Chakurutu cha Pakampwil!
“Mwiwonsu mwom ni ukwitiyila am kakez kafap.”—YOHAN 11:26.
CHISU chikusangulau tunan twa antu, kakez kuyichirishinap ku mwom pa divu didia lakilak. (Midimu 24:15) Akez kayilangwishin mwi nsulangen wa ufun ni akez kuman anch kushakam mutapu umwing uwamp, maswin, ni yakudia yivud ayirijekidin kal awiy. Nnany ukusala yirijek yiney yawonsu? Chidi patok anch antu akwikaliku aom mu mangand masu kurutu disanguk dia pa divu disambisha. Ov adi annany?
2 Kushiken kwa uprofet wa Baibel kumekeshin anch tushich mu “machuku ma kwisudiel” ma ditenchik dia yom dined.a (2 Timoteu 3:1) Katat kamu ak, Yehova Nzamb ukutandjek chikas chend mu milong ya ukamuntu ni kudiosh uyimp pa divu. (Kuseng 37:10, 11; Jinswir 2:21, 22) Pa muten winiwa, yik yikeza kushiken amusadidila Yehova mu kushinshaman?
3 Yehova kakujiyishap atentamina pamwing ni ayimp. (Kuseng 145:20) Kand kal ezap kusal chom mud chinech, ni kakez kuchisalap pakudioshay uyimp wawonsu pa divu. (Tal Disambishil 18:22, 23, 26.) Mwawiy, buku wa nsudel wa Baibel wisambidil “chisak chipandikena kujimb, chakad kutwish kuchind kudi muntu, mupwidil michid yawonsu ni majuku mawonsu, antu a mangand mawonsu ni jindim jawonsu,” adiokil mu “mar makash.” (Kuburik 7:9-14) Inge, chisak chipandikena kujimb chikurezik ku mar makash kukujiyina mangand mayimp ma katat, ni kwandam mu mangand masu ma Nzamb. Mwinimwa, anaantu in kuziyil akutwish kwisakin sens kudimukin kupandikena kuwap kwa Nzamb chakwel kukol anaantu ku chitil ni rufu. (Kuburik 22:1, 2) Chawiy lel, “chisak chipandikena kujimb” chikuswiridinap kufa ap pakemp. Ruchingej ra pakampwil mud ik!
4 Ov tukutwish kuchingejin ruchingej riner rishimokishina? Chakin kamu! Yesu Kristu amwinend walejana anch kukwikal chisu chikezau antu kushakam pakad kufa. Kurutu kamu kwa kumusangul murund nend Lazaras, Yesu wamuleja Mata anch: “Mwiwonsu mwom ni ukwitiyija am kakez kafap.”—Yohan 11:26.
Niyey Ukutwish Kushakam Chikupu
5 Ov usotin kushakam chikupu mu Paradis pa divu? Ov uswiridin kuman kand akatish ney? Chawiy lel ufanyidin kwilej ronganyin salal ra rusot ni jintong ja Nzamb. Mu dilembil kud Nzamb, Yesu walonda anch: “Kwinoku kurumburikin mwom wa chikupu, kwandjikang kwau ronganyin ra ey, Nzamb umwing wakin, ni ra ndiy watuma, Yesu Kristu.”—Yohan 17:3, NW.
6 Ridi rusot ra Nzamb anch “antu a mitapu yawonsu ayipandisha ni eza ku ronganyin salal ra uyakin.” (1 Timoteu 2:3, 4, NW) Udi katat muten wa kwilej mutapu, ey, pamwing ni tunan twa antu akwau asadiling kal rusot ra Nzamb, ukutwishany kushakam chikupu mu Paradis pa divu. Atuman’a Yehova akusangar kukukwash kwilej yivud piur pa Nzamb ni yitinay ndiy. Ov ukutwishap kumanijan nau ku Chot cha Want chidia piswimp ney ap kufund mu kusadilang adres wa piswimp udia pa paj ulondwila?
[Footnotes]
a Tal La connaissance qui mène à la vie éternelle, mapaj 98-107, upalangeshinau kud Watch Tower Bible and Tract Society of Pennsylvania.
[Questions]
1. Tunan twa antu afila akez kuyisangwil mwi nsulangen wa mutapu ik?
2-4. Chakurutu ik cha pakampwil chiyichingedila adia aom mu “machuku ma kwisudiel”?
5, 6. Anch usotil kushakam chikupu mu Paradis pa divu, chom ik ufanyidina kusal?
[Caption on page 31]
“Chisak chipandikena kujimb” chiswiridinap kufa ap pakemp