So cărdea o Iehova caște salvil le manușen păcătoși?

1, 2. a) So si o păcato hai sar daisaras te câștighisaras o marimos contra leste? (Dich „Hachiar mai mișto”) b) Anda so das duma ande cado articolo hai ande le coaver articolea cai arachen-pe ande cado număro anda o Turno de veghe? (Dich vi i nota catar i pagina 32, „Amaro drago cititorii”.)

CAMES te jianes sode but iubil tut o Iehova Del? Daștis te jianes cadaia cana sichios anda so cărdea vo caște salvil tut anda o păcato hai o merimos. O păcatoa si iech baro dușmano, saves ci daștis te mares-les corcoro. Savore mașcar amende păcătuisaras ande fiesavo ghies hai o păcato îngărel amen co merimos. (Rom. 5:12) Cu sea cadala, si vi iech vestea lași. O Iehova cherel tut mai zuralo caște câștighis o marimos contra o păcato. Mai but, jianas ciaces că o Iehova va salvila amen anda o păcato hai o merimos!

² O Iehova Del ajutil le manușen te maren-pe contra o păcato cam de 6 000 bărșa. Sostar? Anda codoia că iubil amen. Vo iubisardea le manușen de cana cărdea-len, cadea că cărdea sea so daisardea caște ajutil len te maren-pe contra o păcato. O Del jianel că o păcato îngărel co merimos hai vo ci camel ca amen te meras. Vo camel te traisaras anda sea o timpo. (Rom. 6:23) Cadaia camel vo vi anda tute. Ande cado articolo, va avela te das duma anda trin pușimata: 1) Sar dea o Iehova iech speranța le manușen păcătoși? 2) Sar daisarde le manușa păcătoși andal ghiesa biblico te aven dichle lașe iachența le Iehovastar? 3) Sar avilea o Isus caște salvil le manușen păcătoși?

SAR DEA O IEHOVA IECH SPERANȚA LE MANUȘEN PĂCĂTOȘI?

3. Sar arăsle o Adam hai i Eva te aven păcătoși?

³ Cana o Iehova cărdea le iechto murșes hai jiuvlea, vo camlea ca von te aven fericime. Vo dea-len iech șucar chăr cai te beșen, o daro la căsătoriaco hai iech șucar buchi te cheren. Von trebunas te pheren i phuv penghe șiavorența, te cheren sea i phuv iech paradiso cadea sar sas i bar le Edenoschi. Vo manglea lendar te na cheren iech corcori buchi. O Iehova, phendea lenghe că, dacă ci așunen catar leschi porunca, lengo păcato avelas te îngărel co merimos. Amen jianas so întâmplosardea-pe. Iech îngero nasul, cai ci iubilas le Devles hai nici len, astardea te athavel-len te cheren cado păcato. O Adam hai i Eva pele ande lesco athaimos. Anda codoia că ci pachiaie-pe ande lengo Dad cai sicadea lenghe iubirea, von păcătuisarde. Cadea sar jianas, so phendea lenghe o Iehova sas ciaces. Anda codo ghies astarde te țârde le nasul buchia: te phurion hai ji la urmă mule. (Gen. 1:28, 29; 2:8, 9, 16-18; 3:1-6, 17-19, 24; 5:5)

4. Sostar urâl o Iehova o păcato hai sostar ajutil amen te maras amen contra lesche? (Romani 8:20, 21)

⁴ O Iehova șiutea andi Biblia so întâmplosardea-pe andi bar le Edenoschi ca amen te sichioas vareso importanto. Cadaia ajutil amen te hachiaras sode but urâl vo o păcato. O păcato duriarel amen amare Dadestar hai îngărel co merimos. (Is. 59:2) Dichta sostar, o Satan, cai risardea pesco dumo le Iehovasche hai andea sea cadal pharimata, iubil o păcato hai rodel vi aghies te cherel le manușen te peren ando păcato. Cana cărdea le Adamos hai la Eva te păcătuin, vo pachiaia că o scopo le Iehovasco le manușența hasardilea. Tha vo ci hachiardea chichi de bari si i iubirea le Iehovaschi. O Del ci parudea niciechdata pesco scopo andal șiave le Adamosche hai Evache. Vo iubil le manușen hai sigo dea iech speranța savoren. (Citisar Romani 8:20, 21.) O Iehova jianelas că chichiva mașcar le șiave cai țârdenas-pe anda o Adam hai i Eva avenas te alosaren te iubin-les hai te roden lesco ajutorii ando marimos contra o păcato. Sar lengo Dad hai Creatorii, vo arachlea iech modo te scăpil-len le păcatostar hai te pașion lestar. Sar cărdea o Iehova posibilo sea cadal buchia?

5. So speranța dea o Iehova le manușen sigo pala so o Adam hai i Eva păcătuisarde? Explichin. (Geneza 3:15)

⁵ Citisar Geneza 3:15. O Iehova astardea te del speranța le manușen păcătoși cana phendea sar avelas te mudarel le Satanos. O Iehova phendea de mai anglal că lesco Șiavo avelas te avel o principalo jeno prin savo daștilas te anel speranța le manușenghe. Cado Șiavo le Devlesco avelas te mudarel, ji la urmă, le Satanos hai te chosel sea o nasulimos cai cado cărdea-les ando Eden. (1 Ioan 3:8) Tha, mai anglal, o Satan avelas te del-les dab hai te cherel-les te merel. Chiar cana cadaia avelas te duchavel zurales le Iehovas, vo dichlea caring o miștimos le manușengo hai sar but jene mașcar lende avenas te aven salvime anda o păcato hai o merimos.

SO CĂRDE LE MANUȘA PĂCĂTOȘI ANDAL GHIESA BIBLICO CAȘTE AVEN MIȘTO DICHLE LE IEHOVASTAR

6. So cărde le devlicane manușa, sar avelas o Abel hai o Noe, caște pașion le Iehovastar?

⁶ Andel bărșa cai avile, o Iehova sicadea, țâra po țâra hai sea mai claro, sar daștinas le manușa păcătoși te pașion lestar. O Abel, o duito șiavo le Adamosco hai la Evaco, sas o dintuno manuș cai șiutea pesco pachiamos ando Iehova pala so le manușa vazdine-pe contra o Del ando Eden. Anda codoia că o Abel iubilas le Iehovas, vo andea lesche iech jertfa caște avel dichlo lașe iachența lestar hai te pașiol caring leste. O Abel sas iech păstorii, cadea că lea chichiva mașcar lesche bacrișen, șindea-len hai andea-len angla o Iehova. So cărdea o Iehova? „O Iehova dichlea lașe iachența caring o Abel hai leschi jertfa”. (Gen. 4:4) Les ciaile-les vi aver jertfe sar cadala, dine manușendar cai iubinas-les hai sas-len pachiamos ande leste, sar avelas o Noe. (Gen. 8:20, 21) Cana primisardea cadal jertfe, o Iehova sicadea că le manușa imperfecți daștin te aven mișto dichle lestar hai te pașion lestar.b

7. So sichioas le Avraamostar cana sas-lo gata te del pesche șiaves sar jertfa?

⁷ O Iehova manglea le Avraamostar, iech manuș zuralo ando pachiamos, te cherel iech buchi phari: te del pesche șiaves Isaac sar jertfa. Cadaia avelas te duchavel but o ilo le Avraamosco. Cu sea cadala, vo așundea le Devlestar hai sas-lo gata te cherel cadai phari buchi. Tha, cana o Avraam sas-lo pașă te mudarel pesche șiaves, o Del așadea-les chiar angla te mudarel-les. Cado exemplo sicavel iech baro ciacimos savore manușenghe cai silen pachiamos: o Iehova iubil cadea de but le manușen, că sas-lo gata te del pesche Șiaves iubime sar jertfa. (Gen. 22:1-18)

8. So sicavenas le but jertfe andine tela i Legea că avelas te cherel o Iehova? (Levitico 4:27-29; 17:11)

⁸ Pala mai but bărșa, cana o Iehova dea i Legea le israelițenghe, vo phendea lenghe te anen jertfe anda animalea caște aven chosle lenghe păcatea. (Citisar Levitico 4:27-29; 17:11.) Cadal jertfe sicavenas că o Iehova avelas te del iech jertfa mai bari, cai avelas te chosel cu sea o păcato le manușengo. O Del mechlea pesche profețenghe te scriin anda iech jeno promiso, cai sicadea-pe că sas iech Șiavo specialo le Devlesco, cai trebulas te nachel prin bare ducha hai te avel mudardo. Vo avelas te avel șindo sar iech bacri andai jertfa. (Is. 53:1-12) Gândisar tut: O Iehova cărdea ca lesco mai cuci Șiaves te avel dino sar jertfa caște salvil le manușen – vi tut – anda o păcato hai o merimos.

SO CĂRDEA O ISUS CAȘTE SALVIL AMEN

9. So phendea o Ioan Botezătorii anda o Isus? (Evrei 9:22; 10:1-4, 12)

⁹ Ando iechto secolo a.e., cana o Ioan Botezătorii, iech manuș devlicano, dichlea le Isusos anda Nazareto, phendea: „Dichen le Bacrișes le Devlesco cai va duriarela o păcato la lumeaco!”. (Ioan 1:29) Cadal dumes cai avile le Devlestar sicavenas că o Isus sas codo jeno specialo, promitime de but timpo. Vo trebulas te del peschi viața sar jertfa. Acana, mai but sar oricana, sas iech bari speranța andal manușa păcătoși – te aven salvime cu sea anda o păcato. (Citisar Evrei 9:22; 10:1-4, 12.)

10. Sar sicadea o Isus că avilea te acharel peste le manușen păcătoși?

¹⁰ O Isus dea iech atenția specialo le manușenghe cai simțosarenas-pe perade anda lenghe doșa hai achardea-len te aven lesche continuatori. Vo jianelas că o păcato anelas sea le pharimata le manușenghe. Dichta sostar vo rodea te ajutil mai but le murșen hai le jiuvlean cai sas-le prinjiande sar manușa păcătoși. Caște hachiarel-pe mai mișto, vo cherel iech exemplo hai phenel: „Na le manușen sasteveste silen nevoia catar o doctorii, tha codolen cai sile nasfale”. Vo mai phenel: „Ci avilem te acharav codolen orta, tha codolen păcătoși”. (Mat. 9:12, 13) O Isus chiar cărdea cadai buchi. Cana iech jiuvli haladea lesche pânre lache asfența, vo dea duma pherdo lașimos caring late hai iertisardea lache păcatea. (Luca 7:37-50) Sa cadea, vo sicadea bare ciacimata la jiuvliache samariteano ca i haing, chiar cana jianelas că voi trailas ieche murșesa cai ci sas laco rrom. (Ioan 4:7, 17-19, 25, 26) O Del chiar dea le Isusos o zuralimos te chosel o mai baro pharimos cai anel-les o păcato – o merimos. Sar? O Isus uștiadea andal mule murșen hai jiuvlean, șavorren hai bare manușen. (Mat. 11:5)

11. Sostar simțonas-pe mișto le manușa păcătoși pașa o Isus?

¹¹ Cadea că, daisaras te hachiaras sostar vi le manușa cai cherenas buchia zurales jiungale simțonas-pe mișto pașa o Isus. Vo hachiarelas prin so nachenas hai phiravelas-pe pherdo lașimos lența. Cadale manușenghe ci sas lenghe lajiav te pașion lestar. (Luca 15:1, 2) O Isus așardea hai pochindea parpale codolen cai sicavenas pachiamos ande leste. (Luca 19:1-10) Vo lea-pe pala pesco Dad hai sicadea iech bari mila le manușenghe. (Ioan 14:9) Prin pesco phiraimos hai prin so phendea, vo sicadea că lesco Dad îndurătorii iubil le manușen hai camel te ajutil fiesaves mașcar lende te câștighil o marimos contra o păcato. Sa cadea, o Isus ajutisardea le manușen păcătoși te camen te paruven pengo phiraimos hai te jian pala leste. (Luca 5:27, 28)

12. So phendea o Isus anda pesco merimos?

¹² O Isus jianelas so ajucărelas-les. Mai butivar, vo phendea pesche discipolenghe că va avela bichindo hai mudardo pe iech stâlpo. (Mat. 17:22; 20:18, 19) Vo jianelas că leschi jertfa avelas te chosel o păcato la lumeaco, cadea sar cărdea prinjiando o Ioan hai phende de mai anglal le profeți. Sa cadea, o Isus phendea că, pala so avelas te merel, vo ‘va țârdela peste manușen de orisavo felo’. (Ioan 12:32) Le manușa păcătoși daștinas te aven mișto dichle le Iehovastar dacă așunenas le Isusostar, lengo Rai, hai lenas-pe pala leste. Prin cadai buchi von daștinas, ji la urmă, te aven „eliberime anda o păcato”. (Rom. 6:14, 18, 22; Ioan 8:32) Pherdo tromai, o Isus sas-lo gata te nachel prin iech pharo merimos caște salvil amen. (Ioan 10:17, 18)

13. Sar mulea o Isus hai so sichioas de catar anda o Iehova? (Dich vi i imaginea.)

¹³ O Isus sas-lo bichindo catar iech anda lesche lașe amala, pala codoia lesche dușmani phandade-les, prasade-les hai doșarde-les anda buchia cai ci cărdea-len. Von șiute ca o Isus te avel mudardo hai chiar marde-les zurales. Le soldați îngărde-les ca o than cai avelas te avel mudardo hai șiute-les po stâlpo. Cana vo nachlea prin cadai bari duch pherdo pachiamos, sas Varecon cai sas vi mai duchado. Cado sas o Iehova Del. Vo încărdea-pe parpale pes hai vi pesco baro zuralimos caște na cherel chanci. Dacă o Iehova iubil cadea de but pesche Șiaves, sostar mechlea-les te nachel prin cadai bari duch hai te avel mudardo? Anda codoia că o Iehova iubil amen. O Isus phendea: „Cadea de but iubisardea o Del la lumea, că dea pesche Șiaves o corcoro cărdo lestar, ca oricon sicavel pachiamos ande leste te na merel, tha te avel-les viața veșnico”. (Ioan 3:16)

14. So sichioas anda i jertfa le Isusoschi?

¹⁴ I jertfa le Isusoschi si i mai bari dovada cai sicavel chichi de but iubil o Iehova le manușen, cai țârden-pe anda o Adam hai i Eva. Cadai buchi sicavel sode but iubil o Iehova vi tut. Vo sas-lo gata te cherel oriso caște salvil tut anda o păcato hai o merimos, chiar cana trebuisardea te nachel prin i mai bari duch. (1 Ioan 4:9, 10) Da, vo camel te ajutil fiesaves mașcar amende te maras amen contra o păcato hai te câștighisaras!

15. So trebul te cheras amen caște țârdas miștimata anda o daro le Devlesco prin savo dea le Isusos te merel anda amende?

¹⁵ O daro le Devlesco prin savo dea pesche Șiaves o corcoro cărdo lestar te merel anda amende cherel posibilo ca amare păcatea te aven chosle. Tha, caște avel amen i iertarea le Devleschi, trebul te cheras vi amen vareso. So? O Ioan o Botezătorii hai, pala codoia, chiar o Isus phenen amenghe so trebul te cheras: „risaren tumen catar tumaro phiraimos nasul, că o Regato le cerurengo pașilo!”. (Mat. 3:1, 2; 4:17) Cadea că, trebul te fal amen pharo anda le buchia nasul cai cărdeam-len hai te paruvas amen dacă camas ciaces te maras amen contra o păcato hai te pașioas amare Dadestar, o Iehova. Tha so însemnol te risaras amen catar amaro phiraimos nasul hai sar ajutil amen te avas mișto dichle le Iehovastar, chiar cana sam păcătoși? Va avela te arachas o răspunso ando articolo cai avel.