Te lașiaras o modo ande savo mangas-ame

1. So acharel-ame o Iehova te cheras? (Dich vi le imagini.)

DAISARAS te pașioas oricana catar o Iehova Del ando manglimos caște del-ame o ajutorii cai trebul amenghe hai caște sicavel amenghe so te cheras. O Iehova acharel-ame te cheras cadaia. Vo camel te mangas-ame mai butivar, chiar zuriarel-ame ‘te mangas-ame sea o timpo’. (1 Tes. 5:17) Prin orisavi buchi avelas te nachas ande amari viața, daisaras te mangas o ajutorii le Iehovasco bi te încăras-ame parpale. (Prov. 3:5, 6) Anda codoia că le Iehovas siles iech baro ilo, daisaras te mangas-ame lesche ori chichivar camas.

2. So va dichaia ande cado articolo?

² Hachiaras mișto că o manglimos si iech daro zurales cuci. Anda codoia că si amen but buchia te cheras, daștil te avel amenghe pharo te arachas iech lașio timpo cana te mangas-ame. Mai but, daștil-pe că camas te lașiaras o modo ande savo mangas-ame. Si șucar că andel Scripturi daisaras te arachas buchia cai zuriaren-ame hai sicaven amenghe so te cheras. Mai dur, va avela te dichas sar ajutil-ame o exemplo le Isusosco te cheras amenghe timpo anda o manglimos. Sa cadea, va avela te dichas panji buchia importanto cai daștin te ajutin-ame te lașiaras o modo ande savo mangas-ame.

O ISUS CĂRDEA PESCHE TIMPO ANDA O MANGLIMOS

3. So hachiardea o Isus anda o manglimos?

³ O Isus hachiardea chichi de cuci si andel iacha le Iehovasche o manglimos. Bute timpoia mai anglal te avel pi phuv, o Isus dichlea sar o Del delas răspunso ca le manglimata pesche slujitorenghe loialo. O Isus sas-lo pașa pesco Dad cana Vo dea răspunso ca le manglimata cai cărde-le i Ana, o David, o Ilie hai but aver manușa. (1 Sam. 1:10, 11, 20; 1 Regi 19:4-6; Ps. 32:5) Ita sostar o Isus sicadea pesche discipolen te manghen-pe mai butivar hai pherde pachiamos. (Mat. 7:7-11)

4. So sichioas catar o Isus anda o manglimos?

⁴ Le manglimata cărde le Isusostar sile iech lașio exemplo anda amende. Chichi timpo cărdea peschi buchi pi phuv, vo manglea-pe butivar le Devlesche. Chiar cana sas-les but buchia te cherel hai butivar sas-lo mașcar but manușa, vo cărdea pesche timpo anda o manglimos. (Mar. 6:31, 45, 46) O Isus uștelas de teharin caște daștil te avel corcoro cana manghelas-pe le Iehovasche. (Mar. 1:35) Iech data, vo manglea-pe sea i riat angla so te lel iech bari decizia. (Luca 6:12, 13) Hai andi riat angla so te merel, o Isus manglea-pe mai butivar caște daștil te cherel i mai phari buchi cai sas lesche dini cade pi phuv. (Mat. 26:39, 42, 44)

5. Sar daisaras te las-ame pala o Isus cana mangas-ame?

⁵ Anda o exemplo le Isusosco sichioas că vi cana si amen but buchia te cheras trebul te arachas amenghe timpo anda o manglimos. Cadea sar o Isus, daștil-pe că trebul te ușteas de teharin sau te sovas iech țâra mai târzio caște mangas-ame. Cadea, va avela te sicavas că dichas cuci cado șucar daro. Iech phei po anav Lynne anel pesche andi goghi chichi de but barilea laco ilo cana așundea că daștil te del duma le Devlesa. Voi phenel: „Cana hachiardem că daștiv te mangav-ma le Iehovasche oricana, astardem te dichav-les sar ieche amales pașardo hai camlem te lașiarav vi mai but o modo ande savo manglem-ma”. Daștil-pe că but mașcar amende simțosaras sa cadea. Te dichas mai dur panji buchia importanto cai daisaras te phenas-le ande amare manglimata.

PANJI BUCHIA IMPORTANTO ANDA SAVE TE MANGAS-AME

6. Cadea sar phenel-pe andi Revelația 4:10, 11, so trebul te avel dino le Iehovasche?

⁶ Te așaras le Iehovas. Ande iech șucar viziunea, o apostolo Ioan dichlea 24 phure cai anenas închinarea le Iehovasche ando cerii. Von așarenas le Devles hai phenenas că vo silo demno te primil „i gloria, i pachiv hai o zuralimos”. (Citisar Revelația 4:10, 11.) Vi le îngeren silen but motivea caște așaren hai te anen pachiv le Iehovasche. Von sile ando cerii leia hai arăsle te prinjianen mișto lesche calități anda codoia că von dichen penghe iachența sea le buchia cai vo cherel-le. Cadea că, cana dichen sea cadal buchia, von camen te așaren-les vi mai but. (Iov 38:4-7)

7. Sostar daisaras te așaras le Iehovas?

⁷ Vi amen camas te așaras le Iehovas ande amare manglimata. Daisaras te cheras cadaia, cana phenas lesche sostar iubisaras-les hai sostar silo cuci anda amende. Cana citis hai sichios andai Biblia, rode te diches sar si ciaces o Iehova hai so calități placian-tu o mai but leste. (Iov 37:23; Rom. 11:33) Pala codoia, phen che Dadesche cerisco chichi de cuci si anda tute cadal calități. Daștis te așares le Iehovas vi anda le buchia cai cherel-le ande amaro miștimos tha vi anda amari șucar familia phralența hai pheianța pa sea i phuv. Vo lel sama sea o timpo pe amende hai feril-ame. (1 Sam. 1:27; 2:1, 2)

8. Save si chichiva motivea anda save daisaras te anas mulțumiri le Iehovasche? (1 Tesaloniceni 5:18)

⁸ Te mulțumisaras le Iehovasche. Si amen but motivea caște anas mulțumiri le Iehovasche ando manglimos. (Citisar 1 Tesaloniceni 5:18.) Daisaras te mulțumisaras lesche anda fiesavi buchi cai avel lestar. (Iac. 1:17) Sar exemplo, daisaras te phenas lesche chichi de cuci si anda amende i șucar phuv pe savi beșas hai le șucar buchia cai cărdea-le. Daisaras vi te sicavas amari recunoștința anda amari viața, amari familia, amare amala hai anda i speranța cai si amen. Sa cadea, camas te mulțumisaras lesche anda codoia că dea-ame i bari pachiv te avas lesche amala.

9. Sostar trebul te bariaras amari recunoștința anda o Iehova?

⁹ Daștil-pe că trebul te das sea amari zor caște încăras andi goghi sostar sam recunoscători le Iehovasche. But manușa aghies ci sile mulțumime. Von gândin-pe mai but ca so camen te aven-len hai mai țâra ca sar daștin te sicaven penghi recunoștința anda so silen. Dacă vi amen avelas te las-ame pala lende, amare manglimata daștinas te arăsăn iech lista numai buchianța cai camas-le. Ci va avela te peras ande cado athaimos dacă bariaras amari recunoștința anda sea so cherel o Iehova ande amaro miștimos hai dacă șioras amaro ilo angla leste. (Luca 6:45)

10. Sar ajutisardea i recunoștința iecha pheia te așel zurali andel pharimata? (Dich vi i imaginea.)

¹⁰ I recunoștința ajutil-ame te nachas mai ușoro părdal le pharimata. Te dichas i experiența la pheiachi Kyung-sook, cai arachas-la ando Turno de veghe anda 15 ianuaria 2015. Le doctori phende lache că sila iech cancero zurales pharo. Voi phendea: „Cana așundem cadaia sas sar cana varecon dea-ma dab zurales. Simțosardem că hasardem sea hai somas zurales daradi”. So ajutisardea-la te nachel părdal cado pharimos? Ande fiesavi riat, voi jialas pi terasa anda laco chăr hai mulțumilas voceaia zurali le Iehovasche anda panji buchia lașe cai vo dea-la ande codo ghies. Cadea, voi ci mai simțosardea-pe duchadi hai camlea te sicavel vi mai but peschi iubirea caring o Iehova. Voi simțosardea pe peschi morci sar o Del silo pașa pesche slujitori loialo cana nachen prin pharimata hai hachiardea că le miștimata cai si amen sile but mai bare sar orisavo pharimos prin savo nachas. Cadea sar i phei Kyung-sook, vi amen si amen but buchia anda save daisaras te mulțumisaras le Iehovasche, chiar cana si amen but pharimata. Dacă sicavas amari recunoștința ando manglimos, va avela te așias zurale hai liniștime cana nachas prin pharimata.

11. Pala so o Isus galea parpale co cerii, sostar le discipolen sas-len nevoia catar o tromai?

¹¹ Te mangas tromai le Iehovastar cana predichisaras. Chiar angla te jial parpale co cerii, o Isus phendea pesche discipolenghe că sas lenghe dini i buchi te den duma anda leste „ando Ierusalimo, ande sea i Iudeea, andi Samaria hai ji ande o mai duriardo than la phuveaco”. (Fapte 1:8; Luca 24:46-48) Ca țâra timpo pala codoia, le conducători iudei astarde le apostolen Petru hai Ioan hai andine-le angla o Sanhedrino. Von phende lenghe te na mai predichin hai chiar camle te șion i dar ande lende. (Fapte 4:18, 21) So cărde o Petru hai o Ioan ande codoi situația?

12. Cadea sar phenel-pe andel Fapte 4:29, 31, so cărde le discipoli?

¹² O Petru hai o Ioan ci mechle-pe darade hai phende lenghe pherde tromai: „Phenen tumen cana si orta andel iacha le Devlesche te așunas mai sigo tumendar sar le Devlestar. Anda codoia că amen ci daisaras te na mai das duma anda le buchia cai dichleam-le hai cai așundeam-le”. (Fapte 4:19, 20) Pala so o Petru hai o Ioan sas-le dine drom, le discipoli cărde iech manglimos caring o Iehova ande savo phende lesche că camen te cheren mai dur leschi voința: „Cher ca che sclavi te phenen mai dur chio cuvânto pherde tromai”. O Iehova dea-le răspunso ca lengo manglimos cărdo anda sea o ilo.(Citisar Fapte 4:29, 31.)

13. So daisaras te sichioas catar o exemplo le phralesco Jin-hyuk?

¹³ Daisaras te las-ame pala o exemplo le creștinengo anda o iechto secolo dacă predichisaras mai dur vi cana le autorități camen te așiaven amari buchi. O Jin-hyuk, si iech phral cai sas-lo phandado anda codoia că încărdea peschi neutralitatea creștino. Ando phandaimos, lesche sas dini i buchi te lel sama pe chichiva manușa phandade cai sas-le ando regimo de izolare. Tha, vo daștilas te del duma lența numai anda so încărelas catar leschi buchi hai ci sas-lo mechlo te phenel lenghe chanci andai Biblia. O Jin-hyuk manglea le Iehovas te del-les tromai hai goghiaverimos caște daștil te predichil de fiesavi data cana daștilas te cherel cadaia. (Fapte 5:29) Vo phenel: „Sar răspunso ca mânro manglimos, o Iehova dea-ma tromai hai goghiaverimos, cadea că daisardem te astarav mai but studii biblico chiar ca le udara catar lenghe celule. O studio lența încărelas cam panji minutea. Pala codoia, pi riat, scriisardemas lila hai o coaver ghies demas-le ca le manușa phandade”. Vi amen daisaras te pachias zurales că o Iehova va ajutila-ame te cheras amari buchi anda leste. Cadea sar o Jin-hyuk, vi amen daisaras te mangas-ame anda tromai hai goghiaverimos.

14. So daștil te ajutil-ame cana nachas prin pharimata? (Psalmo 37:3, 5)

¹⁴ Te mangas o ajutorii le Iehovasco caște nachas părdal le pharimata. But mașcar amende nachas prin iech nasfalimos sau sam perade. Daștil-pe că mulea amenghe varecon drago, si amen iech situația phari andi familia, sam persecutime sau nachas prin aver pharimata. Mai but, le bare nasfalimata pa sea i phuv hai le războaia cărde ca cadal pharimata te aven vi mai bare. Dacă vi tu san ande cadai situația, pâtăr chio ilo angla o Iehova hai phen lesche sea so simțosares cadea sar cana des duma ieche lașe amaleia. Pachia zurales că o Iehova „va cherela buchi ande chio miștimos”.(Citisar Psalmo 37:3, 5.)

15. Sar daștil te ajutil-ame o manglimos te așias zurale andel pharimata? Den iech exemplo.

¹⁵ Cana mangas-ame mai butivar daisaras te ‘așias zurale andel pharimata’. (Rom. 12:12) O Iehova prinjianel mișto sea le pharimata prin save nachen lesche slujitori hai așunel codolen cai „den cingar caring leste pala o ajutorii”. (Ps. 145:18, 19) Sar exemplo, i Kristie, iech pioniera cai sila 29 bărșa, pelea nasfali bi te ajucărel-pe. Laco nasfalimos peradea-la cadea de but că arăslea te avel-la iech bari depresia. Pala codoia, așundea că laca deia sas-la iech pharo nasfalimos hai că sas-li pe merimaste. I Kristie phenel: „Manglem-ma but le Iehovasche te del-ma ande fiesavo ghies o zuralimos cai sas man nevoia. Dem mânri zor te avel man iech lașio programo anda le buchia spiritualo, te jiav ca le întruniri hai te sichioav corcori anda o Iehova”. Voi mai phenel: „O manglimos ajutisardea-ma te nachav părdal le mai cale ghiesa anda mânri viața. Jianglem că o Iehova silo sea o timpo pașa mande, hai cadaia sastiardea but mânro ilo. Vi cana mânre pharimata ci nachle de pe iech ghies pe aver, o Iehova dea răspunso ca mânre manglimata hai dea-man but pacea ando ilo”. Ci trebul te bâstras niciechdata că „o Iehova jianel te hastravel anda o zumaimos le manușen cai silen devoțiunea sfânto”. (2 Pet. 2:9)

16. Sostar trebul amenghe o ajutorii le Iehovasco caște așias zurale contra le athaimata?

¹⁶ Te mangas o ajutorii le Iehovasco caște așias zurale contra le athaimata. Anda codoia că sam imperfecți, trebul te maras-ame sea o timpo contra o camnimos te cheras so si nasul. O Satan del sea peschi zor caște cherel cadaia vi mai pharo anda amende. Sar exemplo, vo camel te athavel amari goghi prin le buchia neuje cai așunas-le sau dichas-le. Cadala pheren amari goghi gândurența neuje cai meliaren-ame andel iacha le Iehovasche hai daștin te îngăren-ame te cheras iech baro păcato. (Mar. 7:21-23; Iac. 1:14, 15)

17. Pala so mangas-ame anda ajutorii, so trebul te cheras caște așias zurale contra le athaimata? (Dich vi le imagini.)

¹⁷ Bi o ajutorii cai avel catar o Iehova, ci daisaras te așias contra o athaimos te cheras so si nasul. O Isus phendea vi le dumes cai aven ando manglimos-modelo: „Na îngăr-ame ando zumaimos, tha ferisar-ame codolestar nasul”. (Mat. 6:13) O Iehova camel te avel pașa amende, tha trebul te mangas lesco ajutorii. Mai but, trebul te cheras cadea sar phenas ande amare manglimata. Si zurales importanto te das amari zor te na așunas sau te citisaras buchia neuje hai sicaimata prinjiande andi lumea le Satanoschi. (Ps. 97:10) Daisaras te pheras amari goghi buchianța uje cana citisaras hai sichioas anda i Biblia. Vi le întruniri hai i predicarea ferin amari goghi, hai o Iehova promitil amenghe că ci va avela te mechel te avas zumade mai but sar daisaras te îngăras. (1 Cor. 10:12, 13)

18. So trebul te cheres ande soste priveal o manglimos?

¹⁸ Acana mai but sar oricana, trebul te mangas-ame caște așias zurale ando pachiamos ande cadal ghiesa phare de palal. Cadea că, te cheras amenghe timpo ande fiesavo ghies anda o manglimos. O Iehova camel te ‘șioras amaro ilo angla leste’ ando manglimos. (Ps. 62:8) Te așaras-les hai te mulțumisaras lesche anda sea so cherel ande amaro miștimos. Te mangas-les te del-ame tromai caște predichisaras, caște nachas părdal le pharimata hai caște așias zurale contra orisavo athaimos. Te na mechas ca chonic hai chanci te așiavel-ame te mangas-ame le Iehovasche ande fiesavo ghies! Tha, sar del-ame vo răspunso ca amare manglimata? Va avela te arachas o răspunso cadale pușimaste ando articolo cai avel.