Sostar si importanto le Iehovasco anav anda o Isus?

1, 2. a) So cărdea o Isus andi riat angla so te merel? b) Save pușimatande va avela te arachas o răspunso ande cado articolo?

ANDO mașcar la ratiaco, joine, 14 nisan 33 a.e., o Isus cărdea i Cina le Raieschi ande iech than pesche apostolența pherde pachiamos. Vo jianglea că, na pa but timpo, avelas te avel bichindo, mardo hai mudardo pesche dușmanendar. Cadea că, pala so halea le apostolența, o Isus phendea lenghe chichiva buchia cai zuriarde-len. Hai angla so te tiliarel, vo phendea iech manglimos zurales importanto. O apostolo Ioan scriisardea cado manglimos hai daisaras vi amen te citisaras-les ando Ioan, o capitolo 17.

² Anda o manglimos le Isusosco daisaras te sichioas chichiva buchia, sar avelas: Anda so buchia daralas o Isus angla so te merel? Hai sar sicavel amenghe lesco manglimos so sas importanto anda leste ande peschi buchi pi phuv? Cadale pușimatande va avela te arachas o răspunso ande cado articolo.

„CĂRDEM PRINJIANDO CHIO ANAV”

3. So phendea o Isus anda o anav le Iehovasco hai so camlea te sicavel prin cadaia? (Ioan 17:6, 26)

³ Ande pesco manglimos, o Isus phendea: „Cărdem prinjiando chio anav”. O Isus chiar phenel dui var cadai buchi. (Citisar Ioan 17:6, 26.) So camlea te phenel o Isus? Sicadea le discipolenghe iech anav cai ci mai așunde-les niciechdata? Le discipoli le Isusosche sas-le evrei, cadea că prinjianenas o anav le Devlesco, Iehova. Cado arachel-pe mii var andel Scripturi ebraico. Cadea că o Isus ci camlea te phenel lenghe numai savo si o anav le Devlesco, tha, mai but, so sicavel cado anav. Vo ajutisardea pesche discipolen te prinjianen mai mișto le Iehovas. Vo phendea lenghe so camel o Iehova te cherel la phuveasa hai le manușența, so cărdea, so va cherela hai so calități siles. Numai o Isus prinjiandea cadichi de mișto le Iehovas.

4, 5. a) Sar daștil o anav varecasco te arăsăl mai importanto anda amende? Den iech exemplo. b) Sar le discipoli le Isusosche ‘arăsle te prinjianen’ o anav le Iehovasco?

⁴ Caște hachiaras mai mișto cadai buchi, gândisar tut că ande chi congregația si iech phuro cai bușiol David hai si doctoro. Prinjianes de but bărșa cadale phrales, tha, ande iech ghies, trebul sigo te cheres iech operația. Avel i salvarea pala tute hai îngărel tut co spitalo cai cherel buchi cado phral, hai vo salvil chi viața. Acana va avela te iubis mai but cadale phrales hai, cana va avela te așunes lesco anav, va avela te gândis tut le șucar buchiande cai cărdea-len anda tute. O David ci mai si numai codo phuro saves prinjianes-les de but bărșa, tha vi o doctoro cai salvisardea chi viața.

⁵ Sa cadea, le discipoli le Isusosche prinjianenas o anav le Iehovasco, tha cado anav arăslea mai importanto anda lende anda codoia că o Isus ajutisardea-len te prinjianen mai mișto le Iehovas. Sar? O Isus lea-pe pala o Iehova ande sea so cărdea hai phendea. Cadea că, le apostoli ‘arăsle te prinjianen’ mai mișto le Iehovas cana dichle sar sicavelas o Isus hai sar phiravelas-pe averența. (Ioan 14:9; 17:3)

„CHIO ANAV, CAI DEAN-LES MANGHE”

6. So camlea o Isus te hachiarel-pe cana phendea că o Iehova dea-les lesco anav? (Ioan 17:11, 12)

⁶ O Isus manglea-pe anda pesche discipoli: „Le sama lendar anda chio anav, cai dean-les manghe”. (Citisar Ioan 17:11, 12.) Sicaven cadal dumes că o anav le Isusosco daștil te avel vi Iehova? Nici. Te dichas că, cana dea duma anda o anav le Iehovasco ando manglimos, o Isus phendea „chio anav”. Cadea că o anav le Iehovasco ci cărdilea o anav le Isusosco. Atunci, so camlea te hachiarel-pe o Isus cana phendea că primisardea o anav le Devlesco? Ando iechto than, vo sas-lo bișialdo le Iehovastar pi phuv caște del duma ande Lesco anav. Vo avilea pi phuv ando anav pesche Dadesco hai cărdea miracolea ande Lesco anav. (Ioan 5:43; 10:25) Ando duito than, o anav „Isus” însemnol „o Iehova si salvarea”. Cadea că le Devlesche anaves sas-les iech phanglimos chidino le Isusosche anavesa.

7. Sostar daisardea o Isus te del duma anda o anav le Iehovasco? Den iech exemplo.

⁷ Te cheras iech ilustrarea. Te phenas că iech președinte bișialel varecas te del duma ande lesco anav. Cadea că cadales va avela-les sa codoi autoritatea cana del duma sar o președinte. Sa cadea, o Iehova bișialdea le Isusos caște del duma ande Lesco anav. (Mat. 21:9; Luca 13:35)

8. Sostar phendea o Iehova că lesco anav sas „ando” Isus angla so te avel pi phuv? (Exodo 23:20, 21.)

⁸ Angla so te avel pi phuv, o Isus sas o Cuvânto, adică Codo cai phenelas o cuvânto le Iehovasco. Cana sas o Cuvânto, vo phendea mai dur avere îngerenghe hai vi le manușenghe so phenelas o Del. (Ioan 1:1-3) Daștil-pe că o Isus sas vi o îngero saves o Iehova bișialdea-les caște lel sama le israelițendar cana sas-le ando șuco than. O Iehova phendea le israelițenghe te așunen cadale îngerostar hai mai phendea: „Anda codoia că mânro anav si ande leste”.a (Citisar Exodo 23:20, 21.) Phenel-pe că o anav le Iehovasco si „ando” Isus anda codoia că vo reprezentil le Iehovas hai si o principalo jeno cai ujiarel o anav pesche Dadesco.

„DADE, DE GLORIA CHE ANAVESCHE!”

9. Chichi de importanto sas o anav le Iehovasco anda o Isus? Explichin.

⁹ Cadea sar dichleam, o anav le Iehovasco sas zurales importanto anda o Isus chiar angla so te avel pi phuv. Cana avilea pi phuv, vo sicadea mai dur prin sea so cărdea chichi de importanto si o anav le Iehovasco anda leste. Andel palutne ghiesa anda peschi buchi pi phuv, o Isus manglea le Iehovas: „Dade, de gloria che anavesche!”. Pala codoia, o Iehova phendea lesche sigo parpale: „Dem lesche gloria hai va avela te dav lesche gloria vi mai dur!”. (Ioan 12:28)

10, 11. a) Sar dea gloria o Isus le anaves le Iehovasco? (Dich vi i imaginea.) b) Sostar trebul te avel așardo hai ujiardo o anav le Iehovasco?

¹⁰ Vi o Isus dea gloria le anaves le Iehovasco. Sar? Vo sicadea averenghe so cărdea hai so va cherela o Del hai vi so șucar calități siles. Tha, caște avel glorifichime o anav le Devlesco, vo cărdea mai but sar cadaia. O anav le Iehovasco trebulas te avel așardo hai ujiardo.b O Isus sicadea chichi de importanto sas-le cadal buchia cana phendea o manglimos-modelo: „Amaro Dad, cai san andel ceruri, te avel așardo chio baro anav”. (Mat. 6:9)

¹¹ Tha sostar trebul te avel așardo hai ujiardo o anav le Iehovasco? Anda codoia că andi bar le Edenoschi, o Satan phendea hohaimata anda o Del. Vo phendea anda o Iehova că si iech hohamno hai că ci delas vareso lașio le Adamosche hai la Evache. (Gen. 3:1-5) Sa cadea, vo phendea că sar cherelas o Iehova le buchia ci sas mișto. Prin cadal hohaimata, o Satan camlea te meliarel o lașio anav le Iehovasco. Pala codoia, andel ghiesa le Iovosche, o Satan phendea că le manușa slujin le Iehovasche numai anda codoia că vo del-len miștimata. Mai but, vo phendea că niciech manuș ci iubil cadichi de but le Iehovas, caște slujil lesche mai dur vi cana nachel prin pharimata. (Iov 1:9-11; 2:4) Trebulas te nachel vremea caște sicavel-pe con sas o hohamno: o Iehova sau o Satan.

„DAV MÂNRI VIAȚA”

12. So sas gata te cherel o Isus anda codoia că iubilas o anav le Iehovasco?

¹² Anda codoia că iubilas le Iehovas, o Isus camlea te cherel sea so daisardea caște așarel hai te ujiarel o anav le Iehovasco. Vo phendea: „Dav mânri viața”. (Ioan 10:17, 18) Ciaces, o Isus sas-lo gata te merel anda o anav le Iehovasco.c O Adam hai i Eva, chiar cana sas-le perfecți, risarde o dumo le Iehovasche hai nachle de i rig le Satanoschi. O Isus sas-lo diferime lendar hai sas-lo gata te avel pi phuv caște sicavel peschi iubirea caring o Iehova hai te așunel lestar ande sea so cărdea hai phendea. (Evr. 4:15; 5:7-10) Vo așilea loialo sea peschi viața, ji cana dea pesco palutno phurdimos, po stâlpo de tortură. (Evr. 12:2) Cadea, sicadea peschi iubirea anda o Iehova hai anda Lesco anav.

13. Sostar sas o Isus o mai lașio jeno cai daștilas te sicavel că o Satan si iech hohamno? (Dich vi i imaginea.)

¹³ Prin sea le buchia cai cărdea-len o Isus cana sas pi phuv, sicadea că o Satan si o hohamno, na o Iehova. (Ioan 8:44) O Isus si o jeno cai prinjianelas o mai mișto le Iehovas. Dacă avelas numai iech țâra ciacimos andel buchia anda save o Satan doșardea le Iehovas, o Isus avelas te jianel. Tha vo camlea anda sea o ilo te ujiarel o lașio anav le Iehovasco. Chiar vi cana falas-pe că o Iehova mechlea-les corcoro, o Isus camlea mai sigo te merel hai te așel loialo sar te na mai așunel pesche Dadestar pherdo iubirea. (Mat. 27:46)d

„CĂRDEM I BUCHI CAI DEAN-LA MANGHE TE CHERAV-LA”

14. Sar pochindea parpale o Iehova le Isusos anda leschi fidelitatea?

¹⁴ Ando manglimos cai phendea-les andi riat angla so te merel, o Isus phendea: „Cărdem i buchi cai dean-la manghe te cherav-la”. Vo pachialas ciaces că o Iehova va pochinela-les parpale anda leschi fidelitatea, hai o Isus cărdea mișto că pachiaia-pe ande pesco Dad. (Ioan 17:4, 5) O Iehova ci mechlea-les te așel ando mormânto. (Fap. 2:23, 24) Vo uștiadea-les andal mule hai dea lesche iech baro than ando cerii. (Filip. 2:8, 9) Ji la urmă, o Isus astardea te rail sar Rege le Regatosco le Devlesco. So avelas te cherel cado Regato? Mai dur ando manglimos-modelo, o Isus phendea: „Te avel chio Regato. Te cărdiol-pe chi voia, sar si ando cerii, cadea te avel vi pi phuv”. (Mat. 6:10)

15. So va cherela o Isus ando viitorii?

¹⁵ Na pa but timpo, o Isus va marela-pe le dușmanența le Devlesche hai va chosela cu sea le nasulen co Armaghedono. (Rev. 16:14, 16; 19:11-16) Țâra timposa pala codoia, vo va șiudela le Satanos „ando abiso”, cai va avela phandado hai ci va daștila te cherel chanci. (Rev. 20:1-3) Ande pesco Raimos de Iech Mia Bărș, o Isus va anela pale i pacea pi phuv hai va ajutila le manușen te arăsăn perfecți. Vo va uștiavela le mulen hai va cherela i phuv iech paradiso. Ji la urmă, i voia le Iehovaschi va pherela-pe! (Rev. 21:1-4)

16. Sar va avela i viața pala o Raimos de Iech Mia Bărș?

¹⁶ Sar va avela i viața pala o Raimos de Iech Mia Bărș? O păcato hai i imperfecțiunea ci va mai avena. Le manușa ci va mai trebuna te manghen penghe iertarea prin i jertfa le Isusoschi. Le manușen ci va mai avela-len nevoia codolendar machle sau le Isusostar caște daștin te avel-len iech amalimos le Iehovasa. Hai „o ultimo dușmano [o merimos adamico] va avela choslo cu sea”. Le mormintea va avena nanghe anda codoia că le mule va avena uștiade parpale viațate. Sea le manușa pa i phuv va avena perfecți. (1 Cor. 15:25, 26)

17, 18. a) So va întâmplola-pe pala o Raimos de Iech Mia Bărș? b) So va cherela o Isus cana va avela o timpo te phandavel pesco raimos? (1 Corinteni 15:24, 28) (Dich vi i imaginea.)

¹⁷ So va mai avela pala o Raimos de Iech Mia Bărș? Ande codoi vremea, va întâmplola-pe vareso zurales specialo: savore va jianena că o Iehova si sfânto hai orta. Sostar? Si ciaces că, andi bar le Edenoschi, o Satan phendea că o Iehova si iech hohamno hai că ci rail iubireasa opral le manușa. Tha, de cana o Satan phedea cado hohaimos, le manușa le Iehovasche ujiarde butivar Lesco anav. Hai, ji cana va terminila-pe o Raimos de Iech Mia Bărș, Lesco anav va avela ujiardo cu sea. Hai vo va sicavela ciaces că si iech Dad pherdo iubirea.

¹⁸ Atunci, savore va jianena mișto că so phendea o Satan sas numai hohaimata. So va cherela o Isus cana va phandavela pesco Raimos de Iech Mia bărș? Va lela-pe pala o Satan hai va vazdela-pe contra le Iehovasche? Jianas ciaces că na! (Citisar 1 Corinteni 15:24, 28.) Vo va dela le Iehovasche o Regato hai va slujila lesche mai dur tela lesco raimos. O Isus ci va cherela sar o Satan, tha vo silo gata te mechel oriso anda codoia că iubil pesche Dades.

19. So însemnol anda o Isus o anav le Iehovasco?

¹⁹ Ci sam uimime că o Iehova sas-lo gata te del pesco anav le Isusosche. O Isus sicadea că sas iech reprezentanto perfecto anda pesco Dad. Cadea că, so însemnol cado anav anda o Isus? O anav le Iehovasco si sea anda leste. O Isus sas-lo gata te merel anda cado anav hai va avela gata te del seal buchia parpale le Iehovasche pala o Raimos de Iech Mia Bărș. Sar daisaras te las amen pala o Isus? Va avela te dichas cadai buchi ando articolo cai avel.