Sar daștis te țârdes miștimata andai citirea la Bibliachi?

1. So sicavel că le Scripturi sas importanto anda o Isus?

IMAGINISAR tuche sar avelas te așunes le Isusos cana sicavelas le manușen. Vo phendea butivar anda șăro versetea andal Sfintele Scripturi. Le dintune cuvintea phende le Isusostar angla lesco bolimos, hai vi chichiva cuvintea cai phendea-le angla te merel arachen-pe andel Scripturi.b (Deut. 8:3; Ps. 31:5; Luca 4:4; 23:46) Chichi timpo o Isus sas-lo pi phuv, vo citisardea sau phendea anda pesco șăro angla aver versetea andal Scripturi hai ajutisardea le manușen te hachiaren-le. (Mat. 5:17, 18, 21, 22, 27, 28; Luca 4:17-21)

2. So ajutisardea le Isusos te prinjianel mai mișto le Scripturi cana barilea? (Dich i imaginea pa i coperta.)

² Bute bărșența anglal so o Isus astardea pesco servicio, vo citisardea hai așundea butivar o Cuvânto le Devlesco. Cana sas-lo chăre, vo așundea ande fiesavo ghies sar i Maria hai o Iosif denas duma andal Scripturi.c (Deut. 6:6, 7) Sa cadea, pachias că o Isus jialas ande fiesavo sabato ca i sinagoga ande iech than pesca familiaia. (Luca 4:16) Code, vo trebulas te așunel atento cana citinas-pe le Scripturi. Cana barilea, o Isus sichilea te citil corcoro andal Lila Sfânto. (Luca 4:16-20) Cadea că, o Isus na numai că prinjianelas mișto le Scripturi, tha cadala arăsle zurales cuci anda leste hai cadaia cărdea-les te lel-pe pala lende ande sea so cherelas. Sar exemplo, te anas amenghe andi goghi că, co 12 bărșa, vo beșlea ando templo mașcar le sicaitori cai prinjianenas mișto i Legea mozaico. Cadala „sas-le uimime catar lesco goghiaverimos hai catar lesche răspunsuri”. (Luca 2:46, 47, 52)

3. So va dichaia ande cado articolo?

³ Cana citisaras i Biblia ande fiesavo ghies, vi amen daisaras te arăsas te prinjinas-la mișto hai te dichas-la cuci. Tha so daisaras te cheras caște țârdas miștimata cana citisaras-la? Daisaras te sichioas anda le cuvintea cai o Isus phendea-le codolenghe cai prinjianenas mișto i Legea; mașcar cadala sas le scribi, le farisei hai le saduchei. Codol conducători religioși citisarde butivar andal Scripturi, tha von ci țârdenas miștimata anda so citinas. O Isus sicadea trin buchia cai von daștinas te cheren-le caște țârden miștimata cana citinas andal Scripturi. Lesche cuvintea va ajutina-ame: 1) te hachiaras mișto so citisaras, 2) te arachas cuci bara spiritualo hai 3) te mechas ca i Biblia te cherel buchi ande amende.

CITISAR CAȘTE HACHIARES

4. So sichioas anda Luca 10:25-29 anda i citirea la Bibliachi?

⁴ Caște țârdas miștimata cana citisaras o Cuvânto le Devlesco, si importanto te hachiaras so citisaras. Te dichas so dea duma o Isus ieche manușeia cai „prinjianelas mișto i Legea”. (Citisar Luca 10:25-29.) Cana o murș pușlea-les so trebulas te cherel caște avel-les viața veșnico, o Isus ortosardea i atenția caring o Cuvânto le Devlesco hai pușlea-les: „So si scriime andi Legea? Sar citis ande late?”. O murș dea iech răspunso lașio hai phendea anda șăro dui pasajea andal Scripturi, iech anda i iubirea caring o Del hai aver anda i iubirea caring le pașarde. (Lev. 19:18; Deut. 6:5) Tha te dichas so pușlea vo pala codoia: „Hai con si ciaces mânro pașardo?”. Prin cadal cuvintea, o murș sicadea că ci hachiardea mișto so citisardea. Cadea că, vo ci jianelas sar te lel-pe ande peschi viața pala le buchia cai citisardea-le andal Scripturi.

5. Sar ajutil-ame o manglimos hai o fapto te na sighiaras cana citisaras te hachiaras mai mișto i Biblia?

⁵ Daisaras te hachiaras mai mișto o Cuvânto le Devlesco dacă cheras amenghe lașe obiceiuri cana citisaras-les. Mai dur, va avela te dichas chichiva anda lende. Te mangas-ame angla so citisaras. Caște hachiaras mișto le Scripturi, si amen nevoia catar o ajutorii le Iehovasco. Cadea că, si importanto te mangas-ame anda o spirito sfânto, ca amari goghi te așel ca so citisaras. Pala codoia, te na sighiaras cana citisaras. Cadaia va ajutila-ame te hachiaras mai mișto le buchia cai citisaras-le. Chichiva dine penghi sama că si mișto anda lende te citin voceaia zurali andai Biblia sau te dichen iech pasajo ando timpo so așunen leschi înregistrarea. Cana așunas le cuvintea hai vi dichas-le pi hârtia, cadaia daștil te ajutil-ame te hachiaras, te încăras ande amari goghi hai te sichioas mai but buchia anda so citisaras andai Biblia. (Ios. 1:8) Cana terminisaras te citisaras, te mangas-ame pale hai te mulțumisaras le Iehovasche că dea-ame sar daro lesco Cuvânto hai te mangas-les te ajutil-ame te las-ame pala le buchia cai sichileam-le.

6. Sar daștil te ajutil-ame o fapto te șioas amenghe pușimata hai le notițe te țârdas miștimata andai citirea la Bibliachi? (Dich vi le imagini.)

⁶ Mai dur, va avela te dichas aver dui buchia cai daștin te ajutin-ame te hachiaras mai mișto i Biblia. Cana citisaras iech relatarea andai Biblia, te șioas amenghe pușimata, sar avelas: „Con si le personajea principalo? Con del duma? Anda caste del-pe duma hai sostar? Cai hai cana întâmplosardea-pe?”. Cadal pușimata va ajutina-ame te hachiaras mișto le sicaimata importanto. Sa cadea, cana citisaras, te cheras amenghe notițe. Cana scriisaras, amare gânduri paruven-pe ande cuvintea hai cadaia ajutil-ame te hachiaras mai mișto le sicaimata. O scriimos ajutil-ame te încăras andi goghi so citisardeam. Daisaras te scriisaras save si le pușimata, so arachleam, le idei principalo, sar ajutil-ame so sichileam hai so sentimentea uștiadea ande amende so citisardeam. Cadea, amare notițe va ajutina-ame te dichas o Cuvânto le Devlesco sar iech mesajo cai del duma amența personalo.

7. So trebul amenghe cana citisaras hai sostar? (Matei 24:15)

⁷ O Isus phendea că trebul amenghe discernământo caște hachiaras o Cuvânto le Devlesco. (Citisar Matei 24:15.) So si o discernământo? O discernământo însemnol te hachiaras so phanglimos si mașcar le idei hai sar sile diferime iech avereatar, hai te rodas te dichas ujes le buchia cai ci sile sicade claro. O Isus sicadea că si amen nevoia catar o discernământo caște dichas sar pheren-pe le profeții biblico. O discernământo va ajutila-ame te țârdas bare miștimata andai citirea la Bibliachi.

8. Sar daisaras te bariaras amaro discernământo caște hachiaras mai mișto i Biblia?

⁸ O Iehova del pesche slujitoren discernământo. Anda codoia, daisaras te mangas le Iehovas te ajutil-ame te bariaras cadai calitatea. (Prov. 2:6) Tha so va ajutila-ame te cheras le buchia cadea sar mangleam-ame le Iehovasche? Te gândisaras-ame mișto ca so citisardeam hai te cheras o phanglimos mașcar le buchia neve cai sichileam-le hai codola cai prinjianas-le deja. Daisaras te folosisaras amare publicații caște ajutin-ame, sar avelas o Ghido de cercetare andal Martori le Iehovasche. Cadal publicații va ajutina-ame te hachiaras so citisardeam hai vi te cheras ande amari viața so sichileam. (Evr. 5:14) Cana folosisaras amaro discernământo te citisaras i Biblia, va avela te hachiaras-le mai mișto.

CITISAR CAȘTE ARACHES CUCI SICAIMATA

9. Părdal so baro ciacimos nachle le saduchei?

⁹ Le saduchei prinjianenas mișto le dintune panji lila andal Scripturi ebraico, tha von nachle părdal chichiva bare ciacimata cai sas-le phende code. Te dichas so phendea o Isus caring le saduchei cana von șiute lesche iech pușimos anda o jiuvindimos. Vo pușlea-le: „Ci citisardean ando lil le Moisesco, anda i relatarea anda i tufa anda canră, că o Del phendea lesche: «Me som o Del le Avraamosco, o Del le Isaacosco hai o Del le Iacobosco»?” (Mar. 12:18, 26) Si ciaces, le saduchei citisarde butivar cado pasajo, tha o pușimos le Isusosco sicadea că von nachle părdal iech baro ciacimos andal Scripturi: o jiuvindimos. (Mar. 12:27; Luca 20:38)d

10. So trebul te rodas te dichas cana citisaras i Biblia?

¹⁰ So sichioas catar? Cana citisaras, si importanto te rodas te dichas so daisaras te sichioas amen anda iech verseto sau anda iech relatarea biblico. Amen ci camas te hachiaras numai le sicaimata de bază, tha vi le cuci garade ciacimata anda o Cuvânto le Devlesco.

11. Cadea sar phenel-pe ando 2 Timotei 3:16, 17, sar daisaras te arachas cuci sicaimata andi Biblia?

¹¹ Sar daisaras te arachas cuci sicaimata cana citisaras i Biblia? Te dichas so phenel-pe ando 2 Timotei 3:16, 17. (Citisar.) Cadal versetea sicaven că „sea i Scriptura si . . . lași”: 1) te sicavel, 2) te mustrol, 3) te ortol le buchia hai 4) te disciplinil. Chiar vi le lila biblico cai ci folosisaras-le cadea de but daștin te cheren cadai buchi. Cana citisaras iech relatarea, te gândisaras-ame so sichioas anda o Iehova, anda so camel vo te cherel hai anda le principii devlicane. Sa cadea, te dichas sar cadai relatarea mustrol amen. Sar exemplo, te dichas sar ajutil-ame so citisardeam te duriaras amendar o phiraimos sau le camimata nasul caște așias pherde pachiamos po drom lașio le Iehovasco. Sa cadea, te dichas sar cadai relatarea ortosarel iech hachiarimos greșime, cai daștil-pe că așundeam-les andi predicarea. Te dichas sar disciplinin amen cadal versetea, caște arăsas te dichas le buchia cadea sar o Iehova. Dacă si tut cadal ștar buchia andi goghi cana citis, va avela te araches cuci sicaimata hai cadea va avela te țârdes but miștimata andai citirea la Bibliachi.

MECH CA I BIBLIA TE CHEREL BUCHI ANDE TUTE

12. Sostar o Isus pușlea le fariseien „Ci citisarde?”?

¹² O Isus șiutea vi o pușimos „Ci citisarden?” caște sicavel i atitudinea nasul cai sas le fariseien cana citinas le Scripturi. (Mat. 12:1-7)e Ande codoi ocazia, le farisei doșarde le discipolen le Isusosche că uștarenas o sabato. Sar răspunso, o Isus phendea lenghe dui exemplea andal Scripturi hai phendea anda șăro iech verseto anda Osea, caște sicavel că le farisei ci hachiarenas so însemnolas ciaces i legea anda o sabato hai că ci sicavenas îndurarea. Sostar ci mechle cadal murșa ca o Cuvânto le Devlesco te cherel buchi anda lende? Anda codoia că cana citinas, lengo ilo sas-lo phuchiardo barimastar hai rodenas numai te prasan averen. Cadea că, von ci hachiarenas so citinas. (Mat. 23:23; Ioan 5:39, 40)

13. So atitudinea trebul te avel amen cana citisaras i Biblia hai sostar?

¹³ Anda le cuvintea le Isusosche sichioas chichi de importanto si te avel amen iech atitudinea lași cana citisaras andai Biblia. Na cadea sar le fairsei, amen camas te avas umilo hai te mechas-ame sicade. Trebul te las-ame pala o îndemno: „Pherde lașimos, mechen te avel șiuto ande tumende o cuvânto”. (Iac. 1:21) Dacă sicavas lașimos, amen va avela te mechas ca o Cuvânto le Devlesco te astarel rădăcini ande amare ile. Le sicaimata andai Biblia anda i îndurarea, compasiunea hai iubirea va cherena buchi ande amende, numai cana va avela te duriaras amendar o phuchiarimos hai o spirito cai cherel-ame te arachas i doș ande le coaver.

14. Sar daisaras te jianas dacă mechas ca i Biblia te cherel buchi anda amende? (Dich vi le imagini.)

¹⁴ O modo sar phiravas-ame averența sicavel dacă mechas ca o Cuvânto le Devlesco te cherel buchi ande amende. Le farisei ci mechle ca o Cuvânto le Devlesco te cherel buchi ande lengo ilo hai von ‘condamninas codolen nedoșale’. (Mat. 12:7) Sa cadea, o modo sar dichas averen hai sar phiravas-ame lența sicavel dacă mechas ca o Cuvânto le Devlesco te cherel buchi ande amende. Sar exemplo, rodas te dichas so si lașio ande le coaver sau sighiaras te țârdas i atenția caring lenghe defectea? Sam îndurători hai gata te iertisaras oricana sau rodas i doș ande le coaver hai încăras holi ande amaro ilo? O răspunso cadale pușimatande sicavel dacă le Scripturi cărde buchi ande amari goghi, amaro ilo hai ande amaro phiraimos. (1 Tim. 4:12, 15; Evr. 4:12)

I CITIREA ANDAI BIBLIA ANEL AMENGHE BUT BUCURIA

15. Sar dichlea o Isus le Sfintele Scripturi?

¹⁵ O Isus dichlea zurales cuci o Cuvânto le Devlesco hai cadaia sicadea-pe ande iech modo profetico prin le cuvintea anda o Psalmo 40:8: „Mânri plăcerea, o, mânro Del, si te cherav so tu cames hai chi legea si ande mande”. Cadea că, vo sas-lo zurales bucurime hai slujisardea anda sea o ilo le Iehovasche. Vi amen daisaras te avas pherde bucuria hai te slujisaras sea o timpo le Iehovasche dacă mechas ca o Cuvânto le Devlesco te arăsăl ji ando mai garado than anda amaro ilo. (Ps. 1:1-3)

16. So cames te cheres caște lașiares o modo sar citisares i Biblia? (Dich o chenaro: „Le cuvintea le Isusosche daștin te ajutin-tu te hachiares so citisares”.)

¹⁶ Le cuvintea hai o exemplo le Isusosco zuriaren-ame te das amari zor te lașiaras o modo sar citisaras i Biblia. Caște hachiaras mai mișto le pasajea biblico, si importanto te mangas-ame, te na sighiaras cana citisaras, te șioas amenghe pușimata hai te cheras amenghe harne notițe. Amen daisaras te folosisaras amaro discernământo caște rodas atento te hachiaras so citisardeam le ajutoroia cai arachas-les ande amare publicații bazome pi Biblia. Amen daisaras te sichioas te folosisaras sea mai mișto le Scripturi, chiar vi le cotora cai prinjianas-le mai țâra, dacă rodas te arachas sicaimata garade ande lende. O Cuvânto le Devlesco va cherela buchi ande amende dacă si amen iech atitudinea lași atunci cana citisaras-les. Dacă cheras sea so daisaras caște cheras cadal buchia cai dichleam-le, i citirea la Bibliachi va anela amenghe bare miștimata hai va avela te pașioas vi mai but le Iehovastar. (Ps. 119:17, 18; Iac. 4:8)