СТАТЬЯ, КАЙ ТЭ СЫТЮВАС 42
Со трэбуй тэ терас, кай о мануш, саво сытёл па Библия, тэ болдёл? (2 часть)
«Вся и время дик пала пэстэ и пала кода, сар ту сытярэс» (1 ТИМОФЕЮ 4:16).
ДИЛИ 71 Лэ Дэвлэско войско!
ПАЛА СО УӶАНАСА АНДА СТАТЬЯ?a
1. Катар амэ ӷанас, кай кала амэ сытярас лэ манушэс па Библия, када можэт тэ спасый лэсти и жызня?
О ИИСУСО ԥэндя пэстирэ учениконэнди: «Жан... сытярэн лэ манушэн, кай вонэ тэ авэн ученикоря. Болэн лэн» (Матфея 28:19, 20). Амэ ӷанас, кай о мануш можэт тэ спасыйпэ, если болдёла. Но ко камэл тэ болдёл, трэбуй тэ патял, кай спасыяпэ кати через лэ Иисусости смэрть. Акэ васо о апостоло Пётро ԥэндя: «Инке исин, со шолпэ пэ кода, со фэрий тумэн акана. Када, кай тумэ болдён... через кода, кай о Иисус Христос рисайля каринг и жызня» (1 Петра 3:21). Вижал, кала о мануш болдёл, во лэл тэ жал па правильно дром, саво анэна лэс каринг и вечно жызня.
2. Со амэ камас тэ терас, кала адиносарас и алава андэ 2 Тимофею 4:1, 2?
2 Кала поможыс лэ манушэсти тэ ашэл лэ Иисусоско ученико, ту трэбуй тэ гиндос, сар май драго тэ сытярэс. (Адиносар 2 Тимофею 4:1, 2b.) О Иисусо ԥэндя: «Жан, сытярэн лэ манушэн, кай вонэ тэ авэн ученикоря». Кацаво жэ гиндо ԥэндя о апостоло Павло лэ Тимофеёсти: «Кала кадя терэса, фэриса и пэс и кодэлэн, ко тут тэ ашунэл». И инке ԥэндя: «Вся и время дик пала пэстэ и пала кода, сар ту сытярэс» (1 Тимофею 4:16). Дицол, кай амэнди трэбуй тэ старысавас, со май драго тэ сытярас лэ манушэн, савэ камэн тэ ашэн лэ Иисусостирэ ученикоря.
3. Пала со амэ уӷанаса андэ кадэя статья?
3 Амэ поможысарас лэ милиононэ манушэнди, кай вонэ тэ сытён па Библия. Андэ кодэя статья амэ дям дума, кай камас тэ поможысарас май бутэ манушэнди тэ болдён и тэ ашэн лэ Иисусостирэ ученикоря. Ай андэ кадэя статья амэ диқаса инке панч советоря, савэ сыкавэна, со амэ можэм тэ терас, кай о мануш тэ болдёл.
МАЙ БУТ ШУВ САМА ПЭ БИБЛИЯ
Манг лэ вазвещятелёс, саво драго ӷанэн тэ проандярэл изучения, тэ подԥэнэн, сар май бут тэ шос сама пэ Библия (Диқэн о абзацо 4—6.)i
4. Васо, кала проандярас и изучения, на трэбуй тэ росԥэнас вся сразу? (Диқэн кадяжэ и сноска.)
4 Амэ любисарас о чачимос анда Библия. И можэм бут пала када тэ дас дума. Но кала амэ росԥэнас лэ манушэсти кода, со андэр латэ ԥэнэнпэ, на трэбуй тэ росԥэнас вся, со ӷанас (Иоанна 16:12)c. Амэ тожэ най вся ӷанасас, сар кати лям тэ изучаем и Библия (Евреям 6:1). И пала када о мануш трэбуй тэ сэрэл, кала проандярэл и «Сторожэво башня» или проандярэл «Сытювас па Библия андэ собрания» или кала изучает аврэ манушэса. Важ када пэ изучения амэ на трэбуй тэ росԥэнас лэ манушэсти вся сразу.
5. а) Сар запистромэ андэ 1 Фессалоникийцам 2:13, со трэбуй тэ полэл о мануш, саво сытёл па Библия? б) Со тэ терэс, кай пэ изучения о мануш тэ росԥэнэн, со во гиндой пала кода, со во уӷанэн анда Библия?
5 О изучающё трэбуй тэ полэл, кай ту сытярэс лэс кати кодэлэсти, со пистромэ андэ Библия. (Адиносар 1 Фессалоникийцам 2:13d.) Со тути поможыя андэ када? Манг, кай во тэ росԥэн тути, со екжэно гиндой пала кода, со уӷанэн нэво анда Библия. На трэбуй кажно разо тэ росԥэнэс лэ манушэсти, пала со о библейско стихо. Фэдэр манг лэс, кай во тэ росԥэнэн, сар лэс поля. Поможысар лэ манушэсти, савэса изучаеш, тэ диқэл, сар и Библия поможый лэсти андэ жызня. Задэ кацавэ вопросоря, савэ поможына лэсти тэ виарақэл атветоря и савэ поможына тути тэ полэс, со во гиндой пала дэсавэ стихоря анда Библия (Луки 10:25—28). Например, ту можэш тэ пушэс, сар о стихо анда Библия поможысардя лэсти тэ додиқэл ек анда лэ Иеговастирэ качестворя? Сар лэсти можэт тэ поможый кода, со во уӷанэн анда Библия? Чалёл лэсти, со во уӷанэн анда Библия? (Притчи 20:5). На бистэр, важно най скати во уӷанэн, ай пэ скати лэсти чалёл кода, со уӷанэн анда Библия и прилэл во када андэ пэстири жызня чи най.
6. Васо авелоп драго тэ ақарас пэ изучения лэ вазвещятелёс, саво драго ӷанэн тэ проандярэл ла?
6 Ақар пэ изучения лэ вазвещятелёс, саво драго ӷанэн тэ проандярэл ла. И потом пуш лэстар, драго ту проандярэс и изучения? Вижал тутэ май бут тэ шос сама пэ Библия? Полэл о изучающё кода, со тумэ прожан пэ изучения? (Диқэн Деяния 18:24—26.) Кай тэ пушэс совето трэбуй тэ на авэс ӷордо. Кадя ту полэса сар май драго тэ сытярэс. Ай если тути трэбуй тэ уладэс пэ куртестэ чи май бут, манг кодэлэ жэ вазвещятелёс, саво сас туса, кай во тэ проандярэл и изучения пока тут на авэла. Тоди и изучения на тердёла, и о мануш полэла пэ скати вой важно. Никала на гиндосар, кай када кати тири изучения. Амэ камас тэ терас вся, кай и изучения тэ на тердёл.
СЫКАВ, КАЙ ТУ ПАТЯС АНДЭ КОДА, СОСТИ СЫТЯРЭС, И КАДА ТУТИ КУЧ
Росԥэн лэ манушэсти, саво изучает, сар и Библия парудя и жызня лэ ԥралэнди и лэ ԥэянди. Кадя во полэла, сар и советоря андар латэ поможына и лэсти (Диқэн о абзацо 7—9.)j
7. Со тэ терэс, кай о изучающё тэ цэний о чачимос анда Библия?
7 Важ о изучающё о чачимос анда Библия авэла куч, если во диқэла, кай ту цэнис кода, сости вой сытярэл и патяс андэ када (1 Фессалоникийцам 1:5). Ту можэш тэ росԥэнэс лэсти, сар и принцыпоря анда Библия поможысардэ тути. И кадя во полэла, сар и советоря анда Библия моӷут тэ поможын и лэсти тэ парудёл андэ лащи риг.
8. Со инке ту можэш тэ стерэс, кай тэ поможыс лэ манушэсти, саво сытёл па Библия?
8 Кала ту проандярэс изучения, росԥэн лэ манушэсти пала ԥрала и ԥэя, савэндэ вижыля тэ улэн кацаво ԥаримос, саво и лэстэ. Кадяжэ ту можэш тэ ақарэс пэ изучения кадэлэ ԥралэс или ԥья. Ай можэт ту виарақэса варисо, со поджал каринг лэстири проблема по амаро сайто jw.org анда рубрика «Библия меняет жизнь»e. Котэ исин статьи и видео, савэ моӷут тэ поможын лэ манушэсти тэ полэл, кай и советоря анда Библия моӷут тэ парувэн лэстири жызня андэ лащи риг.
9. Сар тэ поможыс, кай о изучающё тэ росԥэнэн пэстирэ родости или лэ друӷонэнди кода, со уӷанэн анда Библия?
9 Если кай о мануш, савэса ту изучаеш и Библия, исин хулай или хулаи ту можэш тэ ақарэс лэс, кай и во или вой тэ побэшэл тумэнца пэ изучения. Кадяжэ ԥэн, кай о изучающё можэт тэ росԥэнэн пэстирэ родости кода, со уӷанэн анда Библия (Иоанна 1:40—45). Можэш тэ пушэс лэстар, саво стихо во призындярдоп, кай вонэ тэ полэн, кай када гиндо анда Библия. Кадя ту поможыса лэсти тэ сытёл тэ росԥэнэн пала Дэл аврэнди. И кала во парувэла пэстири жызня, кай тэ ашэл некрещённо вазвещятелё, во сможэт тэ служый вмести ла собранияса. Кадяжэ можно тэ пушэс лэстар, ӷанэн во варикас, ко камлоп тэ сытёл па Библия. Если ӷанэн, тоди пуш, сар тэ диқэспэ кодэлэ манушэса и тэ сыкавэс о видео «Сар амэ дас помощь тэ уӷанэн и Библия?»f.
ПОМОЖЫСАР, КАЙ О ИЗУЧАЮЩЁ ТЭ ВИАРАКЭЛ ДРУӶОНЭН АНДЭ СОБРАНИЯ
Поможысар, кай о изучающё тэ виарақэл друӷонэн андэ собрания (Диқэн о абзацо 10, 11.)k
10. Сости ту можэш тэ сытёс лэ Павлостар, сар запистромэ андэ 1 Фессалоникийцам 2:7, 8?
10 Анда ди шув сама лэ манушэс, савэс сытярэс па Библия. Дик пэр лэстэ, кабута во ужэ ԥрал или ԥэй андэ собрания. (Адиносар 1 Фессалоникийцам 2:7, 8g.) Ту трэбуй тэ поможыс тэ виарақэл друӷонэн андэ собрания. Лэсти найвушэро тэ парашэл тэ дружый лэ найлашэ друӷонэнца, савэ лэстэ сас, и тэ парувэл пэстири жызня, кай тэ служый лэ Иеговасти. Ту екжэно трэбуй тэ авэс важ лэстэ друӷо. Проандяр лэса время най кати пэ изучения. Если ту звониса лэсти, пистроса, зажаса най пэ долӷонэстэ, тоди во полэла, кай ту лэс цэнис.
11. Васо о изучающё трэбуй тэ виарақэл друӷонэн андэ собрания?
11 Андо ери всаворэ диқэн пала бэято. Кадяжэ вся и собрания поможый, кай лэ манушэстэ, саво изучает, тэ авэл май лащи дружба лэ Иеговаса. Акэ васо кадя важно, кай во тэ ӷанэн лэ ԥралэн и лэ ԥэян андэ собрания. Тоди во лэла тэ дружый кодэлэнца, ко служый лэ Дэвлэсти. Када поможыя лэсти тэ парувэл пэстири жызня. Кадяжэ кодэла ԥрала и ԥэя моӷут тэ поможын, кай лэстири дружба лэ Иеговаса тэ авэл май лащи, и подритярэна лэс кала авэла трэбуй (Притчи 13:20). Амэ камас, кай о изучающё тэ авэл андэ собрания сар андо ери и тэ дружый лэ ԥралэнца и лэ ԥэянца, савэ шон сама лэс анда ди. Тоди лэсти авэла май вушэро тэ парашэл тэ дружый лэ манушэнца, савэ на дэн тэ пашол каринг о Дэл. Если и друӷоря, савэ сас лэстэ раньшэ, ашавэна лэс, во ӷанэна, кай и чачунэ друӷоря лэстэ исин андэ собрания (Марка 10:29, 30; 1 Петра 4:4).
ШУВ САМА, ВАСО ВАЖНО, КАЙ О МАНУШ ТЭ ДЭЛ АЛАВ ЛЭ ИЕГОВАСТИ ТЭ ЖУВЭЛ ВАЖ ЛЭСТЭ И ТЭ БОЛДЁЛ
О мануш, саво анда вся ди сытёл па Библия, сможэт тэ болдёл, если на парашэла тэ жал па кадэва дром! (Диқэн о абзацо 12, 13.)
12. Васо важно тэ ԥэнэс лэ манушэсти, кай трэбуй тэ дэл алав тэ жувэл важ о Дэл и тэ болдёл?
12 Если о мануш изучает най ек шон и ля тэ ԥирэл пэ собрания, во трэбуй тэ полэл, кай и изучения поможыя лэсти тэ авэл ӷотово тэ служый лэ Иеговасти. На лажа ворта тэ ԥэнэс, кай о изучающё тэ полэл, сар дэ важно тэ дэл алав тэ жувэл важ о Дэл и тэ болдёл. Амэ камас тэ поможысарас лэсти тэ болдёл и тэ ашэл лэ Иисусоско ученико.
13. Савэ шаӷоря трэбуй тэ стерэл о мануш, саво камэл тэ болдёл?
13 Савэ шаӷоря терэл о мануш, саво камэл тэ болдёл? Спэрва во уӷанэн лэ Иеговас и лэл тэ патял андэр лэстэ (Иоанна 3:16; 17:3). Потом во лэл тэ любий лэ Иеговас, лэ ԥралэн и лэ ԥэян андэ собрания (Евреям 10:24, 25; Иакова 4:8). Через дэсави время лэстэ вижал тэ парудёл и тэ каийпэ андэ кода, кай раньшэ во терэлас кадя, сар на чалёл лэ Дэвлэсти (Деяния 3:19). Тоди во лэл тэ росԥэнэн аврэнди о чачимос анда Библия, важ кода кай ля тэ патял лэ Иеговасти (2 Коринфянам 4:13). И потом во дэл алав лэ Иеговасти кай авэла тэ жувэл важ лэстэ и болдёл (1 Петра 3:21; 4:2). Када фартэ радосно дес важ всаворэ! Пала вся, со терэл о изучающё, амэ трэбуй анда вся оди тэ хвалисарас лэс, кай во тэ на парашэл тэ жал па кадэва дром.
ШУВ САМА, САР ПАРУДЁЛ О ИЗУЧАЮЩЁ
14. Сар тэ полэс, камэл о мануш тэ болдёл чи най?
14 Кала ту поможыс лэ манушэсти, трэбуй тэ на грабис лэс, кай во тэ болдёл. Но ту трэбуй тэ полас, чаче во камэл тэ служый лэ Иеговасти? Стол во зор, кай тэ терэл кадя, сар сытярэлас о Иисусо? Чи лэсти просто чалёл тэ уӷанэн варисо нэво анда Библия?
15. Сар трэбуй тэ полэс исин кай о мануш дружба лэ Иеговаса чи най?
15 Кала о мануш сытёл па Библия ту трэбуй тэ полэс акэ со. Дэл дума во пала кода, кай о Иегова лэсти куч? Мангэлпэ во лэсти? (Псалом 116:1, 2). Чалёл лэсти тэ адиной и Библия? (Псалом 119:97). На промэкэл во и собрания? (Псалом 22:22). Парудя во ужэ варисо андэ пэстири жызня? (Псалом 119:112). Росԥэнэн во ужэ лэ родости чи лэ друӷонэнди пала кода, со уӷанэн анда Библия? (Псалом 9:1). И со май ӷлавно, камэл во тэ ашэл лэ Иеговаско служытелё? (Псалом 40:8). Ай если ту полэс, кай лэ манушэстэ нинай дружба лэ Иеговаса, тоди ковлэс пуш, васо кадя. Потом ворта, но ковлэс подэ дума лэса пала кадаh.
16. Сар тэ полэс, трэбуй тэ парашэс тэ изучаеш лэ манушэса чи най?
16 Дэкала трэбуй тэ полэс тэ парашэс тэ изучаеш лэ манушэса чи най. Кай тэ полэс, шув сама акэ пэр со. Ӷотовица во каринг и изучения? Камэл во тэ ԥирэл пэ собрания? Ашадя во и найлашэ привычки? Ужыля во анда хохавни вера? Если ту диқэс, кай во када на терэл, тоди тэ сытярэс лэс, када, сар ԥэнэса, тэ сытярас тэ плавуий лэ манушэс, саво дарал лэ паестар! Если важ о изучающё най куч кода, со во уӷанэн анда Библия, и во на камэл тэ парувэл пэстири жызня, трэбуй тоди тэ сытярас лэс па Библия?
17. Со трэбуй тэ терэн кодэла, кастэ исин изучения, сар запистромэ андэ 1 Тимофею 4:16?
17 Амэ полас, кай када важно дила тэ сытярас лэ манушэн и тэ поможысарас лэнди тэ болдён. Пэ изучения амэ ласа май бут тэ шас сама пэ Библия и тэ сыкавас, кай амэнди када куч и амэ патяс андэ када. Кадяжэ амэ ласа тэ поможысарас, кай о изучающё тэ виарақэл друӷонэн андэ собрания. Инке трэбуй тэ полас, ашэл лэстири дружба лэ Иеговаса май лащи, кай во потом тэ болдёл. (Диқэн и рамка «Со ту трэбуй тэ терэс, кай о мануш, савэса изучаеш, тэ болдёл».) Амэ фартэ лошалэ тэ терас и дила, сави спасый лэ манушэндири жызня! Ласа тэ терас вся, со па амаро зор, кай тэ поможысарас лэ манушэсти, саво сытёл па Библия, тэ болдёл.
ДИЛИ 79 Сытярэн лэн, кай вся тэ виритярэн
a Важ амэндэ бари бах тэ поможысарас лэ манушэнди тэ парудёнпэ, кай тэ чалён лэ Иеговасти. Андэ кадэя статья амэ диқаса инке панч советоря, сар инке май драго тэ проандярас и изучения.
b 2 Тимофею 4:1, 2: «Англа Дэл и англа Иисус Христос, саво лэла тэ сындой лэ жундэн и лэ мулэн. Ай кадяжэ, важ кода кай сэрав, кай во авэла и правия, сар Царё андо Царство, строӷо приԥэнав тути, росԥэн пала Дэл, тер када андэ лащи время и андэ найлащи время и на отстов када. Ԥэн, со терэн най кадя, ԥэн строӷо, дэ дума кадя, кай тэ полэн и тер вся када би холяко, сар када терэл лашо учителё».
c Диқэн и статья «Каких ошибок нужно избегать, когда проводишь изучение Библии» андэ тетрадка «Дром и служэния» пала сентябрё 2016 бэрш пэ русско шыб.
d 1 Фессалоникийцам 2:13: «Вся и время ԥэнас лэ Дэвлэсти „наис“ и пала кода, кай тумэ, кала ашундэ лэ Дэвлэско алав, ашундэ лэс амэндар, и прилинэ лэс най сар о алав лэ манушэстар, но кадя, саво во и исин па чачимастэ, сар лэ Дэвлэско алав, саво парувэл и жызня кодэлэнди, ко патял».
e По сайто jw.org диқэн и вкладка О НАС > СЛУЧАИ ИЗ ЖИЗНИ.
f Андэ прилажэния JW Library® диқэн и вкладка МУЛЬТИМЕДИА > АМАРЭ СОБРАНИИ И СЛУЖЭНИЯ > ВАЖ И СЛУЖЭНИЯ.
g 1 Фессалоникийцам 2:7, 8: «Но амэ жалуисарасас тумэн, сар и дэй жалуий пэстирэ ԥарнэстирэ бэятос. Амэ фартэ любисарас тумэн, и важ када самас лошалэ най кати тэ пэрэдас тумэнди лэ Дэвлэстири лащи весть, но и тэ отдас тумэнди пэско ди, важ кода кай тумэ фартэ куч амэнди».
h Диқэн и статьи «Важ кода кай любис лэ Иеговас, ту закамэса тэ болдёс» и «Ӷотово ту тэ болдёс чи най?» андэ «Сторожэво башня» пала марто 2020 бэрш.
i ПЭ КАРТИНКИ. И ԥэй, сави драго ӷанэн тэ проандярэл изучения, росԥэнэн ла ԥьяти, васо на трэбуй сас бут тэ росԥэнэн пэ изучения.
j ПЭ КАРТИНКИ. Пэ изучения и манушни уӷанэн, сар тэ авэл лащя хулаяса. Потом вой росԥэнэн пала кода, со уӷангля пэстирэ хуласти.
k ПЭ КАРТИНКИ. Андо Зало Царства и изучающё, поджал каринг и ԥэй, савя камэл май драго тэ уӷанэн. Потом пэстирэ хуласа вой авэл каринг латэ, кай тэ побэшэн.