Va dela o Iehova răspunso ca mânre manglimata?

1, 2. Sostar daisaras te arăsas te pachias că o Iehova ci del-ame răspunso ca le manglimata?

ANDO Psalmo 37:4 phenel-pe: „O Iehova te avel chi mai bari bucuria hai vo va dela-tu so manghel chio ilo”. So șucar promisiunea! Tha trebulas te ajucăras-ame ca o Iehova te del-ame sigo, sea so mangas lestar? Sostar daisaras te pușias-ame cadaia? Te gândisaras-ame ca le situații cai aven. Iech phei cai na-i căsătorime manghel-pe le Iehovasche te jial ca i Școala anda le Evanghelizatori le Regatosche. Tha le bărșa nachen, hai voi ci sili achardi. Iech phral tărno cai siles iech pharo nasfalimos, manghel le Iehovasche te sastiarel-pe caște cherel mai but andi congregația. Cu sea cadala, lesco sastimos ci lașiarel-pe. Iech dad hai iech dei manghen-pe le Iehovasche te ajutil lenghe șiaves te așel ando ciacimos. Tha, lengo șiavo alosarel te na mai slujil le Iehovasche.

² Daștil-pe că vi tu manglean vareso le Iehovastar hai ci primisardean răspunso. Cadea că, astardean te pachias că o Iehova del răspunso ca averenghe manglimata, tha na ca so manglean tu lestar. Sau daștil-pe că gândisares-tu că cărdean vareso nasul. Iech phei po anav Janiceb nachlea prin cadaia. Voi hai laco rrom camle te slujin co Betelo hai mangle-pe anda cadaia. Voi phenel: „Pachiaiem ciaces că va acharen-ame sigo”. Tha, sea ajucărdeam hai le șiona cărdile bărșa, hai ci samas acharde. I Janice phenel: „Somas peradi hai ci hachiardem le buchia. Pușlem-ma dacă holiardem le Iehovas. Manglem-ma cadea de but caște jias co Betelo. Sostar ci dea-ma răspunso o Iehova?”.

3. So va avela te dichas ande cado articolo?

³ Poiechdata, daisaras te pușias-ame dacă o Iehova așunel amare manglimata. Chiar vi chichiva murșa pherde pachiamos andal puraimata pușle-pe cadaia. (Iov 30:20; Ps. 22:2; Hab. 1:2) So daștil te cherel-ame te pachias că o Iehova va dela răspunso ca amare manglimata? (Ps. 65:2) Va avela te hachiaras mai mișto cadaia cana arachas o răspunso ca le pușimata cai aven: 1) So daisaras te ajucăras le Iehovastar? 2) So ajucărel amendar o Iehova? 3) So paruimata daștil-pe că trebul te cheras cana mangas-ame le Iehovasche?

SO DAISARAS TE AJUCĂRAS LE IEHOVASTAR?

4. Cadea sar phenel-pe ando Ieremia 29:12 so promitisardea o Iehova că va cherela?

⁴ O Iehova promitil amenghe că va așunela amare manglimata. (Citisar Ieremia 29:12.) O Del iubil pesche manușen zurales but, anda codoia va avela sea o timpo atento ca lenghe manglimata. (Ps. 10:17; 37:28) Tha, cadaia ci însemnol că o Iehova va del-ame sea so mangas lestar. Daștil-pe că anda chichiva buchia cai mangas-len trebul te ajucăras ji cana va avela i lumea nevi.

5. So încărel o Iehova ande peschi goghi cana del răspunso ca amare manglimata? Explichin.

⁵ O Iehova încărel andi goghi pesco scopo cana del răspunso ca amare manglimata. (Is. 55:8, 9) Iech anda le buchia cai vo camel-le si ca sea i phuv te avel pherdi manușența cai așunen lestar anda sea o ilo. Cu sea cadala, o Satan phendea că le manușa avenas mai fericime dacă rainas-pe corcore. (Gen. 3:1-5) O Iehova mechlea le manușen te rain-pe corcore, caște sicavel că so phendea o Beng si iech hohaimos. But anda le pharimata prin save nachas aghies sile andine catar o raimos le manușengo. (Ecl. 8:9) O Iehova ci va duriarela cadal pharimata acana. Dacă cherelas cadaia, chichiva daștinas te pachian că le manușen silen o zuralimos te lașiaren corcore penghe pharimata hai că o raimos le manușengo silo lașio.

6. Sostar trebul te pachias că sea so cherel o Iehova si orta hai pherdo iubirea?

⁶ O Iehova daștil te del răspunsuri diferime ca le manglimata cai amean. Sar exemplo, cana o rege Ezechia sas-lo zurales nasfalo, vo manglea le Iehovas te sastiarel-les, hai o Iehova sastiardea-les. (2 Regi 20:1-6) Vi o apostolo Pavel manghlea le Iehovas te duriarel lestar „iech canro ando mas”, cai daștil-pe că sas iech nasfalimos. (2 Cor. 12:7-9) Tha, o Iehova ci duriardea lesco pharimos. Te gândisaras-ame vi ca le apostoli Iacov hai Petru. O Rege Irod camlea te mudarel le duien. I congregația manglea-pe anda o Petru hai sa cadea vi anda o Iacov. Cu sea cadala, o Iacov sas-lo mudardo hai o Petru sas-lo hastrado ieche îngerostar. (Fap. 12:1-11) Cadea că, daisaras te pușas-ame: „Sostar o Iehova hastradea le Petros, tha na vi le Iacovos?”. I Biblia ci phenel amenghe sostar.c Tha jianas că o Iehova „ci cherel niciechdata so na-i orta”. (Deut. 32:4) Sa cadea, jianas că vi o Petru, tha vi o Iacov sas-le cuci andel iacha le Iehovasche. (Rev. 21:14) So daisaras te sichioas anda cadal exemplea? Poiechdata, cana mangas-ame le Iehovasche, daisaras te primisaras iech răspunso cai ci ajucărdeam-ame. Cu sea cadala, pachias anda sea o ilo că o răspunso le Iehovasco ca amare manglimata va sicavela sea o timpo leschi iubirea hai ortomos. Cadea că, ci va avela te rovaras-ame anda sar alosarel vo te del-ame răspunso ca amare manglimata. (Iov 33:13)

7. So ci trebul te cheras hai sostar?

⁷ Ci trebul te cheras comparația mașcar amari situația hai averenghi. Sostar? Te phenas că mangas-ame le Iehovasche anda iech pharimos, tha ci primisaras răspunso. Pala iech timpo, așunas că varecon manglea-pe anda sa codo pharimos hai o Iehova dea-le iech răspunso. Iech phei po anav Anna nachlea prin cadaia. Voi manglea-pe ca laco rrom, o Matthew, te sastiarel-pe catar o cancero. Ande sa codo timpo, dui pheia phure nachenas prin sa codo nasfalimos. I Anna manglea-pe anda sea o ilo anda o Matthew, tha vi anda le dui pheia. Le pheia sastiarde-pe, tha o Matthew mulea. I Anna astardea te pușel-pe dacă o Iehova sastiardea le pheian, hai, dacă da, sostar ci sastiardea vi lache rromes? O ciacimos si că, ci jianas sostar sastiarde-pe le dui pheia. So jianas si că o Iehova va chosela sea le pharimata co timpo alosardo hai că abia ajucărel te anel parpale viațate pesche amalen. (Iov 14:15)

8. a) Cadea sar phenel-pe ando Isaia 43:2, sar silo o Iehova pașa amende? b) Sar ajutil-ame o manglimos cana nachas prin pharimata? (Dich o materialo video O manglimos ajutil-ame cana nachas prin pharimata.)

⁸ O Iehova va avela sea o timpo pașa amende. Sar iech dad pherdo iubirea, le Iehovas duchal-les cana dichel că sam duchade. (Is. 63:9) Cu sea cadala, o Iehova ci duriarel sea amare pharimata, cai, poiechdata daștin te aven sar niște lena sau sar iech iag cai thabol. (Citisar Isaia 43:2.) Tha, cadea sar promitisardea, vo va ajutil-ame te nachas părdal lende. Mai but, prin oriso pharimos nachas vo va ajutil-ame te încăras zuralo amaro amalimos leia. Vo dea-ame vi pesco spirito sfânto caște așias zurale. (Luca 11:13; Filip. 4:13) Cadea că, pachias ciaces că o Iehova va del-ame sea o timpo so trebul-ame caște nachas părdal le pharimata hai te așias lesche loiali.d

SO AJUCĂREL AMENDAR O IEHOVA?

9. Cadea sar phenel-pe ando Iacov 1:6, 7, sostar trebul te pachias că o Iehova va ajutil-ame?

⁹ O Iehova ajucărel te pachias-ame ande leste. (Evr. 11:6) Poiechdata, le pharimata prin save nachas fal-pe că sile prea bare anda amende. Daisaras te arăsas te pușas-ame dacă o Iehova chiar va ajutil-ame. Tha, i Biblia phenel amenghe că prin o zuralimos le Iehovasco, daisaras te huteas chiar vi „părdal iech zido”. (Ps. 18:29) Cadea că, ando than te bariaras cadal daraimata ande amare ile, mai mișto te mangas-ame le Iehovasche hai te pachias zurales că vo va del-ame răspunso. (Citisar Iacov 1:6, 7.)

10. Den iech exemplo cai sicavel că trebul te cheras sea so daisaras pala so mangleam-ame le Iehovasche.

¹⁰ O Iehova ajucărel-pe te cheras sea so daisaras pala so mangleam-ame lesche. Sar exemplo, iech phral camel te jial ca iech congreso regionalo hai manghel-pe le Iehovasche te ajutil-les te lel pesche libero catar i buchi. Sar daștilas o Iehova te del-les răspunso? Vo daștilas te del-les tromai caște del duma pesche șefosa. Cu sea cadala, vi o phral trebul te del peschi zor. Daștil-pe că va trebula te del duma pesche șefosa mai butivar. Sa cadea, daștilas te cherel buchi ande aver ghies sau dacă trebul, chiar te lel pesche ghiesa libero bi te avel pochindo.

11. Sostar trebul te mangas-ame mai butivar anda iech buchi?

¹¹ O Iehova ajucărel-pe te mangas-ame mai butivar anda iech buchi. (1 Tes. 5:17) Anda so phendea o Isus pesche discipolenghe, hachiaras că chichiva anda amare manglimata ci va avena te primisaren iech răspunso sigo. (Luca 11:9) Cadea că, te na mechas-ame! Te mangas-ame mai butivar hai anda sea o ilo. (Luca 18:1-7) Sostar? Anda codoia că, cana mangas-ame mai butivar, sicavas le Iehovasche că so mangas si iech buchi ciaces importanto anda amende. Sa cadea, sicavas amaro pachiamos că vo daștil te ajutil-ame.

SO PARUIMATA DAȘTIL-PE CĂ TREBUL TE CHERAS CANA MANGAS-AME LE IEHOVASCHE?

12. a) So trebul te pușas-ame anda amare manglimata hai sostar? b) So daisaras te cheras ca amare manglimata te sicaven iech bari pachiv caring o Iehova? (Dich o chenarii „Sicaven mânre manglimata pachiv caring o Iehova?”.)

¹² Dacă mangleam-ame anda iech buchi, tha o Iehova ci dea-ame răspunso, avelas mișto te șioas amenghe trin pușimata. O dintuno pușimos si: „Si mânro manglimos potrivime?”. Butivar, daisaras te pachias că jianas so si mai mișto anda amende. Tha, daștil-pe că le buchia cai mangas-le te na anen amenghe miștimata ando timpo. Cana mangas-ame anda iech pharimos, daștil-pe că va lașiarela-pe ande aver modo mai lașio sar codo cai mangleam-les. Sa cadea, chichiva buchia cai mangas-le ci sile pala i voința le Devleschi. (1 Ioan 5:14) Sar exemplo, te gândisaras-ame ca o dad hai i dei anda save dea-pe duma mai anglal. Von mangle-pe le Iehovasche ca lengo șiavo te așel ando ciacimos. Fal-pe că si iech manglimos lașio. Cu sea cadala, o Iehova ci va oblighil-ame te anas lesche închinarea. Vo camel ca fiesavo mașcar amende, chiar vi amare șiave, te alosaras corcore te slujisaras lesche. (Deut. 10:12, 13; 30:19, 20) Cadea că, o dad hai i dei daștinas te manghen le Iehovas te ajutin-le te arăsăn co ilo lenghe șiavesco, ca vo te camel te iubil le Iehovas hai te cărdiol lesco amal. (Prov. 22:6; Ef. 6:4)

13. Cadea sar phenel-pe ando Evrei 4:16, cana va ajutil-ame o Iehova? Explichin.

¹³ O duito pușimos si: „Pachial o Iehova că acana si o timpo te del-ma so manglem lesche?”. Poiechdata daisaras te pachias că trebul amenghe iech răspunso chichi de sigo ca amare manglimata. Tha, o Iehova jianel mai mișto cana si o mai lașio timpo caște ajutil-ame. (Citisar Evrei 4:16.) Cana ci primisaras sigo so mangleam, daisaras te pachias că o răspunso le Iehovasco si „Nici”. Tha, daștil-pe că o răspunso si „Na acana”. Te gândisaras-ame ca o tărno phral anda savo dea-pe duma mai anglal. Vo manglea le Iehovas te sastiarel-les catar lesco pharo nasfalimos. Dacă o Iehova avelas te sastariales-les prin iech miracolo, o Satan daștilas te phenel că o phral sluijisardea mai dur le Devlesche numai anda codoia ca sas-lo sastiardo. (Iov 1:9-11; 2:4) Mai but, o Iehova alosardea deja iech ghies cana va chosela sea le nasfalimata. (Is. 33:24; Rev. 21:3, 4) Ji atunci, ci daisaras te ajucăras-ame te avas sastiarde prin miracolea. Cadea că, o phral daștilas te manghel le Iehovas te del-les zuralimos hai pacea ando ilo caște nachel părdal o nasfalimos hai te slujil mai dur le Devlesche pherdo pachiamos. (Ps. 29:11)

14. So sichioas catar i Janice?

¹⁴ Te anas amenghe andi goghi anda i Janice, cai manglea-pe but te slujil co Betelo. Pala panji bărșa, voi hachiardea că o Iehova dea-la răspunso ca lache manglimata, tha na cadea sar ajucărelas-pe voi. I Janice phenel: „Ande codo timpo, o Iehova sicadea-ma but buchia hai ajutisardea-ma te barioav spiritualo. Trebulas te zuriarav mânro pachiamos ande leste. Sas-ma nevoia te lașiarav o modo sar sichilem corcori anda o Iehova. Hai trebulas te hachiarav că mânri bucuria ci încărel catar o than cai slujiv le Iehovasche”. Pala iech timpo, i Janice hai laco rrom sas-le acharde te jian hai te vizitin le congregații. Cana dichel-pe parpale, i Janice phenel: „O Iehova dea-ma răspunso ca mânre manglimata, tha na cadea sar ajucărdem-man. Trebuisardea manghe timpo ji cana hachiardem so șucar daro dea-ma o Iehova prin cado răspunso. Leschi iubirea hai lașimos sile cadea de cuci anda mande”.

15. Sostar avelas mișto ca poiechdata te na phenas claro so camas amen ando manglimos? (Dich vi le imagini.)

¹⁵ O trinto pușimos si: „Trebulas te mangav-ma anda aver vareso?”. Chiar cana si mișto te phenas le Iehovasche ando manglimos claro so camas poiechdata avelas mișto te na cheras cadaia. Cadea mechas le Iehovas te sicavel so camel vo anda amende. Te anas amenghe andi goghi o exemplo la pheiaco corcori cai manglea-pe te jial ca i Școala anda le Evanghelizatori le Regatosche. Voi camlea te jial ca i școala caște slujil cai si mai bari nevoia. Cadea că, ando timpo so manghelas-pe mai dur andai Școala, voi daștilas te manghel le Iehovas te sicavel lache cai hai sar daștilas te cherel mai but anda leste. (Fap. 16:9, 10) Pala so manglea-pe, avelas mișto te pușel le phrales cai vizitil le congregații ande savo than mai pașardo si nevoia catar mai but pionieri. Sau daștilas te scriil ca i filiala caște pușel cai si mai bari nevoia phralendar andai predicarea.e

16. So daisaras te pachias ciaces?

¹⁶ Cado articolo zuriardea amaro pachiamos că o Iehova va dela răspunso ca amare manglimata pherdo iubirea hai ortomos. (Ps. 4:3; Is. 30:18) Cu sea cadala, poiechdata daștil-pe că ci va avela te primisaras o răspunso cai ajucăras-les. Tha însemnol cadaia că o Iehova ci așunel amare manglimata? Nici. Vo iubil-ame zurales but hai ci va mechel-ame niciechdata. (Ps. 9:10) Cadea că, ‘te pachias-ame sea o timpo ande leste, hai te șioras amaro ilo angla leste!’. (Ps. 62:8)