Referințea anda o Caieto anda i întrunirea „Amari viața sar creștini hai i predicarea”
© 2024 Watch Tower Bible and Tract Society of Pennsylvania
1-7 IULIA
SUMNACAI ANDA O LIL LE DEVLESCO PSALMII 57-59
O Iehova ci mechel codolen nasul te cheren so camen lesche poporosa
bt-M 220, 221 ¶14, 15
„Ji ande o mai duriardo than la phuveaco”
14 Angla te avel mudardo, o Ștefan dea duma pherdo tromai anda i vestea lași. (Fap. 6:5; 7:54-60) Anda codoia că avilea „iech bari persecuția”, avreal le apostoli, sea le dicipoli sas-le nașade andi Iudeea hai andi Samaria. Tha cadaia ci așadea-len te phenen i vestea lași. O Filip gălea andi Samaria caște del duma le manușenghe de othar hai cadala așunde-les. (Fap. 8:1-8, 14, 15, 25) Mai but, i Biblia phenel că von arăsle ji andi Fenicia, ando Cipro hai andi Antiohia. Code, von ci denas duma anda i vestea lași numai le iudeienghe, tha vi codolenghe cai avile anda o Cipro hai anda i Cirena hai denas duma i șib greaca. (Fap. 11:19, 20) Ando iechto secolo, i persecuția cărdea ca i vestea lași anda o Regato te avel phendi ande mai but thema.
15 Sa cadea sas vi andi Uniunea Sovietico, ande amare ghiesa. Ande le bărșa ‘50, mii Martori le Iehovasche sas-le îngărde andi Siberia. Anda codoia că sas-le hulade ande diferime thana, von daisarde te den duma anda i vestea lași ande codo baro them. Niciechdata ci daștinas cadea de but Martori le Iehovasche te jian andi Siberia te den duma anda i vestea lași, anda codoia că sas cam 10 000 kilometri dur lendar. Len ci sas-len cadea de but love caște cheren cadaia. Tha, chiar o guverno ajutisardea-len te arăsăn ande sea o them. Iech phral phendea că chiar le autorități ajutisarde mii manușa andai Siberia, te arăsăn te prinjianen o ciacimos.
8-14 IULIA
SUMNACAI ANDA O LIL LE DEVLESCO PSALMII 60-62
O Iehova del amen siguranța, feril amen hai zuriarel amen caște na peras
it-2-E 1118 ¶7
Turno
Senso figurato. Codola cai sicaven pachiamos ando Iehova hai așunen lestar sile andi siguranța. Vi o David phendea ande iech ghili că anda leste, o Iehova sas iech garaimos, iech zuralo turno angla lesche dușmani. (Ps 61:3) Amen ci daras chancestar cana hachiaras so însemnol o anav le Devlesco, pachias amen ande leste hai phiravas-les pachivales. Cadai buchi si ciaci anda codoia că i Biblia phenel: „O anav le Iehovasco si iech zuralo turno. Codo orta nașel ande leste hai silo ferime”. (Pr 18:10; dich vi 1Sa 17:45-47)
it-2-E 1084 ¶8
Țărha
Andi Biblia, butivar, del-pe duma anda „i țărha” ande iech modo figurativo. Iech țărha sas iech than cai varecon daștilas te avel ferime hai te beșel liniștime. (Ge 18:1) Cana iech manuș sas-lo achardo ande varecaschi țărha, vo jianelas că va lela-pe sama lestar hai că va avela te del-pe lesche pachiv. Sar exemplo, andi Revelația 7:15 del-pe duma anda iech bari mulțimea hai phenel-pe că o Del ‘va zinghiarela peschi țărha părdal lende’. Cadaia sicavel că o Del feril-len hai zuriarel-len caște na peren. (Ps 61:3, 4) Vi o Isaia del duma anda iech țărha. Vo phenel că o Siono si ‘i rromni le Devleschi’ hai că va avela te năștil șiave. O Isaia phenel că voi va ‘bariarela peschi țărha‘ anda lache șiave. (Is 54:2) Cadaia însemnol că voi bariarel o than cai lache șiave va avena ferime.
w02 15/04-M 16 ¶14
Le Devlesche legi sile ande amaro miștimos
14 I legea le Devleschi ci paruvel-pe, hai cadaia cherel amen te avas andi siguranța. Ande le phare timpuri cai traisaras, o Iehova silo iech stânca cai ci mișchil-pe, cai silo anda sea o timpo. (Psalmo 90:2) Vo phenel anda peste: „Me som o Iehova, me ci paruvav man”. (Maleahi 3:6) Daisaras te pachias amen zurales ande le Devlesche legi, cai arachas-len andi Biblia. Tha ci daisaras te phenas sa codoi buchi anda le manușenghe legi, anda codoia că von butivar paruven-len. (Iacov 1:17) Sar exemplo, but bărșa le psihologi phende că, caște bariares mișto le șiaven trebul te meches pala lende. Tha, pala iech timpo, chichiva anda lende dine penghi sama că cadai buchi na-i lași anda le șiave. O sicaimos le manușengo anda sar te bariaras le șiaven paruvel-pe sea o timpo, ci așel pe thaneste, sar iech patrin cai sili phurdini catar i barval. Tha o Cuvânto le Iehovasco ci paruvel-pe. De șăla bărșa, i Biblia del amen sfaturi pherde iubirea anda sar te bariaras le șiaven. O apostolo Pavel phendea: „Dada, na holiaren tumare șiaven, tha bariaren-len andi disciplina hai ando sicaimos le Iehovasco”. (Efeseni 6:4) Daisaras te pachias amen zurales andi legea le Iehovaschi, anda codoia că ci paruvel-pe hai cherel amen te avas andi siguranța.
Cuci bara anda o lil le Devlesco
w06 1/06-M 11 ¶6
Idei importanto anda o lil Psalmii
62:11. Le Devles ci trebul-les zuralimos chanicastar, anda codoia că lestar avel o zuralimos. „O zuralimos si le Devlesco”.
15-21 IULIA
SUMNACAI ANDA O LIL LE DEVLESCO PSALMII 63-65
„Chi iubirea loialo si mai cuci sar i viața”
w01 15/10-M 15, 16 ¶17, 18
Con va duriarela amen catar i iubirea le Devleschi?
17 Chichi de importanto si anda tumende i iubirea le Devleschi? Ita so phendea o David: „Anda codoia că chi iubirea loialo si mai cuci sar i viața, mânre ușta va avena te așaren tut. Va avela te așarav tut sea mânri viața. Ande chio anav va avela te vazdav mânre vasta”. (Psalmo 63:3, 4) Daștil i viața ande cadai lumea te del amen vareso mai cuci sar i iubirea hai o amalimos loialo le Devlesco? Sar exemplo, so si mai cuci anda tute: iech buchi cai anel tuche but love sau o amalimos chidino le Iehovasa, cai anel tuche pacea andi goghi hai bucuria? (Luca 12:15) Chichiva creștini trebuisarde te alosaren te mechen le Iehovas sau te meren. Sar exemplo, ando Duito Războio Mondialo andi Germania nazisto, le mai but anda amare phrala alosarde te așen andi iubirea loialo le Devleschi, chiar cana trebuisarde te meren anda cadaia. Codola cai așen andi iubirea le Devleschi daștin te pachian că o viitorii cai va dela-len o Iehova si iech viitorii but mai lașio sar daștil te del-len i lumea. (Marcu 8:34-36) Tha si mai but sar cadichi.
18 Amen jianas că bi le Iehovasco, ci daisaras te traisaras anda sea o timpo. Tha, te gândisaras amen sar avelas te traisaras anda sea o timpo bi codolesco cai cărdea amen. Ci avelas amen iech viața șucar hai ci avelas te jianas sostar traisaras. Ande cadal palutne ghiesa, o Iehova dea penghe slujitorenghe te cheren iech buchi cai anel lenghe bucuria. Daisaras te pachias ciaces că o Iehova va pherela pesche promisiuni hai va dela amen viața veșnico, ande savi va avela te sichioas hai te cheras but șucar buchia. (Eclesiasto 3:11) Chiar cana mii bărșa va avela te sichioas but buchia, ci va avela te arăsas niciechdata te prinjianas „o butimos le barvalimasco, le goghiaverimasco hai le prinjianimasco le Devlesco”. (Romani 11:33)
w19.12-M 28 ¶4
„Anen mulțumiri ande orisavi buchi”
Si mișto te mulțumisaras le Devlesche anda le buchia cai del-len amenghe. Poiechdata, anas amenghe amintea catar le but buchia spiritualo hai materialo cai dea-len amenghe o Del. (Deut. 8:17, 18; Fap. 14:17) Tha trebul te cheras mai but sar cadichi. Trebul te cheras amenghe timpo te beșas hai te gândisaras amen ca le but miștimata cai dea-len amenghe hai codolenghe cai si amenghe cuci. Cana gândisaras amen chichi de but șucar buchia del amen amaro Creatorii, pachias vi mai but că vo iubil amen hai că dichel amen cuci. (1 Ioan 4:9)
w15 15/10-M 24 ¶7
Te gândisaras amen vi mai dur ca le buchia spiritualo
7 Si ciaces, poiechdata na-i amenghe ușoro te citisaras. Tha vi mai pharo si te gândisaras amen ca so citisardeam. Poiechdata, cana camas te citisaras, trebul te das amari zor. Tha cana camas te beșas hai te gândisaras amen ca so citisardeam, trebul te das vi mai but amari zor te folosisaras amari goghi, anda codoia că amari goghi imperfecto camel te cherel buchia mai ușoro. Cadea că, cana camas te beșas hai te gândisaras amen, avelas mișto te na avas chine hai te rodas iech than liniștime, ande savo na-i chanci cai daștil te țârdel amari atenția. O David alosardea te gândil-pe andi riat, ande pesco pato, cana ci daștilas te sovel. (Ps. 63:6) Vi o Isus, cai sas-les iech goghi perfecto, alosardea thana liniștime ande save te gândil-pe hai te manghel-pe le Devlesche. (Luca 6:12)
w09 15/07-M 16 ¶6
Te sicavas averen, pherde iubirea, cadea sar o Isus
6 Ciaiol amen te das duma anda le manușa cai si amenghe cuci. Cana das duma anda varecaste cai si amenghe drago, dichiol-pe pe amende că das duma anda sea o ilo hai pherde bucuria. Amaro ilo thabol te phenas vi averenghe so jianas anda leste. Cadea că, prin so phenas, das-les pachiv, așaras-les hai las leschi partea. Cheras sea cadala anda codoia că camas ca vi aver manușa te dichen-les cuci.
Cuci bara anda o lil le Devlesco
w07 15/11-M 15 ¶6
Zuriares averen?
Si mai ușoro te des tele iech chăr sar te vazdes iech nevo. Cadea si vi cana das duma. Anda codoia că sam imperfecto, savore greșisaras. O rege Solomon phendea că „ci si manuș orta pi phuv savo te cherel numai o miștimos hai te na păcătuil niciechdata”. (Eclesiasto 7:20) Si loches te diches le greșeli ieche manușesche hai te peraves-les chire dumența. (Psalmo 64:2-4) Tha, caște zuriares-les trebul te jianes mișto sar te des duma.
22-28 IULIA
SUMNACAI ANDA O LIL LE DEVLESCO PSALMII 66-68
O Iehova phiravel amare pharimata de fiesavo ghies
w10 1/12-M 23 ¶6
Te las sama codolendar cai bariaren penghe șiaven corcore
Cana jianas te anen închinarea le Iehovasche, le israeliți ghilabanas le ghilea sfânto, sau le psalmi, cai acana sile scriime ando lil le Devlesco. Mașcar lende sas phivlea hai șiave bi dadengo. Cadal ghilea anenas lenghe andi goghi că o Iehova sas lengo dad hai codo cai va hastravela-len. Gândisar tut chichi de zuriarde sas-le cana ghilabade cadal dumes! (Psalmo 68:5; 146:9) Vi amen daisaras te phenas dumes cai zuriaren codolen cai bariaren corcore penghe șiaven hai daștil-pe că von ci va avela te bâstren-len but bărșa. Iech phei po anav Ruth, cai bariardea corcori pesche șiaven, anel pesche andi goghi so phendea lache acana 20 bărșa iech phral cai sas iech lașio dad : „Tu bariares zurales șucar che duien șiaven. Cher mai dur sa cadea!”. I Ruth phenel: „Cadal dumes cai așundem-len zuriarde man but”. Si ciaces, le dumes cai sastiaren daștin te zuriaren mai but sar pachias varecas cai bariarel corcoro pesche șiaven. (Proverbe 15:4) Gândis tut vi tu sar te zuriares varecas cai bariarel corcoro pesche șiaven?
w09 1/4-M 31 ¶1
O Dad le șiavengo bi dadesco
I Biblia phenel că o Del, cai beșel ande pesco than sfânto, si „o Dad codolengo bi dadesco”. (Psalmo 68:5) Anda cado verseto sichioas vareso zurales șucar anda o Iehova: că les duchal-les le șiavendar casche mule lenghi dei sau lengo dad. Andi Legea cai dea-la le Israelosche o Iehova sicadea că camlea anda ilo te lel sama lendar. Te dichas andi Biblia o dintuno than cai del-pe duma anda o șiavo cai ci sas-les dad, ando Exodo 22:22-24.
Cuci bara anda o lil le Devlesco
w06 1/6-M 10 ¶5
Idei importanto anda o lil Psalmii
68:18 – Con sas ‘le manușa sar daruri‘? Cadala sas murșa cai mai anglal beșenas ando Them Promiso, tha save le israeliți line-len pența cana șiute cado them tela pengo zuralimos. Pala iech timpo, cadal murșa sas-le șiute te cheren buchi anda le leviți. – Ezra 8:20.
29 IULIA – 4 AUGUSTO
SUMNACAI ANDA O LIL LE DEVLESCO PSALMO 69
So buchia prin save nachlea o Isus sas phende de mai anglal ando Psalmo 69
w11 15/8-M 11 ¶17
Von ajucărde le Mesias
17 Le manușa avenas te urân le Mesias bi te avel-len sostar. (Ps. 69:4) Ando lil Ioan arachas so phendea o Isus: „Dacă ci cărdemas le buchia ande lengo mașcar cai chonic ci daștilas te cherel-len, ci avelas-len păcato. Tha acana dichle-man hai urâsarde vi man, vi mânre Dades. Tha cadaia întâmplol-pe caște pherel-pe lenghi Legea: «Urâsarde man bi te avel-len sostar»”. (Ioan 15:24, 25) I „Legea” anda savi del-pe duma cade si le Scripturi cai sas ande codo timpo. (Ioan 10:34; 12:34) Le Evanghelii sicaven că o Isus sas urâme mai but le rașaiendar evrei. O Isus phendea: ”I lumea na-i sostar te urâl tumen, tha man urâl man anda codoia că dav duma anda lache buchia nasul cai cherel-len”. (Ioan 7:7)
w10 15/12-M 8 ¶7, 8
Te thabol amaro ilo anda i ciaci închinarea
7 Iech relatarea anda i viața le Isusoschi sicavel claro sar thabolas lesco ilo anda i ciaci închinarea. Sas 30 a.e. hai i Patraghi pașiolas. Na de but timpo, o Isus astardea leschi buchi pi phuv. Vo avilea co Ierusalimo ande iech than le discipolența hai dichlea ando templo „codolen cai bichinenas guruvnea, bacrea hai porumbei hai codolen cai paruvenas le love code”. So cărdea o Isus hai so avilea andi goghi le discipolenghi? (Citisar Ioan 2:13-17.)
8 Cana le discipoli dichle hai așunde le Isusos, ande lenghi goghi avile le dumes cai phendea-len o David: „Thabolas o ilo ande mande anda chio chăr”. (Ps. 69:9) Tha sostar andea ande penghi goghi cadal dumes? Anda codoia că so cărdea o Isus sas zurales pharo. Codola cai bichinenas bi lajiaves ando templo sas le rașaia, le scribi hai aver bare manușa catar o templo. Anda codoia că ci mechle-len te cheren so camen, o Isus arăslea lengo dușmano. Cadea sar dichle vi lesche discipoli, le Isusosco ‘ilo thabolas anda o chăr le Devlesco‘, sau anda i ciaci închinarea.
g95 22/10-M 31 ¶4
Daștis te meres anda codoia că si duchado chio ilo?
Chichiva phenen că o Isus mulea anda codoia că lesco ilo sas-lo duchado, cadea sar sas phendo de mai anglal: „Le prasaimata duchade mânro ilo hai i duch ci sastiarel-pe”. (Psalmo 69:20) Angla so te merel, le Isusos sas-les ducha fizico zurales bare, hai vi lesco ilo sas-lo zurales duchado. (Matei 27:46; Luca 22:44; Evrei 5:7) Daștil-pe că anda codoia că sas-les cadai bari duch, pharadilea lesche iech vena principalo sau lesco ilo, hai o rat arăslea ando colin sau ando pericardo (o gonorro cai pachiarel o ilo), cai si vi pai. Cadea că, cana o Isus sas-lo pusado iecha sulițasa ca țâra timpo pala soste mulea, i Biblia phenel că anda leste șiordea-pe „rat hai pai”. (Ioan 19:34)
it-2-E 650
Otrava
Anda o Mesia phendea-pe de mai anglal că va avela te del-pe lesche te hal „otrava”. (Ps 69:21) Hai cadea sas. Angla te avel șiuto po stâlpo, le Isusosche dea-pe lesche mol ande savi sas cărchi. Cana gustisardea hai dichlea că sas iech pimos cai țâniarel i duch, o Isus ci mai camlea te piel-les. O Matei scriisardea anda sar pherdilea-pe cadai profeția, hai folosisardea iech duma grecisco kholḗ, cai însemnol cărchi (Matei 27:34). Sa codoi duma si vi andi Septuaginta grecisco co Psalmo 69:21. Tha cana o Marcu scriisardea anda cadai buchi, vo folosisardea i duma „smirna” (Mr 15:23); anda codoia but phenen că „i otrava” sau „i cărchi” si „i smirna”. Aver phenen că cado pimos cai lel anda duch sas cărdo anda i cărchi hai smirna.
Cuci bara anda o lil le Devlesco
w99 15/1-M 18 ¶11
Amare vasta te aven loialo cana vazdas-len ando manglimos
11 But manușa phenen manglimata le Devlesche numai caște manghen lestar vareso. Tha amen, iubisaras le Iehovas, anda codoia mulțumisaras lesche hai așaras-les vi cana mangas amen lesche corcore hai vi cana manghas amen lesche angla aver. I Biblia phenel: „Na îngrijorin tumen anda chanceste, tha ande orisavi buchi, prin manglimata hai implorări ande iech than mulțumirența, cheren prinjiande le Devlesche tumare manghimata, hai i pacea le Devleschi, cai nachavel orisavo hachiarimos, va păzila tumaro ilo hai goghi prin o Cristos Isus. (Filipeni 4:6, 7) Si ciaces, daisaras te mangas le Iehovastar but buchia, tha trebul vi te mulțumisaras lesche anda le lașe buchia cai del-len amenghe vi fizico vi spiritualo. (Proverbe 10:22) O Psalmisto phendea că cana mulțumisaras le Devlesche, anas lesche iech jertfa. (Psalmo 50:14) Hai ande iech manglimos cai ghilabadea-les le Devlesche, o David phendea zurales șucar că va avela te așarel o anav le Devlesco prin ghilea hai mulțumiri. (Psalmo 69:30) Ci trebulas vi amen te cheras sa cadea cana mangas amen le Iehovasche corcore sau angla aver?
5-11 AUGUSTO
SUMNACAI ANDA O LIL LE DEVELSCO PSALMII 70-72
De duma le tărnenghe anda o zuralimos le Devlesco
w99 1/9-M 18 ¶17
Tărne, folosin mișto tumari goghi caște cheren lașe alosarimata!
17 Caște așas dur le Satanostar, butivar trebul te avas atenți hai te avel amen but tromai. Daștil-pe că poiechdata ci hachiaren tumen chanicasa, nici tumare colegența, sau aver varecasa. O David manglea-pe cadea: „Tu san mânri speranța, o, Devla Iehova cai san O Mai Baro, pachiav man ande tute anda mânro tărnimos! O, Devla, tu sicadean man de cana somas tărno hai acana dav duma anda che șucar buchia”. (Psalmo 71:5, 17) O David sas prinjiando sar manuș tromano. De cana sas vo tromano? De cana sas tărno! Angla so te marel-pe le Goliatosa, o David sicadea iech baro tromai cana mudardea iech leo hai iech riș caște lel sama catar i turma peschi dadeschi. (1 Samuel 17:34-37) Cu sea cadala, o David phendea că o Iehova cărdea sea cadal buchia hai că de cana sas-lo tărno șiutea pesco pachiamos ande leste. Cadea, o David daisardea te nachel părdal orisavo pharimos cai avilea ande leschi viața. Dacă vi tumen șion tumaro pachiamos ando Iehova, vo va dela tumen tromai hai zuralimos caște ‘biruin i lumea‘. (1 Ioan 5:4)
g04 8/10-M 23 ¶3
Sar trebulas te phiravas amen codolența mai phure?
O psalmisto manglea-pe: „Na duriar-tut mandar co phurimos, na mech man cana ci si man zuralimos!”. (Psalmo 71:9) O Del ci ‘duriarel-pe‘ pesche slujitorendar fidelo, chiar cana von pachian că ci sile lașe chancestar. O psalmisto ci simțosardea că o Iehova mechlea-les; mai but, ando timpo so phuriolas, vo phendea că trebulas te șiol vi mai but pesco pachiamos ando Iehova. O Iehova silo pașa codola loialo hai ajutil-len sea lenghi viața. (Psalmo 18:25) Butivar, o Iehova ajutil amen prin le phrala creștino.
w14 15/1-M 23 ¶4, 5
Slujin le Iehovasche angla te aven le phare ghiesa
4 Dacă san mai phuro, puș tut: Chichi timpo si man zuralimos, so va avela te cherav mânra viațasa? Dacă san Martoro le Iehovasco de but timpo, daștis te cheres but buchia cai aver ci daștin te cheren-len. Sar exemplo, daștis te phenes le tărnenghe chichiva buchia cai sichilean-len catar o Iehova. Daștis te zuriares averen cana phenes so bucuria sas-tut andi buchi le Iehovaschi. O David manglea-pe caște daștil te cherel cadai buchi. Vo phendea: „O, Devla, tu sicadean man de cana somas tărno . . . Na mech man, o Devla, cana som phuro hai mânre bal parnile. Mech man te dav duma le șiavenghe cai aven pala mande anda chio zuralo vast hai savorenghe cai va avena anda chio zuralimos.” (Ps. 71:17, 18)
5 Sar daștis te phenes vi averenghe le șucar buchia cai sichilean-len ande chi viața? Daștis te achares tute chăre chichiva tărnen caște bucurin tumen hai caște zuriaren tumen iech averen. Sau daștis te achares-len andi predicarea caște dichen chichi de bucurime san cana cheres cadai buchi anda o Iehova. O Elihu phendea: „Te den duma le bărșa, le but bărșa te sicaven o goghiaverimos”. (Iov 32:7) O apostolo Pavel phendea le pheianghe cai sile mai phure te zuriaren averen prin so phenen hai so cheren. Vo scriisardea: „Le jiuvlea mai phure . . . te sicaven averen so si mișto”. (Tit 2:3)
Cuci bara anda o Lil le Devlesco
it-1-E 768
Eufrato
I granița le themeschi cai sas dini le Israelosche. Cana cărdea iech legământo le Avraamosa, o Del promitisardea lesche că va avela te del lesche șiavenghe o them cai zinghiarelas-pe ‘de catar i len le Egiptoschi ji ca i bari len Eufrato’. (Ge 15:18) Cadai promisiunea sas cărdi mai butivar le poporosche Israel. (Ex 23:31; De 1:7, 8; 11:24; Ios 1:4) I profeția pherdilea-pe cu sea angla so te rail o David, cana chichiva șiave le Rubenosche zinghiarde pengo them „ji cai astarel o șuco than pașa i bari len Eufrato”. (1Cr 5:9) O Eufrato sas cam 800 km dur catar „o esto anda o Galaado”. (1Cr 5:10) Cadea că, le versetea daștinas te sicaven că le rubeniți zinghiarde pengo them catar o esto anda Galaado ji cai terminil-pe o Șuco Than la Siriaco, cai zinghiarel-pe ji co Eufrato. Cadea că, i promisiunea le Iehovaschi pherdilea-pe cu sea ando timpo so railas o David hai o Solomon cana ando them le Israelosco arăslea te cherel partea vi o regato arameeano andai Țoba cai zinghiardea-pe ji co Eufrato (anda o nordo la Siriaco). (2Sa 8:3; 1Re 4:21; 1Cr 18:3-8; 2Cr 9:26) Anda codoia că o Eufrato sas importanto, phenelas-pe lesche „I Bari Len”. (Ios 24:2, 15; Ps 72:8)
12-18 AUGUSTO
SUMNACAI ANDA O LIL LE DEVELSCO PSALMII 73, 74
Sam invidioso pe codola cai ci slujin le Devlesche?
w20.12-M 19 ¶14
O Iehova hastravel codolen cai sile perade
14 O manuș cai scriisardea o Psalmo 73 sas iech levito. Anda leste sas iech bari buchi te slujil ando than cai anelas-pe închinarea le Iehovasche. Cu sea cadala, vo saslo zurales perado. Sostar? Anda codoia că arăslea te avel invidioso pe codola baricane, na anda le buchia nasul cai cherenas-len tha anda codoia ca jialas lenghe misto. (Ps. 73:2-9, 11-14) Falas-pe că ci sas-len pharimata hai că sas-len sea so trebul lenghe sar avelas barvalimata hai iech viața fericime. Cana dichlea sea cadala, o psalmisto sas-lo cadea de perado că arăslea te pachial că so cărdea vo sas de ivea. Vo saslo ande iech baro pericolo spiritualo.
w20.12-M 19, 20 ¶15, 16
O Iehova hastravel codolen cai sile perade
15 Citisar Psalmo 73:16-19, 22-25. O Levito gălea andre ando baro chăr le Devlesco. Cade sas vi aver manușa cai anenas închinarea le Iehovasche. Cadea, astardea te dichel avere iachența le buchia hai manglea-pe. Vo dea peschi sama că ci gândilas mișto hai că daștilas te hasarel pesco amalimos le Iehovasa. Sa cadea hachiardea că codola nasul beșenas pe iech phuv cai ci daștinas te așen ande pânrende hai că lengo sfârșito va avela nasul. Caște na mai avel invidioso hai perado, o psalmisto trebulas te dichel le buchia cadea sar dichenas-len o Iehova. Pala so chărdea cadai buchi, sas-les pale pacea ando ilo. Vo phendea că avreal le Iehovastar ci trebul-les chanci pi phuv.
16 Sicaimata anda amende.Te na avas niciechdata invidioso pe codola cai fal-pe că jial lenghe mișto. Lenghi bucuria ci sili ciaci hai nachel sigo; von ci va avena te train anda sea o timpo. (Ecl. 8:12, 13) Cana arăsas te avas invidioso pe varecaste arăsas te avas perade hai te hasaras amaro amalimos le Iehovasa. Cadea că, dacă sam invidioso pe codola nasul, cai fal-pe că jial lenghe mișto, te cheras cadea sar cărdea o levito. Te încăras so manghel amendar o Del iubireasa hai te rodas te beșas pașa codola cai cheren so phenel lenghe vo. Dacă iubisaras le Iehovas mai but sar oriso, va avela te arachas i ciaci fericirea hai va avela te phiras po drom cai îngărel ca i ciaci viata. (1 Tim. 6:19)
w14 15/4-M 4 ¶5
Te avel amen o pachiamos cai sas le Moises
5 Sar daisaras te așias dur catar i „plăcerea le păcatoschi cai nachel”? Te na bâstras niciechdata că i plăcerea cai anel-la o păcato nachel sigo. Pherde pachiamos, amen dichas că i lumea nachel hai lache camnimata sa cadea. (1 Ioan 2:15-17) Te gândisaras amen so viața va avela codolen ca ci fal-len nasul anda so cărde. I Biblia phenel ca von sile pe iech phuv pe savi ci daștin te beșen ande pânrende hai că va perena tele! (Ps. 73:18, 19) Cana san zumado te cheres iech păcato puș tut: Sar camav te avel mânri viața?
w13 15/2-M 25, 26 ¶3-5
Te na mechas nici iech buchi te așiavel amen te primisaras pachiv
3 O psalmisto pachiaia zurales că o Iehova va dela-les pachiv. (Citisar Psalmo 73:23, 24.) Sar del o Iehova pachiv le manușen cai așunen lestar? O Iehova del pachiv pesche slujitoren umilo ande mai but feluri. Sar exemplo, ajutil-len te hachiaren de mai anglal so camel vo te cherel. (1 Cor. 2:7) Sa cadea, del-len i pachiv te avel-len iech amalimos chidino lesa. (Iac 4:8)
4 O Iehova del pachiv pesche slujitoren prin o fapto că phendea lenghe te den duma anda i vestea lași. (2 Cor. 4:1, 7) Cadai buchi îngărel ca i pachiv. Ita so promitil o Iehova codolenghe cai așaren-les hai ajutin averen cana jian andi predicarea: „Codolen cai den man pachiv vi me va avela te dav-len pachiv.” (1 Sam. 2:30) O Iehova del pachiv codolen cai den duma anda leste hai cherel lenghe iech lașio anav. Vi mai but, aver slujitori le Devleche va dena duma șucar anda lende. (Pr 11:16, 22:1)
5 So daisaras te phenas anda sar va avela i viața codolenghi cai „sperin ando Iehova hai încăren leschi rig? I Biblia promitil: „Vo [o Iehova] va vazdela tut caște les andi stăpânirea i phuv. Va dicheia cana le nasul va avena nimicime.” (Ps. 37:34) Le slujitori le Devleche ajucăren zurales but i bari pachiv te train pi phuv anda sea o timpo. (Ps. 37:29)
Cuci bara anda o lil le Devlesco
it-2-E 240
Leviatano
Ando Psalmo 74 del-pe duma anda sar o Iehova hastradea pesche poporos mai butivar, hai le versetea 13 hai 14 den duma anda sar o poporo le Devlesco sas-lo hastrado catar i sclavia egipteano. Cade, „le monștrii la mareache” sile sa codoi buchi sar „o leviatano”. O verseto 14 sicavel că le șăre le leviatanosche sas-le phagărde. Cadaia sas cana o faranono hai leschi armata sas-le mudarde, ando timpo cana o poporo israelo sas-lo încalado avri anda Egipto. Iech traducerea la Bibliachi, ando than te phenel „le șăre le leviatanosche”, phenel „le zurale manușa le faraonosche”. (Dich vi Eze 29:3-5 cai phenel că o faraono si sar iech „monstro la mareaco zurales baro” cai beșel pi bari len, o Nilo; dich vi Eze 32:2.) Cadea sar dichas ande Isaia 27:1, o leviatano silo iech imperio sau iech organizația pa sea i phuv ande savi rail varecon cai bușiol „sap” hai „balauro”. (Re 12:9) Anda codoia că i profeția del duma anda sar o Iehova încaladea avri pesche poporos anda le vasta le dușmanenghe, daștil-pe că o leviatano, cas o Iehova avileas te phagărel-les, sas vi o Babilono. Cu sea cadala, o Isaia 27:12, 13 del duma vi anda i Asiria hai o Egipto. Cadea că, o leviatano si iech bari organizația pa sea i phuv sau iech imperio cai si contra le Iehovasche hai lesche poporosche.
19-25 AUGUSTO
SUMNACAI ANDA O LIL LE DEVELSCO PSALMII 75-77
Na așaren tumen – Sostar?
w18.01-M 28 ¶4, 5
Dichen i deosebirea mașcar le manușa
4 Pala so phendea că le manușa va sicavena iubirea numai caring pende hai că va iubina le love, o Pavel mai phendea vi că le manușa va așarena-pe, va dena-pe bare hai că va avena puchiarde barimastar. Le manușa cai sile cadea, dichen-pe mai opre sar le coaver anda codoia că pachian anda pende că sile mai lașe, mai șucar sau mai barvale. Von camen sea o timpo ca le coaver te așaren-len, te del-len pachiv hai te meren pala lende. Iech biblisto phendea că iech manuș puchiardo barimastar cărdea pesche ando ilo iech altaro, caște anel închinarea pesche. Chichiva phende că o puchiarimos si cadea de jiungalo, că nici codoles cai silo puchiardo ci ciaol-les te dichel-les ca aver manuș.
5 O Iehova ci daștil te dichel o puchiarimos. Vo urâl „le iacha cai den-pe bare” (Prov. 6:16, 17) O puchiarimos ci mechel amen te pașioas le Devlestar. (Ps. 10:4) O Beng silo puchiardo. (1 Tim. 3:6) Cu sea cadala, vi chichiva slujitori le Iehovasche arăsle te aven puchiarde. Sar exemplo, o Ozia sas rege ando Iuda hai but bărșa sas-lo loialo le Iehovasche. Tha, cana arăslea zuralo, lesco ilo cărdilea puchiardo. Anda codoia, ci mai așilea loialo le Iehovasche hai cărdea vareso cai andea lesche merimos: gălea andre ando templo le Iehovasco caște thabarel tămâia. Pala chichiva bărșa vi o rege Ezechia arăslea puchiardo iech timpo. (2 Cron. 26:16; 32:25, 26)
Cuci bara anda o lil le Devlesco
w06 15/7-M 11 ¶3
Idei importanto anda o lil Psalmii
76:10 – Sar daștil i holi le manușeschi te așarel le Iehovas? Cana o Del mechel le manușen te sicaven penghi holi contra amenghe anda codoia că sam lesche slujitori, daștil-pe ca le buchia te înclen mișto anda amende ji la urmă. Fiesavo pharimos prin savo nachas daștil te sicavel amen vareso hai te ortosarel amen. O Iehova mechel te așel iech pharimos pe amende, numai ji cana arăsas te sichioas vareso anda leste. (1 Petru 5:10) Tha sar si cana i duch prin savi nachas anel amenghe merimos? Vi cadaia daștil te așarel le Iehovas prin o fapto că codola cai dichen că așileam loialo hai ci mechleam amen, daștin te astaren te așaren le Devles.
26 AUGUSTO – 1 SEPTEMBRIA
SUMNACAI ANDA O LIL LE DEVLESCO PSALMO 78
Te na cheras sar i națiunea Israel cai risardea o dumo le Iehovasche
w96 1/12-M 29, 30
Anen tumenghe amintea le ghiesendar de mai anglal - Sostar?
Le israeliți arăsle te peren butivar ando păcato anda codoia că bâstărde so cărdea o Del anda lende. So întâmplosardea-pe pala codoia? „Butivar șiute co zumaimos le Devles, cărde te avel duchado o Sfânto le Israelosco. Von ci ande penghe amintea anda lesco zuralimos, anda o ghies cana hastradea-len le dușmanestar”. (Psalmo 78:41, 42) Cadea că, o Del duriardea-pe lendar anda codoia că von bâstărde so phendea lenghe vo. (Matei 21:42, 43)
Iech lașio exemplo anda amende si codo cai scriisardea o psalmo: „Va avela te anav manghe amintea le buchiandar cai cărdea-le o Iah; va avela te anav manghe amintea so șucar phiradean-tu anda puraimata. Hai va avela te meditosarav ca sea chi buchi, va avela te gândiv-ma ca so cărdean”. (Psalmo 77:11, 12) Cana gândisaras amen ca le buchia cai cărdea-len o Iehova mai anglal pherdo iubirea, sam zuriarde te cheras vareso hai te dichas-len cuci. Sa cadea, cana anas amenghe amintea le ghiesendar de mai anglal ci mai sam chine, das amari zor te cheras sea so daisaras hai te na mechas amen.
w06 7/15-M 17 ¶16
Te na rovaras amen
16 Cana rovaras amen, gândisaras amen numai amende hai ca le pharimata cai si amen. Cadea, ci mai dichas le miștimata cai si amen sar Martori le Iehovasche. Dacă sea o timpo rovaras amen hai ci mai camas te cheras cadaia, trebul te încăras ande amari goghi cadal miștimata. Sar exemplo, fiesaves mașcar amende siles i bari pachiv te phiravel o anav le Iehovasco. (Isaia 43:10) Daisaras te avas amala lesa hai daisaras te das duma oricana Codolesche cai așunel o manglimos. (Psalmo 65:2; Iacov 4:8) Amen jianas so te cheras amara viațasa anda codoia că hachiaras că o Del si amaro conducătoro hai si amen o privilegio te așias lesche loialo. (Proverbe 27:11) Daisaras te das duma ande fiesavo ghies anda i vestea lași anda o Regato. (Matei 24:14) Si amen iech conștiința uji anda codoia că pachias zurales că o Isus dea peschi viața anda amende. (Ioan 3:16) Cadala si chichiva miștimata cai si amen, chiar cana trebul te nachas părdal pharimata cai si ande amari viața.
w11 1/7-M 10 ¶3, 4
Siles sentimentea le Iehovas?
O psalmisto phendea: „De chichivar vazdine-pe contra lesche ando pustio!” (o verseto 40). Mai dur phenel: „Butivar șiute co zumaimos le Devles.” (o verseto 41). Anda cadal dumes hachiaras că le israeliți risarde o dumo le Iehovasche mai butivar. Cadai buchi dichlea-pe ando pustio, ca țâra timpo pala so sas-le încalade avri anda o Egipto. Le israeliți astarde te den duma nasul contra le Devlesche hai pușenas-pe dacă o Del camel hai daștil te lel sama lendar. (Numerea 14:1-4) Ande iech lil cai si anda codola cai traducin i Biblia, phenel-pe că le dumes „risarde lesche o dumo” daștin te aven vi că „lengo ilo cărdilea sar o barr hai ci mai așunde le Devlestar” sau „phende le Devlesche «Nici»”. Cu sea cadala, cana falas-len nasul, o Iehova iertisardea-len pherdo lașimos. Tha von risarenas pale lesche o dumo hai cherenas cadaia mai butivar. (Psalmo 78:10-19, 38)
So sas ando ilo le Iehovasco de fiesavi data cana lesco poporo risardea lesche o dumo? O verseto 40 phenel că „holiarde-les”. Aver traducerea la Bibliachi phenel că „duchade-les”. Iech referința biblico phenel că cadal dumes sicaven că le buchia cai cărde-len le evrei ande but duch ando ilo le Iehovasco, cadea sar cherel iech șiavo cai ci așunel. Cadea sar iech șiavo cai risarel o dumo pesche dadenghe duchavel lengo ilo, vi le israeliți cai risarde o dumo le Devlesche „cărde te avel duchado o Sfânto le Israelosco” (o verseto 41).
Cuci bara anda o lil le Devlesco
w06 15/7-M 11 ¶4
Idei importanto anda o lil Psalmii
78:24, 25 – Sostar phenel i Biblia că i mana si „o ghiv le cerosco” hai „o manro codolengo zurale”? ‘Codola zurale‘ si le îngeri anda o cerii. Tha niciech anda cadal dumes ci sicaven că i mana sas o hamos le îngerengo. Voi si „o ghiv le cerosco” anda codoia că avelas anda o cerii (Psalmo 105:40). Anda codoia că le îngeri, sau ‘codola zurale‘, beșen ando cerii, le dumes „o manro codolengo zurale” daștil-pe te însemnol că avelas catar o Del, cai beșel ando cerii (Psalmo 11:4). Mai but, daștil-pe că o Iehova folosisardea le îngeren caște del mana le israelițen.