!» Пэ Сара фартэ тасавэнас, но вой смило вся виритярдя, ужыля анда қандири и болделя.

ВАСО АМЭНДИ ТРЭБУЙ ТЕРПЕНИЯ?

14. а) Васо, кай тэ виарақас лэ манушэн, савэ камэн тэ ашэн ученикоря, шолпэ пэ рыбалка? б) Со трэбуй тэ терэн, сар ԥэндя о Павло андэ 2 Тимофею 4:1, 2?

¹⁴ Дажэ кала тумэнди здэлпэ, кай тумари служэния на анэн нисавэ результаторя, на парашэн тэ родэн кодэлэн, ко камэн тэ ашэн лэ Христостирэ ученикоря. На бистрэн, кай о Иисусо ԥэндя, кай кадэя дила шолпэ пэ кода, сар астарэс лэ мащес. И рыбакоря дэкала аштярэн бут время, кай варисо тэ астарэн. Часто вонэ астарэн и рят чи тэсара, ай дэкала лэнди прижалпэ тэ отплывин май дур лэ бэрэӷостар (Луки 5:5). Кадя жэ дэсавэ вазвещятеля бут время проандярэн, кай тэ «рыбачут», када, кала ԥирэн тэ росԥэнэн важ о Дэл андэ разно время андэ разни месторя. Кадя исин май бут возможность тэ диқэн лэ манушэн. И ԥрала и ԥэя, савэ стон бут зор, часто виарақэн кодэлэн, касти чалёл амари весть. Ай со сар тэ росԥэнас важ о Дэл андэ кацави время, кала бут мануша цэрэ или тэ служысарас котэ, кай май бут исин возможность тэ подас дума лэ манушэнца? (Адиносар 2 Тимофею 4:1, 2f.)

15. Васо трэбуй терпения, кала сытярэс па Библия?

¹⁵ Васо, кала сытярэс па Библия, трэбуй терпения? Амэ камас тэ поможысарас, кай о мануш тэ уӷанэн и тэ любий най кати кода, со пистромэ андэ Библия, но и кодэлэс, ко дя и Библия, када лэ Иеговас. Инке амэнди трэбуй най кати тэ росԥэнас лэ манушэсти, со о Иисусо аштярэл пэстирэ учениконэндар, но и тэ сыкавас лэсти, сар тэ жувэл кадя, сар сытярэл о Христос. Трэбуй тэ авэл терпения, кай тэ поможысарас лэсти тэ жувэл па аврятэ, када па библейски принцыпоря. Варикасти, кай тэ парувэл пэстирэ гиндоря и кода, каринг со во присытеля, хутилэла дэсавэ шона, ай варикасти пэ када трэбуй авэла май бут время.

16. Сости амэн сытярэл кода, со сас лэ Раулёса?

¹⁶ Еқэ мисианеростэ, саво варикала служыяс андэ Перу, сас кацаво, со сыкадя, кай и терпения анэн лашимос. Акэ со во росԥэндя: «Мэ сытяравас па Библия лэ Раулёс, савэса прожылям дуй книжки, но во кадя и на паруделяпэ. Во на ладияс лэ ереса и дэлас дума фартэ найдраго, ай и бэятцэ на стонас пэр лэстэ патив. Важ кода кай о Раулё вся и время авэлас пэ собрания, мэ на парашавас тэ авав лэстэ и каринг лэско ери и старысававас тэ поможысарав лэнди. Посли кода, сар мэ лэстэ авелэм пэрво разо, прожылэ май бут чем трин бэрш, кати тоди во паруделя и лэсти можно сас тэ болдёл».

17. Пала со подаса дума андэ авэр статья?

¹⁷ О Иисусо приԥэндя амэнди: «Жан кай всаворэ народоря, сытярэн лэ манушэн, кай вонэ тэ авэн ученикоря». Кала амэ терас кадэя дила, амэ часто диқаспэ манушэнца, савэ гиндон па аврятэ, най кадя сар амэ. Машкар лэндэ исин кодэла, ко на патял андо Дэл чи на камэл тэ авэл ни андэ сави вера. Андэ авэр статья амэ подаса дума пала кода, сар тэ росԥэнас важ о Дэл кацавэ манушэнди.