Referințea anda o Caieto anda i întrunirea „Amari viața sar creștini hai predicarea”
© 2024 Watch Tower Bible and Tract Society of Pennsylvania
4-10 NOIEMBRIA
SUMNACAI ANDA O LIL LE DEVLESCO PSALMO 105
„Vo anel pesche amintea anda sea o timpo o legământo cai cărdea-les”
it-2-E 1201 ¶2
O Cuvânto
Sea le buchia cai cărdea-len o Del, le buchia cai si len viața sau nici, așunen catar lesco cuvânto hai vo daștil te cherel-len te pheren lesco scopo. (Ps 103:20; 148:8) Lesco cuvânto silo demno pachiamasco anda codoia că o Del cherel sea o timpo so phenel. (De 9:5; Ps 105:42-45) Vo phendea că lesco cuvânto „așel anda sea o timpo”; hai că niciechdata ci va avela parpale leste bi te pherel pesco scopo. (Is 40:8; 55:10, 11; 1Pe 1:25)
Cuci bara anda o lil le Devlesco
w87 1/11-M 13 ¶15
Caște avel fericime hai chidini iech familia, so trebun te cheren le tărne?
15 „Lesche pânre sas-le phanghle andel cătușe, leschi cor sas șiuti andel sastra. Ji cana pherdea-pe so phendea o Iehova, ujiarde-les lesche dumes.” (Psalmo 105:17-19) O Iosif saslo sclavo hai beșlea ando phandaimos 13 bărșa, ji cana o Iehova pherdea peschi promisiunea. Anda codoia că nachlea prin cadala, vo sas-lo ujiardo. O Iehova ci dea-les cadal pharimata, tha vo mechlea-len te aven pe leste caște pherel iech scopo. Cana nachlea prin sea cadala, o Iosif pachiaia-pe mai dur andel dumes le Iehovasche. Mai but vo arăslea iech manuș mai răbdătoro, mai umilo; lesco pachiamos barilea hai camlea vi mai but te cherel orisavi phari buchi cai sas lesche dini. Si ciaces, o Iosif nachlea prin cado pharimos cadea sar nachel o sumnacai prin iag, anda codoia vo arăslea te avel mai ujo hai mai cuci andel iacha le Devlesche. Pala codoia, o Iehova folosisardea-les ande iech șucar modo. (Geneza 41:14, 38-41, 46; 42:6, 9)
11-17 NOIEMBRIA
SUMNACAI ANDA O LIL LE DEVLESCO PSALMO 106
„Bâstarde le Devles, lengo Salvatorii”
w18.07-M 20 ¶13
„Con si de i rig le Iehovaschi?”
13 Le israeliți daraile zurales cana dichle iech calo noro, le fulgerea hai aver bare buchia cai sicavenas o zuralimos le Devlesco. Anda codoia, phende le Moisesche te del duma vo ande lengo than le Iehovasa, po plain Sinai. (Ex. 20:18-21) O Moise beșlea mai but timpo po plain. Simțosarde-pe le israeliți corcore ando șuco than, anda codoia că o Moise ci sas pașa lende? Fal-pe că len sas-len pachiamos numai cana o Moise sas lența. Von hasarde penghi răbdarea hai phende le Aaronosche: „Cher amenghe iech Del cai te jial angla amende, că ci jianas so si cadale Moiseia, o manuș cai încaladea-ame anda o them le Egiptosco!”. (Ex. 32:1, 2)
Cuci bara anda o lil le Devlesco
w06 15/7-M 13 ¶9
Buchia importanto anda o trin-to hai ștar-to lil anda Psalmi
106:36, 37. Cadal versetea cheren phanglimos mașcar i închinarea le idolenghe hai le jertfe andine le demonenghe. Cadaia sicavel că, cana varecon anel închinarea le idolenghe, daștil te arăsăl tela o zuralimos le demonengo. I Biblia phenel amenghe: „Ferin tumen catar le idoli!”. (1 Ioan 5:21)
18-24 NOIEMBRIA
SUMNACAI ANDA O LIL LE DEVLESCO PSALMII 107, 108
„Anen mulțumiri le Iehovasche, că silo lașio”
w07 15/4-M 20 ¶2
I congregația te așarel le Iehovas!
2 I congregația ci si iech than sau iech asociația cai chiden-pe mai but manușa caște den duma, sau te cheren buchia cai ciaion-len, sar avelas o sporto sau aver vareso. I congregația si iech than cai chiden-pe le manușa caște așaren le Iehovas. Cadaia ci si vareso nevo. Ando Psalmo 35:18 phenel-pe: „Va avela te anav tuche mulțumiri andi bari congregația hai va avela te așarav tut mașcar but manușa”. Hai ando Psalmo 107:31, 32 citisaras: „Le manușa te anen mulțumiri le Iehovasche anda leschi iubirea loialo hai anda le șucar buchia cai cărdea-len anda lende! Te anen lesche pachiv ando mașcar le poporosco”.
w15 15/1-M 9 ¶4
Anen mulțumiri le Iehovasche hai vo va dela tumen miștimata
4 Caște arăsas te camas sea mai but te mulțumisaras le Iehovasche, trebul te gândisaras amen ca le miștimata cai dea-len amenghe vo hai sar sicavel prin cadala că iubil amen. Cana o David cărdea cadea, dichlea zurales cuci le șucar buchia cai cărdea-len o Iehova. (Citisar Psalmo 40:5; 107:43)
25 NOIEMBRIA–1 DECEMBRIA
SUMNACAI ANDA O LIL LE DEVLESCO PSALMII 109-112
Te așias pașa o Isus, amaro Rai!
w06 1/9-M 13 ¶6
Buchia importanto anda o panji-to lil anda Psalmi
110:1, 2 – So cărdea „o Rai [le Davidosco]”, o Isus Cristos, chichi timpo beșlea ca i ciaci rig le Devleschi? Pala so sas-lo uștiado andal mule, o Isus gălea ando ceri hai beșlea ca i ciaci rig le Devleschi ji cana astardea te rail sar Rege ando bărș 1914. Ande cado timpo, o Isus railas opral le creștini machle. Vo sicadea-len sar te predichin, sar te cheren discipoli hai pregătisardea-len vi caște rain ande iech than lesa ande lesco Regato. (Matei 24:14; 28:18-20; Luca 22:28-30)
w00 1/4-M 18 ¶3
Codola cai maren-pe contra le Devlesche ci va așena ande pânrende!
3 De cana astardea o secolo 20, but thema așile contra le manușenghe le Iehovasche. Le jiungale manușa camle te așaven codolen cai phenenas i vestea lași anda o Regato le Devlesco. Von sas-le spidime catar o Beng amaro dușmano, cai „phirel angle hai pale sar iech leo cai răcnil, hai rodel te hal varecas” (1 Petru 5:8). Ando bărș 1914, cana „le timpuri cai sas dine le națiunenghe” terminisarde-pe, o Del șiutea pesche șiaves sar nevo Rege opral i phuv hai phendea lesche: „Jia te rais ando mașcar che dușmanengo” (Luca 21:24; Psalmo 110:2). O Isus dea avri anda o ceri le Satanos hai șiudea-les pi phuv. Anda codoia că jianel că mai si-les târa timpo, vo șiorel peschi bari holi opral le creștini machle hai opral codola cai așen pașa lende (Revelația 12:9, 17). So rezultatea sas codolen cai marde-pe butivar contra le Devlesche?
be 76-M ¶2
De chi zor te barios spiritualo
Caște folosis mișto che daruri, tu trebul te cheres o dintuno paso. Cheres o dintuno paso te achares averen andi predicarea? Rodes sar te ajutis le tărnen, le nasfalen hai codolen neve anda congregația? Jias te ajutis co ujimos ca i sala le Regatoschi hai ca le congresea? Cheres o pionierato auxiliaro cana daștis? Daștis te cheres o pionierato regularo sau te jias ande aver congregația cai si mai bari nevoia? Dacă san phral, des chi zor te cheres so phenel i Biblia caște daștis te aves iech slujitoro auxiliaro sau iech phuro? Cana cheres o dintuno paso caște ajutis hai te cheres le buchia cai si tuche dine, sicaves că barios spiritualo. (Ps. 110:3)
Cuci bara anda o lil le Devlesco
it-1-E 524 ¶2
O legământo
O legământo caște avel iech rașai cadea sar o Melhisedec. Cado legământo arachas-les ando Psalmo 110:4, hai ando Evrei 7:1-3, 15-17 phenel-pe că o Isus Cristos cherel partea anda leste. Cado si iech legământo cărdo numai mașcar o Iehova hai o Isus. Fal-pe că o Isus referil-pe leste cana cărdea aver legământo pesche discipolența anda iech regato. (Lu 22:29) Prin o solaharimos le Iehovasco, o Isus Cristos, lesco șiav cerisco daștilas te avel iech rașai cadea sar sas o Melhisedec. O Melhisedec sas le Devlesco rege hai rașai pi phuv. Cadea sar o Melhisedec, o Isus avelas te avel rege hai rașai tha ando cerii, na pi phuv. Pala so sas-lo vazdino co cerii vo sas-lo șiuto ande cadal poziții, caște așel anda sea o timpo. (Ev 6:20; 7:26, 28; 8:1) O legământo așel anda sea o timpo, anda codoia că o Isus sar Rege hai Baro Rașai va așunela le Iehovastar anda sea o timpo. (Ev 7:3)
2-8 DECEMBRIA
SUMNACAI ANDA O LIL LE DEVLESCO PSALMII 113-118
Sar daisaras te pochinas le Iehovas parpale?
w01 1/1-M 11 ¶13
Te avas zuriarde prin iubirea
13 Le dumes le Isusosche sicaven mișto că trebul te iubisaras le Iehovas mai but sar oriso. Amen ci năștisaras amen cadala iubireasa caring o Iehova. Trebul te das amari zor caște bariaras-la. Cana așundeam i dintuni data anda o Iehova, cadaia țârdea amen caring Leste. Țâra po țâra sichileam sar cărdea vo i phuv anda le manușa. (Geneza 2:5-23) Sichileam sar phiradea-pe le manușența: chiar cana o păcato avilea andi lumea, vo ci risardea o dumo le manușenghe, tha cărdea sigo vareso caște salvil-len. (Geneza 3:1-5, 15) Vo sas-lo lașio codolența fidelo hai dea anda amende pesche Șiaves, o corcoro cărdo Lestar, caște aven iertime amare păcatea. (Ioan 3:16, 36) Ando timpo so prinjiandeam mai mișto le Iehovas, vo arăslea vi mai cuci anda amende. (Isaia 25:1) O Rege David phendea că iubilas le Iehovas anda codoia că vo lea sama lestar pherdo iubirea. (Psalmo 116:1-9) Vi aghies o Iehova lel sama amendar, sicavel amenghe so te cheras hai zuriarel amen. Chichi timpo sichioas mai but anda Leste, va avela te iubisaras Les vi mai but. (Psalmo 31:23; Țefania 3:17; Romani 8:28)
w09 15/7-M 29 ¶4, 5
Te das avrenghe anda sea o ilo – Te mulțumisaras anda ilo cana primisaras vareso
O psalmisto pușlea-pe: „Sar daștiv te pochinav parpale le Iehovas anda sea o miștimos cai cărdea-les manghe?” (Ps. 116:12) So miștimata primisardea vo? O Iehova sas pașa leste chichi timpo sas andel „pharimata hai ducha”. Mai but „salvisardea-les le merimastar”. Cadea că, vo camlea te „pochinel-Les” parpale varesar. So daștilas te cherel vo anda o Del? Vo phendea: „Va avela te încărav mânre solaharimata cai cărdem-len le Iehovasche”. (Ps. 116:3, 4, 8, 10-14) O psalmisto camlea zurales te încărel sea le solaharimata cărde le Iehovasche hai te cherel sea so manglea lestar o Iehova.
Vi amen daisaras te cheras sa cadea. Sar? Cana traisaras amari viața pala le Devlesche legi hai principii, cadea sar o psalmisto. Cadea că, te das amari zor te șioas po iechto than ande amari viața i închinarea le Iehovaschi. Sa cadea, te mechas amen îngărde le spiritostar sfânto ande sea so cheras. (Ecl. 12:13; Gal. 5:16-18) Si ciaces, ci daisaras te pochinas parpale le Devles anda sea le miștimata cai dea-len amenghe. Cu sea cadala ‘lesco ilo va bucurila-pe’ cana cheras leschi buchi sea le ilesa. (Prov. 27:11) Si iech bari pachiv anda amende te bucurisaras o ilo le Iehovasco!
w19.11-M 22, 23 ¶9-11
Sicaimata anda o lil Levitico
9 O duito sicaimos: Slujisaras le Iehovasche anda codoia că camas te mulțumisaras lesche anda sea so cherel anda amende. Caște hachiaras mai mișto cadai buchi, te dichas i porunca anda le jertfe de comuniune, iech aver partea importanto anda i închinarea cai andine-la le israeliți. Anda o lil Levitico, sichioas că iech israelito daștilas te anel iech jertfa de comuniune „sar mulțumirea”. (Lev. 7:11-13, 16-18) Vo anelas-la anda codoia că camelas, na că sas spidime varecastar. Sas iech daro cai o israelito anelas-les pherdo iubirea pesche Devlesche, o Iehova. Codo cai anelas i jertfa, leschi familia hai le rașaia daștinas te han anda o animalo cai dea-les sar jertfa. Tha chichiva părți anda o animalo cai sas dino sar jertfa, sas-le dine numai le Iehovasche.
10 O trinto sicaimos: Amen das le Iehovasche so si amen mai lașio anda codoia că iubisaras-les. Anda o Iehova, o thulimos si i mai lași partea anda iech animalo. Sa cadea, vo phendea că chichiva organea, sar si le rinichi, sas zurales importanto. (Citisar Levitico 3:6, 12, 14-16.) Cadea că, o Iehova dichelas zurales cuci cana iech israelito anelas sar jertfa le organea hai o thulimos ieche animalosche. Codo cai anelas i jertfa sicavelas că camel te del le Iehovas sea so siles mai lașio. Vi o Isus dea le Iehovas sea so sas-les mai lașio hai slujisardea lesche sea le ilesa hai pherdo iubirea. (Ioan 14:31) Anda o Isus sas cuci i legea le Devleschi hai sas zurales bucurime te slujil Lesche. (Ps. 40:8) Le Iehovasco ilo barilea cana dichlea că o Isus camlea anda sea o ilo te anel lesche închinarea!
11 Cadea sar le jertfe anda mulțumirea, i închinarea cai anas-la le Iehovasche anda sea o ilo sicavel chichi de but iubisaras-les. Amen das-les so si amen mai lașio anda codoia că iubisaras-les anda sea o ilo. O Iehova silo zurales bucurime cana dichel că milioanea manușa slujin lesche pherde iubirea hai dichen cuci lesche legi! Cana gândisaras amen că anda o Iehova si cuci na numai so cheras, tha vi sostar cheras le buchia anda leste, si amen pacea ando ilo. Sar exemplo, dacă phurilean hai ci mai daștis te cheres cadea de but sar cameias, av siguro că o Iehova hachiarel tut. Daștil-pe că pachias că ci daștis te cheres but anda o Iehova, tha vo dichel chi bari iubirea, cai ajutil tut te cheres sea so daștis. Lesco ilo bariol cana dichel că das-les so si amen mai lașio.
Cuci bara anda o lil le Devlesco
w12 15/5-M 22 ¶1, 2
Pușimata catar amare cititori
O Iehova dichel zurales cuci fiesave manușes cai anel lesche ciaci închinarea. Ando Psalmo 116:15 phenel-pe: „Andel iacha le Iehovasche o merimos codolengo loialo si iech baro hasarimos”. O psalmisto ci camlea te phenel că iech manuș le Devlesco ci daștil te merel.
Cado verseto ci trebul te avel citime ande iech cuvântarea anda o prahimos chiar cana codo manuș așilea loialo ji co merimos. Sostar? Anda codoia că o psalmisto camlea te phenel că o Iehova dichel cuci sea pesche manușen loialo hai ci va mechela te meren sea lesche manușa, sar grupo. (Dich Psalmii 72:14; 116:8)
9-15 DECEMBRIA
SUMNACAI ANDA O LIL LE DEVLESCO PSALMO 119:1-56
„Sar daștil iech tărno te încărel ujo pesco drom?”
w88 1/10-M 16 ¶10
Așes ujo ande orisavi buchi?
10 Ando Efeseni 5:5 o Pavel phenel: „Anda codoia că jianen hai hachiaren mișto că niciech manuș imoralo, niciech manuș neujo, niciech manuș hașvalo, adică iech idolatro, ci va moștenila o Regato le Cristososco hai le Devlesco.” Cu sea cadala, ande fiesavo bărs, mii phrala hai pheia sile ortosarde sau dine avri anda congregația anda codoia că cheren buchia sexualo melale – ‘păcătuin contra pengo corpo.’ (1 Corinteni 6:18) Butivar, von cheren cadai buchi anda codoia că ci așunen le Iehovastar. (Psalmo 119:9) Sar exemplo, but phrala hai pheia ci len sama so phenel o Iehova cana jian andi vacanța. Von ci jian ca le întruniri hai, code cai phiren, cheren penghe amala cai ci slujin le Iehovasche. Anda codoia că chichiva phrala pachianas că cadal manușa ‘sile lașe’, arăsle te cheren lența buchia nasul. Sa cadea, aver arăsle te avel-len iech amalimos chidino codolența casa cheren buchi. Iech phuro de congregație pașilea cadea de but iecha jiuvleatar catar i buchi, că arăslea te mechel pesca familia caște beșel lasa! Vo sas-lo dino avri anda i congregația. So ciace sile cadal dumes andai Biblia: „Le amalimata nasul rimon le obiceiuri lașe”! (1 Corinteni 15:33)
w06 15/6-M 25 ¶1
„Iubisarav le buchia cai anes-len manghe amintea”
O IEHOVA anel amintea pesche manușenge chichiva buchia caște ajutil-len te nachen părdal le zumaimata ande cadal phare ghiesa. Chichiva anda lende arachas-len cana citisaras corcore i Biblia, hai aver prin le cuvântări hai răspunsuri ca le întruniri la congregațiache. But buchia save citisaras-len sau așunas-len ci sile neve anda amende, anda codoia că sichileam-len de mai anglal. Cu sea cadala, amen bâstras sigo, hai anda codoia trebul te anas amenghe amintea sea o timpo o scopo le Iehovasco, lesche legi hai so phenel amenghe vo te cheras. Trebul te mulțumisaras le Iehovasche anda le buchia cai anel-len amenghe amintea. Cadala zuriaren amen hai ajutin amen te na bâstras sostar camas anda sea o ilo te traisaras amari viața pala sar camel o Del. Anda codoia, o psalmisto ghilabadea le Iehovasche: „Iubisarav le buchia cai anes-len manghe amintea.” (Psalmo 119:24)
w10 15/4-M 20 ¶2
Le che iacha catar le buchia cai nai-le lașe!
2 Cu sea cadala, so dichas daștil te cherel amenghe nasul. Le buchia cai dichas-len daștin te așen but timpo ande amari goghi; mai but, daștin te bariaren le camnimata ande amaro ilo. Cadai lumea cai si tela o zuralimos le Benghesco nașel numai pala le buchia cai ciaiol-la. Anda codoia si șiute angla amare iacha but poze, reclamea hai but hohaimata cai daștin te îngăren amen pe iech jiungalo drom, chiar cana dichas numai țâra lende. (1 Ioan 5:19) Anda codoia, o psalmisto manglea-pe zurales le Devlesche hai phendea: „Le mânre iacha catar le buchia cai nai-le lașe; încăr man andi viața pe chio drom.” (Ps. 119:37)
Cuci bara anda o lil le Devlesco
w05 15/4-M 10 ¶2
Te pachias amen ande so phenel o Iehova
2 O Psalmo 119 sicavel chichi de cuci sile le buchia cai phenel-le amenghe o Iehova. Cado Psalmo si iech ghili scriime andi ordinea alfabetico, ca le manușa te daștin te sichion-la mai ușoro. Andi șib ebraico, siles 176 versetea hai silo cărdo anda 22 strofe. Ande fiesavi strofa si 8 versuri cai astaren sa cadala literasa. Vo șutea ande cado psalmo i duma le Devleschi, leschi legea, le buchia cai anel-len amenghe amintea, lesche droma, le ordini, le dispoziții, le porunci, hai le hotărâri judecătorești. Cana gândisaras amen prin so nachle hai so cărde le manușa le Iehovasche andal puraimata hai de aghies, va avela te hachiaras mai mișto cado psalmo hai va avela te dichas mai cuci i Biblia, o lil scriime le Devlesco.
16-22 DECEMBRIA
SUMNACAI ANDA O LIL LE DEVLESCO PSALMO 119:57-120
Sar daisaras te așias zurale andel pharimata
w06 15/6-M 20 ¶2
„Ce but iubisarav chi legea!”
2 Daisaras te pușias amen: Sar zuriardea i legea le Devleschi codoles cai scriisardea o psalmo? Vo pachialas anda sea o ilo că o Iehova iubilas-les hai cadaia ajutisardea-les. Chiar cana lesche dușmani cherenas lesche nasulimata, o psalmisto sas fericime anda codoia că pachialas că i legea dini le Iehovastar sas ande lesco miștimos. Vo dea peschi sama că o Iehova cărdea lesche mișto. Mai but, anda codoia că o psalmisto lea-pe pala i legea le Devleschi, cadaia cărdea-les mai goghiaver sar le coaver hai chiar salvisardea leschi viața. Les sas-les pacea ando ilo hai iech conștiința uji anda codoia că sicadea pachiv caring i legea. (Psalmo 119:1, 9, 65, 93, 98, 165)
w00 1/12-M 14 ¶3
Iubin anda sea o ilo le buchia cai anel-len tumenghe amintea o Iehova?
3 O psalmisto dichelas zurales cuci le buchia cai anelas-len lesche amintea o Iehova. Vo ghilabadea: „Sighiarav hai ci mechav pe aver data te încărav che porunci. Le dorea le nasulenghe sile pe mande, tha me ci bâstrav chi legea.” (Psalmo 119:60, 61) Le buchia cai anel-len amenghe amintea o Iehova ajutin amen te așias zurale cana le coaver așen amenghe contra, anda codoia că jianas că amaro Dad cerisco daștil te șinel le dorea savența camen te phandaven amen hai te așiaven amen le dușmani. Ando mai lașio timpo, vo va salvila amen catar le athaimata caște phenas i vestea lași anda o Regato vi mai dur. (Marcu 13:10)
w06 1/9-M 14 ¶4
Buchia importanto anda o panji-to lil anda Psalmi
119:71 –Sar daștil te avel ande amaro miștimos i duch? Cana nachas prin pharimata daisaras te sichioas te pachias amen mai but ando Iehova, te mangas amen lesche anda sea o ilo, te sichioas mai mișto corcore le Iehovasa hai te cheras so phenel amenghe vo. Mai but, cana nachas prin pharimata, amaro phiraimos sicavel sar sam ciaces hai so lașiarimata trebul te cheras. Dacă mechas ca i duch te cherel amen mai lașe, ci va avela te mechas amen perade.
w17.07-M 13 ¶3, 5
„Roven codolența cai roven”
3 Pachias ciaces că o Iehova, amaro Dad cerisco cai si pherdo lașimos, si amari mângâierea. (Citisar 2 Corinteni 1:3, 4.) O Iehova si o mai lașio exemplo anda sar te șioas amen ando than le manușengo. Vo promitisardea pesche manușenghe „Me som Codo cai mângâil tumen.” (Is. 51:12; Ps. 119:50, 52, 76)
5 Daisaras te pachias anda sea o ilo că o Iehova va avela pașa amende. Anda codoia, trebul te phenas lesche ando manglimos sea so si ande amaro ilo. Sam zuriarde cana jianas că o Iehova hachiarel amari duch hai că del amen i mângâierea cai trebul amen. Tha, sar cherel vo cadaia?
Cuci bara anda o lil le Devlesco
w06 1/9-M 14 ¶5
Buchia importanto anda o panji-to lil anda Psalmi
119:96 –So hachiaras anda le dumes „sea so si perfecto terminil-pe”? O psalmisto del duma anda sar dichel o manuș i perfecțiunea. Daștil-pe că vo gândisardea-pe că o manuș pachial că i perfecțiunea terminil-pe. Tha, le Devlesche porunci ci terminin-pe. Sea so phenel amenghe vo ajutil amen anda sea so cheras ande amari viața. O psalmisto phenel: „Dichlem că sea so si perfecto terminil-pe, tha chi porunca ci terminil-pe”.
23-29 DECEMBRIA
SUMNACAI ANDA O LIL LE DEVLESCO PSALMO 119:121-176
So te cheras caște na avas duchade de ivea
w18.06-M 17 ¶5, 6
Te sicavas amari conștiința pala le Iehovasche legi hai pala leschi goghi
5 Dacă camas ca le Iehovasche legi te ajutin amen, trebul te cheras mai but sar te citisaras-len hai te prinjianas-len. Trebul te arăsas te iubisaras-len hai te traisaras amari viața pala lende. O Lil le Devlesco phenel: „Urân o nasulimos hai iubin o miștimos!”. (Amos 5:15) Tha, sar daisaras te cheras cadaia? Trebul te sichioas te dichas le buchia cadea sar dichel-len o Iehova. Sar exemplo, te gândisaras amen că ci daisaras te sovas mișto. O medico phenel amenghe te cheras sporto, te has mai mișto hai te paruvas chichiva buchia anda amari viața. Cana cheras so phendea amenghe o medico dichas că simțosaras amen mai mișto! Daștil-pe că mulțumisaras lesche but anda codoia că ajutisardea amen te avel amen iech viața mai lași.
6 Sa cadea, Codo cai cărdea amen, dea amen legi cai cheren amari viața mai șucar hai cai ferin amen le buchiandar jiungale cai andea-len o păcato. Te gândisaras amen ca le miștimata cai si amen cana las amen pala le Iehovasche legi anda le buchia sar avenas le hohaimata, le athaimata, o ciorimos, le buchia sexualo melale, le marimata hai o spiritismo. (Citisar Proverbe 6:16-19; Rev. 21:8) Cana dichas so but miștimata si amen cana las amen pala le Iehovasche legi, amari iubirea caring o Iehova hai caring lesche legi va bariola sea mai but.
w93 15/4-M 17 ¶12
Tărne – So camen te cheren?
12 Mai but sar oriso, trebul te sichion te urân zurales o nasulimos. (Psalmo 97:10) Sar daștin te urân vareso cai fal-pe că si lașio sau cai ciaiol tumen? Cana gândin tumen de mai anglal ca so va avela te întâmplol-pe! „Na athaven tumen: O Del ci mechel-pe prasado! Anda codoia că, so șiol andi phuv o manuș, codoia va chidela! Con șiol andi phuv anda o mas va chidela anda pesco mas o chernimos.” (Galateni 6:7, 8) Cana san ando athaimos, te na mechen tumen îngărde le camnimastar. Gândin tumen ca le bare buchia nasul cai va avena hai ca sar daștin te duchaven o ilo le Iehovasco. (Dich vi Psalmo 78:41.) Gândin tumen că daștin te len iech nasfalimos, sar avelas i SIDA sau că i jiuvli daștil te așel phari. Tumaro ilo daștil te avel phagărdo cu sea sau daștin te na mai dichen tumen lașe iachența. Iech phiraimos sar cado, daștil te anel ducha mai but timpo. Iech phei phenel: „Angla te prinjianas amen, me hai mânro rrom suteam vi avere manușența. Cadala cheren amen butivar te has amen hai te daravas amen chiar cana le dui sam creștini acana”. Ci trebun te bâstren că daștin te hasaren vi le buchia cai cheren-len andi congregația sau chiar te aven dine avri anda late! (1 Corinteni 5:9-13) Meritil te pochinas iech prețo cadea de cuci anda iech buchi cai cherel te simțosaras amen mișto numai pe thaneste?
30 DECEMBRIA–5 IANUARIA
SUMNACAI ANDA O LIL LE DEVLESCO PSALMII 120-126
Șiute andi phuv asfența, tha chidine bucuriasa
w04 1/6-M 16 ¶10
Codolen cai den pachiv le Devles va avena-len but miștimata
10 Cana camas te jias pala o Isus, trebul te maras amen contra le Satanosche. Ando Iacov 4:7 phenel-pe: „Așen contra le Benghesche, hai vo va nașela tumendar”. Si ciaces, na-i ușoro te cheras cadaia. Trebul te das sea amari zor caște cheras buchi anda o Del. (Luca 13:24) Tha i Biblia promitil amenghe ando Psalmo 126:5: „Codola cai șion andi phuv asfența, va dena cingar bucuriatar cana va chidena”. Amen cheras buchi ieche Devlesche cai ci bâstrel so cheras anda leste. Vo silo „o pochinitorii codolengo cai roden-les anda sea o ilo” hai vo del miștimata codolenghe cai anen lesche pachiv. (Evrei 11:6)
w01 15/7-M 18, 19 ¶13, 14
Te predichisaras mai dur!
13 Le Devlesche manușa, vi mai but codola savenghe varecon așel contra, sile zuriarde cana dichen so phenel o Psalmo 126:5, 6: „Codola cai șion andi phuv asfența, va dena cingar bucuriatar cana va chidena. Codo cai rovel cana jial te îngărel pesco gono pherdo semințea, va avela te del cingar bucuriatar cana risarel-pe parpale, hai va avela-les andel vasta cotora ghivesche phangle.” Cadal dumes sicaven sar lea sama o Iehova codolendar cai risarde-pe anda o purano Babilono hai so miștimata dea-len. Chiar cana sas-le bucurime anda codoia că sas-le încalade avri, daștil-pe că le israeliți rovenas cana șiute andi phuv, ande savi ci mai sas șiuto chanci de 70 bărșa. Tha, codola cai șiute mai dur andi phuv hai vazdine mai dur o foro, arăsle te bucurin-pe catar penghi buchi.
14 Daștil-pe că vi amen rovas cana nachas prin pharimata, sau cana amen sau amare phrala sam duchade anda o ortomos. (1 Petru 3:14) Daștil-pe că na-i ușoro anda amende te astaras te șioas andi phuv anda codoia că, chiar cana das amari zor, ci dichas chanci anda so cheras. Tha, dacă va avela te șioas mai dur andi phuv hai te chinghiaras, o Del va cherela te bariol. (1 Corinteni 3:6) Cadai buchi sicavel-pe claro cana dichas sode Biblii hai lila sas dine le manușenghe.
Cuci bara anda o lil le Devlesco
cl 73-M ¶15
O zuralimos cai feril amen – „O Del si amaro garaimos”
15 Ando iechto than, te dichas sar feril amen o Iehova. Sar manușa le Iehovasche, daisaras te ajucăras amen te avas ferime sar grupo. Dacă o Iehova ci cherelas cadaia, o Satan avelas te mudarel amen sigo. Te gândisaras amen că o Satan, „o conducătorii cadala lumeachi”, avelas zurales bucurime te chosel cu sea i închinarea uji. (Ioan 12:31; Revelația 12:17) Chichiva anda le mai zurale guvernea pa i phuv așiade i predicarea hai dine penghi zor te chosen-la. Cu sea cadala, le Iehovasche manușa așile zurale hai predichisarde mai dur bi te așiaven-pe. Sostar ci daisarde cadala zurale națiuni te așiaven i predicarea cărdi țâra manușendar? Anda codoia că o Iehova ferisardea amen pesche zurale phachența! (Psalmo 17:7, 8)