Referințea anda o Caieto anda i întrunirea „Amari viața sar creștini hai i predicarea”
© 2024 Watch Tower Bible and Tract Society of Pennsylvania
2-8 SEPTEMBRIA
SUMNACAI ANDA O LIL LE DEVLESCO PSALMII 79-81
Te sicavas că iubisaras o baro anav le Iehovasco
w17.02-M 9 ¶5
I răscumpărarea si iech daro perfecto catar o Dad
5 Sar daisaras te sicavas că si cuci anda amende o anav le Iehovasco? Prin amaro phiraimos. O Iehova manghel amendar te avas sfinți. (Citisar 1 Petru 1:15, 16.) Cadaia însemnol că trebul te anas închinarea numai lesche hai te așunas lestar anda sea o ilo. Vi cana varecon așel amenghe contra, amen das sea amari zor te traisaras pala le Iehovasche legi hai pala o modo sar gândil vo. Cana cheras cadea, așaras o baro anav le Iehovasco hai amari lumina strălucil. (Mat. 5:14-16) Sar poporo sfânto, prin amaro phiraimos, sicavas că le Iehovasche legi sile orta hai că le buchia nasul cai phendea-len o Satan sile hohamne. Savore greșisaras, tha fal amen nasul anda sea o ilo hai ci mai cheras le buchia cai anen lajiav po Iehova sau cai meliaren lesco anav. (Ps. 79:9)
ijwbv-M 3 ¶4, 5
Romani 10:13 – „Te acharas o anav le Iehovasco”
Andi Biblia, le dumes „te acharas o anav le Iehovasco” însemnol mai but sar te prinjianas lesco anav hai te folosisaras-les andi închinarea. (Psalmo 116:12-14) Mai însemnol vi te șioas amaro pachiamos ando Del hai te mangas lesco ajutoro. (Psalmii 20:7; 99:6)
Anda o Isus sas importanto o anav le Devlesco. Cadai buchi dichiol-pe ando modo sar sicadea amen te mangas amen. Le dintune dumes anda cado manglimos sile: „Amaro Dad cai san andel ceruri, te avel sfințome chio anav”. (Matei 6:9) Caște avel amen viața veșnico, o Isus mai phendea că trebul te arăsas te prinjianas Codoles cai phiravel cado anav, te iubisaras-les hai te așunas lestar. (Ioan 17:3, 6, 26)
Cuci bara anda o lil le Devlesco
it-2-E 111
O Iosif
O anav le Iosifosco arăsăl baro. Mașcar le șiave le Iacobosche, o Iosif arăslea iech baro manuș. Anda codoia, poiechdata, lesco anav sas-lo folosime cana dea-pe duma anda sea le triburi le Israelosche (Ps 80:1) sau cana dea-pe duma anda le deș triburi cai cherenas o regato anda nordo. (Ps 78:67; Am 5:6, 15; 6:6) Mai but, lesco anav silo ande mai but profeții. Andi profeția cai phendea-la o Ezechiel, o Iosif primisardea iech moștenirea dui-var mai bari (Eze 47:13). Iech aver profeția del duma anda iech foro cai bușiol „O Iehova si code”, ande savo iech anda le udara phiravel o anav le Iosifosco (Eze 48:32, 35). Ande iech profeția, o Obadia phendea că vi o chăr le Iosifosco va phagherela o chăr le Esaosco (Ob 18), hai o Zaharia phendea că o Iehova va hastravela o chăr le Iosifosco (Za 10:6). Ando Israelo spiritualo, o tribo le Iosifosco lea o than le Efraimosco (Re 7:8).
Angla te merel, o Iacob, cai sas o dad le Iosifosco, cărdea iech profeția anda o Iosif. Anda Revelația 7:8 hachiaras că cadai profeția aplichil-pe vi co Israelo spiritualo. Ande late, del-pe duma anda iech Păstorii hai iech Bar. Cado Lașio păstorii si o Isus cai mulea anda pesche bacrea (Ioa 10:11-16) hai o Bar pe savo sas vazdino o templo le Devlesco (o Israelo spiritualo) si sea o Isus (Ef 2:20- 22; 1Pe 2:4-6). Hai vo si le Iehovasa. (Io 1:1-3; Fa 7:56; Ev 10:12; dich vi Ge 49:24, 25)
9-15 SEPTEMBRIA
SUMNACAI ANDA O LIL LE DEVLESCO PSALMII 82-84
Dich cuci le privilegii cai si tut
wp16.6-M 8 ¶2, 3
So sichioas catar le ciriclea
Le manușa anda o Ierusalimo sas-le sicade le ciricleanța, save cherenas penghe cuibo ca lenghe chăra. Chichiva cirichlea cărde penghe cuibo chiar ando templo le Solomonosco. Anda codoia că simțonas-pe mișto cade, von avenas ande fiesavo bărș co templo caște bariaren penghe puionen liniștime.
Codo cai scriisardea o Psalmo 84 sas iech murș cai țârdelas-pe anda o Core. Vo slujilas co templo iech curco ca fiesave șiov șiona, hai cadea, dichlea le cuiburi catar o templo. Anda codoia că camlea te avel sar le ciriclea cai beșenas ando chăr le Iehovasco sea o timpo, vo phendea: „Chichi de șucar si chio baro tabernacolo, o, Iehova le armatengo! Mânro ilo camel zurales, da, merav dorostar anda le barea le Iehovasche . . . Chiar vi iech ciricli arachel pesche iech chăr code, hai i rândunica arachel pesche iech cuibo ande savo lel sama pesche puionendar pașa chio baro altaro, o, Iehova le armatengo, mânro Rai hai Del!”. (Psalmo 84:1-3) Sicavas amen hai amare șiave că si amenghe cuci i congregația le Devleschi hai că camas anda sea o ilo te așias ande late? (Psalmo 26:8, 12)
w08 15/07-M 30 ¶3, 4
Te gândisaras amen ca le buchia cai daisaras te cheras-len, hai cadea, va avela te avas bucurime
Dacă san phuro sau nasfalo, daștil-pe că ci mai cheres cadea de but anda o Iehova. Dacă san dad sau dei, daștil-pe că pachias că ci țârdes miștimata cana sichios corcoro sau cana san ca le întruniri, anda codoia că les sama che șiavendar hai ci mai si tut zor hai timpo. Tha sostar gândis tut ca le buchia save ci daștis te cheres-len? Na cadai buchi așavel tut te diches le buchia cai daștis te cheres-len?
Acana mii bărșa, iech levito camlea te cherel iech buchi savi ci daștilas te cherel-la vo. Chiar cana sas-les i pachiv te cherel buchi dui curche po bărș co templo, vo camlea te beșel sea o timpo pașa o altarii. (Ps. 84:1-3) So ajutisardea cadale murșes te încărel peschi bucuria? Vo hachiardea că sas iech bari pachiv vi iech corcoro ghies te cherel buchi ande le barea le templosche. (Ps. 84:4, 5, 10) Sa cadea, ando than te gândisaras amen ca le buchia save ci daisaras te cheras-len, te das amari zor te dichas cuci le buchia save daisaras te cheras-len.
w20.01-M 16 ¶12
Anda o Iehova, chio Del, san cuci!
12 Dacă san duchado anda codoia că san nasfalo, av siguro că o Iehova jianel prin so naches. Mangh-les anda sea o ilo te ajutil tut te diches le buchia avere iachența. Pala codoia, rode andi Biblia le șucar dumes cai mechlea-len o Iehova anda amende. Gândisar tut ca le exemplea cai sicaven chichi de but iubil o Iehova pesche manușen. Cana cheres cadea, va avela te diches că o Iehova silo lașio sea codolența cai slujin lesche loialo. (Ps. 84:11)
Cuci bara anda o lil le Devlesco
it-1-E 816
O șiavo bi dadesco
Cana i națiunea Israel așilea pașa o Iehova hai sas sastevesti po plano spiritualo lea sama codolendar duchade cai hasarde varecas cuci ando merimos hai ci daștinas te ferin-pe corcore. Tha cana i națiunea Israel duriardea-pe le Iehovastar hai ci mai cărdea so si orta, ci mai lea sama cadale manușendar. Cana von ci mai line sama le „șiavestar bi dadesco” sicade că sasle nasfale spiritualo. (Ps 82:3; 94:6; Is 1:17, 23; Ier 7:5-7; 22:3; Eze 22:7; Za 7:9-11; Mal 3:5) O Iehova dea armai codolen cai phirade-pe neorta le șiavența bi dadesco. (De 27:19; Isa 10:1, 2) O Iehova si anda lende Codo cai hastravel-len (Pr 23:10, 11), Codo cai ajutil-len (Ps 10:14), hai lengo Dad (Ps 68:5). Vo si codo cai cherel lenghe cris orta anda lengo miștimos (De 10:17, 18), sicavel lenghe mila (Os 14:3), feril-len (Ps 146:9) hai încărel-len andi viața. (Ier 49:11)
Iech buchi prin savi le creștini sicaven că sile ciace, si te len sama codolendar duchade save mulea lenghe varecon drago sar avelas o rrom, o dad sau i dei. O discipolo Iacov phendea: „I închinarea uji hai sfânto andel iacha amare Devlesche hai Dadesche si cadaia: te les sama pe codola cai nai-le dada hai pe le phivlea ande lengo pharimos hai te na meches-tu meliardo catar i lumea.” (Iac 1:27.)
16-22 SEPTEMBRIA
SUMNACAI ANDA O LIL LE DEVLESCO PSALMII 85-87
O manglimos ajutil amen te na mechas amen hai te jias mai dur
w12 15/5-M 25 ¶10
Sicaves vi tu i gloria le Iehovaschi?
10 Caște sicavas i gloria le Devleschi, trebul ‘te cheras mai dur manglimata‘. (Rom. 12:12) Trebul te mangas le Iehovas te ajutil amen te slujisaras lesche cadea sar camel vo. Daisaras te mangas lesco spirito sfânto, te del amen mai but pachiamos hai zuralimos caște na mechas amen athade. Trebul amen o ajutorii le Iehovasco vi caște ‘jianas te folosisaras mișto o cuvânto le ciacimasco‘. (2 Tim. 2:15; Mat. 6:13; Luca 11:13; 17:5) Cadea sar ieche șiaves si les nevoia pesche dadestar caște jial lesche mișto, sa cadea, vi amen si amen nevoia le Iehovastar, amaro Dad cerisco. Dacă mangas-les te ajutil amen te cheras mai but anda leste, daisaras te avas siguro că va ajutila amen. Te na pachias niciechdata că nai-les timpo te așunel amen! Mai mișto avelas te așaras-les ande amare manglimata, te mulțumisaras lesche, te mangas-les te sicavel amenghe so te cheras cana nachas prin pharimata hai te mangas-les te ajutil amen te das pachiv lesche anavesche prin amari închinarea. (Ps. 86:12; Iac. 1:5-7)
Cuci bara anda o lil le Devlesco
it-1-E 1058 ¶5
O ilo
Te slujisaras „sea le ilesa”. Ci daisaras te traisaras ieche ilesa fizico pe dipaș. Tha amaro ilo figurativo, adică con sam de andral, daștil te avel șindo ande dui. O David manglea-pe: „De man iech ilo cai ci țârdel ande dui riga caște daral che anavestar”. Cadaia însemnol că o manuș daștil te iubil vi le Iehovas hai te iubil vi aver buchia cai ci ciaion le Devles. (Ps 86:11) I Biblia sicavel că iech manuș sar cado silo „tachiorro” anda codoia că lesco ilo si numai dipaș anda o Del. (Ps 119:113; Re 3:16) Mai but, ieche manușes daștil te avel-les „iech ilo cai athavel-les” (sar cana siles dui ile). Cado camel te slujil duie Devlenghe. Vo phenel iech buchi tha ande leschi goghi si aver vareso. (1Cr 12:33; Ps 12:2, nt) O Isus phendea angla savore că si zurales nasul te avel amen dui fețe. (Mt 15:7, 8)
23-29 SEPTEMBRIA
SUMNACAI ANDA O LIL LE DEVLESCO PSALMII 88, 89
O raimos le Iehovasco si o mai lașio
w17.06-M 28 ¶5
Te avas de i rig Iehovaschi, cai si O Mai Baro!
5 O Iehova silo O Mai Baro ando universo vi anda codoia că leschi cris si orta hai perfecto. O Iehova phenel că silo ‘Codo cai sicavel lașimos pherdo iubirea, Codo cai cherel i cris hai o ortomos pi phuv, că arachel peschi plăcerea ande cadal buchia‘. (Ier. 9:24) O Del ci lel-pe pala le manușenghe legi caște phenel so si orta hai mișto. Anda codoia că cadea silo vo, orta hai perfecto, daștil te cherel o ortomos hai te del legi scriime le manușenghe. „O ortomos hai i cris orta sile i temelia che tronoschi”. Anda codoia, daisaras te pachias zurales că lesche legi, principii hai hotărâri sile orta. (Ps. 89:14; 119:128) Tha o Satan, codo cai phendea că o Iehova si iech conducătorii neorta, ci daisardea te cherel iech lumea ande savi te avel ortomos.
w17.06-M 29 ¶10, 11
Te avas de i rig Iehovaschi, cai si O Mai Baro!
10 O raimos le Iehovasco ci șiol pe amende pharimata hai vo ci phiravel-pe nasul amența. Lesche manușa sile fericime hai daștin te alosaren corcore so te cheren. (2 Cor. 3:17) O David phendea că ando than cai o Iehova beșel si șucarimos, zuralimos hai bucuria. (1 Cron. 16:7, 27) Sa cadea, o pslamisto Etan phendea: „Fericime si o poporo cai jianel sar si te des cingar bucuriatar. O, Iehova, von phiren andi lumina cai avel catar chio mui!”. (Ps. 89:15, 16)
11 Cana gândisaras amen mai butivar co lașimos le Iehovasco, pachias vi mai but că lesco raimos si o mai lașio hai avel amenghe te phenas cadea sar o psalmisto: „Că mai lașio si iech ghies ande che barea sar iech mia ande aver than”. (Ps. 84:10) Hai cadaia si ciaces! Anda codoia că o Iehova cărdea amen hai iubil amen vo jianel so trebul amenghe caște avas ciaces fericime hai sea cadal buchia del len amenghe buhle vastența. Sea so manghel amendar vo si anda amaro miștimos hai anel amenghe fericirea chiar cana poiechdata si amenghe pharo te așunas lestar. (Citisar Isaia 48:17)
w14 15/10-M 10 ¶14
Te pachias amen zurales ando Regato le Devlesco
14 O Iehova cărdea iech promisiunea le Davidosche anda o purano Israelo. Cadai promisiunea sili prinjiandi sar o legământo le Davidosa. (2 Samuel 7:12, 16.) O Iehova phendea că o Mesia va avela iech andal șiave le Davidosche. (Luca 1:30-33) Cadea, o Iehova sicadea prin savi familia va avela o Mesia. O Iehova phendea că cadales șiaves le Davidosco, va avela-les „o drepto legalo” te avel Rege ando Regato mesianico. (Eze 21:25-27) O raimos le Davidosco va așela anda sea o timpo anda codoia că o Isus, cai țârdelas-pe anda o David, va așela „anda sea o timpo; lesco trono va așela . . . cadea de but sar o cham”. (Ps 89:34-37) Daisaras te pachias anda sea o ilo că o raimos le Mesiasco ci va cărdiola nasul hai că va anela amenghe miștimata anda sea o timpo!
Cuci bara anda o lil le Devlesco
cl 281-M ¶4, 5
„Numai tu san loialo”
4 Andel Scripturi ebraico sicavel-pe că iech manuș „loialo” si iech manuș cai așel pherdo iubirea pașa varecaste, ji cana lesco scopo codole manușesa pherel-pe. Cadaia însemnol mai but sar i fidelitatea. Iech manuș daștilas te așel fidelo numai anda codoia că trebul. Tha i loialitatea avel andai iubirea. Sa cadea, i duma „fidelo” daștil te avel folosime vi andal buchia bi viațaco. Sar exemplo, o psalmisto phendea că o șionoto si „iech martoro fidelo andel ceruri” hai cadaia cherel amen te gândisaras amen că o șionoto silo po cerii ande fiesavi riat. (Psalmo 89:37) Tha ci daisaras te phenas că o șionoto silo loialo. Sostar? Anda codoia că i loialitatea avel andai iubirea, hai le buchia bi viațaco ci daștin te sicaven iubirea.
5 I loialitatea anda savi del duma i Biblia si vareso cai avel anda iech ilo lașio. Cana varecon sicavel loialitatea varecasche, însemnol că mașcar lende si iech amalimos chidino. I loialitatea ci paruvel-pe. Ci sili sar le valuri la mareache cai sile phirade catar i barval. Mai but, o manuș loialo daștil te nachel părdal le mai bare pharimata anda codoia că silo zuralo hai ci paruvel-pe.
30 SEPTEMBRIA – 6 OCTOMBRIA
SUMNACAI ANDA O LIL LE DEVLESCO PSALMII 90, 91
Dacă pachias amen ando Iehova, va avela te traisaras but bărșa
wp19.3-M 5 ¶3-5
Daștil i știința te cherel amen te traisaras mai but bărșa?
Chichiva manușa de știință pachian că ci traisaras mai but dacă cheras tratamentea caște na purioas. Si ciaces, anda o secolo 19 le manușa train sea mai but, anda codoia că cherel-pe mai but ujimos, jianas so te cheras caște na las le nasfalimata iech catar aver, si amen draba hai vaccinea.
Acana 3 500 bărșa, o Moise phendea: „Le bărșa amara viațache sile 70, hai anda codola zurale, 80. Tha si pherde necazo hai duch, nachen sigo, hai vi amen lența”. (Psalmo 90:10) Chiar cana o manuș del peschi zor te trail sea mai but, aghies trail cadea sar phendea o Moise.
O lolo aricio paiesco hai iech specia de scoică train mai but sar 200 bărșa, hai chichiva cașta, sar si o cașt sequoia, daștin te train mii bărșa. Cana gândisaras amen chichi de țâra trail o manuș hai chichi de but train chichiva plantea hai animalea, si normalo te pușias amen: „Terminil-pe sea pala 70 sau 80 bărșa?”
wp19.1-M 5, o chenarii
Savo si o ananv le Devlesco?
But manușa pușen-pe: „Con cărdea le Devles?”. Daștil-pe că pușes tut vi tu. Dacă sea so si ando universo cărdea-len varecon, atunci le Devles con cărdea-les?
But manușa de știință pachian că le universos sas-les iech începuto. Anda codoia i Biblia phenel: „Mai anglal, o Del cărdea le ceruri hai i phuv”. (Geneza 1:1)
O universo ci daștilas te avel cărdo corcoro hai ci daștilas te avel cărdo anda chanceste. Daștis te cheres vareso anda chanceste? Aghies, o universo existil anda codoia că mai anglal te avel cărdo, sas Varecon cai cărdea les. Codo Varecon si o Iehova Del, cai si o mai goghiaver. Vo ci si sar o manuș fizico, silo spirito hai așel anda sea o timpo. (Ioan 4:24)
I Biblia phenel anda o Del: „Angla te cărdion-pe le plaina hai angla ca tu te cheres i phuv hai le phuvea cai den haben, anda sea o timpo tu san o Del hai cadea va aveia sea o timpo”. (Psalmo 90:2) Cadea că, o Del silo anda sea o timpo. Vo sas codo cai, „co începuto”, cărdea o universo. (Revelația 4:11)
Cuci bara anda o lil le Devlesco
wp17.5-M 5
Si tut iech îngero cai lel sama tutar?
I Biblia ci sicavel amen că le manușen silen iech îngero cai lel sama lendar. Si ciaces, o Isus phendea: „Len sama te na prasan nicieches anda cadal țânorre [le discipoli le Cristososche], că phenav tumenghe că lenghe îngeri, ando cerii, dichen sea o timpo i fața mânre Dadeschi, cai silo ando cerii”. (Matei 18:10) Tha o Isus ci camlea te phenel că fiesaves manușes siles iech îngero cai lel sama lestar. Vo camlea te phenel că le îngeri sile zurales interesime anda so cherel fiesavo discipolo. Le Devlesche manușa ci va cherena buchia bi goghiaco sau bi te len sama anda codoia că pachian că le îngeri va ferina-len.
Însemnol cadaia că le îngeri ci ajutin le manușen? Nici. (Psalmo 91:11) Chichiva pachian zurales că o Del ferisardea-len hai sicadea lenghe so te cheren prin le îngeri. Ando timpo cana sile andi predicarea, le Martori le Iehovasche dichen butivar sar ajutin-len le îngeri. Anda codoia că amen ci daisaras te dichas le îngeren, ci daisaras te phenas sar folosil-len o Del caște ajutin le manușen. Cu sea cadala, daisaras te mulțumisaras le Iehovasche anda o modo sar ajutil amen. (Coloseni 3:15; Iacov 1:17, 18)
7-13 OCTOMBRIA
SUMNACAI ANDA O LIL LE DEVLESCO PSALMII 92-95
Cana slujisaras le Iehovasche si amen i mai șucar viața!
w18.04-M 26 ¶5
Tărneale, camen te șion ande tumari goghi te cheren mai but anda o Iehova?
5 Trebul te șioas ande amari goghi te cheras mai but anda o Iehova anda codoia că dichas cuci leschi iubirea caring amende hai ande sea so cărdea vo anda amaro miștimos. Ando Psalmo 92:1, 4 citisaras: „Si mișto te mulțumisaras le Iehovasche . . . O, Iehova, le buchia cai cărdean len ande manghe bucuria; dav cingar bucuriatar anda le buchia cărde che vastendar”. Cuci tărne, gândisaren tumen ca so dea tumen o Iehova: i viața, o pachiamos, i Biblia, i congregația creștino hai i șucar speranța te train anda sea o timpo. Cana șion po iechto than le Iehovas, sicaven că mulțumisaren lesche anda sea cadal șucar buchia hai cadea pașion vi mai but lestar.
w18.11-M 20 ¶8
Pala caschi goghi les tut?
8 Cadea sar iech lașio Dad, o Iehova camel te avel amen iech viața pherdi bucuria. (Is. 48:17, 18) Anda codoia, vo camel te hachiaras o modo sar gândil vo hai te traisaras amari viața cadea sar manghel amendar vo caște avel amen iech viața uji hai sar te phiravas amen averența. Cadai buchi ci si phari, tha ajutil amen te avas mai goghiaver, te cheras alosarimata cai anen amenghe bucuria hai cai mechen amen te lulughioas. (Ps. 1:2, 3; 92:5; Prov. 2:1-5; Is. 55:9) Si ciaces, cana si amen i goghi le Iehovaschi, si amen but miștimata!
w20.01-M 19 ¶18
O Iehova, chio Del, dichel tut cuci!
18 Chiar cana phurioas, ci trebul te pachias că o Iehova ci mai del amen chanci te cheras anda leste. (Ps. 92:12-15) O Isus sicadea că sea so cheras anda o Iehova si cuci ande lesche iacha, chiar cana pachias că ci sam lașe chancestar hai că ci cheras prea but. (Luca 21:2-4) Cadea că, te dichas ca so daisaras te cheras. Sar exemplo, daisaras te das duma anda o Iehova, te mangas amen anda amare phrala hai te zuriaras averen caște așen loialo. O Iehova dichel tut zurales cuci anda codoia că așunes lestar, na anda le buchia save cheres-len. (1 Cor. 3:5-9)
Cuci bara anda o lil le Devlesco
cl 176-M ¶18
O baro goghiaverimos le Devlesco
18 Ita so phendea o Pavel anda o baro goghiaverimos le Iehovasco: „O butimos le barvalimasco, le goghiaverimasco hai le prinjianimasco le Devlesco! Chichi de neprinjiande si lesche judecăți hai chichi de but si lesche riga!”. (Romani 11:33) Ande le dintune dumes, o Pavel phenel so si ande pesco ilo hai, prin cadaia, vo sicavel peschi bari pachiv caring o Del. I duma grecisco cai folosisardea-la anda „butimos” ameal la dumasa „abiso”(bari hâv). Cadal dumes ajutin amen te cheras amenghe iech imaginea ande amari goghi. Cana gândisaras amen co goghiaverimos le Iehovasco, si sar cana dichas atento ande iech bari hâv cai ci terminil-pe, sau iech than cadea de baro că ci daisaras te hachiaras niciechdata chichi de buhlo, ucio hai adânco silo. (Psalm 92:5) Ci camas te avas mai umilo cana gândisaras amen cadale buchiande?
14-20 OCTOMBRIA
SUMNACAI ANDA O LIL LE DEVLESCO PSALMII 96-99
Phenen i vestea lași!
w11 1/3-M 6 ¶1, 2
So si i vestea lași?
LE CREȘTINI trebun te phenen ‘i vestea lași anda o Regato‘ hai vi te phenen le manușenghe că o Regato va raila ortomasa pe sea i phuv. Tha andi Biblia, i duma „vestea lași” si folosime ande mai but moduri. Sar exemplo, „i vestea lași le hastraimaschi” (Psalmo 96:2), ‘i vestea lași le Devleschi‘ (Romani 15:16) hai ‘i vestea lași anda o Isus Cristos‘. (Marcu 1:1)
I vestea lași si sea le ciacimata phende le Isusostar cai scriisarde-len lesche discipoli. Mai anglal te jial ando cerii, o Isus phendea pesche discipolenghe: „Jian deci hai cheren discipoli anda le manușa anda sea le națiuni, bolindoi-le ando anav le Dadesco, le Șiavesco hai le spiritosco sfânto hai sicaven-len te încăren sea so me poruncisardem tumenghe”. (Matei 28:19, 20) Cadea că, le ciace creștini ci trebun te den duma numai anda o Regato, tha vi te den penghi zor te cheren discipoli.
w12 1/9-M 16 ¶1
So va avela ando Ghies la Crisaco?
Cadea sar dichas andi imaginea cai si andi ciaci rig, but manușa pachian că, ando Ghies la Crisaco, miliardea sufletea va avena andine angla o trono le Devlesco caște cherel-pe lenghe cris pala le buchia cai cărde-len mai anglal – chichiva caște jian opre ando cerii, hai aver caște aven chinuime andi iag. Tha i Biblia phenel că o Ghies la Crisaco si caște cherel-pe le manușenghe ortomos. (Psalmo 96:13) O Del șiutea le Isusos te cherel i cris hai te cherel te avel pale o ortomos pi phuv. (Citisaren Isaia 11:1-5; Faptele 17:31)
w12 15/09-M 12 ¶18, 19
Pacea anda iech mia bărșa hai vi pala codoia
18 Cado șucar amalimos rimosardea-pe cana le manușa sas-le athade le Satanostar, risarde o dumo le Iehovasche hai ci pachiaie că vo si o mai baro. Anda o bărș 1914, o Regato mesianico astardea te „chidel sea le buchia . . . andal ceruri hai buchia pa i phuv” hai te avel pale pacea mașcar lende. (Ef. 1:9, 10) Ando Raimos de Iech Mia Bărșa, le bare buchia cai aghies „ci dichen-pe” va avena ciaces. So va avela „co sfârșito”, adică cana va nachena codola iech mia bărșa? Chiar cana ‘sea i autoritatea sas lesche dini ando cerii hai pi phuv‘, o Isus ci cherel so camel vo hai ci camel te lel o than le Iehovasco. Pherdo umilința, vo „va dela parpale o Regato pesche Devlesche hai Dadesche”. O Isus va folosila peschi autoritatea „caring i pachiv le Devleschi”. (Mat. 28:18; Filip. 2:9-11)
19 Ji atunci, sea le manușa opral save va raila o Regato va avena perfecto. Cadea sar o Isus, vi von va avena pherde umilința hai va pachiana anda sea o ilo că o Iehova si o mai baro. Ando palutno testo, von va sicavena cadai buchi dacă așen lesche loialo. (Rev. 20:7-10) Pala codoia, sea le manușa hai le îngeri cai ci așunde le Devlestar va avena distrugime anda sea o timpo. So bari bucuria va avela! I familia le Iehovaschi anda o cerii hai pa i phuv va așarena-les, hai vo va avela „sea anda savore”. (Citisaren Psalmo 99:1-3)
Cuci bara anda o lil le Devlesco
it-2-E 994
Ghili
I Biblia del duma anda „i nevi ghili” andel Psalmii tha vi ande aver lila sar avenas o Isaia hai o Ioan. (Ps 33:3; 40:3; 96:1; 98:1; 144:9; 149:1; Isa 42:10; Re 5:9; 14:3) Cana citisaras sea o capitolo ande savo del-pe duma anda cadaia, hachiaras că „i nevi ghili” sas-li ghilabadi cana o Iehova cărdea neve buchia caște sicavel că vo silo O Mai Baro ande sea o Universo. Sar exemplo ando Psalmo 96:10 phenel-pe: „O Iehova cărdilea rege.” Andi „nevi ghili” del-pe duma anda o fapto că o Iehova bariardea pesco raimos hai cadaia andea miștimata ando cerii hai pi phuv. (Ps 96:11-13; 98:9; Isa 42:10, 13)
21-27 OCTOMBRIA
SUMNACAI ANDA O LIL LE DEVLESCO PSALMII 100-102
Te sicavas că si amenghe cuci i iubirea loialo le Iehovaschi
w11 15/7-M 16 ¶7, 8
Cheres so phenel tuche o Iehova?
7 Sar daisaras te așias dur catar le sicaitori neciace? Amen ci das-len lașio ghies hai ci acharas-len ande amare chăra. Ci citisaras lenghe lila, ci dichas lenghe programea TV, ci jias pe lenghe site-uri hai ci mechas comentarii ca so șion von po interneto. Sostar ci cheras cadaia? Ando iechto than, anda codoia că iubisaras „le Devles le ciacimasco”. Amen ci interesin amen lenghe sicaimata neciace cai si contra o Cuvânto ande savo si o ciacimos. (Ps. 31:5; Ioan 17:17) Ando duito than, anda codoia că iubisaras i organizația le Iehovaschi. Prin late sichileam o ciacimos anda o anav le Devlesco, anda so însemnol vo, anda so camel o Del te cherel la phuveasa, anda so si amența cana meras sau anda i speranța că va avaia pale viațate. Anes tuche amintea sar simțosardean tut cana sichilean cadal cuci ciacimata? Na mech ca le sicaitori neciace te athaven tut hai te cheren tut te na mai pachias andi organizația le Iehovaschi! (Ioan 6:66-69)
8 Oriso avelas te phenen cadal sicaitori neciace, amen ci va avela te las amen pala lende. Sostar te jias ca iech haing ande savi ci si pai? Caște avas sea o timpo trușale? Amen ci camas te avas cadea niciechdata. Cadea că, te das amari zor te așias loialo le Iehovasche hai lesca organizațiache! Te na bâstras că i organizația le Iehovaschi ci mechel amen trușale spiritualo. Voi del amen de but timpo o ujo pai le ciacimasco. (Is. 55:1-3; Mat. 24:45-47)
Cuci bara anda o lil le Devlesco
it-2-E 596
Pelicano
Cana o pelicano silo ciailo, vo zburil dur ande thana cai ci si chonic. Code vo țârdel peschi cori tele hai mechel pesco șăro po dumo bi te mișchil-pe sar cana silo zurales tristo. De durial, fal-pe că si iech parno bar. Vo beșel cadea but ceasuri, bi te cherel chanci. Anda codoia, cana dea duma anda peschi duch, o psalmisto phendea: „Som sar iech pelicano ando than ande savo ci beșen le manușa” (Ps 102:6). Cade, „o than cai ci beșen le manușa” ci si iech șuco than, tha si iech than paialo hai cicalo. Andi Valea le Iordanoschi sas but pelicanea. Von sasle de but feluri tha le mai but sas parne.
Le pelicanos ceaiol-les zurales but te beșel corcoro andel thana cai le manușa ci deranjil-les. Code, vo cherel anre hai beșel pe lende ji cana înclen le pui. Mai but, pala so astarel mașe, vo avel pale ande codo than caște odihnil-pe. I Biblia del duma anda o pelicano cana camel te sicavel că varecon silo corcoro hai zurales tristo. Caște sicavel că ci va mai avela chonic ando Edomo, i Biblia phenel că ande leste va beșena le pelicani. (Is 34:11) O Țefania phendea de mai anglal că le pelicani va beșena ando Ninive, caște sicavel că ci va mai așela niciech manuș ando foro. (Țef 2:13, 14)
28 OCTOMBRIA – 3 NOIEMBRIA
SUMNACAI ANDA O LIL LE DEVLESCO PSALMII 103, 104
Cuci bara anda o lil le Devlesco
cl 55-M ¶18
O zuralimos savesa cărdea sea le buchia – „Codo cai cărdea o cerii hai i phuv”
18 Le Iehovas siles o zuramos te cherel but neve buchia hai șucar. Cana dichas i creația ci avel amenghe te pachias chichi de șucar sili. Iech psalmisto phendea: „Chichi de but si le buchia cai cărdean-le, o, Iehova! I phuv si pherdi le buchianța cai cărdean-le.” (Psalmo 104:24) Chichi de ciace si cadal dumes! Pi phuv si cadea de but jiuvindimata că le manușa ci daștin te înghinen-len. Poiechdata le artiști ci jianen so neve buchia te mai cheren. Tha o Iehova na-i cadea. Les si les o goghiaverimos hai o zuralimos caște cherel sea o timpo buchia neve hai șucar.