Referințea anda o Caieto anda i întrunirea „Amari viața sar creștini hai i predicarea”
© 2024 Watch Tower Bible and Tract Society of Pennsylvania
6-12 MAI
SUMNACAI ANDA O LIL LE DEVLESCO PSALMO 36, 37
„Na astar tut holiatar anda le manușa nasul”
w17.04-M 10 ¶4
So va duriarela o Regato le Devlesco?
4 Sar duchaven amen le manușa nasul? O apostolo Pavel scriisardea că andel palutne ghiesa va avena „timpuri phare, cai phares va cărdiola lenghe fața”. Tha pala codoia, vo phendea: „Le manușa nasul hai codola cai athaven va jiana anda nasul ando mai nasul”. (2 Tim. 3:1-5, 13) Dichen sar pheren-pe cadal dumes? Le manușa cai prasan averen, cai sile pherde ura hai cai mudaren averen cărde but nasulimos le manușenghe; daștil-pe că vi amenghe. Chichiva cheren cadal jiungale buchia bi te garaven-pe. Aver athaven, pachiaren so cheren hai mechen le coaveren te pachian că sile orta. Chiar cana ci cărde amenghe nasul, cana așunas anda lende ca le știri, sam zurales duchade. O modo sar phiraven-pe le șiavența, le phurența sau avere manușența cai nai-les chanicas te feril-len, daravel amen. Cadal manușa nasul ci phiraven-pe sar le manușa, tha phiraven-pe sar le animalea hai sar le benga. (Iac. 3:15) Chiar cana așunas but vești nasul, sam bucurime te jianas că o Iehova del amen lașe vești prin pesco Lil.
w03 1/12-M 13 ¶20
„O Iehova te avel chi mai bari bucuria”
20 „Le umili va traina pi phuv”. (Psalmo 37:11a) Tha con si codola „umili”? Le manușa umili si le manușa perade, cai daștil-pe că sas-le cărde lajiavestar hai cai ajucăren le Iehovas te ortosarel sea le buchia nasul cai sas lenghe cărde. Von „va arachena plăcerea ando butimos la paceaco”. (Psalmo 37:11b) Amen arachas vi acana but pacea ando paradiso spiritualo cai si amen andi congregația creștino.
Cuci bara anda o lil le Devlesco
it-2-E 445
Le plaina
Așel pe thaneste, ci mișchil-pe, silo ucio. Le plaina așen pe thaneste hai chonic ci daștil te mișchil len. (Is 54:10; Hab 3:6; dich vi Ps 46:2) Cadea că, cana o psalmisto phendea că o ortomos le Iehovasco si sar „le plaina le Devlesche” (Ps 36:6), daștil-pe că vo camlea te phenel că o ortomos le Iehovasco ci mișchil-pe sau ci paruvel-pe. Mai but, anda codoia că le plaina sile uce, cadaia daștil te sicavel că o ortomos le Iehovasco si but mai baro sar o ortomos le manușengo. (Dich vi Is 55:8, 9.) Andi Revelația 16:20 phenel-pe că, cana o Del va șiorela le efta cupe la holiache, „le plaina ci va mai avena arachle”. Cadaia sicavel că nici le buchia cai sile uce sar le plaina ci va avena hastrame cana o Del va șiorela peschi holi. (Dich vi Ier 4:23-26.)
13-19 MAI
SUMNACAI ANDA O LIL LE DEVLESCO PSALMO 38, 39
Le tele pa chio ilo o pharimos cai anel-la i bari doș
w20.11-M 27 ¶12, 13
Dich angle caring o viitorii
12 Citisar 1 Ioan 3:19, 20. Savore simțosaras amen poiechdata doșale. Sar exemplo, chichiva simțon-pe doșale anda le buchia cai cărde-le mai anglal te prinjianen o ciacimos, hai aver anda le buchia cai cărde-le pala o bolimos. (Rom. 3:23) O ciacimos si că camas te cheras so si orta. Tha „savore greșisaras butivar”. (Iac. 3:2; Rom. 7:21-23) Chiar cana ci ciaiol amen te simțosaras amen doșale, cadaia daștil te ajutil amen te avas hotărâme te na mai cheras le greșeli cai cărdeam-le. (Evr. 12:12, 13)
13 Poiechdata, daștil-pe te simțosaras amen prea doșale, chiar cana falea amen pharo hai o Iehova sicadea amenghe că iertisardea amen. Cadaia daștil te peravel amen. (Ps. 31:10; 38:3, 4) Te dichas o exemplo iecha pheiaco cai simțosardea-pe doșali anda le păcatea cai cărdea-le de but timpo. Voi phendea: „Gândisardem man că si de ivea te dav mânri zor te cherav mai but anda o Iehova anda codoia că, orisar, si prea târzio anda mande”. Daștil-pe că but anda amende daisaras te simțosaras amen cadea sar voi. Anda codoia, trebul te las sama te na arăsas te doșaras amen prea but. O Satan avelas zurales bucurime te dichel că mechas amen, chiar cana o Iehova ci mechel amen. (Dich vi 2 Corinteni 2:5-7, 11.)
w02 15/11-M 20 ¶1, 2
So daisaras te cheras ca amare ghiesa te aven cuci andel iacha le Iehovasche?
AMARE ghiesa fan-pe că sile țâra hai nachen sigo. Cadaia cărdea vi le Davidos te manghel-pe le Devlesche cadea: „O, Iehova, ajutisar man te prinjianav mânro sfârșito hai o număro mânre ghiesengo, caște jianav chichi de harni si mânri viața. Si ciaces că le ghiesa cai dean-le manghe sile țâra; ande che iacha si chanci sode încărel mânri viața”. O David dea peschi zor caște avel cuci andel iacha le Iehovasche prin so phenelas hai so cherelas. Vo sicadea că șiolas pesco pachiamos ando Del cana phendea că Vo si leschi corocori speranța. (Psalmo 39:4, 5, 7) O Iehova așundea-les. Dichlea sea so cărdea o David hai pochindea-les parpale.
Na-i vareso nevo anda amende că ci si amen timpo, anda codoia că cheras but buchia ande fiesavo ghies. Daștil-pe că sam stresome cana camas te cheras vi mai but hai o timpo ci arăsăl amenghe. Tha camas vi amen, cadea sar o David, te traisaras amari viața caște avas cuci andel iacha le Devlesche? Daisaras te avas siguro că o Iehova dichel zurales atento ca fiesavo anda amende. Acana 3 600 bărșa, o Iov, iech manuș cai daralas le Devlestar, jianglea că o Iehova dichelas sea lesche droma hai sea so cherelas vo. Vo pușlea-pe: „So va avela te phenav lesche parpale cana va pușela man so cărdem?”. (Iov 31:4-6, 14) Amare ghiesa daștin te aven cuci andel iacha le Devlesche cana șioas po iechto than le buchia spiritualo, cana încăras lesche porunci hai cana folosisaras amaro timpo goghiaverimasa.
20-26 MAI
SUMNACAI ANDA O LIL LE DEVLESCO PSALMO 40, 41
Sostar si mișto te ajutisaras averen?
w18.08-M 22 ¶16-18
Codola cai den anda sea o ilo sile fericime
16 Le manușa cai den anda sea o ilo ci ajucăren chanci parpale. O Isus phendea că cana acharas ca iech petrecerea le cioren, le nasfalen, le banghen hai le coren, va avaia fericime anda codoia că len na-i len chanci so te den amen parpale. (Luca 14:13, 14) I Biblia mai phenel: „Fericime si codo cai îngrijil-pe le ciorestar”. (Ps. 41:1; Prov. 22:9) Cadea că, caște avas ciaces fericime trebul te das averen anda so si amen.
17 Vi o Pavel phendea le dumes cai phendea-le o Isus: „Si mai but fericirea te des sar te primis”. O Pavel ci phendea că trebul te das numai anda le buchia materialo, tha camlea te phenel că te das însemnol vi te zuriaras averen, te sicavas len hai te avas pașa lende cana nachen prin pharimata. (Fap. 20:31-35) Prin so cărdea hai so phendea, o Pavel sicadea amen că te das anda sea so si amen însemnol te das averen amaro timpo, amaro zuralimos hai amari iubirea.
18 Le manușa cai roden te hachiaren mai mișto o phiraimos le manușengo, phende că le manușa cai den anda sea o ilo sile mai fericime. Chichiva manușa phende că sas-le „but mai fericime pala so cărde vareso lașio anda le coaver”. Hai aver phenen că trebul te ajutisaras averen caște avel amen iech lași viața hai iech scopo. Chichiva manușa goghiaver phenen le manușenghe că dacă camen te aven sasteveste hai mai fericime, te cheren buchi bi lovengo ando miștimos le coaverengo. Cadaia na-i vareso nevo anda amende, anda codoia că amen jianas că o Iehova, Codo cai cărdea amen pherdo iubirea, phendea acana but timpo ande pesco Lil, că sam fericime cana das anda sea o ilo. (2 Tim. 3:16, 17)
w15 15/12-M 24 ¶7
O Iehova silo pașa tute
7 Cana sam nasfale, te avas siguro că o Iehova va avela amența hai va dela amen goghiaverimos, cadea sar cărdea vi pesche slujitorența mai anglal. O David phendea: „Fericime si codo cai îngrijil-pe le ciorestar; ando pharo ghies, o Iehova va hastravela-les. O Iehova va ferila-les hai va încărela-les jiuvindo”. (Ps. 41:1, 2) O David ci camlea te phenel că codo cai lel sama ieche ciorestar ci va avela te merel niciechdata. Tha sar va avela o Del te ajutil cadale manușes? O David phendea: „O Iehova va avela pașa leste po pato le nasfalimasco; cana va avela nasfalo, tu va paruveia cu sea lesco pato”. (Ps. 41:3) Iech manuș cai lelas sama ieche ciorestar daștilas te avel siguro că o Del jianelas prin so nachelas vo hai jianelas că sas lesche loialo. O Iehova daștilas te del-les tromai hai goghiaverimos. Mai but, o Iehova cărdea o corpo le manușesco caște daștil te sastiol. Cadea că, vo daștilas te avel pale sastevesto.
w17.09-M 12 ¶17
Te sicavas mila cadea sar o Iehova
17 Amen ci trebul te sicavas mila numai anda codoia că cadai buchi anel amenghe miștimata. O mai baro motivo sostar sicavas mila si anda codoia că camas te avas sar o Iehova hai te așaras-les. (Prov. 14:31) O Iehova sicavel i mai bari iubirea hai mila. Anda codoia, te das sea amari zor te avas sar vo hai te sicavas mila. Cadea, cheras ca i iubirea de mașcar amende te bariol hai te avas mișto savore manușența de pașa amende. (Gal. 6:10; 1 Ioan 4:16)
Cuci bara anda o lil le Devlesco
it-2-E 16
Iehova
Sea i Biblia del duma anda o fapto că o Iehova silo O Mai Baro. Cadaia sicavel că i mai bari buchi cai camel te cherel-la o Iehova Del si te sfințol pesco anav. O anav le Iehovasco va avela sfințome cana va avela ujiardo, cana ci va mai avela doșardo pe neciacimaste hai cana ci va mai phenela-pe chanci nasul anda leste. Tha, vi mai importanto si, ca sea le îngeri anda o cerii hai sea le manușa pa i phuv te den-les pachiv hai te dichen-les sfânto. Von sicaven că cheren cadaia cana alosaren te hachiaren hai te respectin o fapto că o Iehova si O Mai Baro, cana slujin-les anda sea o ilo hai cana ciaiol len te cheren leschi voia anda codoia că iubin-les. O manglimos le Davidosco caring o Iehova, scriime ando Psalmo 40:5-10, sicavel cadai buchi hai sicavel so însemnol ciaces te sfințosaras o anav le Iehovasco. (O apostolo Pavel folosisardea cado psalmo cana dea duma anda o Isus Cristos ando Evrei 10:5-10.)
27 MAI – 2 IUNIA
SUMNACAI ANDA O LIL LE DEVLESCO PSALMO 42-44
Țârde miștimata anda o sicaimos cai avel le Iehovastar
w06 1/6-M 9 ¶4
Sicaimata anda o Psalmo
42:4, 5, 11; 43:3-5. Dacă de iech timpo sam dur bi te camas catar i congregația creștino, te gândisaras amen ca le bucurii cai sas amen cana samas ande iech than amare phralența. Cadaia daștil te ajutil amen ande codol momentea. Mai but, chiar cana co începuto, daisaras te avas zurales duchade anda codoia că sam corcore, cadaia anel amenghe andi goghi că o Del si amaro garaimos hai că trebul te ajucăras les te hastravel amen.
w12 15/1-M 15 ¶2
Te arachas bucuria cana sichioas andai Biblia
1 O MANGLIMOS: O iechto paso si o manglimos. (Ps. 42:8) Sostar? Anda codoia că cana sichioas andai Biblia, anas închinarea le Iehovasche. Cadea că, te mangas le Iehovas te del amen spirito sfânto hai te ajutil amen te pregătisaras amari goghi. (Luca 11:13) Ita so phenel i Barbara, cai slujil sar misionara de but timpo: „Sea o timpo mangav man angla te citisarav sau te sichioav andai Biblia. Simțosarav că o Iehova silo manța hai că dichel lașe iachența so cherav”. Cana mangas amen angla te sichioas, pâtras amari goghi hai amaro ilo caște daisaras te țârdas le mai bare miștimata anda o hamos spiritualo cai sas pregătime anda amende.
w16.09-M 5 ¶11, 12
„Na mech che vasta te covlion”
11 O Iehova zuriarel amen prin o sicaimos cai primisaras-les ca le întruniri, ca le congresea hai ca le școli teocratico. Cado sicaimos ajutil amen te cheras le buchia anda iech ilo ujo, te șioas ande amari goghi te cheras mai but anda o Iehova hai te cheras sea le buchia cai trebul te cherel len iech creștino. (Ps. 119:32) Des vi tu chi zor te țârdes miștimata anda cado sicaimos?
12 O Iehova ajutisardea le israelițen te câștighin o marimos contra le amaleciți hai le etiopieni hai dea le Neemias hai le iudeien o zuralimos te vazden pale le ziduri anda o Ierusalimo. O Del va dela vi amen o zuralimos cai trebul amen caște cheras mai dur i lucrarea de predicare, chiar cana aver așen amenghe contra, le manușa ci camen te așunen amen sau si amen but buchia po șăro. (1 Pet. 5:10) Tha ci ajucăras amen ca o Iehova te cherel iech miracolo hai te lașiarel sea amare pharimata. Trebul te cheras vi amen vareso. Cadaia însemnol că ande fiesavo ghies trebul te citisaras anda o Lil le Devlesco, te pregătisaras amen anda le întruniri hai te jias lende ande fiesavo curco. Vi mai but, daisaras te zuriaras amari goghi hai amaro ilo cana sichioas corcore le Iehovasa, cana cheras i închinarea andi familia hai cana mangas amen sea o timpo le Iehovasche. Te na mechas niciech buchi te avel mai importanto anda amende sar le buchia cai del-len amen o Iehova caște zuriarel amen. Dacă des chi sama că ci cheres iech anda cadal buchia, si sar cana che vasta covlile hai trebul te manghes o ajutorii catar o Del. Cadea, va avela te diches sar o spirito ‘cherel buchi ande tute caște cames, hai vi del tut i zor caște cheres so trebul‘. (Filip. 2:13) Tha so daștis te cheres caște zuriares le coaverenghe vasta?
Cuci bara anda o lil le Devlesco
it-1-E 1242
O ratavalo ruv
Andi Biblia, del-pe duma mai butivar anda o ratavalo ruv. Sar exemplo, o Iov dea duma anda i phari situația ande savo sas-lo hai phendea: „Arăslem te avav phral le ratavale ruvența”. (Iov 30:29) Caște sicavel sar sas mardo hai dichlo tele o poporo le Devlesco, o psalmisto phenel: „Tu phagărdean amen code cai train le ratavale ruva”. (Ps 44:19) Vo dea duma anda o plain le marimasco cai chidenas-pe le ratavale ruva caște han codolen cai sas-le mudarde. (Dich vi Ps 68:23.) Cana le babilonieni thabarde o Ierusalimo anda o bărș 607 a.a.e., ando foro avilea iech baro bochalimos hai chichiva deia arăsle te phiraven-pe ratavales penghe șiavența. Cadea că, o Ieremia camlea te phenel că le ratavale ruva phirade-pe mai șucar penghe puionența sar phiradea-pe o poporo le Devlesco pesche șiavența. (Pln 4:3, 10)
3-9 IUNIA
SUMNACAI ANDA O LIL LE DEVLESCO PSALMO 45-47
Iech ghili anda o abiav ieche Regesco
w14 15/2-M 9, 10 ¶8, 9
Bucurisar-tu catar o abiav le Bacresco!
8 Citisar Psalmo 45:13, 14a. Cade phenel-pe că i bori sas-li zurales șucar pregătime anda o abiav regalo. Andi Revelația 21:2 phenel-pe că voi „cărdea-pe șucar anda laco rrom”. Mai but, anda late phenel-pe că si sar iech foro, o Nevo Ierusalimo. Cadale foros cerisco siles „i gloria le Devleschi” hai strălucil sar o mai cuci bar, sar o cristalo. (Rev. 21:10, 11) O lil Revelația sicavel chichi de șucar si o Nevo Ierusalimo. (Rev. 21:18-21) Cadea că, hachiaras sostar vi o psalmisto phenel că i bori sili zurales șucar! Anda codoia că o abiav silo opre, ando cerii.
9 I bori sili andini angla o Jamutro, cai si o Rege, o Mesia. Vo pregătisardea-la hai „ujiardea-la le paiesa prin o cuvânto”. Voi si „sfânto hai bi doșaco”. (Ef. 5:26, 27) I bori sili hureadi cadea sar trebul anda o abiav. Laco hureaimos silo pherdo sumnacai hai silo suvdo șucar. Anda o abiav le Bacresco, voi hureadea-pe ando „ino strălucitorii hai ujo, anda codoia că o ino sicavel le lașe buchia cai cărde-le le sfinți”. (Rev. 19:8)
it-2-E 1169
O marimos
Cana va phandavela-pe o marimos, va avela pacea pi phuv iech mia bărșa. Ando psalmo, o Iehova phenel că ci va mai avena marimata pi phuv: „Vo va așavela le marimata pa sea i phuv. Phaghel o arco, phagărel i sulița hai thabarel andi iag le vurdona le marimasche”. Cadai profeția pherdilea-pe i iechto data cana o Del andea pacea ando Israelo hai phagărdea le arme le dușmanenghe. Cana codola cai maren-pe va avena mudarde le Isusostar co Armaghedono, va avela pacea pe sea i phuv. (Ps 46:8-10) Codola cai paruven le arme andel instrumentea savența te cheren buchi hai ‘ci mai sichion o războio’, va avena te train anda sea o timpo. „Anda codoia că o mui le Iehovasco le armatengo dea duma.” (Is 2:4; Mi 4:3, 4)
Cuci bara anda o lil le Devlesco
w17.04-M 11 ¶9
So va duriarela o Regato le Devlesco?
9 Cana le organizații cai athaven ci va mai avena, so va avela ande lengo than? Va mai avena organizații pi phuv pala o Armaghedono? I Biblia phenel că „amen ajucăras ceruri neve hai iech phuv nevi, hai ande lende va beșela o ortomos”. (2 Pet. 3:13) Le purane ceruri si le guvernea cai athaven, hai i purani phuv si le manușa conducime lendar. Sea cadala ci va mai avena. So va avela ande lengo than? Le „ceruri neve” si iech nevo guverno, o Regato cai rail o Isus Cristos hai codola 144 000 phrala machle. I „nevi phuv” si aver manușa, opral save va raila o Regato le Devlesco. O Isus hai lesco Regato va cherena ca sea le buchia te aven ca lengo than, cadea sar camel o Del. (1 Cor. 14:33) Cadea că, pi phuv sea le buchia va avena lașiarde anda codoia că pe late va avena manușa lașe, cai va cherena ca sea le buchia te aven ca lengo than. (Ps. 45:16) O Isus hai codola 144 000 va phenena lenghe so te cheren. Chichi de mișto va avela cana sea le organizații cai athaven va avena distrugime hai ande lengo than va avela iech corcori organizația chidini, cai ci va athavela niciech data!
10-16 IUNIA
SUMNACAI ANDA O LIL LE DEVLESCO PSALMO 48-50
Dadale, zuriaren tumare șiaven te pachian-pe andi organizația le Iehovaschi
w11 15/3-M 19 ¶5-7
Si amen sostar te avas bucurime
O psalmisto zuriardea le israelițen ‘te jian co Siono, te inghinen lesche turnuri, te roden te dichen lesche ziduri zuriarde hai te den duma anda lende codolenghe cai va avena pala lende’. (Ps. 48:12, 13) Prin cadal dumes, vo phendea le israelițenghe te jian hai te dichen o Ierusalimo de pașă. Le familii anda o Israelo jianas te dichen o foro sfânto hai o baro templo ande fiesavo bărș, ca le sărbători. Cadea, le șucar buchia cai dichenas-len așenas ande lenghi goghi hai cadala sas-le zurales cuci anda lende. Anda codoia, von phende penghe șiavenghe so dichle code.
Cana i regina anda i Șeba așundea anda o goghiaverimos le Solomonosco hai sar railas, voi ci pachiaia sea cadal buchia. Tha so cărdea voi caște pachial so așundea? Voi phendea că ci pachiaia so așundea ji cana ci gălea te dichel pesche iachența. (2 Cron. 9:6) Ciaces, so dichas ‘amare iachența’ daștil te cherel amen te pachias vi mai but so așundeam.
Sar daștin te ajutin tumare șiaven te dichen ‘penghe iachența’ le șucar buchia cai cherel-le i organizația le Iehovaschi? Dacă pașa tumende si iech filiala le Martorenghe le Iehovasche, den tumari zor te îngăren len te dichen-la. Sar exemplo, i Mandy hai i Bethany, beșenas ca 1 500 kilometri dur catar i filiala anda lengo them. Cu sea cadala, lenghe dada îngărde-len butivar te dichen o Betelo, de cana sas-le țâne. Angla so te jian co Betelo, von pachiaie că code sas numai phure phrala hai că chonic ci asal. Tha cana găle, von dichle tărne cai cherenas phari buchi anda o Iehova pherde bucuria. Von dichle că i organizația le Iehovaschi sas but mai bari hai mai șucar sar dichenas von ande lengo țâno foro. „De fiesavi data cana găleam co Betelo, samas zuriarde spiritualo”. Anda codoia că dichle i organizația le Iehovaschi mai butivar, i Mandy hai i Bethany camle te astaren o pionierato. Hai cana barile, von sas-le acharde te cheren buchi iech timpo co Betelo.
w12 15/8-M 12 ¶5
Sicaven că cheren partea anda o Regato
5 Sichio anda so cărdea o Regato andel purane ghiesa. Varecon cai camel te muchil-pe ande aver them, daștil-pe că trebul te sichiol vareso anda so sas mai anglal ande codo them. Sa cadea, codola cai camen te cheren partea anda o Regato le Devlesco trebun te sichion chichi mai but buchia anda leste. Sar exemplo, o Core hai lesche șiave slujinas le Iehovasche ando Israelo purano. Anda codoia că iubinas but o Ierusalimo hai o than cai anelas-pe închinarea, von denas duma pherde bucuria anda so sas code andel purane ghiesa. Len ciaiolas len zurales but o foro, na numai anda codoia că sas-lo șucar, tha vi anda codoia că o Ierusalimo sas o mai importanto than cai anelas-pe închinarea uji le Iehovasche. Anda codoia o foro bușolas vi „i cetatea le Bare Regeschi”. Code le manușa sichionas i legea le Devleschi. Hai o Iehova sicavelas pesco baro lașimos caring o poporo cai beșelas ando Ierusalimo. (Citisar Psalmo 48:1, 2, 9, 12, 13.) Cheres vi tu so cărde cadal murșa? Cames vi tu te sichios mai but hai te phenes vi averenghe so cărdea i organizația le Iehovaschi pi phuv andel purane ghiesa? Cana prinjianes mai but buchia anda i organizația le Iehovaschi hai anda o modo sar lel sama pesche slujitorendar, pachias vi mai but că o Regato silo ciaces. Mai but, va avela te des duma anda sea o ilo anda o Regato. (Ier. 9:24; Luca 4:43)
Cuci bara anda o lil le Devlesco
it-2-E 805
O barvalimos
Le israelițen sas-len so te han hai so te pien hai jialas lenghe mișto. (1Re 4:20; Ec 5:18, 19) Anda codoia că sas-le barvale, ci sas-len le pharimata cai si le cioren. (Pr 10:15; Ec 7:12) Cu sea cadala, chiar cana o Iehova mechlea ca le israeliți te bucurin-pe catar i buchi penghe vastenghi (dich vi Pr 6:6-11; 20:13; 24:33, 34), o Iehova dichlea că trebulas te anel lenghe amintea te na șion pengo pachiamos andel barvalimata hai te na bâstrăn că sea le buchia cai sas-len avenas Lestar. (De 8:7-17; Ps 49:6-9; Pr 11:4; 18:10, 11; Ier 9:23, 24) Mai but, trebunas te încăren andi goghi vi că le barvalimata nachen sigo (Pr 23:4, 5), că ci daștin te hastraven chanicas anda o merimos (Ps 49:6, 7) hai că le mule ci len chanci pența. (Ps 49:16, 17; Ec 5:15) Sas lenghe phendo că dacă dichen prea cuci le barvalimata, daștin te arăsăn te cioren hai te na mai aven mișto dichle le Iehovastar. (Pr 28:20; dich vi Ier 5:26-28; 17:9-11.) Sa cadea, sas-le zuriarde ‘te anen pachiv le Iehovasche sea penghe cuci buchianța’. (Pr 3:9)
17-23 IUNIA
SUMNACAI ANDA O LIL LE DEVLESCO PSALMO 51-53
Le sama te na arăsăs te cheres iech bari greșeala
w19.01-M 15 ¶4, 5
Sar daștis te les sama che ilestar?
4 Andel Proverbe 4:23, i duma „ilo” însemnol sar sam amen de andral. (Citisar Psalmo 51:6.) Cadea că, i duma „ilo” camel te sicavel so si ande amari goghi, ande amaro ilo, sostar cheras iech buchi hai le camnimata cai si amen. Cadaia sicavel sar sam de andral, na sar sam de avreal.
5 Te dichas sar ameal o sastimos fizico le sastimasa spiritualo. Ando iechto than, dacă camas te avas sasteveste, trebul te has sastevesto hai te cheras sporto ande fiesavo ghies. Sa cadea, dacă camas ca amaro ilo spiritualo te avel zuralo, trebul te has sastevesto spiritualo hai te zuriaras ande fiesavo ghies amaro pachiamos ando Iehova. Cadaia însemnol te cheras so sichileam hai te das duma averenghe anda amaro pachiamos. (Rom. 10:8-10; Iac. 2:26) Ando duito than, chiar cana pachias că sam sasteveste anda codoia că sicavas mișto de avreal, daștil-pe ca amaro ilo te avel nasfalo. Sa cadea, chiar cana fal-pe amenghe că si amen iech pachiamos zuralo anda codoia că si amen iech programo buchianța spiritualo, ande amaro ilo daștil-pe te aven camnimata nasul. (1 Cor. 10:12; Iac. 1:14, 15) Te na bâstras că o Satan camel te șiol ande amari goghi buchia nasul. So daștil vo te cherel hai sar daisaras te ferisaras amen?
w15 15/6-M 14 ¶5, 6
Daștil-pe te avel amen iech phiraimos ujo
5 Sicavas că pachias amen cu sea ando Iehova cana mangas-les te ajutil amen te duriaras amendar le gânduri melale. Cana pașioas le Iehovastar ando manglimos, vi vo pașiol amendar. Vo del amen anda sasto ilo pesco spirito sfânto hai camel te ajutil amen caște camas zurales te duriaras amendar le gânduri melale hai te așias uje. Cadea că, te phenas le Devlesche so si ande amari goghi hai te sicavas că camas anda sea o ilo te avas cuci ande lesche iacha. (Ps. 19:14) Te pușas amen: Mangas le Iehovas pherde umilința te rodel dacă si ande amende camnimata nasul sau aver buchia greșime, cai cheren amen te peras ando păcato? (Ps. 139:23, 24) Mangas sea o timpo le Iehovas te ajutil amen te așias lesche loialo cana nachas prin zumaimata? (Mat. 6:13)
6 O modo sar barileam sau amaro phiraimos de mai anglal, daștin te cheren amen te ciaion amen le buchia cai o Iehova urâl-len. Cu sea cadala, o Iehova daștil te ajutil amen te cheras le paruimata cai trebun caște slujisaras lesche mai dur cadea sar camel vo. O rege David hachiardea cadai buchi. Sar exemplo, pala so cărdea adultero la Bat-Șeba, o David manglea zurales le Iehovas ‘te cherel ande leste iech ilo ujo hai te șiol ande leste iech nevo spirito, cai ci nachel’. (Ps. 51:10, 12) Amaro ilo daștil te țârdel amen zurales te cheras vareso nasul, tha o Iehova daștil te cherel amen te camas te așunas lestar. Chiar cana le camnimata nasul sile de but timpo ande amaro ilo hai zurale, o Iehova daștil te ajutil amen te așunas lestar hai te daisaras te cheras so manghel amendar vo. O Iehova daștil te cherel amen te camas mai but te așunas lestar, sar te camas te cheras vareso nasul. (Ps. 119:133)
Cuci bara anda o lil le Devlesco
it-1-E 644
Doeg
O Doeg sas iech edomito cai cherelas buchi anda o rege Saul. Vo sas o mai baro păstorii opral le coaver slujitori le regesche. (1Sa 21:7; 22:9) O Doeg sas iech prozelito. Sas-lo ‘phandado co Nob, angla o Iehova’, anda codoia că daștil-pe că cărdea iech solaharimos, cărdea vareso neujo sau că pachialas că sas-les lepra. Code dichlea cana o baro rașai o Ahimelec dea le Davidos manro hai i sabia le Goliatoschi. Pala codoia, cana o Saul phendea pesche slujitorenghe că savore sas contra lesche, o Doeg phendea so dichlea co Nob. Atunci o Saul achardea sea le rașaien, chiar vi le bare rașaies o Ahimelec, hai dine duma lența. Pala codoia, phendea le manușenghe de pașa peste te mudaren sea le rașaien. Tha cadala ci camle. Atunci, o rege manghlea catar o Doeg te cherel cadai buchi hai vo muradea 85 rașaia. Pala codo nasulimos, o Doeg mudardea sea le manușen anda o Nob, vi tărne, vi phure hai sea le animalea. (1Sa 22:6-20)
Cadea sar sicaven le dintune versetea anda o Psalmo 52, o David scriisardea anda o Doeg că leschi șib sas sar iech șiuri. Vo cherdea but nasulimos, anda codoia că iubilas mai but o nasulimos sar o lașimos hai că ciaiolas-les mai but te hohavel sar te phenel o ciacimos. (Ps 52:2-4)
24-30 IUNIA
SUMNACAI ANDA O LIL LE DEVLESCO PSALMO 54-56
O Del si de chi rig
w06 1/8-M 22 ¶10, 11
Aven goghiaver hai daran le Devlestar
10 Iech data, o David nașlea co Achiș, cai sas rege ando Gat, iech foro filisteano cai năștisailea o Goliat. (1 Samuel 21:10-15) Le slujitori le regesche doșarde le Davidos că si iech dușmano anda lengo poporo. So cărdea o David cana sas-lo ando pericolo? Vo șiordea pesco ilo angla o Iehova ando manglimos. (Psalmo 56:1-4, 11-13) Caște hastral peschi viața, vo trebuisardea te cherel-pe că silo dilo. O David hachiardea că o Iehova sas codo cai hastradea-les hai dea-les miștimata anda le phare buchia cai cărdea-len. Anda codoia că sas-les iech zuralo pachiamos ando Iehova, o David sicadea că daralas ciaces le Devlestar. (Psalmo 34:4-6, 9-11)
11 Cadea sar o David, vi amen daisaras te sicavas că daras le Devlestar cana șioas amaro pachiamos ande leste, că va ajutila amen te nachas părdal le pharimata. O David phendea: „Mech andel vasta le Iehovasche chi rig, pachia tut ande leste hai vo va cherela buchi ande chio miștimos”. (Psalmo 37:5) Cadaia ci însemnol că trebul te șiudas sea le pharimata po Iehova bi te cheras chanci. Pala so manglea-pe anda o ajutorii, o David cărdea vareso. Vo folosisardea peschi goghi hai pesco zuralimos cai sas-les le Iehovastar caște nachel părdal pesco pharimos. Tha vo jianglea că ci daștil te cherel cadaia numai pesche zuralimasa. Vi amen trebulas te cheras sa cadea. Pala so cărdeam sea so daisardeam, trebul te mechas le buchia andel vasta le Iehovasche. Tha butivar, sea so daisaras te cheras si te șioas amaro pachiamos ande Leste. Cadea va avela te sicavas că daras le Devlestar. Le dumes le Davidosche cai phendea că „o amalimos chidino le Iehovaia silo anda codola cai daran lestar” zuriaren amen but. (Psalmo 25:14)
cl-M 243 ¶9
Chanci ci daștil „te încărel-ame dur catar i iubirea le Devleschi”
9 Sam cuci andel iacha le Iehovasche cana dichel că ci mechas amen. (Matei 24:13) Na bâstăr că o Satan camel te risares o dumo le Iehovasche. Cana așes loialo le Iehovasche ande fiesavo ghies, sicaves că o Satan silo iech hohamno. (Proverbe 27:11) Poiechdata, na-i ușoro te jias mai dur. Fiesavo ghies daștil te avel pharo anda amende cana na-i amen love, cana sam nasfale, cana sam perade sau cana nachas prin aver buchia cai duchaven amen. Daștin te peraven amen vi le buchia ca ajucăras len prea but. (Proverbe 13:12) Sam zurales cuci andel iacha le Iehovasche cana ci mechas amen ande cadal pharimata. Anda codoia, o rege David manglea le Iehovastar te chidel lesche asfa ande iech „gonorro” hai, pherdo pachiamos, mai phendea: „Ci sile von scriime ande chio lil?”. (Psalmo 56:8) O Iehova dichel cuci amare asfa hai le ducha prin save nachas caște așias lesche loialo. Vo ci bâstrăl-len niciechdata.
Cuci bara anda o lil le Devlesco
it-1-E 857, 858
Jianel de mai anglal, alosarel de mai anglal
O Iuda Iscariot prin pesco phiraimos nasul, pherdea i profeția le Devleschi hai sicadea că o Del hai lesco Șiavo jianen de mai anglal so va avela. (Ps 41:9; 55:12, 13; 109:8; Fa 1:16-20) Tha ci daisaras te phenas că o Del alosardea de mai anglal le Iudas caște bichinel le Isusos. Le profeții sicade că o Isus avelas te avel bichindo ieche amalestar, tha ci phende con avileas te avel codo amal. I Biblia sicavel că o Del ci alosardea de mai anglal so avelas te cherel o Iuda. Sar exemplo, o apostolo Pavel phendea ‘te na șios niciechdata sigo o vast pe varecaste hai nici te na cheres tut doșalo anda le averenghe păcatea, caște încăres tut ujo’. (1Ti 5:22; dich vi 3:6.) O Isus camlea te alosarel mișto hai goghiaverimasa codole 12 apostoli, anda codoia vo manglea-pe sea i riat pesche Dadesche anda cadai buchi hai numai pala codoia phendea vi averenghe so alosardea. (Lu 6:12-16) Dacă o Iuda avelas alosardo de mai anglal le Devlestar caște bichinel le Isusos, cadaia însemnolas că o Del ci cherel so phenel. Cadea sar dichleam mai opre, vo avelas doșalo anda le păcatea cai cărdea-le o Iuda.
Cana o Iuda sas-lo alosardo sar discipolo, ande lesco ilo ci sas buchia nasul. Tha, vo mechlea ca ande lesco ilo te bariol o nasulimos hai cadaia cărdea-les te duriarel-pe catar so si orta. Vo ci mai așilea pi rig le Iehovaschi, tha alosardea te jial caring o Beng hai, cadea, vo arăslea te avel ciordano hai iech athaitorii. (Ev 12:14, 15; Ioa 13:2; Fa 1:24, 25; Iac 1:14, 15; dich vi IUDA nr. 4.) O Isus dichlea că o Iuda astardea te paruvel pesco phiraimos hai anda codoia că jianglea vi so sas ande lesco ilo, daisardea te phenel că va avela bichindo lestar. (Ioa 13:10, 11)