O pachiamos ando Iehova cărdea-ma te arachav i ciaci siguranța

PRINJIANAV LE IEHOVAS HAI ȘIOAV MÂNRO PACHIAMOS ANDE LESTE

Năștisailem ando bărș 1948, ande iech gav anda o sud-vesto la Nigeriaco. Cam sa ande codo timpo, o phral mânre dadesco, o Moustapha, hai pala codoia, vi o Wahabi, mânro mai baro phral, bolde-pe sar Martori le Iehovasche. Cana sas-ma enia bărșa, mânro dad mulea. Cado pharimos phagărdea mânro ilo. O Wahabi phendea manghe că daștiv te dichav pale mânre dades co jiuvindimos. Cadai buchi zuriardea-ma te astarav te sichioav andai Biblia. Bolde-man ando bărș 1963, hai pala codoia, bolde-pe vi mânre coaver trin phrala.

Ando bărș 1965, tiliardem ando Lagos, ca mânro phral mai baro, o Wilson. Code somas zurales voime că daisardem te beșav mașcar le pionieri regulari anda i Congregația Igbobi. Lenghi bucuria hai lengo zelo cărde vi man te astarav o pionierato ando bărș 1968.

Iech phral catar o Betelo, cai bușiolas Albert Olugbebi, cărdea iech întrunirea specialo amența, le tărnența. Vo camelas te zuriarel-ame te astaras o pionierato specialo ando nordo la Nigeriaco cai sas nevoia bari. Anav manghe andi goghi vi acana sar phendea pherdo bucuria: „San tărne hai daștin te den tumaro timpo hai tumaro zuralimos le Iehovasche! Le ogoarea sile parne”. Anda codoia că camlem te lav-man pala o profeto Isaia, cai camlea te del vi mai but le Iehovasche, cărdem iech cererea. (Is. 6:8)

Ando mai 1968, somas bișaldo sar pioniero specialo ando foro Kano, ando nordo la Nigeriaco. Sas iech perioada phari, anda codoia că ande le bărșa 1967-1970, sas războio andi Biafra. O marimos cărdea but phagherimata ando nordo la Nigeriaco hai arăslea ji ando esto le themesco. Iech phral cai camelas mânro miștimos, phendea manghe te na jiav. Tha me phendem lesche: „Nais tuche că gândisares-tu mande, tha jianav că dacă o Iehova camel ca me te slujiv lesche code, daisarav te pachiav ciaces că vo va lela sama pe mande”.

ȘIUTEM MÂNRO PACHIAMOS ANDO IEHOVA ANDE IECH THAN PHAGĂRDO CATAR O RĂZBOIO

Le buchia sas-le zurales nasul ando Kano. O războio civilo phagărdea but buchia ande cado baro foro. Poiechdata, cana gălem andi predicarea, dichlem manușa mule cai sas-le mudarde ando marimos. Ando Kano sas mai but congregații, tha le mai but phrala nașle catar o războio. Așile mai țâra sar 15 vestitori, hai cadala sas-le darade hai perade. Cana me hai le coaver panji pionieri speciali arăsleam ando foro, le phrala hai le pheia sas-le zurales voime. Von mechle-pe zuriarde. Ajutisardeam-le te încăren pale le întruniri, te jian andi predicarea hai te bișalen pale penghe rapoartea andai predicarea hai le comenzi anda le lila catar i filiala.

Amen, le pionieri speciali astardeam te sichioas i șib hausă, cai sas i șib cai denas duma le manușa cothar. But mașcar lende așunenas-ame anda ilo cana deamas duma ande lenghi șib. Tha, le manușa anda i mai importanto religia anda Kano ci dichenas-ame lașe iachența cana deamas duma le manușenta anda o Del, cadea că trebulas te avas atento sea o timpo. Iechdata, me hai o phral saveia somas andi predicarea, dichleam că iech manuș nașelas pala amende iecha șureaia. Tha, amen nașleam mai sigo sar vo hai ci daisardea te astarel-ame. Chiar cana sas pericolea, o Iehova ajutisardea-ame ‘te beșas andi siguranța’. (Ps. 4:8) Ando timpo, astarde te aven sea mai but vestitori, cadea că, aghies, ando Kano si 11 congregații, ande save si mai but sar 500 vestitori.

PERSECUȚII ANDO NIGER

Ando augusto 1968, numai pala chichiva șiona de cana samas bișalde ando Kano, me hai aver dui pionieri speciali samas bișalde ando Niamey, i capitala catar i Republica Niger. Dichleam că andi Africa de Vest si le mai tate thana pa i phuv. Trebulas te sichioas sar te predichisaras ande iech baro tachimos hai vi te sichioas i șib cai delas-pe duma code, i franceza. Tha, șiuteam amaro pachiamos ando Iehova hai daisardeam te nachas părdal cadal pharimata. Astardeam te jias andi predicarea chichiva phralența anda i capitala. Pala țâra timpo, cam sea le manușa anda Niamey save jianenas te citin, primisarde iech lil anda o studio O ciamos cai îngărel ca i viața veșnico. Le manușa chiar rodenas-ame caște das vi lenghe iech lil.

Na pala but timpo, le autorități astarde te așaven amari buchi. Andi iulia 1969, chideam-ame caște încăras o dintuno congreso de circumscripție ande cado them. Co congreso, avile cam 20 manușa hai avenas te bolen-pe dui vestitori. Tha, chiar ando dintuno ghies le congresosco avilea i poliția hai așadea o programo. Le pionieri speciali hai o phral cai vizitil le congregații sas-le îngărde ca i secția de poliție. Pala so șiute amenghe mai but pușimata, phende amenghe te jias code vi o duito ghies. Deam amari sama că le buchia daștinas te cărdion mai nasul, hai anda codoia alosardeam ca i cuvântarea anda o bolimos te avel încărdi varecaste chăre, hai pala codoia te bolas-len garades ande iech len.

Pala chichiva curche, o Ministero de Interne dea iech ordino ca me hai aver panji pionieri speciali te tiliaras anda o Niger. Phende amenghe că si amen numai 48 ceasurea te tiliaras anda o them. Cărdeam so sas amenghe phendo hai găleam andi filiala anda Nigeria, hai cothar samas bișalde ande aver thana.

Somas bișaldo ando gav Orisunbare, cai sas iech țâni grupa vestitorenghi. Code ciaiolas-ma but te dav duma le manușenta hai te ajutiv-len te sichion andai Biblia, tha pala șiov șiona i filiala achardea-man te jiav parpale ando Niger, tha de cadai data, corcoro. Co începuto, ci avelas manghe te pachiav hai somas iech țâra perado, tha pala codoia camlem but te dichav-man pale le phralența anda Niger.

Risailem parpale ando Niamey. Ca iech ghies pala so arăslem, iech barvalo manuș nigeriano dea peschi sama că som Martoro le Iehovasco hai astardea te șiol manghe pușimata andai Biblia. Astardeam te sichioas ande iech than hai, pala so ci mai pielas but pimos hai mechlea le țigări, vo boldea-pe. Dichlem mânre iachența sar barilea o teritorio anda Niger. I dintuni data cana arăslem ando them sas 31 Martori, hai ji cana tiliardem cărdile 69.

„CI JIANAS BUT BUCHIA ANDA I PREDICAREA ANDI GUINEEA”

Andi decembria 1977, risailem andi Nigeria caște jiav trin curche ca iech curso. Pala so terminisardeam o curso, o coordonatoro la filialaco, o Malcolm Vigo, dea-man iech lil catar i filiala anda Sierra Leone. Ando lil, phenelas-pe că le phralen trebulas-len iech phral cai te vizitil le congregații andi Guineea, saves te avel-les iech lașio sastimos, te avel pioniero, te avel corcoro hai te jianel te del duma engleza hai franceza. O phral Vigo phendea manghe că som pregătime te cherav cadai buchi. Tha, ande sa codo timpo phendea manghe că ci va avela ușoro hai mai phendea: „Ci trebul te des-ma iech răspunso acana. Mai anglal, gândisar-tu mișto”. Tha phendem lesche sigo parpale: „Anda codoia că o Iehova si codo cai bișalel-ma, va avela te jiav”.

Lem o aviono ji ande Sierra Leone hai code arachlem-ma le phralența catar o Comiteto la filialaco. Iech anda lende phendea manghe: „Ci jianas but buchia anda i predicarea andi Guineea”. Chiar cana i filiala lelas sama pa i predicarea anda o them de pașa leste, i Guineea, von ci daștinas te den duma le phralența anda codoia că code sas nehachiarimata politico. Le phrala camle mai butivar te bișalen ieche phrales caște vizitil le congregații, tha ci daisarde. Cadea că, sas manghe phendo te jiav ando Conakry, i capitala anda i Guineea, hai te mangav i permisiunea catar o guverno caște mechen-ma te beșav code.

Cana arăslem ando Conakry, gălem co ambasadoro la Nigeriaco hai phendem lesche că me avilem andi Guineea caște dav duma le manușența anda o Del. Tha o ambasadoro zuriardea-ma te na așav code anda codoia că daisardemas te perav phandado sau chiar vi mai nasul. Vo phendea manghe: „Jia parpale andi Nigeria hai de duma le manușența andai Biblia code”. Tha me phendem lesche parpale: „Som hotărâme te așiav”. Cadea că, o ambasadoro bișaldea iech lil caring o ministro de afaceri interno hai manglea-les te ajutil-ma, hai chiar cadaia cărdea.

Pala țâra timpo, risailem ca i filiala anda Sierra Leone hai phendem le phralenghe so alosardea o ministro catar le afaceri interno. Le phrala dine cingar bucuriatar cana așunde sar ajutisardea-ma o Iehova ca sea le buchia te aven mișto. O guverno mechlea-ma te așav andi Guineea!

Mașcar le bărșa 1978-1989, slujisardem andi Guineea hai andi Sierra, hai gălem te vizitiv le congregații de cothar, hai andi Liberia, somas ando than le phralesco cai trebulas te cherel cadaia. Co începuto, butivar pelemas nasfalo, vi mai but cana gălemas andel thana mai duriarde. Tha, le phrala cherenas sea so daștinas caște îngăren-ma co spitalo.

Iechdata, cărdem iech malaria mai phari hai vi cherme intestinali. Pala iech timpo, așundem că anda codoia că somas cadea de nasfalo, le phrala denas duma anda cai te avav prahome. Chiar cana somas pașă le merimastar, ci nachlea prin mânri goghi niciechdata te mechav mânri repartiția. Pachiav anda sea o ilo că numai o Del daștil te lel sama ciaces amendar, hai chiar vi cana meras, vo daștil te anel-ame parpale viațate.

ME HAI MÂNRI RROMNI ȘIOAS AMARO PACHIAMOS ANDO IEHOVA

Ando bărș 1988, prijiandem iech pioniera umilo hai zurali ando pachiamos, po anav Dorcas. Pala so leam-ame voi astardea te jial manța te vizitisaras le congregații. I Dorcas cărdea buchi phares manța hai sas-li gata butivar te cherel oriso anda o Iehova. Cana tiliardeamas catar iech congregația anda aver, trebulas te jias telal cam 25 km, hai te îngăras amența vi le bagajea. Caște arăsas ca le congregații cai sas-le mai dur hai cai le droma sas-le pherde cic hai hâva trebulas te las orisavo transporto cai arachleamas.

I Dorcas si zurales tromani. Sar exemplo, poiechdata trebuisardea te nachas anda lena cai sas crocodili. Ande iech drom panjie ghiesengo, nachleam anda iech len iecha barcaia țâni anda codoia că le poduri anda cașt sas-le rimosarde. Cana i Dorcas vazdea-pe anda i barca, voi pelea ando baro pai. Nici me, hai nici i Dorcas ci jiangleam te naiuvas, hai i len sas pherdi crocodili. Sas mișto că, chichiva tărne șiudine-pe ando pai hai hastrade-la. But timpo pala codoia sas-ame sune nasul anda codo ghies, tha camleam te cheras vi mai dur i buchi cai sas amenghe dini.

Co începuto le bărșesco 1992, primisardeam iech vestea cai ci ajucărdeam-ame: I Dorcas așilea phari. Pușleam-ame dacă code avelas te terminil-pe amaro servicio cu timp integral. Alosardeam te șioas amara șeiorache o anav Jahgift (andi engleza însemnol „daro catar o Iah”) anda codoia că chiar dichleam-la sar iech daro cai dea-les amenghe o Iehova. Ca ștar bărșa pala so avilea voi, năștisailo vi o Eric. Le dui sile anda amende ciace daruri catar o Iehova. I Jahgift cărdea buchi ca i traducerea ca iech birouo ca i distanța anda Conakry, hai o Eric silo slujitoro auxiliaro.

Ji la urmă, i Dorcas trebuisardea te mechel o pionierato specialo, tha voi cărdea pionierato regularo, ando timpo so bariarelas vi amare șiaven. Le ajutoroia le Iehovasco, cărdem mai dur pionierato specialo. Hai, pala so le șiave barile, i Dorcas astardea pale o pionierato specialo. Acana, le dui sam misionari ando Conakry.

I CIACI SIGURANȚA AVEL LE IEHOVASTAR

Sea mânri viața gălem code cai bișaldea-ma o Iehova. Me hai mânri rromni dichleam butivar sar o Iehova lea sama pe amende hai dea-ame but miștimata. O pachiamos ando Iehova ferisardea-ame catar o baro streso cai si codolen cai șion pengo pachiamos ande le buchia materialo. Me hai i Dorcas dichleam pe amari morci că Codo castar avel i ciaci siguranța si „O Del amara salvareaco”, o Iehova. (1 Cron. 16:35) Pachiav anda sea o ilo că i viața codolenghi cai șion pengo pachiamos ande leste „va avela încărdi andi siguranța ando gonorro la viațaco le Iehovasco”. (1 Sam. 25:29)