„Alosaren . . . casche camen te slujin”

1. So trebul te cheras caște avas ciaces fericime hai sostar? (Isaia 48:17, 18)

AMARO Dad andal ceruri iubil amen zurales but hai camel te bucurisaras amen viațatar acana hai ando viitorii. (Ecl. 3:12, 13) Cana cărdea amen, dea amen șucar talentea. Cu sea cadala, o Iehova ci dea nici ieche manușesche o zuralimos te rail opral aver manuș hai nici o zuralimos te alosarel peche norme anda so si mișto hai so si nasul. (Ecl. 8:9; Ier. 10:23) O Iehova jianel că, caște avas ciaces fericime, trebul te slujisaras lesche hai te așunas lestar. (Citisar Isaia 48:17, 18.)

2. So camel o Satan te pachias hai so cărdea o Iehova caște sicavel că cadaia si iech hohaimos?

² O Satan camel ca le manușa te pachian că daștin te aven fericime bi le Iehovasco hai că daștin te rain opral pende corcore. (Gen. 3:4, 5) Caște sicavel că cadaia si iech hohaimos, o Iehova mechlea le manușen iech timpo te rain corcore opral pende. Ci trebul te cheras iech phari buchi caște dichas că le manușa ci îngăren-la mișto cana aver manuș rail opral lende. Cu sea cadala, i Biblia del duma anda but murșa hai jiuvlea cai sas-le fericime anda codoia că slujisarde le Iehovasche. Iech baro exemplo anda amende si o Isus Cristos. Mai anglal, va avela te dichas sostar alosardea vo te slujil le Iehovasche. Pala codoia, va avela te dichas sostar meritil o Iehova te slujisaras lesche, hai vi sostar alosaras amen te slujisaras le Iehovasche.

SOSTAR ALOSARDEA O ISUS TE SLUJIL LE IEHOVASCHE

3. So camlea o Satan te del le Isusos hai so alosardea o Isus te cherel?

³ Cana sas pi phuv, o Isus trebulas te alosarel casche va slujila. Pala iech țâra timpo de cana cărdea o bolimos, o Satan phendea le Isusosche că, dacă avelas te închinil-pe lesche numai iech data, avelas te del lesche sea le regatea la lumeache. Atunci o Isus phendea lesche: „Jiatar, Satan! Anda codoia că si scriime: «Le Iehovasche, che Devlesche, te închinis tut hai numai anda leste te cheres iech buchi sfânto»”. (Mat. 4:8-10) Sostar cărdea o Isus cado alosarimos? Mai dur, va avela te dichas sostar.

4, 5. Sostar alosardea o Isus te slujil le Iehovasche?

⁴ Ando iechto than, o Isus alosardea te slujil le Iehovasche anda codoia că iubil-les. Le Isusos siles iech bari hai zurali iubirea caring pesco Dad. (Ioan 14:31) Mai but, o Isus slujil le Iehovasche anda codoia că pachial ciaces că cadea si mișto te cherel. (Ioan 8:28, 29; Rev. 4:11) Vo jianel vi că le Iehovastar avel i viața, că vo del buhle vastesa but buchia lașe hai că si demno pachiamasco. (Ps. 33:4; 36:9; Iac. 1:17) O Iehova phendea sea o timpo o ciacimos le Isusosche. Hai mai but, o Isus primisardea sea-l buchia pesche Dadestar. (Ioan 1:14) Tha o Satan si cu sea diferime le Iehovastar. Vo cărdea le manușen te păcătuin hai te meren. O Satan si iech baro hohamno, lacomo hai cai gândil-pe numai peste. (Ioan 8:44) O Isus prinjianelas mișto le Iehovas, tha vi le Satanos. Cadea că vo ci camlea niciechdata te avel sar o Satan hai te vazdel-pe contra o Iehova. (Filip. 2:5-8)

⁵ So mai cărdea le Isusos te alosarel te slujil le Iehovasche? Vo gândisardea-pe ca le lașe buchia cai anelas-len leschi buchi loialo. (Evr. 12:2) Vo jianglea vi că, dacă așelas fidelo, avelas te ujiarel o anav pesche Dadesco hai că prin leste o Iehova daștilas te chosel o merimos hai o păcato cai andea-len o Satan.

SOSTAR MERITIL O IEHOVA TE SLUJISARAS LESCHE

6, 7. Sostar but manușa de aghies ci slujin le Iehovasche, tha sostar meritil vo te slujisaras lesche?

⁶ But manușa de aghies ci slujin le Iehovasche anda codoia că von ci prinjianen lesche șucar calități hai sea le lașe buchia cai cărdea-len anda lende. Sa cadea sas vi le manușa andai Atena, savenghe predichisardea o Pavel. Von ci prinjianenas le Devles. (Fap. 17:19, 20, 30, 34)

⁷ O Pavel phendea le manușenghe andai Atena că o ciacio Del „del viața savoren, phurdimos hai sea le buchia”. Vo mai phendea că „prin leste si amen viața, cheras sea hai traisaras”. O Del si o Creatoro, cai „cărdea sea le manușen anda iech corcoro manuș”. Cadea că vo meritil te slujisaras lesche. (Fap. 17:25, 26, 28)

8. So jianas că ci va cherela niciechdata o Iehova? Explichin.

⁸ Anda codoia că o Iehova cărdea sea le buchia hai si O Mai Baro Rai anda o universo, vo daștilas te cherel zorasa le manușen te slujin lesche. Tha o Iehova ci va cherela cadaia niciechdata. Ba mai but, vo del amen dovezi cai sicaven că vo existil hai că iubil zurales but fiesaves de mașcar amende. Vo camel ca chichi mai but manușa te aven lesche amala anda sea o timpo. (1 Tim. 2:3, 4) Anda codoia, o Iehova sicavel amen sar te sicavas averen le lașe buchia cai va cherela-len anda le manușa hai vi sar va cherela-len. (Mat. 10:11-13; 28:19, 20) Sa cadea, vo dea amen i congregația, iech than cai daisaras te slujisaras lesche hai te avas ajutime le phurendar cai sile pherde iubirea. (Fap. 20:28)

9. Sar sicavel o Iehova peschi iubirea caring le manușa?

⁹ O Iehova sicavel peschi bari iubirea cana del lașe buchia chiar vi codolen cai ci pachian ande leste. Te gândisaras amen: de cana si i lumea, miliardea manușa alosarde te cheren so von pachianas că si mișto hai nasul, ando than te așunen le Iehovastar. Cu sea cadala, o Iehova, pherdo lașimos, dea-len le buchia cai trebunas lenghe caște train hai te bucurin-pe viațatar. (Mat. 5:44, 45; Fap. 14:16, 17) Vo dea-len i capacitatea te cheren penghe amala, iech familia, te avel-len șiave hai te bucurin-pe catar i buchi cai cheren-la. (Ps. 127:3; Ecl. 2:24) Dichiol-pe mișto că amaro Dad andal ceruri iubil sea le manușen. (Ex. 34:6) Acana, te anas amenghe amintea sostar alosardeam amen te slujisaras le Iehovasche hai te dichas sar binecuvântil o Iehova codolen cai slujin lesche.

SOSTAR ALOSARAS TE SLUJISARAS LE IEHOVASCHE?

10. a) Ando iechto than, sostar slujisaras le Iehovasche? (Matei 22:37) b) So miștimata si amen anda codoia că o Iehova sicavel amenghe răbdarea? (Psalmo 103:13, 14)

¹⁰ Cadea sar o Isus, ando iechto than, amen slujisaras le Iehovasche anda codoia că iubisaras-les. (Citisar Matei 22:37.) Le șucar calități le Iehovasche cheren amen te pașioas lestar. Sar exemplo, te gândisaras amen ca i răbdarea cai o Iehova sicavel-la caring amende. Cana le israeliți vazdine-pe contra lesche, vo, pherdo lașimos, phendea lenghe: „Mangav tumen, risaren tumen catar tumare droma nasul!”. (Ier. 18:11) O Iehova anel pesche amintea că sam imperfecți, că sam phuv. (Citisar Psalmo 103:13, 14.) So si ande chio ilo cana gândis tut ca i răbdarea hai le coaver calități le Iehovasche? Na-i cadea că cames te slujis lesche anda sea o timpo?

11. So aver buchia cheren amen te alosaras te slujisaras amare Dadesche andal ceruri?

¹¹ Sa cadea, slujisaras le Iehovasche anda codoia că pachias ciaces că cadea si mișto te cheras. (Mat. 4:10) Mai but, hachiaras că, cana slujisaras loialo le Iehovasche, ujiaras lesco anav, sicavas că o Satan si iech hohamno hai bucurisaras o ilo amare Dadesco. Hai dacă alosaras te slujisaras le Iehovasche acana, si amen i posibilitatea te slujisaras lesche anda sea o timpo. (Ioan 17:3)

12, 13. So sichioas anda i experiența le pheianghi Jane hai Pam?

¹² Chiar cana sam zurales tărne, daisaras te bariaras iech zurali iubirea anda o Iehova, cai daisaras te încăras-la ando ilo sea amari viața. Cadai buchi cărde-la vi dui pheia ratesche, i Jane hai i Pam.a Von astarde te sichion andai Biblia cana sas-len 11 hai 10 bărșa. Chiar cana lengo dad hai lenghi dei ci camle te sichion andai Biblia, von mechenas-len te sichion le Martorența le Iehovache dacă von jianas lența ca i changheri. I Jane phenel: „So sichilem andai Biblia ajutisardea man te na țârdav droguri hai te na cherav buchia sexualo melale, cadea sar cherenas but anda mânre colegi”.

¹³ Pala chichiva bărșa, le dui șeia cărdile vestitoarea. Pala iech vremea, astarde o pionierato hai line sama vi penghe dadestar hai deiatar, cai sas-le phure. Cana gândil-pe ca so cărdea o Iehova anda lende, i Jane phenel: „Dichlem pe mânri morci că o Iehova lel sama ciaces pesche amalendar hai, cadea sar sicavel-pe ando 2 Timotei 2:19, vo «prinjianel codolen save si lesche»”. Pachias ciaces că o Iehova ci mechel niciechdata codolen cai iubin-les hai cai alosaren te slujin lesche.

14. Sar daisaras te ujiaras o anav le Iehovasco? (Dich vi le imagini.)

¹⁴ Si iech bari pachiv anda amende te cheras sea so daisaras caște ujiaras o anav le Iehovasco. Gândisar tut că si tut iech pașardo amal, cai si lașio, del buhle vastesa hai iertil anda sea o ilo. Tha, ande iech ghies, așunes că varecon phenel hohaimata anda leste, sar avelas că si jiungalo hai bipachivalo. So avelas te cheres? Caște feris o anav che amalesco, avelas te phenes că cadala si hohaimata! Sa cadea, o Satan hai codola cai len-pe pala leste phenen hohaimata anda o Iehova caște meliaren lesco lașio anav. Tha amen ujiaras o anav le Iehovasco cana phenas o ciacimos anda leste. (Ps. 34:1; Is. 43:10) Fiesavo de mașcar amende daștil te sicavel prin so phenel hai prin so cherel că alosardea te slujil le Iehovasche sea le sufletosa.

15. So miștimata sas le Pavelos anda codoia că sas gata te paruvel peschi viața? (Filipeni 3:7, 8)

¹⁵ Amen, le slujitori le Iehovasche, sam gata te paruvas amari viața caște avas dichle lașe iachența le Iehovastar sau caște cheras mai but anda leste. Sar exemplo, o apostolo Pavel sas-lo prinjiando sar iech baro manuș mașcar le manușa cai beșelas. Cu sea cadala, vo mechlea sea cadal buchia palal caște lel-pe pala o Isus hai te slujil le Iehovasche. (Gal. 1:14) Cadea că, les sas-les iech viața șucar hai sas lesche dini i bari pachiv te rail le Cristososa ando cerii. Ci falas-les nasul niciechdata că alosardea te slujil le Iehovasche. Hai vi amen, dacă alosaras te slujisaras le Iehovasche, ci va fala amen nasul niciechdata. (Citisar Filipeni 3:7, 8.)

16. So sichioas anda i experianța la pheiachi Julia? (Dich vi le imagini.)

¹⁶ Cana șioas po iechto than ande amari viața i buchi le Iehovaschi, vo va pochinela amen parpale acana hai, ando viitorii, va dela amen i mai șucar viața. Te dichas i experiența la pheiachi Julia. Încă de cana sas-li țâni, i Julia ghilabelas andi changheri. Savore dichenas laco baro talento hai astardea te avel sicadi caște avel iech lași ghilabaitoarea cai opera. Pala țâra timpo, laco baro talento astardea te avel prinjiando hai astardea te ghilabel andel bare săli de operă zurales prinjiande. Ando timpo so cherelas iech bari școala andal ghilea, iech anda lache colegi dea duma lasa anda o Del hai phendea lache că lesco anav si Iehova. Na pala but vremea, i Julia astardea te sichiol andai Biblia dui var po curco. Ji la urmă, voi alosardea te del pesco timpo hai pesco zuralimos anda o Iehova, ando than te ghilabel cai opera. Ci sas ușoro anda late te cherel cado alosarimos. I Julia anel pesche amintea: „But manușa phende manghe că si iech dilimos te na mai ghilabav caște slujiv le Iehovasche, tha me camlem te dav sea mânri viața le Iehovasche”. Sar dichel i Julia o alosarimos cai cărdea-les acana mai but sar 30 bărșa? „Acana si man but pacea hai pachiav ciaces că, ando viitorii, o Iehova va dela man sea so camel mânro ilo”. (Ps. 145:16)

TE SLUJISARAS MAI DUR LE IEHOVASCHE

17. a) So trebulas te cheren codola cai încă ci slujin le Iehovasche hai sostar? b) So jianen codola cai alosarde te slujin le Iehovasche?

¹⁷ Sam zurales pașă catar o sfârșito cadale sistemosco. O apostolo Pavel scriisardea: „Încă «zurales țâra timpo» hai «codo cai avel va arăsăla hai ci va mechela-pe ajucărdo»”. (Evr. 10:37) So trebul te hachiaras te cathar? Pe iech rig, jianas că le manușen ci mai silen but timpo caște alosaren te slujin le Iehovasche. (1 Cor. 7:29) Hai pe aver rig, amen, cai deja alosardeam te slujisaras le Iehovasche, jianas că, chiar cana trebul te nachas prin pharimata, cadala va încărena „zurales țâra timpo”.

18. So zuriaren amen te cheras o Iehova hai o Isus?

¹⁸ O Isus zuriardea pesche discipolen na numai te astaren te len-pe pala leste, tha te len-pe pala leste sea o timpo. (Mat. 16:24) Cadea că, chiar cana deam amari viața le Iehovasche acana but bărșa, trebul te avas hotărâme te na mechas amen. Trebul te cheras sea so daisaras caște slujisaras mai dur le Iehovasche. Chiar cana na-i ușoro, dacă slujisaras le Iehovasche va avela amen but bucuria hai miștimata încă de acana. (Ps. 35:27)

19. So sichioas anda i experiența le phraleschi Gene?

¹⁹ Chichiva pachian că ci daștin te bucurin-pe penga viațatar cana slujin le Iehovasche. Dacă san tărno, pachias că hasardean prea but buchia caște slujis le Iehovasche? Iech tărno phral cai bușiol Gene phenel: „Falas-pe că, sar Martoro le Iehovasco, ci daisardem te cherav but buchia. But anda le șiave savența barilem trainas penghi viața cadea sar camenas von, jianas ca-l petreceri, phirenas le șeianța sau chelenas-pe jocuri ande save marenas-pe, ando timpo so me trebulas te jiav ca le întruniri hai andi predicarea”. Sar rimosardea cado gândimos le phrales Gene? Vo phenel: „Astardem te cherav chichiva buchia nasul cai vi aver tărne cherenas-len hai cadaia andea manghe fericirea anda iech țâra timpo. Cu sea cadala, cadai fercirea ci încărdea but. Astardem te gândiv man ca le miștimata cai si amen cana așunas catar le sfaturi andai Biblia. Cadea că alosardem te slujisarav le Iehovasche anda sea o ilo. De atunci, simțosardem că o Iehova dea man răspunso ca fiesavo manglimos”.

20. So trebul te avas hotărâme te cheras?

²⁰ Iech psalmisto ghilabadea le Iehovasche: „Voime si codo cas alosares-les hai anes-les pașa tute caște beșel ande che barea”. (Ps. 65:4) Cadea că, te avas hotărâme te slujisaras mai dur amare Devlesche! Cadea sar o Iosua, camas te phenas: „Me hai mânro chăr va avela te slujisaras le Iehovasche!”. (Ios. 24:15)