1921 Acana iech șăl bărș

„SO BUCHI trebul te cheras ando bărș cai si angla amende?” Cado pușimos, anda O Turno de veghe anda 1 ianuaria 1921, sas șiuto le Studențenghe andi Biblia cai sas zeloși anda codoi vremea. O răspunso le pușimaste sas o pasajo anda Isaia 61:1, 2, cai anelas amintea chichi de importanto si i lucrarea de predicare: „O Iehova machlea man te phenav i vestea lași codolenghe umili . . . , te dav duma anda o bărș anda lașimos le Iehovasco hai o ghies la crisaco amare Devlesco”.

PREDICATORI BIDARANE

Caște cheren i buchi cai sas lenghe dini, le Studenți andi Biblia trebunas te sicaven iech baro tromai. Von trebunas te phenen „i vestea lași” codolenghe umili, hai codolenghe nasul, că avel „o ghies la crisaco”.

O phral Hoskin, cai beșelas andi Canada, șiutea mărturia pherdo tromai, chiar cana aver așile lesche contra. Ando pașmilai le bărșesco 1921, dea duma ieche pastoroia metodisto. O phral Hoskin phendea lesche catar o începuto: „Trebulas te das duma șucar anda le Scripturi hai, chiar cana ci sam de acord ande sea le buchia, jianas vi le dui că trebul te das duma andi pacea hai te tiliaras cathar sar amala”. Tha ci sas cadea. O phral Hoskin phendea so sas mai dur: „Pala numai chichiva minutea, o pastoro phandadea o udar cadea de zurales, că mai sas iech țâra ca lesco geamo te phagiol”.

„Jia hai predichisar codolenghe cai ci jianen chanci anda o Del, na manghe!”, phendea lesche zurales o pastoro. O phral Hoskin ci phendea chanci, tha ando timpo so tiliarelas, phenelas ande peste: „Pachiav că chiar acana dem duma ieche manușeia cai ci prinjianel le Devles”.

O duito ghies, cana încărelas i predica, o pastoro holiardo phendea buchia nasul anda o phral. O phral Hoskin phenel: „Phendea le manușenghe te len sama, că som o mai baro hohamno cai șiutea vroiechdata pânro ande codo foro hai că trebulas te avav mudardo”. O phral Hoskin ci mechlea-pe darado, predichisardea mai dur hai le manușa așunenas-les. „Dem duma zurales șucar le manușența ande codo timpo. Chichiva manușa chiar phende: «Jianas că san iech slujitoro le Devlesco!» hai pușle man dacă daștinas te ajutin-ma sau dacă trebul manghe vareso.”

O STUDIO PERSONALO HAI ANDI FAMILIA

Andi revista Epoca de aur,a le Studenți andi Biblia publichisarde programea anda o studio la Bibliaco caște ajutin codolen cai camle te barion spiritualo. Iech andal programea bușiolas „Studio biblico andal tărne” hai ande leste sas pușimata anda save le dada trebunas te den duma ande iech than le șiavența. Le dada „șionas le șiavenghe cadal pușimata hai ajutinas-le te arachen le răspunsuri andi Biblia”. Chichiva pușimata, sar avenas: „Chichi lila si la Biblia?”, ajutinas le șiaven te hachiaren bare ciacimata. Aver, sar avelas: „Va avela persecutime fiesavo creștino ande iech modo sau aver?”, pregătinas le tărnen te aven predicatori tromane.

O programo „Bare studii ando plano divino le bărșengo” sas anda le Studenți andi Biblia mai bare hai ande leste sas pușimata mai profundo savengo răspunso arachelas-pe ando iechto volumo anda le Studii andel Scripturi. Chiar cana cadal programea ajutisarde mii manușen cai citinas-le, andi revista Epoca de aur anda 21 decembria 1921 phendea-pe că le dui ci va mai avena. So cărdea te avel cado paruimos neajucărdo?

IECH NEVO LIL!

O lil *Harfa lui Dumnezeu*

Semno lilesco le paginența cai trebunas citime

Cartonașe pușimatanța

Codola cai sas-le opral i lucrarea hachiarde că le manușa trebunas te prinjianen le ciacimata biblico pe subiectea. Cadea că, ande noiembria 1921, sas dino o lil Harfa lui Dumnezeu. Le manușa cai camle te primin o lil sas-le șiute ande iech curso anda o studio la Bibliaco. Von studiinas corcore hai sas-le ajutime te hachiaren „so camelas te cherel o Del caște del le manușen viața veșnico”. Sar încărelas-pe cado studio?

Le manușesche cai lelas o lil sas lesche dino vi iech cartonașo pe savo sas scriime le pagini cai trebulas te citil-le. Ando curco cai avelas, sas lesche dino iech aver cartonașo pe savo sas mai but pușimata anda so citisardea. Tele po cartonașo, sas-le sicade le pagini cai o manuș trebulas te citil-le o curco cai avelas.

Ande 12 curche, o manuș primilas prin poșta ande fiesavo curco câte iech cartonașo bișaldo catar i congregația localo. Butivar, le cartonașea sas-le bișalde catar le phrala mai phure andai congregația sau codolendar cai ci daștinas te jian chăr chărestar. I Anna Gardner, anda Millvale, Pennsylvania, SUA, phenel: „Cana sas dino o lil Harfa lui Dumnezeu, mânri phei, i Thayle, cai ci jianelas te phirel, cărdea mai but andi predicarea hai bișaldea ande fiesavo curco cartonașe pușimatanța”. Pala so o manuș terminilas o curso, le phrala jianas leste chăre hai ajutinas-les te prinjianel mai but andai Biblia.

I Thayle Gardner ando scamin andal banghe

I BUCHI SI CĂRDI MAI DUR

Co sfârșito le bărșesco, o phral Rutherford bișaldea iech lil caring sea le congregații. Vo phendea: „Ande cado bărș, o secerișo va avela mai baro sar niciechdata”. Vo delas duma anda i buchi cai așelas angla lende hai mai phendea: „Mai si but buchi te cheras. Zuriaren vi averen te len partea amența ande cado servicio binecuvântime.” Cadea sar ajucărdea-pe, le Studenți andi Biblia camle sigo te ajutin ande cadai buchi. O bărș 1922 avelas te arachel-le andi predicarea vi mai but hai avelas te phenen pherde tromai o mesajo anda Regato.

Amala bidarane

Le Studenți andi Biblia sicade penghi iubirea prin o fapto că ajutisarde-pe iech averes. Von sas-le amala bidarane, ‘cărde anda o ghies le pharimasco’, cadea sar va avela te dichas mai dur. (Prov. 17:17)

Marține, 31 mai, 1921, arăslea iech ghies calo andi istoria le foroschi Tulsa, Oklahoma (SUA). Ande codo ghies, iech calo murș sas-lo phandado hai doșardo că atachisardea iecha parnea jiuvlea. Cado fapto îngărdea ca o Mudarimos Rasialo anda Tulsa. Mai but sar 1 000 parne murșa marde-pe ieche țâne grupoia cale murșența. Ci nachlea but, hai o marimos arăslea ando cartierii Greenwood, cai beșenas mai but cale manușa. Anda mai but sar 1 400 chăra hai magazinea sas ciorde le buchia hai sas-le dine iag. O număro oficialo codolengo cai mule sas de 36, tha daștil-pe că, o ciacimos sas că sas-le mai but șăla.

O phral Richard Hill, iech Studento andi Biblia calo, cai beșelas ando Greenwood, phendea so sas ande codo ghies: „Ande codoi riat, sas amen întrunirea, sar de fiesavi data. Pala so cadaia terminisarde-pe, așundeam țârdimata pistolosche ando centro le forosco. Cana gălem te sovav încă așunenas-pe”. Tetraghine de teharin, 1 iunia, i situația sas vi mai nasul. „Chichiva manușa avile hai phende amenghe că, caște avas ferime, trebulas te jias sigo ca i Sala de Conferințe le foroschi.” Cadea că, o phral Hill ande iech than pesca rromniaia hai lenghe panji șiavența găle caring codo than. Andre, sas 3 000 murșa hai jiuvlea cale, cai sas-le păzime catar i Garda Naționalo, cai sas-li achardi te cherel pale ordinea.

Ande cado timpo, o Arthur Claus, iech phral parno, cărdea vareso pherdo tromai. Vo phenel: „Cana așundem că le but manușa holiarde găle andre Greenwood, ciorde andal chăra hai dine-le iag, gălem te dichav dacă mânro cuci amal, o phral Hill, sas-lo mișto”.

O Arthur Claus folosil o lil Harfa lui Dumnezeu caște studiil i Biblia iecha clasa de 14 șiave

Cana arăslea ca o chăr le phralesco Hill, avilea angla leste iech anda le vecini, iech parno murș, ande savesco vast sas iech pușca. O vecino, vi vo iech amal le phralesco Hill, pachiaia că o Arthur sas vi vo mașcar codola cai atachisarde. „So rodes cade?”, dea cingar caring mande.

„Dacă ci dinemas o lașio răspunso, daisardemas te avav mulo”, phendea o Arthur. „Phendem lesche că som iech amal le phralesco Hill hai că ci sas i iechto data cana avav leste.” Pala codoia, o Arthur hai o vecino le phralesco Hill așile ande iech than pașa o chăr te na jian le cior andre.

Na pala but timpo, o Arthur așundea că o phral Hill hai leschi familia sas-le ca i Sala de Conferințe. Le Arthurosche sas phendo că codola cai sile cale ci daștinas te înclen anda codo than bi te avel-le iech ordino semnime catar o generalo Barrett. „Te jias co generalo sas zurales pharo. Pala so phendem so camlem te cherav, pușlea man: «Va avela te les sama pe cadai familia?».” Camlem te cherav cadaia bucurime.

Le ordinoia ando vast, o Arthur gălea sigo caring i Sala de Conferințe. Vo dea-les ieche ofițerosche de othar, cai phendea: „Ci avel manghe te pachiav! Semnisardea-les chiar o generalo. San o iechto jeno cai daștil te lel varecas cathar”. Pala iech timpo, o phral Hill hai leschi familia sas-le arachle mașcar codola cai garavenas-pe ande codo than. Savore șiute-pe andi mașina le phraleschi Arthur hai găle caring chăre.

O Arthur lea sama ca o phral Hill hai leschi familia te aven ferime. O exemplo pherdo iubirea hai tromai cai sicadea-les o Arthur sas-lo dichlo vi averendar. O Arthur phendea: „O vecino saveia ande iech than leam sama po chăr le phralesco Hill începosardea te dichel lașe iachența vi mai but codolen cai sas Studenți andi Biblia. But manușa camle te jianen mai but anda o mesajo anda o Regato anda codoia că dichle că mașcar amende ci cheren-pe diferențea rasialo hai că ando poporo le Devlesco niciech ci pachial că si mai lașio sar ocoaver”.

a Ande 1937, i revista Epoca de aur parudea pesco anav ande Mângâiere, hai anda 1946, sila o anav Ușten!.