Te phiras prin pachiamos!

1. Sostar sas fericime o Pavel cana gândisardea-pe sar traisardea peschi viața?

O APOSTOLO Pavel hachiardea că, na pa but timpo, avelas te avel mudardo. Tha, cana gândisardea-pe sar traisardea peschi viața, vo sas-lo zurales fericime. Cana gândisardea-pe le buchiande cai cărdea-len, vo phendea: „Nașlem i cursa ji co sfârșito, așilem ando pachiamos”. (2 Tim. 4:6-8) O Pavel alosardea mișto sar te folosil peschi viața caște slujil le Iehovasche hai jianglea ciaces că vo dichelas-les lașe iachența. Vi amen camas te cheras lașe alosarimata hai te avas dichle lașe iachența le Iehovastar. Sar daisaras te cheras cadaia?

2. So însemnol te phires prin pachiamos?

² O Pavel phendea anda peste hai anda aver creștini fideli: „Amen phiras prin pachiamos, na prin so dichas”. (2 Cor. 5:7) So camlea o Pavel te phenel? Andi Biblia, i duma „te phiras” poiechadata sicavel caring o modo sar alosarel iech manuș te trail peschi viața. Cana varecon phirel numai pala le buchia cai dichel-len, cherel alosarimata pala so phenel lesco ilo, pala so dichel hai așunel. Tha cana varecon phirel prin pachiamos, cherel alosarimata cai sicaven că pachial-pe ando Iehova. Le buchia cai cherel-len sicaven că pachial ciaces că o Iehova va pochinela-les parpale hai că va avela-les miștimata dacă așunel catar le sfaturi anda o Lil le Devlesco. (Ps. 119:66; Evr. 11:6)

3. So miștimata si amen cana phiras prin pachiamos? (2 Corinteni 4:18)

³ O ciacimos si că savore cheras chichiva alosarimata pala sar țârdel amen amaro ilo. Tha, dacă las amen numai pala so dichas sau așunas cana cheras bare alosarimata, daștin te aven amen but pharimata. Sostar? Anda codoia că so țârdel amen o ilo te cheras daștil te athavel amen. Hai, chiar cana ci avelas te athavas amen, cana phiras numai pala le buchia cai dichas-len, daisaras te arăsas te na mai așunas le Devlestar hai te cheras vareso nasul ande lesche iacha. (Ecl. 11:9; Mat. 24:37-39) Tha, cana phiras prin pachiamos, va avela mai ușoro te cheras alosarimata „cai sile lașe andel iacha le Raiesche”. (Ef. 5:10) Cana las amen pala so phenel amenghe o Del, va avela amen pacea ando ilo hai va avela te arachas i ciaci fericirea. (Ps. 16:8, 9; Is. 48:17, 18) Mai but, dacă phiras mai dur prin pachiamos, va avela te bucurisaras amen catar iech viitoro veșnico. (Citisar 2 Corinteni 4:18.)

4. Sar daisaras te hachiaras dacă phiras prin pachiamos sau pala le buchia cai dichas-len?

⁴ Sar daisaras te hachiaras dacă phiras prin pachiamos sau pala le buchia cai dichas-len? Daisaras te pușias amen: „Pala so las amen cana cheras alosarimata? Las amen numai pala le buchia cai dichas-len sau șioas amaro pachiamos ando Iehova hai las amen pala lesche sfaturi?”. Mai dur, va avela te dichas sar daisaras te phiras prin pachiamos ande trin buchia: 1) cana alosaras so te cheras buchi, 2) cana alosaras casa te căsătorisaras amen hai 3) cana i organizația del amen îndrumări. Ande fiesavi buchi, va avela te dichas so daștil te ajutil amen te alosaras mișto.

CANA ALOSARAS SO TE CHERAS BUCHI

5. Save buchiande trebulas te gândisaras amen cana alosaras so te cheras buchi?

⁵ Savore camas te las sama amendar hai amara familiatar. (Ecl. 7:12; 1 Tim. 5:8) Chichiva thana buchiache sile pochinde mai mișto hai, cadea, daisaras te chinas le buchia cai trebun amen hai vi te șioas love de iech rig. Aver thana buchiache den mai țâra love hai daisaras te chinas numai le buchia cai trebun amara familiache caște trail. Cana alosaras cai te cheras buchi, si vareso normalo te pușias chichi love va avena te den amen. Cu sea cadala, dacă cadaia si i corcori buchi pala savi las amen cana alosaras dacă cheras buchi code sau nici, daștilas te însemnol că las amen pala le buchia cai dichas-len cana cheras alosarimata.

6. Sar daisaras te phiras prin pachiamos cana alosaras so te cheras buchi? (Evrei 13:5)

⁶ Cana phiras prin pachiamos, las sama ca amaro than buchiaco te na covliarel amaro amalimos le Iehovasa. Daisaras te pușias amen: „Va trebula te cherav chichiva buchia cai o Iehova ci dichel-len lașe iachența?”. (Prov. 6:16-19) „Codo than buchiaco va ciorela anda o timpo cai dav-les le Iehovasche sau va încărela man dur mânra familiatar mai but timpo?”. (Filip. 1:10) Dacă o răspunso cadale pușimatande si „da”, avelas goghiaver te na jias te cheras codoi buchi, chiar cana si pharo te arachas aver. Anda codoia că phiras prin pachiamos, va avela te cheras alosarimata cai sicaven că pachias ciaces că o Iehova va lela sama amendar hai va dela amen le buchia cai trebun amen. (Mat. 6:33; citisar Evrei 13:5)

7, 8. Sar phirdea prin pachiamos iech phral andai America de Sud? (Dich vi i imaginea.)

⁷ O Javier,a iech phral andai America de Sud, hachiardea chichi de importanto si te phirel prin pachiamos. Vo phenel: „Șiutem mânre lila anda iech buchi cai avelas te del man dui-var mai but love hai cadaia avelas te cherel man fericime”. Cu sea cadala, o Javier camlea anda sea o ilo te astarel o pionierato. Vo mai phenel: „O mai baro directoro anda o them camlea te del duma manța anda i buchi. Angla so te dav duma lesa, manglem le Iehovas te ajutil man hai pachiaiem ciaces că vo jianglea so sas mai mișto anda mande. Camlem te avav mai lașio ande mânri buchi, tha ci camlem ca codo than buchiaco te așiavel man te cherav mai but anda o Iehova”.

⁸ O Javier mai phenel: „Cana dem duma lesa, o directoro phendea manghe că trebulas te așiav ca i buchi mai but ande fiesavo ghies. Phendem lesche șucar că ci daștiv te cherav cadaia anda codoia că trebul te cherav vi le buchia anda o Iehova”. O Javier ci gălea ca codoi buchi. Pala dui curche vo astardea o pionierato, hai pala codoia, ande sa codo bărș, vo arachlea iech than buchiaco cai trebulas te cherel buchi numai dipaș ghies. Vo phenel: „O Iehova așundea mânre manglimata hai dea man iech than buchiaco cai ci așiavel man te cherav o pionierato. Som zurales fericime că cherav mai țâra buchi hai cadea, așel manghe mai but timpo te slujiv le Iehovasche hai le phralenghe”.

9. So sichios anda so cărdea o Trésor?

⁹ So daisaras te cheras dacă o than buchiaco cai si amen acana ci mechel amen te phiras prin pachiamos? Te dichas so cărdea o Trésor, anda Congo. Vo phenel: „Camlem sea o timpo iech than buchiaco sar cado. Somas pochindo trin var mai bute lovența hai le manușa denas manghe but pachiv”. Cu sea cadala, o Trésor ci gălea butivar le întrunirende anda codoia că trebulas te așel mai but ca i buchi. Sa cadea, le coaver phenenas lesche te garavel le buchia bipachivale cai cherenas-pe ca leschi buchi. O Trésor camlea te mechel codo than buchiaco, tha daralas că ci avelas te arachel aver. So ajutisardea-les? Vo phenel: „Hachiardem anda Habacuc 3:17-19 că o Iehova avelas te lel sama mandar, chiar cana ci mai avelas man love. Cadea că, mechlem codo than buchiaco”. Vo mai phenel: „But manușa cai pochinen tut anda iech buchi pachian că, caște aves mișto pochindo, trebul te meches sea, chiar vi i viața andai familia sau le buchia cai cheres-len anda o Del. Som fericime că lem sama catar mânro amalimos le Iehovasa hai mânra familiasa. Pala iech bărș, o Iehova ajutisardea man te arachav iech than buchiaco lașio, cai ajutil man te avel man iech viața lași hai te avel man mai but timpo caște cherav buchi vi anda leste. Cana șioas le Iehovas po iechto than andi viața, daștil-pe că iech timpo va avela te traisaras mai țâra lovența, tha o Iehova va lela sama amendar”. Dacă va avela amen pachiamos andel îndrumări hai promisiuni le Iehovasche, va avela te phiras mai dur prin pachiamos, hai vo va dela amen but miștimata.

CANA ALOSARAS CASA TE CĂSĂTORISARAS AMEN

10. So daștil te sicavel că phiras pala le buchia cai dichas-len cana alosaras casa te căsătorisaras amen?

¹⁰ I căsătoria si iech daro le Iehovastar, cadea că si normalo te cames te căsătoris tut. Cana iech phei camel te căsătoril-pe ieche phralesa, daștilas te gândil-pe ca chichiva buchia, sar avelas lesco phiraimos, sar sicavel de avreal, sar si prinjiando le coaverendar, chichi love siles, dacă trebul te lel sama varecastar andai familia tha vi dacă cherel-la te avel fericime.b Cadal buchia sile importanto. Cu sea cadala, dacă dichel numai cadala buchia, daștilas te însemnol că lel-pe pala le buchia cai dichel-len cana cherel alosarimata.

11. Sar daisaras te phiras prin pachiamos cana alosaras casa te căsătorisaras amen? (1 Corinteni 7:39)

¹¹ O Iehova del-pe baro le phralența hai pheianța cai len-pe pala lesche sfaturi cana alosaren casa te căsătorin-pe! Sar exemplo, von len-pe pala so phenel i Biblia hai ajucăren te nachel „i lulughi le tărnimaschi” angla te camen te prinjianen-pe mai mișto varecasa. (1 Cor. 7:36) Hai mai but, von roden varecas cai sicavel le calități cai o Iehova phenel că trebul te avel ieche lașe rromes sau rromnia. (Prov. 31:10-13, 26-28; Ef. 5:33; 1 Tim. 5:8) Cana varecon cai ci silo Martoro cherel lenghe gule iacha sau sicavel că camel te avel-len iech relația, von va alosarena te căsătorina-pe „numai ando Rai”, cadea sar phenel-pe ando 1 Corinteni 7:39. (Citisar.) Von phiren prin pachiamos anda codoia că pachian ciaces că o Iehova va lela sama lenghe ilendar mai mișto sar oricon. (Ps. 55:22)

12. So sichioas catar i Rosa?

¹² Te dichas so cărdea i Rosa, iech pioniera andai Columbia. Ando than cai cherelas buchi, iech murș cai ci sas-lo Martoro astardea te cherel lache gule iacha. Vi i Rosa placialas-les. Voi phenel: „Falas-pe că sas-lo iech murș zurales lașio. Ajutilas le manușen de pașa leste hai ci cherelas buchia nasul. Ciaiolas man sar phiravelas-pe manța. Sas-les sea so camlem catar iech rrom, tha ci sas-lo Martoro”. Voi mai phenel: „Sas manghe pharo te phenav lesche că ci camav chanci lesa, anda codoia că sas man nevoia varecastar pașa mande. Ande codo timpo, simțosardem man corcori hai camlem te căsătoriv man, tha ci arachlem chanicas mașcar le manușa le Iehovasche”. Cu sea cadala, i Rosa ci lea-pe numai pala le buchia cai dichlea-len. Voi gândisardea-pe sar avelas laco amalimos le Iehovasa dacă avelas te prinjianel-pe mai mișto codole murșesa. Cadea că, voi ci mai dea duma lesa hai cărdea sea so daștilas andi buchi le Iehovaschi. Pala țâra timpo, voi sas achardi ca i Școala andal Evanghelizatori le Regatosche, hai acana slujil sar pioniera specialo. Voi phenel: „O Iehova pherdea mânro ilo bucuriatar”. Na-i sea o timpo ușoro te cheras so camel o Iehova, vi mai but cana amaro ilo țârdel amen te cheras aver vareso. Tha, cana phiras prin pachiamos, si amen but miștimata.

CANA I ORGANIZAȚIA DEL AMEN ÎNDRUMĂRI

13. So daisaras te gândisaras cana i organizația del amen îndrumări?

¹³ Butivar i organizația del amen îndrumări cai ajutin amen te slujisaras le Iehovasche. Cadala daștin te aven dine catar le phure andai congregația, catar o phral cai vizitil le congregații, catar i filiala sau catar o Corpo de Guvernare. Tha, poiechdata, daștil-pe că ci hachiaras sostar i organizația del amen iech îndrumarea. Daisaras te astaras te pușias amen dacă cadai îndrumarea si lași anda amende hai chiar te astaras te dichas numai le doșa le phralenghe cai den amen îndrumări.

14. So va ajutila amen te phiras prin pachiamos cana i organizația del amen îndrumări? (Evrei 13:17)

¹⁴ Cana phiras prin pachiamos, pachias ciaces că sea le buchia anda i organizația sile andel vasta le Iehovasche hai că vo prinjianel mișto amari situația. Cana cheras cadaia, sam gata te așunas le Iehovastar hai te dichas lașe iachența le îndrumări. (Citisar Evrei 13:17.) Amen jianas că, cana așunas catar le îndrumări, ajutisaras te așel chidini amari congregația. (Ef. 4:2, 3) Hai pachias ciaces că o Iehova va dela amen but miștimata dacă las amen pala le îndrumări, chiar cana le phrala cai sile angla amende sile imperfecți. (1 Sam. 15:22) Sa cadea, jianas că, dacă iech îndrumarea trebul te avel parudi, o Iehova va paruvela-la cana jianel vo că si mai mișto. (Mica 7:7)

15, 16. So ajutisardea ieche phrales te phirel prin pachiamos, chiar cana pușelas-pe dacă i nevi îndrumarea sas lași? (Dich vi i imaginea.)

¹⁵ Te dichas iech buchi cai cărde-la le phrala anda Peru cai sicavel amenghe iech anda le miștimata cai si amen cana phiras prin pachiamos. Chiar cana i șib le themeschi si spaniola, but manușa den duma șiba indigeno, sar avelas i quechua. But bărșa, le phrala cai denas duma quechua rodenas manușen cai denas duma lenghi șib. Tha, ande iech ghies, caște len-pe pala so phendea lenghe o guverno, von trebunas te roden le manușen aver varesar, na sar sas-le sicade. (Rom. 13:1) Atunci, chichiva phrala astarde te pușen-pe dacă cado paruimos ci avelas te cherel mai phari lenghi buchi. Tha, anda codoia că line-pe pala le îndrumări, o Iehova binecuvântisardea-len anda i phari buchi cai cărde-la caște arachen chichi mai bute manușen cai denas duma i șib quechua.

¹⁶ Mașcar codola cai astarde te pușen-pe dacă cado paruimos avelas lașio sas vi o Kevin, iech phuro anda iech congregația cai del-pe duma i șib quechua. Vo phenel: „Gândisardem man: «Sar va avela te arachas le manușen cai den duma quechua?»”. O Kevin mai phenel: „Andem manghe amintea o verseto anda Proverbe 3:5 hai gândisardem man co Moise. O Iehova phendea lesche te cherel vareso cai, anda leste, falas-pe că sas iech dilimos. Vo phendea le Moisesche te îngărel le israelițen anda o Egipto ca i Marea Loli. Falas-pe că ande codo than va avena astarde catar le egipteni. Cu sea cadala, o Moise așundea le Iehovastar hai o Iehova binecuvântisardea-len hai salvisardea-len prin iech baro miracolo”. (Ex. 14:1, 2, 9-11, 21, 22) O Kevin lea-pe pala le îndrumări. Vo phenel: „Ci avelas manghe te pachiav sar binecuvântisardea amen o Iehova. Mai anglal, cărdeam bare droma ando teritorio caște arachas ieche sau duie manușen cai den duma i șib quechua. Acana, jias te predichisaras andel thana cai beșen mai but manușa cai den duma i șib quechua. Cadea că bucurisaras amen te das duma cadale manușența, te jias parpale lende hai te sichioas lența andai Biblia. Hai acana, aven vi mai but manușa ca amare întruniri”. Si ciaces, o Iehova pochinel amen parpale sea o timpo cana phiras prin pachiamos.

17. So sichilean ande cado articolo?

¹⁷ Ande cado articolo sichileam sar daisaras te phiras mai dur prin pachiamos ande trin buchia importanto. Tha, trebul te phiras prin pachiamos ande sea le buchia anda amari viața, chiar vi cana alosaras so te dichas, so te cheras amare timposa libero, chichi de but școala te cheras hai sar te bariaras amare șiavorren. Cana alosaras vareso, ci trebul te las amen numai pala le buchia cai dichas-len, tha mai but, trebul te las sama catar amaro amalimos le Iehovasa, te așunas catar lesche sfaturi hai te încăras andi goghi leschi șucar promisiunea că vo va lela sama amendar. Cadea, „va avela te phiras ando anav le Iehovasco, amaro Del, anda sea o timpo, da, veșnico”. (Mica 4:5)