Referințea anda o Caieto anda i întrunirea „Amari viața sar creștini hai i predicarea”
© 2023 Watch Tower Bible and Tract Society of Pennsylvania
1-7 IANUARIA
SUMNACAI ANDA O LIL LE DEVLESCO | IOV 32, 33
Așen pașa codola cai sile perade
it-1-E 710
Elihu
O Elihu ci încărdea chanicasa, hai ci phendea dumes gugle averenghe caște del-pe pașa lende. Vo jianglea că sas sar o Iov: cărdo anda i phuv hai că Codo o Mai Zuralo cai cărdea-les. O Elihu ci camlea te daravel le Iovos, tha dea duma lesa sar iech ciacio amal. Vo chiar phendea lesco anav, na cadea sar cărde o Elifaz, o Bildad hai o Țofar. (Iov 32:21, 22; 33:1, 6)
w14 15/6-M 25 ¶8-10
Diches le manușenghe covlimata cadea sar dichel-le o Iehova?
8 So daștil te ajutil-ame te hachiaras mai but so si ando ilo amare phralengo? Te anas ande amari goghi că chichiva sile bi zoraco anda codoia că silen iech nasfalimos sau depresia sau anda codoia că beșen ande iech than la familiasa cai ci sili co ciacimos. Daștil-pe că ande iech ghies vi amen te arăsas cadea sar von. Te gândisaras-ame ca le israeliți cai sas-le ciore hai zurales duchade ando Egipto. Angla so te jian ando Them Promiso, o Del phendea lenghe ca lengo ‘ilo te na avel sar iech bar’ caring le ciore. O Iehova ajucărelas-pe ca le israeliți te ajutin penghe phralen cai nachenas prin pharimata. (Deut. 15:7, 11; Lev. 25:35-38)
9 Ando than te dichas tele le phralen cai nachen prin pharimata hai te judechisaras-le, trebulas te ajutisaras-le. (Iov 33:6, 7; Mat. 7:1) Sar exemplo, iech manuș cai tradel iech motocicleta cherel iech accidento hai arăsăl co spitalo. Le doctori ci roden te dichen con sas doșalo, tha lel sama sigo lestar. Sa cadea, cana iech phral ando ciacimos nachel prin pharimata, i dintuni data trebul te ajutisaras-les spiritualo. (Citisaren 1 Tesaloniceni 5:14.)
10 Dacă gândisaras-ame prin so nachen amare phrala, daisaras te dichas lenghe covlimata avere iachența. Te gândisaras-ame ca le pheia savenghe familii așen lenghe contra de but bărșa. Daștil-pe că chichiva anda lende fal-pe că sile covle, tha na-i cadea că sicaven că sile zurale hai pherde pachiamos? Daștil-pe că dichas iecha deia cai sili corcori că avel de fiesavi data ca le întruniri pesche șiavența. Na-i cadea că zuriarel-ame laco pachiamos hai o fapto că cherel cadaia anda sea o ilo? Sa cadai buchi daisaras te phenas vi anda le tărne cai așen loialo chiar cana nachen prin pharimata ca i școala. Daisaras te phenas anda sea o ilo că cadal phrala cai fal-pe că sile covle, sile sa cadea de „zurale ando pachiamos” sar aver mașcar amende savenghe jial mai mișto. (Iac. 2:5)
w20.03-M 23 ¶17, 18
Cana si o lașio momento te das duma?
17 O ștarto jeno cai gălea co Iov, sas o Elihu, iech neamo le Avraamosco. Vo sas code cana o Iov hai le trin murșa dine duma. Anda codoia că așundea zurales atento so phende von, o Elihu daisardea te del le Iovos sfaturi directo tha pherde mila. Cadea, o Iov daisardea te paruvel pesco modo gândimasco. (Iov 33:1, 6, 17) Po iechto than anda o Elihu, sas te del pachiv le lehovasche, na pesche sau averenghe. (Iov 32:21, 22; 37:23, 24) Catar o Elihu sichioas că si iech momento te așias hai te așunas. (Iac. 1:19) Mai but, sichioas că atunci cana das sfaturi, camas te das pachiv le Iehovasche, na amenghe.
18 Sicavas că dichas cuci o daro te das duma cana las-ame pala so phenel i Biblia anda sar hai cana te das duma. O goghiaver rege Solomon phendea: „Sar sumnacune phabaia andel coșulețea rupune, cadea si iech cuvânto phendo co lașio momento.” (Prov. 25:11) Cana așunas atento so phenen aver hai gândisaras angla te das duma, amare dumes va avena sar le sumnacune phabaia – șucar hai vi cuci. Cana cheras cadea, amare dumes va zuriarena averen hai o Iehova va dela-pe baro amența, chiar cana das duma țâra sau but. (Prov. 23:15; Ef. 4:29) Cado si o mai lașio modo te mulțumisaras le Iehovasche anda o daro te das duma!
Cuci bara anda o lil le Devlesco
w13 15/1-M 19 ¶10
Pașion mai dur le Iehovastar
10 Sa cadea, si mișto te las sama sar sicavas de avreal. Tha, trebulas te na das amari zor te cheras oriso, caște na dichiol-pe că phurioas. O fapto că phurioas daștil te sicavel că gândisaras mai mișto, că sam pachivale hai șucar de andral. I Biblia phenel: „O bal parno si iech coroana șucarimaschi cana arachel-pe po drom le ortomasco.” (Prov. 16:31) O Iehova cadea dichel-ame hai sa cadea trebulas te dichas-ame vi amen. (Citisar 1 Petru 3:3, 4.) Cadea că, si mișto te cheras operații sau tratamentea cai daștin te cheren amenghe nasul, numai caște avas mai șucar de avreal hai te țârdas i atenția caring amende? „I bucuria le Iehovaschi” del-ame o ciacio șucarimos cai avel de andral, chiar cana sam phure sau tărne, nasfale sau sasteveste. (Neem. 8:10) Numai andi lumea nevi va avela-ame iech sastimos perfecto hai o șucarimos le tărnimasco. (Iov 33:25; Isaia 33:24) Ji atunci, te avas goghiaver hai te sicavas pachiamos caște avel amenghe mai ușoro te așias pașa o Iehova hai te cheras sea so daisaras anda leste. (1 Tim. 4:8)
8-14 IANUARIA
SUMNACAI ANDA O LIL LE DEVLESCO | IOV 34, 35
Cana fal-pe că numai le lașe manușen silen pharimata
wp19.1-M 8 ¶2
Sar si o Del?
O Del cherel sea o timpo so si orta. „Dur catar o ciacio Del te cherel so si nasul hai Codolestar o mai Zuralo te cherel so si neorta!” (Iov 34:10) Anda codoia că o Iehova judechil ortomaia, o psalmisto phendea lesche: „Tu va aveia te judechis le popoarea ortomaia.” (Psalmo 67:4) Anda codoia că „o Iehova dichel so si ando ilo”, ci daștil te avel athado catar le manușa cai silen dui fețe, tha prinjianel sea o timpo o ciacimos hai judechil orta. (1 Samuel 16:7) Mai but, o Del dichel fiesavo neortomos, fiesavi buchi nasul hai promitil că „codola nasul va avena chosle pa i phuv”. (Proverbe 2:22)
w17.04-M 10 ¶5
So va chosela cu sea o Regato le Devlesco?
5 So va cherela o Iehova? Aghies, o Iehova camel te ajutil le manușen nasul te paruven-pe. (Is. 55:7) Cadai lumea ande savi traisaras sili condamnime, tha încă ci silo judechime fiesavo manuș. So va avela codolența cai ci camen te paruven-pe hai așen mai dur pașa cado sistemo ji cana astarel o baro necazo? O Iehova promitil că va chosela cu sea le manușen nasul pa i phuv. (Citisar Psalmo 37:10.) Daștil-pe că codola nasul pachian că ci va avela pe lende cadai cris. Ande amare ghiesa, but manușa sichile te garaven le buchia cai cheren-le, hai butivar ci sile arachle doșale. (Iov 21:7, 9) Cu sea cadala, i Biblia phenel: „Le iacha le Devlesche sile caring le droma le manușesche hai Vo dichel sea lesche pași. Ci si nici tunearico, nici bari ucial cai te garaven-pe codola nasul.” (Iov 34:21, 22) Chonic ci daștil te garavel-pe catar o Iehova Del. Nici iech hohamno ci daștil te athavel-les. Ci si niciech garaimos cai o Del te na dichel-les. Pala o Armaghedono, va avela te dichas caring o than cai sas codola nasul hai ci va mai avela. (Ps. 37:12-15)
Cuci bara anda o lil le Devlesco
w17.04-M 29 ¶3
Cana camas te cheras buchi anda o Iehova, așaras-les!
3 O Iehova ci ordosardea le Elihos cana șiutea o pușimos: „Dacă san orta, so des lesche tu [le Devlesche] sau so primil vo tutar?” (Iov 35:7) Camlea o Elihu te phenel că i zor cai das-la ando servicio le Devlesco si de ivea? Nici. Vo camlea te phenel că le Iehovas na-i les nevoia amendar, caște anas lesche închinarea. Le Iehovasche ci lipsol lesche chanci. Niciech buchi cai amen das-la lesche ci daștil te cherel-les mai barvalo sau mai zuralo. Mai but, sea le lașe buchia cai si amen, so jianas te cheras hai amaro zuralimos aven le Devlestar hai vo dichel sar folosisaras-le.
15-21 IANUARIA
SUMNACAI ANDA O LIL LE DEVLESCO | IOV 36, 37
Sostar daisaras te pachias-ame andi promisiunea le Devleschi că va avela te traisaras anda sea o timpo
w15 1/10-M 13 ¶1, 2
Daisaras ciaces te arachas le Devles?
O DEL SILO ANDA SEA O TIMPO: I Biblia phenel că o Del silo anda „sea o timpo.” (Psalmo 90:2) Aver varesar phendo, le Devles na-i les începuto hai nici sfârșito. Anda amende „lesche bărșa sile cadea de but că nachavel amaro hachiarimos.” (Iov 36:26)
Miștimata: O Del promitil amenghe că va avela te traisaras anda sea o timpo dacă arăsas te prinjianas-les ciaces (Ioan 17:3). Sar daisaras te pachias cadai promisiunea dacă o Del ci trailas anda sea o timpo? Numai „o Rai cai si anda sea o timpo” daștil te pherel cadai promisiunea (1 Timotei 1:17).
w20.05-M 22 ¶6
Diches cuci le daruri cai del-le o Del?
6 Si amen o pai anda codoia că i phuv sili șiuti chichi de dur trebul le chamestar. Dacă avelas iech țâra mai pașă, ci mai avelas pai, hai i phuv avelas thabardi, bi viațaco. Dacă avelas mai dur le chamestar, o pai avelas pahome hai i phuv avelas iech bari mingea pahoschi. Anda codoia că o Iehova șiutea i phuv chichi de dur trebul le chamestar, o pai cai jial andi natura cherel te avel viața pe late. O tachimos le chamesco țârdel opre o pai anda le mări, oceanea hai andai phuv, hai cadea cheren-pe le nori. Pe bărșeste silo țârdino avri cam 500 000 km3 paiesche. Cado pai așel andi atmosfera cam deș ghiesa hai pala codoia perel pale pi phuv, cana del o brâșând sau o iv. Cadea, o pai risarel-pe andel mări, oceanea sau ande aver thana cai si pai. O pai andai natura silo țârdino opre hai pala codoia perel tele, pale hai pale; ci așavel-pe niciechdata. Cadaia sicavel că o Iehova silo goghiaver hai zuralo. (Iov 36:27, 28; Ecl. 1:7)
Cuci bara anda o lil le Devlesco
it-1-E 492
Sar sas cărde prinjiande le buchia
Andel phurane thana anda save del duma i Biblia, le nevimata hai le buchia importanto sas-le cărde prinjiande catar iech manuș caring aver, ande but moduri. Le nevimata de cothar hai anda aver thema sas-le phende iech averestar. (2Sa 3:17, 19; Iov 37:20) Ande codo timpo, le manușa jianas le vurdonența anda iech than ande aver. Cana așavenas-pe andel forurea sau aver thema te chinen penghe haben, pai hai aver buchia, von phenenas vi ande codo them le nevimata de dureal. I Palestina sasli șiuti ande iech than prin savo nachenas le manușa catar Asia, Africa hai Europa. Anda codoia, le manușa cai beșenas code prinjianenas sigo le mai neve buchia catar le duriarde thema. Butivar, von așunenas le nevimata anda lengo than hai anda aver thema, andi piața le foroschi.
22-28 IANUARIA
SUMNACAI ANDA O LIL LE DEVLESCO | IOV 38, 39
Cheres tuche timpo te diches atento i creația?
w20.08-M 14 ¶2
O jiuvindimos sicavel i iubirea, o goghiaverimos hai i răbdarea le Devleschi
2 Angla so te cherel sea le buchia, o Iehova cărdea pesche Șiaves, le Isusos. Pala codoia, prin leste „sas cărde sea-l coaver buchia”, hai vi milioanea îngeri. (Col. 1:16) O Isus sas-lo zurales voime te cherel buchi pesche Dadeia. (Prov. 8:30) Hai vi le îngeri le Devlesche sas-le voime te dichen sar o Iehova hai lesco Meștero lașio, o Isus, cărde le ceruri hai i phuv. Sar sicade von penghi bucuria? Von ‘denas cingar caște așaren le Devles’ cana sas cărdi i phuv hai de fiesavi data cana o Iehova cărdea vareso nevo. Von așarenas-les vi mai but cana cărdea le manușen, i mai șucar buchi lesche vastenghi. (Iov 38:7; Prov. 8:31) Fiesavi buchi cai o Iehova cărdea-la, sicadea leschi iubirea hai lesco goghiaverimos. (Ps. 104:24; Rom. 1:20)
Cuci bara anda o lil le Devlesco
it-2-E 222
Codo cai del le legi
O Iehova si codo cai del le legi. O Iehova si o corcoro anda o universo cai daștil te del le legi. Les trebul te așiaras-les anda codoia că cărdea le legi fizico cai rain opral sea le buchia cai nai-le viața (Iov 38:4-38; Ps 104:5-19), tha vi opral le animalea (Iov 39:1-30). Anda codoia că o manuș silo cărdo le Iehovastar vi vo silo tela le legi andai fizica. Mai but, anda codoia că o manuș daștil te gândil hai te avel-les iech amalimos le Iehovaia, vo silo vi tela le legi moralo le Devlesche. (Ro 12:1; 1Co 2:14-16) Chiar vi le îngeri sile tela i legea le Iehovaschi. (Ps 103:20; 2Pe 2:4, 11)
Le legi fizico cărde le Iehovastar ci daștin te aven chosle. (Ier 33:20, 21) Ando universo dichlo hai prinjiando, lesche legi ci paruven-pe hai sile demno pachiamasche. Anda codoia, le manușa goghiaver daștin te cheren iech calculo exacto anda sar mișchil-pe o șionoto, le planetea hai aver bare buchia andal ceruri. Dacă varecon cherel vareso contra le legi fizico, va avela duchado pe thaneste anda codoia că ci încărdea conto lendar. Sa cadea, le legi moralo le Devlesche ci daștin te aven chosle hai chonic cai uștarel-le ci așel bi doșaco hai pochinel anda cadaia. Si sa cadea de importanto te încăras cadal legi sar si te încăras le legi andai natura, chiar cana daștil-pe că ci simțosaras pe thaneste le ducha. „O Del ci mechel-pe prasado! Anda codoia că, so șiol andi phuv o manuș, codoia va chidela!”. (Ga 6:7; 1Ti 5:24)
29 IANUARIA – 4 FEBRUARIA
SUMNACAI ANDA O LIL LE DEVLESCO | IOV 40-42
So daisaras te sichioas catar o Iov
w10 15/10-M 3, 4 ¶4-6
„Con arăslea te prinjianel i goghi le Iehovaschi?”
4 Cana gândisaras-ame ca so cherel o Iehova, trebul te las sama te na peras ando athaimos te judechisaras le Devles pala i goghi le manușenghi. Anda cado athaimos o Iehova phenel ando Psalmo 50:21: „Pachiaian că som sar tu”. Acana mai but sar 175 bărșa, iech biblisto phendea: „Le manușa judechin le Devles pala sar gândin von hai pachian că vi o Del trebul te încărel cadal legi cadea sar von”.
5 Trebul te las sama te na dichas le Iehovas pala sar camasas amen te avel sau pala sar pachias amen că silo vo. Sostar? Cana sichioas andai Biblia, daștil-pe că citisaras anda chichiva buchia cărde le Iehovastar, cai daștin te fan-pe neorta ande amare iacha, anda codoia că sam manușa imperfecți. Andel puraimata, le israeliți arăsle te gândin cadea hai ci hachiarde mișto so cărdea o Iehova anda lende. O Iehova phendea lenghe: „Tha tumen va avena te phenen: «I rig le Iehovaschi na-i orta». Așunen, mangav-tume, chăr le Israelosco! Mânri rig na-i orta? Na varesar tumare riga ci sile orta?” (Ezec. 18:25)
6 Caște na arăsas te judechisaras le Iehovas pala i goghi le manușenghi trebul te jianas ande amaro ilo că ci prijianas sea hai că sar dichas le buchia ci si sea o timpo mișto. O Iov trebulas te sichiol cadai buchi. Anda codoia că sas-lo duchado, gândisardea-pe numai peste hai hasardea le buchia mai importanto. Tha, o Iehova, pherdo iubirea ajutisardea-les te paruvel pesco modo gândimasco. Cana șiutea lesche mai but sar 70 pușimata, o Iov ci daisardea te del răspunso lende. Cadea, o Iehova cărdea-les te hachiarel că ci jianel sea-l buchia. O Iov sas-lo umilo hai parudea pesco modo gândimasco. (Citisar Iov 42:1-6.)
w17.06-M 25 ¶12
Dich sea o timpo caring i mai importanto buchi
12 Phiradea-pe o Iehova nasul le Iovosa pala so nachlea prin pharimata? Nici. O Iov hachiardea hai dichlea cuci o modo sar o Iehova ortosardea-les. Vo chiar phendea: „Lav parpale mânre cuvintea hai căiv man andi phuv hai ando uciar”. (Iov 42:1-6) Mai anglal, o Iov primisardea sfaturi vi catar o tărno Elihu. (Iov 32:5-10) Pala so o Iov mechlea-pe ortosardo hai parudea pesco modo gândimasco, o Iehova phendea vi averenghe so cuci dichlea le Iovos, anda codoia că așilea pașa leste ande-l pharimata. (Iov 42:7, 8)
Cuci bara anda o lil le Devlesco
it-2-E 808
Prasaimos
O Iov sas iech murș orta cai așilea loialo chiar cana sas-lo prasado. Vo astardea te dichel greșime le buchia hai cărdilea doșalo; anda codoia sas-lo ortosardo. O Elihu phendea anda leste: „So manuș silo sar o Iov, cai piel o prasaimos cadea sar piel o pai?”. (Iov 34:7) O Iov arăslea te dichel prea but caring peste, hai dichlea-pe mai orta sar o Del. (Iov 35:2; 36:24) Cana sas-lo prasado catar pesche trin „amala”, o Iov pachiaia că cadal prasaimata sas anda peste, na anda o Del. Cadea, vo sas-lo sar iech manuș cai mechel-pe prasado hai arăsăl te placial-les te avel cadea, sar cana placial-les te piel o pai. Pala iech timpo, o Del cărdea le Iovos te hachiarel că cadal prasaimata phende neciacimata anda o Del, na anda leste. (Iov 42:7) Sa cadea, cana le israeliți mangle iech rege, o Iehova phendea caring o profeto Samuel: „Na tut ci camen, tha man, caște na mai avav lengo rege.” (1Sa 8:7) Hai o Isus phendea pesche discipolenghe: „Va avena urâme sea le themendar [na anda tumari doș, tha] anda mânro anav.” (Mt 24:9) Cana le creștini încăren andi goghi cadal buchia, va daștina te dichen o prasaimos cadea sar o Del hai te nachen părdal leste. Cadea va meritina te aven pochinde parpale anda codoia că ci mechen-pe. (Lu 6:22, 23)
5-11 FEBRUARIA
SUMNACAI ANDA O LIL LE DEVLESCO | PSALMO 1-4
Alosaren o Regato le Devlesco
w16.04-M 29 ¶11
Te încăras amari neutralitatea ande iech lumea huladi
11 Materialismo. Dacă si cuci anda amende le buchia cai si amen, daștilas te avel amenghe pharo te așias neutro. I phei Ruth anda Malawi dichlea că chichiva Martori ci așile neutro andel persecuții ande le bărșa ’70. Voi anel ande peschi goghi: „Von ci daisarde te mechen penghi șucar viața cai sas-le. Chichiva sas-le amența ando exilo, tha mai târzio găle ando partido hai risarde-pe chăre anda codoia că ci camle te așen ando lagăro andal refugiați cai sas iech phari viața”. Tha, le mai but slujitori le Iehovasche așile neutro, chiar cana ci sas len chanci sau chiar hasarde sea so sas len. (Evr. 10:34)
Cuci bara anda o lil le Devlesco
it-1-E 425
I pleava
Si vareso sano cai pachiarel le cuchia catar le cerealea sar si o orzo sau o ghiv. Chiar cana andi Biblia del-pe duma ando senso figurativo anda i pleava, cadaia sicavel sar chidenas-pe le semințea anda le timpuri purane. Pala o secerișo, cadai buchi cai si sar o hureaimos anda i cuchi, ci sas folosime chanceste. Anda codoia, andi Biblia del-pe duma anda i pleava caște sicavel-pe vareso cai ci si importanto, cai nai-la valoarea hai cai ci camel-la chonic, vareso cai trebul huladi catar so si lașio hai șiudini.
Mai anglal, le cerealea sile marde hai cadea, i pleava sili huladi catar i cuchi. Pala codoia, cana phurdel i barval, voi sili îngărdi dur, sar o uciar. (Dich VÂNTURARE.) Cadaia sicavel sar o Iehova Del, duriarel codolen cai sile apostați mașcar lesco poporo hai vi sar va chosela cu sea le manușen nasul hai codolen cai sile contra lesche. (Iov 21:18; Ps 1:4; 35:5; Is 17:13; 29:5; 41:15; Os 13:3) O Regato le Devlesco phagherela pesche dușmanen andel părți cadea de țâne că i barval va îngărela-le dur, cadea sar îngărel i pleava. (Da 2:35)
Butivar, i pleava cai ci sas lași chanceste, sas chidini hai thabardi, caște na phurdel-la i barval pale mașcar le cerealea hai te rimosarel-le. Sa cadea, o Ioan Botezătoro phendea de mai anglal că le conducători religioso va avena chosle cu sea cana o Isus Cristos va chidela o ghiv hai „va thabarela i pleava ande iech iag cai ci daștil te avel mudardi”. (Mt 3:7-12; Lu 3:17; dich TREIERAT)
12-18 FEBRUARIA
SUMNACAI ANDA O LIL LE DEVLESCO | PSALMO 5-7
Așen loialo chiar cana dichen so cheren aver
w20.07-M 8 ¶3, 4
Te pachias zurales că si amen o ciacimos
3 Amaro pachiamos ci trebul te avel numai anda o fapto că dichas i iubirea le phralenghi mașcar o poporo le Devlesco. Sostar? Te phenas că iech creștino cai si phuro de congregație sau pioniero, cherel iech baro păcato. Sau daștil-pe că iech phral sau iech phei duchavel-tu. Sau daștil-pe că varecon arăsăl apostato hai phenel că amende ci si o ciacimos. So va avela te cheres dacă va avela cadea? Va avela te meches-tu perado hai ci va mai avela te slujis le Iehovasche? Catar sichios iech bari buchi: Chio pachiamos ci va avela zuralo cana avel numai anda o fapto că diches so cheren aver. O pachiamos avel vi anda iech amalimos chidino le Iehovaia. Caște zuriares chio pachiamos, ci trebul te les-tu numai pala so phenel chio ilo tha vi te rodes buchia cai sicaven claro o ciacimos hai save daștis te hachiares-le. Trebul corcoro te sichios te pachias zurales că andi Biblia si o ciacimos anda o Iehova. (Rom. 12:2)
4 O Isus phendea că chichiva va primina o ciacimos „pherde bucuria”, tha cana va nachena prin iech zumaimos, lengo pachiamos va merela. (Citisaren Matei 13:3-6, 20, 21.) Daștil-pe că cadala ci hachiarde că dacă camen te jian pala o Isus, va nachena prin zumaimata hai pharimata. (Mat. 16:24) Sau daștil-pe că pachiaie că dacă sile creștini va avela-le iech viața pherdi miștimata, bi te aven-le niciech pharimos. Tha ande cadai lumea imperfecto, nachas prin pharimata. Andi viața daștin te aven paruimata cai cioren amari bucuria anda iech timpo. (Ps. 6:6; Ecl. 9:11)
Cuci bara anda o lil le Devlesco
it-1-E 995
Mormânto
Ando Romani 3:13, o apostolo Pavel phenel le dumes anda o Psalmo 5:9, cai sicaven că i „cor” le manușenghi nasul hai cai athaven si sar iech „mormânto pâtărdo”. Cadea sar iech mormânto pâtărdo si iech than le merimasco hai le cărnimasco, sa cadea i cor codolenghi nasul si pherdi dumes cai mudaren, meliaren hai rimosaren. (Dich vi Mt 15:18-20.)
19-25 FEBRUARIA
SUMNACAI ANDA O LIL LE DEVLESCO | PSALMO 8-10
„O Iehova, va avela te așarav-tu”!
w20.05-M 23 ¶10
Diches cuci le daruri cai del-le o Del?
10 Iech modo prin savo daisaras te sicavas că dichas cuci o fapto te das duma si te phenas codolenghe cai pachian andi evoluția sostar pachias că si iech Creatoro. (Ps. 9:1; 1 Pet. 3:15) Codola cai pachian andi evoluția phenen că i phuv hai i viața pa late ci cărdea-le chonic. I Biblia hai chichiva buchia anda cado articolo va ajutina-ame te sicavas că sam de i rig amare Dadeschi cerisco hai te phenas le coaverenghe că o Iehova si Codo cai cărdea o cerii hai i phuv. (Ps. 102:25; Is. 40:25, 26)
Cuci bara anda o lil le Devlesco
it-1-E 832
Nai
Ando senso figurativo; i Biblia phenel anda o Del că folosisardea pesco „nai” sau pesche „naia”, sar exemplo, caște scriil Le deș porunci pe le table anda o bar (Ex 31:18; De 9:10), caște cherel miracolea (Ex 8:18, 19) hai caște cherel le ceruri (Ps 8:3). I relatarea biblico anda i creația ande savi citisaras că i zor le Devleschi (rúaḥ, „spirito”) mișchil-pe opral le paia, sicavel că i duma „le naia” le Devlesche referil-pe ca lesco spirito sfânto cai si leschi zor. (Ge 1:2) Mai but, le Scripturi grecisco creștino ajutin-ame te hachiaras mișto cadai duma, anda codoia că o Matei phendea că o Isus dea avri le benghen prin „o spirito le Devlesco”, hai o Luca phendea că o Isus cărdea cadaia „le naiesa le Devlesco”. (Mt 12:28; Lu 11:20)
26 FEBRUARIA – 3 MARTIA
SUMNACAI ANDA O LIL LE DEVLESCO | PSALMO 11-15
Dich-tu andi lumea nevi le Devleschi cai si pherdi pacea
w06 15/5-M 18 ¶3
Idei importanto anda o lil Psalmo
11:3 – So si le temelii cai sile dine tele? Cadala si le buchia pala save trebun te train le manușa: i legea, i ordinea hai o ortomos. Cana cadala sile dine tele, le buchia ci mai jian mișto mașcar le manușa hai ci mai si ortomos. Atunci, „codo orta” trebul te șiol pesco pachiamos cu sea ando Del. (Psalmo 11:4-7)
wp16.4-M 11
Daștil te avel iech lumea bi te aven marimata?
Andi Biblia arachas i promisiunea că o Del va ujiarela chichi mai sigo i phuv catar le marimata. O Del va anela „i cris hai va chosela” le manușen nasul cai si aghies. (2 Petru 3:5-7) Le manușa nasul ci va mai duchavena averen. Sostar daisaras te pachias zurales că o Del va chosela le marimata?
Andi Biblia phenel-pe că o Del „urâl codoles cai iubil o marimos”. (Psalmo 11:5) Codo cai cărdea-ame iubil i pacea hai o ortomos. (Psalmo 33:5; 37:28) Anda codoia, vo ci va mai mechela but timpo le manușen nasul pi phuv.
w17.08-M 6 ¶15
Cames te ajucăres pherdo răbdarea?
15 Sostar camlea o David te ajucărel pherdo răbdarea? Arachas o răspunso ando psalmo ande savo vo pușlea ștar-var: „Ji cana?”. Ita so phendea vo mai dur: „Me pachiav-ma ande chi iubirea loialo; mânro ilo va bucurila-pe anda so cheres caște salvis-ame. Va avela te ghilabav le Iehovasche, anda codoia că vo pochindea-ma but parpale.” (Ps. 13:5, 6) O David pachiaia andi iubirea loialo le Iehovaschi. Vo ajucărdea pherdo bucuria te avel hastrame hai gândisardea-pe sar pochindea-les parpale o Iehova. O David jianglea că vo ci ajucărel de ivea.
kr-M 236 ¶16
O Regato pherel so camel o Del pi phuv
16 Siguranța. Le șucar dumes anda o Isaia 11:6-9, cai arăsăn ande amaro ilo, va pherena-pe ciaces hai cu sea. Le murșa, le jiuvlea hai le șiave va jiana andi siguranța oricai camen pi phuv. Niciech manuș sau animalo ci va mai cherena nasul. Gândisar-tu ca o timpo cana va avela te simțosares-tu sar chăre ande fiesavo than pa i phuv; daștis te naios ande iech len, iech laco sau andi marea; hai daștis te jias andi siguranța po plaina. Cana va avela i riat, ci va mai avela sostar te daras. Le dumes anda o Ezechiel 34:25 va pherena-pe ciaces hai le slujitori le Devlesche „va beșena andi siguranța hai va sovena ando veșa”.
Cuci bara anda o lil le Devlesco
w13 15/9-M 19 ¶12
Parudean tumaro modo gândimasco?
12 But manușa de aghies sile cadea sar phendea o apostolo Pavel. Von pachian că ci mai trebul te traisaras pala sar phenel amenghe o Del hai nici te phenas averenghe te cheren cadaia. Le dada hai le profesori phenen că le șiave daștin te cheren oriso camen hai că fiesavo jeno daștil te alosarel corcoro so si mișto hai so si nasul. But manușa religioso, phenen că daștin te cheren so pachian von că si orta hai că ci trebul te len-pe pala le legi le Devlesche. (Ps. 14:1) Cado modo gândimasco daștil te athavel vi le ciace creștinen. Codola cai ci len sama daștinas te pachian sa cadai buchi anda sar sile cărde le buchia ande amari organizația. Von daștinas te na mai camen te cheren so si lenghe phendo andi congregația hai chiar te rovaren-pe anda so ci placial-le. Sau daștinas te na mai așunen le sfaturi andai Biblia anda le distracții, anda sar te folosin o interneto hai dacă te cheren sau nici iech școala mai bari.