Сар и ԥрала и ԥэя андэ собрания поможын, кай о мануш, саво изучает и Библия, тэ болдёл?

1, 2. Ко можэт тэ поможый лэ манушэсти, саво изучает и Библия, кай во тэ закамэл тэ болдёл?

И ԤЭЙ, сави жувэл пэ Фиджи, ԥэнэн, кай лати фартэ чалёлас тэ изучает и Библия, и вой полэлас, кай када чачимос пала Дэл. Но латири дружба ля тэ ашэл май лащи лэ Иеговаса кати тоди, кала вой ля тэ общяеца лэ ԥралэнца и лэ ԥэянца анда собрания. Тоди вой ля тэ парувэл пэстири жызня и болделя. Анда када дицол, кай лэ манушэстэ, саво изучает, тэ авэл лащи дружба лэ Иеговаса, лэсти андэ када поможын и ԥрала и ԥэя анда собрания.

² Кажно вазвещятелё можэт тэ поможый, кай май бут мануша, савэ изучают и Библия, тэ болдён (Эф. 4:16). И пианерка, савя ақарэн Лейлани, росԥэнэн, кай всаворэ ԥрала и ԥэя андэ собрания поможын лэ манушэсти, саво изучает, кай во тэ служый лэ Дэвлэсти. Када, сар ԥэнэса, лэ бэятос барярэл вся о ери. Кадяжэ и всаворэ вазвещятеля андэ собрания моӷут тэ поможын и тэ подԥэнэн кодэлэсти, ко изучает и Библия. Инке вонэ андярэн пэс кадя, кай о изучающё лэндар тэ сытёл. Кода, кай и ԥрала и ԥэя лэс подритярэн, када поможыя, кай лэстири дружба лэ Иеговаса тэ авэл май лащи, и тоди можэт во закамэла тэ болдёл (Прит. 15:22).

3. Сости амэ сытювас анда кода, со ԥэнэн и ԥэй Анна, и ԥэй Лейлани и о ԥрал Дорин?

³ Кажно вазвещятелё, савэстэ исин изучения Библии, на трэбуй тэ отԥэндёл, кай авэр вазвещятеля лэсти тэ поможын. И ԥэй Анна ԥэнэн, кай трэбуй тэ пристос бут зор, кай лэ манушэстэ, саво изучает, тэ авэл лащи дружба лэ Иеговаса. И еқэ манушэсти када авэла фартэ ԥарэс тэ стерэл. Кацаво жэ гиндо кай о ԥрал Дорин, саво служый сар спецыально пианеро. Во шутя сама, кай най еқвар и ԥрала и и ԥэя пэ изучения ԥэнэн именно кода, со лэл лэ одестар лэ манушэс, саво изучает, и со лэ ԥралэсти никала на авелоп по гиндо. Ай и ԥэй Лейлани ԥэнэн, кай кала о мануш, саво изучает, полэл, кай лэс цэнин и диқэл кай лэс шон сама, тоди во полэл, кай амэ па чачимастэ лэ Иеговаско народо (Иоан. 13:35).

4. Пала со амэ подаса дума андэ кадэя статья?

⁴ О вазвещятелё, савэс ақардэ пэ изучения, можэт тэ пушэл пэстэ, сар во можэт тэ поможый лэ манушэсти, саво изучает и Библия? Андэ кадэя статья амэ уӷанаса, сар амэ можэм тэ поможысарас, кала амэн ақарэн пэ изучения, или кала о мануш ля тэ ԥирэл пэ собрания. Ай кадяжэ уӷанаса, сар и старейшыноря моӷут тэ поможын лэ манушэсти, саво изучает, кай во тэ закамэл тэ ашэл вазвещятелё и тэ болдёл.

КАЛА ТУТ АҚАРДЭ ПЭ ИЗУЧЕНИЯ

5. Со ту можэш тэ терэс, кала тут ақарэн варикастэ пэ изучения?

⁵ Канешно, май бут поможый лэ манушэсти кодэва, ко проандярэл и изучения. Но на бистэр, кай ту тожэ можэш тэ поможыс, кала тут ақарэн варикастэ пэ изучения (Эккл. 4:9, 10). Но со ту можэш тэ стерэс?

6. Сар ту можэш тэ прилэс каринг пэстэ и алава анда Притчи 20:18, кала тут ақарэн пэ изучения?

⁶ Подӷотовься каринг и изучения. Ту можэш тэ мангэс, кай о ԥрал или и ԥэй набут тэ росԥэнэн тути пала мануш, саво изучает. (Адиносар Притчи 20:18.) Ту можэш тэ пушэс, каса тумэ авэна тэ проандярэн изучения, и со тумэ лэна тэ прожан? Андэр со именно ту можэш тэ поможыс? Кадяжэ ту можэш тэ пушэс, кай о вазвещятелё, сости во камэл тэ сытярэл лэ манушэс пэ кадэя изучения? Кадяжэ можно тэ пушэс, пала со трэбуй тэ дэс дума, ай пала со на трэбуй? И со именно ту можэш тэ росԥэнэс пэ изучения, кай када тэ лэл лэ манушэс лэ одестар и кай лэстэ тэ авэл май лащи дружба лэ Иеговаса? Канешно, о ԥрал чи и ԥэй, савэ ақардэ тут пэ изучения, на лэна тэ росԥэнэн пала лэ манушэстири лично жызня. Ай росԥэнэна кати кода, со поможыя тути тэ подӷотовишся каринг кадэя изучения. Кадя терэл и ԥэй мисианерка, савя ақарэн Джой. Вой дэл дума лэ ԥралэнца и лэ ԥэянца пала пэско изучающё. И тоди и ԥрала и ԥэя май драго полэн, пала со вонэ лэна тэ дэн дума пэ изучения.

7. Васо, кала тут ақарэн пэ изучения, трэбуй драго тэ ӷанэс, со лэна тэ прожан?

⁷ Если тут ақардэ пэ изучения, авелоп драго тэ проадинос май англал, со лэна тэ прожан (Езд. 7:10). О ԥрал Дорин ԥэнэн, кай драго кала о вазвещятелё, савэс во ақарэл пэ изучения, проадиной и тема, сави лэна тэ прожан. Тоди о изучающё полэл, кай тумэ лэдуй драго подӷотовились каринг изучения. Тоди во тожэ лэла кадя тэ терэл. Но если тутэ на сас время, кай драго тэ проадинос вся, тоди проадиносар хоть и ӷлавни гиндоря анда ӷлава, сави лэна тэ прожан пэ изучения.

8. Со поможыя тути тэ ӷанэс, пала со тэ мангэспэ пэ изучения?

⁸ Если тут мангэна тэ лэс и молитва пэ изучения, трэбуй май англал тэ погиндос, со ту ԥэнэса андэ молитва. Важ кода кай и молитва, када фартэ важно (Пс. 141:2). И ԥэй анда Япония идоси сэрэл, сар мангляпэ ек ԥэй латэ пэ изучения. Вой ԥэнэн, кай андэ молитва дицолас, пэ скати важ кодэя ԥэй о Иегова сас лашо друӷо, и сар вой любияс лэс. И вой камэлас, кай и латэ тэ авэл кацави жэ дружба лэ Дэвлэса, сар кай кодэя ԥэй. Ай кала кодэя ԥэй ԥэнэнас лако алав андэ молитва, вой полэлас кай ла цэнин.

9. Сар и алава анда Иакова 1:19 поможына тути тэ дэс дума тоди, кала трэбуй?

⁹ Поможысар кодэлэсти, ко проандярэл изучения. И ԥэй анда Нигерия ԥэнэн, кай драго кала о вазвещятелё, савэс вой ақардя пэ изучения, ашунэл, пала со жал и дума. Драго, кала во дэл дума набут, и кати кода со трэбуй. Но сар тэ полэс, кала и со трэбуй тэ дэс дума пэ изучения? (Прит. 25:11). Трэбуй драго тэ ашунэс и кодэлэс, ко проандярэл изучения и кодэлэс, каса изучаете, кай тэ на мишыис. (Адиносар Иакова 1:19.) На трэбуй тэ дэс дума фартэ бут, тэ пэрэмарэс или тэ пэрэжас пэ авэр тема. Но ту можэш тэ росԥэнэс варисаво примеро или тэ задэс вопросо, кай тэ доандярэс варисаво гиндо. Дэкала здэлпэ, кай пэ изучения тутар нинай нисаво толку. Но если ту лэса анда вся оди тэ хвалис лэ манушэс, саво изучает, тэ шос сама лэс, тоди ту поможыса, кай лэстири дружба лэ Иеговаса тэ авэл май лащи.

10. Сар кода, кай ту набут росԥэнэса пала пэстэ пэ изучения, можэт тэ поможый лэ манушэсти, саво изучает и Библия?

¹⁰ Росԥэн пала пэстэ. Кала трэбуй, ту можэш набут тэ росԥэнэс пала пэстэ. Можэш тэ росԥэнэс, сар уӷанглян пала о Дэл, сар пэрэандярэсас о ԥаримос андэ пэстири жызня, и сар о Иегова тути поможыяс (Пс. 78:4, 7). Ко ӷанэн, ай можэт када и поможыя лэ манушэсти? Тоди кода, со ту росԥэнэса пэ изучения, поможыя лэ манушэсти май фартэ тэ патял лэ Иеговасти. И када можэт тэ поможый лэсти, кай во тэ ашэл вазвещятелё и тэ болдёл (1 Пет. 5:9). Кадяжэ тири дума можэт тэ поможый лэсти тэ пэрэандярэл о ԥаримос. О ԥрал Габриело, саво жувэл андэ Бразилия и акана служый сар пианеро, ԥэнэн, кай блаӷодаря кодэлэсти, кай и ԥрала и ԥэя росԥэнэнас лэсти, со вонэ пэрэжудэ, во поля кай о Иегова диқэл вся о ԥаримос, саво амэндэ исин. И если вонэ пэрэандярдэ када, тоди и лэстэ вижала тэ пэрэандярэл любо ԥаримос.

КАЛА И ИЗУЧАЮЩИ АВЭН ПЭ СОБРАНИЯ

11, 12. Васо трэбуй анда оди тэ шас сама лэ манушэс, саво изучает, кала во авэл пэ собрания?

¹¹ Но кай лэ манушэндэ, савэ изучают, тэ авэл лащи дружба лэ Дэвлэса, и кай вонэ тэ закамэн тэ болдён, лэнди трэбуй тэ на промэкэн и собрания (Евр. 10:24, 25). И кала вонэ пэрво разо авэна пэр латэ, кажно андар мэндэ можэт тэ поможый, кай лэнди тэ чалёл пэ собрания. Но сар амэ можэм тэ поможысарас?

¹² Прилэн лэн анда вся оди (Рим. 15:7). Если о мануш, саво изучает, полэла, кай лэс лошалэ тэ диқэн пэ собрания, тоди во старыияпэ ла тэ на промэкэл. Амэ можэм тэ поджас каринг лэстэ, тэ шас сама лэс. Если во камэл, тоди можэм тэ подындярас лэс каринг авэр ԥрала и ԥэя, кай во лэн май драго тэ уӷанэн. И на трэбуй тэ гиндосарас, кай если када най амари изучения, тоди амэ на трэбуй тэ шас сама лэ манушэс. Можэт кодэлэ ԥралэсти или ла ԥьяти най кала, или вонэ опаздывают пэ собрания. Трэбуй драго тэ ашунас, кала о изучающё варисо росԥэнэн. Када вся можэт тэ лэл лэс лэ одестар. О ԥрал Дмитрий, саво болделя най дэлмут и служый сар служэбно помошнико ԥэнэн, кай кала во авеля пэрво разо пэ собрания, во тердёлас паша Зало Царства и фартэ пэрэжывал. Ек ԥрал додиқля лэс и поджыля каринг лэстэ, и вонэ вмести зажылэ андо зало. Котэ бут мануша пашэлэ каринг лэстэ и шутэ сама лэс. Када ля лэс лэ одестар, и во закамля, кай и собрания тэ авэл кажно дес. Во ԥэнэн, кай лэстэ по ди никала кацаво на сас сар тоди.

13. Со моӷут тэ полэн и мануша, савэ изучают, кала диқэн, сар амэ пэс андярас?

¹³ Андярэн пэс кадя, кай вонэ тэ сытён. Кода, сар амэ пэс андярас, можэт тэ поможый лэ манушэнди, савэ изучают и Библия тэ патян, кай вонэ виарақлэ о чачимос пала Дэл (Матф. 5:16). Ек ԥрал, саво служый пианероса андэ Молдова, ԥэнэн, кай кала во диқэлас, сар пэс андярэн и ԥрала и ԥэя, и савэ вонэ андэ жызня, во полэлас, кай кадя и трэбуй тэ андярэн пэс и чачунэ христианоря.

14. Сар кода, сар амэ пэс андярас, можэт тэ поможый лэ манушэнди, савэ изучают, кай вонэ тэ жувэн па Библия?

¹⁴ Кай и мануша, савэ изучают, тэ болдён, лэнди трэбуй тэ терэн кадя, сар пистромэ андэ Библия. Лэнди авэла май вушэро тэ жувэл па Библия, кала вонэ диқэна, кай и ԥрала и ԥэя жувэн кадя, сар сытярэл о Дэл (1 Кор. 11:1). И ԥэй, пала сави амэ ужэ дям дума, ԥэнэн, кай кала вой кати ля тэ изучает и Библия, авэр ԥрала и ԥэя ужэ жувэнас па лэ Дэвлэско законо. Лэндар вой сытёлас, сар тэ поможый аврэнди, сар тэ простий и сар тэ сыкавэл, кай вой любий лэн. Вой шутя сама, кай вонэ никала на дэнас дума пала авэр найдраго. И лати закамляпэ тэ авэл кацави жэ, сар и вонэ.

15. Васо амэнди трэбуй май драго тэ уӷанас лэ манушэс, саво изучает, кала во авэл пэ собрания, сар ԥэнэнпэ андэ Притчи 27:17?

¹⁵ Уӷанэн май драго лэ манушэс, саво изучает. Кажно разо кала о мануш авэл пэ собрания анда вся оди шам сама лэс (Флп. 2:4). Старысавас май драго тэ уӷанас лэс. Хвалисараса лэс пала кода, кай во ля тэ жувэл па лэ Иеговаско законо. Амэ можэм тэ пушас, сар лэстэ цэрэ, сар о ери, сар лэстэ и дила пэ бути. Но кати на трэбуй тэ задас лэсти лишни вопросоря. Если амэ ласа май бут тэ общяемся лэ манушэса, кадя амэ сможэм тэ ашас лэса друӷоря. И кадя амэ сможэм тэ поможысарас лэсти, кай во тэ закамэл тэ болдёл. (Адиносар Притчи 27:17.) И ԥэй, сави акана служый сар общё пианеро, ԥэнэн, кай вой идоси сэрэл, сар пэрво разо авеля пэ собрания. Ла котэ фартэ драго прилинэ, и вой на промэкэлас ни ек собрания дажэ тоди, кала сас фартэ цыени. Лати чалёлас тэ проандярэл время кадэлэ манушэнца, и вой ля лэнца тэ дружый. Кадя вой парашэля тэ дружый кодэлэнца, ко на любий лэ Иеговас. Вой закамля тэ авэл май пашэ каринг о Иегова и каринг и ԥрала и ԥэя андэ собрания. Важ када вой ашэля вазвещятелё и болделя.

16. Сар инке амэ можэм тэ поможысарас лэ манушэсти, саво изучает, кай во тэ полэл, кай во трэбуй андэ собрания?

¹⁶ Если амэ диқас, кай о мануш, саво изучает и Библия, старыийпэ тэ парувэл пэстири жызня и тэ жувэл кадя, сар пистромэ андэ Библия, тоди амэ можэм тэ поможысарас лэсти, кай тэ полэл, кай во трэбуй андэ собрания. Например, амэ можэм тэ ақарас лэс в ӷости (Евр. 13:2). О ԥрал анда Молдова, савэс ақарэн Денис, ԥэнэн, кай кала вонэ ла хулаяса изучали и Библия и ԥрала и ԥэя анда собрания най еқвар ақарэнас лэн вмести тэ проандярэн и время. Вонэ росԥэнэнас, сар о Иегова лэнди поможыяс. Через када о Денис и лэстири хулаи полинэ, кай камэн тэ служын лэ Иеговасти и кай лэн англэ аштярэл райкани жызня. Инке амэ можэм тэ поможысарас лэ манушэсти, саво ужэ ашэля вазвещятелё, если ақараса лэс вмести тэ жас пэ служэния. О ԥрал Диегу анда Бразилия ԥэнэн, кай кала во ашэля вазвещятелё бут ԥрала ақарэнас лэс пэ служэния. Кадя вонэ май драго уӷанэнас ек еқэс. Во сытёлас лэндар и май драго уӷангля лэ Иеговас и лэ Иисусос.

САР МОӶУТ ТЭ ПОМОЖЫН И СТАРЕЙШЫНОРЯ?

17. Сар и старейшыноря моӷут тэ поможын кодэлэ манушэсти, саво изучает?

¹⁷ Шон сама лэ манушэс, саво изучает. Если о старейшына лэла тэ шол сама лэ манушэс, саво изучает, кадя во можэт тэ поможый лэсти, кай дружба лэ Иеговаса тэ авэл май лащи, и мануш можэт тэ закамэл тэ болдёл. О старейшына можэт тэ задэл пэсти кацаво вопросо. Можэт во тэ шол сама лэ манушэн, савэ изучают, кала вонэ авэн пэ собрания? Кала о изучающё камэл тэ дэл каминтариё, драго авелоп кай о старейшына тэ сэрэл, сар лэс ақарэн. Кадя о изучающё полэла, кай и старейшыноря анда вся оди шон сама лэс. Инке о старейшына можэт тэ ԥэнэн лэ ԥралэнди и лэ ԥэянди, савэндэ исин изучения Библии, кай вонэ тэ ақарэн лэс пэ изучения. И дажэ если кай о старейшына нинай пэ када время, во можэт тэ парувэл дэсо андэ пэстири дила, кай тэ авэл пэ изучения. Кадя о изучающё полэла, кай о старейшына лэс шол сама. И ԥэй анда Нигерия ԥэнэн, кай бут мануша, савэнца вой изучала и Библия, удивинаспэ, кала уӷанэнас, кай лэндэ пэ изучения, сас о старейшына. Вой ԥэнэн, кай кала проандярэлас изучения андэ ек ери, котэ ек мурш ԥэндя лати, кай лэндэ и рашая нисо на терэн би ловэнго. Вонэ жан кати кай и барвалэ и кати тоди, кала вонэ лэнди драго потинэна. Важ када лэс ля лэ одестар кода, сар андярэн пэс и старейшыноря. И акана кадэва мурш ԥирэл пэ собрания.

18. Со трэбуй тэ терэл о старейшына, сар запистромэ андэ Деяния 20:28?

¹⁸ Поможын и подԥэнэн кодэлэнди, ко проандярэл изучения. И старейшыноря трэбуй тэ поможын лэ ԥралэнди и лэ ԥэянди, кай вонэ инке май драго тэ росԥэнэн пала Дэл и тэ проандярэн изучения Библии. (Адиносар Деяния 20:28.) Ай если о вазвещятелё лажал тэ проандярэл изучения англа лэстэ, тоди о старейшына можэт ла тэ проандярэл. И ԥэй Джеки ԥэнэн, кай о старейшына вся и время пушэл, сар и дила кай латири изучающё. Если пэ изучения вой на ӷанэн, сар тэ объясний ԥари тема, тоди о старейшына можэт лати тэ поможый андэ када. И старейшыноря бут со моӷут тэ стерэн, кай тэ поможын кодэлэнди, кастэ исин изучения (1 Фес. 5:11). Кадэя ԥэй ԥэнэн, кай лати драго по ди, кала и старейшыноря поможын лати, хвалин и цэнин пала вся со вой терэл. Када важ латэ сар шудро паи, кала ԥабарэл о қам. Кадя вой полэл, кай латэ драго вижал тэ служый лэ Иеговасти, и кадэлэстар вой инке май лошали (Прит. 25:25).

19. Состар кажно андар мэндэ авэла лошало?

¹⁹ Дажэ если тутэ нинай изучения, ту можэш тэ поможыс, кала авэр ақарэн тут пэ изучения. Тоди ту можэш тэ поможыс лэ ԥралэнди и лэ ԥэянди пэ изучения, кала лэса тэ дэс дума набут и па тема. Ай кала о мануш лэл тэ ԥирэл пэ собрания, тоди кажно андар мэндэ можэт тэ шол сама лэс и тэ андярэл пэс кадя, кай во амэндар тэ сытёл. Ай о старейшына можэт тэ витидэл время, кай тэ авэл пэ изучения кодэлэ манушэстэ, саво изучает и Библия. Ай кадяжэ во можэт тэ хвалий лэ вазвещятелёс, саво проандярэл изучения. Амэ аваса фартэ лошалэ, если хоть набут поможысараса аврэ манушэнди тэ полюбин лэ Иеговас и тэ служын лэсти.