«Сытярэн лэ манушэн, кай вонэ тэ авэн ученикоря»

1, 2. Со о анӷело ԥэндя лэ жувлянди, савэ авелэ каринг о ҭан, кай сас гарадо о Иисусо, и со мангля о Иисусо лэн тэ стерэн?

ТЭСАРА 16 нисана андо 33 бэрш лэ И. Х. дэсавэ жувля, савэ ровэнас, жан каринг о ҭан, кай сас гарадо о Иисусо дуй дес палпалэ. Вонэ камэн тэ обмакэн лэстири тила чарянца и вулееса, савэ драго қандэн. Вонэ фартэ удивисайлэ, кала додиқлэ, кай и моӷила шущи! О анӷело ԥэндя лэнди, кай о Иисусо рисайля каринг и жызня, ай инке ԥэндя лэнди: «Во жал андэ Галилея англа тумэндэ. Котэ диқэна лэс» (Матфея 28:1—7; Луки 23:56; 24:10).

² Кала и жувля жанас палпалэ, лэн диқля о Иисусо, саво мангля лэн: «Жан, ԥэнэн мэрнэ ԥралэнди, кай вонэ тэ жан андэ Галилея. Котэ вонэ диқэна ман» (Матфея 28:10). Андэ Галилея о Иисусо трэбуй сас тэ ԥэнэн лэ учениконэнди варисо фартэ важно. Посли кода, сар во рисайля каринг и жызня, када сас пэрво разо, кала вонэ стидэнапэ вмести.

КАСТИ ДИНЭ КАДЭЯ ДИЛА?

3, 4. Васо можно тэ ԥэнэс, кай и дила, пала сави запистромэ андэ Матфея 28:19, 20, динэ най ек лэ апостолонэнди? (Диқэн и картинка пэ обложка.)

³ Адиносар Матфея 28:16—20b. Кала о Иисусо диқляпэ лэ учениконэнца андэ Галилея, во росԥэндя лэнди пала важно дила, сави лэнди трэбуй сас тэ терэн андэ кодэя время. Када кадэя жэ дила, сави амэ терас адес. Во ԥэндя: «Жан кай всаворэ народоря, сытярэн лэ манушэн, кай вонэ тэ авэн ученикоря... и сытярэн лэн тэ терэн вся, со мэ тумэнди приԥэндэм».

⁴ О Иисусо камэл, кай всаворэ лэстирэ ученикоря тэ росԥэнэн и лащи весть. Катар амэ ӷанас, кай кадэя дила во дя тэ терэн най кати и 11 апостолоря, савэ лэс кандэнас? Давай погиндосарам. Хэба ек и апостолоря диқлэ лэ Христос андэ Галилея? О анӷело ԥэндясас лэ жувлянди: «Котэ [андэ Галилея] диқэна лэс». Када сыкавэл, кай кадэла жувля, савэ кандэнас лэ Дэвлэс, кадяжэ сас котэ, кала диқлэ лэ Иисусос. Но када инке най вся. О апостоло Павло пистросардя, кай лэ Иисусос «диқлэ май бут чем пятьсот ԥрала сразу» (1 Коринфянам 15:6). Кай када сас?

5. Со можэм тэ полас анда кода, со пистромэ андэ 1 Коринфянам 15:6?

⁵ Амэ можэм тэ патяс, кай андэ 1 Коринфянам 15:6 и андэ Матфея андэ 28 ӷлава и дума жал пала кодэва жэ разо, кала лэс диқлэ андэ Галилея. Васо кадя можно тэ гиндос? Пэрво, бут ученикоря сас анда Галилея. Важ када о плай андэ Галилея май фартэ поджалас, кай тэ диқэлпэ бутэ учениконэнца, чем о цэр. Дуйто, о Иисусо, саво рисайля каринг и жызня, ужэ диқля 11 апостолонэн андэ ек цэр андо Иерусалимо. Тэ камлоп о Иисусо тэ дэл кадэя дила, кай тэ росԥэнэн и лащи весть и тэ сытярэн лэ учениконэн кати лэ апостолонэнди, во моӷ када тэ стерэл и андо Иерусалимо. Хэба тоди во манглоп лэ апостолонэн, ай кадяжэ лэ жувлян и аврэн учениконэн тэ авэн каринг лэстэ андэ Галилея? (Луки 24:33, 36).

6. а) Сар кода, со пистромэ андэ Матфея 28:20, сыкавэл, кай и дила тэ сытярэн учениконэн поджал каринг и христианоря и андэ амарэ деса? б) И сар и мануша терэн кадэя дила адес?

⁶ Шам сама инке пэ ек фартэ важно маменто. И дила, кай тэ сытярэн лэ учениконэн, о Иисусо дя най кати лэ христианонэнди, савэ жувэнас андэ пэрво вико. Катар амэ када ӷанас? Пэстири дума о Иисусо додя дума кацавэ алавэнца: «И мэ авава тумэнца андэ всаворэ деса, пока кадэлэсти, со андэ люма, на авэла конец» (Матфея 28:20). Адес, сар и ԥэндясас о Иисусо, кадэя дила терэн фартэ драго. Кати погиндон, кажно бэрш варикай 300 000 мануша болдён и ашэн лэ Христостирэ ученикоря и авэн андэ лэ Иеговастири арӷанизацыя!

7. Пала со амэ акана подаса дума и васо?

⁷ Бут мануша, кас амэ сытярас па Библия, терэн бут со, кай лэндэ тэ авэл лащи дружба лэ Иеговаса и тэ болдён. Но дэсавэ на грабин тэ ашэн лэ Христостирэ ученикоря. Лэнди чалёл тэ сытён па Библия, но вонэ нисо на терэн, кай тэ болдён. Если тумэ сытярэн па Библия, канешно, тумэ камэн, кай кодэва, ко сытёл, тэ терэл кадя, сар уӷанэн. И сар прожал варисави время, кай во тэ ашэл лэ Христоско ученико. Андэ кадэя статья амэ подаса дума, сар тэ поможысарас кодэлэнди, кас амэ сытярас па Библия, тэ любин лэ Иеговас и тэ авэл лэндэ лащи дружба лэса. Васо трэбуй тэ дас дума важ када? Важ кода кай варикала трэбуй тэ витидас, трэбуй чи най и май дур тэ сытярас лэ манушэс па Библия.

ПОМОЖЫН ЛЭНДИ, КАЙ ВОНЭ ТЭ ЛЮБИН ЛЭ ИЕГОВАС

8. Васо манушэсти можэт тэ авэл найвушэро тэ любий лэ Иеговас?

⁸ О Иегова камэл, кай и мануша тэ служын лэсти, важ кода кай любин лэс. Важ када амэ трэбуй тэ поможысарас кодэлэнди, кас амэ сытярас па Библия, тэ полэн, кай лэ Иеговасти куч кажно мануш и во любий кажнонэс андар мэндэ. Амэ камас тэ поможысарас лэ манушэнди тэ полэн лэ Иеговас кадя, кай во «дад лэ чорорэнди и фэрий лэ ԥивлян» (Псалом 68:5). Кала кодэва, ко сытёл па Библия полэла, кай о Дэл и лэс любий, тоди во кадяжэ лэла тэ любий лэ Дэвлэс. Но дэкасти ԥарэс тэ полэн лэ Иеговас, сар любящёнэ Дадэс. Важ кода кай андэ лэнго ери о дад на сыкавэлас, кай любияс лэн и на заботияспэ пала лэндэ (2 Тимофею 3:1, 3). Тоди, кала кацавэн сытярэн па Библия, шон сама пэ лашэ качестворя, савэ исин кай о Иегова. Поможын кодэлэнди, кас сытярэн па Библия, кай вонэ тэ полэн, кай амаро любящё Дэл камэл тэ подарий лэнди вечно жызня и камэл андэ када лэнди тэ поможый. Со инке амэ можэм тэ стерас?

9, 10. Па савэ книжки трэбуй тэ сытярэс па Библия и васо кати пар лэндэ?

⁹ Сытярэн па Библия па кадэла книжки «Сости сытярэл амэн и Библия?» и «Оставайся в любви Бога». Кадэла книжки важ кода, кай тэ поможын кодэлэнди, ко сытёл па Библия, тэ любин лэ Иеговас. Например, и пэрво ӷлава андэ книжка «Сости сытярэл амэн и Библия?» дэл атветоря пэ вопросоря «О Дэл любий амэн чи во жэстоко?», «Со кай о Дэл андо ди, кала во диқэл по ԥаримос?» и «Вижала тутэ тэ авэс лэ Дэвлэско друӷо?». Ай и книжка «Любовь Бога» поможый кодэлэсти, ко сытёл па Библия тэ полэл, сар и принцыпоря анда Библия поможына лэсти тэ парувэл пэсти жызня, кай тэ авэл май лащи, и кай во тэ ашэл май пашэ лэ Иеговаса. Дажэ, кала тумэ ужэ най еқварэс сытярэнас па кадэла книжки, всаек май драго подӷотовьтесь каринг кода, кай тэ сытярэн и шон сама пэ кода, со трэбуй лэ манушэсти, савэс сытярэн.

¹⁰ Ай со тэ терэс, кала кодэва, кас ту сытярэс па Библия, кала тумэндэ прожал изучения, пушэл тут пала кода, со нинай андэ книжки «Сости сытярэл амэн и Библия?» и «Любовь Бога»? Кай акана изучения тэ на тердярэс, можэш лэсти тэ ԥэнэс, кай во можэт екжэно пала када тэ проадиной андэ литература.

11. Кала фэдэр тэ залэс тэ мангэнпэ, кала сытярэс па Библия, и сар тэ росԥэнэс манушэсти, васо важно тэ мангэлпэ?

¹¹ Кажно разо, кала залэс тэ сытярэс па Библия, мангэнпэ. Старысав, со май йто, кала залэс тэ сытярэс па Библия, тэ мангэнпэ. Терэн када, кала залинэ тэ адинон пэ изучения и кала доадиносардэ. Трэбуй тэ поможыс кодэлэсти, ко сытёл па Библия, тэ полэл, кай и Библия можно тэ полэл кати через о свынто духо. Кай тэ полэн, сар важно и молитва, дэсавэ вазвещятеля сыкавэн о стихо Иакова 1:5, андэ саво пистромэ: «Кала варикасти андар тумэндэ на хутилэл и мудрость, мэк мангэл кай о Дэл». Кала проадинон кадэва стихо, вонэ пушэн: «Со амэ трэбуй тэ терас, если камас, кай амэндэ тэ авэл мудрость?» Кодэва, ко сытёл па Библия, можэт тэ ԥэнэн, кай трэбуй тэ мангаспэ.

12. Сар о Псалом 139:2—4, поможыя тэ росԥэнэс кодэлэсти, кас сытярэс па Библия, сар тэ мангэлпэ лэ Иеговасти анда оди?

¹² Сытяр кодэлэс, кас сытярэс па Библия, тэ мангэлпэ. Ԥэн лэ манушэсти, кай о Иегова камэл тэ ашунэл и молитвы, савэ во ԥэнэн анда оди. Росԥэн, кай андэ молитва, амэ можэм тэ ԥэрнавас пэско ди лэ Иеговасти и тэ росԥэнас кода, со никасти на росԥэндоп. О Иегова и кадя ӷанэн амарэ гиндоря, савэ нико на ӷанэн. (Адиносар Псалом 139:2—4c.) Кадяжэ ту можэш тэ ԥэнэс кодэлэсти, кас сытярэс па Библия, кай во можэт тэ мангэл лэ Дэвлэс тэ поможый лэсти тэ улэл пэстар и найлашэ гиндоря и привычки. Ԥэнаса, манушэсти, саво ужэ сытёл па Библия, всаек чалёл о Кричуно, хоть во полэл, кай кадэва празнико най лэ Дэвлэстар. Ԥэн лэсти, кай во тэ росԥэнэн лэ Иеговасти, со лэстэ по ди. Кадяжэ тэ мангэл лэ Иеговас тэ сытярэл лэс, кай во тэ любий кати кода, со чалёл лэ Иеговасти (Псалом 97:10).

13. а) Васо трэбуй со май йто тэ ақарэс пэ собрания кодэлэс, кас сытярэс па Библия? б) Со трэбуй тэ терэс, кай кодэва, кас сытярэс па Библия, андо Зало Царства тэ на авэл, сар чужо?

¹³ Со май йто ақар кодэлэс, кас сытярэс па Библия, пэ собрания. Кода, со во котэ ашунэла и диқэла, можэт тэ лэл лэс лэ одестар и во закамэла, кай лэстэ тэ авэл май лащи дружба лэ Иеговаса. Сыкав кодэлэсти, кас сытярэс па Библия, видео «Со терэн андо зало, кай тидэнпэ лэ Иеговастирэ свидетеля?» и анда оди ақар лэс тэ жал туса пэ собрания. Сар тутэ исин возможность, ԥэн, кай во можэт туса тэ ладэл. Инке авелоп драго, кала жас тэ сытярэс лэс па Библия, тэ лэс пэса разнонэ манушэн. Кадя во уӷанэна лэ ԥралэн и лэ ԥэян анда собрания. Тоди, кала во авэла пэ собрания андо Зало Царства, во ужэ бутэн ӷанэна и на авэла, сар чужо.

ПОМОЖЫСАР, КАЙ ЛЭНДЭ ТЭ АВЭЛ МАЙ ЛАЩИ ДРУЖБА ЛЭ ИЕГОВАСА

14. Кала о мануш закамэла, кай лэстэ тэ авэл май лащи дружба лэ Иеговаса?

¹⁴ Амэ трэбуй тэ поможысарас кодэлэсти, кас сытярас па Библия, кай лэстэ тэ авэл май лащи дружба лэ Иеговаса (Эфесянам 4:13). Кала мануш залэл тэ сытёл па Библия, во, файма, гиндой: «Со манди кадэлэстар авэла?» Ай кала во лэл тэ любий лэ Иеговас май фартэ, во лэл тэ загиндойпэ, сар тэ поможый аврэ манушэнди и кадяжэ лэ ԥралэнди и лэ ԥэянди андэ собрания (Матфея 22:37—39). На лажа, кала поджала время, тэ ԥэнэс лэсти, кай если во камэл, во можэт, сар и всаворэ амэ, лэ ловэнца тэ подритярэл и дила важ лэ Дэвлэско Царство.

15. Сар тэ поможыс кодэлэсти, кас сытярэс па Библия, тэ пэрэандярэл о ԥаримос?

¹⁵ Сытяр кодэлэс, кас сытярэс па Библия, тэ пэрэандярэл о ԥаримос. Роздиқам кацаво случаё. О мануш, кас ту сытярэс па Библия и саво ужэ ашэля некрещённо вазвещятелё, росԥэнэн тути, кай варико андэ собрания лэса обжыляпэ найдраго. Ту на трэбуй тэ залэс варикастири риг, ай фэдэр тэ росԥэнэс лэсти, со подԥэнэн и Библия и со во трэбуй тэ терэл андэ кацави время. Во можэт тэ простий кодэлэ манушэс и тэ бистрэл пала кода, со сас. Ай если лэстэ када на вижал, лэсти трэбуй анда оди тэ подэл дума кодэлэ манушэса, кай тэ помирийпэ. (Диқэн Матфея 18:15.) Поможысар кодэлэсти, кас ту сытярэс па Библия, кай во тэ подӷотовица каринг кода, кай тэ подэл дума лэ манушэса. Сыкав лэсти, сар тэ виарақэл советоря пала кода, со тэ терэс, кала туса обжылэпэ найдраго андэ прилажэния JW Library^®, чи андэ онлайн библиатека, чи по сайто jw.org^®. Если жы каринг кода, сар тэ болдёл, во сытёла тэ пэрэандярэл о ԥаримос, тоди и посли кода, сар во болдёла, лэстэ вижала тэ ладий лэ ԥралэнца и лэ ԥэянца андэ собрания.

16. Васо драго тэ ақарэс аврэн вазвещятелёнэн, кала сытярэс па Библия?

¹⁶ Кала сытярэс па Библия, ақар туса аврэн вазвещятелёнэн, и кадяжэ ақар лэ раёнонэс надзирателёс. Состэ? Най кати важ кода, пала со сас пистромэ май упрэ. Ай инке важ кода, кай авэр ԥрала и ԥэя моӷут тэ поможын кодэлэсти, кас сытярэс па Библия, кадя, сар тутэ на вижала. Ԥэнаса, о мануш, кас ту сытярэс па Библия, камэл тэ мэкэл тэ цырдэл, но вся и время залэл упалэ тэ цырдэл. Ақар туса манушэс анда собрания, савэстэ сас кадяжэ. Во росԥэнэна кодэлэсти, кас сытярэс па Библия, кода, со поможыя лэсти тэ мэкэл тэ цырдэл. Если ту лажас англа авэр вазвещятелё, саво май бут терэл кадэя дила тэ сытярэс, тоди манг лэс, кай ек разо во тэ сытярэл. Кала ту ақарэс туса аврэн, тоди кодэва, кас ту сытярэс па Библия, можэт лэндар варисо тэ сытёл. На бистэр, важ амэндэ ӷлавно када, кай лэ манушэстэ, кас сытярэс па Библия, тэ авэл май лащи дружба лэ Иеговаса.

ТРЭБУЙ ЧИ НАЙ ТЭ ПАРАШЭС ТЭ СЫТЯРЭС ПА БИБЛИЯ?

17, 18. Пэр со трэбуй тэ шос сама, кала гиндос трэбуй чи най тэ парашэс тэ сытярэс па Библия?

¹⁷ Если кай о мануш, савэс ту сытярэс па Библия, на ашэл май лащи дружба лэ Дэвлэса, тути прижалапэ тэ пушэс пэстар: «Трэбуй чи най тэ парашав тэ сытярав лэс па Библия?» Но май англал трэбуй тэ шос сама пэ кода, саво лэстэ зор, бэрша, саво ери и вушэро лэсти тэ полэл чи най кода, со во сытёл. Дэкасти, кай тэ полюбин лэ Иеговас, трэбуй май бут время, чем аврэнди. Пуш пэстар: «Моӷу мэ чи най тэ ԥэнав, кай лэ манушэстэ, савэс мэ сытярав па Библия, ашэл май лащи дружба лэ Иеговаса? Дицол чи най па кода, саво лэстэ зор, бэрша, саво ери чи вушэро лэсти тэ полэл или най кода, со во сытёл, кай лэстири дружба лэ Иеговаса ашэл май лащи? Заля во тэ терэл кадя, сости сытеля?» (Матфея 28:20). Кай йто тэ парудёлпэ манушэстэ сразу на вижала. Но хоть андэ варисо по набут во трэбуй тэ парудёл.

¹⁸ Но со, если о мануш, савэс ту варисави время сытярэс па Библия, най фартэ цэний, кай во сытёл? Ԥэнаса, ту ужэ прожылян лэса и книжка «Сости сытярэл амэн и Библия?» и, файма, залян тэ сытярэс па книжка «Любовь Бога», ай во ни еқвар на авеля ни пэ ек собрания, и кадяжэ на авеля по Вэчэро, кай сэрэн пала лэ Иисусостири смэрть. И кала ту авэсас лэстэ, во ԥэнэнас, кай лэсти най кала, хоть лэстэ на сас важно дила. Тоди трэбуй пала када тэ подэс дума лэсаd.

19. Со можно тэ ԥэнэс кодэлэсти, важ кастэ, сар тути здэлпэ, кода, кай во сытёл па Библия, на ашэл нисо? И пэр со трэбуй тэ шос сама?

¹⁹ Англа кода, сар тэ залэс и дума кодэлэса, кас сытярэс па Библия, можно тэ пушэс лэстар: «Сар ту гиндос, со на дэл тути, кай ту тэ ашэс лэ Иеговаско свидетелё?» Можэт, во ԥэнэна: «Манди чалёл тэ сытював па Библия, но мэ никала на ашава лэ Иеговаско свидетелё!» Если амэ лэс ужэ бут время сытярас па Библия, и во всаек кадя гиндой, тоди трэбуй чи най амэ лэс инке тэ сытярас? Авря ригатар, можэт кодэва, кас ту сытярэс па Библия, пэрво разо росԥэндя тути, васо лэстэ нинай лащи дружба лэ Иеговаса. Например, можэт во дарал, кай лэсти прижалапэ тэ росԥэнэн важ о Дэл па цэра. Акана, кала ту када ӷанэс, ту май драго полэса, соса лэсти тэ поможыс.

20. Сар кода, кай ту полэс и алава анда Деяния 13:48, поможыя тути тэ полэс, тэ парашэс тэ сытярэс лэ манушэс па Библия чи най?

²⁰ Сар бы ԥарэс тэ на авэл, но дэсавэ мануша, кас сытярас па Библия, гиндон кадяжэ, сар и израильтяноря, савэ жувэнас андэ кодэя время, кала жувэлас о Иезекиилё. Акэ со о Иегова ԥэндя пала кодэла мануша пэстирэ пророкости: «Ту важ лэндэ сар лащи дили, сар мануш, кастэ лашо ӷолосо и саво драго дилабэл по инструменто, савэстэ исин струны. Вонэ ашунэн тирэ алава, но нико на терэл кадя» (Иезекииль 33:32). Канешно, найвушэро тэ ԥэнэс манушэсти, кай будэр на лэса тэ сытярэс лэс па Библия. Но на бистэр, «кай время ашэляпэ набут» (1 Коринфянам 7:29). Фэдэр тэ на сытярэс па Библия кодэлэс, кастири дружба лэ Иеговаса на ашэл май лащи. Ай фэдэр тэ арақэс кодэлэн, кас цырдэл «каринг о чачимос, саво дэл вечно жызня». (Адиносар Деяния 13:48e.)

21. Со пистромэ андо стихо по 2020 бэрш и андэр со во амэнди поможыя?

²¹ О стихо по 2020 бэрш поможыя амэнди тэ гиндосарас пала кода, сар май драго тэ сытярас лэ учениконэн. Када лэ Иисусостирэ алава, савэ во ԥэндя, кала ақардя всаворэн пэстирэ учениконэн андэ Галилея: «Жан... сытярэн лэ манушэн, кай вонэ тэ авэн ученикоря. Болэн лэн» (Матфея 28:19).