На гиндон пала кода, со сас. Диқэн англэ!

1, 2. Сар тэ терас кадя, сар ԥэнэнпэ андэ Притчи 4:25? Росԥэнэн.

ПОГИНДОСАРАМ пала трин примероря, со можэт тэ авэл кай и христианоря. Например, и ԥэй, сави андэ бэршэндэ сэрэл пала лашимос, саво сас андэ латири жызня. И хоть акана латэ андэ жызня май бут ԥаримос, вой всаек на парашэл тэ терэл андэ служэния лэ Иеговасти вся, со па лако зор (1 Коринфянам 15:58). Кажно дес вой гиндой пала кода, кай пашол и время, кала вой авэла андо раё пэ ԥув, и паша латэ авэна всаворэ латирэ чаче. Авря ԥья варикала холярдэ андэ собрания. Но вой на ля тэ ритярэл и холи (Колоссянам 3:13). Ай о ԥрал нащи бистрэл пэстирэ ошыбки, савэ стердясас варикала. Но во старыийпэ фартэ тэ на гиндой пала лэндэ, ай тэ терэл вся, со можэт, кай тэ на парашэл тэ кандэл лэ Иеговас (Псалом 51:10).

² Со еқэндар, кай кадэла трин мануша? Всаворэ вонэ сэрэн, со лэнца сас варикала, но вонэ на гиндон кати ек пала када. Лэндирэ «яқа диқэн англэ». (Адиносар Притчи 4:25b.)

3. Васо амэнди важно тэ гиндосарас, со авэла англэ?

³ Васо амэнди важно тэ гиндосарас пала кода, со авэла англэ? О мануш нэ можэт тэ жал па дром ворта, если во вся и время обдиқэлпэ палпалэ. Кадяжэ и амэ нэ сможэм тэ служысарас лэ Иеговасти анда вся оди, если вся и время ласа тэ гиндосарас пала кода, со амэнца сас варикала (Луки 9:62).

4. Со амэ уӷанаса андэ кадэя статья?

⁴ Андэ кадэя статья амэ уӷанаса трин маменторя, васо амэ можэм тэ гиндосарас кати пала кода, со сас варикалаc. Пэрво, када можэт тэ авэл, кала ту скучис пала кодэя время, сави сас варикала. Дуйто, када кала тут варико холярдя андэ собрания. И трито, када кала ту фартэ пэрэжываеш пала пэстирэ ошыбки, савэ стердян варикала. Амэ уӷанаса пала советоря анда Библия, савэ поджан каринг када (Филиппийцам. 3:13).

КАЛА СКУЧИСАРАС ПАЛА КОДЭЯ ВРЕМЯ, САВИ САС

5. Пала со жал и дума андэ Экклезиаст 7:10?

⁵ Адиносар Экклезиаст 7:10d. Шон сама, кай катэ на ԥэнэнпэ, кай нащи тэ пушас: «Васо варикала сас кадя драго?» Важ кода кай и память, када подарко лэ Иеговастар. Но катэ ԥэнэнпэ: «На ԥэн: „Васо варикала сас май фэдэр, чем щяс?“» И алава «май фэдэр, чем сас» сыкавэн, кай если амэ сыстосарас и время, сави сас, и время, сави акана, и полас, кай щяс вся ашэля май хужэ, када нэправильно. Аврэ алавэнца, кала лас тэ сыстосарас и время, сави сас, и время, сави акана, кадя амэ можэм тэ попэрас андэ лэ Сатанастири ловушка.

6. Васо нащи вся и время тэ гиндос, кай варикала и жызня сас май лащи? Росԥэнэн пала израильтяноря.

⁶ Нащи вся и время тэ гиндосарас, кай варикала и жызня сас май лащи. Если амэ скучисарас пала кодэя время, сави сас, кадя амэ сгиндосарас кати пала лашимос, саво сас, и здэлпэ, кай вэрыто тоди нисо и на сас. Подам дума пала израильтяноря, савэ вижылэ анда Египто. Вонэ йто забистэрдэ кода, сави лэндэ ԥари жызня сас андо Египто. Вонэ сэрэнас кати, о лашо хамос и со пэнас. Вонэ ровэнас и ԥэнэнас: «Амэ сэрас, сар андо Египто евья хасас о мащё, краставицы, кавуноря, зэлэно пурум, обычно пурум и о чесноко!» (Числа 11:5). Но чаче вонэ ханас кадэва хамос евья? Канешно, най! Вонэ потинэнас фартэ кучутни цэмин. Вонэ сас раборя андо Египто и лэнца жэстоко обжанаспэ (Исход 1:13, 14; 3:6—9). И всаек вонэ забистэрдэ пала вся ԥаримос, саво лэндэ котэ сас и скучинас пала кодэя время. Ай сар о Иегова заботияспэ пала лэндэ, вонэ совсем на шонас сама. Важ када о Иегова пэр лэндэ фартэ холяйля (Числа 11:10).

7. Со поможысардя ла ԥьяти тэ на гиндой кати пала кодэя лащи время, сави латэ сас?

⁷ Со тэ терас, кай тэ на гиндосарас кати пала кодэя лащи время, сави сас? Акэ сости амэ можэм тэ сытювас еқа ԥьятар, сави служыяс андо бруклинско Вефилё андо 1945 бэрш. Через и время вой вижыля пала мануш, саво тожэ служыяс андо Вефилё. Вмести вонэ служынас бут бэрша. Но андо 1976 бэрш лако хулай фартэ занасвайля. Во полэлас, кай йто мэрэла и дя лати лашэ советоря, савэ поможысардэ лати тэ пэрэандярэл о ԥаримос. Во ԥэндя: «Вмести амэ самас бахталэ. Най всаворэ кадя драго полэн ек еқэс. Сэр пала када вся, но на жув кати кодэлэса, со сас. Прожала время, и тути авэла май вушэро. На холяв и на жалуисар пэс. Лошав кодэлэсти, кай тутэ сас кодэла бахталэ деса. [...] Кода, кай амэ можэм тэ сэрас, со сас, када подарко лэ Иеговастар». Савэ дэ лашэ алава ԥэндя о ԥрал!

8. Сар ла ԥьяти поможысардэ и алава, савэ ԥэндя лако хулай?

⁸ И ԥэй приашунделя каринг и алава, савэ ԥэндя лако хулай. Вой росԥэнэн: «Мэ служысаравас пианероса 63 года, и мэ моӷу тэ ԥэнав, кай прожудэм па чачимастэ бахтали жызня. Бахтали жызня кати тоди, кала ту андэ лэ Иеговастири арӷанизацыя машкар и ԥрала и ԥэя. Кала ту аштярэс и время, кай лэса тэ жувэс лэнца андо раё пэ ԥув. Ай кадяжэ кала авэла время, кала лэса вся и вечность тэ служыс амарэ Создателёсти, еқэ Дэвлэсти, лэ Иеговасти»e. Кадэя ԥэй прожудя 92 года, и жы каринг пэстири смэрть вой на парашэлас тэ служый лэ Иеговасти. Амэ сытювас латар, кай нащи тэ жувас кати кодэлэса, со сас варикала, ай трэбуй тэ диқас англэ!

КАЛА ХОЛЯРДЭ

9. Кала найвушэро тэ простис аврэ манушэс? (Левит 19:18).

⁹ Адиносар Левит 19:18f. Тэ простис кодэлэ манушэс, саво тут холярдя и обжыляпэ туса нэсправедливо, дэкала най вушэро, особенно, если кадэва мануш тиро друӷо или во тути родо или када варико анда собрания. Акэ со сас еқа ԥьяса. Ек ԥэй андэ собрания дошалярдя ла, кай вой чордя латар ловэ. Но потом вой поля, кай када сас най кадя и мангля, кай во тэ простий ла. Но ла ԥьяти, пэ сави када ԥэндэ, сас фартэ ԥарэс по ди, и вой нэ моӷла тэ вишол када анда шэро. Ай тутэ сас кацаво? Дажэ если тутэ на сас кацаво, ту можэт, ӷанэс, сар дуқал оди, кала тут варико холярдя. И можэт тути здэласпэ, кай никала на простиса кодэлэ манушэс, саво стердя, кай тути тэ авэл ԥарэс по ди.

10. Со поможыя, если амэ ритярас холи пэ варикастэ?

¹⁰ Со поможыя, если амэ ритярас холи пэ варикастэ? На бистрам, кай о Иегова диқэл вся. Во ӷанэн пала вся, со амэнца терэлпэ, кадяжэ пала кода, кай амэнца обжанпэ нэсправедливо (Евреям 4:13). Амаро небесно Дад полэл, кала амэнди ԥарэс (Исаия 63:9). Ай инке, во дэл алав, кай англэ стерэла кадя, кай будэр на дуқала оди кодэлэстар, кай амэнца обжанпэ нэсправедливо (Откровение 21:3, 4).

11. Саво лашимос амэнди кодэлэстар, кай амэ простисарас аврэн?

¹¹ Кала амэ парашас тэ холявас пэ варикастэ, амэнди жэ кадэлэстар и май фэдэр ашэл. Кадэя ԥэй, пэ сави хохадэ, кай вой чордя и ловэ, поля када. Прожыля время и вой простисардя кодэла ԥья. Лати поможысардя о гиндо анда Библия, кай если амэ простисарас аврэн, тоди и о Иегова простия амэн (Матфея 6:14). Вой полэлас, кай кода, сар андярдя пэс ласа кодэя ԥэй, сас нэправильно, но вой всаек парашэля тэ холявэл и простисардя ла. Со вижыля? Вой ашэля инке май лошали и на парашэля тэ служый лэ Иеговасти.

КАЛА ФАРТЭ ДОШАЛЯРАС ПЭС, КАЙ СТЕРДЯМ ВАРИСО НАЙ КАДЯ

12. Сости амэ сытювас анда алава, савэ запистромэ андэ 1 Иоанна 3:19, 20?

¹² Адиносар 1 Иоанна 3:19, 20g. Всаворэндэ амэндэ сас кацаво, кай оди дошалярэлас пала ошыбки, савэ стердямас варикала. Дэкас оди дошалярэл важ кода, кай вонэ терэнас найлащи дила жы каринг кода, сар тэ уӷанэн о чачимос анда Библия. Ай авэр ԥрала и ԥэя дошалярэн пэс, важ кода кай стердэ варисо най кадя ужэ посли кода, сар болделэ (Римлянам 3:23). Канешно, амэ камас тэ терас правильно. Но всаек вижал кадя, кай «всаворэ амэ бут со терас най кадя» (Иакова 3:2; Римлянам 7:21—23). И хоть амэнди най драго, кала оди дошалярэл, всаек андэ када исин и варисо лашо. Кала оди лэл тэ дошалярэл, тоди о мануш можэт тэ парудёлпэ и будэр тэ на терэл кадя (Евреям 12:12, 13).

13. Васо нащи тэ домэкэс, кай оди фартэ тэ дошалярэл амэн?

¹³ Дэкала можэт тэ авэл кадя, кай оди фартэ амэн дошалярэл. Оди на парашэл тэ дошалярэл лэ манушэс, хоть во ужэ и каисайля, и о Иегова лэс ужэ простисардя. Тоди када залэл бут зор лэ манушэстар (Псалом 31:10; 38:3, 4). Васо? Акэ со росԥэнэн ек ԥэй, савя дошалярэлас оди пала ӷрехоря, савэ вой стердясас варикала. Вой гиндояс, кай акана фартэ на трэбуй тэ пристол зор андэ служэния лэ Иеговасти, важ кода кай и дружба лэса вой ужэ на рия. Можэт бутэндэ андар мэндэ сас кацаво, сар латэ. Но нащи тэ домэкас, кай через када амэндэ тэ умэкэнпэ и вас. Кадэлэсти кати лошавэла о Сатана. Но о Иегова на камэл, кай амэ тэ умэкас и вас! (Диқэн 2 Коринфянам 2:5—7, 11.)

14. Сар тэ полас, кай о Иегова камэл амэн тэ простий?

¹⁴ Можэш тэ пушэс пэстар: «Сар мэ тэ полав, простисардя ман о Иегова чи най?» Если амэ када пушас, када сыкавэл, кай амэ камас тэ уӷодисарас лэ Иеговасти и камас, кай во амэнди тэ поможый. Андэ «Сторожэво башня» бут бэрш палпалэ сас пистромэ: «Амэ можэм най еқвар тэ умэкас и вас, важ кода кай варисави найлащи привычка, сави сас амэндэ варикала, можэт упалэ тэ авэл амэндэ. Если тутэ кадя, тоди на умэк и вас и на гиндосар, кай ту стердян кацаво бэзэх, саво никала на простияпэ. Када и аштярэл о Сатана. Кода, кай тут дошалярэл оди, ужэ сыкавэл, кай ту на зажылян фартэ дур. Никала на параш анда вся оди тэ мангэс лэ Иеговас тэ простий и тэ поможый, кай тиро ди будэр тэ на дошалярэл тут. Манг помощь лэ Иеговастар, сар о бэято мангэл помощь пэстирэ дадэстар. Нэ важно скати разоря ту терэс кодэя жэ ошыбка. О Иегова всаворэ одеса поможыя тути, важ кода кай во добро. И если ту каиспэ анда вся оди, во дэла тути вужи совесть»h.

15, 16. Со сас по ди кай и христианоря, савэ полинэ, кай о Иегова на отбанделя лэндар?

¹⁵ Бутэ лэ Иеговастирэ служытелёнэнди ашэл май вушэро, кала полэн, кай о Иегова на отбанделя лэндар. Ек ԥрал росԥэнэн, кай андэ тэрнэ бэрша во старыияспэ тэ на диқэл билажавардэ картинки, и лэстэ када вижалас. Но найдэлмут во упалэ диқля лэн. Во мангля помощь кай и старейшыноря и ашадя кадэя найлащи привычка. Вонэ ԥэндэ, кай о Дэл лэс любий, и кай во жалуий анда вся оди. Но всаек лэс дэкала дошалярэлас оди, и лэсти здэласпэ, кай о Иегова лэс на любияс.

¹⁶ Кадэлэ ԥралэсти фартэ чалеля ек статья, сави сас андэ рубрика «Библия парувэл и жызня». Андэ кадэя статья росԥэнэнаспэ пала ԥэй, савятэ сас кацави жызня, кай лати сас ԥарэс тэ патял, кай о Иегова ла любий. Дажэ тоди, кала вой болделя, кадэва гиндо и ԥэй нащи вишолас анда шэро бут бэрша. Но вой гиндояс пала лэ Иисусостири жэртва. И важ када вой патяя, кай о Иегова ла любийi. Сар кадэя статья поможысардя лэ ԥралэсти? Во поля, кай если во на патял, кай о Иегова лэс простия, тоди вижал, кай во на патял андэ лэ Иисусостири жэртва, сави можэт тэ улэл лэстирэ ӷрехоря. Во вишындя анда брашура кадэя статья, кай вся и время тэ авэл англа яқа. И кажно разо, кала лэстэ сас гиндоря, кай о Иегова лэс на любий, во адинояс кадэя статья и гиндояс пала кадэла алава.

17. Со поможысардя лэ Павлости, кай лэс фартэ тэ на дошалярэл оди?

¹⁷ О Апостоло Павло англа кода, сар тэ ашэл христианино, тожэ терэлас бут ӷрехоря. Во сэрэлас, со во терэлас варикала, но во на гиндояс пала када вся и время (1 Тимофею 1:12—15). О Павло ӷанэнас, кай лэ Иисусостири жэртва, када подарко, саво о Дэл подарисардя и лэсти (Галатам 2:20). Важ када во на домэкэлас, кай лэс фартэ тэ дошалярэл оди. Ай наоборот, во терэлас важ о Иегова вся, со па лэско зор.

ДИҚАМ АНГЛЭ!

18. Со амэ уӷанглям анда кадэя статья?

¹⁸ Анда кадэя статья амэ уӷанглям трин маменторя. Пэрво маменто, кай тэ сэрас пала лащи время, када драго и када подарко лэ Иеговастар. Но сар драго амэнди тэ на авелоп дэлмут, и жызня андо раё пэ ԥув пэ бутэстэ авэла май лащи. Дуйто маменто, када кала авэр мануша моӷут тэ холярэн амэн, но на трэбуй тэ ритярас пэр лэндэ холи. Кадя амэ сможэм тэ служысарас лэ Иеговасти анда вся оди. И трито маменто, кала фартэ дошалярэл оди, амэ можэм тэ хасарас и радость андэ служэния лэ Иеговасти. Важ када амэнди трэбуй, сар и лэ Павлости, тэ патяс, кай о Иегова простия амэн.

19. Васо амэ патяс, кай андо раё пэ ԥув на ласа тэ сгиндосарас пала кода, состар амэнди авелоп ԥарэс?

¹⁹ О Иегова дэл амэнди алав, кай англэ амэн аштярэл вечно жызня андо раё пэ ԥув, и кай амэ на ласа тэ сэрас пала кода, состар амэнди сас ԥарэс. Акэ сар пала када ԥэнэнпэ андэ Библия: «Кода, со сас, на лэна тэ сэрэн» (Исаия 65:17). Кати погиндон, кай дажэ и ԥурэ ԥрала и ԥэя, савэ служынас лэ Иеговасти вся и жызня, упалэ ашэна тэрнэ (Иов 33:25). Важ када на трэбуй тэ жувас лэ гиндонэнца пала время, сави сас. Ласа тэ гиндосарас пала кода, со авэла англэ и тэ терас вся, со па амаро зор, кай тэ жувас андо раё пэ ԥув!