„Așen lucido, len sama!”

1. So phendea o Isus pesche discipolenghe anda o timpo cana va avela o sfârșito hai so zuriardea-le vo te cheren?

CHICHIVA ghiesența angla so te merel o Isus, ștar anda lesche discipoli pușle-les: „Savo va avela o semno . . . [anda] o phandaimos cadale sistemosco?”. (Mat. 24:3) Daștil-pe că le discipoli pușenas-pe sar avenas te jianen cana avenas te aven distrugime o Ierusalimo hai o templo. O Isus ci dea duma numai anda o phandaimos le sistemosco iudaico, tha vi anda o phandaimos cadale sistemosco ande savo traisaras amen acana. Anda o timpo cana va avela o sfârșito, o Isus phendea: „Chonic ci jianel o ghies hai i ora, nici le îngeri anda o cerii, nici o Șiav, numai o Dad”. Pala codoia, o Isus zuriardea pesche discipolen ‘te așen uștiade’. (Mar. 13:32-37)

2. Sostar trebunas te așen uștiade le creștini anda o iechto secolo?

² Caște așen andi viața, le creștini iudei anda o iechto secolo trebunas te așen uștiade. O Isus dea duma pesche discipolenghe anda chichiva semnea, caște jianen cana o sistemo iudaico sas pașă te avel distrugime. Vo phendea: „Tha cana va dichena o Ierusalimo înconjurime catar le armate cai șiute penghe țărhea code, te jianen că leschi pustiirea pașilea”. Ande codol momentea, von trebunas te așunen catar so phendea lenghe o Isus te cheren hai „te nașen ca le plaina”. (Luca 21:20, 21) Codola cai așunde so phendea lenghe o Isus așile andi viața cana o Ierusalimo sas-lo distrugime catar le romani.

3. So va dichaia ande cado articolo?

³ Amen traisaras aghies ande le palutne ghiesa cadale sistemosche nasul. Cadea că, vi amen trebul te așias lucido hai uștiade. Ande cado articolo, va dichaia so te cheras cana dichas so întâmplol-pe andi lumea, sar daisaras te las sama pe amende hai sar daisaras te folosisaras chichi mai mișto o timpo cai mai așilea.

SO TE CHERAS CANA DICHAS SO ÎNTÂMPLOL-PE ANDI LUMEA

4. Sostar trebul te avas interesime ande le buchia cai întâmplol-pe aghies pe sea i phuv, cai pheren le profeții biblico?

⁴ Si amen motivea zurale te avas interesime ande le buchia cai întâmplol-pe aghies pe sea i phuv, cai pheren le profeții biblico. Sar exemplo, o Isus dea duma anda chichiva buchia cai ajutin-ame te hachiaras cana o sistemo le Satanosco va avela te phandavel-pe. (Mat. 24:3-14) O apostolo Petru zuriardea-ame te dichas sar le profeții pheren-pe, ca amaro pachiamos te așel zuralo. (2 Pet. 1:19-21) Hai o palutno lil andai Biblia astarel prin le cuvintea: „Iech revelația catar o Isus Cristos, cai dea-la lesche o Del caște sicavel pesche sclavenghe le buchia cai trebun te aven na pa but timpo”. (Rev. 1:1) Cadea că, amen sam interesime ande le buchia cai întâmplol-pe aghies pi phuv hai camas te dichas sar pheren cadala le profeții la Bibliache. Daștil-pe că abia ajucăras te das duma amare phralența anda cadal evenimentea.

5. So ci trebulas te cheras hai so trebulas te cheras? (Dich vi le imagini.)

⁵ Cana das duma anda le profeții biblico, ci trebul te phenas so pachias amen că va avela te întâmplol-pe. Sostar? Anda codoia că amen ci camas te phenas vareso cai daștil te cherel ca i congregația te na mai avel chidini. Sar exemplo, daisaras te așunas chichiva conducătoren la lumeache că den duma anda sar daștin von te lașiaren le buchia hai sar daștin te anen pacea hai securitatea. Ando than te phenas că le dumes phende catar codola conducători pheren i profeția anda 1 Tesaloniceni 5:3, mai mișto avelas te prinjianas le palutne sicaimata cai del-le amenghe i organizația le Iehovaschi. Cana le buchia cai das-le duma averența sile anda amare publicații, ajutisaras ca i congregația te așel chidini „ande sa codo modo gândimasco”. (1 Cor. 1:10; 4:6)

6. So sichioas anda 2 Petru 3:11-13?

⁶ Citisar 2 Petru 3:11-13. O apostolo Petru ajutil-ame te hachiaras sostar trebul te prinjianas mișto le profeții biblico. Vo zuriarel-ame „te încăras ande amari goghi o ghies le Iehovasco”. Sostar? Na anda codoia că camas te prinjianas „o ghies hai i ora” cana o Iehova va anela o Armaghedono, tha anda codoia că camas te folosisaras chichi mai mișto o timpo cai mai așilea caște sicavas că sam ‘manușa savengo phiraimos si sfânto hai cheras buchia cai sicaven că slujisaras anda sea o ilo le Devlesche’. (Mat. 24:36; Luca 12:40) Aver varesar phendo, amen camas te phiravas-ame șucar hai te avas siguri că sea so cheras ando servico le Iehovasco sicavel amari iubirea anda leste. Caște cheras cadaia, trebul te las sama pe amende.

SO ÎNSEMNOL TE LAS SAMA PE AMENDE?

7. Sar daisaras te sicavas că las sama pe amende? (Luca 21:34)

⁷ O Isus phendea pesche discipolenghe te len sama na numai ca so întâmplol-pe pe sea i phuv, tha vi pe pende. Cadai buchi sicavel-pe vi ando Luca 21:34, cana o Isus phendea: „Len sama pe tumende”. (Citisar.) Te las sama pe amende însemnol te dichas de mai anglal le buchia cai daștinas te rimosaren amaro amalimos le Iehovaia hai te cheras sea so daisaras caște na întâmplol-pe cadaia. Cadea, așias andi iubirea le Devleschi. (Prov. 22:3; Iuda 20, 21)

8. So zuriardea o Pavel le creștinen te cheren?

⁸ O apostolo Pavel zuriardea le creștinen te len sama pe pende. Sar exemplo, vo phendea caring le creștini anda Efes: „Len sama sar phiren, na sar codola cai nai-le goghiaver, tha sar codola cai sile goghiaver”. (Efes. 5:15, 16) O Satan camel sea o timpo te rimosarel amaro amalimos le Iehovaia, anda codoia i Biblia phenel amenghe: „Hachiaren savi si i voința le Iehovaschi”. (Efes. 5:17). Cadea, amen daisaras te așias zurale angla orisavo zumaimos cai avel catar o Satan.

9. Sar daisaras te hachiaras savi si i voința le Iehovaschi anda amende?

⁹ I Biblia ci del duma anda sea le athaimata cai daștinas te rimosaren amaro amalimos le Iehovaia. Butivar, amen trebul te alosaras so te cheras andel situații anda save i Biblia ci del duma directo. Caște cheras alosarimata goghiaver, trebul te hachiaras savi si „i voința le Iehovaschi”. Amen daisaras te cheras cadaia cana las o Cuvânto le Devlesco hai citisaras-les ande fiesavo ghies hai pala codoia gândisaras-ame ca so citisardeam. Dacă das amari zor te hachiaras chichi mai mișto i voința le Iehovaschi hai te avel amen „i goghi le Cristososchi”, ‘va avela te phiras sar niște manușa goghiaver’ chiar vi ande le situații cai ci si amen iech regula cai phenel amenghe so te cheras. (1 Cor. 2:14-16) Poiechdata daștil te avel amenghe ușoro te dichas so ci trebul te cheras, tha aver data daștil te avel amenghe mai pharo te cheras cadaia.

10. Save si chichiva buchia cai trebul te duriaras-le amendar?

¹⁰ Mașcar le buchia cai ci trebul te cheras-le si te cheras gule iacha averenghe, te pias prea but, te avas hașvale co haben, te phenas buchia cai daștin te duchaven averen, te dichas le divertismentea violento, i pornografia hai aver buchia sar cadala. (Ps. 101:3) Amaro dușmano, o Beng, rodel sea o timpo ocazii te șinel amaro amalimos le Iehovaia. (1 Pet. 5:8) Dacă ci las sama, o Satan daștil te cherel-ame te na mai dichas lașe iachența averen, te phiravas-ame nepachivales, te avas hașvale, te încăras holi ando ilo, te avas baricane hai te na bâstras cana aver greșin contra amenghe. (Gal. 5:19-21) Co începuto, cadal sentimentea daștin te fan-pe că ci sile cadea de nasul. Tha, dacă ci cheras sigo vareso caște duriaras-le amendar, cadala daștin te barion ande amari goghi hai te cheren amenghe but nasul. (Iac. 1:14, 15)

11. So athaimos garado trebul te duriaras amendar hai sostar?

¹¹ Iech athaimos garado si le amalimata cai na-i lașe. Te gândisaras-ame ca iech exemplo. Te phenas că cheres buchi varecasa cai na-i iech Martoro. Anda codoia că tu cames ca vo te dichel mișto le Martoren le Iehovasche, phiraves-tu șucar lesa hai ajutis-les. Poiechdata, vi han ande iech than. Na pala but timpo, cheres cadaia ande fiesavo ghies. Poiechdata, cado manuș del duma anda buchia imoralo. Co începuto, ci placial-tu te așunes-les. Tha, ando timpo, ci mai diches nasul cadai buchi. Ande iech ghies, chio colego acharel-tu te pien vareso ande iech than pala i buchi, hai tu jias. Ji la urmă, astares te gândis sar vo. Chichi timpo pachias că trebul te mai nachel ji cana astares te phiraves-tu sar vo? Si ciaces, amen camas te avas lașe hai te sicavas pachiv savore manușenghe, tha ci trebul te bâstras că daisaras te arăsas sar codola casa alosaras te beșas. (1 Cor. 15:33) Dacă las sama pe amende, cadea sar zuriardea-ame o Isus, amen ci va avela te beșas but timpo codolența cai ci len-pe pala le norme uje le Iehovasche. (2 Cor. 6:15) Amen va dichaia o athaimos hai va avela te duriaras-ame lestar.

TE FOLOSISARAS CHICHI MAI MIȘTO AMARO TIMPO

12. So trebunas te cheren le discipoli le Isusosche ando timpo so ajucărenas te avel o sfârșito?

¹² O Isus camlea ca lesche discipolen te avel-len sea o timpo so te cheren ando timpo so ajucărenas te avel o sfârșito. O Isus poruncisardea lenghe te phenen i vestea lași „ando Ierusalimo, andi sea i Iudeea, andi Samaria hai ji ande o mai duriardo than la phuveaco”. (Fap. 1:6-8) So bari buchi trebunas te cheren le continuatori le Isusosche! Cana denas sea penghi zor te phenen i vestea lași averenghe, von folosinas pengo timpo ando mai lașio modo.

13. Sostar trebul te folosisaras chichi mai mișto amaro timpo? (Coloseni 4:5)

¹³ Citisar Coloseni 4:5. Te las sama pe amende însemnol te gândisaras-ame mișto sar folosisaras amaro timpo. „Le buchia cai ci ajucăras-le arăsăn le savoren”. (Ecl. 9:11) Daisaras te hasaras amari viața ande orisavo momento.

14, 15. Sar daisaras te folosisaras chichi mai mișto amaro timpo? (Evrei 6:11, 12) (Dich vi i imaginea.)

¹⁴ Amen daisaras te folosisaras chichi mai mișto amaro timpo cana cheras i voința le Iehovaschi hai zuriaras amaro amalimos leia. (Ioan 14:21) Amen trebul te avas ‘zurale, te na mechas-ame perade, te avel amen sea o timpo but buchia te cheras andi buchi le Raieschi’. (1 Cor. 15:58) Cana va avela o sfârșito amara viațaco sau o sfârșito cadala lumeaco, ci va fala amenghe pharo că ci cărdeam mai but anda o Iehova. (Mat. 24:13; Rom. 14:8)

¹⁵ Aghies, o Isus lel sama mai dur ca lesche discipoli te predichin anda o Regato le Devlesco pe sea i phuv. Vo pherdea deja cadai promisiunea. Ca amare întruniri hai prin amare publicații, o Isus sicavel-ame sar te predichisaras i vestea lași. Sa cadea, vo del-ame sea so si amen nevoia caște cheras cadaia. (Mat. 28:18-20) Amen cheras so phendea amenghe o Isus, cana predichisaras hai sicavas averen hai așias uștiade ando timpo so ajucăras ca o Iehova te phandavel cado sistemo nasul. Dacă încăras o sfato anda Evrei 6:11, 12, daisaras te încăras zurali amari speranța „ji co sfârșito”. (Citisar.)

16. So camas anda sea o ilo te cheras?

¹⁶ O Iehova alosardea deja iech ghies hai iech ora cana va chosela cu sea o sistemo le Satanosco. Cana va avela codo timpo, o Iehova va pherela sea le profeții cai phendea-le anda i lumea nevi. Poiechdata, daisaras te pachias că o sfârșito cadale sistemosco ci si cadea de pașă. Tha, o ciacimos si că o ghies le Iehovasco „ci va arăsăla târzio”. (Hab. 2:3) Cadea că, camas anda sea o ilo ‘te așias uștiade ando timpo so ajucăras le Iehovas’ hai te sicavas că ‘ajucăras pherde răbdarea le Devles, cai salvil-ame’! (Mica 7:7)