Daștis te încăres chio pachiamos zuralo cana naches prin pharimata

1, 2. a) Sar ameal amari situația hai i situația le evreienghi cai risaile ando Ierusalimo? b) Prin so pharimata nachle von? (Dich vi o chenarii „Le buchia cai întâmplosarde-pe andel ghiesa cana traisarde o Hagai, o Zaharia hai o Ezra”.)

SI TUCHE dar poiechdata cana gândisares-tu co viitorii? Daștil-pe că hasardean chi buchi hai daras anda codoia că ci jianes sar va avela te les sama pe chi familia. Sau daștil-pe că anda codoia că ande chio them si nehachiarimata politico, si persecuții sau le manușa așen tumenghe contra andi predicarea si tuche dar anda i siguranța chia familiachi. Naches chiar acana prin iech anda cadal pharimata? Dacă da, va ajutila-tu te jianes sar ajutisardea o Iehova le israelițen andal puraimata cana nachle prin pharimata sar cadala.

² Le evreien cai traisarde sea penghi viața ando Babilono, trebulas-le iech pachiamos zuralo caște mechen o lașio traio hai o barvalimos cai sas-len code, hai te jian caring iech them anda savo ci jianenas prea but buchia. Cana arăsle code, na pa but timpo astarde te avel-len pharimata le lovența. Sa cadea, sas vi nehachiarimata politico ando Imperio Persano, hai vi le thema de pașa lende așenas lenghe contra. Cadea că, anda chichiva jene sas pharo te șion o vazdimos le templosco po iechto than ande penghi viața. Anda codoia, cam ando bărș 520 a.a.e., o Iehova alosardea dui profeți, o Hagai hai o Zaharia caște zuriarel o zelo pesche manușengo. (Hag. 1:1; Zah. 1:1) Cadea sar va avela te dichas mai dur, lenghe dumes zuriarde hai ajutisarde but le poporos. Tha, cam pala 50 bărșa, le israeliți cai risaile parpale ando Ierusalimo sas-le pale perade. O Ezra, iech manuș goghiaver cai scriilas i Legea le Devleschi, avilea anda o Babilono co Ierusalimo caște zuriarel le manușen le Devlesche te șion i închinarea andini le Iehovasche po iechto than ande penghi viața. (Ezra 7:1, 6)

3. Ca so pușimata va avela te arachas răspunso? (Proverbele 22:19)

³ Le profeții cai cărdea-len o Hagai hai o Zaharia ajutisarde le manușen le Devlesche andal puraimata, cana nachle prin pharimata hai cana aver așine lenghe contra caște șion pengo pachiamos ando Iehova. Tha von daștin te ajutin vi amen te na hasaras amaro pachiamos ando Iehova chiar cana va avela te nachas prin but pharimata. (Citisar Proverbele 22:19.) Mai dur, va avela te dichas o mesajo cai o Iehova phendea-les prin o Hagai hai o Zaharia, tha vi so daisaras te sichioas catar o Ezra. Sa cadea, va avela te arachas o răspunso cadale pușimatande: Sar perade le evreien cai risaile ando Ierusalimo le pharimata? Sostar trebul te șioas i închinarea andini le Iehovasche po iechto than ande amari viața vi cana nachas prin ghiesa phare? Hai sar daisaras te zuriaras amaro pachiamos ando Iehova andel pharimata?

SAR PERADE LE EVREIEN CAI RISAILE ANDO IERUSALIMO LE PHARIMATA

4, 5. Sostar daștil-pe că le israeliți hasarde pengo zelo te vazden pale o templo?

⁴ Cana risaile ando Ierusalimo, le evreien sas-len but buchi te cheren. Cu sea cadala, von vazdine sigo o altaro le Iehovasco hai șiute i temelia le temploschi. (Ezra 3:1-3, 10) Tha lenghi bucuria de mai anglal astardea te hasarel-pe. Sostar? Von na numai că trebunas te vazden pale o templo, tha trebunas te cheren penghe chăra ande save te beșen hai te astaren te cheren buchi i phuv caște avel lenghe familien so te han. (Ezra 2:68, 70) Mai but, le dușmani așenas lenghe zurales contra hai cherenas penghe iech plano caște așaven o vazdimos le templosco. (Ezra 4:1-5)

⁵ Le evrei cai risaile parpale, nachenas vi prin pharimata le lovența hai nehachiarimata politico. Von sas-le tela o zuralimos le Imperiosco Persano. Pala so o rege persano Cirus mulea ando bărș 530 a.a.e., o Cambise, o rege cai avilea pala leste, cărdea iech campania militaro caște lel tela pesco zuralimos o Egipto. Ando timpo so jianas caring o Egipto, lesche soldați daștil-pe că mangle catar le israeliți haben, pai, hai iech than cai te beșen, hai cadaia, andea încă iech pharimos pe lenghe dume. Pala codoia astardea te rail o rege Darius I, vi ande codo timpo sas but marimata hai nehachiarimata politico. Sea cadala cherenas i viața le israelițenghi vi mai phari. Daștil-pe că von pușenas-pe sar va lena sama pe penghe familii. Sea cadal pharimata neajucărde, cărde chichiva israelițen te pachian că ci sas o mai lașio momento te vazden pale o templo le Iehovasco. (Hag. 1:2)

6. Prin so aver pharimata nachle le iudei hai so phendea lenghe o Zaharia? (Zaharia 4:6, 7)

⁶ Citisar Zaharia 4:6, 7. Le israeliți nachenas na numai prin pharimata le lovența hai nehachiarimata politico, opral lende avile vi persecuții. Ando bărș 522 a.a.e., lenghe dușmani daisarde te așaven o vazdimos le templosco le Iehovasco. Tha, o Zaharia phendea le evreienghe că o Iehova, prin pesco spirito sfânto, va duriarela lendar orisavo pharimos. Ando bărș 520 a.a.e., o rege Darius mechlea-le te vazden mai dur o templo hai dea-len love caște daștin te cheren cadaia, hai vi manușa cai te ajutin-len. (Ezra 6:1, 6-10)

7. Anda codoia că șiute po iechto than leschi voința so miștimata dea o Iehova pesche manușenghe?

⁷ Prin o Hagai hai o Zaharia, o Iehova phendea pesche manușenghe că va avela lența, dacă avenas te șion po iechto than i buchi te vazden pale o templo. (Hag. 1:8, 13, 14; Zah. 1:3, 16) Zuriarde catar cadal profeți, le evrei astarde ando bărș 520 a.a.e. te vazden pale o templo hai 5 bărșa mai târzio, terminsarde-les. Von șiute po iechto than ande penghi viața i voința le Iehovaschi chiar cana nachle prin but pharimata. Cadea că, o Iehova dea-len na numai so trebulas lenghe caște train tha vi zuriardea lengo pachiamos, hai daisarde te anen închinarea le Iehovasche pherde bucuria. (Ezra 6:14-16, 22)

CHEREN ANDA I VOINȚA LE IEHOVASCHI I MAI IMPORTANTO BUCHI ANDA TUMARI VIAȚA

8. Sar ajutin-ame le dumes anda Hagai 2:4 te șioas sea o timpo i voința le Iehovaschi po iechto than ande amari viața? (Dich vi i nota de telal.)

⁸ Ando timpo so o baro necazo pașiol sea mai but, amen jianas chichi de importanto si te predichisaras le manușenghe. (Mar. 13:10) Tha, daștil-pe că ci si amenghe ușoro te cheras cadaia, vi mai but cana si amen pharimata le lovența sau varecon așel amenghe contra. So daștil te ajutil-ame te șioas po iechto than ande amari viața i voința le Iehovaschi? Te pachias anda sea o ilo că „o Iehova le armatengo”b silo amența. O Iehova va ajutil-ame dacă șioas vi mai dur leschi voința mai opral le buchiandar cai camas-le amen. Cadea că, na-i amen sostar te daras. (Citisar Hagai 2:4.)

9, 10. Sar pherdine-pe le dumes anda Matei 6:33 andi viața le phralenghi Oleg hai Irina?

⁹ Te dichas prin so nachlea o phral Oleg hai leschi rromni, Irina,c cai slujin sar pionieri. Pala so găle ande aver than caște ajutin iech congregația, von ci mai daisarde te cheren love anda codoia că ande lengo them sas but pharimata le lovența. Cam iech bărș ci sas-len iech than buchiaco siguro. Cu sea cadala, von dichle sea o timpo o vast le Iehovasco sar ajutil-len. Mai but, poiechdata primisarde ajutorii vi catar le phrala hai le pheia. So ajutisardea-le te nachen părdal cadal pharimata? Chiar cana co începuto sas-lo perado, o Oleg phenel: „Cărdeam chichi de but daisardeam andi predicarea, hai cadaia ajutisardea-ame te încăras andi goghi ca le mai importanto buchia anda amari viața”. Vo hai leschi rromni rodine vi mai dur iech than te cheren buchi, tha șiute sea o timpo i predicarea po iechto than.

¹⁰ Ande iech ghies cana avenas anda i predicarea, von așunde că iech lașio amal cărdea cam 160 km caște anel lenghe dui plase pherde haben. O Oleg phenel: „Ande codo ghies, dichleam chichi de bari si i iubirea le Iehovaschi tha vi le phralenghi andai congregația. Chiar cana fal-pe că le buchia ci va lașiarena-pe, amen pachias zurales că o Iehova ci bâstrăl niciechdata pesche manușen”. (Mat. 6:33)

11. So daisaras te ajucăras dacă das sea amari zor te cheras i buchi le Iehovaschi?

¹¹ O Iehova camel te das sea amari zor te predichisaras le manușenghe, te cheras discipoli hai cadea te salvisaras lenghi viața. Cadea sar dichleam ando paragrafo 7, o Hagai zuriardea le manușen le Iehovasche te neviaren pengo zuralimos andi buchi le Devleschi, sar cana avenas te șion pale i fundația le temploschi. O Iehova phendea lenghe că dacă cherenas cadaia, va ‘dela-le but miștimata’. (Hag. 2:18, 19) Dacă das amari zor te cheras i buchi le Iehovaschi, daisaras te pachias ciaces că vo va dela vi amen but miștimata!

SAR TE ZURIAREN TUMARO PACHIAMOS ANDO IEHOVA

12. Sostar sas importanto anda o Ezra hai le coaver evrei te avel-le iech zuralo pachiamos?

¹² Ando bărș 468 a.a.e., o Ezra hai iech duito grupo evrei tiliarde anda o Babilono hai găle co Ierusalimo. Trebulas-le iech baro pachiamos caște cheren codo drom. Von daranas anda codoia că codol droma sas periculoso hai le ciora daștinas te len o sumnacai hai o rup cai o rege dea-len anda o templo. (Ezra 7:12-16; 8:31) Mai but, von hachiarde că nici o Ierusalimo ci sas iech than siguro. Code, beșenas țâra manușa, hai le ziduri hai udara le forosche trebunas lașiarde. So daisaras te sichioas catar o Ezra anda sar zuriardea pesco pachiamos ando Iehova?

13. Sar zuriardea o Ezra pesco pachiamos ando Iehova? (Dich vi i nota de telal.)

¹³ O Ezra dichlea sar o Iehova ajutisardea pesche poporos andel phare ghiesa. Ando bărș 484 a.a.e., daștil-pe că o Ezra sas-lo ando Babilono cana o rege Ahașveroș dea o decreto ca sea le iudei cai beșenas ando Imperio Persano te aven mudarde. (Est. 3:7, 13-15) I viața le Ezraschi hai sea le iudeienghi sas ando pericolo! Cana așunde sea cadal buchia, sea le evrei astarde te na mai han, te roven hai te manghen-pe zurales le Iehovasche caște ajutil-len. (Est. 4:3) Daisaras te gândisaras-ame so sas ando ilo le Ezrasco hai le coaver evreiengo, cana codola cai camle te cheren lenghe nasulimos sas-le mudarde! (Est. 9:1, 2) Daștil-pe că sea le buchia prin save nachlea o Ezra ajutisarde-les te așel zuralo andel pharimata cai avile ando viitorii hai zuriarde lesco pachiamos că o Iehova daștil te feril Pesche manușen.d

14. So sichilea iech phei pala so dichlea o vast le Iehovasco cana nachlea prin pharimata?

¹⁴ Cana dichas sar lel sama pe amende o Iehova cana nachas prin pharimata, amaro pachiamos ande leste cărdiol sea mai zuralo. Te dichas prin so nachlea i Anastasia, iech phei cai beșel andi Europa de Est. Voi mechlea peschi buchi anda codoia că lache colegi camenas te cheren-la te hamisarel-pe andi politica. Voi anel peschi andi goghi: „Sas i dintuni data anda mânri viața, cana ci mai sas-ma nici iech țâra love.” Hai mai phenel: „Mechlem sea cadal buchia ando vast le Iehovasco hai dichlem sar vo pherdo iubirea lea sama pe mande. Cadea că, dacă va mai avela te hasarav mânri buchi ci va avela te darav. Dacă mânro Dad cerisco lel sama pe mande aghies, pachiav că va lela sama pe mande vi tehara”.

15. So ajutisardea le Ezras te încărel zuralo pesco pachiamos ando Iehova? (Ezra 7:27, 28)

¹⁵ O Ezra dichlea o vast le Iehovasco ande peschi viața. Vo gândisardea-pe butivar sar lea o Iehova sama pe leste, hai cadaia ajutisardea-les te încărel vi mai dur pesco pachiamos zuralo. Te dichas le dumes „o vast mânre Devlesco, le Iehovasco, sas-lo opral mande”. (Citisar Ezra 7:27, 28.) Ando lil cai phiravel lesco anav, o Ezra mai phendea panji-var sa codol dumes. (Ezra 7:6, 9; 8:18, 22, 31)

16. Cana daisaras te dichas o vast le Iehovasco ande amari viața? (Dich vi i imaginea.)

¹⁶ O Iehova silo pașa amende, gata te ajutil-ame oricana nachas prin iech pharimos. Sar exemplo, cana mangas amenghe libero catar i buchi caște jias ca iech congreso sau cana mangas iech paruimos ande amaro programo catar i buchi caște jias ca sea la întruniri, daisaras te dichas o vast le Iehovasco ande amari viața. Daștil-pe că le buchia va jiana but mai mișto sar ajucărdeam-ame. Cadea că, amaro pachiamos ando Iehova va cărdiola sea mai zuralo.

17. Sar sicadea o Ezra umilința cana nachlea prin pharimata? (Dich i imaginea pa i coperta.)

¹⁷ O Ezra manglea o ajutorii le Iehovasco pherdo umilința. De fiesavi data cana sas-lo perado anda codoia că ci daștilas te cherel sea le buchia cai sas lesche dine, o Ezra manghelas-pe le Iehovasche ieche ileia umilo. (Ezra 8:21-23; 9:3-5) Anda codoia că vo șiutea pesco pachiamos ando Iehova zuriardea le coaveren te cheren sa cadea. (Ezra 10:1-4) Cana sam perade anda codoia că si amen pharimata le lovența sau si amenghe dar anda o miștimos amara familiaco, te rodas pherde pachiamos o ajutorii le Iehovasco ando manglimos, cadea sar cărdea o Ezra.

18. Sar daisaras te zuriaras amaro pachiamos ando Iehova?

¹⁸ Dacă vi amen cana nachas prin pharimata rodas pherde umilința o ajutorii le Iehovasco hai mechas amare phralen te aven pașa amende, amaro pachiamos ando Del va bariola. I Erika, iech dei cai sila trin șiave, încărdea zuralo pesco pachiamos ando Iehova chiar cana nachlea prin bare pharimata. Ande iech țâra timpo, mulea laco șiavo nenăștime hai vi laco rrom. Cana dichel-pe parpale, voi phenel: „Ci daștis te jianes de mai anglal sar va ajutila-tu o Iehova. Vo daștil te ajutil-tu cadea sar nici na ajucăres-tu. Tha, dichlem că, butivar, o Iehova dea-ma răspunso ca le manglimata prin so phenenas hai cherenas manghe mânre amala. Dacă pâtrav mânro ilo angla lende, va avela lenghe mai ușoro te ajutin-ma”.

TE ÎNCĂRAS AMARO PACHIAMOS ZURALO ANDO IEHOVA JI CO SFÂRȘITO

19, 20. So sichioas catar le evrei cai ci daisarde te risaren-pe ando Ierusalimo?

¹⁹ Daisaras te sichioas vareso importanto vi catar le evrei cai ci daisarde te risaren-pe ando Ierusalimo. Daștil-pe că, chichiva ci daisarde te cheren cadaia anda codoia că sas-le prea phure, nasfale sau i situația cai sas ande lenghi familia ci mechelas-le. Cu sea cadala, von sas-le voime te ajutin buchianța materialo codolen cai risaile. (Ezra 1:5, 6) Cadea sar fal-pe, cam 19 bărșa pala so o dintuno grupo risailo ando Ierusalimo, codola cai așile ando Babilono încă bișalenas donații. (Zah. 6:10)

²⁰ Daștil-pe că amen camas te cheras mai but anda o Iehova, tha amari situația ci mechel-ame. Daisaras te pachias ciaces că anda o Iehova si cuci sea le buchia cai cheras-le anda leste. Catar jianas cadai buchi? Andel ghiesa le Zahariasche, o Iehova phendea le profetosche te cherel iech coroana anda o sumnacai hai o rup bișalde catar le evrei anda o Babilono. (Zah. 6:11) Cadai „bari” coroana avelas te avel cărdi caște „anen penghe andi goghi” sea so von dine buhle vasteia. (Zah. 6:14, n.s.) O Iehova ci va bâstrăla niciechdata sea so cheras caște slujisaras lesche anda sea o ilo, chiar cana nachas prin pharimata. (Evr. 6:10)

21. So va ajutil-ame te pachias-ame ando Iehova indiferento so va avela ando viitorii?

²¹ Jianas că va avela te nachas prin mai but pharimata ande cadal palutne ghiesa hai le buchia daștin te rimosaren-pe vi mai but. (2 Tim. 3:1, 13) Cu sea cadala, ci trebul te mechas ca le daraimata te peraven-ame! Te anas amenghe andi goghi so phendea o Iehova pesche manușenghe andel ghiesa cai traisardea o Hagai: „Me som tumența . . . Te na daran!”. (Hag. 2:4, 5) Vi amen daisaras te pachias ciaces că chichi timpo cheras sea so încărel amendar andi buchi le Iehovaschi, vo va avela pașa amende. Dacă încăras andi goghi so sichileam anda le profeții cai cărdea-le o Hagai hai o Zaharia, tha vi anda o exemplo le Ezrasco, va avela te zuriaras amaro pachiamos ando Iehova, orisave pharimata va avena ando viitorii.