ARTICOLO STUDIOSCHE 23
GHILI 2 Iehova si chio anav!
Sostar si importanto le Iehovasco anav anda amende?
„«Tumen san mânre martori», phenel o Iehova.” (IS. 43:10)
ANDA SO DAS DUMA
So daisaras te cheras caște așaras hai te ujiaras le Iehovasco anav.
1, 2. Catar jianas că le Iehovasco anav si importanto anda o Isus?
ANDA o Isus, chanci ci si mai importanto sar o anav le Iehovasco. Vo si o principalo jeno cai ujiarel o anav pesche Dadesco. Cadea sar dichleam ando articolo cai nachlea, o Isus sas-lo gata te merel anda o anav le Iehovasco hai anda sea so însemnol cado. (Mar. 14:36; Evr. 10:7-9) Hai pala o Raimos de Iech Mia Bărș, o Isus va avela gata te mechel sea o zuralimos cai sas lesche dino caște avel așardo o anav le Iehovasco. (1 Cor. 15:26-28) Sea le buchia cai cărdea-len o Isus anda o Iehova sicaven ciaces că vo iubilas zurales but le Iehovas.
2 O Isus avilea pi phuv ando anav pesche Dadesco. (Ioan 5:43; 12:13) Vo cărdea prinjiando cado anav codolenghe cai lenas-pe pala leste. (Ioan 17:6, 26) O Isus sicadea averen hai cărdea miracolea ando anav le Iehovasco. (Ioan 10:25) O Isus chiar manglea le Iehovas te lel sama pesche discipolendar ‘anda lesco anav’. (Ioan 17:11) Si ciaces că o anav le Devlesco sas mai importanto sar oriso anda o Isus. Cadea că, sar daștil varecon te phenel că lel-pe pala o Isus bi te prinjianel hai te folosil le Iehovasco anav?
3. So va avela te dichas ande cado articolo?
3 O Isus sas iech lașio exemplo hai, sar creștini, das sea amari zor te uștiaras chichi mai mișto pe lesche urme. Cadea că o anav pesche Dadesco si zurales importanto vi anda amende. (1 Pet. 2:21) Ande cado articolo, va avela te dichas sostar o Iehova dea pesco anav codolenghe cai predichin ‘i vestea lași anda o Regato’. (Mat. 24:14) Va avela te dichas vi so trebulas te însemnol o anav le Iehovasco anda fiesavo de mașcar amende.
„IECH POPORO ANDA PESCO ANAV”
4. a) So phendea o Isus le discipolenghe te cheren angla so te vazdel-pe co cerii? b) Save pușimaste va avela te arachas o răspunso?
4 Chiar angla so te vazdel-pe co cerii, o Isus phendea codolenghe cai lenas-pe pala leste: „Va primina zuralimos cana o spirito sfânto va avela pe tumende hai va avena mânre martori ando Ierusalimo, ande sea i Iudeea, andi Samaria hai ji ande o mai duriardo than la phuveaco”. (Fap. 1:8) Cadea că i vestea lași avelas te avel predichime vi avreal o Israelo. Ji la urmă, le manușa anda sea i lumea avenas te daștin te len-pe pala o Isus. (Mat. 28:19, 20) Tha, dichas că o Isus phendea: „Va avena mânre martori”. Trebunas cadal neve discipoli te prinjianen o anav le Iehovasco sau trebunas numai te aven martori le Isusosche? Le evenimentea cai si scriime ando lil Fapte, o capitolo 15, ajutin amen te arachas o răspunso cadale pușimaste.
5. Sar sicade le apostoli hai le phure anda o Ierusalimo că sea codola cai cărdile discipoli trebunas te prinjianen o anav le Iehovasco? (Dich vi i imaginea.)
5 Ando bărș 49 a.e., le apostoli hai le phure anda o Ierusalimo chidine-pe caște alosaren so trebunas te cheren codola cai ci sas-le șinde împrejur caște daștin te aven andi congregația creștino. Pala i întrunirea, o Iacov, o phral vitrego le Isusosco, phendea: „[O Petru] phendea ji ande le mai țâne buchia sar, anda i iechto data, o Del ortosardea pesco dichimos caring le națiuni caște încalavel anda lende iech poporo anda pesco anav”. So camlea te phenel o Iacov? Cana citisardea le dumes cai scriisardea-len o profeto Amos, vo mai phendea: „Codola cai așen te roden anda sea o ilo le Iehovas, ande iech than le manușența anda sea le națiuni, manușa cai sile acharde pala mânro anav, phenel o Iehova”. (Fap. 15:14-18) Le neve discipoli ci avenas numai te sichion anda o Iehova, tha vi te aven „acharde pala [lesco] anav”. Cadea, von avenas te phenen averenghe o anav le Devlesco hai avenas te aven prinjiande pala cado anav.
Ande iech întrunirea le corposchi de guvernare anda o I secolo hachiardea-pe mișto iech ciacimos importanto: Le creștini trebun te aven iech poporo anda o anav le Devlesco (Dich o paragrafo 5)
6, 7. a) Sostar avilea o Isus pi phuv? b) Savo sas o mai importanto motivo sostar o Isus avilea pi phuv?
6 O anav „Isus” însemnol „o Iehova si salvarea”. O Șiav le Devlesco si codo prin savo o Iehova va salvila codolen cai pachian-pe ande leste. (Mat. 20:28) O Isus avilea pi phuv caște del peschi viața ando miștimos le manușengo. Vo pochindea anda amare păcatea hai, cadea, dea le manușenghe i posibilitatea te aven salvime hai te train anda sea o timpo. (Ioan 3:16)
7 Tha sostar trebunas le manușa te aven salvime? Anda codoia că andi bar le Edenoschi întâmplosarde-pe chichiva buchia nasul. Cadea sar dichleam ando articolo cai nachlea, le anglune manușa, o Adam hai i Eva, vazdine-pe contra o Iehova. Von hasarde i posibilitatea te train anda sea o timpo. (Gen. 3:6, 24) Tha, cana o Isus avilea pi phuv, cărdea vareso mai importanto sar te salvil le manușen. Te anas amenghe amintea că o anav le Iehovasco sas-lo meliardo. (Gen. 3:4, 5) Cadea că, le manușa trebunas te jianen că o Iehova na-i doșalo anda le hohaimata cai phendea-len o Satan anda leste hai că lesco anav silo ujo. Sar reprezentanto le Iehovasco hai codo cai phiravel Lesco anav, o Isus sas o mai lașio jeno cai daștilas te ujiarel o anav le Devlesco.
Sar daștil varecon te phenel că lel-pe pala o Isus bi te prinjianel hai te folosil le Iehovasco anav?
8. So trebunas te hachiaren codola cai sicavenas pachiamos ando Isus?
8 Savore cai avenas te sicaven pachiamos ando Isus, vi le evrei, hai vi le manușa andal națiuni, trebunas te hachiaren că o Iehova, o Dad le Isusosco, si lengo Salvatorii. (Ioan 17:3) Mai but, von avenas te aven prinjiande pala cado anav, cadea sar o Isus. Sa cadea, von trebunas te hachiaren chichi de importanto si te avel ujiardo o anav le Devlesco. Von trebunas te cheren cadaia caște aven salvime. (Fap. 2:21, 22) Cadea că, sea le creștini fideli trebunas te sichion mai but vi anda o Iehova, hai vi anda o Isus. Daisaras te hachiaras sostar o Isus, cana phandadea pesco manglimos cai si scriime ando Ioan, o capitolo 17, phendea: „Me cărdem lenghe prinjiando chio anav hai va avela te cherav-les prinjiando vi mai dur, ca i iubirea saveasa iubisardean man tu te avel ande lende hai me te avav iech lența”. (Ioan 17:26)
„TUMEN SAN MÂNRE MARTORI”
9. Sar daisaras te sicavas că o anav le Iehovasco si importanto anda amende?
9 Sea codola cai len-pe ciaces pala o Isus trebun te ujiaren o anav le Devlesco. (Mat. 6:9, 10) Chanci ci trebul te avel mai importanto anda lende sar o anav le Iehovasco, hai cadaia trebul te dichiol-pe ande sea le buchia cai cheren-len. Tha so daisaras te cheras caște ujiaras o anav le Iehovasco hai te sicavas că so phendea o Satan anda o Iehova si numai hohaimata?
10. So citisaras ando Isaia, le capitolea 42 ji co 44? (Isaia 43:9; 44:7-9) (Dich vi i imaginea.)
10 Andel capitolea 42 ji co 44 ando lil biblico Isaia sicavel-pe so buchi importanto daștil te cherel fiesavo de mașcar amende caște așarel o anav le Iehovasco. Ande cadal capitolea, o Iehova phenel le manușenghe save ci slujin lesche te sicaven că penghe devla sile ciace. Cadea sar ande iech proceso, vo acharel chichiva martoren caște sicaven o ciacimos. Tha chonic ci daștil te cherel cadaia. (Citisar Isaia 43:9; 44:7-9.)
Prin sea so cheras hai phenas, sicavas că o Iehova si o corcoro ciacio Del (Dich le paragrafea 10 hai 11)
11. So phendea o Iehova caring pesche manușa ando Isaia 43:10-12?
11 Citisar Isaia 43:10-12. O Iehova phenel anda pesche manușa: „Tumen san mânre martori, . . . hai me som o Del”. O Iehova pușlea pesche slujitoren: „Si oare aver Del avreal mande?”. (Is. 44:8) Hai vo manglea-len vi te den răspunso cadale pușimaste. Acana, amen si amen i pachiv te das răspunso cadale pușimaste. Prin so phenas hai prin so cheras, amen sicavas că o Iehova si o corcoro ciacio Del hai că lesco anav si mai opral sar orisavo aver anav. Prin sar traisaras amari viața, sicavas că iubisaras ciaces le Iehovas hai că așias lesche loiali, chiar cana o Satan cherel amen te nachas prin pharimata. Cana cheras cadaia, vi amen ajutisaras te avel așardo le Iehovasco anav.
12. Sar pherdile-pe le dumes anda o Isaia 40:3, 5?
12 O Isaia phendea de mai anglal că varecon avelas te ‘ujiarel o drom le Iehovasco’. (Is. 40:3) Sar pherdilea-pe cadai profeția? O Ioan o Botezătoro ujiardea o drom anda o Isus, cai avilea ando anav le Iehovasco hai dea duma ande Lesco anav. (Mat. 3:3; Mar. 1:2-4; Luca 3:3-6) O Isaia phendea mai dur: „I gloria le Iehovaschi va sicavela-pe”. (Is. 40:5) Sar pherdile-pe cadal dumes? Anda codoia că, cana sas pi phuv o Isus lea-pe pala pesco Dad ande iech modo perfecto, sas sar cana o Iehova avilea pi phuv. (Ioan 12:45)
13. So daisaras te cheras caște las amen pala o Isus?
13 Cadea sar o Isus, amen sam martori le Iehovasche. Amen phiravas o anav le Iehovasco hai phenas savorenghe anda le șucar buchia cai cărdea-len anda amende. Tha, caște cheras cadai buchi mai mișto, amen trebul te phenas le manușenghe vi so cărdea o Isus caște așarel o anav le Iehovasco. (Fap. 1:8) O Isus si o mai importanto Martoro le Iehovasco, hai amen las amen pala leste. (Rev. 1:5) Tha so trebulas te însemnol o anav le Iehovasco anda fiesavo mașcar amende?
SO ÎNSEMNOL LE IEHOVASCO ANAV ANDA AMENDE?
14. Pala sar phenel-pe ando Psalmo 105:3, so simțosaras anda o anav le Iehovasco?
14 Das amen bare le anavesa le Iehovasco. (Citisar Psalmo 105:3.) O Iehova bucuril-pe zurales but cana das amen bare lesche anavesa. (Ier. 9:23, 24; 1 Cor. 1:31; 2 Cor. 10:17) Pachias că si iech bari pachiv te phenas le coaverenghe că o Iehova si ujo hai că sea so cherel vo si orta. Ci trebul te avel amenghe niciechdata lajiav te phenas că sam Martori le Iehovasche codolenghe casa cheras buchi, codolenghe catar i școala, amare vecinenghe sau avere manușenghe! O Satan ci camel te das duma anda o anav le Iehovasco. (Ier. 11:21; Rev. 12:17) Vo hai codola cai phenen mai dur lesche hohaimata camen te cheren le manușen te bâstren o anav le Devlesco. (Ier. 23:26, 27) Tha amen bucurisaras amen mai dur „sea o ghies” ando anav le Iehovasco anda codoia că iubisaras cado anav. (Ps. 5:11; 89:16)
15. So însemnol te acharas o anav le Iehovasco?
15 Acharas mai dur o anav le Iehovasco. (Ioel 2:32; Rom. 10:13, 14) Te acharas o anav le Iehovasco ci însemnol numai te prinjianas-les hai te phenas-les. Amen arăsleam te prinjianas le Iehovas sar ieche Jenes, te pachias amen ande leste, te rodas lesco ajutorii hai leschi îndrumarea. (Ps. 20:7; 99:6; 116:4; 145:18) Sa cadea, phenas vi averenghe anda o anav hai anda le calități le Iehovasche, hai ajutisaras-len te paruven penghi viața caște aven dichle lașe iachența le Iehovastar hai te aven salvime. (Is. 12:4; Fap. 2:21, 38)
16. Sar daisaras te sicavas că o Satan si iech hohamno?
16 Amen sam gata vi te avas duchade anda o anav le Iehovasco. (Iac. 5:10, 11) Cana așias loialo andel zumaimata, sicavas că o Satan si iech hohamno. Andel ghiesa le Iovosche, o Satan phendea: „O manuș va dela sea so siles anda peschi viața”. (Iov 2:4) Prin cadaia, o Satan phendea că le manușa slujin le Iehovasche numai cana îngăren-la mișto, hai va avena te mechen le Iehovas cana nachen prin pharimata. O Iov sicadea că cado sas iech baro hohaimos. Vi amen si amen i bari pachiv te sicavas că ci va avela niciechdata te risaras o dumo le Iehovasche, orichichi de phare avenas le zumaimata prin save cherel amen te nachas o Satan. Amen daisaras te pachias ciaces că o Iehova va lela sama amendar anda o drago pesche anavesco. (Ioan 17:11)
17. Pala sar phenel-pe ando 1 Petru 2:12, sar daisaras te das pachiv le anavesche le Iehovasco?
17 Sicavas pachiv caring o anav le Iehovasco. (Prov. 30:9; Ier. 7:8-11) Anda codoia că sam Martori le Iehovasche hai phiravas lesco anav, prin so cheras, daisaras te așaras lesco anav sau te meliaras-les. (Citisar 1 Petru 2:12.) Cheras sea so daisaras caște așaras o anav le Iehovasco prin so phenas hai prin so cheras. Hai, chiar cana sam imperfecți, cheras sea so daisaras caște anas pachiv caring o anav le Iehovasco.
18. Sar mai daisaras te sicavas chichi de importanto si o anav le Iehovasco anda amende? (Dich vi i nota de telal.)
18 Amen dichas le Iehovasco anav mai importanto sar le buchia cai le manușa gândin-len anda amende. (Ps. 138:2) Sostar si cadea de importanto cadaia? Anda codoia că, cana cheras buchia cai placian le Iehovas, butivar le manușa daștin te na dichen amen lașe iachența hai te phenen buchia nasul anda amende.a Caște așarel o anav le Iehovasco, o Isus sas-lo gata te merel cadea sar iech manuș zurales nasul. Le Isusosche „ci sas lesche lajiav”. (Evr. 12:2-4) Sostar? Anda codoia că vo ci gândisardea-pe prea but le buchiande cai le coaver pachianas-len anda leste. Vo gândisardea-pe mai but le buchiande cai o Iehova camelas te cherel-len. (Mat. 26:39)
19. So simțosares caring o anav le Iehovasco hai sostar?
19 Amen das amen bare le anavesa le Iehovasco hai si iech bari pachiv anda amende te avas prinjiande sar Martori le Iehovasche. Anda lesco anav, sam gata te avas prasade codolendar cai așen amenghe contra. Amen dichas le Iehovasco anav mai importanto sar le buchia cai le manușa gândin-len anda amende. Cadea că, te camas anda sea o ilo te așaras o anav le Devlesco, chiar cana o Satan camel te așiavel amen. Cadea, va avela te sicavas că o anav le Iehovasco si o mai importanto anda amende, cadea sar si vi anda o Isus Cristos.
GHILI 10 Lăudin le Iehovas!
a Chiar vi o Iov, iech manuș fidelo ci mai încărdea andi goghi so sas ciaces importanto cana lesche trin amala astarde te phenen că cărdea chichiva buchia nasul. Mai anglal, cana pesche șiave mule hai hasardea pesche barvalimata „o Iov ci păcătuisardea hai ci doșardea le Devles anda chanci nasul.” (Iov 1:22; 2:10) Tha, pala codoia, cana astardea te avel doșardo anda chichiva buchia nasul, astardea te phenel „dumes bi goghiaco”. Vo rodea mai anglal te lel sama catar pesco lașio anav ando than te ujiarel le Devlesco anav. (Iov 6:3; 13:4, 5; 32:2; 34:5)