Februaria

Cana o rege Ezechia sas-lo zurales nasfalo, vo manglea le Iehovas te sastiarel-les, hai o Iehova sastiardea-les. (2 Regi 20:1-6) Vi o apostolo Pavel manghlea le Iehovas te duriarel lestar „iech canro ando mas”. (2 Cor. 12:7-9) Tha, o Iehova ci duriardea lesco pharimos. Te gândisaras amen vi ca le apostoli Iacov hai Petru. O Rege Irod camlea te mudarel le duien. O Iacov sas-lo mudardo hai o Petru sas-lo hastrado ieche îngerostar. (Fap. 12:1-11) Cadea că, daisaras te pușas amen: „Sostar o Iehova hastradea le Petros, tha na vi le Iacovos?”. I Biblia ci phenel amenghe sostar. Tha jianas că o Iehova „ci cherel niciechdata so na-i orta”. (Deut. 32:4) So daisaras te sichioas anda cadal exemplea? Poiechdata, cana mangas amen le Iehovasche, daisaras te primisaras iech răspunso cai ci ajucărdeam amen. Cu sea cadala, pachias anda sea o ilo că o răspunso le Iehovasco ca amare manglimata va sicavela sea o timpo leschi iubirea hai ortomos. Cadea că, ci va avela te rovaras amen anda sar alosarel vo te del amen răspunso ca amare manglimata. (Iov 33:13) w23.11 21 ¶6

Tela inspirația, o Iacov phendea că le manușa goghiaver sile ‘gata te așunen’. Prin cadal dumes, vo sicadea că trebul te avas gata te așunas anda ilo le manușendar cai o Iehova dea-len autoritatea. Si ciaces, Vo ci camel te așunas codolendar cai camen te cheren amen te uștaras lesche norme. (Fap. 4:18-20) Tha castar si amenghe mai ușoro te așunas: le Iehovastar sau le manușendar? Daștil-pe că le Iehovastar, anda codoia că lesche îndrumări sile sea o timpo perfecto. (Ps. 19:7) Tha le manușa ci sile perfecto, anda codoia daștil te avel amenghe pharo te așunas lendar. Cu sea cadala, o Iehova, amaro Del, dea iech anumime autoritatea le daden hai le deian, le phuren hai vi codolen cai cheren partea andal guvernea. (Prov. 6:20; 1 Tes. 5:12; 1 Pet. 2:13, 14) Cana așunas lendar, o ciacimos si, că așunas le Iehovastar. w23.10 6 ¶2, 3

Daisaras te zuriaras amaro pachiamos cana gândisaras amen ca o zuralimos le Iehovasco. Les siles o zuralimos te pherel sea le promisiuni cai cărdea-len. Cu sea cadala, te na bâstras că vo silo O Mai Zuralo Del. (Iov 42:2; Mar. 10:27) Vo phendea caring o Avraam hai Sara că va avela-len iech șiavorro pe lengo phurimos. (Gen. 17:15-17) Mai but, vo phendea caring o Avraam că lesche șiave va moștenina o them Canaan. Ando timpo chichi le israeliți, le șiave le Avraamosche, sas-le ando Egipto sar sclavi, cadai promisiunea falas-pe că ci va pherela-pe niciechdata. Tha pherdilea-pe ciaces. Vo phendea că i Maria, cai sas șei bari, avelas te năștil lesche Șiaves, anda savo o Iehova cărdea i profeția că va avela mii bărșența mai anglal andi bar Eden. (Gen. 3:15) Cana beșas hai gândisaras amen ande amaro ilo ca sea le promisuni cai cărdea-len o Iehova hai sar pherdea vo cadala, hachiaras că les siles iech baro zuralimos. Cadea, amaro pachiamos andi promisiunea că va anela iech lumea nevi si vi mai zuralo. (Ios. 23:14; Is. 55:10, 11) w23.04 28 ¶10-12

O Iehova așundea le manglimata le Davidosche hai hastradea-les. (1 Sam. 19:10, 18-20; 2 Sam. 5:17-25) O Iehova phenel că va așunela vi amare manglimata. (Ps. 145:18) Tha, daștilas te na del amen o răspunso cai ajucărdeam-les ca amare manglimata. O apostolo Pavel manglea le Iehovas te duriarel lestar ‘iech canro ando mas’. Trin-var manglea-pe anda cado baro pharimos. Dea o Iehova răspunso ca lesche manglimata? Da, tha na cadea sar ajucărdea-pe o Pavel. Ando than te duriarel lesco pharimos, o Iehova dea-les o zuralimos cai sas-les nevoia caște slujil lesche mai dur pherdo pachiamos. (2 Cor. 12:7-10) Poiechdata, daștil-pe că vi amen primisaras iech răspunso ca amare manglimata cai nai-lo cadea sar ajucărdeam amen. Tha daisaras te pachias ciaces că o Iehova jianel so si ande amaro miștimos. Te na bâstras că vo „daștil te cherel but mai but sar mangas sau nachel prin amari goghi”. (Ef. 3:20) Cadea că, o răspunso ca amare manglimata daștil te avel cana ci ajucăras amen sau ande iech felo cai ci gândisardeam amen niciechdata. w23.05 8, 9 ¶4-6

Poiechdata, cherel amenghe mișto te gândisaras amen ca i promisiunea biblico anda o jiuvindimos. Sostar? Anda codoia că oricana daisaras te peras nasfale sau te hasaras varecas cuci ando merimos. (Ecl. 9:11; Iac. 4:13, 14) I speranța le jiuvindimaschi daștil te ajutil amen cana nachas prin cadal pharimata. (1 Tes. 4:13) Andai Biblia hachiaras că amaro Dad cerisco prinjianel-ame ciaces hai iubil amen anda sea o ilo. (Luca 12:7) Te gândisaras amen chichi de mișto prinjianel amen vo caște daștil te cherel amen pale, sa cadea sar samas mai anglal, sa codole buchianța cai încărdeam-len ande amari goghi. O Iehova iubil amen cadea de but, că del amen i ocazia te traisaras anda sea o timpo hai chiar cana meras, vo camel anda sea o ilo te anel amen parpale viațate. Sostar daisaras te pachias ando jiuvindimos? Anda codoia că jianas ciaces că codo cai cărdea-la camel hai siles vi o zuralimos te pherel-la. w23.04 8, 9 ¶2-4

O Iosif hai i Maria dine penghi zor ande iech than te încăren zuralo pengo amalimos le Iehovaia. Von hachiarde chichi de importanto si te anen închinarea le Iehovasche sar familia. (Luca 2:22-24; 4:16) Cu sea cadala, von dine sea penghi zor te cheren cadaia. Von sile iech exemplo anda le rroma hai le rromnia de aghies. Dacă si tumen șiave, daștil-pe că na-i tumenghe ușoro te jian ca le întruniri sau te arachen timpo anda i închinarea andi familia. Daștil te avel tumenghe vi mai pharo te lașiaren tumaro programo caște sichion andai Biblia numai tumen le dui sau te manghen tumen ande iech than. Tha, încăren ande tumari goghi că atunci cana anen închinarea le Iehovasche sar familia, tumen pașion mai but lestar tha vi iech averestar. Cadea că șion po iechto than i închinarea co Iehova! Dacă si tumen pharimata andi căsătoria, daștil-pe că ci țârdel tumen o ilo te cheren i închinarea andi familia ande iech than. Tha, daștin te alosaren te den duma anda vareso harno hai șucar. Cadea, va pașiona mai but iech averestar hai va camena te cheren buchia spiritualo ande iech than sar familia. w23.05 22 ¶7, 8

Sar ajutisardea i dar sfânto le Obadias? Cărdea-les te avel iech manuș pachivalo hai demno pachiamasco. Cadea că, o rege dea-les i buchi te lel sama pe lesco chăr. (Dich vi o verseto anda Neemia 7:2.) Sa cadea, i dar sfânto dea iech baro tromai le Obadias, buchi saveatar sas-les ciaces nevoia. Vo traisardea ando timpo cana railas o rege Ahab. (1 Regi 16:30) Mai but, i Izabela, i rromni le regeschi Ahab, anelas închinarea co Baal. Voi urâlas cadea de but le Iehovas, că dea sea peschi zor caște chosel i închinarea uji anda o regato de nord hai chiar mudardea but profeți le Devlesche. (1 Regi 18:4) Cana i Izabela astardea te phirel pala le profeți le Devlesche caște mudarel-len, o Obadia ‘garadea 100 anda le profeți, hulade câte 50 ande iech peștera, hai dea-len manro hai pai’. (1 Regi 18:13, 14) Dacă avileas astardo, o Obadia avileas te avel mudardo. Si ciaces, sar orisavo manuș, vo ci camelas te merel. Tha, o Obadia iubisardea le Iehovas hai codolen cai anenas închinarea Lesche mai but sar iubilas pes. w23.06 16 ¶9, 10

Vi aghies, cadea sar cărdea mai anglal, o Iehova îndrumil pesche manușen prin lesco Lil hai prin lesco Șiavo, o șăro la congregațiaco. Daisaras te dichas că o Iehova îndrumil vi mai dur pesche poporos prin manușa? Da. Iech buchi cai sicavel cadaia, si so întâmplosardea-pe co sfârșito le bărșengo 1800. O Charles Taze Russell hai lesche amala hachiarde că si iech phanglimos mașcar o bărș 1914 hai o Regato le Devlesco. (Dan. 4:25, 26) Von arăsle te pachian cadaia cana rodine te prinjianen mai mișto chichiva profeții andai Biblia. Sicadea lenghe o Iehova so sicaimata te roden? Daisaras te pachias ciaces că da. So întâmplosardea-pe pi phuv ando bărș 1914 sicadea claro că o Regato le Devlesco astardea te rail. Atunci astardea o Iechto Războio Mondialo, pala codoia avile nasfalimata cai lenas-pe, izdraimata phuveache hai bochalimata. (Luca 21:10, 11) Cadea că, dichiolas-pe claro că o Iehova îndrumilas pesche manușen prin codola creștini le ileia ujo. w24.02 22 ¶11

Sar manușa le Iehovasche, amen jianas că vo iubil amen hai că vo camel te avel amen i mai șucar viața. (Rom. 8:35-39) Sa cadea, amen jianas că cana las amen pala le sicaimata cai arachas-len andi Biblia si amen sea o timpo but miștimata. (Is. 48:17, 18) Tha, so daisaras te cheras cana nachas prin pharimata neajucărde? Sar exemplo, daștil-pe că iech jeno anda amari familia cherel vareso cai duchavel- amen. Daștil-pe că iech pharo nasfalimos ci mai mechel amen te cheras cadea de but anda o Iehova sar mai anglal. Daștil-pe că nachleam prin iech dezastro naturalo sau sam persecutime anda amaro pachiamos. Cana nachas prin cadal phare buchia, daisaras te pușias amen: „Sostar avilea cado pharimos pe mande? Cărdem vareso nasul? Sicavel cadaia că ci mai som cuci andel iacha le Iehovasche?”. Șiutean tuche vi tu pușimata sar cadala? Dacă da, na av perado. But slujitori le Iehovasche simțosarde-pe sa cadea. (Ps. 22:1, 2; Hab. 1:2, 3) w23.04 14 ¶1, 2

Cana sam zumade te cheras vareso nasul, amen duriaras amendar orisavo gândo sau buchi cai daștilas te rimosarel amaro amalimos le Devleia. O Iehova camel ‘te așunas lestar anda sea o ilo’. (Rom. 6:17) So phenel amenghe vo te cheras si sea o timpo ande amaro miștimos, hai lesche legi ci paruven-pe pala amende. (Is. 48:17, 18; 1 Cor. 6:9, 10) O Beng folosil-pe catar i violența hai camel te covliarel amaro ilo caște na mai așias zurale ando pachiamos. Vo rodel te ‘hal amen’, adică te rimosarel amaro amalimos le Iehovasa. (1 Pet. 5:8) Ando iechto secolo, le creștini sas-le darade, marde hai chiar mudarde anda codoia că ci camle te mechen pengo pachiamos. (Fap. 5:27, 28, 40; 7:54-60) O Satan folosil vi aghies i persecuția. Amen dichas sar cherel vo cadaia le phralența hai pheianța andai Rusia hai anda aver thema, cai codola cai așen contra le ciace creștini, phiraven-pe zurales nasul lența sau cheren phari lenghi viața ande aver moduri. O Satan avel contra amenghe na numai prin atacuri directo tha vi prin aver „athaimata”. (Ef. 6:11) w23.07 15, 16 ¶6-9

Ando timpo so sichios anda o Cuvânto le Devlesco, arăsăs te iubis le Iehovas sea mai but. Cadai iubirea cherel tut te cheres so sichios. Cadea că, hachiares sar daștis te alosares mai mișto so te cheres ande chi viața. Paruves chi goghi hai chio phiraimos, anda codoia că cames te aves cuci andel iacha le Iehovasche. Des chi zor te les tut pala chio Dad cerisco, cadea sar iech șiavorro lel-pe pala pesco dad. (Ef. 5:1, 2) Savore daisaras te pușias amen: „Iubiv acana mai but le Iehovas sar cana boldem man? Arăslem te lav man sea mai but pala o modo sar gândil hai sar phiravel-pe o Iehova, vi mai but cana sicavav iubirea mânre phralenghe hai pheianghe? Dacă „i iubirea cai sas tut mai anglal” șudrilea, na av perado. Vi le creștini anda o iechto secolo nachle prin cadaia. Cu sea cadala, o Isus ci duriardea-pe lendar. Daștis te pachias ciaces că vo ci va duriarela-pe nici tutar! (Rev. 2:4, 7) Vo jianel că daștis te bariares pale i iubirea cai sas tut mai anglal cana sichilean o ciacimos. w23.07 8 ¶2, 3

O apostolo Petru cărdea mai but greșeli. Mai anglal, vo sicadea că pachialas-pe prea but ande peste hai dea-pe baro că vo ci va mechela le Isusos, chiar cana le coaver apostoli avenas te mechen-les. (Mar. 14:27-29) Pala codoia, o Petru ci așundea le Isusostar cana vo phendea lesche mai butivar te așel uștiado. (Mar. 14:32, 37-41) Mai târzio, cana mai but manușa avile te len le Isusos caște phandaven-les, o Petru mechlea-les. (Mar. 14:50) Ji la urmă, vo phendea trin-var că ci prinjianel le Isusos hai chiar solahardea cadaia. (Mar. 14:66-71) So cărdea o Petru cana dea peschi sama so baro păcato cărdea? Vo astardea te șiorel cărche asfa hai i doș halea lesco ilo. (Mar. 14:72) Ando than te doșarel le Petros anda lesche greșeli, o Isus phendea pesche lașe amalesche că avelas te del-les bare buchia te cherel. (Ioan 21:15-17) O Petru jianelas că so cărdea sas iech baro păcato, tha vo ci mechlea-pe anda codoia că pachialas anda sea o ilo că o Isus ci mechlea-les. So sichioas ? O Iehova camel te pachias ciaces că vo iubil amen hai că silo gata te iertil amen. (Rom. 8:38, 39) w24.03 18, 19 ¶13-15

I imoralitatea sexualo daștil te anel lajiav, daștil te cherel ieche jenes te pachial că nai-lo lașio chancesche, daștil te cherel iecha jiuvlea te așel phari bi te camel hai daștil te îngărel iecha familia te rimosarel-pe. Cadea că, hachiarel-pe ciaces că si goghiaver te na jias andre ando ‘chăr’ la jiuvleaco cai nai-la goghi hai te șios tut ca lachi meseili. O phiraimos imoralo îngărel le manușen te hasaren pengo amalimos le Iehovasa, tha na numai cadichi. But manușa imorali astaren nasfalimata cai mudaren-len de tărne. (Prov. 7:23, 26) O verseto 18 anda o capitolo 9 anda o lil Proverbe phenel: „Le manușa cai aven late sile ande le mai garade thana le Mormântosche”. Atunci sostar așunen but jene pala laco acharimos athaitorii, cai îngărel numai co nasulimos? (Prov. 9:13-18) Iech athaimos zurales prinjiando si i pornografia. Codola cai peren ande cado athaimos pachian că na-i chanci nasul dacă dichen buchia pornografico, tha cadaia na-i ciaces. I pornografia cherel but nasul, rimosarel le manușen hai si zurales pharo te meches tut latar. Le imagini imoralo meliaren i goghi, așen code but timpo hai chosen-pe zurales phares. Mai but, i pornografia ci ‘mudarel’ le camnimata nasul, tha cherel-len te thabon vi mai zurales. (Col. 3:5; Iac. 1:14, 15) But jene cai dichen buchia pornografico arăsăn te cheren imoralitatea sexualo. w23.06 23 ¶10, 11

Chiar cana, aver națiuni maren-pe poiechdata le Zuralimasa Mondialo Anglo-Americano, von ci va daștina te len lesco than. Tha, catar jianas cadai buchi? I Biblia phenel, că le naia catar le pânre – o zuralimos anglo-americano – va avela nichiardo catar o Regato le Devlesco, reprezentime prin iech „bar”, hai na catar aver zuralimos. (Dan. 2:34, 35, 44, 45) Pachias că i profeția le Danieloschi anda le naia catar le pânre anda sastr hai andai phuv covli si demno pachiamaschi? Dacă da, cadaia va dichiola-pe anda sar alosares te trais chi viața. Ci va avela te des chi zor te cheres sea mai but love sau te chides barvalimata anda codoia că jianes că na pa but timpo cadai lumea nasul va nachela. (Luca 12:16-21; 1 Ioan 2:15-17) Sa cadea, va ajutila tut vi te hachiares chichi de importanto si te phenes hai te sicaves le manușenghe i vestea lași. (Mat. 6:33; 28:18-20) Pala so sichilean mai mișto cadai profeția, daștis te pușes tut: „Sicaven le buchia cai alosarav-len ande mânri viața că pachiav anda sea o ilo că o Regato le Devlesco va chosela sea le guvernea le manușenghe?”. w23.08 11 ¶13, 14

Pherdo umilința hachiar că ci mai daștis te cheres sa cadea de but sar mai anglal, anda codoia că phurilean, san nasfalo sau si tut iech situația mai phari. Le tut pala o Barzilai hai av gata te meches le buchia cai ci mai daștis te cheres-len, atunci cana o nasfalimos sau o phurimos așiaven tut. Cadea sar o Moise, mech ca le coaver te ajutin tut hai de-len te cheren chi buchi, cana si mișto cadaia. (Ex. 18:21, 22) Cana san umilo, ci va avela te ajucăres tutar prea but buchia cai chiniaren tut hai mechen tut bi zuralimasco. Ci trebul te simțosaras amen doșale anda le buchia nasul cai le coaver alosaren-len. Ci daisaras te alosaras ande averengo than hai nici na daisaras te ferisaras-len sea o timpo catar le buchia nasul cai țârden-len anda le alosarimata cai cheren-len. Sar exemplo, iech șiavo sau iech șei daștin te alosaren te mechen le Iehovas. Cadaia daștil te duchavel zurales but o ilo le dadengo. Cu sea cadala, le dada cai doșaren-pe anda o alosarimos nasul lenghe șiavesco len opral pende iech baro pharimos. Tha o Iehova ci camel ca von te phiraven cado pharimos. w23.08 29 ¶11, 12

Cadea sar amen vi o Samson sas-lo imperfecto, hai cărdea alosarimata nasul. Iech anda cadal alosarimata andea lesche bare pharimata. Pala so o Samson slujisardea iech timpo sar judecătoro, „iech jiuvli anda i valea Sorec, po anav Dalila pelea ca lesco ilo”. Mai anglal, o Samson sas-lo logodime iecha jiuvleasa filisteano, tha „cadai buchi sas-li catar o Iehova, că Vo rodelas te jial contra le filisteni”. (Jud. 14:1-4; 16:1-3) Pala iech timpo, o Samson, așilea chăre ca iech prostituata, anda o foro filisteano Gaza, ocazia ande savi o Iehova ajutisardea-les te încalavel le udara le forosche hai cadea te covliarel lengo zuralimos. (Jud. 14:1-4; 16:1-3) Mașcar vo hai i Dalila, sas aver vareso. Pala so fal-pe, i Dalila sas israelita, cadea că o Samson ci rodelas prin late te astarel le filistenen. I Dalila lea catar le filisteni but love caște athavel le Samsonos. w23.09 5 ¶12, 13

Iech buchi cai daștil te ajutil amen te avas blândo si o goghiaverimos. (Prov. 19:11) Iech manuș goghiaver încărel-pe parpale cana le coaver prasan lesco pachiamos. Lenghe dumes sau pușimata daștin te aven cadea sar iech baro pahos ando pai. Tu diches numai iech țâno cotor anda leste, tha ci jianes chichi de baro silo tela o pai. Sa cadea, ci jianas so daștil te avel garado pala iech pușimos. Anda codoia, angla te des iech răspunso, gândisar tut so cărdea codole manușes te șiol tuche codo pușimos. (Prov. 16:23) Te dichas so cărdea o Ghedeon cana le murșa anda Efraim astarde-pe holiatar. Von pușle-les sostar ci achardea-len te maren-pe de mai anglal contra le dușmani le Israelosche. So sas garado tela lenghi holi? Pachiaie von că sas-le dine de iech rig? Orisar așile le buchia, o Ghedeon sicadea goghiaverimos, dea peschi zor te hachiarel so sas ande lengo ilo hai dea-len iech răspunso blândo. Cadea, le murșa „ci mai sas-le holiarde”. (Jud. 8:1-3) w23.09 16 ¶8, 9

Le Iehovas hai le Isusos silen o mai zuralo phanglimos cai daștil te avel mașcar iech dad hai lesco șiavo. O ilo le Iehovasco sas-lo phagărdo duchatar cana le manușa phirade-pe nasul lesche Șiavesa hai cana sas-lo mudardo ande bare ducha. Orisavo dad sau dei cai hasardea ando merimos pesche șiavorres jianel mișto so bari duch anel cadaia. Si amen iech pachiamos zuralo ando jiuvindimos, tha cadaia ci chosel i duch anda amaro ilo cana varecon drago amenghe merel. Cado exemplo ajutil amen te hachiaras so simțosardea o Iehova cana dichlea pesche cuci Șiaves sar merel, ando ghies de 14 Nisan 33 a.e. (Mat. 3:17). Ji ca i Comemorarea, avelas mișto te cheres tuche timpo te sichios mai but buchia andai răspumpărarea corcoro sau ca i închinarea andi familia. Sa cadea, na bâstăr te diches i închinarea de teharin anda o ghies cana si i Comemorarea. Sea cadal buchia va ajutina tut te pregătis chio ilo hai te ajutis vi averen te țârden miștimata andai Comemorarea. (Ezra 7:10) w24.01 11 ¶10-12

Iech modo prin savo daisaras te primisaras zuralimos le Iehovastar si te pâtras amaro ilo angla leste ando manglimos. Pala so mangas amen, o Iehova daștil te del amen „i zor cai nachel orisavi buchi”. (2 Cor. 4:7) Sa cadea, daisaras te avas zuriarde vi cana citisaras lesco Lil hai sichioas anda leste. (Ps. 86:11) Sostar? Anda codoia că o mesajo le Iehovasco cai arachel-pe ande lesco Lil silo „zuralo”. (Evr. 4:12) Cadea că, cana mangas amen le Iehovasche hai citisaras lesco Lil, va avela te primisaras o zuralimos cai trebul amenghe, caște na mechas amen, caște așias bucurime sau caște cheras iech buchi cai si mai phari. Mai dur, va avela te dichas sar zuriardea o Iehova le profetos Iona. O Iehova dea le Ionas te cherel iech phari buchi. Tha, astardo daratar vo nașlea, gălea opre pe iech barca hai tiliardea caring iech aver than. Cadea că, vo hai codola pa i barca sas-le pașă te meren ande iech baro brâșând. Cana cadala șiudine-les ando pai, vo arăslea ando păr ieche bare mașesco. So cărdea o Iona caște așel zuralo cana sas-lo corcoro ando păr ieche bare mașesco? Mai anglal, vo manglea-pe. (Iona 2:1, 2, 7) w23.10 13 ¶4-6

Chiar cana o apostolo Petru scriisardea cadal lila andal creștini anda o iechto secolo, o Iehova șiutea-len ande pesco Cuvânto. Cadea vi amen daisaras te țârdas miștimata anda le sfaturi cai si ande lende. (Rom. 15:4) But manușa de aghies ci pachian andel profeții andai Biblia. Codola cai așen amenghe contra asan amendar anda codoia că ajucăras de but bărșa o sfârșito, hai cado ci avilea încă. Si manușa cai phenen că ci va avela niciechdata. (2 Pet. 3:3, 4) Cana așunas cadal buchia catar iech manuș casa das duma andi predicarea, catar iech colego catar i buchi sau catar iech jeno anda amari familia, amaro pachiamos daștil te avel zumado. So daștil te ajutil amen? Le sfaturi cai dea-len o Petru le creștinenghe anda o iechto secolo. Chichiva manușa daștinas te pachian că o Del ci sighiarel te anel o sfârșito cadale sistemosco nasul. Tha le dumes le Petrosche ajutin amen te dichas le buchia avere iachența. Vo anel amenghe andi goghi că o Iehova dichel o timpo diferime sar le manușa. (2 Pet. 3:8, 9) Anda o Iehova, iech mia bărșa si sar iech ghies. Mai but, vo ajucărel pherdo răbdarea anda codoia că ci camel ca niciech manuș te avel distrugime. Cu sea cadala, cana va arăsăla o timpo alosardo lestar, cado sistemo va avela choslo. w23.09 26, 27 ¶2-5

Sostar scriisardea o apostolo Pavel pesco lil caring le creștini evrei anda Iudeea. Daștil-pe că sas-les dui bare motivea. Ando iechto than vo camlea te zuriarel-len. Le mai but jene mașcar lende sas-le bariarde andi religia iudaico. Daștil-pe că, pala so cărdile creștini, le conducători religioși iudei asanas lendar. Sostar? Anda codoia că le creștinen ci sas-len iech baro templo cai te anen închinarea, ci sas-len iech altarii pe savo te anen jertfe le Devlesche hai nici rașaia cai te slujin ande lengo miștimos. Cadai buchi daisardeas te peravel-len sau te cheren-len te na mai aven cadea de zurale ando pachiamos. (Evr. 3:12, 14) Chichiva mașcar lende daisardeas te gândin-pe chiar te risaren-pe ca i religia iudaico. Ando duito than, o Pavel phendea caring le creștini evrei că ci denas penghi zor caște hachiaren o „haben zuralo” anda o Lil le Devlesco, adică le ciacimata spiritualo profundo sau le sicaimata neve. (Evr. 5:11-14) Pala so fal-pe, chichiva anda lende încărenas încă i Legea mozaico. w23.10 24, 25 ¶3, 4

Chichiva pheia alosaren te na jian rromeste. (Mat. 19:10-12) Cu sea cadala, indiferento savi si chi situația, daștis te pachias ciaces că o Iehova hai o Isus ci dichel mai tele le pheian cai nai-le căsătorime. Pe sea i phuv, von sile iech ciaci binecuvântarea anda le congregații. Anda codoia că sicaven iubirea hai interesin-pe ciaces le coaverendar, von cărdion pheia hai deia spiritualo anda butende. (Mar. 10:29, 30) But pheia alosaren te cheren mai but andi buchi le Devleschi. I mai bari buchi andi predicarea cheren-la le pheia. (Ps. 68:11) Daștis te șios tuche vi tu andi goghi te astares o servicio cu timp integral? Daștis te slujis sar pioniera, ca le construcții sau co Betelo. Mang tut anda so cames te cheres. De duma avere phralența cai deja cheren cadaia hai dich so mai trebul te cheres caște daștis te astares cado servicio. Pala codoia, cher tuche iech plano cai te avel lașio anda tute. O servicio cu timp integral, daștil te pâtrel tuche o drom caring iech șucar viața andi buchi le Iehovaschi. w23.12 22 ¶16, 17

Ando timpo so o baro necazo pașiol sea mai but, amen jianas chichi de importanto si te predichisaras le manușenghe. (Mar. 13:10) Tha, daștil-pe că ci si amenghe ușoro te cheras cadaia, vi mai but cana si amen pharimata le lovența sau varecon așel amenghe contra. So daștil te ajutil amen te șioas po iechto than ande amari viața i voința le Iehovaschi? Te pachias anda sea o ilo că „o Iehova le armatengo” silo amența. O Iehova va ajutil amen dacă șioas vi mai dur leschi voința mai opral le buchiandar cai camas-len amen. Cadea că, na-i amen sostar te daras. (Hag. 2:4) O Iehova camel te das sea amari zor te predichisaras le manușenghe, te cheras discipoli hai cadea te salvisaras lenghi viața. O Hagai zuriardea le manușen le Iehovasche te neviaren pengo zuralimos andi buchi le Devleschi, sar cana avenas te șion pale i fundația le temploschi. O Iehova phendea lenghe că dacă cherenas cadaia, va ‘dela-len but miștimata’. (Hag. 2:18, 19) Dacă das amari zor te cheras i buchi le Iehovaschi, daisaras te pachias ciaces că vo va dela vi amen but miștimata! w23.11 16 ¶8; 17 ¶11

Ande pesco lil caring le romani, o apostolo Pavel phendea că sea le manușa sile păcătoși. Cadea că, sar daștil o Del te arachel amen orta sau bidoșaco hai sar daisaras te arăsas cuci ande lesche iacha? Caște ajutil sea le creștinen le ilesa ujo te arachen răspunso cadale pușimaste, o Pavel dea duma anda o exemplo le Avraamosco. O Iehova phendea anda o Avraam că sas iech manuș orta cana cado beșelas ando them Canaan. Sostar daisardea o Iehova te phenel cadaia? Încărelas o Avraam ande iech modo perfecto i Legea mozaico? Nici. (Rom. 4:13) I Legea mozaico sas dini caring i națiunea Israel pala so o Del phendea anda o Avraam că sas iech manuș orta, pala mai but sar 400 bărșa. Cadea că, ande pesco baro lașimos, o Iehova phendea că o Avraam sas iech manuș orta anda codoia că sas-les iech pachiamos zuralo. (Rom. 4:2-4) w23.12 3 ¶4, 5

Na pala but timpo, o profeto Natan gălea parpale co David, tha na caște anel lesche iech vestea lași. „Chiar ande codoi riat”, o Iehova phendea caring o Natan că na o David avelas te vazdel o templo. (1 Cron. 17:3, 4, 11, 12) So cărdea o David cana așundea cado mesajo? Vo astardea te chidel love hai materialea cai o Solomon avelas te folosil-len anda o vazdimos le templosco. (1 Cron. 29:1-5) Ca țâra timpo pala so phendea le Davidosche că na vo avelas te vazdel o templo, o Iehova phandadea iech solaharimos lesa. O Del phendea lesche că iech anda lesche urmași va raila anda sea o timpo. (2 Sam. 7:16) Te gândisaras amen so but va bariola bucuriatar o ilo le Davidosco ando timpo le Raimasco de Iech Mia Bărș, cana va așunela că o Isus, cai si o Rege, țârdel-pe anda leschi familia! So sichioas anda cadai relatarea? Vi cana ci daisaras te cheras sea so camas ando servicio le Iehovasco, amaro Del daștil te del amen miștimata cai nici na nachle prin amari goghi. w23.04 16 ¶8-10

Va dicheia că si cotora andai Biblia cai va sastiarena chio ilo cana san astardo daratar. Sar exemplo, daștis te aves zuriardo cana citis anda le lila biblico Iov, Psalmi sau Proverbe, hai vi le dumes le Isusosche anda Matei, o capitolo 6. Cadea că, cana manghes tut hai citis anda o Lil le Devlesco va dicheia o vast le Iehovasco cai ajutil tut te araches mângâierea. Daisaras te pachias anda sea o ilo că o Iehova va avela pașa amende cana ande amari viața aven bare pharimata. Ci sam niciechdata corcore! (Ps. 23:4) O Iehova promitil că va ferila amen, va zuriarela amen caște na peras, va avela pașa amende hai va sastiarela i duch anda amaro ilo. Ande Isaia 26:3 phenel-pe anda o Iehova: „Tu va avela te feris codolen cai mechen-pe cu sea ande chio vast; va avela te des-len iech pacea cai încărel, anda codoia că șion pengo pachiamos ande tute”. Cadea că, te pachias amen ando Iehova hai te mechas-les te ajutil amen. Cana cheras cadea, va avela te astaras pale zuralimos, chiar vi cana nachas prin bare pharimata! w24.01 25 ¶16, 17

Cadal dumes cai aven le Devlestar pheren-pe aghies tela amare iacha. Mai but, amen dichas vi sar pheren-pe le dumes cai aven: „Sea che șiave va avena sicade le Iehovastar hai bari va avela i pacea che șiavenghi. Va aveia zuriardi ando ortomos. . . . Ci va avela te daras chancestar hai ci va avela sostar te izdras, anda codoia că cadaia ci va pașiola tutar”. (Is. 54:13, 14) Nici măcar o Satan, „o Del cadale sistemosco”, ci daștil hai nai-les zuralimos te așiavel i buchi cai cheren-la le manușa le Iehovasche prin savi sicaven averen anda o Del! (2 Cor. 4:4) I închinarea uji sili andini parpale. Chanci hai chonic ci va mai daștila niciechdata te meliarel-la. Orisavi arma vazdini contra amenghe va așela bi zuralimasco! w24.02 4 ¶10

Aghies, anda amende si zurales importanto o solaharimos cai cheras-les cana das amari viața le Iehovasche. Amen încăras amaro solaharimos chiar cana amari familia daștil te holiarel-pe. Si ciaces, amen las sama mișto pe amari familia, cadea sar phenel vi i Biblia, tha ci camas te uștaras le legi le Iehovasche cana von ajucăren amendar iech buchi. (Mat. 10:35, 36; 1 Tim. 5:8) Cadea că, trebul te hachiaras că, poiechdata, va avela te hasaras i pacea andi familia anda codoia că cheras so si mișto andel iacha le Iehovasche. Vo dea amen i familia hai camel te avas fericime ande late. (Ef. 3:14, 15) Tha, dacă camas te avas ciaces fericime, trebul te cheras so camel o Iehova ande amari viața. O Iehova dichel cuci i phari buchi cai cheras-la caște slujisaras lesche ando timpo so las sama pe le jene anda amari familia hai phiravas amen lența pherde iubirea hai pachiv. (Rom. 12:10) w24.02 18 ¶11, 13