Mai

Ando iechto secolo, cana iech baro bochalimos avilea „opral sea i phuv” le creștini nachle prin bare pharimata. Le șăre la familiache pușle-pe daraimasa sar avenas te arachen haben anda penghe familii. Daștil-pe că chichiva tărne șiute ande penghi goghi te cheren mai but andi predicarea. Gândisarde-pe von te mechen cado plano pe mai târzio? Chiar cana nachle prin cado pharimos, sichile te train vi ande cadai situația. Von phende mai dur i vestea lași pherde zelo, cadea sar daisarde. Sa cadea, von sas-le bucurime te den anda penghe buchia le phralenghe anda Iudeea. (Fap. 11:29, 30) Codola cai primisarde buchia materialo dichle sar o Iehova dea pesco vast caște ajutil-len. (Mat. 6:31-33) Cadaia cărdea-len te pașion penghe phralendar cai sicade lenghe lașimos hai avile ande lengo ajutorii. Hai codola cai cărde donații sau cărde buchi caște ajutin ande vroiech felo le phralen, simțosarde i bari bucuria cai avel anda o fapto te des. (Fap. 20:35) w23.04 16 ¶12, 13

Poiechdata, caște del răspunso ca amare manglimata, o Iehova cherel chichiva manușen cai ci slujin lesche te aven ande amaro ajutorii. Sar exemplo, vo cărdea ca o rege Artaxerxes te mechel ca o Neemia te jial parpale ando Ierusalimo caște ajutil te vazdel-pe pale o foro. (Neem. 2:3-6) Vi aghies o Iehova daștil te cherel codolen cai ci slujin lesche te ajutin amen. O mai butivar, ci primisaras răspunso ca amare manglimata ande iech modo nemaidichlo. Tha daisaras te pachias ciaces că o răspunso cai si amenghe dino si exacto so si amen nevoia caște așias loialo amare Dadesche andal ceruri. Cadea că, trebul te avas atento caște rodas te dichas le răspunsuri le Iehovasche ca amare manglimata. Cadea că, aș po than poiechdata hai te gândisar-tut sar del-tut răspunso o Iehova ca chire manglimata. (Ps. 66:19, 20) Trebul te sicavas pachiamos na numai cana mangas amen le Iehovasche, tha vi cana hachiaras lesco răspunso ca amare manglimata, indiferento savo avelas cado. (Evr. 11:6) w23.05 12 ¶13, 15; 13 ¶16

Cana deam amari viața le Iehovasche, solahardeam că va avela te anas lesche închinarea hai că va avela te cheras so phenel amenghe vo. Amen trebul te încăras cado solaharimos. Cado na-i iech pharimos anda amende. Sostar? Anda codoia că cadea samas cărde le Iehovastar, caște anas lesche închinarea. (Rev. 4:11) Vo cărdea amen pala lesco chipo hai șiutea ande amaro ilo o camnimos te prinjianas-les. Cadea că, daștil te avel amen iech amalimos chidino lesa hai te arachas bucuria ando timpo so cheras leschi voința. Si ciaces, cana cheras cadea hai las amen pala o exemplo lesche Șiavesco, sam zuriarde. (Mat. 11:28-30)Cadea că, bariar mai dur chi iubirea anda o Iehova cana gândis tut ca sea le lașe buchia cai cărdea-len vo anda tute hai ca sea le miștimata cai ajucăren tut. Cana chi iubirea anda o Del va bariola sea mai but, va avela tuche mai ușoro te așunes lestar. (1 Ioan 5:3) O Isus daisardea te cherel so phendea lesche o Del anda codoia că manglea lesco ajutorii hai încărdea ande peschi goghi o pochinimos anda i viața veșnico. w23.08 27, 28 ¶4, 5

Savoren ciaiol amen cana le coaver sicaven răbdarea. Sar exemplo, dichas lașe iachența codolen cai jianen te ajucăren bi te rovaren-pe. Sam recunoscători codolenghe cai sicaven amenghe răbdarea cana greșisaras. Sa cadea, nais le jenesche cai sicadea amen o ciacimos andai Biblia anda codoia că sas-les răbdarea amența ji cana sichileam, hachiardeam hai astardeam te las amen pala iech sicaimos biblico. Mai opral sar oriso, nais anda sea o ilo le Iehovasche anda codoia că siles răbdarea amența. Chiar cana dichas cuci i răbdarea cai sicaven-la le coaver, daștil-pe că ci si amenghe sea o timpo ușoro te avas răbdători. Sar exemplo, daștil te avel amenghe pharo te așias liniștime cana po drom si but mașini hai ci daisaras te jias angle, vi mai but cana sighiaras. Sau cana le coaver holiaren amen daisaras sigo te astaras amen holiatar. Hai, poiechdata, daștil te avel amenghe pharo te ajucăras i lumea nevi cai promitisardea-la o Iehova. Cu sea cadala, ande cadal momentea, trebul te sicavas răbdarea. w23.08 20 ¶1, 2

O Iehova phendea caring o Ghedeon te bișalel chăre cam sea pesche manușen. Vo daisardeas te pușel-pe: „Chiar trebul te avel cărdo cado paruimos? Va avela mișto?”. Orisar așile le buchia, o Ghedeon așundea catar so phendea lesche o Del. Aghies le phure daștin te len-pe pala o Ghedeon, cana așunen hai len-pe pala le paruimata cai cherel-len i organizația le Iehovaschi. (Evr. 13:17) O Ghedeon așundea catar o Iehova, chiar cana darailea hai i buchi cai sas lesche dini sas periculoso. (Jud. 9:17) Pala so o Iehova phendea că va avela pașa leste, vo pachiaia anda sea o ilo că o Del avelas te ajutil-les caște feril o poporo. Le phure cai beșen andel thana cai i predicarea sili așiadi len-pe pala o Ghedeon. Pherde tromai von den penghi zor caște aven încărde le întruniri hai te avel cărdi i predicarea. Von cheren cadaia chiar cana daștinas te aven phandade, te aven îngărde ca le autorități cai te șion lenghe pușimata, te hasaren penghi buchi sau chiar te aven marde. Cana va avela o baro necazo, le phure va trebuna te sicaven tromai, caște len-pe pala le îndrumări cai sas lenghe dine, chiar cana va avela periculoso te cheren cadaia. w23.06 5, 6 ¶12, 13

O Iehova lea sama ca sea le lașe buchia cai cărdea-len o baro rașai Iehoiada te aven scriime ande lesco Cuvânto hai cadea amen te sichioas lestar. (Rom. 15:4) Hai cana o Iehoiada mulea, sas lesche dini i bari pachiv te avel prahome „ando foro le Davidosco, pașa le regi, anda codoia că cărdea but lașe buchia ando Israelo, anda o ciacio Del hai anda Lesco chăr”. (2 Cron. 24:15, 16) I relatarea anda o Iehoiada daștil te ajutil savoren anda amende te bariaras iech dar lași caring o Del. Le phure sichion lestar te așen uștiade hai te ferin le bacrean le Devlesche. (Fap. 20:28) Codola mai phure daștin te sichion catar o Iehoiada că, dacă daran le Iehovastar hai așen lesche loialo, vo daștil te folosil-len caște pherel pesco scopo. Anda o modo sar phiradea-pe o Iehova caring o Iehoiada, le tărne sichion te den pachiv le phralenghe mai phure, vi mai but codolenghe cai slujin de but timpo le Iehovasche. (Prov. 16:31) Savore trebul te așias pașa codola cai sile șiute angla amende hai te așunas lendar. (Evr. 13:17) w23.06 17 ¶14, 15

Ca le întruniri, te avas goghiaver cana alosaras chichi-var vazdas o vast caște das răspunsuri. Dacă cheras cadaia prea butivar, o phral cai încărel i tema daștilas te simțol-pe oblighime te șiol amen mai butivar, chiar cana aver phrala ci daisarde încă te den iech răspunso. Cadaia daștilas te peravel le coaveren hai te cherel-len te na mai vazden o vast. (Ecl. 3:7) Cana mai but phrala vazden o vast caște den răspunsuri, daștil-pe că ci va avela te avas șiute te das răspunso de fiesavi data cana camas. Poiechdata, o phral cai încărel i tema ci va daștila te șiol amen nici măcar iechdata. Chiar cana cadaia daștilas te peravel amen, te na pachias că le phrales siles vareso amența. (Ecl. 7:9) Dacă ci arăsas te das răspunsuri cadea de but sar camas amen, te așunas atento le răspunsuri cai den-len le coaver, hai pala i întrunirea, te așaras-len. Amare șucar dumes phende anda sea o ilo daștin te zuriaren amare phralen hai pheian sa cadea de but sar le răspunsuri cai daisardeamas te das-len. w23.04 23, 24 ¶14-16

Si zurales importanto te sichioas anda o Cuvânto le Devlesco hai te gândisaras amen ca so sichileam. Iech cașt daștil te așel zuralo dacă siles rădăcini mișto șiute andi phuv. Sa cadea, vi amen daisaras te așias zurale ando pachiamos dacă zuriaras-les prin o Cuvânto le Devlesco. Ando timpo so o cașt bariol, vi lesche rădăcini zuriaren-pe hai zinghiaren-pe sea mai but. Cana sichioas corcore andai Biblia hai gândisaras amen ca so sichileam, amaro pachiamos ando Iehova zuriarel-pe hai hachiaras că leschi îndrumarea si i mai lași. (Col. 2:6, 7) Te gândisaras amen chichi de but ajutisarde o sicaimos, le sfaturi hai i grija le Iehovaschi lesche slujitoren andal puraimata. Sar exemplo, o Ezechiel dichelas atento sar iech îngero măsurilas ande le mai țâne buchia o templo andai viziunea. So dichlea angla peste zuriardea le Ezechielos, hai amen ajutil amen te hachiaras sar daisaras te încăras le norme le Iehovasche andai închinarea uji. (Ezec. 40:1-4; 43:10-12) Vi amen si amen but miștimata cana sichioas le buchia mai phare hachiarimasco anda o Cuvânto le Devlesco hai cana gândisaras amen lende. Cadea, daștil te avel amen iech ilo zuralo hai te pachias amen cu sea ando Iehova. (Ps. 112:7) w23.07 18 ¶15, 16

Andi Biblia, si but exemplea pala save daștis te les tut. But manușa le Iehovasche andal puraimata iubisarde-les anda sea o ilo hai line sama pe lesco poporo. Tha, daștis te araches exemplea lașe vi ande chi familia sau congregația. (Evr. 13:7) Mai but, o Isus si o mai lașio exemplo. (1 Pet. 2:21) Daștis te sichios atento anda cadal exemplea hai catar le calități cai sicade-len von. (Evr. 12:1, 2) Pala codoia, gândisar tut sar daștis te les tut pala lende. Iech manuș cai sichilea sar te folosil pesco goghiaverimos, gândil-pe mai anglal te cherel vareso. Gândisar tut ca so phenel tuche o Iehova prin i Biblia hai so miștimata va avena-tut dacă așunes lestar. Pala codoia, de chi zor te folosis cadal sicaimata caște alosares goghiaver so te cheres. (Psalmo 119:9) Cadea, va avela te barios spiritualo. (Prov. 2:11, 12; Evr. 5:14) w23.12 24, 25 ¶4, 5

O dad hai i dei daștin te sicaven penghe șiaven sar te den duma blândo cana si lenghe șiute pușimata anda pengo pachiamos. (Iac. 3:13) Ca i închinarea andi familia, iech dad hai iech dei dichen ande iech than so daștin te cheren. Von gândin-pe ca chichiva pușimata save daștin te aven șiute le șiavenghe ca i școala, hai pala codoia dichen sar te den răspunso. Cadea, von sicaven penghe șiaven te den duma pherde blândețea hai lașimos. Le sesiuni practico daștin te zuriaren o pachiamos codolengo tărne hai te ajutin vi averen te hachiaren sostar daștin te pachian cadaia. Le serii „Le tărne pușen-pe” hai „Lilorre andal activități”, pa o jw.org, sile cărde caște ajutin le tărnen te bariaren pengo pachiamos hai te daștin te jianen so te phenen prin penghe dumes le coaverenghe. Dacă sichioas anda cadal serii ande iech than sar familia, savore daisaras te hachiaras mai mișto sar te ferisaras amaro pachiamos ande iech modo blândo hai cai te ajutil vi le coaveren. w23.09 17 ¶10; 18 ¶15, 16

Șiutean tuche andi goghi te aves iech creștino mai lașio sau te lașiares iech buchi prin savi anes închinarea le Iehovasche, sar avelas i citirea la Bibliachi, o sicaimos cai cheres-les corcoro sau i predicarea, tha ci daisardean te arăsăs te cheres cadaia? Dacă da, ci san o corcoro. Sar exemplo, o Philip camlea te lașiarel pesche manglimata hai te manghel-pe ande fiesavo ghies, tha sas lesche pharo te arachel timpo te cherel cadaia. I Erika șiutea ande peschi goghi te arăsăl ca le întruniri anda i predicarea angla te astaren, tha butivar avelas pala so astarenas le întruniri. Dacă cames te cheres iech buchi anda o Iehova hai ci daisardean te cheres-la ji acana, na av perado. Vi anda iech țâni buchi trebul te araches tuche timpo hai te cheres sea so daștis anda late. Cana des chi zor te cheres so șiutean ande chi goghi, sicaves că chio amalimos le Iehovasa silo zurales cuci anda tute hai cames te des-les sea so si tut mai lașio. O Iehova dichel lașe iachența că des sea chi zor. Mai but, vo ci ajucărel tutar mai but sar daștis te cheres. (Ps. 103:14; Mica 6:8) Cadea că, cana șios ande chi goghi te cheres mai but anda o Iehova, alosar iech buchi cai daștis te arăsăs te cheres-la. w23.05 26 ¶1, 2

Vi le tromane manușa daștin te daran, tha cadai buchi ci așiaven-len te cheren so si orta. O Daniel sas iech tărno zurales tromano. Vo sichilea atento le profeții cai avile le Devlestar, mașcar save sas vi le profeții scriime catar o Ieremia. Anda cadala vo hachiardea că pala țâra timpo le evrei avenas te aven dine drom anda o Babilono. (Dan. 9:2) Cana dichlea sar pherdile-pe cadal profeții, o pachiamos le Danielosco ando Del zuriardea-pe. Cadea că, cado zuralo pachiamos cai sas-les ando Iehova cărdea-les te sicavel iech baro tromai. (Dich vi Romani 8:32, 37-39.) I mai importanto buchi cai cărdea-la o Daniel sas te del duma butivar ando manglimos pesche Dadesa anda o cerii. (Dan. 6:10) Vo phendea pesche păcatea hai pâtărdea pesco ilo angla o Iehova. Mai but, o Daniel manglea ajutorii. (Dan. 9:4, 5, 19) Cadea sar fiesavo anda amende, o Daniel ci năștisailo tromano. Vo sicadea tromai anda codoia că sichilea andal Scripturi, manglea-pe le Iehovasche hai pachiaia-pe ande leste. w23.08 3 ¶4; 4 ¶7

Cana așunas catar le autorități mai bare, țârdas miștimata vi amen, tha vi le coaver. Sar exemplo, ci sam pedepsime sar codola cai uștaren i legea. (Rom. 13:1, 4) Mai but, cana sicavas că așunas catar le autorități cadala va dichena că le Martori le Iehovasche sile manușa lașe. Bute bărșența mai anglal, le soldați găle andre ande iech sala le Regatoschi andai Nigeria ando timpo so încărelas-pe i întrunirea, caște roden codolen cai vazdine-pe contra o guverno hai cherenas protestea ca le manușa te na pochinen penghe taxe. O ofițero cai sas angla codola soldați dea ordino te tiliaren hai phendea lenghe: „Le Martori le Iehovasche pochinen sea o timpo penghe taxe hai ci cheren protestea”. De fiesavi data cana așunas catar i legea, daisaras te încăras ujo o anav amara organizațiaco, hai cado lașio anav daștilas ande iech ghies te feril amare phralen hai pheian. w23.10 9 ¶13

Chichiva slujitori le Iehovasche ajucăren de but timpo te nachel cadai lumea nasul. Andel iacha le manușenghe, daștilas te fal-pe că o Del ci sighiarel te pherel peschi promisiunea. O Iehova hachiarel că le manușa daștinas te pachian cadai buchi. Anda codoia, vo phendea caring o Habacuc: „I viziunea ajucărel încă pesco timpo alosardo. Jial angle sigo te pherdiol-pe hai ci va hohavela. Chiar cana falas-pe că ci avel, ajucăr-la vi mai dur, anda codoia că va pherdiola-pe ciaces. Ci va arăsăla târzio!”. (Hab. 2:3) Camlea o Iehova te zuriarel numai le Habacucos prin cadal dumes? Sau zuriaren cadala vi amen? Tela inspirația le Devlestar, o apostolo Pavel phendea că cadal dumes sile lașe vi anda le creștini, cai abia ajucăren te avel i lumea nevi. (Evr. 10:37) Daisaras te pachias ciaces că, chiar cana fal-pe că i promisiunea le Iehovaschi te hastravel amen ci avel cadea de sigo, cadaia „va pherela-pe ciaces. Ci va arăsăla târzio!”. w23.04 30 ¶16

Chiar cana dichilea-pe claro că o Iehova alosardea le Moises te avel angla lende, le israeliți ci camle te pachian cadaia. (Num. 14:10, 11) Butivar, von chiar dine duma nasul anda o Moise hai vazdine-pe contra lesche. Anda codoia, o Iehova ci mechlea codole israelițen te arăsăn ando Them Promiso. (Num. 14:30) Tha, sas vi israeliți cai așunde catar i îndrumarea le Iehovaschi. Sar exemplo, ita so phendea o Iehova anda o Caleb: „Phirdea pe mânro drom anda sea o ilo”. (Num. 14:24) O Iehova pochindea parpale le Calebos hai mechlea-les te alosarel corcoro cai te beșel ando Canaan. (Ios. 14:12-14) Sa cadea, o poporo cai vazdea-pe anda cadal israeliți așunde cu sea catar i îndrumarea le Iehovaschi. Cana o Iosua avilea angla o poporo ando than le Moisesco „len sas-len iech bari pachiv caring leste ande sea le ghiesa lesca viațache.” (Ios. 4:14) Cadea că, o Iehova binecuvântisardea-len hai dea len o Them Promiso. (Ios. 21:43, 44) w24.02 21 ¶6, 7

Cadea sar iech medico daștil te jianel chichi de sastevesto si amaro ilo cana lel o pulso, sa cadea i iubirea cai si amen caring amare phrala daștil te sicavel chichi de bari si amari iubirea anda o Del. Dacă das amari sama că i iubirea caring amare phrala covliardea-pe, cadaia daștil te sicavel că amari iubirea anda o Del astardea te covliol sea mai but. Tha, cana sicavas iubirea caring le phrala, sicavas că amari iubirea anda o Del si zurali. Trebulas te daras dacă i iubirea caring amare phrala hai pheia covliardea-pe? Da, anda codoia că sam ando pericolo te hasaras amaro amalimos le Iehovasa. O apostolo Ioan phendea claro cado ciacimos: „Con ci iubil pesche phrales, cas dichel, ci daștil te iubil le Devles, cas ci dichel”. (1 Ioan 4:20) Cadea că, sam dichle mișto andel iacha le Iehovasche numai cana iubisaras amen iech averes. (1 Ioan 4:7-9, 11) w23.11 8 ¶3; 9 ¶5, 6

Cana sas-lo tărno, o rege Ioas alosardea goghiaver. Anda codoia că așilea bi dadesco, vo mechlea-pe sicado catar o Baro Rașai Iehoiada. Vo bariardea-les hai sicadea-les sar pesche șiaves. Cadea că, o Ioas alosardea te slujil le Iehovas hai te ajutil le manușen te anen închinarea uji le Devlesche. Sa cadea, vo chiar lea sama ca o templo te avel lașiardo. (2 Cron. 24:1, 2, 4, 13, 14) Dacă san sicado te iubis le Iehovas hai te încăres lesche porunci, te jianes că si tuche dino iech cuci daro. (Proverbe 2:1, 10-12) Chio dad hai chi dei daștin te sicaven tut prin but buchia. Von va avena zurales voime dacă așunes le sfaturi cai va dena tut von andai Biblia. Tha, vi mai importanto, o ilo le Iehovasco va bariola hai chio amalimos Lesa va cărdiola sea mai zuralo. (Prov. 22:6; 23:15, 24) Ci cherel tut cadaia te les tut vi mai but pala o exemplo cai mechlea-les o Ioas cana sas-lo tărno? w23.09 8, 9 ¶3-5

O Iehova promitil amenghe că va așunela amare manglimata. O Del iubil pesche manușen zurales but, anda codoia va avela sea o timpo atento ca lenghe manglimata. (Ps. 10:17; 37:28) Tha, cadaia ci însemnol că o Iehova va del amen sea so mangas lestar. Daștil-pe că anda chichiva buchia cai mangas-len trebul te ajucăras ji cana va avela i lumea nevi. O Iehova încărel andi goghi pesco scopo cana del răspunso ca amare manglimata. (Is. 55:8, 9) Iech anda le buchia cai vo camel-len si ca sea i phuv te avel pherdi manușența cai așunen lestar anda sea o ilo. Cu sea cadala, o Satan phendea că le manușa avenas mai fericime dacă rainas-pe corcore. (Gen. 3:1-5) O Iehova mechlea le manușen te rain-pe corcore, caște sicavel că so phendea o Beng si iech hohaimos. But anda le pharimata prin save nachas aghies sile andine catar o raimos le manușengo. (Ecl. 8:9) O Iehova ci va duriarela cadal pharimata acana. w23.11 21 ¶4, 5

O Iehova promitisardea că prin o Avraam, va avena binecuvântime but națiuni. O Avraam arăslea ca 100 bărș, hai i Sara ca 90 bărșa, tha ci sas-len încă iech șiavo. Andel iacha le manușenghe ci mai daștilas te avel-len iech șiavo. Cadaia zumadea ciaces o pachiamos le Avraamosco. „Cu sea cadala, prin speranța, les sas-les pachiamos că va avela o dad bute națiunengo.” (Rom. 4:18, 19) Hai ji la urmă, so ajucărdea o Avraam pherdilea-pe. Vo cărdilea o dad le Isaacosco, o șiavo cai ajucărdea-les cadea de but! (Rom. 4:20-22) Daisaras te cheras so si mișto andel iacha le Devlesche, te avas arachle orta lestar hai te arăsas lesche amala, cadea sar sas vi o Avraam. O Pavel chiar phendea cadai buchi ando Romani 4:23, 24: „Le dumes «sas-lo arachlo orta» ci sas-le scriime numai anda [o Avraam], tha vi anda amende, cai va avela te avas arachle orta, anda codoia că pachias ande Codo cai uștiadea andal mule le Isusos, amaro Rai”. Cadea sar le Avraamos, vi amen trebul te avel amen pachiamos, te cheras lașe buchia hai te pachias zurales că sea so promitisardea o Iehova va pherela-pe. w23.12 7 ¶16, 17

Cana naches prin iech pharimos cai daravel tut, na bâstăr că o Iehova dichel prin so naches hai vi sar cherel tut codo pharimos te simțosares tut. Sar exemplo, o Iehova dichlea na numai le nasulimata cai cherenas-len le egipteni le israelițenghe, tha vi prinjianelas mișto le ducha prin save nachenas. (Ex. 3:7) Cana naches prin iech pharimos, daștil-pe că ci diches sar silo o Iehova pașa tute. Cadea că mang-les te ajutil tut te diches cadaia. (2 Regi 6:15-17) Pala codoia șiu tuche le pușimata: „Somas zuriardo cana așundem iech tema sau iech comentario ca iech întrunirea? Arachlem vareso cai zuriardea man ande iech publicația, ande iech materialo video sau andel dumes anda iech ghili? Phendea manghe varecon iech șucar sicaimos sau avilea ande mânri goghi iech șucar verseto?”. Dacă ci sam atento, daisaras te arăsas te na mai dichas cuci i iubirea amare phralenghi hai o haben spiritualo cai primisaras-les. Tha, cadala sile șucar daruri cai aven le Iehovastar. (Is. 65:13; Mar. 10:29, 30) Von sicaven chichi de but iubil amen o Iehova hai că daisaras te pachias amen ciaces ande leste. (Is. 49:14-16) w24.01 4 ¶9, 10

Chiar angla te jial parpale co cerii, o Isus phendea pesche discipolenghe că sas lenghe dini i buchi te den duma anda leste „ando Ierusalimo, ande sea i Iudeea, andi Samaria hai ji ande o mai duriardo than la phuveaco”. (Fapte 1:8; Luca 24:46-48) Ca țâra timpo pala codoia, le conducători iudei astarde le apostolen Petru hai Ioan hai andine-len angla o Sanhedrino. Von phende lenghe te na mai predichin hai chiar camle te șion i dar ande lende. (Fapte 4:18, 21) O Petru hai o Ioan phende pherde tromai: „Phenen tumen cana si orta andel iacha le Devlesche te așunas mai sigo tumendar sar le Devlestar. Anda codoia că amen ci daisaras te na mai das duma anda le buchia cai dichleam-len hai cai așundeam-len”. (Fapte 4:19, 20) Pala so o Petru hai o Ioan sas-le dine drom, le discipoli cărde iech manglimos caring o Iehova ande savo phende lesche că camen te cheren mai dur leschi voința. O Iehova dea-len răspunso ca lengo manglimos cărdo anda sea o ilo. (Faptele 4:31) w23.05 5 ¶11, 12

Mașcar o Iehova hai lesco cuci șiavo si iech phanglimos zuralo hai pherdo iubirea cai încărel de miliardea bărșa. Cado si o mai purano phanglimos anda o universo mașcar iech dad hai lesco șiavo. O Iehova sicadea peschi iubirea caring o Isus, cadea sar citisaras ando texto de aghies. O Iehova daisardeas te phenel harnes: „Cado si o jeno cas aprobisardem-les”. Tha vo camlea te cherel prinjiando le manușenghe chichi de but iubil le Isusos, anda codoia phendea: „Cado si mânro Șiavo, codo iubime”. O Iehova dea-pe baro le Isusosa hai anda so avelas te cherel vo anda sea le manușa. (Ef. 1:7) O Isus jianelas anda sea o ilo că lesco Dad iubilas-les. Anda leste i iubirea le Iehovaschi sas ciaci hai daștilas te simțol-la pe peschi morci. Cadea că, pherdo pachiamos vo phendea mai butivar că lesco Dad iubilas-les. (Ioan 3:35; 10:17; 17:24) w24.01 28 ¶8

Gândisar tut că varecon caste încăres but phenel vareso zurales nasul anda tute. Jianes că si iech hohaimos, tha chichiva jene pachian-les. Cadal dumes jian vi mai dur hai vi aver manușa astaren te pachian codo hohaimos. Sar avelas te simțosares tut? Chio ilo avelas ciaces duchado anda codoia că cames ca le manușa te dichen tut lașe iachența. Cado exemplo ajutil amen te hachiaras so sas ando ilo le Iehovasco cana lesco anav sas-lo meliardo. Iech anda lesche șiave cerisco phendea iech hohaimos anda leste caring i dintuni jiuvli, i Eva. Voi pachiaia cado hohaimos hai cadea, le dintune manușa, anda save țârdas amen, ci mai așunde le Iehovastar. Cadaia cărdea ca sea le manușa te aven păcătoși hai, ji la urmă, te meren. (Gen. 3:1-6; Rom. 5:12) Sea le pharimata cai dichas-len aghies – o merimos, le marimata hai i duch – sile numai anda codoia că o Satan phendea dumes hohamne. Duchaven le Iehovas le hohaimata cai phendea-len o Satan? Jianas ciaces că da. Cu sea cadala, o ilo le Iehovasco ci pherdea-pe holiatar hai nici na mechlea-pe perado. Mai but, vo așel vi mai dur ‘o Del fericime’. (1 Tim. 1:11) w24.02 8 ¶1, 2

Sar daștis te așes loialo le Iehovasche, cadea sar o Iosif? Trebul te jianes încă de acanara so trebul te cheres cana avel iech athaimos. Sichio te nașes le buchiandar cai o Iehova urâl-len. De chi zor nici te na gândis tut ca le buchia nasul. (Ps. 97:10; 119:165) Cadea, ci va avela te meches tut cana avel vroiech athaimos. Daștil-pe că jianes ande chio ilo că arachlean o ciacimos hai cames te slujis le Iehovasche sea che zuralimasa. Tha vareso încărel tut parpale te des chi viața le Iehovasche hai te boles tut. Dacă si cadea, daștis vi tu te manghes tut sar o rege David, cai phendea: „Rode mișto ande mande, o, Devla, hai prinjiar mânro ilo! Dich mișto sar som hai prinjiar mânre phare gânduri! Dich dacă si ande mande vroiech nasulimos hai încăr man po drom caring i veșnicia!”. (Ps. 139:23, 24) O Iehova pochinel parpale codolen cai „roden-les anda sea o ilo”. Sicaves cadaia cana cheres sea so daștis caște des chi viața le Iehovasche hai te boles tut. (Evr. 11:6) w24.03 6 ¶13-15

Andel puraimata, le bare rașaies sas-les i buchi te reprezntil le manușen angla o Iehova. O dintuno baro rașai le Israelosco, o Aaron, sas-lo numime le Iehovastar cana o tabernacolo sas-lo dedichime. Cu sea cadala, cadea sar phendea o apostolo Pavel, „but jene trebuisarde te cărdion rașaia iech pala aver anda codoia că o merimos așavel-len te așen ande cadai buchi”. (Evr. 7:23-26) Sar manușa imperfecți, le bare rașaia trebunas te anen jertfe vi anda lenghe păcatea. Cadea că, dichas so bari diferența si mașcar lende hai o Baro Rașai, Isus Cristos. Na cadea sar le rașaia anda o Israelo purano, amaro Baro Rașai, si „iech slujitoro . . . andi ciaci țărha, savi vazdea-la o Iehova, na o manuș”. (Evr. 8:1, 2) O Pavel phendea anda o Isus: „anda codoia că așel andi viața anda sea o timpo, les siles iech rașaimos cai ci va nachela avereste” hai mai phendea că silo „ujo, încărdo dur codolendar păcătoși”. Cadea că, „vo ci si sar le coaver bare rașaia, ci trebul te anel ande fiesavo ghies jertfe” anda pesche păcatea. w23.10 26 ¶8, 9

„O cerii de mai anglal” si le guvernea cai mechen-pe îngărde catar o Satan hai lesche demoni. (Mat. 4:8, 9; 1 Ioan 5:19) Andi Biblia, i duma „phuv” daștil te sicavel le manușen cai train pe late. (Gen. 11:1; Ps. 96:1) Cadea că, „i phuv de mai anglal” reprezintil le manușen nasul de aghies. O Iehova na numai va lașiarela „o cerii” hai „i phuv” de aghies, tha va ujiarela-len cu sea hai va paruvela-len. „Iech cerii nevo hai iech phuv nevi” va paruvela o cerii hai i phuv de aghies, adică iech nevo guverno va raila opral sea le manușa orta. O Iehova va astarela te anel pale ca i perfecțiunea i phuv hai le manușen. Cadea sar phendea o Isaia, o Iehova va cherela sea i phuv iech șucar than, sar sas i bar le Edenoschi. Vi amen va cherela amen sar neve hai va sastiarela amen cu sea. Le banghe, le core hai le cașuche va avena sastiarde hai chiar vi le mule va avena uștiade parpale viațate. (Is. 25:8; 35:1-7) w23.11 4 ¶9, 10

O baro necazo va astarela de iechdata. (Mat. 24:21) But dezastrea aven neajucărde, tha amen jianas mișto că o baro necazo va avela. Acana cam 2 000 bărșa, o Isus phendea pesche continuatorenghe te aven pregătime anda cado ghies. (Mat. 24:44) Dacă sam pregătime va avela amenghe mai ușoro te nachas părdal cadal phare ghiesa hai te ajutisaras vi averen te cheren sa cadea. (Luca 21:36) Dacă așias zurale ando pachiamos hai ci mechas amen va daisarasa te așunas le Iehovastar, hai va avela te pachias că vo va ferila amen. So va avela te cheras dacă amare phrala va hasarena chichiva sau sea penghe buchia? (Hab. 3:17, 18) I mila va cherela amen te ajutisaras-len. So va avela te cheras dacă, pala o ataco cai va anela-les contra amenghe i coaliția andal națiuni, va trebula te beșas chidine amare phralența hai pheianța ande iech țâno than? (Ezec. 38:10-12) I iubirea anda amare phrala va ajutila amen te nachas părdal cadal phare ghiesa. w23.07 2 ¶2, 3

Codola căsătorime daștin te sichion but buchia catar o Aquila hai i Priscila, iech familia zurales pachivali anda o iechto secolo. (Rom. 16:3, 4) Von cherenas buchi, predichinas hai ajutinas averen ande iech than. (Fap. 18:2, 3, 24-26) Mai but, cana si duma anda o Aquila hai i Priscila, i Biblia phenel-len ande iech than. Sar daștin codola căsătorime te len-pe pala lende? Gândin tumen ca le but buchia cai trebun te cheren-len. Daștinas te cheren chichiva anda lende ande iech than, na corcore? Sar exemplo, o Aquila hai i Priscila predichinas ande iech than. Jian vi tumen ande iech than, mai butivar andi predicarea? Sa cadea, o Aquila hai i Priscila cherenas buchi ande iech than. Daștil-pe că tumen ci si tumen sa codo than buchiaco, tha daștinas te cheren chichiva buchia ando chăr ande iech than? (Ecl. 4:9) Cana ajutin tumen iech averes caște cheren iech buchi, simțon că san sar iech echipa hai cadea daștin vi te den duma mai but. w23.05 22, 23 ¶10-12

Savore manușa daran poiechdata. Sar exemplo, cana o rege Saul phirelas pala leste caște mudarel le Davidos, vo alosardea te nașel ando foro filisteano Gat. Na pala but timpo, o Achiș, o rege anda Gat, așundea că o David sas o zuralo războinico așardo ande iech ghili anda codoia că mudardea deșemiienghe filisteni. Atunci le Davidos „astardea-les iech bari dar”. (1 Sam. 21:10-12) Vo sas-lo darado anda so daștilas te cherel lesche o Achiș. Sar nachlea o David părdal pesche daraimata? Ando Psalmo 56, o David phendea so sas-les po ilo ando timpo so beșelas ando Gat. Ande cado psalmo, vo sicadea na numai save sas lesche daraimata, tha vi sar daisardea te duriarel-len pestar. Cana astardea-les i dar, o David șiutea pesco pachiamos ando Iehova. (Ps. 56:1-3, 11) Les sas-les iech lașio motivo te cherel cadaia. Le ajutorosa le Iehovasco, vo alosardea te cherel vareso neobișnuime. Vo cărdea-pe că silo dilo, hai lesco plano înclistea mișto. Cana o Achiș dichlea-les pachiaia că leschi prezența mai but holiarel-les sar te daravel-les. Cadea că o David daisardea te hastral lestar. (1 Sam. 21:13–22:1) w24.01 2 ¶1-3

Con sile codola anda caste del-pe duma ando texto de aghies? Cadala si le creștini machle, cai sas-le uștiade viațate opre ando cerii. Cadea că, cana le palutne creștini machle pa i phuv va avena line co cerii, caring o sfârșito le bare necazosco, i iechto buchi cai va trebula te cheren-la si te maren-pe. Pala so va vazdena-pe co cerii, von va slujina pașa o Cristos hai lesche îngeri sfinți hai va marena-pe ando palutno marimos contra le dușmani le Devlesche.Te gândisaras amen: aghies, cade pi phuv, chichiva creștini machle sile zurales phure hai nasfale. Tha, cana va avena uștiade viațate ando cerii, von va avena creaturi spiritualo zurale cai ci mai daștin te meren. Len va avela-len i buchi te maren-pe pașa lengo Rege zuralo, o Isus Cristos. Pala so va nachela o războio Armaghedon, von va cherena buchi ande iech than le Isusosa caște ajutin le manușen te arăsăn perfecți. Daisaras te pachias ciaces că anda o cerii, von va daștina te cheren mai but miștimos penghe cuci phralenghe hai pheianghe pa i phuv sar daisardeias te cheren vroiechdata sar manușa imperfecți! w24.02 6, 7 ¶15, 16

Chiar cana chichiva jene sile gata te bolen-pe, daștil-pe că daran te cheren cadai buchi. Daștil-pe că von pușen-pe: „Dacă va avela te cherav iech baro păcato hai te avav șiudino avri andai congregația?”. Dacă vi tu daras, pachia anda sea o ilo că o Iehova va ajutila tut te trais chi viața ‘ande iech modo demno lestar caște aves cuci ande lesche iacha cu sea’. (Col. 1:10) O Iehova ajutisardea bute manușen te așen zurale ando pachiamos. Cadea că, daștis te pachias ciaces că va dela vi tut o zuralimos te cheres cadaia. (1 Cor. 10:13) Anda codoia, si țâra Martori cai sile șiudine avri andai congregația. O Iehova lel sama ca lesche manușa te așen zurale ando pachiamos. Anda codoia că savore sam imperfecți, poiechdata avel amenghe te cheras buchia nasul. (Iac. 1:14) Tha te cheres vareso nasul si iech alosarimos – chio alosarimos. Ji la urmă, tu san codo cai alosarel sar te trais chi viața. Dacă poiechdata chio ilo athavel tut te cheres buchia nasul, daștis te sichios te încăres tut parpale catar cadal camnimata, chiar cana chichiva manușa ci pachian că si tut o zuralimos te așes lenghe contra. w24.03 5 ¶11, 12