Uyakin Piur pa Milong ya Mupim
“Ni yen ukez kijikany uyakin, ni uyakin ukez kanikolany.”—YOHAN 8:32.
YITIYIJ piur pa rufu ni mwom wa kwinyim kwa rufu yibudikidin nakash nakash ku relijon ni yaku ya chinshakuru ya muntu. Mud mutwamananga, yidiokil ku kwitiyik kwa kwel anch mupim ukat kushiken rutong rau ra nsudel ching kusu kwinyim kwa kuvadiok tupamp tuvud ni djat ku kwel anch mwom wa katat wa muntu wawiy ukata kujingunish dishiken diend dia nsudel. Chawiy lel, kampand ukutwish kuchingejin kubombaken kwa nsudel nend udingaku wa nsudel pakufay, mukwau ukutwish kuchingejin kushiken ku Nirvana, ap kand mukwau kuchingejin kutambul masamun ma mwiur. Chad lel, wisu udia uyakin? Mulong yitiyij yetu yikweting usu piur pa ngikadil wetu, yisalijok yetu, ni mbil yitukata kukwat, ov tuwapidilap kuman chakul ku chipul chinech?
2 Buku mukuru nakash mu mangand, Baibel, ushimwin rusangu ra muntu kudiosh patangau mupim wa ukamuntu wa kusambish. Mafundish mend mashindamedinap mafilozofi ni yinshakuru ya chimuntu. Baibel ulondil patok uyakin piur pa mupim anch: Mupim wey yey kamu, afu kijap chom ap chimwing, adia mu chivurish cha Nzamb akez kuyisangul pa muten wend ufanyina. Ov kwijik chinech kurumburikin ik kud ey?
3 Yesu Kristu wayileja in kumulondul end anch: “Ni yen ukez kijikany uyakin, ni uyakin ukez kanikolany.” (Yohan 8:32) Mwaning, uyakin ukat kukolang. Pakwez uyakin piur pa mupim ukez kutukol ku chom ik?
Akodilau ku Wom ni Kuburen Ruchingej
4 Buku The World Book Encyclopedia ulondil anch “Antu avud akweting wom wa rufu ni apakishining kwipuk yitongijok piur pa rufu.” Ngang-a-chishimu umwing ulondil anch “Dizu kusu ‘rufu’ adinad diezin kwikal diakad kutwish kudijimbul Kurand.” Ni mu yinshakuru yimwing maujindj mud “kushadik” ni “kuya mukares” amasadidin nakash kulondil muntu ufila. Wom winou wa rufu uding chakin wom wa yom yakad kwijikan, mulong ku antu avud rufu ridi chilayilay. Ronganyin ra uyakin piur pa yikata kutushiken pitukufanga ridioshin wom winou.
5 Chilikej, chinshikin yitongijok ya Michaelyn ukweta mivu 15. Wayela musong wa kanser wa mash ni wafa rufu rimwing riyimp. Makwend Paula, uvurikin anch: “Michaelyn walonda anch kakutwishap kubang rufu mulong wading wij anch rufu ridi kusu ra chisu chikemp. Twisambina nakash piur pa mangand masu ma Nzamb ni awonsu akezau kasangwilamu. Michaelyn wadinga ni ritiy rikash mudiay Yehova Nzamb ni mu disanguk—wakad ap ntad.” Ruchingej ra disanguk ramukola changadim winou ku wom upandikena wa rufu.
6 Uyakin wayasina nchik anvaj a Michaelyn? Tatukwend Jeff ulondil anch: “Rufu ra mwanetu mband mukemp radinga chom chimwing chisansena kamu nakash chezap kal kutushiken. Pakwez twengamidin nakash kushilimu kwa Yehova kwa disanguk, ni tukat kutadil dichuku ditukeza kubwikat kand mukatish netu Michaelyn. Ukez kwikal uumwing mud ik!”
7 Mwaning, uyakin piur pa mupim kukat kumukol muntu ku kuburen ruchingej kukutwisha kulet rufu ra mukatish. Chakin, kwikil chom chikutwisha kudiosh kusansan ni runeng rujim rikatau kwov pafilinga mukatish. Pakwez, ruchingej ra disanguk ridutishin madil ni kupipesh kusansan.
8 Uyakin wa Mifund piur pa ngikadil wa afu utukodil kand ku wom wa afu. Kudiosh kwilejinau uyakin winou, avud adinga pasak alamatidina utuk wa afu kwovilap kand wom wa mashing, yipong, jinkau, ni misengu, ap kupesh yakupesh ya usey ukash chakwel kuyidutish angakau palemp eza kuyilankin. Chakin, mulong afu “kajinguninap chom ap chimwing,” yisalijok mud yiney yidi kwau yamwamu.—Ecclesiaste 9:5, NW.
9 Uyakin piur pa mupim udia mu Baibel, udi chakin ukodiling ni wa kashinsh. Pakwez shinshik kand ruchingej ra pakampwil rikulejinay Baibel anch rikushiken.
[Questions]
1. Mulong wak chidi cha usey kushinshikin yitiyij yetu piur pa mupim ni rufu?
2, 3. (a) Mulong wak tukutwisha kuchingejin yilondila Baibel piur pa mupim? (b) Mud mulondilau mu Baibel, wisu uyakin piur pa mupim?
4, 5. (a) Uyakin piur pa mupim ukat kupwish wom wak? (b) Ruchingej ra disanguk rakasikesha nchik changadim wa dikum dia mivu wadinga ni musong uletina rufu?
6, 7. Uyakin piur pa mupim ukat kutukol ku kuburen ruchingej ik? Fanikesh.
8, 9. Uyakin piur pa ngikadil wa afu utukodil ku wom wak?
[Caption on page 29]
Uyakin piur pa mupim ukukodil ey ku wom wa rufu, wom wa afu, kuburen ruchingej kwinyim kwa rufu ra mukatish